Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2014

 OONDJOKONONA

Jehova okwa kwathela ndje shili

Jehova okwa kwathela ndje shili

Onda heluka meshina pamwe nomuyalekwa gwandje Evelyn positaasi yaHornepayne, okamukunda ke li muumbangalantu waOntario moKanada. Okwa li kwa talala noonkondo ongulonene ndjoka. Konima sho omumwatate gumwe e tu ile po, otwa ka lya olusitati pamwe nomukulukadhi gwe nomwanamati, e tatu ka longa egumbo negumbo molumi. Komatango onda ka gandja oshipopiwa shandje shotango ndi li omutonateli omweendi notwa li po owala yatano.

SHAASHI onda li ndi na ohoni, kanda li ndu uvu nayi sho poshipopiwa shandje shoka nda gandja mo 1957, pwa li pu na owala aantu aashona. Nokuli sho nda li okanona, onda li handi holama uuna paandjetu pwe ya aayenda, kutya nduno ondi ya shi.

Otashi vulika wu kumwe okuuva kutya iinakugwanithwa yandje ayihe mehangano lyaJehova oya kala ya kwatela mo okweendathana naantu oyendji, yamwe ookuume nayalwe kandi ya shi nando onale. Ihe nando ongaaka, onda kala ndi na ohoni nondu uvite inaandi gwana, nomolwashoka itandi vulu okutya onde shi ningi koonkondo dhandje mwene. Ihe onda mono nkene Jehova a kala ta gwanitha po euvaneko lye, ndyoka tali ti: “Otandi ku kankameke e tandi ku kwatha; otandi ku gamene notandi ku hupitha.” (Jes. 41:10) Okwa kala unene ha kwatha ndje okupitila mooitaali ooyakwetu. Nandi mu kuthile ko kashona kombinga yayamwe yomuyo mboka ya kwatha ndje okuza sho nda li okanona.

OKWA LI TA LONGITHA OMBIIMBELI NOKAMBO OKALUUDHE

Ndi li pofaalama yetu muumbugantuninginino waOntario

Ongula yOsoondaha yimwe mo 1940 nasha, Elsie Huntingford okwe ya pofaalama yetu yi li muumbugantuninginino  waOntario. Meme oye e mu egulula, omanga ngame natate, ngoka naye a li e na ohoni, twa kuutumba megumbo twa pulakena. Shaashi tate okwa li ta dhiladhila kutya meme Huntingford ota landitha, tate okwa yi pomweelo, oshoka okwa li a tila kutya pamwe meme ota ka landa sha inaatu shi pumbwa. Sho tate a ti inatu pumbwa sha, meHuntingford okwa ti: “Inamu hala ekonakonombiimbeli?” Tate okwe mu yamukula a ti: “Aaye, ekonakonombiimbeli otwa hala.”

MeHuntingford okwi ile pethimbo lyo opala. Aavali yandje oya adhika owala opo ya thigi po ongeleka yo-United Church of Canada moka ya kala yi itula ethimbo ele. Oya zile mo shike? Omusita okwa li ha nateke ombapila yomadhina gaamboka haya gandja ongalo posheelo shongeleka. Molwashoka aavali yandje kaya li haya vulu okugandja oshimaliwa oshindji, omadhina gawo oga li aluhe haga kala kehulilo lyomusholondondo. Aakuluntugongalo yongeleka oya li haye ya thiminike wo ya gandje oshimaliwa oshindji. Omusita gumwe mongeleka ndjoka okwa zimine kutya omalongo ngoka ha longo aantu ine gi itaala, ooshoka owala inaa hala okukanitha iilonga ye. Nomolwashono twa zi mo mongeleka, ihe otwa li natango tu na ompumbwe yopambepo.

Molwashoka Oonzapo dhaJehova odha li dhi indikwa moKanada, meHuntingford okwa li ha konakona natse ta longitha owala Ombiimbeli nokambo okaluudhe moka a nyola iitsa yontumba. Sho a mono kutya itatu ke mu lopota kepangelo, okwa tameke oku tu etela iileshomwa yopaMbiimbeli. Otwa li hatu yi holeke nawa, konima yekonakono kehe. *

Aavali yandje oya taamba ko oshili e taya ninginithwa mo 1948

Nonando opwa li omapataneko nomandangalati galwe, omumwameme Huntingford okwa kala tu uvitha onkundana ombwanawa nuulaadhi. Uulaadhi we owa kwathele ndje ndi dhiginine oshili. Konima yomvula yimwe, sho aavali yandje ya ninginithwa, nangame onda ninginithwa mo 27 Febuluali 1949, metemba lyosheela lyokunwina iimuna. Onda li ndi na oomvula 17. Okuza mpoka onda tokola ndi ye miilonga yethimbo lyu udha.

JEHOVA OKWA TSU NDJE OMUKUMO

Onda li nda kumwa sho ndi ithanwa kObetel mo 1952

Onda li nda tila okutameka uukokolindjila.  Shaashi onda li ndi itaala kutya onda pumbwa oshimaliwa shokukwathela ndje sho te kokola ondjila, onda longo mombaanga nomombelewa yimwe uule wokathimbo. Ihe oshimaliwa shandje kanda li nde shi kwata nawa. Tate Ted Sargent okwa ladhipike ndje ndi ikolelele nokwiinekela muJehova. (1 Ondjal. 28:10) Shoka osha tsu ndje omukumo e tandi tameke uukokolindjila muNovomba 1951. Onda li ndi na owala oodola 40, okambasikela okakulu nondjato yomambo ompe. Ihe Jehova okwa kala aluhe ta sile ndje oshimpwiyu. Onda pandula sho tate Ted a ladhipike ndje ndi kokole ondjila! Shika oshe etela ndje omalaleko nuuyamba ogendji.

Ongulohi yimwe muAuguste 1952, onda yakula ongodhi ya zi koToronto. Aamwatate koshitayimbelewa shOonzapo dhaJehova moKanada oya li ya hala ndi ka longe kObetel okuza muSeptemba. Nonando onda li ndi na ohoni noinandi enda ko nale, onda li nda halelela okuya ko, oshoka aakokolindjila yalwe oya ti kutya okuuwanawa. Ondi igilile ko nziya.

“ULUKILA AAMWATATE KUTYA OWU NA KO NASHA NAYO”

Konima yoomvula mbali sho nda thiki kObetel, onda pingene po Bill Yacos ngoka a li omuunganeki gwolutu lwaakuluntugongalo megongalo lyaShaw moToronto. Onda li ndi na owala oomvula 23 nokanda li ndi na owino oyindji. Ihe tate Yacos okwa li u ulukile ndje neifupipiko nonohole shoka ndi na okuninga. Jehova naye okwa li a kwatha ndje lela.

Tate Yacos okwa li omulumentu omufupi ngoka a li omunyanyukwi noku hole shili aantu, nooitaali oya li ye mu hole. Okwa li aluhe ha talele po ooitaali momagumbo gawo nuuna kaaye na omaupyakadhi. Okwa ladhipike ndje nangame ndi kale wo osho handi ningi nondi kale handi longo naamwatate momapya. Okwa lombwele ndje a ti: “Ken, ngele owu ulukile aamwatate kutya owu ya hole, itaya ka tala komapuko goye.”

NEKULU LYANDJE OKWA KALA OMUDHIGININI

Jehova okwa kwatha ndje momukalo gwa dhenga mbanda okuza muJanuali 1957. Momwedhi moka onda hokana naEvelyn, ngoka a pita ongundu onti-14 yOsikola yaGilead. Manga inaatu hokana, okwa li hu uvithile aapopi yOshifulaanisa moQuebec. Pethimbo ndyoka ongeleka yaKatoolika kaRoma oyo ya li tayi ti pii moQuebec. Onkee ano Evelyn okwa li hu uvitha nuudhigu, ihe nonando ongaaka, okwa kala omudhiginini kuJehova.

Ngame naEvelyn otwa hokana mo 1957

Evelyn okwa kala wo omudhiginini kungame. (Ef. 5:31) Nokuli uudhiginini we owa li wa yelekwa konima owala sho twa hokana. Otwa li tu na okuya koFlorida muAmerika, ihe konima owala yesiku lyohango yetu, oshitayimbelewa osha pula ndje ndi ye uule woshiwike komutumba kObetel yaKanada. Omutumba nguka ogwa yi moshipala elongekidho lyetu, ihe ngame naEvelyn otwa li twa tokola okuninga kehe shoka Jehova te tu pula tu ninge. Onkee ano inatu ya we. Oshiwike shoka Evelyn okwa kala ta longo momapya popepi noshitayimbelewa. Nonando aantu moshitopolwa kaya li ya fa mboka a li hu uvithile moQuebec, okwi idhidhimike.

 Pehulilo lyoshiwike, onda pulwa ndi ninge omutonateli omweendi kuumbangalantu waOntario. Nonando onda adhika opo owala nda hokana nondi na owala oomvula 25 nokanda li ndi na naanaa owino, otwa yi twi inekela muJehova. Otwa kwata eshina lyokolutenda pamwe naatonateli aayendi ya pyokoka mboka ya li taya shuna kiitopolwa hoka haya longele. Oya li ye tu tsu omukumo. Omumwatate gumwe okwe tu pe po okandunda ke mu na okambete, opo kaatu lale twa kuutumba. Ongulonene yesiku lya landula, omasiku 15 konima owala sho twa hokana, otwa ka talela po okangundu kOonzapo moHornepayne, ngaashi nde shi popi petameko.

Monkalamwenyo yetu omwa li natango tamu ka ningwa omalunduluko ogendji. Pehulilo lyo 1960, manga nda li omutonateli gwoshitopolwa ondi ithanwa ndi ka hite ongundu onti-36 kOsikola yaGilead, ndjoka ya li hayi kutha oomwedhi omulongo noya li tayi ka tameka muFebuluali 1961 moBrooklyn moNew York. Onda li nda nyanyukwa, ihe onda li ndi na oomwenyo mbali, oshoka Evelyn ini ithanwa. Pehala lyaashoka, okwa pulwa a nyole ombilive tayi popi kutya okwi ilongekidha okukala twa topoka oomwedhi omulongo. Evelyn oshinima shika oshe mu lilitha, ihe otwa tokola ndi ye kosikola nokwa li a nyanyukwa sho tandi ka dheulwa koGilead.

Moomwedhi ndhoka Evelyn okwa kala ha longo moshitayimbelewa moKanada. Oya li mondunda yimwe nameme Margaret Lovell ngoka a li omugwayekwa. Ngame naEvelyn otwa li twa yuulukwathana shili. Ihe kekwatho lyaJehova, otwa vulu okugwanitha po iinakugwanithwa yetu yopakathimbo. Osha gumu ndje noonkondo sho Evelyn a li i ilongekidha okukala twa topoka, opo ndi mone edheulo ndyoka tali ke tu kwathela tu vule okulongithwa kuJehova nokehangano lye.

Konima yoomwedhi ndatu moGilead, tate Nathan Knorr, ngoka oye a li ta tonatele iilonga pethimbo mpoka, okwa pula ndje ndi ninge oshinima inaandi shi tegelela. Okwa li a hala ndi thige po osikola ndi ka longe Osikola yUukalele wUukwaniilwa koshitayimbelewa moKanada uule wokathimbo. Okwa lombwele ndje kutya ngele itashi vulika, nandi popye. Okwa ti otandi vulu okumana Osikola yaGilead, opo pamwe ndi ka ninge omutumwa. Okwa ti wo kutya ngele onda shuna koKanada, otapeya kaandi ki ithanununwe we koGilead, nokonima otashi vulika ndi ka shunwe muukokolindjila moKanada. Okwa ti nandi tokole konima ngele nda popi nanekulu lyandje.

Molwashoka onda li nale ndi shi nkene Evelyn a tala ko iinakugwanithwa yopambepo, onda lombwele tate Knorr te ti: “Kehe shimwe shoka ehangano lyaJehova lya hala tu ninge, otatu ka kala twa nyanyukwa oku shi ninga.” Otwa kala aluhe hatu ti, kehe oshinakugwanithwa shoka ehangano lyaJehova tali tu pe otatu ke shi taamba kutya nduno hasho naanaa twa hala.

MuApilili 1961, onda shuna koKanada ndi ka longe Osikola yUukalele wUukwaniilwa. Konima  yethimbo otwa ka longa mObetel. Onda li nda kumwa sho ndi ithanununwa ndi ka hite ongundu onti-40 kOsikola yaGilead, ndjoka ya li tayi ka tameka 1965. Evelyn natango okwa li e na okunyola ombilive kutya okwi ilongekidha okukala twa topoka. Ihe konima yiiwike yontumba, naye okwi ithanwa kosikola oyo tuu ndjoka, naashika oshe tu nyanyudha shili.

Sho twa thiki koGilead, tate Knorr okwe tu lombwele kutya ayehe mboka haya longwa mOshifulaanisa, ngaashi tse, ohaya tuminwa kuAfrika. Ihe sho twa mana, otwa tuminwa koKanada. Onda langekwa po ndi li omutonateli gwoshitayimbelewa (Omuunganeki gwOkomitiye yOshitayimbelewa). Onda dhimbulukitha tate Knorr kutya ngame omushona, oshoka onda li ndi na owala oomvula 34. Ihe okwa tsu ndje omukumo. Okuza ketameko, onda kala handi pula omayele kwaamboka ya pyokoka mObetel, manga inaandi ninga omatokolo ga kwata miiti.

OBETEL EHALA LYOKWIILONGA NOLYOKULONGA YALWE

MObetel onda mono ompito yokwiilonga kuyalwe. Onda simaneka iilyo yilwe yOkomitiye yOshitayimbelewa. Ondi ilongo wo oshindji kaalumentu naakiintu Aakriste, aagundjuka naakokele, mboka twa tsakanena nayo mObetel nomomagongalo gi ili nogi ili.

Tandi kwatele komeho enyolo lyesiku mObetel yaKanada

Okulonga mObetel okwa pa ndje wo ompito yokulonga yalwe nokukoleka eitaalo lyawo. Omuyapostoli Paulus okwa lombwele Timoteus a ti: “Kala mwaambyoka yoshili, ngaashi we yi longwa.” Okwa ti wo: “Dhiginina oohapu ndhoka u uvu tandi dhi uvitha montaneho yoonzapo oyendji. Dhi gandja kaantu ye shi kwiinekelwa, mboka taa vulu oku dhi longa yakwawo.” (2 Tim. 2:2; 3:14) Omathimbo gamwe Aakriste ooyakwetu ohaya pula ndje kutya ondi ilonga shike moomvula 57 ndhoka nda kala mObetel. Ohandi yamukula paufupi kutya, “Ngele owa pulwa wu ninge sha kehangano lyaJehova, shi ninga neendelelo wu na omukumo kutya Jehova ote ke ku kwatha.”           

Ondi wete owala pwa fa inaapu pita ethimbo ele, okuza sho nde ya kObetel ndi li omugundjuka nondi na ohoni. Ihe oomvula adhihe ndhika, Jehova okwa kala ‘ta tsu ndje omukumo.’ Unene tuu okupitila mooitaali ooyakwetu mboka haya kwathele ndje nolukeno nopethimbo lyo opala, Jehova okwa kala ta shilipaleke ndje ta ti: “Ino tila; otandi ku kwatha.” —  Jes. 41:13.

^ okat. 10 Mo 22 Mei 1945, epangelo lyaKanada olya pitike iilonga yetu.