Macitidwe ya Atumwi 22:1-30
22 “Mweo ŵanthu, akwangu na ausuwangu, mvwani mau ŵangu oziteteza.”
2 Peecimvwa kuti enzolaŵila nao m’Ciheberi, onse enkhala celele ndipo yove elaŵila kuti:
3 “N’ne Myuda ndipo nevyalikila ku Tariso wa ku Kilikiya koma nephunzisiwa na Gamaliyeli mu mzinda wamene uno. Eniphunzisa kukonkha mosamala Cilamulo ca makolo ŵasu. Nenze soti wacangu ngako potumikila Mulungu monga ni mwamulili mweo monse lelo.
4 Nenzonzunza ŵanthu amene okonkha Njila iyi mpaka kuŵapaya. Nenzomanga analume koma soti anakazi noŵatwala ku jele.
5 Mkulu wa ansembe na bungwe yonse ya akulu anganicitile umboni cifukwa ove niye enipasa makalata a cilolezo kuti nikamange akwasu ku Damasiko. Nenyamuka kuti nikakate ŵanthu a kwamene uku noŵaleta ku Yerusalemu apo n’kuti ni omangiwa kuti azepasiwe cilango.
6 “Koma penenze m’njila apo n’kuti nasala patontho kufwika ku Damasiko mzuŵa, mosayembekezeleka kuwala kukulu ngako kofumila kululu kwenizungulila.
7 Nepona pansi ndipo necimvwa mau akuti, ‘Saulo, Saulo, ndaŵa yanji uninzunza?’
8 Neyankha kuti, ‘Ambuye, kansi nimwe ŵani?’ Yove eyankha kuti, ‘N’ne Yesu wa ku Nazareti waunzunza.’
9 Ŵanthu ŵenenze nao eona kuwala uku, koma aliyoumvwe mau ya munthu enzolaŵila na neo.
10 Pavuli pake, nelaŵila kuti, ‘Kansi nufunika kucita cinji Ambuye?’ Ambuye eniuzhya kuti, ‘Nyamuka ndipo ulute ku Damasiko. Kwamene uko, ukauzhyiwe vinthu vonse vakonzewa kuti weo ucite.’
11 Koma pofwana kuti nenzokwanisha lini kuona cifukwa ca ulemelelo wa kuwala uku, ŵanthu ŵenenze nao enikatilila kwanja mpaka kuyofwika ku Damasiko.
12 “Pavuli pake, munthu muyakine wa zina yakuti Hananiya wamene enzoyopa Mulungu mokatizhyana na Cilamulo koma soti enze na mbili yabwino pakati pa Ayuda onse a kwamene uku,
13 ewela kuli neo. Yove epanama pafupi nolaŵila kuti: ‘Mkwangu Saulo, yamba soti kuona.’ Nthawi yamene iyo, nelolesha ndipo nemuona.
14 Yove elaŵila kuti: ‘Mulungu wa makolo ŵasu wakusankha kuti uziŵe cifunilo cake noona wolungama koma soti kuti umvwe mau a pa kamwa pake.
15 Cifukwa unkhale mboni yake kuli ŵanthu onse pa vinthu vawaona na kumvwa.
16 Lomba ucelwelanji? Nyamuka, ubatizike nocosa macimo ŵako mwa kuita pa zina yake.’
17 “Koma penewelela ku Yerusalemu noyamba kupemphela m’kacisi, neona mensomphenya.
18 M’mensomphenya aŵa, neona Ambuye apo n’kuti oniuzhya kuti, ‘Fuma mu Yerusalemu kamangu cifukwa ove alandile lini uthenga wako wokamba za neo.’
19 Ndipo nelaŵila kuti, ‘Ambuye, ove oziŵa bwino kuti neo nenzoluta m’masunagoge noika m’jele koma soti kukwapula ŵanthu amene enzokukhulupililani.
20 Ndipo Sitefano wamene ni mboni yanu peenzopaiwa, neo nenzepo ndipo nevomelezhya. Nenzoyanganila soti vovwala vakunja va ŵanthu aŵa amene enzomupaya.’
21 Koma yove eniuzhya kuti, ‘Nkhoya cifukwa nikutume kutali, ku ŵanthu a mitundu iyakine.’”
22 Ove enzomvwishila mpaka pecilaŵila mau aŵa. Koma pavuli pake, ekuwa kuti: “Munthu uyu acosewe pa calo cifukwa ofunika lini kunkhala na moyo!”
23 Koma cifukwa cakuti enzokuwa, kuponya vovwala vao vakunja nomwazhya lukungu m’mululu,
24 mkulu wa gulu ya masoja elamula kuti aloŵe naye mu mpanda wa masoja. Yove elaŵila kuti enzofunika kukonshewa makonsho apo n’kuti okwapuliwa kuti aziŵe cecitisha kuti ŵanthu amukuwilile teti.
25 Koma pecimuyoneka kuti amukwapule, Paulo ekonsha mkulu wa masoja wamene enze epanama pafupi kuti: “Kansi malamulo olola kuniata nzika ya Roma mlandu wake ukaliyokambiwa?”
26 Mkulu wa masoja peecimvwa izi, eluta kuli mkulu wa gulu ya masoja nomuuzhya kuti: “Kansi mufuna kucitanji? Munthu uyu ni nzika ya Roma.”
27 Tetyo, mkulu wa gulu ya masoja eluta kuli yove nolaŵila kuti: “Niuzhye, kansi n’cendi kuti niwe nzika ya Roma?” Yove eyankha kuti: “Eee.”
28 Mkulu wa gulu ya masoja elaŵila kuti: “Neo negula ufulu wonkhala nzika na ndalama zinyinji.” Paulo elaŵila kuti: “Koma neo ufulu wangu necitovyalika nao.”
29 Nthawi yamene iyo, analume amene enzofuna kumukonsha makonsho apo n’kuti omukwapula, ecoka nomusiya. Naye mkulu wa gulu ya masoja ecita wowa peciziŵa kuti munthu weenze emanga ni nzika ya Roma.
30 Siku yokonkhapo, pofuna kuziŵa cecitisha Ayuda kuti amupase mlandu, emumasula. Ndipo elamula ansembe akulu na ŵanthu onse a m’Khoti ya Sanihedirini* kuti asonkhane. Pavuli pake, eleta Paulo nomupanamika pakati pao.
Mau a m'nyansi
^ Kapena kuti, “Khoti Ikulu ya Ayuda.”
