Macitidwe ya Atumwi 8:1-40
8 Saulo evomelezhya kuti Sitefano apaiwe.
Pa siku yamene iyo, mpingo wamene wenze ku Yerusalemu weyamba kunzunziwa ngako. Tetyo, ophunzila onse emwazhyikana kuluta m’vigao va Yudeya na Samariya kucoselako tyala atumwi.
2 Koma ŵanthu amene enzoyopa Mulungu, etola Sitefano na kuyomuika m’manda ndipo emulila ngako.
3 Saulo eyamba kunzunza mpingo mwankhanza. Yove enzoloŵa m’ng’anda iliyonse nodonsela panja analume na anakazi ndipo enzoŵatwala ku jele.
4 Olo n’tetyo, ŵanthu ŵala amene emwazhyikana, enzolalikila uthenga wabwino wa mau a Mulungu m’madela mweciluta.
5 Filipo eluta mu mzinda wa Samariya noyamba kulalikila ŵanthu a kwamene uko zokhuza Khristu.
6 Ŵanthu anyinji enzomvwishila zeenzolaŵila Filipo. Onse enzomvwishila noona vizindikilo veenzocita.
7 Ŵanthu anyinji a ku malo uku, enze na mizimu iipa ndipo mizimu iyi yenzokuwa nofuma. Kuyangizhyila apo, ŵanthu anyinji amene enze ozizila vizo koma soti olemala, enzopoleshewa.
8 Tetyo, ŵanthu a mu mzinda uyu esangalala ngako.
9 Mu mzinda uyu, mwenze soti munthu muyakine wa zina yakuti Simoni. Izi zikaliyocitika, yove enzocita zamasenga nodabwisa ngako ŵanthu onse a ku Samariya ndipo enzolikuzhya nolaŵila kuti enze wamphamvu.
10 Ŵanthu onse, ŵana na akulu, enzocita naye cidwi ndipo enzolaŵila kuti: “Munthu uyu ali na mphamvu ikulu yofumila kwa Mulungu.”
11 Tetyo, ove enzocita naye cidwi cifukwa enze eŵadabwisa kwa nthawi itali na zamasenga zake.
12 Ŵanthu aŵa pecikhulupilila Filipo wamene enzolengeza uthenga wabwino wa Ufumu wa Mulungu koma soti wonena za zina ya Yesu Khristu, enzobatizika, analume na anakazi.
13 Naye Simoni enkhala wokhulupilila. Pecibatizika, enzokonkha Filipo kulikonse. Yove enzodabwa kuona vizindikilo koma soti nchito zikulu na zamphamvu zamene zenzocitika.
14 Atumwi ku Yerusalemu peecimvwa kuti ŵanthu a ku Samariya alandila mau a Mulungu, eŵatumizhyila Petulo na Yohane.
15 Ove eluta kwamene uko ndipo eŵapemphelela kuti alandile mzimu utuŵa.
16 Cifukwa pa nthawi iyi, onse enze akaliyolandila mzimu utuŵa koma enze ebatizika tyala m’zina ya Ambuye Yesu.
17 Tetyo, atumwi aŵa eyamba kukata ŵanthu aŵa pa mutu ndipo elandila mzimu utuŵa.
18 Simoni peciona kuti ŵanthu olandila mzimu utuŵa atumwi akaŵakata, efuna kuŵapasa ndalama.
19 Yove elaŵila kuti: “Nane nipasenkoni mphamvu zamene izo kuti aliyense waningakate, akolandila mzimu utuŵa.”
20 Koma Petulo emuuzhya kuti: “Uonongekele pamozi na siliva wako cifukwa uganiza kuti mphaso yamahala ya Mulungu ungaigule na ndalama.
21 Nchito iyi yukukhuza lini ndipo uliye mbali iliyonse cifukwa Mulungu oona kuti mtima wako uliye cilungamo.
22 Tetyo, lapa vinthu ivi viipa vawacita ndipo usenge Yehova mopapatila kuti ngati n’zokwanishika, akukhululukile cifukwa ca maganizo aipa ali mu mtima mwako.
23 Cifukwa naona kuti niwe poizoni yoŵaŵa* koma soti kapolo wa vinthu vosalungama.”
24 Simoni eyankha kuti: “Nipempheleleni kwa Yehova mopapatila kuti vinthu vamwalaŵila visanicitikile.”
25 Tetyo, pecisilizhya kucitila umboni mokwanila koma soti kulaŵila mau a Yehova, ewelela ku Yerusalemu. Peenzowelela, enzolengeza uthenga wabwino m’minzi inyinji ya ku Samariya.
26 Koma mngelo wa Yehova elaŵila na Filipo kuti: “Nyamuka ndipo ulute kum’mwela, ku mseu wofumila ku Yerusalemu kuluta ku Gaza.” (Uyu ni mseu wa m’cipululu.)
27 Tetyo, enyamuka noluta ndipo ekumana na nduna ya ku Itiyopiya. Munthu uyu enze na udindo ukulu ndipo enzoyavya Kandake, mfumukazi ya Itiyopiya. Enzoyanganila soti cuma conse ca mfumukazi iyi. Yove enze eluta ku Yerusalemu kuyolambila Mulungu.
28 Pa nthawi iyi, munthu uyu enze pa ulwendo wowelela kwao ndipo enze enkhala m’galeta yake apo n’kuti oŵelenga mokuwa ulosi wa mneneli Yesaya.
29 Pavuli pake, mzimu weuzhya Filipo kuti: “Nkhoya pafupi na galeta iyi.”
30 Filipo enzoutuka m’mbali mwa galeta iyi ndipo emumvwa oŵelenga mokuwa ulosi wa mneneli Yesaya. Pavuli pake, emukonsha kuti: “Kansi mumvwisha vamuŵelenga?”
31 Yove eyankha kuti: “Ningamvwishe tyani paliye wonimasulila?” Tetyo, esenga Filipo kuti akwele nonkhala naye m’galeta umu.
32 Mau ya m’Malemba yeenzoŵelenga yenze yakuti: “Monga mbelele, emutwala ku malo kwecimupaila. Ndipo molingana na mwana wa mbelele wamene onkhala tyala celele ngati ofuna kumugela usako, yove aliyosegule pakamwa pake.
33 Peenzomucitila vinthu vomucitisha nsoni, aliyomucitile cilungamo. Ni ŵani angafotokoze bwino m’badwo wa makolo ŵake? Cifukwa moyo wake wacosewapo pa calo.”
34 Tetyo nduna ila yekonsha Filipo kuti: “Napapata niuzhyeni, kansi mneneli uyu olaŵila za ŵani? Kansi olaŵila za yove kapena za munthu muyakine?”
35 Filipo eyamba kulaŵila, ndipo eyambila pa lemba yamene iyi kumuuzhya uthenga wabwino wonena za Yesu.
36 Pecipitilizhya kuyenda mu mseu uyu, epeza manzi anyinji. Ndipo nduna ila yelaŵila kuti: “Onani, aya manzi. N’cinji cunikangisha kubatizika?”
37 ——
38 Pavuli pa izi, elamula kuti Galeta ipaname. Ndipo Filipo na nduna ila, eseluka noloŵa m’manzi. Pavuli pake, Filipo ebatiza nduna ila.
39 Pecifuma m’manzi umu, mzimu wa Yehova wemucosapo Filipo kamangu ndipo nduna ila iliyomuone soti, koma yepitilizhya ulwendo wake apo n’kuti ni yosangalala ngako.
40 Koma Filipo ezipeza kuti ali ku Asidodi ndipo eyamba kulengeza uthenga wabwino m’mizinda yonse ya m’dela iyi mpaka efwika ku Kaisareya.
Mau a m'nyansi
^ Mau ŵake ŵeneŵene, “ndulu yoŵaŵa.”
