Macitidwe ya Atumwi 5:1-42
5 Munthu muyakine wa zina yakuti Hananiya na mkazi wake Safira, egulisa munda wao.
2 Koma yove ecosapo ndalama ziyakine nofisa ndipo mkazi wake eziŵa zamene izi. Pavuli pake, etola ndalama zesalapo nozipeleka kuli atumwi.
3 Koma Petulo emuuzhya kuti: “Hananiya, ndaŵa yanji Satana wakutang’isha mtima kuti utalizhye wenye mzimu utuŵa nofisa ndalama ziyakine zawagulisila munda?
4 Munda uyu ukaliyougulisa, kansi wenze lini wako? Ndipo peweugulisa, kansi sembe ndalama zamene izo uliyocite nazo ciliconse caufuna? Lomba ndaŵa yanji weganiza zocita cinthu ici mu mtima mwako? Watalizhya wenye Mulungu osati ŵanthu.”
5 Hananiya peecimvwa izi, epona pansi na kufwa. Ndipo ŵanthu onse amene ecimvwa za nkhani iyi, ecita wowa ngako.
6 Pavuli pake, alumbwana ewela nomuvunga mu nyula ndipo emunyamula na kuyomuika m’manda.
7 Pavuli pa maawazi pafupifupi atatu, mkazi wake eloŵa koma enze aliyoziŵe vecitika.
8 Petulo emukonsha kuti: “Niuzhye, kansi ndalama zonse zamwapeza pamwagulisa munda wanu ni zamene izi?” Yove eyankha kuti: “Eee, ni zamene izi.”
9 Pavuli pake, Petulo emukonsha kuti: “Ndaŵa yanji mweo aŵili mwakatizhyana kuti muyese mzimu wa Yehova? Ona, ŵanthu amene enze aluta kuyoika mulume wako m’manda ali pa mlyango. Nawe akunyamule noluta nawe.”
10 Nthawi yamene iyo, Safira epona pansi pafupi na mendo ya Petulo na kufwa. Ndipo alumbwana ŵala peciloŵa, emupeza kuti wafwa kale. Tetyo, emunyamula noluta naye ndipo eciyomuika m’manda pafupi na mulume wake.
11 Pavuli pake, mpingo wonse koma soti ŵanthu amene ecimvwa nkhani iyi, ecita wowa ngako.
12 Kuyangizhyila apo, atumwi epitilizhya kucita vizindikilo koma soti vodabwisa vinyinji pakati pa ŵanthu. Ndipo okhulupilila onse enzosonkhana mu Lukolo ya Vipilala ya Solomo.
13 N’cendi kuti paliye aliyense wamene etang’a mtima nokatizhyana na ophunzila aŵa, koma ŵanthu enzoŵatamanda ngako.
14 Kuyangizhyila apo, okhulupilila Ambuye epitilizhya kuyangizhyilika. Analume na anakazi anyinji enkhala ophunzila.
15 Ŵanthu aŵa enzoleta olwala m’miseu noŵayoneka pa tumabedi tutontho-tutontho na pa mphasa kuti Petulo popita, cimvwilimvwili cake cifwike pali ayakine mwa ŵanthu aŵa olwala.
16 Ndipo ŵanthu anyinji ofumila m’mizinda yozungulila ya Yerusalemu enzoluta ku malo uku na ŵanthu olwala koma soti ŵanthu amene enzovutika na mizimu iipa. Ndipo onse enzopoleshewa.
17 Koma mkulu wa ansembe na ŵanthu onse ŵeenze nao, amene enze m’gulu ya ampatuko ya Asaduki, ecita nsanje ngako.
18 Tetyo, ove epanama nokata atumwi ndipo eŵaika m’jele.
19 Koma usiku, mngelo wa Yehova esegula viseko va jele iyi noŵacosa panja ndipo eŵauzhya kuti:
20 “Nkhoyani mukapaname m’kacisi ndipo mukapitilizhye kuuzhya ŵanthu zokhuza moyo wamene ukuza.”
21 Peecimvwa izi, ove eloŵa m’kacisi m’mamawa ngako noyamba kuphunzisa.
Mkulu wa ansembe na ŵanthu ŵeenze nao, esonkhanisha ŵanthu onse a m’Khoti ya Sanihedirini* koma soti akulu onse ŵa Aisiraeli. Pavuli pake, etuma akamalonda ku jele kuti akatole atumwi nowela nao kuli ove.
22 Koma akamalonda pecifwika, aliyoŵapezemo atumwi m’jele. Tetyo, ewelela na kuyoŵauzhya izi.
23 Ove elaŵila kuti: “Tapeza jele ni yokhoma koma soti yotetezewa bwino. Ndipo akamalonda ali peneme pa mlyango. Koma patasegula, tiliyopezemo aliyense.”
24 Woyanganila kacisi na ansembe akulu peecimvwa izi, esoŵa cocita cifukwa enzoziŵa lini kuti nkhani iyi isile tyani.
25 Koma kwewela munthu muyakine ndipo eŵauzhya kuti: “Onani, ŵanthu ŵala ŵemwenze mweika m’jele apanama m’kacisi ndipo ophunzisa ŵanthu.”
26 Pavuli pake, woyanganila kacisi uyu enyamuka pamozi na akamalonda ŵake kuyoŵatola. Koma aliyoŵatole mwaciwawa cifukwa enzoyopa kuti ŵanthu angaŵateme miyala.
27 Tetyo, ewela nao noŵapanamika mu holo ya Sanihedirini.* Ndipo mkulu wa ansembe eŵauzhya
28 kuti: “Tekulamulani mwamphamvu kuti osati mukaphunzise soti m’zina iyi. Koma mwazuzhya Yerusalemu na ciphunziso canu ndipo mwasimikizhya mtima kuti tinkhale na mlandu wa milopa ya munthu uyu.”
29 Petulo na atumwi ayakine eyankha kuti: “Tufunika kumvwila Mulungu monga wolamulila osati ŵanthu.
30 Mulungu wa makolo ŵasu eukisha Yesu wamene mwemupaya mwa kumupacika pa cimuti.
31 Ndipo Mulungu emuika palulu ku kwanja yake yamalendi monga Mtumiki Mkulu koma soti Mpulumusi. Ecita izi kuti Aisiraeli alape koma soti kuti macimo ŵao akhululukiwe.
32 Ndipo seo nase nise mboni za vinthu ivi monga ni mwaulili mzimu utuŵa, wamene Mulungu epasa ŵanthu amene omumvwila monga wolamulila.”
33 Peecimvwa izi, ove ekalipa ngako ndipo enzofuna kuŵapaya.
34 Koma Mfarisi muyakine wa zina yakuti Gamaliyeli epanama m’Khoti ya Sanihedirini.* Mfarisi uyu enze mphunzisi wa Cilamulo wamene enzolemekezewa ngako na ŵanthu onse. Yove elamula kuti ŵanthu aŵa aŵafumye panja kwakanthawi katontho.
35 Yove eŵauzhya kuti: “Mweo Aisiraeli, musamale na vamufuna kucita ŵanthu aŵa.
36 Mwacisanzo, m’masiku akuvuli, kwenze Tauda wamene enze echuka ngako ndipo ŵanthu pafupifupi 400 eloŵa m’gulu yake. Koma munthu uyu epaiwa ndipo ŵanthu onse amene enzomukonkha, emwazhyikana ndipo aliyopezekepo soti.
37 Pavuli pake, kwewela Yudasi wa ku Galileya m’masiku a kalembela. Ŵanthu anyinji eyamba kumukonkha. Koma naye ecifwa ndipo ŵanthu onse amene enzomukonkha emwazhyikana.
38 Tetyo, monga ni mwavilili vinthu apa, nukuuzhyani kuti osakangana nao ŵanthu aŵa. Asiyeni cifukwa ngati volinga vao kapena nchito yao yucokela kuli ŵanthu, ilute lini patali.
39 Koma ngati yufumila kwa Mulungu, mungakwanishe lini kuŵalesha. Ndipo mukapitilizhya, mupezeke kuti mukangana na Mulungu.”
40 Ove emvwila malangizo ŵake ndipo eita atumwi. Pavuli pake, eŵakwapula noŵalamula kuti aleke kulaŵila m’zina ya Yesu ndipo eŵamasula.
41 Tetyo, atumwi aŵa ecoka pamenso pa Khoti ya Sanihedirini* apo n’kuti ni osangalala cifukwa Mulungu eŵaona kuti enze oyenela kucitishiwa nsoni cifukwa ca zina ya Yesu.
42 Siku iliyonse, epitilizhya kuphunzisa mwakhama m’kacisi koma soti ku ng’anda na ng’anda. Ndipo enzolengeza uthenga wabwino wonena za Khristu Yesu.
