1. Ehangano lini lya pingene po oshigwana shaIsraeli oshishunimonima? (Tala kethano lyopetameko.)

JEHOVA oye a toto po egongalo lyopaKriste methelemumvo lyotango noye a totulula elongelokalunga lyashili methimbo lyetu. Ngaashi sha popiwa moshileshwa sha tetekele, Jehova okwa toto po ehangano epe lya lukilwa edhina lye, lya thikama po maalanduli yaKristus, ndyoka lya pingene po oshigwana shaIsraeli oshishunimonima. Iilyo yehangano ndika epe lya hokiwa kuKalunga oya hupu sho Jerusalem sha hanagulwa po mo 70 E.N. (Luk. 21:20, 21) Iiningwanima mbyoka ya ningilwe methelemumvo lyotango oya li tayi ulike shoka tashi ka ningilwa aapiya yaJehova yokunena. Otu li momasiku gahugunina moka uuyuni waSatana wu li pokuhanagulwa po, ihe ehangano lyaJehova lyo itali ka hanagulwa po. (2 Tim. 3:1) Otu shi shi ngiini?

2. Jesus okwa popi shike kombinga ‘yuudhigu uunene,’ notawu ka tameka nashike?

² Jesus okwa popi kombinga yokukala po kwe nehulilo lyuuyuni a ti: “Omasiku ngoka otaku kala uudhigu uunene inaau kala ko nale okuza ketameko lyuuyuni sigo ongashingeyi, nongaashi itau ya we.” (Mat. 24:3, 21) Uudhigu mbuka uunene inaawu  monika nando onale otawu ka tameka sho Jehova ta ka longitha omapangelo gopapolotika ga hanagule po “Babiloni oshinene,” ano omalongelokalunga agehe giifundja. (Eh. 17:3-5, 16) Ngele Babiloni oshinene sha hanagulwa po, oshike tashi ka landula ko?

3. Konima ngele omalongelokalunga giifundja ga hanagulwa po, oshigwana shaJehova otashi ka ningilwa shike?

³ Ngele omalongelokalunga giifundja ga hanagulwa po, Satana nomahangano ge galwe otaya ka ponokela aapiya yaJehova. Pashiholelwa, Omanyolo oga hunganeke kombinga ‘yaGog gwomevi lyaMagog’ ga ti: “Oye pamwe netangakwiita lye niigwana oyindji pamwe naye otaa ka homona ya fa oshikungulu nongiikogo tayi kwidhidhike evi.” Molwashoka Oonzapo dhaJehova kadhi na etangakwiita nodhi li oshigwana oshinambili, otadhi ka monika dha fa tadhi vulu okuponokelwa nuupu. Ihe oku dhi ponokela otaku ka kala kwaa li pandunge. —  Hes. 38:1, 2, 9-12.

4, 5. Jehova Kalunga ota ka ninga po shike, sho Satana ta ka kambadhala okuhanagula po oshigwana she?

⁴ Kalunga ota ka ninga po shike sho Satana ta ka kambadhala okuhanagula po oshigwana She? Jehova, Omupangeliawike, ote ke ya kondjela. Shaashi ngele Satana okwe shi ponokele, nena okwa fa owala ta ponokele Jehova. (Lesha Sakaria 2:8.) Onkee ano Tate yetu gwomegulu ota ka katuka nziya, opo e tu hupithe. Nokonima yaashoka, uuyuni waSatana otawu ka hanagulwa po ‘piita yomesiku enene lyaKalunga Omunankondoadhihe’ mbyoka hayi ithanwa Armagedon. —  Eh. 16:14, 16.

⁵ Ombiimbeli oya popi kombinga yaArmagedon ya ti: “OMUWA oku na oontamanana niigwana. Ote eta aantu ayehe kompangu, naakolokoshi te ya etha ya dhipagwe. OMUWA oye a popi. OMUWA Omunankondoawike ota ti, omupya otagu adha oshigwana, noshikungulu oshinene otashi tukuka kooha dhuuyuni. Mesiku ndyoka omidhimba dhaantu mboka ya dhipagwa kOMUWA, otadhi ka langathana okuza kooha dhuuyuni sigo okooha oonkwawo. Kape na ngoka ta lili oosa, nomidhimba itadhi kuthwa po dhi ka fumvikwe. Otadhi kangawala pevi dha fa oondumba dhuuhoho.” (Jer. 25:31-33) Uuyuni waSatana otawu ka hanagulwa po puArmagedon, ihe ehangano lyaJehova itali ka hanagulwa po.        

6, 7. (a) Iilyo yengathithi lyaantu oya zi peni? (b) Engathithi oli indjipala shi thike peni moomvula opo dha zi ko?

⁶ Ehangano lyaKalunga otali shi enditha nawa, molwashoka aantu mboka ye li mo oya hokiwa kuKalunga. Ombiimbeli otayi tu shilipaleke tayi ti: “Omeho gOmuwa oge wete aayuuki, naaluhe ota pulakene omaindilo gawo; ihe ota thigi po mboka haa longo uuwinayi.” (1 Pet. 3:12) Aayuuki mboka oya kwatela mo “engathithi lyaantu” mboka “ya piti momahepeko ngoka omanene.” (Eh. 7:9, 14) Aantu mbaka taya ka hupa kaye shi ongundu owala onshona, ihe ‘engathithi lyaantu.’ Mbela nangoye omo ngaa to ka kala mongundu yaamboka taya ka hupa “momahepeko ngoka omanene”?

⁷ Iilyo yengathithi lyaantu oya zi peni? Omiigwana yi ili noyi ili sho ya taamba ko etumwalaka lyUukwaniilwa. Jesus okwa hunganeke a ti: “Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo; notaku ya ihe ehulilo.” (Mat. 24:14). Shika osho oshilonga sha simanenena shoka tashi longwa kehangano  lyaKalunga momasiku ngaka gahugunina. Aantu omamiliyona ohaya longele Kalunga ‘mombepo nomoshili,’ molwashoka yu uvithilwa noya longwa kOonzapo dhaJehova. (Joh. 4:23, 24) Pashiholelwa, pokati komumvo gwiilonga 2003 no 2012, aantu 2 707 000 oyi igandjele Kalunga e taya ninginithwa. Muuyuni awuhe omu na Oonzapo dhi vulithe 7 900 000, naantu omamiliyona ohaye endathana nayo, unene tuu pethimbo lyEdhimbuluko ndyoka hali ningwa omumvo kehe. Ohashi tu nyanyudha okumona nkene engathithi lyaantu tali indjipala, notu shi shi kutya ‘Kalunga oye te li kokitha.’ —  1 Kor. 3:5-7.        

8. Omolwashike omwaalu gwOonzapo dhaJehova tagu indjipala?

⁸ Oonzapo dhaJehova otadhi indjipala noonkondo kunena, molwashoka Jehova ote dhi ambidhidha. (Lesha Jesaja 43:10-12.) Eindjipalo ndika olya hunganekelwe ngeyi: “Aashuushuka yomune otaa ka ninga eyuvi, naashona otaa ningi oshigwana oshinankondo. Ongame OMUWA; otandi shi ningi methimbo lyo opala.” (Jes. 60:22) Ethimbo limwe aagwayekwa oya li taya monika ‘aashuushuka,’ ihe omwaalu gwawo ogwe ende tagu indjipala sho Aaisraeli yalwe yopambepo ye ya mehangano lyaKalunga. (Gal. 6:16) Molwashoka Jehova okwa kala te tu yambeke muule woomvula dha piti, omwaalu onkee ngaa tagu indjipala sho engathithi lyaantu tali gongelwa.

9. Otu na okuninga shike, opo tu ka nyanyukilwe onakuyiwa ombwanawa ndjoka yu uvanekwa mOohapu dhaKalunga?

⁹ Kutya nduno tse aagwayekwa nenge iilyo yengathithi lyaantu otatu vulu oku ka nyanyukilwa onakuyiwa ombwanawa ndjoka yu uvanekwa mOohapu dhaKalunga. Ihe otu na tango okukala hatu vulika kuye. (Jes. 48:17, 18) Natu taleni kAaisraeli mboka ya li kohi yOmpango yaMoses. Elalakano limwe lyompango ndjoka olya li oku ya gamena moku ya pa omilandu dhi na ko nasha nomilalo, ongeshefa, okusila aanona oshimpwiyu, okukala nawa naantu ooyakwawo nosho tuu. (Eks. 20:14; Lev. 19:18, 35-37; Deut. 6:6-9) Ngele natse otwa vulika kiipango yaKalunga otashi ke tu etela uuwanawa, niipango mbika ihatu mono iidhigu kutse. (Lesha 1 Johannes 5:3.) Ngaashi naanaa iipango ya li ya gamene Aaisraeli, natse ngele otwa vulika kuyo nokomakotampango gaJehova Kalunga otayi ke tu gamena noku tu kaleka tu na “eitaalo lyu uka.” —  Tit. 1:13.

10. Omolwashike tu na okukonga ethimbo lyokukonakona Ombiimbeli nokuninga Elongelokalunga lyUukwanegumbo oshiwike kehe?

¹⁰ Ehangano lyaJehova kombanda yevi otali humu komeho miinima yi ili noyi ili. Pashiholelwa, otatu ende tatu uvu ko nawa oshili yOmbiimbeli. Shika osho shi na okukala, oshoka “ondjila yaayuuki oya fa uuyelele weluwa tali tende, mboka tau yele sigo kwa shi.” (Omayel. 4:18) Ihe otu na okwiipula ngeyi: ‘Mbela onda taamba ko ngaa uuyelele uupe womOmanyolo mboka twa pewa? Ohandi lesha ngaa Ombiimbeli esiku kehe? Mbela ondi hole ngaa okulesha iileshomwa yetu? Ohandi ningi ngaa Elongelokalunga lyUukwanegumbo oshiwike kehe pamwe noyaandjetu?’ Oyendji ohaya zimine kutya iinima mbika kayi shi iidhigu okuninga. Olundji uupyakadhi ohawu kala owala pokumona ethimbo lyoku yi ninga. Inashi simana tuu okutseya oshili yOmbiimbeli, oku yi tula miilonga nokuninga ehumokomeho, unene tuu sho omahepeko ngoka omanene nenge uudhigu uunene tawu hedha popepi!          

11. Iituthi mbyoka ya li hayi ningwa muIsraeli shonale, okugongala niigongi iinene niishona mbyoka hayi ningwa kunena ohayi tu kwathele ngiini?

 ¹¹ Ehangano lyaJehova oli tu lile po sho tali tu ladhipike tu tule miilonga omayele gomuyapostoli Paulus ngoka taga ti: “Tu silathaneni oshimpwiyu, tu kwathathaneni mokuholathana nomokulongelathana uuwanawa. Inatu etha po okugongala pamwe, ngaashi yamwe haa ningi. Ihe natu kumagidhathaneni, unene sho tu wete esiku lyOmuwa tali hedha popepi.” (Heb. 10:24, 25) Iituthi yokomumvo niigongi yilwe yopalongelokalunga oya li ya tungu Aaisraeli pambepo. Oshikwawo, iituthi mbika, ngaashi Oshituthi showina shomatsali giihwa iitalala shoka sha ningilwe pethimbo lyaNehemia, oya li hayi kala ethimbo lyenyanyu. (Eks. 23:15, 16; Neh. 8:9-18) Natse ohatu mono uuwanawa pokugongala nopiigongi iinene niishona. Opo tu kale twa kola pambepo notwa nyanyukwa, natu longithe nawa omasiloshimpwiyu ngaka. —  Tit. 2:2.       

12. Otu na okukala tu uvitile ngiini iilonga yokuuvitha Uukwaniilwa?

¹² Atuheni mboka tu li mehangano lyaKalunga otu na ompito yokukutha ombinga nenyanyu ‘miilonga iiyapuki yevaangeli.’ (Rom. 15:16, OB-1954) Okukutha ombinga ‘miilonga mbika iiyapuki’ otaku tu ningi “aalongi pamwe” naJehova, ngoka e li “omuyapuki.” (1 Kor. 3:9; 1 Pet. 1:15) Okuuvitha onkundana ombwanawa otaku yapulitha edhina lyaJehova eyapuki. Naashika oshi li uuthembahenda uunene okukala twi inekelelwa “onkundana ombwanawaele la ya za kuKalunga omunyanyukwi.” —  1 Tim. 1:11, NW.        

13. Otu na okuninga shike ngele otwa hala okukala twa kola pambepo noku ka mona omwenyo?

¹³ Kalunga okwa hala tu kale twa kola pambepo mokukala puye nokwaambidhidha ehangano lye momikalo dhi ili nodhi ili. Moses okwa lombwele Aaisraeli a ti: “Nena otandi ku pe, u hogolole pokati komwenyo neso, pokati keyambeko lyaKalunga netulomutima lye, notandi hiya egulu nevi li ninge onzapo yehogololo ndyoka to hogolola. Hogolola omwenyo. Hola OMUWA Kalunga koye, vulika kuye nou mu dhame, nena ngoye mwene noluvalo lwoye otamu ka kala olule mevi ndyoka u uvaneke te li pe oohokulu Abraham, Isak naJakob.” (Deut. 30:19, 20) Ngele otwa hala oku ka mona omwenyo, otu na okulonga ehalo lyaJehova, okukala tu mu hole, okuvulika kuye nokudhama muye.      

14. Omwiitaali gumwe okwa ti ngiini kombinga yehangano lyaKalunga?

¹⁴ Tate Pryce Hughes ngoka a kala a dhama muKalunga nokwa kala he endele pamwe nehangano lyaKalunga okwa nyolele a ti: “Ohandi pandula sho nda kala ndi shi omalalakano gaJehova okuza koomvula ndhoka dha tetekele omumvo 1914 . . . Oshinima shoka sha kala sha simana kungame okukala mehangano lyaJehova. Petameko onda mono kutya kashi li pandunge okwiikolelela komadhiladhilo gopantu. Okuza sho nde shi dhimbulula mo, onda tokola okukala mehangano lyaJehova. Jehova ota vulu owala oku tu yambeka nokukala e tu hokwa, ngele otu li mehangano lye.”

15. Gandja oshiholelwa tashi ulike nkene tu na okukala twa tala ko omalunduluko ngoka haga ningwa meuvoko lyetu lyOmbiimbeli.

¹⁵ Ngele otwa hala okukala twa hokiwa kuJehova, otu na okwaambidhidha ehangano lye nokutaamba ko uuyelele uupe meuvoko lyetu lyOmbiimbeli. Dhiladhila kwaashika: Konima yeso lyaJesus, Aakriste Aajuda omayuvi mboka ya li ya dhiginina Ompango oya li  ya mono oshidhigu oku yi etha po. (Iil. 21:17-20) Ihe ontumwafo yaPaulus ndjoka a nyolele Aahebeli oye ya kwathele yu uve ko kutya inaya yapulwa ‘nomayambo ngoka ga li haga yambwa pampango,’ ihe ‘oya yelithwa lumwe aluke koondjo omolwaKristus, sho a yamba olutu lwe mwene.’ (Heb. 10:5-10) Osha yela kutya Aajuda oyendji mboka ya ningi Aakriste oya li ye etha po shoka ya li yi itaala e taya humu komeho pambepo. Natse wo otwa pumbwa okukonakona Ombiimbeli twa mana mo nokutifuka ngele pwa holoka elunduluko lyontumba montseyo yetu yOmbiimbeli nomomukalo gwokuuvitha.

16. (a) Omalaleko nuuyamba geni tatu ka mona muuyuni uupe? (b) Owa halelela oku ka gwanithilwa po euvaneko lini muuyuni uupe?

¹⁶ Jehova ota ka yambeka ayehe mboka aadhiginini kuye nokehangano lye. Aagwayekwa otaya ka nyanyukilwa okupangela pamwe naKristus megulu. (Rom. 8:16, 17) Naamboka taya ka kala mOparadisa, nayo otaya ka nyanyukilwa onkalamwenyo ndjoka. Inatu nyanyukwa tuu ngashingeyi sho tatu lombwele yalwe kombinga yuuyuni uupe mboka Kalunga u uvaneka! (2 Pet. 3:13) Episalomi 37:11 otali ti: “Aaifupipiki otaa ka thigulula evi notaa ka mona uulinawa nombili.” Aantu “otaa ka tunga omagumbo, opo ya kale mo yo yene” notaya ka nyanyukilwa “iilonga yiikaha yawo yene.” (Jes. 65:21, 22) Itaku ka kala we omuntu ta thindilwa kongudhi, e li moluhepo nenge e niwe kondjala. (Eps. 72:13-16) Babiloni oshinene itashi ka pukitha we aantu, molwashoka otashi ka hanagulwa po. (Eh. 18:8, 21) Aasi otaya ka yumudhwa notaya ka kala nomwenyo sigo aluhe. (Jes. 25:8; Iil. 24:15) Aantu omamiliyona mboka yi iyapulila Jehova kaye na tuu etegameno ewanawa! Opo tu gwanithilwe po omauvaneko ngaka gopamanyolo, otu na okutsikila okuninga ehumokomeho lyopambepo nokweendela aluhe pamwe nehangano lyaKalunga.

17. Otu na okukala twa tala ko ngiini okulongela Jehova nosho wo ehangano lye?

¹⁷ Sho ehulilo lyuuyuni mbuka li li popepi, natu kaleni tu na eitaalo lya kola nokulongela Jehova nuudhiginini pamwe nehangano lye. David osho a li a hala okuninga sho a nyola a ti: “OMUWA onde mu indile ompumbwe yimwe; ondi na oshinima shimwe ashike nde shi hala: okukala mongulu yOMUWA okukalamwenyo kwandje akuhe, okunyanyudhwa kuuwanawa we nokupula ewiliko lye.” (Eps. 27:4) Atuheni natu dhame muJehova Kalunga nokweendela pamwe nehangano lye ndyoka tali humu aluhe komeho.