Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2013

Ino ‘geyela nando Jehova’

Ino ‘geyela nando Jehova’

‘Uugoya womuntu otawu goyokitha ondjila ye, nomutima gwe otagu geyele Jehova.’ — OMAYEL. 19:3, yelekanitha NW.

1, 2. Omolwashike kaatu na okupa Jehova uusama omolwomaupyakadhi gaantu? Shi thaneka.

NATU tye ando owu li omulumentu ngoka a kala ta nyanyukilwa ondjokana ye uule woomvula odhindji. Ihe esiku limwe sho wa galukile kegumbo, owa adha kehe shimwe megumbo sha taalelithwa mombanda. Iikwapundi oya teyagulwa, yo iiyuma oya tatulwagulwa, lyo emate olya yonagulwa po thilu. Egumbo lyoye ndyoka wu hole olya ninga oshigunda shiingulu. Mbela oto ki igidha to ti kutya, “omolwashike omukulukadhi gwandje a ningile ngeyi?” Nenge oto ka pula to ti kutya “olye a ningi ngeyi?” Nopwaahe na omalimbililo epulo etiyali olyo tali ke ya mo nziya momadhiladhilo goye. Omolwashike? Omolwaashoka owu shi kutya kuume koye ngoka wu mu hole ita ka longa uuhwapindi wu thike mpoka.

2 Kunena, evi ndyoka li li egumbo lyaantu olya yonagulwa kekako, kelongithonkondo nokoluhondelo. Tu li aakonakoni yOmbiimbeli, otu shi shi nawa kutya Jehova haye omweetithi gwomaupyakadhi agehe ngaka. Okwa shiti opulanete ndjika yi kale oparadisa ombwanawa. (Gen. 2:8, 15) Jehova oKalunga kohole. (1 Joh. 4:8) Okukonakona kwetu Omanyolo okwe tu kwathela tu mone kutya olye naanaa omweetithi gwomaupyakadhi ogendji muuyuni. Kapu na gulwe kee shi Satana Ondiapoli, “omupangeli guuyuni mbuka.” — Joh. 14:30; 2 Kor. 4:4.

3. Okudhiladhila kwetu ohaku vulu ku goyokithwe ngiini?

3 Nonando ongawo, itatu vulu okupa Satana uusama omolwomaupyakadhi getu agehe. Omolwashike mbela? Omolwaashoka omaupyakadhi getu gamwe oge li iizemo yomapuko getu yene. (Lesha Deuteronomium 32:4-6.) Nokuli nando otu zimine uushili mboka, okwaagwanenena kwetu otaku vulu okugoyokitha okudhiladhila kwetu noku tu ningitha tu landule ondjila ndjoka tayi fala moshiponga. (Omayel. 14:12) Omomukalo guni mbela? Pehala lyokwiipa tse yene uusama nenge oku wu pa Satana omolwuupyakadhi wetu, ohashi vulika tu tameke okupa Jehova uusama. Ohashi vulika nokuli tu ‘geyele Jehova.’ — Omayel. 19:3, yelekanitha NW.

4, 5. Omukriste ota vulu ‘okugeyela Jehova’ ngiini?

 4 Mbela otashi wapa ngaa shili tu ‘geyele Jehova’? Osha yela kutya okuninga ngaaka itaku ka kwatha sha. (Jes. 41:11) Otatu ka mona shike? Omutoti gumwe gwiiteyo okwa ti: “Ito vulu okukondja naKalunga molwaashoka omaako goye omahupi.” Inatu kambadhala nando tu popye tatu nyenyetele Jehova. Omayeletumbulo 19:3 otaga ti kutya uugoya womuntu otawu ‘goyokitha ondjila ye, nomutima gwe otagu geyele Jehova.’ Eeno, omuntu ota vulu okugeyela Kalunga momutima gwe. Iikala mbyoka otashi vulika kaatu yi mone nuupu. Omuntu otashi vulika a kale e nine Jehova iikonene. Naashoka otashi vulika shi ningithe omuntu i itongole ko kegongalo nenge a kale itaa ambidhidha naanaa omalongekidho gelongelokalunga lyaJehova.

5 Oshike tashi vulu oku tu ningitha tu ‘geyele Jehova’? Ongiini tatu vulu okuhenuka omwigo nguka? Osha simanenena tu kale tu shi omayamukulo komapulo ngaka. Omolwashike mbela? Omolwaashoka ekwatathano lyetu naJehova olya kwatelwa mo.

OSHIKE TASHI VULU OKU TU NINGITHA TU ‘GEYELE JEHOVA’?

6, 7. Omolwashike Aaisraeli pethimbo lyaMoses ya li ya tameke okunyenyetela Jehova?

6 Oshike tashi vulu okuninga omutima gwomupiya gwaJehova omudhiginini gu tameke okunyenyetela Kalunga? Natu ka kundathaneni iinima itano nokukonakona iiholelwa yopaMbiimbeli mbyoka tayi tsu omuthindo nkene yamwe monakuziwa ya li ya gwile momwigo nguka. — 1 Kor. 10:11, 12.

Okupulakena kokupopya okuwinayi kwayalwe otaku vulu oku ku nwetha mo nayi (Tala okatendo 7)

7 Okupopya okuwinayi kwayalwe otaku vulu oku tu nwetha mo. (Lesha Deuteronomium 1:26-28.) Aaisraeli oya li owala opo ya kuthwa muupika muEgipiti. Jehova okwa adhika e eta omageelo omulongo koshigwana shoka oshikwanyanya nokonima ta hanagula po Falao netangakwiita lye mEfuta Etiligane. (Eks. 12:29-32, 51; 14:29-31; Eps. 136:15) Oshigwana shaKalunga osha li sha tegelela okuya mEvi lyEuvaneko. Ihe, pethimbo ndika lya simana, Aaisraeli oya li ya tameke okunyenyetela Jehova. Oshike sha li she etitha okwaaneitaalo kwawo huka? Omitima dhawo odha li dha ziluka omolwehokololo ewinayi lyayamwe mboka ya li ya tumwa ya ka ndaadhe oshilando. (Num. 14:1-4) Oshizemo? Aantu eyehe yepipi limwe kaya li ye ethwa ya ye “mevi ndyoka ewanawa.” (Deut. 1:34, 35) Mbela otashi vulika omathimbo gamwe tu ethe okupopya okuwinayi kwayalwe ku nkundipaleke eitaalo lyetu noku tu ningitha tu ngungutule omolwomukalo ngoka Jehova tu ungaunga natse?

8. Oshike sha li sha ningitha oshigwana shaKalunga pethimbo lyaJesaja shi tameke okupa Jehova uusama omolwonkalo yasho?

8 Uudhigu nomaupyakadhi otaga vulu oku tu teya omukumo. (Lesha Jesaja 8:21, 22.) Pethimbo lyaJesaja, oshigwana shaJuda osha li shi iyadha monkalo ombwinayi. Osha li sha kundukidhwa kaatondi. Iikulya oya li ya pumba. Oyendji oya li ye niwe kondjala. Ihe opwa li ondjala yopambepo yi vule ndjoka yopalutu. (Amos 8:11) Pehala lyokukonga ekwatho kuJehova sho tashu ungaunga nuudhigu mbuka, osha tameke ‘okutuka’ omukwaniilwa gwasho naKalunga kasho. Eeno, osha li sha pe Jehova uusama omolwomaupyakadhi gasho. Ngele otwa gwililwa po kuupyakadhi wontumba nenge wopaumwene, mbela natse otashi vulika tu ipopile momitima dhetu tatu ti: ‘Jehova okwa li peni sho nda li nde mu pumbwa?’

9. Omolwashike Aaisraeli yopethimbo lyaHeskiel ya li ya kokeke etaloko lya puka?

9 Katu na uushili wi ihwa po. Omolwokwaahe na uushili wi ihwa po, Aaisraeli pethimbo lyaHesekiel oya li yu uvite kutya omukalo gwaJehova kagwa li ‘gu uka.’ (Hes. 18:29) Oya fa ya li yi iningi aapanguli yaKalunga, taya tula omithikampango dhawo yene dhuuyuuki komeho gaandhoka dhaJehova noku mu pangula shi ikolelela kontseyo yawo onshona ndjoka ya li ye na kombinga yiiningwanima. Ngele omathimbo gamwe ohatu kala kaatu uvite ko nawa omahokololo gOmbiimbeli nenge omukalo gwankene iiningwanima yontumba ya ningwa monkalamwenyo  yetu, mbela otashi vulika tu kale tu uvite momitima dhetu kutya omukalo gwaJehova kagu li nawa, ano ‘inaagu uka’? — Job 35:2.

10. Ongiini gumwe ta vulu okulandula oshiholelwa sha puka shaAdam?

10 Ohatu pe yalwe uusama omolwomayono getu nomapuko getu. Okuza ngaa petameko lyondjokonona yaantu, Adam okwa li a pe Kalunga uusama omolweyono lye mwene. (Gen. 3:12) Nonando Adam okwa li a teyele owina ompango yaKalunga noku shi nawa iilanduliko yoku yi teya, okwa li a pe Jehova uusama. Muushili wo wene, okwa ti kutya Jehova okwe mu pa omukulukadhi omwiinayi. Okuza ngaa nee kesiku ndyoka, yalwe oya landula oshiholelwa shaAdam shokupa Kalunga uusama omolwomapuko gawo yene. Otashi ka kala shi li nawa tu ipule tatu ti: ‘Mbela okuuva nayi nosho wo ongeyo omolwomapuko gandje ohayi ningitha ndje ndi kale inaandi nyanyukilwa omithikampango dhaJehova?’

11. Oshiilongomwa shini tatu ilongo kuJona?

11 Ohatu kala tatu gandja unene eitulomo kutse yene. Omupolofeti Jona okwa li e na uupyakadhi netokolo lyaJehova lyopahenda li na ko nasha naNinive. (Jona 4:1-3) Omolwashike mbela? Okwa kala ti ipula unene nokukanitha edhina lye oshoka ehanagulo ndyoka a li u uvitha inali ningwa. Jona okwa li e etha okwiipula kwe shi na ko nasha nedhina lye ku kwidhidhike ohenda ndjoka a li e na okukala e nine Aaninive mbeyaka yi iyela ombedhi. Mbela natse otashi vulika tu tameke okukala tatu gandja unene eitulomo kutse yene e tatu ‘geyele Jehova’ sho itee eta ehulilo nziya? Ngele otwa kala tatu uvitha uule woomvula omilongo kutya esiku lyaJehova oli li popepi, mbela otatu ka tameka okukala itaatu vulu okutegelela kuJehova uuna yalwe itaaya tsu kumwe naashono tatu uvitha shoka sha popiwa mOmbiimbeli? — 2 Pet. 3:3, 4, 9.

SHOKA TASHI TU KWATHELE TU HENUKE ‘OKUGEYELA JEHOVA’

12, 13. Ngele otwa tameke okulimbililwa iilonga yaJehova yimwe, oshike tu na okutonatela?

12 Oshike tatu vulu okuninga po ngele omitima dhetu omilunde odha tameke okukala dha limbililwa iilonga yimwe yaJehova? Dhimbulukwa kutya kashi li pandunge okuninga ngaaka. Etoloko lilwe olya toloka Omayeletumbulo 19:3 tali ti: “Okwiipwililika kwomuntu ohaku piyaganeke oondjila dhe noha tsu ondumbo naJehova.” (Byington)  Tu na oohapu ndhoka momadhiladhilo, natu ka kundathaneni iinima itano mbyoka tayi ke tu kwathela kaatu ethe nando okuuva nayi kwomonkalamwenyo ku tu ningithe tu pe Jehova uusama.

13 Ino kala itoo tonatele ekwatathano lyoye naJehova. Otatu vulu okuhenuka egamo lyopantu inaali gwanenena li tu ningithe kaatu geyele Kalunga ngele otwa kala tu na ekwatathano lyopothingo naye. (Lesha Omayeletumbulo 3:5, 6.) Otwa pumbwa okukala twi inekela muJehova. Otwa pumbwa wo okuhenuka okukala aanawino momeho getu yene nenge okugandja eitulomo kutse yene. (Omayel. 3:7; Omuuv. 7:16) Uuna twa ningi ngaaka, itatu ka pa Jehova uusama uuna iinima iiwinayi ya ningwa.

14, 15. Oshike tashi ke tu kwathela kaatu nwethwe mo kokupopya okuwinayi kwayalwe?

14 Ino etha okupopya okuwinayi kwayalwe ku ku nwethe mo. Pethimbo lyaMoses, Aaisraeli oya li ye na omatompelo ga gwana yi itaale kutya Jehova okwa li te ke ya wilika nawa sigo omEvi lyEuvaneko. (Eps. 78:43-53) Ihe sho ya li yu uvu oohapu oombwinayi dhoondaadhi omulongo ndhoka kaadha li dhi na eitaalo, kaya li ya “dhimbulukwa iilonga ye yoonkondo.” (Eps. 78:42) Ngele otwa tedhatedha kiilonga yaJehova, tu na momadhiladhilo iinima ayihe iiwanawa e tu ningila, otatu ka koleka ekwatathano lyetu naye. Shoka otashi ke tu kwathela kaatu ethe omadhiladhilo omawinayi gayalwe ga tile omeya pokati ketu naJehova. — Eps. 77:11, 12.

15 Ongiini ngele otu na etaloko ewinayi kombinga yooitaali ooyakwetu? Monkalo yi li ngaaka, ekwatathano lyetu naJehova ota li vulu okugumwa kulyo. (1 Joh. 4:20) Sho Aaisraeli ya li ya limbililwa sho Aaron a langekwa po naasho a pewa ondondo, Jehova okwa li e shi tala ko kutya Oye taya ngungutulile. (Num. 17:10) Sha faathana, ngele ando otu tameke okugeyela nokungungutula kombinga yaamboka Jehova ta longitha moshitopolwa shehangano lye shokombanda yevi, otatu ka kala tatu nyenyetele owala Jehova. — Heb. 13:7, 17.

16, 17. Oshike twa pumbwa okudhimbulukwa uuna tu na omaupyakadhi?

16 Dhimbulukwa kutya Jehova ihe etitha omaupyakadhi getu. Nonando Aaisraeli yopethimbo lyaJesaja oya li ya pilamene Jehova, Okwa li natango a hala oku ya kwathela. (Jes. 1:16-19) Kutya nduno otu iyadhe momaupyakadhi ga tya ngiini, otatu vulu okumona ehekeleko mokutseya kutya Jehova oku na ko nasha natse nokwa hala oku tu kwathela. (1 Pet. 5:7) Uushili owo kutya, oku uvaneka oku tu pa oonkondo ndhoka twa pumbwa opo tu tsikile nokwiidhidhimika. — 1 Kor. 10:13.

17 Ngele otatu mono iihuna omolwoshinima shontumba kaashi li pauyuuki shoka twa ningilwa, nokuli ngaashi omulumentu omudhiginini Job a li a ningilwa, otwa pumbwa okwiidhimbulukitha kutya Jehova haye e tu etela iinima iiwinayi mbyoka. Jehova oku tonde okwaanuuyuuki; oku hole uuyuuki. (Eps. 33:5) Ngaashi kuume kaJob, Elihu, natu zimine kutya “itashi vulika Kalunga a longe uugoyoki. Omunankondoawike ita vulu okulonga uuwinayi.” (Job 34:10) Pehala lyoku tu etela omaupyakadhi, Jehova ohe tu pe “oshipewa kehe oshiwanawa nomagano kehe ga gwana ga pwa.” — Jak. 1:13, 17.

18, 19. Omolwashike kaatu na nando okukala twa limbililwa Jehova? Shi thaneka.

18 Ino kala nando wa limbililwa Jehova. Kalunga okwa gwanenena, nomadhiladhilo ge kage shi omadhiladhilo getu. (Jes. 55:8, 9) Onkee ano, eifupipiko nokukala nondjele oyi na oku tu kwathela tu zimine kutya otu na euvoko lya ngambekwa. (Rom. 9:20) Olundji ihatu kala tu na uushili awuhe kombinga yonkalo yontumba. Nopwaahe na omalimbililo, owu na okukala wa mona uushili woohapu dheyeletumbulo ndika: “Nakuthika tango koompangu ota monika a fa e li mondjila, sigo mukwawo e ya ete mu pulapula.” — Omayel. 18:17, New International Version.

19 Ngele otu na kuume omwiinekelwa ngoka tashi vulika a ninge oshinima shoka kaatu uvite ko petameko nenge tu wete kutya ita vulu oku shi ninga, mbela otatu ka endelela ngaa tu mu lundilile sha oshiwinayi? Nenge mbela otatu ka kala twa hala oku mu ulukila kutya inatu  mu limbililwa unene tuu ngele omuntu ngoka otwa kala tu mu shi uule woomvula odhindji? Ngele ohatu ungaunga nookuume ketu mboka inaaya gwanenena momukalo nguka gwopahole, mbela itatu ka kala tuu twa hala okukala twi inekela Tate yetu gwomegulu, ngoka oondjila dhe nomadhiladhilo ge, ge vule getu!

20, 21. Omolwashike sha simana kutse tu tule ombedhi mpoka yi na okutulwa?

20 Ombedhi nayi tulwe ngaa mpoka yi na okutulwa. Omolwashike tu na okuninga ngaaka? Dhoshili, otashi vulika otse yene twi iyetela omaupyakadhi getu gamwe. Ngele otse yene twi iyetela, otwa pumbwa okuzimina uushili mboka. (Gal. 6:7) Ino kambadhala okupa Jehova uusama omolwomaupyakadhi ngoka. Omolwashike okuninga ngaaka itaaku ka kala pandunge? Tala koshiholelwa shika: Ohauto otashi vulika yi kale hayi vulu okutondoka ondapo yoshidhudhu. Natu tye ando omuhingi okwa pitililitha ondapo ndjoka yi na okuhingwa sho ta hingi pegoli e ta kandoma. Mbela ngu a longa ohauto ndjono oye e na okupewa ombedhi omolwoshiponga shoka? Aawe nando nando! Sha faathana, Jehova okwe tu shita nemanguluko lyokuninga omatokolo. Ihe okwe tu pa wo omisindalandu dhankene tu na okuninga omatokolo gomondjila. Onkee ano, omolwashike tatu ka pa Omushiti uusama omolwomapuko getu yene?

21 Eeno shili, hamaupyakadhi getu agehe ge li iizemo yomapuko getu gopaumwene nenge goonkatu dhetu dha puka. Iiningwanima yimwe ohayi ningwa ‘omolwethimbo nombaadhilila.’ (Omuuv. 9:11, NW) Nando ongawo, inatu dhimbwa nando kutya Satana Ondiapoli oye unene he etitha uukolokoshi. (1 Joh. 5:19; Eh. 12:9) Oye omutondi ihe ke shi Jehova. — 1 Pet. 5:8.

KALA WA LENGA EKWATATHANO LYOYE NAJEHOVA LI NA ONDILO

Josua naKaleb oya li ya lalekwa nuuyamba omolwokwiinekela kwawo muJehova (Tala okatendo 22)

22, 23. Oshike tu na okudhimbulukwa ngele otwa kala twa teka omukumo omolwomaupyakadhi getu?

22 Uuna wu na uudhigu nuupyakadhi, dhimbulukwa oshiholelwa shaJosua naKaleb. Aalumentu mbaka aadhiginini oya li ya galuka nehokololo ewanawa inaaya fa oondaadhi dhilwe ndhiyaka omulongo. (Num. 14:6-9) Oya li ye na eitaalo muJehova. Nokuli nonando ongawo, oya li ye na okweenda mombuga uule woomvula 40 pamwe nAaisraeli ooyakwawo. Mbela Josua naKareb oya li ya nyenyeta nenge ya geye, yu uvite kutya shika kashi li pauyuuki? Aawe. Oya li yi inekela muJehova. Mbela oya li ya yambekwa? Eeno lela! Omanga aantu ayehe yepipi limwe ya sile mombuga, aalumentu mbaka ayehe osho ngaa nduno ya ka thika mEvi lyEuvaneko. (Num. 14:30) Sha faathana, Jehova ote ke tu laleka nuuyamba ngele itatu ‘vulwa’ okulonga ehalo lye. — Gal. 6:9; Heb. 6:10.

23 Ngele owa teka omukumo omolwomaupyakadhi, okwaagwanenena kwayalwe, nenge okwaagwanenena kwoye mwene, owu na okuninga po shike? Kala to gandja eitulomo kuukwatya waJehova uukumithi. Kala wa fa wu wete etegameno ndyoka Jehova e ku pa. Ipula kutya, ‘ando kapwa li Jehova ando ondi li peni?’ Kala aluhe popepi naye, ngoye ino etha nando omutima gwoye gu mu geyele!