Macitidwe ya Atumwi 9:1-43
9 Koma Saulo epitilizhya kuyofya ophunzila ŵa Ambuye ndipo enzofunishisha kuŵapaya. Tetyo, eluta kuli mkulu wa ansembe
2 kuyosenga makalata yakuti alute nayo ku masunagoge a ku Damasiko. Ecita izi na colinga cakuti ankhale na cilolezo cakuyomanga munalume kapena munakazi aliyense wamene angapezeke kuti okonkha Njila iyi,* nowela naye ku Yerusalemu.
3 Peenze pa ulwendo uyu apo n’kuti wasala patontho kufwika ku Damasiko, mosayembekezeleka kuwala kofumila kululu kwemuzungulila.
4 Pavuli pake, epona pansi ndipo ecimvwa mau akuti: “Saulo, Saulo, ndaŵa yanji uninzunza?”
5 Saulo ekonsha kuti: “Ambuye, kansi nimwe ŵani?” Yove emuyankha kuti: “N’ne Yesu waunzunza.
6 Koma nyamuka uloŵe mu mzinda umu ndipo uuzhyiwe zaufunika kucita.”
7 Ŵanthu ŵeenze nao pa ulwendo uyu, epanama tyala nosoŵa colaŵila. Ove ecimvwa mau koma aliyoone elaŵila.
8 Pavuli pake, Saulo epanama. Koma olo kuti menso ŵake enze oseguka, enzoona lini ciliconse. Tetyo, emukata kwanja noloŵa naye mu mzinda wa Damasiko.
9 Kwa masiku atatu, Saulo enzololesha lini ndipo enzokulya lini olo kumwa ciliconse.
10 Ku Damasiko kwenze wophunzila muyakine wa zina yakuti Hananiya. Ambuye emuita m’mensomphenya kuti: “Hananiya!” Yove eyankha kuti: “N’neo Ambuye.”
11 Pavuli pake, Ambuye emuuzhya kuti: “Nyamuka ndipo ulute ku mseu woitiwa kuti Siteleti. Ukayofwika pa ng’anda ya Yudasi, ukakonshe za munthu wa zina yakuti Saulo wa ku Tariso. Yove opemphela
12 ndipo m’mensomphenya waona munthu wa zina yakuti Hananiya apo n’kuti wafwika nomukata pa mutu kuti ayambe soti kuona.”
13 Koma Hananiya eyankha kuti: “Ambuye, namvwa kufumila kuli ŵanthu anyinji zokhuza munthu uyu. Namvwa viipa vonse vecicitila atuŵa ŵanu ku Yerusalemu.
14 Ndipo lomba ansembe akulu amupasa mphamvu kuti amange ŵanthu onse oita pa zina yanu.”
15 Koma Ambuye emuuzhya kuti: “Nkhoya! Cifukwa munthu uyu ni ciya canasankha kuti auzhye ŵanthu a mitundu iyakine, mafumu koma soti Aisiraeli za zina yangu.
16 Cifukwa nimuoneshe bwino-bwino mavuto yonse yati akumane nayo cifukwa ca zina yangu.”
17 Tetyo, Hananiya eluta na kuyoloŵa m’ng’anda mwamene mula. Yove ekata Saulo pa mutu nolaŵila kuti: “Mkwangu Saulo, Ambuye Yesu amene eonekela kuli weo pewenzokuza kuno anituma. Anituma kuli weo kuti uyambe soti kuona koma soti kuti unkhale na mzimu utuŵa.”
18 Nthawi yamene iyo, tunthu tooneka monga ni mamba a nsomba twepona kufuma m’menso mwa Saulo ndipo eyamba soti kuona. Pavuli pake, enyamuka ndipo ebatizika.
19 Peecilya cakulya, enkhala na mphamvu.
Yove enkhala na ophunzila ku Damasiko kwa masiku oŵelengeka.
20 Ndipo nthawi yamene iyo, eyamba kulalikila zokhuza Yesu m’masunagoge kuti uyu ni Mwana wa Mulungu.
21 Koma ŵanthu onse amene emumvwa peenzolaŵila, edabwa ngako ndipo enzokamba kuti: “Kansi munthu uyu ni ula lini wamene enzonzunza ŵanthu a ku Yerusalemu amene oita pa zina iyi? Kansi kuno aliyowele kuti azekate ŵanthu noluta nao kuli ansembe akulu?”
22 Koma Saulo epitilizhya kunkhala na mphamvu zinyinji ndipo enzodabwisa Ayuda a ku Damasiko poŵafotokozela mfundo zomvwika bwino peenzoŵasimikizhyila kuti Yesu ni Khristu.
23 Pavuli pa masiku anyinji, Ayuda ekonza ciwembu cakuti amupaye.
24 Koma Saulo eziŵa za ciwembu ceenze ekonza. Ove enzoyembekezela mosamala pa mageti a mzinda uyu mzuŵa na usiku na colinga cakuti amupaye.
25 Tetyo, ophunzila ŵake emuika mu basiketi nomucosa kunja usiku kupitila pa cim’boo ca mpanda.
26 Pecifwika ku Yerusalemu, eyesayesa kuti akatizhyane na ophunzila. Koma onse enzomuyopa cifukwa enzokhulupilila lini kuti enkhala wophunzila.
27 Tetyo, Baranaba emuyavya noluta naye kuli atumwi. Yove eŵafotokozela bwino mwamene Saulo eonela Ambuye pa njila pecilaŵila naye, koma soti mwamene Saulo elaŵilila motang’a mtima m’zina ya Yesu ku Damasiko.
28 Pavuli pake, epitilizhya kunkhala nao noyenda momasuka mu Yerusalemu ndipo enzolaŵila motang’a mtima m’zina ya Ambuye.
29 Yove enzolaŵila koma soti kusushana na Ayuda amene enzolaŵila Cigiriki. Koma ove eyesa kupeza njila yakuti amupailemo.
30 Akwasu peciziŵa za nkhani iyi, eluta naye ku Kaisareya ndipo emutumizhya ku Tariso.
31 Pavuli pake, mpingo ku Yudeya konse, ku Galileya na ku Samariya weyamba kunkhala pa mtendele ndipo wenkhala wotang’a. Cifukwa cakuti ophunzila enzoyopa Yehova koma soti enzotang’ishiwa* na mzimu utuŵa, mpingo wepitilizhya kukula.
32 Petulo peenzoyenda m’cigao conse ici, efwika soti kuli atuŵa amene enzonkhala ku Luda.
33 Kwamene uku, epeza munalume muyakine wa zina yakuti Eneya wamene enzonkhala lele pa bedi yake kwa vyaka 8 cifukwa enze wozizila vizo.
34 Petulo emuuzhya kuti: “Eneya, Yesu Khristu okupolesha. Nyamuka ndipo ukonze pa bedi pako.” Nthawi yamene iyo, enyamuka.
35 Ŵanthu onse amene enzonkhala ku Luda na m’Cigwa ca Sharoni pecimuona, ekhulupilila Ambuye.
36 Ku Yopa kwenze wophunzila muyakine wa zina yakuti Tabita, zina yamene ikamasuliliwa yutanthauza kuti “Dorika.”* Tabita enzocita vinthu vinyinji vabwino ndipo enzopasa ŵanthu mphaso zacifundo zinyinji.
37 Koma m’masiku amene aŵa, yove elwala nomwalila. Tetyo, emusambika nomuika m’cipinda capalulu.
38 Pofwana kuti ku Luda kwenze kufupi na ku Yopa, ophunzila peecimvwa kuti Petulo ali mu mzinda uyu etuma ŵanthu aŵili kuti akamusenge kuti: “Tapapata, welani kuno kamangu.”
39 Petulo peecimvwa izi, enyamuka nolutila nao pamozi. Pecifwika, emusogolela noluta naye m’cipinda capalulu. Anakazi onse amasiye, eluta kuli yove apo n’kuti olila, ndipo enzomuonesha vovwala vinyinji na mikhanjo yeenzosoka Dorika peenze nao.
40 Petulo euzhya ŵanthu onse kuti afume panja, ndipo egwada nopemphela. Pavuli pake, ecunguluka nololesha mtembo ula ndipo elaŵila kuti: “Tabita, uka!” Tabita elolesha ndipo peciona Petulo, euka nonkhala pansi.
41 Petulo emukata kwanja nomuyavya kuti apaname. Pavuli pake, eita atuŵa onse na anakazi amasiye ndipo emupeleka kuli ove apo n’kuti ali moyo.
42 Izi zeziŵika ku Yopa konse ndipo ŵanthu anyinji ekhulupilila Ambuye.
43 Petulo epitilizhya kunkhala ku Yopa kwa masiku oŵelengeka. Yove enzonkhala kuli munthu muyakine wamene enzopuka vikumba wa zina yakuti Simoni.
