Macitidwe ya Atumwi 1:1-26
1 A Teofilo, m’nkhani yoyamba nekulembelani vinthu vonse vecicita Yesu koma soti veciphunzisa,
2 mpaka pa siku yecitolewa kuluta kululu, pavuli pakuti wapeleka malangizo kupitila mwa mzimu utuŵa kuli atumwi ŵecisankha.
3 Pavuli pa mavuto yecikumana nayo, yove eonekela wamoyo kuli atumwi poseŵenzesha maumboni anyinji osimikizhyilika. Ove emuona kwa masiku onse 40 ndipo enzoŵauzhya za Ufumu wa Mulungu.
4 Pa nthawi yecisonkhana na ophunzila ŵake, yove eŵalamula kuti: “Musacoke mu Yerusalemu, koma pitilizhyani kuyembekezela zecikulonjezani Atata, zenekuuzhyani.
5 Cifukwa Yohane enzobatiza na manzi, koma mweo mubatiziwe na mzimu utuŵa pakaliyopita masiku anyinji.”
6 Tetyo, pecisonkhana emukonsha kuti: “Ambuye, kansi muwezhyeleshe ufumu kuli Aisiraeli pa nthawi ino?”
7 Yove eŵayankha kuti: “Mufunika lini kuziŵa nthawi olo nyengo yaasankha Atata mu ulamulilo wao.
8 Mzimu utuŵa ukayofwika pali mweo mukalandile mphamvu. Ndipo mukankhale mboni zangu mu Yerusalemu, ku Yudeya konse na ku Samariya mpaka ku madela a kutali ngako a calo.”*
9 Pecisilizhya kulaŵila vinthu ivi, etolewa kuluta m’mululu apo n’kuti ove oona. Ndipo mkumbi wemufisa cakuti aliyokwanishe soti kumuona.
10 Ove peenzololeshesha kululu Yesu peenzokuya, mosayembekezeleka analume amene enze evwala vovwala vituŵa epanama pafupi na ove.
11 Analume aŵa eŵauzhya kuti: “Mweo analume a ku Galileya, ndaŵa yanji mwapanama nololesha kululu? Yesu wamene watolewa pakati panu kuluta kululu, akawele m’njila yolingana na mwamwamuonela pakuya.”
12 Pavuli pake, ophunzila aŵa ewelela ku Yerusalemu kufuma ku Lupili ya Maolivi. Lupili iyi ili pafupi na Yerusalemu, pa msenga wa pafupifupi kilomita imozi.*
13 Pecifwika mu mzinda umu, eluta m’cipinda capalulu mweenzonkhala. Penze Petulo, Yohane, Yakobo, Andireya, Filipo, Thomasi, Batolomeyo, Mateyo, Yakobo mwana wa Alifeyo, Simoni wacangu na Yudasi mwana wa Yakobo.
14 Onse mokatizhyana enzolimbikila kupemphela kuyangizhyilapo anakazi ayakine, akwake a Yesu koma soti Mariya amai ŵake a Yesu.
15 M’masiku amene ao, Petulo epanama pakati pa ophunzila aŵa (onse pamozi enzokwana pafupifupi 120) ndipo elaŵila kuti:
16 “Akwangu, penze poyenela kuti lemba ikwanilishiwe, yamene mzimu utuŵa welaŵililatu kupitila muli Davide zokhuza Yudasi wamene esogolela ŵanthu kuti akate Yesu.
17 Yove enze m’mozi wa seo ndipo enzotumikila nase.
18 (Munthu uyu, egula munda na malipilo osalungama. Epona na mutu nophulika luvumo ndipo matumbo ŵake onse efuma.
19 Nkhani iyi yeziŵika kuli ŵanthu onse onkhala mu Yerusalemu, cakuti munda uyu eupasa zina m’cilaŵilo cao yakuti A·kelʹda·ma, kutanthauza, “Munda wa Milopa.”)
20 Cifukwa m’buku ya Masalimo elembamo kuti, ‘Malo ŵake onkhala asanduke matongwe ndipo pasapezeke aliyense wonkhalapo,’ koma soti kuti, ‘udindo wake monga woyanganila, utolewe na munthu muyakine.’
21 Tetyo, m’pofunika kuti yove aloŵewe m’malo na m’mozi mwa analume amene enzoyenda nase pa nthawi yonse yamene Ambuye Yesu enzocita vinthu vosiyanasiyana pakati pasu.
22 Munthu uyu ankhale wakuti enzoyenda nase kuyambila pa nthawi pamene Yohane ebatiza Yesu, kufwika siku yecitolewa kuluta kululu kufuma pakati pasu. Yove ankhale mboni pamozi na seo ya kuuka kwa Yesu.”
23 Tetyo, petomolewa analume aŵili, Matiya na Yosefe woitiwa kuti Barasaba wamene enzoitiwa soti kuti Yusito.
24 Pavuli pake, epemphela kuti: “Mweo Yehova, muziŵa mitima ya ŵanthu onse. Tetyo, tionesheni munthu wamwasankha pa ŵanthu aŵili aŵa
25 kuti atole malo a utumiki uyu nonkhala mtumwi, amene ni maudindo yecisiya Yudasi noyenda njila zake.”
26 Ove ecita maele ndipo maele aŵa eponela Matiya. Tetyo, emuika pa gulu ya atumwi 11.
