Macitidwe ya Atumwi 6:1-15
6 M’masiku amene ao, ophunzila peenzopitilizhya kuyangizhyilika, Ayuda amene enzolaŵila Cigiriki eyamba kudandaula cifukwa ca Ayuda amene enzolaŵila Ciheberi. Enzodandaula cifukwa anakazi amasiye Acigiriki enzonyalanyaziwa pa nkhani yogaŵa cakulya ca siku iliyonse.
2 Tetyo, atumwi 12 eita gulu ya ophunzila nolaŵila kuti: “Pali lini bwino kuti tileke nchito yophunzisa Mau a Mulungu noyamba kugaŵa cakulya.
3 Lomba akwasu, sankhani analume 7 pakati panu amene ali na mbili yabwino, mzimu koma soti nzelu kuti tiŵapase udindo uyu woyanganila nchito iyi yofunika.
4 Koma seo tizipeleke pa nkhani yopemphela koma soti kuphunzisa Mau a Mulungu.”
5 Ŵanthu onse esangalala ngako na zecilaŵila ndipo esankha Sitefano, munthu wamene enze na cikhulupililo cotang’a koma soti wamene enze na mzimu utuŵa. Esankha soti Filipo, Purokoro, Nikanora, Timoni, Paremena na Nikolao wa ku Antiokeya wamene etembenukila ku Ciyuda.
6 Pavuli pake, eŵatwala kuli atumwi ndipo pavuli popemphela, atumwi aŵa eŵakata pa mutu poonesha kuti aŵapasa udindo.
7 Izi pezecitika, Mau a Mulungu epitilizhya kulalikiliwa m’madela osiyanasiyana. Ciŵelengelo ca ophunzila cepitilizhya kuyangizhyilika ngako mu Yerusalemu. Ndipo ansembe anyinji enkhala okhulupilila.
8 Sitefano enze na mphamvu ndipo enzocitoonekelatu kuti Mulungu enze naye. Yove enzocita vinthu vodabwisa koma soti vizindikilo vikulu pakati pa ŵanthu.
9 Koma ŵanthu ayakine a m’gulu yoitiwa kuti Sunagoge wa Omasuliwa, ewela pamozi na ŵanthu a ku Kurene, a ku Alekizandiriya, a ku Kilikiya koma soti a ku Asia kuzosushana na Sitefano.
10 Koma ove aliyokwanishe kulimbana na nzelu zake koma soti mzimu utuŵa wamene wenzomusogolela kulaŵila.
11 Tetyo, enyengelela analume ayakine mwacisinsi kuti alaŵile kuti: “Tamumvwa uyu olaŵila vinthu vonyoza Mose na Mulungu.”
12 Izi zekalipisha ngako akulu, alembi na ŵanthu ayakine. Pavuli pake, ove ewela mosayembekezeleka nomukata ndipo eluta naye ku Khoti ya Sanihedirini.*
13 Ove eleta mboni zawenye ndipo mboni izi zelaŵila kuti: “Munthu uyu onkhalila tyala kulaŵila mau onyoza malo aŵa atuŵa koma soti Cilamulo.
14 Mwacisanzo, seo tamumvwa apo n’kuti olaŵila kuti Yesu ula wa ku Nazareti akaononge malo aŵa atuŵa nocinja miyambo yecitipasa Mose.”
15 Ŵanthu onse amene enze m’Khoti ya Sanihedirini* pecimuloleshesha Sitefano, eona kuti cinso cake cenzooneka monga ni ca mngelo.
