Macitidwe ya Atumwi 3:1-26
3 Siku iyakine, Petulo na Yohane enzokuya m’kacisi pa nthawi yopemphela. Nthawi iyi yenze 15 awazi.*
2 Lomba penze munalume muyakine wamene evyalika wolemala ndipo ŵanthu enze emunyamula. Siku iliyonse enzomunyamula nomunkhazika pafupi na mlyango wa kacisi woitiwa kuti Geti Yokongola kuti akosenga mphaso zacifundo kuli ŵanthu amene enzoloŵa m’kacisi umu.
3 Munthu uyu peciona Petulo na Yohane apo n’kuti akuyoloŵa m’kacisi, eyamba kuŵasenga kuti amupase mphaso zacifundo.
4 Koma Petulo na Yohane emuloleshesha nomuuzhya kuti: “Tiloleshe.”
5 Tetyo, eŵalolesha ndipo enzoyembekezela kuti amupaseko kanthu.
6 Petulo elaŵila kuti: “Niliye siliva na golide, koma nikupase canili naco. M’zina ya Yesu Khristu wa ku Nazareti, yenda!”
7 Pavuli pake, emukata kwanja yamalendi nomupanamika. Nthawi yamene iyo, vipazi na tunkhombwa twake vekosa.
8 Pezecitika izi, munthu uyu elumpha nopanama ndipo eyamba kuyenda. Yove eloŵela nao pamozi m’kacisi umu apo n’kuti oyenda, kulumphalumpha koma soti kutamanda Mulungu.
9 Ŵanthu onse emuona apo n’kuti oyenda notamanda Mulungu.
10 Ŵanthu aŵa emuzindikila kuti munthu uyu ni ula wamene enzonkhala pa Geti Yokongola ya kacisi, apo n’kuti osenga mphaso zacifundo. Ove edabwa nosangalala ngako na vinthu vemucitikila.
11 Munthu ula enzokonkhelela Petulo na Yohane ndipo gulu yonse ya ŵanthu yeutukila kuli ove pa malo otiwa kuti Lukolo ya Vipilala ya Solomo apo n’kuti ni yodabwa ngako.
12 Petulo peciona izi, euzhya ŵanthu aŵa kuti: “Mweo Aisiraeli, ndaŵa yanji mudabwa nazo izi? Ndaŵa yanji mutiloleshesha monga kuti tamucitisha kuti ayende na mphamvu zasu kapena cifukwa ca kuzipeleka kwasu kwa Mulungu?
13 Mulungu wa Abulahamu, wa Isaki na wa Yakobo, Mulungu wa makolo ŵasu niye walemekeza Mtumiki wake Yesu, wamene mweo mwemupeleka nomukana pamenso pa Pilato, olo kuti Pilato enzofuna kumumasula.
14 Eee, mweo mwekana munthu ula mtuŵa koma soti wolungama ndipo mwesenga kuti akumasulileni munthu wopaya ŵanthu.
15 Mwepaya Mtumiki Mkulu wamoyo. Koma Mulungu emuukisha ndipo seo nise mboni pa nkhani iyi.
16 Tetyo, kupitila m’zina yake koma soti cifukwa cakuti tukhulupilila zina iyi, munthu uyu wamuona koma soti wamuziŵa wapola. Cikhulupililo catili naco cifukwa ca Yesu, cacitisha kuti apole monga ni mwamuonela monse.
17 Akwangu, nuziŵa kuti mwecita vinthu mosaziŵa monga ni mwecicitila olamulila ŵanu.
18 Koma mwa njila iyi, Mulungu wakwanilisha vinthu veenze elengezelatu kupitila muli aneneli onse, kuti Khristu wake enze kuzovutika.
19 “Tetyo, lapani notembenuka kuti macimo ŵanu afutiwe na kuti nyengo zosisimusha ziwele kufumila kwa Yehova*
20 koma soti kuti atumizhye Yesu wamene ni Khristu wosankhiwa cifukwa ca mweo.
21 Kululu kufunika kusunga munthu uyu mpaka nthawi yowezhyelesha vinthu vonse yamene Mulungu elaŵila kupitila muli aneneli ŵake atuŵa akale.
22 Ndipo Mose elaŵila kuti: ‘Yehova Mulungu wanu akakupaseni mneneli monga ni neo kufumila pakati pa akwanu. Mukamvwile vonse vati akakuuzhyeni.
23 Aliyense wati akaleke kumvwila mneneli uyu, Mulungu akamupaye kuti asankhale soti pakati pa ŵanthu.’
24 Aneneli onse kuyambila pali Samueli mpaka kufwika pali aneneli onse amene ewela pavuli pake, onse amene elosela elaŵila mosapita m’mbali za masiku amene aŵa.
25 Mweo nimwe ŵana ŵa aneneli koma soti ŵana a pangano yamene Mulungu epangana na makolo ŵanu akale. Yove euzhya Abulahamu kuti: ‘Kupitila mwa mbadwa* yako, mabanja onse a pa calo akadalisiwe.’
26 Pavuli pakuti Mulungu wasankha Mtumiki wake, eyambila kumutumizhya kuli mweo kuti akudaliseni pozhyosha aliyense wa mweo kuti musiye nchito zanu ziipa.”
