Macitidwe ya Atumwi 13:1-52
13 Mu mpingo wa ku Antiokeya mwenze aneneli na aphunzisi aŵa: Baranaba, Sumiyoni woitiwa kuti Nigeri, Lukiyo wa ku Kurene, Saulo koma soti Manayeni wamene enzophunzila pamozi na Herode, wolamulila cigao.
2 Ove peenzotumikila Yehova koma soti kuleka kulya kwakanthawi, mzimu utuŵa weŵauzhya kuti: “Muniikile Baranaba na Saulo pa mbali kuti akate nchito yeneŵaitila.”
3 Peyesila nthawi yoleka kulya kwakanthawi nopemphela, eŵakata pa mutu noŵalola kuti alute.
4 Tetyo, analume aŵa amene etumiwa na mzimu utuŵa, eluta ku Selukeya ndipo pocoka uku eyenda ulwendo wa pa manzi kuluta ku Kupuro.
5 Pecifwika ku Salami, eyamba kulalikila mau a Mulungu m’masunagoge ŵa Ayuda. Ove enze soti na Yohane wamene enzoŵatumikila.*
6 Ove eyenda pa cisumbu conse ca Kupuro mpaka kuyofwika ku Pafo. Kwamene uku, ekumana na Myuda muyakine wa zina yakuti Bara-Yesu, wamene enzocita zamasenga koma soti enze mneneli wawenye.
7 Yove enze pamozi na bwanamkubwa Serigio Paulo, wamene enze munthu wanzelu. Bwanamkubwa uyu eita Baranaba na Saulo cifukwa enzofunishisha kumvwa mau a Mulungu.
8 Koma Elima, wamene enze wamasenga, (cifukwa niye mwakuimasulilila zina yake) eyamba kusushana nao. Yove enzofuna kuti bwanamkubwa uyu asakhulupilile Ambuye.
9 Koma Saulo, woitiwa soti kuti Paulo, pecinkhala na mzimu utuŵa, emuloleshesha
10 nolaŵila kuti: “Weo munthu wozula na cinyengo ca mtundu ulionse koma soti viipa, mwana wa Maleŵania koma soti mdani wa cinthu ciliconse colungama, kansi ni lini pati ukaleke kubendesha njila zoyenela za Yehova?
11 Lomba mvwaya! Kwanja ya Yehova ili pali weo ndipo unkhale mphofu. Kwakanthawi, ukokwanisha lini kuona kuwala kwa zuŵa.” Nthawi yamene iyo, eyamba kuona fulele yamphamvu koma soti mfinzi, ndipo eyamba kusakila ŵanthu kuti amukate kwanja nomusogolela.
12 Bwanamkubwa peciona izi, enkhala wokhulupilila, cifukwa edabwa ngako na zeciphunzila zokhuza Yehova.
13 Pavuli pake, Paulo na ayake, eyamba ulwendo wao wa pa nyanja kucoka ku Pafo ndipo eciyofwika ku Pega ku Pamfuliya. Koma Yohane eŵasiya nowelela ku Yerusalemu.
14 Olo n’tetyo, pecifuma ku Pega efwika ku Antiokeya wa ku Pisidiya. Kwamene uko, eloŵa m’sunagoge pa siku ya Sabata nonkhala pansi.
15 Pecisilizhya kuŵelenga Cilamulo na zolemba za aneneli pamenso pa ŵanthu, asogoleli a sunagoge etuma munthu kuti akaŵauzhye kuti: “Akwasu, ngati muli na mau alionse amene angalimbikishe ŵanthu aŵa, yakambeni.”
16 Tetyo, Paulo epanama ndipo eimya kwanja yake nolaŵila kuti:
“Mweo ŵanthu, Aisiraeli na mweo ayakine onse amene muyopa Mulungu, mvwani.
17 Mulungu wa ŵanthu aŵa Aisiraeli, esankha makolo ŵasu akale. Ove peenzonkhala m’calo cacilwendo ku Iguputo, yove eŵasandusha mtundu wamphamvu, ndipo eŵafumya m’calo ici na kwanja yake yamphamvu.
18 Yove epilila nkhalidwe yao m’cipululu kwa vyaka pafupifupi 40.
19 Pavuli poononga mitundu 7 ya ŵanthu m’calo ca Kanani, yove epeleka calo ici kuli Aisiraeli kuti cinkhale coloŵa cao.
20 Vinthu vonse ivi vecitika m’vyaka pafupifupi 450.
“Pavuli pa izi, eŵapasa oweluza mpaka m’nthawi ya mneneli Samueli.
21 Koma pavuli pake, ŵanthu aŵa ekamba kuti ofuna mfumu. Ndipo Mulungu eŵapasa Sauli mwana wa Kisi, wamene enze munthu wa fuko ya Benjamini. Yove enkhala mfumu yao kwa vyaka 40.
22 Pecicosa Sauli pa ufumu, eŵapasa Davide kuti ankhale mfumu yao. Mulungu emucitila umboni kuti, ‘Napeza Davide mwana wa Jese, munthu wa pa mtima pangu. Yove akacite zonse zanufuna.’
23 Mokatizhyana na lonjezo yake, Mulungu waleta mpulumusi mu Isiraeli, wamene ni Yesu kufumila pa mbadwa* za munthu uyu.
24 Mpulumusi uyu akaliyofwika, Yohane elalikila kuli ŵanthu onse a mu Isiraeli zokhuza ubatizo, monga cizindikilo ca kulapa.
25 Koma Yohane peenzosilizhya utumiki wake, enzolaŵila kuti, ‘Kansi muganiza kuti n’ne ŵani? Neo n’ne lini wamuganizila. Koma muyakine akuza pavuli pangu, wamene neo n’ne wosayenelela kumasula nthambo za masanda* ŵake.’
26 “Mweo ŵanthu, akwangu, mbadwa za Abulahamu koma soti ŵanthu onse amene oyopa Mulungu ali pakati panu, mau acipulumuso ici atumizhyiwa kuli seo.
27 Cifukwa ŵanthu a ku Yerusalemu na olamulila ŵao aliyomuzindikile. Koma pecimuweluza, ekwanilisha zecilaŵila aneneli, zamene zuŵelengewa mokuwa pa Sabata paliponse.
28 Olo kuti aliyomupeze na cifukwa cakuti amupaile, ekakamizhya Pilato kuti munthu uyu apaiwe.
29 Ndipo pecikwanilisha vinthu vonse velembewa vokhuza yove, emuselusha pa cimuti na kuyomuika m’manda.*
30 Koma Mulungu emuukisha kwa akufwa.
31 Ndipo kwa masiku anyinji, eonekela kuli ŵanthu amene eyenda naye kufumila ku Galileya kuluta ku Yerusalemu. Lomba, ŵanthu aŵa ni mboni zake kuli ŵanthu.
32 “Tetyo, tulengeza uthenga wabwino kuli mweo wokamba za vinthu vecilonjezewa makolo ŵasu.
33 Mulungu wakwanilisha vinthu vonse vecilonjeza makolo ŵasu kuli seo ŵana ŵao poukisha Yesu, mokatizhyana na zelembewa mu salimo yaciŵili kuti: ‘Weo niwe mwana wangu. Lelo neo nankhala ausuwako.’
34 Ndipo mfundo yakuti yove emuukisha na kuti angankhale lini soti na muŵili wamene uwola, eifotokoza teti: ‘Neo nikaoneshe mweo ŵanthu cikondi cokhulupilika cenelonjeza Davide. Lonjezo iyi ni yodalilika.’
35 Ndipo salimo iyakine yulaŵila soti kuti, ‘Mukalole lini kuti muŵili wa wokhulupilika wanu uwole.’
36 Davide ecita cifunilo ca Mulungu pa nthawi ya m’badwo wake, emwalila noikiwa m’manda ya makolo ŵake ndipo muŵili wake wewola.
37 Koma munthu ula weciukisha Mulungu, muŵili wake uliyewole.
38 “Lomba mweo akwasu, ziŵani kuti seo tulalikila kuli mweo za kukhululukiwa kwa macimo kupitila muli munthu uyu.
39 Ziŵani soti kuti pa vinthu vonse vamene cenze cosakwanishika kuti mweo muonewe kuti muliye mlandu kupitila m’Cilamulo ca Mose, aliyense wokhulupilila oonewa kuti aliye mlandu kupitila mwa munthu uyu.
40 Tetyo, samalani kuti zecilaŵila aneneli zisakucitikileni. Ove elaŵila kuti:
41 ‘Mweo ŵanthu onyoza, onani zanucita nodabwa nazo. Pavuli pake, mukaonongewe cifukwa mukakhulupilile lini zati nikacite m’masiku ŵanu, olo kuti muyakine akakufotokozeleni bwino-bwino.’”
42 Peenzocoka, ŵanthu eŵapapatila kuti akaŵafotokozele soti nkhani izi pa Sabata yokonkhapo.
43 Tetyo, msonkhano wa m’sunagoge pewesila, Ayuda na ŵanthu anyinji amene etembenukila ku Ciyuda amene enzolambila Mulungu, ekonkha Paulo na Baranaba. Ndipo ove enzolimbikisha ŵanthu aŵa kuti apitilizhye kunkhala oyenela kulandila kuwama mtima kukulu kwa Mulungu.
44 Pa Sabata yokonkhapo, pafupifupi ŵanthu onse a mu mzinda esonkhana kuti amvwishile mau a Yehova.
45 Ayuda peciona gulu iyi ya ŵanthu, ecita nsanje ndipo eyamba kususha veenzolaŵila Paulo monyoza.
46 Tetyo, Paulo na Baranaba elaŵila nao motang’a mtima kuti: “Penze poyenela kuti mweo munkhale oyamba kuuzhyiwa mau a Mulungu. Koma pofwana kuti muyakana ndipo muziweluza mweka kuti nimwe osayenelela moyo wosasila, seo tukuya kuli ŵanthu a mitundu iyakine.
47 Cifukwa Yehova watilamula kuti, ‘Nakupasani udindo wakuti munkhale kuwala kuli ŵanthu a mitundu iyakine, kuti munkhale cipulumuso mpaka kosilizhyila kwa calo.’”
48 Ŵanthu a mitundu iyakine peecimvwa izi, esangalala ndipo etamanda mau a Yehova. Ŵanthu onse amene enze na maganizo abwino amene angaŵayavye kupeza moyo wosasila, enkhala okhulupilila.
49 Kuyangizhyila apo, mau a Yehova epitilizhya kulalikiliwa m’calo conse ici.
50 Koma Ayuda esonkhezela anakazi ochuka amene enzoyopa Mulungu na analume olemekezeka a mu mzinda uyu. Tetyo, ove ecitisha kuti Paulo na Baranaba ayambe kunzunziwa ndipo eŵafumya kunja kwa mzinda wao.
51 Tetyo, Paulo na Baranaba ekunkhumula lukungu ku mendo kwao kuti unkhale umboni woŵasusha ndipo eluta ku Ikoniyo.
52 Ophunzila aŵa epitilizhya kunkhala osangalala ndipo mzimu utuŵa wenzoŵayavya ngako.
