Macitidwe ya Atumwi 28:1-31
28 Petepulumuka, niye peteuzhyiwa kuti cisumbu ici cuitiwa kuti Melita.
2 Ŵanthu olaŵila cilaŵilo ciyakine* etionesha kuwama mtima kwapadela. Ove etikozhyela mulilo notilandila bwino tonse cifukwa kwenze mvula koma soti kwenze kozizila.
3 Koma Paulo pecitola nkhuni noziponya pa mulilo, pecoka njoka ya cipili cifukwa ca kupya. Ndipo yemuluma nomukangamila ku kwanja.
4 Ŵanthu olaŵila cilaŵilo ciyakine peciona kuti njoka ya poizoni yulelembela ku kwanja yake, eyamba kuuzhyana kuti: “Munthu uyu ni wopaya ŵanthu cendi ndipo olo kuti wapulumuka pa nyanja, Cilungamo* ciliyolole kuti apitilizhye kunkhala na moyo.”
5 Koma yove ekunkhumulila njoka ila pa mulilo ndipo aliyoumvwe ululu.
6 Ove enzoyembekezela kuti avimbe kapena kupona mosayembekezeleka na kufwa. Koma peciyembekezela kwa nthawi itali noona kuti paliye cumucitikila, ecinja maganizo noyamba kulaŵila kuti yove ni mulungu.
7 Pafupi na malo aŵa, penze minda ya munthu muyakine wa zina yakuti Papuliyo wamene enzoyanganila cisumbu ici. Yove etilandila bwino ngako ndipo etisamalila kwa masiku atatu.
8 Koma ausuwake a Papuliyo enze yone cifukwa enzolwala maleliya* koma soti kamulopa. Tetyo, Paulo eloŵa mweenze ove nopemphela. Pavuli pake, eŵakata pa mutu noŵapolesha.
9 Pavuli pa izi, ŵanthu ayakine onse amene enzolwala pa cisumbu ici, eyamba kuluta kuli yove ndipo eŵapolesha.
10 Ove etilemekeza mwa kutipasa mphaso zinyinji. Ndipo petenzonyamuka ulwendo wasu, etipasa vinthu vinyinji vetenzofunikila.
11 Pavuli pa miyezi itatu, tenyamuka na boti yamene yenze na cizindikilo ca “Ŵana a Zeu.” Boti iyi yenze ya ku Alekizandiriya ndipo yepanama pa cisumbu ici poyembekezela kuti nthawi ya mphepo isile.
12 Pavuli pake, tefwika pa malo payopanama maboti ku Surakusa ndipo tenkhalapo masiku atatu.
13 Petecoka kwamene uku, teyenda mpaka kuyofwika ku Regio. Pavuli pa siku imozi, kweyamba kuchaya mphepo ya kum’mwela ndipo teciyofwika ku Potiyolo pa siku yaciŵili.
14 Kwamene uku, tepeza akwasu ndipo etisenga kuti tinkhale nao kwa masiku 7. Pavuli pake, tepitilizhya ulwendo wasu wakuya ku Roma.
15 Akwasu a kwamene uku peecimvwa za seo, eyenda mpaka kuyofwika ku maketi ya Apiyo na ku Ng’anda Zitatu za Alwendo kuzokumana nase. Paulo peciŵaona, eyamikila Mulungu ndipo etang’a mtima.
16 Petefwika ku Roma, Paulo elolewa kuti akonkhala yeka na msoja womulonda.
17 Pavuli pa masiku atatu, Paulo eitanisha akulu-akulu ŵa Ayuda. Pecisonkhana pamozi, yove eŵauzhya kuti: “Mweo analume, akwangu, olo kuti niliyocite ciliconse cosushana na ŵanthu kapena miyambo ya makolo ŵasu akale, nepelekewa m’manja mwa Aroma monga mkaidi kufumila ku Yerusalemu.
18 Ndipo pecifufuza, enzofuna kunimasula cifukwa aliyonipeze na mlandu wonipaila.
19 Koma Ayuda pecikana, nekakamizhyika kucita apilu kwa Kaisara. Koma osati cifukwa cakuti nenzofuna kuzopasa mlandu mtundu wangu.
20 Niye cifukwa cake nesenga kuti nizeonane namwe nolaŵila namwe, cifukwa namangiwa macheni aŵa cifukwa ca ciyembekezo caali naco Aisiraeli.”
21 Ove emuyankha kuti: “Seo tiliyolandile makalata alionse ofumila ku Yudeya okamba zokhuza weo. Ndipo paliye aliyense mwa akwasu wamene etiuzhya olo kukamba ciliconse ciipa cokhuza weo.
22 Koma tuona kuti zili bwino kuti timvwe maganizo ŵako cifukwa kulaŵila cendi, seo tuziŵa kuti gulu iyi yampatuko oilaŵilila viipa kulikonse.”
23 Tetyo, ove ekonza siku yakuti akumane naye ndipo ewela anyinji kweenzonkhala. Ndipo kuyambila m’mawa mpaka m’cingulo, eŵafotokozela nkhani yonse nocitila umboni mokwanila za Ufumu wa Mulungu. Eŵalimbikisha kukhulupilila Yesu poseŵenzesha mfundo zofumila m’Cilamulo ca Mose na zecilemba aneneli.
24 Ayakine eyamba kukhulupilila vinthu vecilaŵila koma ayakine aliyokhulupilile.
25 Tetyo, cifukwa cakuti ekangana, ove eyamba kucoka. Ndipo Paulo elaŵila kuti:
“Mzimu utuŵa welaŵila cendi kuli makolo ŵanu kupitila muli mneneli Yesaya.
26 Welaŵila kuti, ‘Nkhoya ukauzhye ŵanthu aŵa kuti: “Mukamvwe zulaŵilika koma mukazindikile lini tanthauzo yake ndipo mukaloleshe koma mukaone lini ciliconse.
27 Cifukwa ŵanthu aŵa ayumisha mitima yao, ndipo amvwa na matu yao koma ocitapo lini kanthu. Avala menso yao kuti asaone novala matu yao kuti asamvwe ciliconse olo kuzindikila tanthauzo yake m’mitima yao na colinga cakuti awelele kuli neo kuti niŵapoleshe.”’
28 Tetyo, ziŵani kuti njila ya Mulungu yopulumusila ŵanthu, yatumizhyiwa kuli ŵanthu a mitundu iyakine. Ndipo mosakaikila, ove amvwishile.”
29 ——
30 Paulo epitilizhya kunkhala kwamene uku kwa vyaka viŵili m’ng’anda yeenzocita lendi. Ndipo ŵanthu onse amene enzoluta kuyomuona, enzoŵalandila bwino.
31 Enzoŵalalikila za Ufumu wa Mulungu na kuŵaphunzisa za Ambuye Yesu Khristu apo n’kuti ali na ufulu wonse wolaŵila* paliye comulesha.
