Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2014

Otu na “okuyamukula aantu” ngiini?

Otu na “okuyamukula aantu” ngiini?

Oohapu dheni nadhi kale aluhe oombwanawa, mu kale aluhe mu shi, nkene mu na okuyamukula aantu.’ —  KOL. 4:6.

1, 2. (a) Hokolola nkene sha simana okupula omapulo ga dhindwa nawa. (Tala ethano lyopetameko.) (b) Omolwashike kaatu na okukala twa tila okukundathana iinima mbyoka ya fa iidhigu?

OMIMVO dha piti, omwiitaali gumwe okwa li ta kundathana nomusamane gwe kee shi omwiitaali kombinga yOmbiimbeli. Monale, omusamane gwe okwa li oshilyo shongeleka yaBabiloni. Sho taya kundathana, omusamane gwe okwa ti okwi itaala mUukwatatu. Omukulukadhi sho a mono kutya omusamane gwe ku uvite ko kutya uukwatatu oshike, okwe mu pula a ti: “Sha hala kutya owi itaala kutya Kalunga oKalunga, Jesus oKalunga nombepo ondjapuki oKalunga, ihe nando ongawo, kaye li ooKalunga yatatu gumwe owala?” Omusamane okwa ti: “Aawe, hasho nando ndi itaala ngaaka!” Shoka osha pendutha oonkundathana oombwanawa kombinga yaKalunga.

2 Ehokololo ndyoka otali tu ulukile nkene sha simana okupula omapulo ga dhindwa nawa. Otali holola wo oshinima sha simana kutya katu na okukala twa tila okukundathana iinima ngaashi Uukwatatu, oheli nenge ngele Kalunga oko ngaa e li shili. Ngele otwa kala twi inekela muJehova nedheulo ndyoka he tu pe,  otatu vulu okukala hatu gandja omayamukulo ngoka tashi vulika ga gume omitima dhaapulakeni. (Kol. 4:6) Ngashingeyi natu kundathaneni nkene ooitaali ooyakwetu mboka ya pyokoka haya kundathana iinima mbyoka. Otatu ka tala nkene tatu vulu (1) okupula omuntu tu mone shoka i itaala, (2) oku mu fatululila nawa omanyolo (3) nokulongitha omathaneko tu mu yelithile oshitsa shontumba.

PULA OMUNTU WU MONE SHOKA I ITAALA

3, 4. Omolwashike sha simana okupula omapulo tu mone shoka omuntu i itaala? Gandja oshiholelwa.

3 Okupula omapulo ohaku tu kwathele tu mone shoka omuntu i itaala. Omolwashike sha simana? Omayeletumbulo 18:13 otaga ti: “Ngoka ta yamukula, manga inaa uva, otashi mu nikile uugoya notashi mu sitha ohoni.” Osha yela kutya manga inaatu tameka oonkundathana nomuntu, otashi ka kala pandunge tu tseye tango shoka i itaala. Ngele inatu shi ninga, nena otashi vulika tu hepithe ethimbo mokuyelitha oshinima shoka omuntu ini itaala nokuli musho. —  1 Kor. 9:26.

4 Natu tye nduno otatu kundathana nomuntu kombinga yoheli. Haantu ayehe yi itaala kutya oheli ehala lyolela moka aantu taya hepekwa momulilo. Aantu oyendji oyi itaala kutya oheli onkalo moka aantu ya topolwa ko kuKalunga. Onkee ano otatu vulu oku mu pula ngeyi: “Shaashi aantu oye na omadhiladhilo ga yoolokathana ngele tashi ya poheli, ngoye oho ti oheli oshike?” Shampa twa mono kutya okwe yi tala ko ngiini, nena otatu ka vula oku mu kwatha u uve ko shoka Ombiimbeli tayi ti kombinga yoheli.

5. Okupula omapulo otaku tu kwathele ngiini tu tseye kutya omolwashike omuntu i itaala elongo lyontumba?

5 Okupula omapulo ga dhindwa nawa otaku tu kwathele wo tu tseye kutya omolwashike omuntu i itaala elongo lyontumba. Pashiholelwa, ongiini nduno ngele otwa tsakanene nomuntu ngoka ta ti kutya ini itaala muKalunga? Oshipu okuthika pehulithodhiladhilo kutya okwa nwethwa mo komalongo gontumba, ngaashi elongo lyoevolusi. (Eps. 10:4) Ashike yamwe otashi vulika ya kale inaaya itaala muKalunga, molwashoka ya pita muudhigu naasho ye wete yalwe taya mono iihuna. Otashi vulika ya kale tayi ipula kutya ngele oku na Kalunga omunahole, omolwashike nee e etha tatu mono iihuna? Onkee ano ngele omupulakeni ota ti Kalunga ke ko, otatu vulu oku mu pula: “Mbela osho wa kala aluhe wi itaala ngawo?” Ngele okwa ti aawe, otatu vulu oku mu pula ngele opu na sha shoka she mu ningitha a kale ini itaala muKalunga. Eyamukulo lye otali ke tu kwatha tu mone nkene tatu vulu oku mu kwathela pambepo. —  Lesha Omayeletumbulo 20:5.

6. Oshike tu na okuninga ngele twa pula omuntu epulo?

6 Osha simana okupulakena nawa sho omuntu ta yamukula epulo lyoye e to mu pandula. Pashiholelwa, otashi vulika wu mone kutya ini itaala kutya oku na Omushiti omunahole, molwashoka a pitile muudhigu wontumba. Otashi ka kala pandunge oku mu ulukila uukwawo wanankali noku mu lombwela kutya inashi puka okwiipula kutya omolwashike tatu monene iihuna, manga inaatu mu lombwela kutya Kalunga oko e li. (Hab. 1:2, 3) Ngele otu ulike ohole neidhidhimiko, nena otashi vulika shi mu inyengithe a kale nehalo lyokwiilonga oshindji.

FATULULILA NAWA AANTU OMANYOLO

Oshike tashi ke tu kwathela tu pondole momapya? (Tala okatendo 7)

7. Oshike hashi tu kwathele unene tu pondole muukalele?

7 Ngashingeyi natu kundathaneni nkene tu na okufatululila nawa aantu omanyolo. Okulongitha Ombiimbeli muukalele okwa simanenena, oshoka ohaku tu kwathele tu ‘kale twa gwana twa pwa notwo opalela oshilonga kehe oshiwanawa.’ (2 Tim. 3:16, 17) Otatu ka pondola owala muukalele, ngele ohatu yelitha  nokufatulula nawa oovelise ndhoka tatu leshele omuntu, ihe hamolwaasho tatu mu leshele oovelise odhindji. (Lesha Iilonga 17:2, 3.) Opo tu shi thaneke, natu taleni kiiholelwa itatu tayi landula.

8, 9. (a) Ongiini tatu vulu okutompathana nomuntu ngoka i itaala kutya Jesus oye Kalunga? (b) Ngoye oho tompathana ngiini nomupondo naantu mboka yi itaala elongo ndika?

8 Oshiholelwa 1: Natu tye nduno otwa tsakaneke omuntu muukalele ngoka i itaala kutya Jesus oye Kalunga. Oovelise dhini tatu ka longitha tu mu tompe kutya hasho? Otatu vulu okulesha naye shoka Jesus a popi muJohannes 6:38, sho a ti: “Oshoka ngame onda za megulu; inandi ya okugwanitha ehalo lyandje mwene, ihe olyaanguka a tuma ndje.” Shampa twe yi lesha, otatu vulu oku mu pula kutya: “Ngele Jesus oye Kalunga, nena olye e mu tumu e ye kombanda yevi? Mbela Ngoka e mu tumu ko kombanda yevi ke mu vule? Otu shi shi kutya omutumi oku vule omutumwa.”

9 Sha faathana, otatu vulu oku mu leshela oohapu dhomuyapostoli Paulus mAafilippi 2:9 kombinga yaashoka Kalunga a ningi, sho Jesus a yumuka kuusi. Ovelise otayi ti: “Kalunga okwe mu [Jesus] yele pombandambanda nokwe mu luku edhina enene li vule omadhina agehe.” Opo tu kwathele omuntu a dhiladhile muule kombinga yovelise ndjoka, otatu vulu oku mu pula ngeyi: “Ngele Jesus manga inaa sa okwa li e thike puKalunga, ye Kalunga te ke mu pa ondondo onene, mbela shoka itashi ningi Jesus a kale e vule Kalunga? Ihe mbela oku na ngaa omuntu ta vulu okukala e vule Kalunga?” Ngele omuntu ngoka okwa simaneka Ombiimbeli nomwiifupipiki, omapulo ngoka otage ke mu inyengitha a konakone oshinima shoka muule. —  Iil. 17:11.

10. (a) Ongiini tatu vulu okutompathana nomuntu ngoka i itaala moheli? (b) Ngoye oho tompathana ngiini nomupondo naantu mboka yi itaala moheli?

10 Oshiholelwa 2: Natu tye ando omukwangeleka gwontumba ke shi uvite ko sho to ti kutya aakolokoshi itaya ka pya moheli. Otashi vulika i itaala ngaaka, shaashi u uvite kutya aakolokoshi oye na okugeelwa molwiimbuluma mbyoka haya longo. Otatu ke mu yelithila ngiini? Tango otatu vulu oku mu shilipaleka kutya aakolokoshi otaya ka geelwa. (2 Tes. 1:9) Nopo nduno tatu mu pula a leshe Genesis 2:16, 17, ngoka ta popi kutya ngele omuntu okwa yono, oshilanduliko eso. Otatu vulu oku mu yelithila kutya okuyona kwaAdam okwa ningi aantu ayehe aalunde. (Rom. 5:12) Ihe otatu ke mu yelithila wo kutya Kalunga ke na mpo a popya kutya aantu otaya ka pya moheli. Opo nduno otatu vulu oku mu pula kutya: “Ngele Adam naEva oya li taya ka pya moheli sigo aluhe, mbela ando Kalunga ine ya londodha  kombinga yaashoka?” Opo nduno tatu lesha Genesis 3:19 moka ya pewa egeelo konima sho ya yono. Ovelise ndjoka inayi popya sha kombinga yokupya momulilo. Pehala lyaashono, Adam okwa lombwelwa kutya ota ka shuna mevi. Otatu vulu nduno oku mu pula kutya, “Osha li ngaa shi li pauyuki okulombwela Adam kutya ota ka shuna mevi ngele nani okwa li ta ka pya moheli?” Ngele omuntu oha dhiladhila, omapulo ngaka otage ke mu kwathela a dhiladhile muule kombinga yaashika.

11. (a) Ongiini tatu vulu okutompathana nomuntu ngoka i itaala kutya aantu ayehe aawanawa otaya yi megulu? (b) Ngoye oho tompathana ngiini nomupondo naantu mboka yi itaala kutya aantu ayehe aawanawa otaya yi megulu?

11 Oshiholelwa 3: Natu tye nduno otwa tsakaneke omuntu muukalele ngoka i itaala kutya aantu ayehe aawanawa otaya yi megulu. Ngele omuntu osho i itaala ngaaka, otashi vulika u uve ko Ombiimbeli papuko. Pashiholelwa, natu tye nduno otatu kundathana naye Ehololo 21:4. (Lesha.) Konima yoku yi lesha, otapeya a dhiladhile kutya iinima mbyoka otayi ka ningwa megulu. Ongiini tatu vulu okutompathana naye? Pehala lyoku mu leshela omanyolo galwe, otatu vulu oku mu tompa tatu longitha owala ovelise ndjoka. Otayi ti: ‘Itaku ka kala we eso.’ Otatu vulu oku mu pula ngele ota tsu kumwe kutya opo oshinima kaashi kale po we, ndishi oosho sha li po nale? Otashi vulika a tse kumwe nangoye. Nopo nduno otatu vulu okuyelitha kutya megulu ihamu siwa, ihe okombanda yevi owala. Osha yela kutya Ehololo 21:4 otayi popi kombinga yomalaleko nuuyamba ngoka Kalunga te ke tu pa monakuyiwa kombanda yevi. —  Eps. 37:29.

LONGITHA OMATHANEKO WU YELITHE OSHITSA SHONTUMBA

12. Omolwashike Jesus a popi momayele, sho ta longo aantu?

12 Jesus sho tu uvitha, ina pula owala omapulo, ihe okwa longitha wo omayele nenge omathaneko. (Lesha Mateus 13:34, 35.) Jesus okwa longitha omayele, opo e ete puuyelele shoka shi li momitima dhaapulakeni ye. (Mat. 13:10-15) Omayele oga kwathele wo aapulakeni yaJesus ya dhimbulukwe shoka te ya longo. Otatu vulu ngiini okulongitha omathaneko sho tatu longo aantu?

13. Oshiholelwa nenge ethaneko lini tatu vulu okulongitha tu yelithe kutya Kalunga oku vule Jesus?

13 Oshiwanawa okulongitha omathaneko omapu. Pashiholelwa, uuna tatu yelithile omuntu kutya Kalunga oku vule Jesus otatu vulu oku shi thaneka. Opo ya yelithe ekwatathano lyawo, Kalunga naJesus oya longitha oshiholelwa shomuvali nomwana. Kalunga okwa ti Jesus Omwana, ye Jesus okwa ti Kalunga oTate gwe. (Luk. 3:21, 22; Joh. 14:28) Opo ihe otatu vulu oku mu pula kutya: “Natu tye nduno owa hala okulonga ndje kutya aantu yontumba oye thike pamwe, mbela oto ka longitha oshiholelwa shaantu yeni yomegumbo limwe wu kwathele ndje ndi uve ko nawa kutya aantu mboka oya pambathana ngiini?” Otashi vulika e ku pe oshiholelwa shaamwayinathana nenge shaakwana. Ngele osho e ku pe, oto vulu okutya oshiholelwa she otashi opalele. Opo nduno to mu pula to ti: “Ngele ngame nangoye otatu vulu okudhiladhila nuupu oshiholelwa sha tya ngawo, ongiini nduno kombinga yaJesus, Omulongi omunene? Mbela naye ando ina vula okulongitha oshiholelwa sha faathana? Ihe pehala lyaashono Jesus okwa ti Kalunga oye He, nokungawo Jesus okwa holola kutya Kalunga oku mu vule.”

14. Ethaneko lini tali vulu okukwathela omuntu a mone kutya itashi ka kala pandunge Kalunga a pitike Ondiyapoli yi fike aantu moheli?

14 Natu taleni koshiholelwa shilwe. Aantu yamwe oyi itaala kutya Satana oye mwene gwoheli. Opo tu kwathele omuvali a mone kutya itashi ka kala pandunge Kalunga a pitike Ondiyapoli yi fike aantu moheli, otatu vulu oku shi thaneka ngeyi: “Natu tye nduno  okamwoye ihaka vulika notaka ningi iinima iiwinayi. Oto ka ninga po shike?” Otashi vulika omuvali a tye ote ke ka pukulula. Otapeya a ninge kehe shoka ta vulu e ka kwathele ke ethe po omikalo dhako omiwinayi. (Omayel. 22:15) Nopo nduno otatu vulu oku mu pula kutya ota ka ninga po shike, ngele okamwana inaka hala okulundulula omikalo dhako. Aavali oyendji ohaya ti kutya otaye ke ka geela. Nena otatu vulu oku mu pula ngeyi: “Ongiini mbela ngele owu uvu kutya okamwoye oka nwethwa mo komukolokoshi?” Osha yela kutya omuvali ota ka kala a geela omuntu a tya ngaaka. Opo tu tse omuthindo oshitsa shoka, otatu vulu oku pula omuvali kutya: “Mbela oto ka pula ngaa omuntu ngoka wu shi nawa kutya oye e ka nwetha mo oye e ka geele?” Nandonando. Sha faathana, Kalunga ita pitike aantu ya geelwe kuSatana ngoka oye e ya nwetha mo ya longe uuwinayi!

KALA WU NA ONDJELE

15, 16. (a) Omolwashike kaatu na okutegelela kehe omuntu tatu uvithile a taambe ko etumwalaka lyUukwaniilwa? (b) Mbela otu na okukala tu na omagano gokupopya, opo tu kale hatu pondola mokulonga aantu? Shi yelitha. (Tala wo oshimpungu “Iileshwa mbyoka tayi tu kwathele tu gandje eyamukulo.”)

15 Otu shi shi kutya haayehe taya ka taamba ko etumwalaka lyUukwaniilwa, nonando otu longithe omapulo ga dhindwa nawa, tu tompathane nayo nawa nenge tu longithe omathaneko omapu. (Mat. 10:11-14) Nokuli netumwalaka lyaJesus, Omulongi kaaku na we, kalya li lya taambiwa ko kaantu oyendji. —  Joh. 6:66; 7:45-48.

16 Mepingathano naashoka, otatu vulu okupondola muukalele nonando otu uvite kutya katu na omagano gokupopya. (Lesha Iilonga 4:13.) Oohapu dhaKalunga otadhi tu shilipaleke kutya “ayehe mboka ya hala okumona omwenyo gwaaluhe” otaya ka taamba ko onkundana ombwanawa. (Iil. 13:48, NW) Onkee ano natu kale tu na ondjele naamboka tatu uvithile onkundana ombwanawa yUukwaniilwa noinatu kala twi idhina. Natu kaleni tu na omukumo kutya edheulo ndyoka Jehova te tu dheula nalyo otali ke tu etela uuwanawa nosho wo mboka taya pulakene kutse. (1 Tim. 4:16) Jehova ota vulu oku tu kwathela tu kale tu shi “okuyamukula aantu.” Ngaashi tatu ke shi mona moshileshwa tashi landula, omukalo gumwe moka tatu vulu okupondola muukalele wetu, okuningila yalwe shoka twa hala ye tu ningile.