Macitidwe ya Atumwi 2:1-47
2 Onse enze esonkhana pamozi pa siku ya Cikondwelelo ca Pentekosite.
2 Mosayembekezeleka, kululu kwemvwika congo monga ni ca mphepo yamphamvu ndipo congo ici cezula m’ng’anda monse mweenze enkhala.
3 Pavuli pake, eona malilime yooneka monga ni mulilo ndipo egaŵikana nonkhala imozi-imozi pali aliyense.
4 Ndipo mzimu utuŵa weyamba kukata nchito pali ŵanthu onse aŵa cakuti eyamba kulaŵila vilaŵilo vosiyanasiyana monga ni mwamene mzimu uyu weŵacitishila kulaŵila.
5 Pa nthawi yamene iyi, Ayuda amene enzocokela m’mitundu yonse ya pa calo amene enzoyopa Mulungu, enzonkhala ku Yerusalemu.
6 Congo ici pecemvwika, gulu ikulu ya ŵanthu yesonkhana pamozi. Ove edabwa ngako cifukwa aliyense eŵamvwa apo n’kuti olaŵila m’cilaŵilo cake.
7 Izi zeŵadabwisa ngako cakuti eyamba kukonshana kuti: “Onani, kansi ŵanthu aŵa olaŵila ni a ku Galileya lini?
8 Lomba zakwanishika tyani kuti seo tonse tikoŵamvwa apo n’kuti olaŵila m’vilaŵilo vasu?
9 Pano pali Apati, Amedi na Aelamu. Pali soti ŵanthu ofumila ku Mesopotamiya, ku Yudeya, ku Kapadokiya, ku Ponto, ku cigao ca Asia,
10 ku Fulugiya, ku Pamfuliya, ku Iguputo na ku madela a Libiya amene ali pafupi na Kurene. Pali soti alwendo ocokela ku Roma amene ni Ayuda koma soti ŵanthu amene etembenukila ku Ciyuda.
11 Kuyangizhyila apo, pali Akerete na Aluya. Tonse tuŵamvwa pakulaŵila vinthu vikulu va Mulungu m’vilaŵilo vasu.”
12 Onse edabwa ngako nosoŵa cocita ndipo enzokonshana kuti: “Kansi izi zutanthauzanji?”
13 Koma ayakine enzoŵaseka nolaŵila kuti: “Akolwa na walwa wonzuna.”*
14 Koma Petulo epanama pamozi na atumwi 11 ŵala. Yove elaŵila mokuwa kuti: “Mweo ŵanthu a ku Yudeya na mweo monse a ku Yerusalemu, ziŵani izi ndipo mvwishilani mosamala zanufuna kukuuzhyani.
15 Mweo muganiza kuti ŵanthu aŵa akolwa, koma aliyokolwe cifukwa nthawi lomba ni 9 awazi.*
16 Koma izi niye zecilaŵila mneneli Yoweli kuti:
17 ‘Mulungu walaŵila kuti, “m’masiku osilizhya, nikapeleke mzimu wangu kuli camoyo ciliconse ndipo ŵana ŵanu analume na anakazi akalosele. Alumbwana akaone mensomphenya ndipo analume acikulile, akalote maloto.
18 Olo akapolo ŵangu analume na anakazi nikaŵapase mzimu wangu m’masiku amene ao ndipo akalosele.
19 Nikacite zodabwisa kululu koma soti vizindikilo pa calo. Pakankhale milopa, mulilo na cusi cinyinji.
20 Zuŵa ikasanduke mfinzi ndipo mwezi ukasanduke milopa. Izi zikacitike ikaliyofwika siku ikulu koma soti ya ulemelelo ya Yehova.
21 Ndipo aliyense wamene oita pa zina ya Yehova akapulumuke.”’
22 “Mweo analume a mu Isiraeli, mvwani mau aŵa: Yesu wa ku Nazareti ni munthu wamene Mulungu ekuoneshani patuŵa. Ecita izi kupitila mu nchito zamphamvu, vodabwisa koma soti vizindikilo vamene Mulungu ecita pakati panu kupitila muli yove, monga ni mwamuziŵila.
23 Mulungu enze eziŵilatu kuti Yesu akapelekewe. Tetyo cenze cifunilo cake. Mweo mwemukhomelela pa cimuti poseŵenzesha ŵanthu amene ni osamvwila malamulo ndipo mwemupaya.
24 Koma Mulungu emuukisha pomumasula ku voŵaŵa va imfwa,* cifukwa zenze zosakwanishika kuti imfwa imukate mwamphamvu.
25 Ponena za yove, Davide elaŵila kuti: ‘Nthawi zonse nuika Yehova pasogolo pangu cifukwa ali ku kwanja yangu yamalendi kuti nisanyezhyeke.
26 Cifukwa ca izi, mtima wangu wesangalala koma soti lilime yangu yekondwela ngako ndipo ninkhale na ciyembekezo,
27 cifukwa mukanisiye lini* m’Manda* ndipo mukalole lini kuti muŵili wa wokhulupilika wanu uwole.
28 Mwaniziŵisha njila za moyo ndipo mucitishe kuti nikosangalala ngako nikankhala pafupi na mweo.’*
29 “Mweo akwangu, nulaŵila namwe momasuka za kolo yasu Davide. Yove emwalila noikiwa m’manda, ndipo manda ŵake tili nao mpaka lelo.
30 Yove enze mneneli ndipo enzoziŵa kuti Mulungu emulonjeza mwa kulumbila, kuti pa mpando wake wacifumu akaikepo m’mozi mwa mbadwa zake.
31 Yove eziŵilatu za msogolo ndipo elaŵililatu za kuuka kwa Khristu kuti akasiiwe lini m’Manda,* koma soti kuti muŵili wake ukawole lini.
32 Mulungu eukisha Yesu uyu ndipo tonse nise mboni za nkhani iyi.
33 Yove eikiwa palulu nonkhala ku kwanja yamalendi ya Mulungu koma soti elandila mzimu utuŵa wecimulonjeza Ausuwake. Tetyo, yove watipasa mzimu utuŵa wamuona na kumvwa.
34 Cifukwa Davide aliyolute kululu koma yove elaŵila kuti, ‘Yehova euzhya Ambuye ŵangu kuti: “Nkhala ku kwanja yangu yamalendi
35 mpaka pati nikaike adani ŵako monga cokandapo mendo ŵako.”’
36 Tetyo, lekani kuti ng’anda yonse ya Isiraeli, iziŵe kuti Yesu uyu wamene mwemupaila pa cimuti, Mulungu emuika kunkhala Ambuye koma soti Khristu.”
37 Peecimvwa mau aŵa, evutika ngako mu mtima ndipo ekonsha Petulo na atumwi ayakine kuti: “Akwasu, ticitenji lomba?”
38 Petulo eŵayankha kuti: “Lapani ndipo aliyense wa mweo abatizike mu zina ya Yesu Khristu kuti macimo ŵake akhululukiwe. Mukacita izi, mulandile mphaso yamahala ya mzimu utuŵa.
39 Cifukwa lonjezo iyi yepelekewa kuli ŵanthu onse amene Yehova Mulungu wasu angaŵasankhe. Ŵanthu aŵa oyangizhyilapo mweo, ŵana ŵanu koma soti ŵanthu onse akutali.”
40 Ndipo na mau ayakine anyinji, Petulo ecitila umboni mokwanila. Kuyangizhyila apo, aliyoleke kuŵalimbikisha ndipo elaŵila kuti: “Zipulumuseni ku m’badwo uyu wamene uli na maganizo olakwika.”
41 Tetyo, ŵala amene evomelezhya mau ŵake mokondwela, ebatizika, cakuti pa siku yamene iyi, ciŵelengelo ca ophunzila ceyangizhyilika na ŵanthu pafupifupi 3,000.
42 Ove epitilizhya kukonkha veenzophunzisa atumwi, kutandala* nolyela pamozi koma soti kupemphela.
43 Ŵanthu onse eyamba kucita ngako wowa ndipo atumwi aŵa eyamba kucita vinthu vodabwisa koma soti vizindikilo vinyinji.
44 Onse amene enkhala okhulupilila enzonkhala pamozi ndipo enzoyaŵana vinthu vonse veenze navo.
45 Ove enzogulisa malo yao koma soti vinthu viyakine veenze navo ndipo ndalama zeenzopeza enzoyaŵila aliyense malinga ni zeenzofunikila.
46 Siku iliyonse, enzosonkhana m’kacisi mokatizhyana. Ove enzolyela pamozi cakulya mu mang’anda osiyanasiyana ndipo enzoyaŵana cakulya cao mosangalala ngako koma soti na mtima wonse.
47 Enzotamanda Mulungu ndipo enzokondewa na ŵanthu onse. Kuyangizhyila apo, siku iliyonse Yehova epitilizhya kuonjezela ŵanthu ŵeenzopulumusa.
Mau a m'nyansi
^ Kapena kuti, “waini wanyowani.”
^ Mau ŵake ŵeneŵene, “awa yacitatu.”
^ Mabaibo ayakine olaŵila kuti, “ku nthambo za imfwa.”
^ Kapena kuti, “mukasiye lini moyo wangu.”
^ Aya ni manda ya ŵanthu onse.
^ Kapena kuti, “nikankhala pamenso panu.”
^ Aya ni manda ya ŵanthu onse.
^ Kapena kuti, “kugaŵana vinthu.”
