Macitidwe ya Atumwi 21:1-40
21 Olo kuti cenze lini cipepu kuti asiyane nao, yove esiyana nao noyamba ulwendo wake wa pa nyanja. Teyenda siteleti mpaka kufwika ku Ko. Siku yokonkhapo, tefwika ku Rode ndipo petecoka uku tefwika ku Patara.
2 Petepeza boti yenzokuya ku Foinike, tekwela noyambapo.
3 Cisumbu ca Kupuro peceyamba kuonekela, tecisiya ku manjele* nopitilizhya ulwendo wasu kuloŵela ku Siriya. Pavuli pake, teciyopanama ku Turo kuti aselushe katundu wenze m’boti.
4 Tesakila ophunzila ndipo peteŵapeza, tenkhala kwamene uku kwa masiku 7. Koma mouzhyiliwa na mzimu, ove enzouzhya Paulo mowelezhyawelezhya kuti asalute ku Yerusalemu.
5 Nthawi yasu yonkhala kwamene uku peyesila, tenyamuka kuti tipitilizhye ulwendo wasu. Akwasu onse, anakazi koma soti ŵana etipelekezhya mpaka kunja kwa mzinda. Kwamene uko, tegwada m’mbali mwa nyanja nopemphela.
6 Pavuli pake, telailana nao ndipo tekwela boti. Koma ove ewelela ku mang’anda kwao.
7 Pavuli pake, tenyamuka kufuma ku Turo na boti ndipo tefwika ku Tolemayi. Kwamene uko, tepasa moni akwasu nonkhala nao kwa siku imozi.
8 Siku yokonkhapo, tenyamuka nofwika ku Kaisareya. Ndipo teluta ku ng’anda kwa mlaliki muyakine wa zina yakuti Filipo. Yove enze m’mozi mwa analume 7 ŵala amene enze na mbili yabwino, ndipo tenkhala naye.
9 Filipo enze na ŵana anakazi 4 osalunguliwa,* amene enzolosela.
10 Koma petenkhala kwamene uku kwa masiku anyinjiko, mneneli muyakine wa zina yakuti Agabo ewela kufumila ku Yudeya.
11 Yove ewela kuli seo notola beoti ya Paulo. Pavuli pake, ezimanga mendo na manja na beoti iyi nolaŵila kuti: “Mzimu utuŵa walaŵila kuti, ‘Mwineco wa beoti iyi akamangiwe teti na Ayuda ku Yerusalemu. Ndipo akamupeleke m’manja mwa ŵanthu a mitundu iyakine.’”
12 Petecimvwa izi, seo na ŵanthu enze kwamene uku, teyamba kupapatila Paulo kuti asalute ku Yerusalemu.
13 Koma Paulo eyankha kuti: “Ndaŵa yanji mulila nofuna kunifokesha? Neo n’ne wokonzeka osati tyala kuyomangiwa, koma na kuyokufwa ku Yerusalemu cifukwa ca zina ya Ambuye Yesu.”
14 Petekangiwa kumucinja maganizo, teleka kumulesha.* Ndipo telaŵila kuti: “Lekani kuti cifunilo ca Yehova cicitike.”
15 Pavuli pake, tekonzeka nonyamuka kuluta ku Yerusalemu.
16 Koma ophunzila ayakine a ku Kaisareya enyamukila nase pamozi kuti atipelekezhye ku ng’anda kwa Mnaso wa ku Kupuro kuti tikankhale monga alwendo m’ng’anda mwake. Munthu uyu enze m’mozi mwa ophunzila oyambilila.
17 Petefwika ku Yerusalemu, akwasu etilandila mosangalala.
18 Pa siku yokonkhapo, Paulo eluta nase kuli Yakobo ndipo akulu onse enze kwamene uku.
19 Paulo eŵapasa moni noyamba kuŵafotokozela bwino-bwino vinthu vamene Mulungu ecitila ŵanthu a mitundu iyakine kupitila mu utumiki wake.
20 Peecimvwa izi, ove eyamba kutamanda Mulungu. Koma emuuzhya kuti: “Mkwasu, pali Ayuda anyinji amene ni okhulupilila ndipo onse ni ozipeleka pa nkhani yokonkha Cilamulo.
21 Koma ove ecimvwa mbili yakuti weo uphunzisa Ayuda onse amene ali pakati pa ŵanthu a mitundu iyakine kuti aleke kukonkha Cilamulo ca Mose. Okamba kuti uŵauzhya kuti osati akocita mdulidwe ŵana ŵao na kuti osati akokonkha miyambo yatankhala tukonkha kuyambila kale-kale.
22 Lomba ticite nayo tyani nkhani iyi? Mosakaikila, ove aamvwe kuti weo wawela.
23 Tetyo, ucite vati tikuuzhye: Tili na analume 4 amene ecita lumbilo.
24 Tetyo, utole ŵanthu aŵa ndipo ukacite nao mwambo wa kuzituŵisha. Uŵalipilile zonse zofunikila kuti agele sisi yao. Pavuli pake, aliyense aziŵe kuti mbili yeecimvwa yokhuza weo, ni yawenye. Ndipo aone kuti ucita vinthu mokonkha dongosolo koma soti kuti usunga Cilamulo.
25 Ponena za okhulupilila amene ofumila m’mitundu iyakine, teŵalembela kalata yofotokoza cigamulo casu cakuti akopewa vinthu vupelekewa nsembe ku mafano, milopa, vosakhesa* koma soti ciwelewele.”*
26 Tetyo siku yokonkhapo, Paulo etola analume ŵala ndipo ezituŵisha mwa mwambo pamozi na analume aŵa. Pavuli pake, eloŵa m’kacisi nolaŵila nthawi pamene masiku ŵao a mwambo wa kuzituŵisha enze kuzosila koma soti nthawi pamene enze kuzopeleka nsembe ya aliyense wa ove.
27 Masiku 7 peyesala patontho kusila, Ayuda a ku Asia eona Paulo peenze m’kacisi. Tetyo, esonkhezela gulu yonse ya ŵanthu kuti iyambishe msokonezo, ndipo yemukata.
28 Ove enzokuwa kuti: “Mweo Aisiraeli, tiyavyeni. Munthu uyu ophunzisa vinthu vosushana na ŵanthu a mtundu wasu kulikonse. Ndipo ophunzisa soti vinthu vosushana na Cilamulo koma soti malo ŵano. Kuyangizhyila apo, yove watola Agiriki noŵaloŵesha m’kacisi ndipo waipisha malo aŵa atuŵa.”
29 Ove elaŵila izi cifukwa siku iyakine enze eona Terofimo wa ku Efeso apo n’kuti ali na Paulo mu mzinda uyu. Tetyo, eganiza kuti Paulo eloŵesha Terofimo m’kacisi.
30 Cifukwa ca izi, mu mzinda monse mwenkhala cipwilikiti. Ndipo ŵanthu eutukila ku kacisi nokata Paulo ndipo emudonsela kunja kwa kacisi. Nthawi yamene iyo, viseko vevaliwa.
31 Peenzofuna kumupaya, mkulu wa gulu ya masoja elandila uthenga wakuti mu Yerusalemu monse muli cipwilikiti.
32 Nthawi yamene iyo, yove etola masoja na asogoleli ŵao noutukila kwamene uku. Ŵanthu aŵa peciona mkulu wa gulu ya masoja na masoja ŵake, eleka kuniata Paulo.
33 Tetyo, mkulu wa gulu ya masoja efwika pafupi nomukata ndipo elamula kuti amumange na macheni aŵili. Pavuli pake, ekonsha ŵanthu zokhuza yove koma soti zecicita.
34 Koma ŵanthu pa gulu iyi eyamba kukuwa vinthu vosiyanasiyana. Ayakine enzokuwa ivi ndipo ayakine enzokuwa viyakine. Tetyo pecikangiwa kutolapo mfundo yeneyene cifukwa ca congo, elamula kuti alute naye ku mpanda wa masoja.
35 Pecifwika pa masitepu, masoja emunyamula cifukwa gulu iyi yenzocita ciwawa.
36 Gulu ya ŵanthu yenzoŵakonkha apo n’kuti yukuwa kuti: “Munthu uyu apaiwe!”
37 Koma pecisala patontho kuloŵa naye mu mpanda wa masoja, Paulo esenga mkulu wa gulu ya masoja kuti: “Kansi ningalaŵileko namwe tyala patontho?” Yove elaŵila kuti: “Kansi uziŵa kulaŵila Cigiriki?
38 Kansi izi zutanthauza kuti niwe lini munthu wa ku Iguputo wamene m’nthawi zakuvuli eyambisha cipolowe coukila boma nosogolela anyankapondo 4,000 kuluta nao m’cipululu?”
39 Paulo eyankha kuti: “Neo n’ne Myuda wa ku Tariso ku Kilikiya. N’ne nzika ya mzinda wochuka. Tetyo, nusenga kuti munilole kuti nilaŵile na ŵanthu aŵa.”
40 Pecimulola, Paulo epanama pa masitepu ndipo eimyila ŵanthu aŵa kwanja yake. Onse pecinkhala celele, yove elaŵila nao m’Ciheberi kuti:
