‘Tu silathaneni oshimpwiyu, tu tsaathaneni omukumo mokuholathana nomokulongelathana uuwanawa.’ — HEB. 10:24, yelekanitha NW.

1, 2. Oshike sha li sha kwathele Oonzapo dhaJehova 230 dhi hupe memaatshingo lyeso pehulilo lyIita Iitiyali yUuyuni?

SHO epangelo lyaNazi lya li lya yongotele pehulilo lyIita Iitiyali yUuyuni, opwa li pwa gandjwa elombwelo lyokudhipaga aantu ayehe omayuvi mboka ya li ya thigala mookamba dhoonkwatwa. Aanandholongo yomokamba yaSachsenhausen oya li ya lombwelwa ya ye komatulilo gwoosikepa hoka ya li taya ka londekwa moosikepa e tadhi ka ota ko. Shika osha li oshitopolwa shompangela ndjoka ye ki ithanwa emaatshingo lyeso.

2 Aanandholongo 33 000 mboka ya li ya zi kokamba yoonkwatwa yaSachsenhausen oya li ye na okumaatshinga ookilometa 250 yu uka kuLübeck, oshilando shetulilosikepa shi li muNdowishi. Mokati kaamboka ya li ya lombwelwa ya maatshinge omwa li Oonzapo dhaJehova dhi li 230 dha za kiilongo ihamano. Ayehe oya li ya nkundipalekwa kondjala nokomikithi. Ongiini mbela aamwatate ya li ya vulu okuhupa mokumaatshinga hoka? Gumwe gwomuyo okwa ti:“Otwa kala nokutsaathana omukumo tu pule komeho.” Ohole yawo yokuholathana pamwe ‘noonkondo dhi vule ndhoka dhopaunshitwe’ ndhoka ya li ya pewa kuKalunga oye ya kwathele ya hupe monkalo ndjika ondhigu. — 2 Kor. 4:7NW.

3. Omolwashike twa pumbwa okutsaathana omukumo?

3 Nonando kunena katu li memaatshingo lyeso lya tya ngaaka, ohatu adhika komashongo ogendji. Konima sho Uukwaniilwa waKalunga wa dhikwa po mo 1914, Satana okwa li u umbwa mo megulu noku umbilwa kombanda yevi, u udha “ondjahi, sho e shi shi kutya oku na ko ashike okathimbo okafupi kowala.” (Eh. 12:7-9, 12) Sho uuyuni mbuka tawu ihilile puArmagedon, Satana ota longitha omamakelo nomathiminiko nelalakano lyoku tu nkundipaleka pambepo. Oshikwawo osho kutya otu na omaupyakadhi ngoka hage tu adha esiku nesiku monkalamwenyo. (Job 14:1; Omuuv. 2:23) Omathimbo gamwe omaudhigu ohashi vulika ge tu gwilile po unene,  nohashi vulika nokuli tu kale kaatu na oonkondo pamaiyuvo nosho wo pambepo, opo tu kondjithe etekomukumo. Tala koshiholelwa shomumwatate gumwe ngoka a li a kwathele pambepo aantu oyendji uule woomvula omilongo odhindji. Sho e li moomvula dhuukokole we, okwa li a teka omukumo molwaashoka ye nomukulukadhi gwe oya li ya kwata kuuvu. Ngaashi owala omumwatate ngoka, atuheni otwa pumbwa ‘oonkondo dhi vule ndhoka dhopaunshitwe’ okuza kuJehova notwa pumbwa okutsaathana omukumo.

4. Ngele otwa hala okutsa yalwe omukumo, otu na okulandula omayele geni gomuyapostoli Paulus?

4 Ngele otwa hala tu kale hatu tsu yalwe omukumo, otu na okulandula omayele ngoka omuyapostoli Paulus a li a pe Aakriste Aahebeli. Okwa ti: ‘Tu silathaneni oshimpwiyu, tu tsaathaneni omukumo mokuholathana nomokulongelathana uuwanawa. Inatu etha po okugongala pamwe, ngaashi yamwe haa ningi. Ihe natu ladhipikathaneni, unene sho tu wete esiku lyOmuwa tali hedha popepi.’ (Heb. 10:24, 25, yelekanitha NW.) Ongiini tatu vulu okutula miilonga oohapu ndhoka dha simana?

‘NATU SILATHANENI OSHIMPWIYU’

5. ‘Okusilathana oshimpwiyu’ otaku ti shike, notaku pula oonkambadhala dhi thike peni?

5 ‘Okusilathana oshimpwiyu’ otaku ti “okukaleka momadhiladhilo oompumbwe dhayalwe, nokudhiladhila kombinga yawo.” Mbela otatu ka vula ngaa okukaleka momadhiladhilo oompumbwe dhayalwe ngele ohatu ya popitha owala osheendelela uuna tu li pOshinyanga shUukwaniilwa nenge hatu popi owala nayo iinima yaafele? Aawe nando. Dhoshili, otwa hala okukala ‘tatu longo iilonga yetu’ yene ihe ‘hakwiitula miinima yaantu.’ (1 Tes. 4:11; 1 Tim. 5:13) Ihe nonando ongawo, ngele otwa hala okutsa omukumo aamwatate, otu na shili okuya tseya nawa ngaashi oonkalo dhawo, uukwatya wawo, uupambepo wawo, okuvula kwawo nosho wo uunkundi wawo. Oya pumbwa oku tu tala ko tu li ookuume kawo noku ya shilipaleka kutya otu ya hole. Shika otashi pula okukala pamwe nayo ethimbo olindji, ha uuna owala ye na omaupyakadhi nenge ya teka omukumo ihe nopoompito dhilwe wo. — Rom. 12:13.

6. Oshike tashi ka kwathela omukuluntugongalo a ‘sile oshimpwiyu’ mboka ye li metonatelo lye?

6 Aakuluntugongalo otaya ladhipikwa ya lithe ‘oshigunda shoka ye shi pewa kuKalunga ye shi tonatele’ nehalo ewanawa. (1 Pet. 5:1-3) Ongiini mbela taya ka vula okugwanitha po oshilonga shawo shokulitha oshigunda ngele kaye shi nawa oonzi ndhoka dhi li metonatelo lyawo? (Lesha Omayeletumbulo 27:23.) Ngele aakuluntugongalo ohaya kala yi ilongekidha aluhe okukwathela ooitaali ooyakwawo nohaya nyanyukilwa okukala pamwe nayo, nena otashi ka kala oshipu kaamwatate okuya pula ekwatho uuna sha pumbiwa. Otashi ka kala oshipu wo kaamwatate naamwameme oku ya lombwela omaiyuvo gawo gokomutima nomaipulo gawo. Naashika otashi ka kwathela aakuluntugongalo ya ‘sile oshimpwiyu’ mboka ye li metonatelo lyawo noku ya kwathela uuna ya pumbwa ekwatho.

7. Otu na okutala ko ngiini ‘oohapu inaadhi dhiladhilwa nawa’ dhaamboka ya teka omukumo?

7 Sho Paulus a li ta popi negongalo lyaTessalonika, okwa ti: “Ambidhidheni aankundi.” (Lesha 1 Aatessalonika 5:14.) Mboka ye na ‘oomwenyo dha polimana’ naamboka ya teka omukumo ayehe oya nkundipala. Omayeletumbulo 24:10 otaga ti: “Ngele to tenguka pethimbo lyuudhigu, nena oonkondo dhoye oonshona ngiini!” Omathimbo gamwe omuntu ngoka a teka omukumo noonkondo ota vulu okukala ha popi ‘oohapu inaadhi dhiladhilwa nawa.’ (Job 6:2, 3) Uuna tatu ‘sile oshimpwiyu’ mboka ya tya ngaaka, osha simana okukaleka momadhiladhilo kutya shoka taya popi otashi vulika haasho lela shi li momitima dhawo. Rachelle, ngoka meme gwe a li a kwatwa kepolimano lya kwata miiti, okwa li e shi ningilwa. Rachelle okwa ti: “Iikando oyindji Meme okwa li hu ula ndje omalaka omawinayi. Nolundji, onda li handi kambadhala okudhiladhila kuukwatya we womeni lela uuwanawa ngaashi ohole ye, ohenda nokugandja kwe. Onda li  ndi ilongo kutya mboka ya polimana ohaya popi iinima oyindji haayo ya hala okupopya. Shoka oshiwinayi, oku mu shunina omalaka omawinayi nenge uuwinayi.” Omayeletumbulo 19:11 otaga ti: “Oondunge dhomuntu otadhi mu ningi omunamutimahenda, nosho esimano kuye okudhima po eyono.”

8. Olye unene tu na ‘okushilipaleka’ ohole yetu nomolwashike?

8 Ongiini tatu vulu ‘okusila oshimpwiyu’ ngoka a gwililwa po kohoni nokwa teka omukumo omolwomayono ge gomonakuziwa, nokuli nonando okwa katuka nale onkatu e go opaleke? Paulus okwa li a nyolele Aakorinto kombinga yomuyoni ngoka a li i itedhulula a ti: “Omu na oku mu dhimina po noku mu hekeleka, opo kaa thindilwe pevi koluhodhi lwe e ti iyekelele. Onkee ano otandi mú [“ladhipike,” NW], mu kale noku mu hola [nenge “mu mu shilipaleke ohole yeni,” NW].” (2 Kor. 2:7, 8) Embwiitya limwe olya toloka oshitya ‘shilipaleka’ lya ti “okupameka, nokukoleka.” Katu na owala okudhiladhila kutya omuntu oku shi shi kutya otu mu hole notu na ko nasha naye. Ihe okwa pumbwa oku shi mona miilonga yetu nomiikala yetu.

‘NATU TSAATHANENI OMUKUMO MOKUHOLATHANA NOMOKULONGELATHANA UUWANAWA’

9. ‘Okutsaathana omukumo mokuholathana nomokulongelathana uuwanawa’ okwa kwatela mo shike?

9 Paulus okwa nyola a ti: ‘Tu silathaneni oshimpwiyu, tu tsaathaneni omukumo mokuholathana nomokulongelathana uuwanawa.’ Otwa pumbwa okwiinyengitha ooitaali ooyakwetu yu ulike ohole noya longe iilonga iiwanawa. Uuna omulilo tagu hala okudhima, ohashi vulika tu kale twa pumbwa okuhohela iikuni noku gu pepela opo gu kale gwa tema. (2 Tim. 1:6, yelekanitha OB-1954.) Momukalo gwa faathana, otatu vulu okutsa aamwatate omukumo tatu shi ningi nohole, yu ulike ohole yawo yokuhola Kalunga nosho wo aantu ooyakwawo. Omukalo gumwe gwa dhenga mbanda moka tatu vulu oku shi ninga, omoku ya pandula omolwiilonga yawo iiwanawa.

Longa pamwe nayalwe momapya

10, 11. (a) Oolye yomokati ketu ya pumbwa okupandulwa? (b) Gandja oshiholelwa wu ulike nkene okupandula taku vulu okukwathela omuntu ngoka ‘a gwila meyono lyontumba.’

10 Kutya nduno otwa teka omukumo nenge hasho, atuheni otwa pumbwa okupandulwa. Omukuluntugongalo gumwe okwa ti: “Kapu na nando  esiku limwe tate a lombwelele ndje kutya onda longa nawa. Onkee ano onda putuka inaandi isimaneka. . . . Nonando ngashingeyi ondi na oomvula 50, natango ohandi pandula ngele ookuume kandje taya lombwele ndje kutya otandi longo nawa ndi li omukuluntugongalo. . . . Oshimoniwa shandje mwene osha longa ndje nkene sha simana okutsa yalwe omukumo, nohandi kongo aluhe oompito ndi shi ningile yalwe.” Okupandula yalwe otaku vulu okunkondopaleka ayehe mwa kwatelwa aakokolindjila, aakokele naamboka tashi vulika ya teka omukumo. — Rom. 12:10.

11 Uuna ‘mboka ya pyokoka pambepo taya pukulula ngoka a gwila meyono lyontumba,’ omayele gopahole noku mu pandula uuna tashi opalele otaku ke mu inyengitha a tameke okulonga iilonga iiwanawa. (Gal. 6:1) Shika osho sha li sha ningilwa omumwameme Miriam. Okwa nyola a ti: “Onda li nda piti monkalo yinikitha oluhodhi monkalamwenyo yandje sho ookuume kandje yamwe yopothingo ya li ya thigi po egongalo, nopethimbo tuu ndyoka, tate okwa li a si ombanda. Onda li nda polimana noonkondo. Nelalakano lyokusinda epolimano lyandje, onda li nda mono po omumati gwomuuyuni.” Shika osha li she mu ningitha a kale u uvite inaa gwana okukala e holike kuJehova, nokwa li a dhiladhila a thige po oshili. Sho omukuluntugongalo e mu dhimbulukitha iilonga ye yuudhiginini yomonakuziwa, osha li shi inyengitha omutima gwe. Okwa li e etha aakuluntugongalo ye mu shilipaleke kutya oku holike natango kuJehova. Oshizemo, okwa li ishewe a hwama mohole ye yokuhola Jehova. Okwe etha po omumati gwomuuyuni nokwa tsikile okulongela Jehova.

Tsaathaneni omukumo mokuholathana nomokulongelathana uuwanawa

12. Oshike tashi vulu okuningwa po ngele ohatu sitha yalwe ohoni, hatu ya pe uusama, nenge hatu yu uvitha nayi opo tu ya ladhipike?

12 Okusitha gumwe ohoni moku mu yelekanitha nayalwe, moku mu pa uusama tatu longitha omithikampango dhetu dhopaumwene, nenge moku mu uvitha nayi molwaashoka ihaa longo oshindji, otashi vulika shi mu inyengithe nziya a hwepopaleke iilonga ye, ihe shika ote ke shi ninga owala okathimbo. Mepingathano naashoka, otatu ka kwathela ooitaali ooyakwetu ngele tatu ya pandula noku ya dhimbulukitha kombinga yohole yawo yokuhola Kalunga. — Lesha Aafilippi 2:1-4.

‘NATU LADHIPIKATHANENI’

13. Okuladhipika yalwe okwa kwatela mo shike? (Tala kethano ndyoka li li petameko.)

13 Otwa pumbwa ‘okuladhipikathana, unene sho tu wete esiku lyOmuwa tali hedha popepi.’ Okuladhipika yalwe okwa kwatela mo oku yi inyengitha ya pule komeho miilonga yawo yokulongela Kalunga. Ngaashi owala okutsaathana omukumo mokuholathana nomokulongelathana uuwanawa taku vulu okufaathanithwa nomuntu ta hohele omulilo ngoka gu li pokudhima, okuladhipika yalwe otaku vulu okufaathanithwa nomuntu ta tula omahooli pomulilo gu kale gwa hwama nenge gu kale gwa yaka. Okuladhipika yalwe okwa kwatela mo okunkondopaleka nokuhekeleka mboka ya teka omukumo. Uuna tatu ladhipike aantu ya tya ngaaka, otu na okupopya nayo nohenda nononge. (Omayel. 12:18) Natango, natu kale ‘hatu pulakene mbala, nokwiikwata mokupopya.’ (Jak. 1:19) Ngele otwa pulakene nuukwawo wanankali, otatu ka vula okumona shoka sha teya omumwatate omukumo noku mu lombwela sha tu mu kwathele u ungaunge noonkalo ndhoka.

14. Omumwatate gumwe ngoka a li a teka omukumo okwa li a kwathelwa ngiini?

 14 Natu tale nkene omukuluntugongalo gumwe omunalukeno a li a vulu okukwathela omumwatate ngoka a kala oomvula dhontumba inii ipyakidhila. Sho a pulakene kuye, omukuluntugongalo okwa li a mono kutya omumwatate oku hole natango Jehova noonkondo. Okwa kala ha konakona oshifo kehe shOshungolangelo nokwa kala ha ningi oonkambadhala a kale pokugongala pandjigilile. Ihe, oonkatu dhayamwe megongalo odha li dhe mu yematitha noku mu geyitha. Omukuluntugongalo okwa li a pulakene kuye nopwaahe na oku mu pangula noku mu ulukila kutya oku na ko nasha naye nonaanegumbo lye. Konima yethimbo, omumwatate okwa li e shi dhimbulula kutya nani okwa li te etha iimoniwa iiwinayi yomonakuziwa yi mu imbe kaa longele Kalunga ngoka e hole. Omukuluntugongalo okwa li e mu hiya ya ka longe pamwe muukalele. Kekwatho lyomukuluntugongalo, omumwatate okwa li a tameke ishewe okuya muukalele nokwa li a langekwa po ishewe e li omukuluntugongalo.

Pulakena neidhidhimiko kugumwe ngoka a pumbwa etsomukumo (Tala okatendo 14, 15)

15. Otatu ilongo shike kuJehova kombinga yokutsa omukumo mboka ya gwililwa po?

15 Omuntu ngoka a teka omukumo ota vulu okukala inaa tula miilonga ekwatho ndyoka a pewa nenge a kale inaa tya po hwepo nziya. Otashi vulika tu ka kale twa pumbwa okutsikila oku mu ambidhidha. Paulus okwa ti: “Yakuleni aankundi, taleni ayehe onteni.” (1 Tes. 5:14, OB-1954) Pehala lyokweetha po mbala okukwathela aankundi, natu kale tatu ya ‘yakula,’ nokutsikila oku ya ambidhidha. Monakuziwa, Jehova okwa li u ungaunga neidhidhimiko naapiya ye yamwe mboka ya li ya teka omukumo. Pashiholelwa, Kalunga okwa li u ungaunga naElia neidhidhimiko, mokusimaneka omaiyuvo ge. Jehova okwa li a pe omupolofeti shoka a li a pumbwa opo a tsikile noshilonga she. (1 Aak. 19:1-18) Molwaashoka David okwa li i itedhulula shili, Jehova okwa li e mu dhimine po. (Eps. 51:7, 17) Kalunga okwa li wo a kwathele omunyoli gwEpisalomi 73, ngoka a li pokweetha po oku Mu longela. (Eps. 73:13, 16, 17) Jehova oha kala e tu uvitile olukeno nohenda, uunene tuu uuna twa gwililwa po nenge twa teka omukumo. (Eks. 34:6) Esilohenda Lye “epe kehe ongula” nokali na esiku ‘li hule po.’ (Oontak. 3:22, 23) Jehova okwa hala tu landule oshiholelwa she notu u ungaunge nolukeno naamboka ya polimana.

NATU LADHIPIKATHANENI KAATU ZE MO MONDJILA NDJOKA TAYI FALA KOMWENYO

16, 17. Sho ehulilo lyonkalelo ndjika tali hedha popepi, otu na okukala twa tokola toko okuninga shike, nomolwashike?

16 Maanandholongo 33 000 mboka ya zile mokamba yoonkwata yaSachsenhausen, aanandholongo omayuvi oya li ya si. Ihe, Oonzapo dhaJehova adhihe dhi li 230 odha li dha hupu monkalo ndjoka ondhigu. Shoka sha li she ya kwathele ya hupe, osho kutya oya kala nokutsaathana omukumo nokwaambidhidhathana.

17 Kunena, otu li ‘mondjila ndjoka tayi fala komwenyo.’ (Mat. 7:14) Masiku, aapiya ayehe yaJehova otaa ke enda ya hangana yu uka muuyuni uupe moka tamu ka kala uuyuuki. (2 Pet. 3:13) Natu kale twa tokola toko okukwathelathana tu kale mondjila ndjoka tayi fala komwenyo gwaaluhe.