1, 2. Opo tu kale twa hokiwa kuKalunga, mbela ‘otu na okukala aantu ya tya ngiini’?

AANTU oyendji ohaya kala tayi ipula naashoka aantu taya dhiladhila kombinga yawo. Ihe tu li Aakriste, mbela katu na okukala tu na ko nasha unene nankene Jehova e tu tala ko? Nokuli, oye owala Omuntu a simanenena meshito alihe noye “oluthithiya lwomwenyo.” — Eps. 36:9.

² Opo a tse omuthindo kutya otu na ‘okukala aantu ya tya ngiini’ pataloko lyaJehova, omuyapostoli Petrus ote tu ladhipike tu kale ‘moondjenda oondjapuki nomiilonga yometilokalunga.’ (Lesha 2 Petrus 3:11.) Opo tu kale twa hokiwa kuKalunga, ‘oondjenda’ dhetu odhi na okukala oondjapuki, sha hala okutya, twa yogoka pamikalo, pamadhiladhilo, nopambepo. Otu na wo okulonga ‘iilonga yometilokalunga’ nesimaneko lyokusimaneka Kalunga nonohole yuudhiginini yoku mu hola. Onkee ano, opo tu kale twa hokiwa kuye katu na owala oku shi ulika miilonga yetu ihe nomuuntu wetu womeni wo. Molwaashoka Jehova oye ‘omukonakoni gwoomwenyo,’ oku shi shi kutya iilonga yetu iiyapuki nenge hasho, nota tseya wo kutya ngele oye awike tatu longele nenge hasho. — 1 Ondjal. 29:17.

3. Omapulo geni tu na okwiipula ngele tashi ya pekwatathano lyetu naKalunga?

³ Satana Ondiapoli, ina hala nando tu kale twa hokiwa kuKalunga. Nokuli, oha ningi ngaashi ta vulu e tu ningithe tu yone po ekwatathano lyetu naJehova. Satana iha kwatakwata mokulongitha iifundja nomakoto e tu heke noku tu gamune ko kuKalunga ngoka hatu longele. (Joh. 8:44; 2 Kor. 11:13-15) Onkee ano, oshi li pandunge twi ipule tatu ti: ‘Satana oha pukitha aantu ngiini? Oshike tandi vulu okuninga opo ndi kaleke po ekwatathano lyandje naJehova?’

4. Nelalakano lyokuyona po ekwatathano lyetu naKalunga, Satana oha kambadhala okukwata ko shike, nomolwashike?

⁴ Omulongwa Jakob okwa nyola a ti: “Omuntu oha makelwa  kuuhalu we mwene, mboka tau mu hekaheka e tau mu yulu. Uuhalu ngele wa ningi uusimba, otau vala uulunde; nuulunde ngele wa koko, otau vala eso.” (Jak. 1:14, 15) Nelalakano lyokuyona po ekwatathano lyetu naKalunga, Satana oha kambadhala okukwata ko omitima dhetu moka omo hamu zi omahalo getu.

5, 6. (a) Satana oha longitha shike opo a kwate ko omitima dhetu? (b) Satana oha longitha omaheka geni a nyateke omahalo getu gomomitima, nokwa pyokoka shi thike peni moku ga longitha?

⁵ Satana oha longitha shike opo a kwate ko omitima dhetu? Ombiimbeli oya ti: “Uuyuni auhe ou li mepangelo lyomuhindadhi.” (1 Joh. 5:19) Iilwitho yaSatana oya kwatela mo “iinima ayihe mbyoka yi li muuyuni.” (Lesha 1 Johannes 2:15, 16.) Muule woomvula omayuvi, Ondiapoli oya kala nokuunganeka nuukeka uuyuni yi heke aantu. Molwaashoka otu li muuyuni mbuka, otwa pumbwa okwiigamena komakoto ge. — Joh. 17:15.

⁶ Satana oha longitha omikalo dhontumba a nyateke omahalo getu gomomitima. Omuyapostoli Johannes okwa tumbula iinima itatu mbyoka Satana ha longitha e tu heke: (1) “uuhalu wopantu,” (2) “okuhola mbyoka aantu taye yi tala,” nosho wo (3) ‘okuhola mbyoka aantu taye yi itangele.’ Satana okwa li a longitha iinima mbyoka a makele Jesus sho a li mombuga. Molwaashoka Satana okwa kala nokulongitha oomwigo ndhoka oomvula odhindji, kunena ohe dhi longitha momukalo ngoka hagu pondola. Oku shi kutya omuntu kehe ote mu kwata nomwigo guni. Manga inaatu ka tala kutya ongiini tatu vulu okwiigamena koomwigo ndhoka, natu tale nkene Ondiapoli ya li ye shi pondola mokulongitha omaheka gontumba sho ya makele Eva ihe inayi pondola sho ya li ya makele Omwana gwaKalunga.

7. Satana okwa li a longitha ngiini “uuhalu wopantu” a makele Eva?

⁷ Aantu ayehe oya pumbwa iikulya opo ya kale nomwenyo. Omushiti okwa shita evi momukalo ngoka hali vulu okugandja iikulya oyindji. Satana ota vulu okulongitha ehalo lyetu lyopaunshitwe lyiikulya nelalakano lyoku tu ethitha po okulonga ehalo lyaKalunga. Natu tale kunkene a li e shi ningile Eva. (Lesha Genesis 3:1-6.) Satana okwa li a lombwele Eva kutya ota vulu okulya iiyimati ‘yokomuti gwokutseya uuwanawa nuuwinayi’ e ta kala inaa sa, a ti kutya mesiku tuu ndyoka ta li ko, okwa li ta ka fa Kalunga. (Gen. 2:9) Kungawo, Ondiapoli oya li yu ulike kutya Eva ka li a pumbwa okuvulika kuKalunga opo a kale nomwenyo. Mbyoka kaya li tuu iifundja iikukutu! Konima sho edhiladhilo ndyoka lya li lya kunwa momadhiladhilo ge, Eva okwa li e na omahogololo gaali: Okwa li ta vulu okutinda edhiladhilo ndyoka nenge okwa li ta vulu okukala ta dhiladhila kulyo, shoka sha li tashi ka kokeka ehalo lye lyokulya oshiyimati. Nonando okwa li ta vulu okulya komiti dhilwe adhihe dhomeyana, Eva okwa li a hogolola okukala ta dhiladhila kwaashoka Satana e mu  lombwele kombinga yomuti ngoka gu li pokati keyana, nokwa “toonona ko iiyimati yimwe e ta li.” Kungeyi, Satana okwa li a tula momutima gwaEva okahalu kaashoka sha li shi indikwa kOmushiti.

8. Ongiini Satana a li a longitha “uuhalu wopantu” a kambadhale a heke Jesus, nomolwashike a li inaa pondola?

⁸ Satana okwa li a longitha omukalo gwomakoto gwa faathana sho a li a kambadhala okumakela Jesus mombuga. Konima sho Jesus a li i idhilike iikulya omasiku omilongo ne, Satana okwa li a kambadhala oku mu makela mokulongitha ehalo lye lyiikulya. Satana okwa ti: “Ngele ngoye Omuna gwaKalunga, lombwela emanya ndika, li shituke oshikwiila.” (Luk. 4:1-3) Jesus okwa li e na omahogololo gaali: Okwa li ta vulu okuhogolola kaa longithe oonkondo dhe dhopashikumithalonga a gwanithe po ompumbwe ye yiikulya, nenge okwa li ta vulu okuhogolola e dhi longithe. Jesus okwa li e shi kutya ke na okulongitha oonkondo ndhoka omolwomalalakano gokwiihola mwene. Nonando okwa li a sa ondjala, ekwatathano lye naJehova olyo lya li oshinima shotango komeho yiikulya. Jesus okwa li a yamukula a ti: “Okwa nyolwa: ‘Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.’” — Mat. 4:4.

9. Uutumbulilo “okuhola mbyoka aantu taye yi tala” otawu ti shike, nongiini Satana a li a longitha ehalo ndika moshinima shaEva?

⁹ Johannes okwa li wo a popi kutya “okuhola mbyoka aantu taye yi tala” oku li eheka. Uutumbulilo mboka otawu ulike kutya omuntu ota vulu okutameka okuhola oshinima moku shi tala owala. Moshinima shaEva, Satana okwa longitha ehalo ndika, a ti: “Omeho geni otaga tonata.” Shi thike ngaa mpoka Eva a kala ta tala komuti ngoka gwi indikwa, opo ngaa pwa kala pu thike okukala a halelela okulya iiyimati yagwo. Eva okwa li a mono kutya omuti ogu “etitha olwiho okuliwa.”

10. Omomukalo guni Satana a li a longitha uuhalu ‘wokuhola mbyoka aantu taye yi tala’ a makele Jesus, na Jesus okwa li i inyenge ngiini?

¹⁰ Ongiini kombinga yaJesus? Satana okwa li u “ulukile [Jesus] mepathimo lyeho omapangelo agehe gomuuyuni. Omuhindadhi okwa ti kuye: ‘Otandi ku ningi omupangeli gwaayihe notandi ku pe omauyamba agehe.’” (Luk. 4:5, 6) Jesus ka li ta vulu okumona omaukwaniilwa agehe nomeho gogenege nziyanziya, ihe Satana okwa li u uvite kutya esimano lyomaukwaniilwa ngoka, ngaashi ege mu ulukile okupitila memoniko, otaga ka ningitha Jesus a kale e ga hokwa. Satana okwe mu lombwele kee na ohoni a ti: “Ayihe mbika otayi ningi yoye, ngele to tsile ndje oongolo e to galikana ndje.” (Luk. 4:7) Jesus ka li nando a hala okukala omuntu ngoka Satana a li e mu halela a kale. Jesus okwa li e mu yamukula mbala, a ti: “Okwa nyolwa: ‘Omuwa Kalunga koye oye awike u na oku mu galikana noku mu longela.’” — Luk. 4:8.

11. Eva okwa li a hekwa ngiini kuSatana?

¹¹ Mokutotha mo iinima yomuuyuni, Johannes okwa li a tumbula ‘okuhola mbyoka aantu taye yi itangele.’ Sho Adam naEva oyo awike aantu ya li kombanda yevi, osha yela kutya kaya li taya vulu ‘okwiitangela yalwe iinima mbyoka ye na.’ Ihe oya li ye na uuntsa. Sho Satana a li ta makele Eva, okwa li ta ti kutya Kalunga okwe mu tindila sha oshiwanawa. Ondiapoli oya li ye mu lombwele kutya mesiku ndyoka ta ka lya “komuti gwokutseya uuwanawa nuuwinayi,” okwa li ta ka ‘kala a fa Kalunga, mokutseya uuwanawa nuuwinayi.’ (Gen. 2:17; 3:5) Kungeyi, Satana okwa li ta ti kutya Eva ota vulu okukala a manguluka ko kuJehova. Otashi vulika Eva a li i itaale iifundja mbyoka omolwuuntsa. Okwa li a li komuti ngoka ya li yi indikwa kaaya lye ko, ta dhiladhila kutya ka li ta ka sa shili. Ka li tuu a puka!

12. Satana okwa li a kambadhala okumakela Jesus momukalo gulwe guni, na Jesus okwa li a yamukula ngiini?

¹² Mepingathano naEva, Jesus ina tula po tuu oshiholelwa oshiwanawa sheifupipiko! Satana okwa li a kambadhala oku mu makela momukalo gulwe, ihe Jesus okwa li a tindi nokuli okulonga sha tashi nukitha mo omwenyo shoka sha li tashi ka yeleka Kalunga. Shoka kasha li tuu tashi ku ulika uuntsa andola okwe shi ningile! Jesus ka li e shi ningi, ihe okwa li a yamukula shu ukilila nosha yela a ti: ‘Okwa nyolwa: “Ino makela Omuwa Kalunga koye.”’ — Lesha Lukas 4:9-12.

13, 14. Yelitha nkene Satana ha longitha omaheka gamwe kunena.

¹³ Kunena, Satana oha longitha omaheka ga faathana naangoka a li a longitha sho a li a makele Eva naJesus. Satana oha longitha “uuhalu wopantu” a makele aantu ya ye momilalo dha nyata nenge ya lye nokunwa sha pitilila. Okupitila momathano giipala, unene tuu kOintaneta, Satana ota vulu okuheka aantu, ya kale ya ‘hala mbyoka taye yi tala.’ Eliko, oonkondo nosho wo esimano kayi li tuu emakelo kwaamboka ye na uuntsa nosho wo mboka ye ‘hole mbyoka aantu taye yi itangele’!

¹⁴ “Iinima ayihe yomuuyuni” oya fa uukulya mboka omuyuli gwoohi ha tula kuundjolo we. Ohawu monika nawa, ihe kokakulya kehe ohaku kala ku na okandjolo. Satana oha longitha iinima yesiku kehe mbyoka aantu tashi vulika ya kale ye yi tala ko inaayi puka opo e ya ningithe ya kale ya hala okuninga iinima mbyoka yi li  ompinge noompango dhaKalunga. Ihe omamakelo ga tya ngaaka giineya, oga ningwa nelalakano lyokunwetha mo omahalo getu nokunyateka omitima dhetu. Omamakelo ngoka oge lile po shili oku tu itaalitha kutya okugwanitha po oompumbwe dhetu dhopaumwene nokukala tu uvite twa gwanenwa okwa simanenena ku vulithe okulonga ehalo lyaKalunga. Mbela otatu ka kwatwa ko komaheka ngoka?

15. Ongiini tatu vulu okuholela Jesus mokukondjitha omamakelo gaSatana?

¹⁵ Nonando Eva okwa li a gwile memamakelo lyaSatana, Jesus okwa li a sindi omamakelo ge. Oshikando kehe, Jesus okwa li a yamukula okuza mOmanyolo a ti: “Okwa nyolwa.” Ngele ohatu konakona nuudhiginini Ombiimbeli, otatu ka kala tu shi Omanyolo nawa, notatu ka vula okudhimbulukwa oovelise ndhoka tadhi vulu oku tu kwathela tu dhiladhile nawa uuna tatu makelwa. (Eps. 1:1, 2) Okudhimbulukwa iiholelwa yopaMbiimbeli yoohandimwe mboka ya li aadhiginini kuKalunga otaku ke tu kwathela tu ya holele. (Rom. 15:4) Okukala twa simaneka shili Jehova, okukala tu hole shoka e hole nokukala tu tonde shoka e tonde, otaku ke tu gamena. — Eps. 97:10.

16, 17. “Oonkondo dhetu dhokudhiladhila” ohadhi vulu oku tu nwetha mo tu kale aantu ya tya ngiini?

¹⁶ Omuyapostoli Paulus ote tu ladhipike tu longithe “oonkondo dhetu dhokudhiladhila” opo tu kale hatu dhiladhila ngaashi Kalunga, ihe hangaashi uuyuni. (Rom. 12:1, 2, NW) Opo Paulus a tse omuthindo nkene sha pumbiwa okukala tatu pangele lela shoka tatu dhiladhila, okwa ti: “Otatu kumuna po einenepeko kehe ndyoka tali inenepekele okutseya Kalunga; otatu tula edhiladhilo kehe meti notatu li vulikitha kuKristus.” (2 Kor. 10:5) Shoka hatu dhiladhila ohashi tu gumu noonkondo, onkee ano otwa pumbwa ‘okukala tatu dhiladhila’ iinima mbyoka tayi tungu. — Fil. 4:8.

¹⁷ Ngele otwa kala tu na omadhiladhilo nomahalo omawinayi, itatu ka kala twa yapuka. Otu na okuhola Jehova ‘nomwenyo gwa yela.’ (1 Tim. 1:5) Ihe omwenyo ogwo omunamakoto, notashi vulika nokuli kaatu shi dhimbulule mo kutya otatu nwethwa mo noonkondo ‘kiinima yomuuyuni.’ (Jer. 17:9) Onkee ano, mbela katu na okukala hatu ‘ikonakona, nokwiiyeleka, tu tale, ngele otu li tuu meitaalo’ tatu shi ningi paushili shi ikolelela kwaashoka hatu ilongo mOmbiimbeli? — 2 Kor. 13:5.

18, 19. Omolwashike tu na okukala twa tokola toko okukala aantu mboka Jehova a hala tu kale?

¹⁸ Oshinima oshikwawo shoka hashi tu kwathele tu kondjithe “iinima ayihe yomuuyuni” osho kutya ohatu kaleke momadhiladhilo oohapu dhaJohannes ndhoka tadhi ti: “Uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga e shi hala, ota kala e na omwenyo aluhe.” (1 Joh. 2:17) Onkalelo yaSatana otayi monika ya fa yolela notayi kalelele. Ihe, otayi ka hanagulwa po esiku limwe. Kapu na nando osha tashi ka hupa muuyuni waSatana. Okukaleka oshinima shoka momadhiladhilo otaku ke tu kwathela kaatu gwile momaheka gOndiapoli.

¹⁹ Omuyapostoli Petrus ote tu kumagidha tu kale aantu mboka ya hokiwa kuKalunga sho ‘twa tegelela esiku lyaKalunga. Tu kambadhale, tu li endelelithe, esiku tuu ndyoka, uuna omagulu taga ka pya po e taga ka yonuka po, niikwakegulu tayi ka hemukithwa kuupyu.’ (2 Pet. 3:12) Esiku ndyoka oli li pokuya, na Jehova ota ka hanagula po oshitopolwa kehe shuuyuni waSatana. Sigo okesiku ndyoka, Satana ota ka tsikila okulongitha “iinima ayihe yomuuyuni” e tu makele, ngaashi a li a makele Eva nosho wo Jesus. Inatu kala twa fa Eva nokugwanitha po omahalo getu gopaumwene. Uuna tatu ningi ngaaka otatu kala twa fa tatu ulike kutya Satana oye kalunga ketu. Otu na okukala twa fa Jesus nokukondjitha omaheka ngoka, kutya nduno oga kale taga monika nawa nomahokithi. Kehe gumwe gwomutse na kale a tokola toko okukala omuntu ngoka Jehova a hala a kale.