Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2013

Elisa okwa li a mono omatembakwiita gomulilo — ngoye oho ga mono?

Elisa okwa li a mono omatembakwiita gomulilo — ngoye oho ga mono?

Omukwaniilwa gwaSiria okwa li e li mokashoko omupolofeti gwaKalunga Elisa nokwa li e mu landula sigo omoshilando shaDotan shoka sha li shi na enkolokuma nosha tungilwa kondundu. Kongulohi, omukwaniilwa gwaSiria okwa li a tumu oonkambe, omatembakwiita, nosho wo oongundu dhaakwiita kuDotan. Sho kwa shi, omatangakwiita ge oga kondeka nale oshilando. — 2 Aak. 6:13, 14.

Sho omumati gwaElisa a penduka e ta yi pondje, okwa mono po mboka ya li ye ya okukwata po omupolofeti. Okwi igidha ta ti: “Yayee, tatekulu! Otatu ningi ngiini?” Elisa okwa yamukula a ti: “Ino tila, otu na oyendji ya gama kutse ye vule mboka ya gama kuyo.” Opo nduno omupolofeti okwa galikana a ti: “OMUWA, tonatitha omeho ge, opo a tale!” Ehokololo olya tsikile ko tali ti: “OMUWA okwa yamukula egalikano lye, nomumati gwaElisa okwa ligamene ko e ta mono ondundu ya kundukidhwa kuukambe womulilo nokomatembakwiita gomulilo ga kunduka Elisa.” (2 Aak. 6:15-17) Oshike tatu vulu okwiilonga moshinima shika nosho wo miiningwanima yilwe yomonkalamwenyo yaElisa?

Elisa ka li a nuka mo omwenyo sho ya kondekwa kAasiria molwaashoka okwa li i inekela muJehova nokwa li e wete nkene Kalunga ta ka longitha oonkondo dhe e ya gamene. Ihatu kala twa tegelela iikumithalonga kunena, ihe ohatu mono kutya Jehova ota gamene oshigwana she shi li ongundu. Meityo lyopathaneko, natse wo otwa kundukidhwa kuukambe womulilo nokomatemba gomulilo. Ngele ohatu ga “mono” nomeho getu geitaalo nongele ohatu kala aluhe twi inekela muKalunga, otatu ka kala kaatu na “nando ombudhi yasha” notatu ka lalekwa nuuyamba kuJehova. (Eps. 4:8) Natu ka taleni nkene tatu vulu okumona uuwanawa miiningwanima yilwe yomonkalamwenyo yaElisa.

ELISA TA TAMEKE OKULONGELA ELIA

Oshikando shimwe, sho Elisa a li ta pulula mepya, omupolofeti Elia okwe ya kuye e tu umbile elwaakani lye mwene kombanda ye. Elisa okwa li e shi kutya shoka osha hala okutya shike. Okwa ningi oshituthi e ta laleke he nayina, nokwa zi mo megumbo e ta yi a ka yakule Elia. (1 Aak. 19:16, 19-21) Molwaashoka Elisa okwa li i igandja a longele Kalunga pakuudha ngaashi tashi vulika, okwa li a ningi oshilongitho moshikaha shaJehova nokwa ka longa e li omupolofeti pehala lyaElia.

Elisa okwa li a longele Elia tashi vulika uule woomvula  hamano. Pethimbo ndyoka, Elisa oye a li ha ‘tula omeya peke lyaElia.’ (2 Aak. 3:11) Pethimbo ndyoka, aantu oya li haya li noonyala, itaaya longitha oofoloko, oombele nenge iinima yilwe yokulitha. Konima yokulya, omupiya okwa li ha tile mwene gwe omeya i iyoge koonyala. Onkee ano iilonga yimwe yaElisa oya li yomupiya gwowala. Ihe nonando ongawo, okwa li e shi tala ko shi li uuthembahenda okukala omuyakuli gwaElia.

Kunena, Aakriste oyendji nayo ohaya yi miilonga yethimbo lyu udha yi ili noyi ili. Mokuninga ngaaka, ohayi inyengithwa keitaalo nokokukala ye na ehalo lyokulongitha oonkondo dhawo ngaashi tashi vulika mokulongela Jehova. Iilonga yimwe ohayi ya pula ya thige po omagumbo gawo ya ka longe ngaashi koBetel, miilonga yokutunga, nomiikwawo yilwe, mbyoka tashi vulika yi kale ya talika ko yowala. Kapu na Omukriste e na okutala ko iilonga mbyoka inaayi simana nenge yidhinitha, molwaashoka Jehova okwe yi lenga noonkondo. — Heb. 6:10.

ELISA OKWA LI A DHIGININE OSHILONGA SHE

Manga Kalunga inaa ‘fala Elia kegulu moshikungulu,’ okwa li a tumu omupolofeti ngoka okuza kuGilgal a ye kuBetel. Elia okwa li a lombwele mukwawo kaaye naye, ihe Elisa okwe mu yamukula a ti: “Itandi ku thigi po.” Sho ye li molweendo, Elia okwa li a lombwele Elisa lwiikando iyali a kale po, ihe ine shi ninga. (2 Aak. 2:1-6) Ngaashi naanaa Rut a li a kakatele puNaemi, Elisa naye okwa li a kakatele puElia. (Rut 1:8, 16, 17) Omolwashike mbela? Osha yela kutya omolwaashoka Elisa okwa li a lenga uuthembahenda mboka a li a pewa kuKalunga wokuyakula Elia.

Elisa okwe tu tulila po oshiholelwa oshiwanawa. Ngele otwa pewa omauthembahenda gamwe giilonga mehangano lyaKalunga, otatu ka kala twa lenga iilonga mbyoka noonkondo ngele otwa kaleke momadhiladhilo kutya otatu longele Jehova. Kapu na we uuthembahenda uunene wu vule mboka. — Eps. 65:4; 84:10.

“LOMBWELA NDJE SHOKA WA HALA NDI KU NINGILE”

Sho aalumentu mbaka ya li mondjila, Elia okwa lombwele Elisa a ti: “Lombwela ndje shoka wa hala ndi ku ningile, manga inaandi kuthwa po.” Ngaashi owala eindilo lyaSalomo ndyoka a li a ningi oomvula dhontumba dha ka pita lya li li ikolelela kiinima yopambepo, eindilo lyaElia nalyo osho lya li ngaaka. Okwa li a pula opo ‘iitopolwa iyali yomombepo yaElia’ yi ye kuye. (1 Aak. 3:5, 9; 2 Aak. 2:9) MuIsraeli, omwanamati gwomusamane gwosheeli okwa li ha pewa lwaali oshipewa shuuthiga. (Deut. 21:15-17) Kungawo, Elisa okwa li a pula opo a ka pingene po Elia e li omupolofeti gwaKalunga. Kakele kaashono, osha yela kutya Elisa okwa li a hala okukala e na omukumo ngaashi Elia, ngoka a li ‘a longele Kalunga aluhe.’ — 1 Aak. 19:13, 14.

Elia okwa li a yamukula ngiini omuyakuli gwe sho e mu indile? Omupolofeti okwa ti: “Eindilo ndika edhigu okugwanitha, ihe oto ke yi pewa, ngele oto mono ndje, sho te kuthwa po pungoye; ihe ngele ito mono ndje, nena ito pewa sha.” (2 Aak. 2:10) Eyamukulo lyaElia olya li li na omaityo gopaali. Lyotango, Kalunga oye owala a li ta vulu okutokola ngele Elisa okwa li ta ka pewa shoka i indile. Etiyali, opo Elisa e shi pewe, okwa li e na okukala naElia, kutya nduno otashi pula shike.

SHOKA ELISA A LI A MONO

Kalunga okwa li a tala ko ngiini eindilo lyaElisa lyokupewa iitopolwa iyali yomombepo yaElia? Ehokololo otali ti: “Oya li taa kundathana, manga taye ende. Ohaluka etemba lyomulilo tali hilwa kuukambe womulilo, olye ya pokati kawo, naElia okwa kuthwa po a falwa megulu moshikungulu. Elisa okwe shi mono.” * Jehova osho a li a yamukula ngaaka eindilo lyaElisa. Elisa okwa li a mono Elia ta kuthwa po puye, okwa li a pewa iitopolwa iyali yomombepo yaElia, nokwa li e mu pingene po oye a kale omupolofeti gwaKalunga. — 2 Aak. 2:11-14.

Elisa okwa li a toola po elwaakani lyiilonga ndyoka lya li lya gwithwa kuElia e te li zala. Okuza mpoka elwaakani ndyoka olya li tali ulike kutya Elisa oku li omupolofeti gwaKalunga. Uunzapo wa gwedhwa po mboka wa li tawu ulike kutya okwa langekwa po owa li we ki imonikila moshikumithalonga shoka a li a longo sho a topola omeya gomulonga gwaJordan.

Shoka a li a mono sho Elia a yi moshikungulu oshi na okukala sha li sha nwetha mo noonkondo Elisa. Nokuli, omuntu iha mono etembakwiita lyomulilo nuukambe womulilo kehe esiku! Iinima mbyoka oya li ya gandja uunzapo kutya Jehova okwa li naanaa a ningile Elisa shoka a li i indile. Uuna Kalunga a yamukula omagalikano getu, ihatu mono omamoniko gomatembakwiita gomulilo nuukambe womulilo. Ihe otatu vulu okumona kutya Kalunga oha longitha oonkondo odhindji opo a shilipaleke kutya ehalo lye olya gwanithwa. Nuuna tu wete kutya Jehova ota laleke nuuyamba oshitopolwa shehangano lye shokombanda yevi, ohatu “mono” etemba lye lyomegulu ta li matuka. — Hes. 10:9-13.

Elisa okwa li e na iimoniwa oyindji mbyoka ya li ye mu  tompo kutya Jehova oku na oonkondo odhindji. Uushili owo kutya, ombepo ondjapuki yaKalunga oya li ya kwathele omupolofeti a longe iikumithalonga 16, yi vule lwiikando iyali mbyoka ya li ya longwa kuElia. * Oshikando oshitiyali shoka Elisa a li a mono uukambe womulilo nomatembakwiita gomulilo osha li pethimbo lyoshikumungu shoka sha li puDotan shoka sha popiwa petameko lyoshitopolwa shika.

ELISA OKWA LI I INEKELE MUJEHOVA

Nonando okwa li a kundukidhwa kaatondi puDotan, Elisa ka li a nuka mo omwenyo. Omolwashike? Omolwaashoka okwa li e na eitaalo lya kola muJehova. Natse otwa pumbwa eitaalo lya tya ngaaka. Onkee ano, natu kale hatu galikana kuKalunga e tu pe ombepo ye ondjapuki opo tu ulike eitaalo lya tya ngaaka nosho wo iiyimati yilwe yombepo. — Luk. 11:13; Gal. 5:22, 23.

Oshiningwanima shopuDotan osha li wo sha pe Elisa etompelo ewanawa lyokukala i inekela muJehova nosho wo megameno lyomatangakwiita ge ngoka kaage wetike. Omupolofeti okwa li a dhimbulula kutya Kalunga okwa li a tula po omatanga gaayengeli ga kondeke oshilando nosho wo mboka ya li ye shi kondeka. Sho Kalunga a tsikitha omutondi, okwa li a hupitha pashikumithalonga Elisa nomupiya gwe. (2 Aak. 6:17-23) Pethimbo ndyoka lya li lya nika oshiponga noonkondo, ngaashi naanaa sho a li moonkalo dhilwe, Elisa okwa li u ulike eitaalo nokwa li a tula thiluthilu einekelo lye muJehova.

Ngaashi Elisa, natu kale twi inekela muJehova Kalunga. (Omayel. 3:5, 6) Ngele otwe shi ningi, ‘Kalunga ote ke tu sila ohenda e te tu yambeke.’ (Eps. 67:1) Eeno shili, inatu kundukidhwa lela lela komatembakwiita gomulilo nuukambe. Ihe, pethimbo ‘lyuudhigu uunene’ mboka wu li pokuya, Jehova ote ke tu gamena tu li uumwayinathana womuuyuni awuhe. (Mat. 24:21; Eh. 7:9, 14) Sigo opethimbo ndyoka, natu dhimbulukwe aluhe kutya “Kalunga oye omupopili gwetu.” — Eps. 62:8.

^ okat. 16 Elia ka li a yi megulu ndyoka li li ehala lyopambepo lyaJehova noyanamati aayengeli. Tala Oshungonangelo ye 1 Kotoba 1997, epandja 12.

^ okat. 19 Tala Oshungonangelo ye 1 Kotoba 2005, epandja 20.