Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2013

Ino teka omukumo nando!

Ino teka omukumo nando!

Mbela owa kala Onzapo yaJehova uule womimvo odhindji nowa halelela kuume koye kopandjokana a ninge omulongeli gwaJehova?

Mbela owa li wa teka omukumo sho omukonakonimbiimbeli ngoka a li tu ulike ohokwe petameko, inaa ninga ehumokomeho e ye moshili?

 Iimoniwa yontumba yokuBritania otayi ke ku kwathela wu mone kutya omolwashike kuu na okuteka omukumo. Oto ka mona wo shoka to vulu okuninga wu ‘umbile oshikwiila shoye kombanda yomeya,’ oku shi popya pathaneko, opo wu kwathele mboka inaaya taamba ko natango oshili. — Omuuv. 11:1.

OSHA SIMANENENA WU KALE OMUDHIGININI

Oshinima shimwe shoka sha simanenena osho okukala omudhiginini. Owa pumbwa okukala wa kakatela oshili nokwiinekela muJehova. (Deut. 10:20) Omumwameme Georgina osho a li a ningi. Sho a tameke okukonakona Ombiimbeli nOonzapo dhaJehova mo 1970, omusamane gwe, Kyriacos, okwa li a geya noonkondo. Okwa li a kambadhala okukeelela omukadhi kaa tsikile nekonakonombiimbeli, okwa li hi indike Oonzapo dhi ye megumbo lye, nokwa li ha kutha po iileshomwa yOonzapo dhaJehova.

Sho Georgina a tameke okukala ha yi kokugongala, omulume osho nduno a latha ko. Esiku limwe okwa li a yi kOshinyanga shUukwaniilwa a ka nyenyete. Omumwameme gumwe sho a mono kutya Kyriacos oha popi nawa Oshigreka, shi vulithe Oshiingilisa, okwa dhengele ongodhi omumwatate gumwe gwokegongalo lilwe ngoka Omugreka e ye e ya kwathele. Omolweihumbato ewanawa lyomumwatate, Kyriacos okwa li a pulakene nawa, noya kala nokukonakona Ombiimbeli naye uule woomwedhi dhontumba. Ihe konima yethimbo Kyriacos okweetha po okukonakona.

Konima yaashono, okwa tsikile okupataneka omukadhi uule womimvo ndatu natango. Okwa lombwele omukadhi kutya ngele okwa ninginithwa ote mu thigi po. Mesiku ndyoka Georgina a ninginithwa okwa li a galikana kuJehova a mana mo opo Kyriacos kee mu thige po. Sho Oonzapo dhe mu ile ya ye koshigongi, Kyriacos okwe dhi lombwele a ti: “Ne indeni owala. Otatu mu landula noshihauto shetu.” Okwa li a kala pomutumba gwongulonene nokutala sho omukadhi ta ninginithwa.

Okuza sho Georgina a tsakanene nOonzapo oshikando shotango, opwa li pwa piti konyala omimvo 40 opo omulume a ninginithwe

Okuza mpoka ka li we ha pataneke unene omukadhi, nomokweendela ko kwethimbo okwa li a ningi omalunduluko omanene. Okuza sho Georgina a tsakanene nOonzapo oshikando shotango, opwa li pwa piti konyala omimvo 40 opo omulume a ninginithwe. Oshike sha li sha kwathele Kyriacos? Okwa ti: “Onda li nda nyanyukwa omolwetokolotoko ndyoka Georgina a kala e na.” Omukadhi okwa ti: “Nonando omusamane gwandje okwa kala nokupataneka ndje, kanda li tandi ka etha po okulongela Kalunga kandje. Onda kala nokugalikana Jehova aluhe, nokanda li nando nda teka omukumo.”

UUWANAWA MBOKA HAWU ZI MOKUZALA OMUNTU OMUPE

Oshinima shilwe shoka hashi kwathele kuume kopandjokana a ninge omalunduluko osho okukokeka uukwatya wopaKriste. Omuyapostoli Petrus okwa ladhipike aakulukadhi Aakriste a ti: “Vulikeni kaalumentu yeni, opo aalumentu mboka inaa itaala oohapu dhaKalunga, ya falwe meitaalo komikalo dheni. Itamu pumbwa oku shi ninga noohapu.” (1 Pet. 3:1) Omumwameme Christine okwa li a tula oohapu ndhoka miilonga, nonando osha li sha pula omulume omimvo odhindji opo a falwe meitaalo komikalo dhe. Konima yomimvo 20 nasha sho Christine a ningi Onzapo, omulume okwa kala e wete inaa pumbwa Kalunga monkalamwenyo ye. John ka li a hala okukala e na ombinga melongelokalunga, ihe okwa li e wete nkene Christine a simaneka eitaalo lye epe. John okwa ti: “Onda li ndi shi wete kutya olye mu etela enyanyu. Okwa li lela e na uukwatya uuwanawa nomwiinekelwa, naashoka osha li sha kwathele ndje ndi pite moonkalo oondhigu odhindji.”

Christine ka li nando a thiminike omulume e ye melongelokalunga moka e li. Omulume okwe shi zimine a ti: “Christine okwa li e shi mono kutya oshi li hwepo kaa popye nangame kombinga yeitaalo lye, nokwa li e etha ndje ndi ilonge oshili nethimbo lyandje nomomukalo ngoka nda hala.” Uuna Christine a mono iitopolwa yontumba mOshungolangelo nenge mo-Awake! mbyoka e shi kutya John ota ka kala e yi hokwa, ngaashi kombinga yuunongononi nosho wo yeshito, ohe yi mu ulukile ta ti: “Ondi wete kutya oto ka kala wa hokwa okulesha iitopolwa mbika.”

Konima yethimbo, John okwa li a penzelwa nokukala ha longo iilonga yomoshikunino. Okwa li e na ethimbo olindji okukala ta dhiladhila komapulo gomuule ge na ko nasha nonkalamwenyo. Okwa tameke okwiipula ta ti: ‘Mbela otwe ya po owala ohaluka, nenge otwa shitwa nelalakano lyasha?’ Esiku limwe omumwatate gumwe ngoka a li ta popi naJohn, okwe mu pula a ti: “Mbela ino hala okukonakona Ombiimbeli?” John okwa ti: “Onda li nda zimine, molwaashoka pethimbo ndyoka onda li nda tameke okwiitaala muKalunga.”

Christine ka li tuu a ningi oshinima sha simana sho inaa teka omukumo! John okwa li a ninginithwa konima yoomvula 20 sho Christine a kala nokugalikana a taambe ko oshili. Ngashingeyi otaya longele Jehova nuulaadhi pamwe. John okwa ti: “Opu na iinima iyali mbyoka ya fala ndje meitaalo. Iinima mbyoka oyo ombili nosho wo uukuume wOonzapo. Ngele owa hokana nenge wa hokanwa kugumwe gwomOonzapo dhaJehova, owu na kuume omudhiginini, omwiinekelwa noku na  ombepo yeiyambo.” Christine okwa li a tula miilonga oohapu ndhoka dhi li mu 1 Petrus 3:1, nokwa li a pondola tuu shili!

OMBUTO OHAYI KA MENA KONIMA YOOMVULA

Ongiini kombinga yaakonakonimbiimbeli mboka ya kanitha ohokwe ndjoka ya li ye na petameko omolwomatompelo gontumba? Omukwaniilwa Salomo okwa nyola a ti: “Kuna oombuto dhoye ongula, ngoye ino vululukitha wo iikaha yoye komatango, oshoka ino tseya, oyini po tayi ka mena, oondjika nenge ndjiyaka, nenge adhihe mbali tadhi ka mena.” (Omuuv. 11:6) Ethimbo limwe ohashi pula oomvula odhindji opo ombuto yoshili yi mene. Ihe konima yethimbo, omuntu oye mwene ha ka mona kutya osha simana okuhedha popepi naKalunga. (Jak. 4:8) Onkee ano, otashi vulika wu ka mone iizemo wa li inoo yi tegelela.

Tala koshiholelwa shomukiintu Alice gwokoIndia, ngoka a li a tembukile koIngilanda. Mo 1974 okwa li a tameke okukonakona Ombiimbeli. Ye mwenemwene omupopi gwOshihindi, ihe okwa li a hala okuhwepopaleka Oshiingilisa she. Okwa li a tsikile nekonakono lye uule womimvo dhontumba nomathimbo gamwe okwa li ha gongala kegongalo lyOshiingilisa. Okwa li e shi kutya oti ilongo oshili, ihe ka li e wete ngele oya simana. Okwa li wo u ukitha eitulomo lye kiimaliwa nokwa li e hole okuya mpoka tapu liwa oshimwenyo. Alice osho ngaa nee e ke etha po okukonakona.

Konima yomimvo 30 lwaampono, omumwameme Stella, ngoka a li ha konakona naAlice, okwa li a yakula ontumwafo ya za kuAlice. Otayi lesha ngeyi: “Ondi shi shi nawa kutya oto ka kala wa nyanyukwa okutseya kutya omukonakonimbiimbeli gwoye gwomo 1974, okwa li a ninginithwa poshigongi shoshitopolwa shoka opo sha zi ko. Owa dhana onkandangala ya simana monkalamwenyo yandje. Owa kuna ombuto yoshili mungame, nonde yi kaleke momadhiladhilo nomomutima gwandje, nonando pethimbo mpoka kanda li ndi ilongekidha okwiiyapulila Kalunga.”

Ontumwafo ndjoka Stella a nyolelwa kuAlice otayi lesha ngeyi: “Ondi shi shi nawa kutya oto ka kala wa nyanyukwa okutseya kutya omukonakonimbiimbeli gwoye gwomo 1974, okwa li a ninginithwa poshigongi shoshitopolwa shoka opo sha zi ko”

Oshike sha ningitha Alice e ye moshili? Okwa hokolola kutya okwa li a polimana noonkondo sho omusamane gwe a si mo 1997. Alice okwa li a galikana kuKalunga. Meni lyominute omulongo, Oonzapo mbali ndhoka hadhi popi Oshipunjabi odha li dhe ya pegumbo lye, nodhe mu pe okatraktate Etegameno Lini kOonakusa Aaholike? Alice okwa li e wete kutya egalikano lye olya yamukulwa nokwa li a tokola kutya oku na okukala te endathana nOonzapo dhaJehova. Okwa li ti ipula nduno kutya ote dhi tsu peni? Okwa li i itsu okambo okakulu mu na ondjukithi yegongalo lyOshipunjabi ndjoka Stella e mu pele. Alice okwa li a talele po Oshinyanga shUukwaniilwa. Aamwatate naamwameme aapopi yOshipunjabi oya li ye mu taamba ko nohole. Alice okwa ti: “Ohole ndjoka oya tsikile mungame noya kwathele ndje ndi pepelelwe po kepolimano lyandje.”

Okwa li a tameke okukala pokugongala pandjigilile nokwa tamekulula ekonakonombiimbeli lye nokwa li i ilongo okupopya nokulesha nawa Oshipunjabi. Okwa li a ninginithwa mo 2003. Pehulilo lyontumwafo ndjoka a li a nyolele Stella, okwa ti: “Tangi unene sho wa li wa kunu ombuto ndjoka oomvula 29 dha piti naasho wa tulila ndje po oshiholelwa oshiwanawa.”

“Tangi unene sho wa li wa kunu ombuto ndjoka oomvula 29 dha piti naasho watulila ndje po oshiholelwa oshiwanawa.” — Alice

Miimoniwa mbika oto ilongo mo shike? Otashi vulika shi kuthe ethimbo shi vulithe pwaashoka wa li wa tegelela, ihe omuntu ngele okwa sa ondjala pambepo, omunashili nomwiifupipiki, Jehova ota ka pitika oshili yi mene momutima gwe. Dhimbulukwa shoka Jesus a popi meyele lye sho a ti: “Ombuto oya mene e tayi koko, ye [omukuni] ina tseya, nkene sha ningwa, oshoka evi olyo lyene tali kokitha iimeno e tali etithitha oomuma: tango omuno, tagu landulwa komutse, nosho wo oomuma tadhi kolo komutse.” (Mark. 4:27, 28) Okukoka hoka ohaku ningi ‘ko kwene’ nohaku endele ko. Muushili wo wene, aauvithi yUukwaniilwa ihaya mono nkene shika tashi ningwa. Onkee ano, tsikila okukuna ombuto oyindji. Ngele owa ningi ngaaka oto ka teya oshindji.

Ino dhimbwa kutya okugalikana okwa simana. Georgina nosho wo Christine oya kala haya galikana kuJehova. Ngele owa ‘dhiginine okugalikana’ nokukala inoo teka omukumo, “nge pwa piti omasiku ogendji,” oto ka mona ishewe “oshikwiila” shoka wa li wu umbile kombanda yomeya. — Rom. 12:12; Omuuv. 11:1.