Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2014

‘Iikulya yandje oyo okulonga ehalo lyaKalunga’

‘Iikulya yandje oyo okulonga ehalo lyaKalunga’

Oshike hashi ku nyanyudha? Mbela ondjokana, okuputudha aamwoye nenge okukoleka ekwatathano lyoye nookuume? Otashi vulika nokuli ho nyanyukilwa okulya pamwe naaholike yoye. Ihe kutse aapiya yaJehova, shoka hashi tu nyanyudha unene okulonga ehalo lyaKalunga, okukonakona Oohapu dhe nokuuvitha onkundana ombwanawa.

Omukwaniilwa David okwi imbile Omushiti gwe ondjimbohambelelo a ti: “Kalunga kandje, ondi hole okugwanitha ehalo lyoye! Otandi dhiginine elongo lyoye momutima gwandje.” (Eps. 40:8) Nonando David okwa li e na omaupyakadhi ogendji monkalamwenyo, okwa li ha nyanyukilwa lela okulonga ehalo lyaKalunga. Ihe David haye owala a li ha nyanyukilwa okulongela Jehova, Kalunga kashili.        

Omuyapostoli Paulus okwa ti oohapu dhEpisalomi 40:8 otadhi popi Mesiasa, nenge Kristus. Okwa nyola a ti: “Kristus sho a li pokuya muuyuni, okwa ti kuKalunga: ‘Omagano nomayambo giinamwenyo ito ga pumbwa, ihe owa longekidhile ndje olutu. Ongoye ito hokwa omayambo giinamwenyo haga lungunithilwa koshiyambelo, nenge omayambo gokukutha po oondjo. Ongame nonda ti: “Ongame nguka, otandi ya okulonga ehalo lyoye, Kalunga, ongaashi sha nyolwa membo lyompango tashi popi ndje.”’” —  Heb. 10:5-7.

Jesus sho a li kombanda yevi okwa li e hole okutala eshito, okukala nookuume nokulya pamwe nayalwe. (Mat. 6:26-29; Joh. 2:1, 2; 12:1, 2) Ihe shoka sha li sha simanenena kuye nohashi mu etele enyanyu enene, okulonga ehalo lyaHe gwomegulu. Nokuli Jesus okwa ti: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.” (Joh. 4:34; 6:38) Aalongwa yaJesus oyi ilongo kuye kutya oshike hashi nyanyudha omuntu shili. Oya kala nokuuvithila aantu nenyanyu nonehalo ewanawa kombinga yUukwaniilwa waKalunga. —  Luk. 10:1, 8, 9, 17.

‘INDENI KA NINGENI AANTU AALONGWA YANDJE’

Jesus okwa lombwele aalanduli ye a ti: ‘Indeni ka ningeni aantu ayehe aalongwa yandje, mu ya ninginithe medhina lyaHe nolyOmwana nolyombepo ondjapuki, ne mu ya longe okudhiginina ayihe mbyoka nde yi mú lombwele. Ihe ngame otandi  kala pamwe nane omasiku agehe sigo ehulilo lyuuyuni.’ (Mat. 28:19, 20, yelekanitha NW.) Opo tu gwanithe po oshilonga shoka, otu na okuuvithila aantu shaa mpono ye li, okushuna kwaamboka yu ulika ohokwe nokukonakona Ombiimbeli nayo. Oshilonga shika otashi vulu oku tu nyanyudha shili.

Ohole ohayi tu inyengitha tu tsikile okuuvitha nonando aantu oyendji kaye na ohokwe

Ngele otu na etaloko ewanawa, otatu ka nyanyukilwa uukalele kutya nduno aantu otaya pulakene nenge hasho. Mbela omolwashike hatu tsikile okuuvithila aantu onkundana ombwanawa nonando oyendji kaye na ohokwe? Ohatu shi ningi molwashoka otu shi kutya okuuvithila aantu noku ya ninga aalongwa otashi ulike kutya otu hole Kalunga naantu ooyakwetu. Osha yela kutya onkalamwenyo yetu noyawo oyi li moshiponga. (Hes. 3:17-21; 1 Tim. 4:16) Natu taleni kiinima yimwe mbyoka ya kwathele aauvithi ooyakwetu yu uvithe nuulaadhi, nonando ohaya taalele omashongo miitopolwa moka haya longo.

LONGITHA OMPITO KEHE

Okupula omapulo tago opalele muukalele olundji ohaku eta iizemo iiwanawa. Ongula yimwe, Amalia okwa adhele omulumentu gumwe ta lesha oshifokundaneki moparka. Okwe mu pula ngele okwa lesha mo ngaa sha oshiwanawa. Sho a yamukula kutya ina lesha mo sha oshiwanawa, Amalia okwa ti: “Onde ku etela onkundana ombwanawa yUukwaniilwa waKalunga.” Omulumentu okwa li a hala oku yi uva e ta zimine a kale ha konakona Ombiimbeli. Amalia okwa li nokuli a tameke okukonakona Ombiimbeli naantu yatatu moparka ndjoka.

Janice okwa li hu uvithile aantu kiilonga. Sho osekuliti nomuniilonga omukwawo yu ulike ohokwe moshileshwa shomOshungolangelo, okwe ya lombwele kutya ota vulu okukala he ye etele aluhe iifo. Okwa kala wo he ye etele omuniilonga gulwe ngoka ha longo pamwe naye, ngoka a li a kuminwa iipalanyolo oyindji mbyoka hayi kundathanwa mOshungolangelo nomo-Awake! Shoka osha ningitha omuniilonga gulwe naye a pule a kale he etelwa iifo. Janice ota ti: “Jehova ina laleka ndje tuu nuuyamba!” Konima yethimbo okwa kala e na aantu 11 kiilonga he ya faalele iifo.

KALA WU NA ETALOKO EWANAWA

Omutonatelishikandjo gumwe okwa ti kutya sho aauvithi taya uvitha egumbo negumbo, pehulilo lyoonkundathana kaye na owala okutya otaya galuka ishewe esiku limwe. Pehala lyaashono, otaya vulu okupula omunegumbo taya ti: “Ino hala ndi ku ulukile nkene ekonakonombiimbeli hali ningwa?” nenge ya tye: “Uunake nopongapi wa hala ndi ye tu kundathane ishewe?” Omutonatelishikandjo okwa ti kutya sho aauvithi megongalo limwe ndyoka a li ta talele po ya longitha omukalo nguka, oya tameke omakonakonombiimbeli 44 muule woshiwike.

Okuninga omaishunoko nziya, nokuli nando okonima yomasiku omashona, otaku vulu okweeta iizemo iiwanawa. Omolwashike? Omolwashoka otashi ulike kutya otwa hala okukwathela mboka ye na omitima omiwanawa yu uve ko Ombiimbeli. Omukiintu gumwe sho a pulwa kutya omolwashike a tameke  okukonakona Ombiimbeli nOonzapo dhaJehova, okwa ti: “Onda tameke okukonakona molwashoka yu ulike kutya oye hole ndje shili.”

Oto vulu okupula omunegumbo to ti: “Ino hala ndi ku ulukile nkene ekonakonombiimbeli hali ningwa?”

Madaí konima yethimbo efupi sho a zi kOsikola yOkudheula Aakokolindjila okwa tameke okukonakona naantu 15 nokwa gandja po yalwe ye vulithe pu 5 kaauvithi yalwe. Oyendji yomaakonakonimbiimbeli ye ohaye ya aluhe kokugongala. Oshike mbela sha kwathele Madaí a tameke okukonakona naantu oyendji? Osikola oyo ye mu kwathele a kale ha shuna ko sigo a mono ishewe mboka yu ulikile ohokwe. Onzapo yilwe ndjoka ya kwathela aantu oyendji yi ilonge oshili yOmbiimbeli oya ti: “Onda mona kutya ngele onda kala handi shuna ko aluhe kaantu opo ashike tandi vulu oku ya kwathela ya tseye Jehova.”

Okuninga omaishunoko nziya otashi ulike kutya otu na ko nasha naamboka ya hala okuuva ko Ombiimbeli

Otashi pula oonkambadhala dha mana mo, opo omuntu wu kale ho ningi omaishunoko nomakonakonombiimbeli. Ihe oonkambadhala ndhoka itadhi yelekwa nomalaleko nuuyamba ogendji ngoka omuntu ta ka mona. Uuna tatu kutha ombinga miilonga yokuuvitha Uukwaniilwa, otatu kwathele yalwe ya “tseye oshili” noya vule okuhupithwa. (1 Tim. 2:3, 4) Notashi tu etele enyanyu kaali shi kuyelekwa.