Macitidwe ya Atumwi 4:1-37
4 Petulo na Yohane peenze akalulaŵila na ŵanthu, ansembe, woyanganila pa kacisi na Asaduki eluta kuli ove.
2 Ove ekalipa cifukwa atumwi aŵa enzophunzisa ŵanthu koma soti kulalikila mosapita m’mbali kuti Yesu eukishiwa kwa akufwa.
3 Tetyo, eŵakata noŵaika m’jele mpaka siku yokonkhapo cifukwa pa nthawi iyi, n’kuti kwafipa kale.
4 Koma ŵanthu anyinji amene emvwishila mau ŵao ekhulupilila ndipo ciŵelengelo ca analume cekwana pafupifupi 5,000.
5 Siku yokonkhapo, olamulila, akulu na alembi esonkhana ku Yerusalemu.
6 Penze soti Anasi wansembe mkulu, Kayafa, Yohane, Alekizanda koma soti ŵanthu onse amene enze abululu a wansembe mkulu.
7 Ove epanamika Petulo na Yohane pakati pao ndipo eyamba kuŵakonsha kuti: “Kansi mphamvu zamucitila vinthu ivi mwazitola kuni, kapena mucita vinthu ivi m’zina ya ŵani?”
8 Pavuli pake, mzimu utuŵa wefwika pali Petulo ndipo eŵayankha kuti:
“Mweo olamulila koma soti akulu,
9 ngati lelo mutikonsha pa cinthu cabwino catacitila munthu uyu wolemala ndipo mufuna kuziŵa wamupolesha,
10 ziŵani mweo monse na Aisiraeli onse kuti m’zina ya Yesu Khristu wa ku Nazareti wamene mwemupaila pa cimuti koma Mulungu emuukisha kwa akufwa, kupitila muli yove munthu uyu wapanama pasogolo panu apo n’kuti ali bwino.
11 Yesu uyu ni mwala wamene mweo omanga ng’anda mweuona monga ni watyalatyala koma lomba wankhala mwala wofunika ngako wapakona.’*
12 Kuyangizhyila apo, paliye munthu aliyense wamene angatipulumuse cifukwa paliye zina iyakine pa calo yamene yepelekewa kuli ŵanthu yamene ingatipulumuse.”
13 Peciona kuti Petulo na Yohane olaŵila motang’a mtima koma soti pecikumbukila kuti enze osaphunzila* na kuti enze ŵanthu wamba, edabwa ngako. Ndipo ezindikila kuti enzoyenda na Yesu.
14 Ove peciona kuti munthu ula wamene enze epoleshewa wapanama nao pamozi, esoŵa colaŵila.
15 Tetyo, eŵalamula kuti afume panja pa holo ya Sanihedirini* ndipo eyamba kulaŵizhyana
16 kuti: “Ticite nao cinji ŵanthu aŵa? Cifukwa kulaŵila cendi, ove acita cizindikilo cikulu cakuti ŵanthu onse a ku Yerusalemu aona. Ndipo seo tingasushe lini izi.
17 Tetyo, kuti nkhani iyi isapitilizhye kuwanda kuli ŵanthu ayakine, tiyeni tiŵayofye noŵauzhya kuti asalaŵile soti m’zina iyi kuli munthu aliyense.”
18 Pavuli pa izi, eŵaita noŵalamula kuti osati akolaŵila olo kuphunzisa m’zina ya Yesu.
19 Koma Petulo na Yohane eŵayankha kuti: “Weluzani mweka, ngati n’zoyenela pamenso pa Mulungu kumvwila mweo m’malo momvwila Mulungu.
20 Koma seo tingaleke lini kulaŵila za vinthu veteona na kumvwa.”
21 Tetyo peciŵayofya soti, eŵamasula cifukwa aliyopeze cifukwa ciliconse coŵapasila cilango. Kuyangizhyila apo, enzoyopa ŵanthu cifukwa onse enzotamanda Mulungu cifukwa ca vinthu vecitika.
22 Munthu ula wamene epoleshewa mozizwisa enze na vyaka vopitilila 40.
23 Peciŵamasula, ove eluta kuli okhulupilila ayao ndipo eŵafotokozela vinthu vonse veciŵauzhya ansembe akulu na akulu.
24 Peecimvwa izi, onse pamozi ekuwa kwa Mulungu kuti:
“Ambuye Mkulu Ngako, mweo niye mwepanga kululu, calo, nyanja na vinthu vonse vili mwamene umo.
25 Poseŵenzesha mzimu utuŵa, mweo kupitila pa kamwa pa kolo yasu Davide mtumiki wanu mwelaŵila kuti, ‘Ndaŵa yanji ŵanthu a mitundu iyakine akalipa? Ndipo ndaŵa yanji mitundu ya ŵanthu yuganizila vinthu vatyalatyala?
26 Mafumu a pa calo epanama pa malo yao ndipo olamulila esonkhana mokatizhyana kuti alimbane na Yehova koma soti wozozewa wake.’*
27 Izi zecitika cendi pamene Herode, Pontiyo Pilato, ŵanthu a mitundu iyakine koma soti ŵanthu a mu Isiraeli esonkhana mu mzinda uyu noukila Yesu, mtumiki wanu mtuŵa wamene mweo mwemuzoza.
28 Ove esonkhana pamozi kuti acite vinthu vemwekambilatu. Mwa mphamvu zanu, mwecitisha kuti izi zicitike mokatizhyana na cifunilo canu.
29 Koma lomba Yehova, mvwani mwakutiyofyela ndipo tiyavyeni seo akapolo ŵanu kuti tipitilizhye kulaŵila mau ŵanu motang’a mtima.
30 Pitilizhyani kupolesha ŵanthu na kwanja yanu koma soti kucitisha kuti vizindikilo na vodabwisha vipitilizhye kucitika m’zina ya Yesu, mtumiki wanu mtuŵa.”
31 Pecisilizhya kupemphela mopapatila, pa malo peenze esonkhana, penyang’anya. Pavuli pake, onse elandila mzimu utuŵa ndipo eyamba kulaŵila mau a Mulungu motang’a mtima.
32 Kuyangizhyila apo, ŵanthu onse amene ekhulupilila enze na maganizo olingana.* Paliye aliyense wamene enzolaŵila kuti vinthu veenze navo venze vake yeka. Vinthu vonse veenze navo venze vao onse.
33 Atumwi epitilizhya kucitila umboni mwamphamvu ngako za kuuka kwa Ambuye Yesu. Ndipo Mulungu enzoŵaonesha kuwama mtima kukulu onse.
34 Ndipo paliye aliyense wamene enzosoŵa kanthu. Onse amene enze na minda kapena mang’anda, enzogulisa noleta ndalama zao.
35 Ndipo enzozipeleka kuli atumwi. Pavuli pake, ndalama izi enzopasa aliyense kulingana na zeenzofunikila.
36 Tetyo Yosefe, wamene atumwi emupasa zina yakuti Baranaba, zina yamene ikamasuliliwa yutanthauza “Mwana Wacitonthozo,” wamene enze Mlevi wovyalikila ku Kupuro,
37 enze na munda. Yove egulisa munda uyu notwala ndalama kuli atumwi.
Mau a m'nyansi
^ Mau ŵake ŵeneŵene, “mutu wa kona.”
^ Enzotanthauza lini kuti enzoziŵa lini kulemba olo kuŵelenga koma enzotanthauza kuti aliyolute ku masukulu ya Arabi.
^ Kapena kuti, “Khoti Ikulu ya Ayuda.”
^ Kapena kuti, “Khristu wake.”
^ Mau ŵake ŵeneŵene, “na mtima umozi koma soti maganizo amozi.”
