Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2013

Mboka ye hole Jehova “ihaa pundukithwa kusha”

Mboka ye hole Jehova “ihaa pundukithwa kusha”

“Oonakuhola ompango yoye ohaa kala ye na ombili oyindji, yo ihaa pundukithwa kusha.” — EPS. 119:165, OB-1954.

1. Iikala yomumatuki gumwe otayi vulu ngiini oku tu kwathela tu kale twa tokola toko kaatu sholole?

SHO Mary Decker a li e na oomvula omulongo nasha, okwa li a ningi omumatuki dhingi muuyuni auhe. Aantu oyendji oya li taya dhiladhila kutya ota ka sindana ombandi yoshingoli puudhano woOlimpika mboka wa li ko mo 1984. Ihe shoka inashi ka ningwa. Manga Mary ta matuka methigathano lyoshinano shoometa 3 000, okwi ikoyola kompadhi yomumatuki omukwawo e ti ihata po. Molwaashoka okwa li a mona oshiponga nokwa li ta lili, okwa tumbwa mo mokapale. Nonando ka li a thiki pethikilo ka li e etha po okumatuka. Konima owala yoomwedhi dhontumba, okwa li a shuna mokumatuka, nomo 1985 okwa li nokuli a matuka ondapo ndjoka inaayi tondokwa nando onale komukiintu muuyuni awuhe.

2. Omeityo lini Aakriste yashili ye li methigathano, notu na okukala tatu lalakanene shike?

2 Tu li Aakriste otu li methigathano lyopathaneko. Elalakano lyetu nali kale okumatuka sigo twa sindana. Katu li methigathano lyoshinano oshihupi moka omuntu ha matuka ondapo yoshidhudhu opo a sindane. Tse natango, itatu matuka ngaashi omuntu ngoka ta nyanya ye ha thikama po manga. Ihe otu li methigathano ndyoka tali vulu okuyelekwa nethigathano lyiinano iile moka omuntu ha matuka uule wethimbo lyontumba opo a sindane. Omuyapostoli Paulus okwa li a longitha efaathanitho lyomuntu e li methigathano montumwafo ye ndjoka a li a nyolele Aakriste yomuKorinto, oshilando shoka mwa li hamu ningilwa olundji omathigathano gokumatuka. Okwa nyola a ti: “One omu shi shi kutya aantu mboka taa ningi shanamutango, ayehe otaa matuka, ihe gumwe awike ta mono ondjambi yesindano. Nane wo matukeni ngaangoka, mu yi mone.” — 1 Kor. 9:24.

3. Omeityo lini aamatuki ayehe taya ka sindana ondjambi yomwenyo gwaaluhe?

3 Ombiimbeli otayi tu lombwele tu matuke twa mana mo methigathano ndika lyopathaneko. (Lesha 1 Aakorinto 9:25-27.) Ondjambi ndjoka tatu ka mona oyomwenyo gwaaluhe. Aakriste  aagwayekwa otaye ke yi mona megulu, yo aakuthimbinga yalwe otaye ke yi mona kombanda yevi. Ethigathano ndika inali fa omathigathano galwe. Kehe gumwe ngoka ti idhidhimike sigo ehulilo ota ka mona ondjambi. (Mat. 24:13) Mboka itaaya landula omilandu dhethigathano nenge mboka taya hulile ondjilakati oyo owala itaaya ka pewa ondjambi. Natango, methigathano ndika omo owala aamatuki taya ka pewa ondjambi yomwenyo gwaaluhe.

4. Omolwashike kaashi shi oshipu okumatuka methigathano lyetu lyoku ka mona omwenyo gwaaluhe?

4 Kashi shi oshipu okumatuka methigathano lyoku ka mona omwenyo gwaaluhe. Ohashi pula oonkambadhala neipangelomwene. Jesus Kristus oye owala a li a vulu okumatuka sigo okethikilo inaa punduka nando olumwe. Omulongwa gwe Jakob okwa nyola a ti: “Atuheni ohatu puka olwindji.” (Jak. 3:2) Oohapu ndhoka kadhi shi tuu dhoshili! Atuheni ohatu puka olundji omolwokwaagwanena kwetu nosho wo kwayalwe. Onkee ano, omathimbo gamwe otashi vulika tu ikoyole musha, e tatu kala tatu matuka kashona. Otashi vulika nokuli tu ihate po, ihe otu na okuyambuka po e tatu tsikile nokumatuka. Yamwe oya li yi ihata po nayi, noya li ye na okukwathelwa ya yambuke po yo ya shune methigathano ya matuke sigo okethikilo. Odhoshili kutya otashi vulika tu punduke nenge twi ihate po pakathimbo nenge lwiikando yontumba. — 1 Aak. 8:46.

Ngele owi ihata po taamba ko ekwatho ndyoka to pewa e to yambuka po!

INO ZA MO METHIGATHANO NGELE WA PUNDUKA

5, 6. (a) Ongiini Omukriste “ihaa pundukithwa kusha,” noshike tashi vulu oku mu kwathela a ‘yambuke po’ ishewe? (b) Omolwashike yamwe ihaaya yambuka po ngele ya punduka?

5 Otashi vulika wa longitha nale oshitya “okupunduka” nosho wo ‘okugwila po,’ wu ulike konkalo yopambepo yomuntu. Omautumbulilo ngaka otaga vulu okulongithwa momukalo nguka, ihe haaluhe ge na eityo lya faathana. Pashiholelwa, Omayeletumbulo 24:16 otaga ti: “Omuyuuki nando ota gwile po luheyali, ota yambuka po, ihe omukeenakalunga ota ka tengukila momupya.”

6 Jehova ite etha mboka ye mu inekela ya punduke nenge ya gwile pevi. Ote ke ya kwathela ya pite muupyakadhi nenge mepuko ndyoka tashi vulika itaaya vulu okuza mo yo yene. Otu na uushili kutya Jehova ote ke tu kwathela tu ‘yambuke po’ opo tu tsikile noku mu longela noonkondo dhetu adhihe. Oohapu ndhoka itadhi hekeleke tuu ayehe mboka ye hole Jehova nomutima aguhe! Aakolokoshi  kaye na ehalo lyokuyambuka po, ngaashi mboka ye hole Jehova. Ihaya kongo ekwatho lyombepo ondjapuki yaKalunga noihaya kongo ekwatho koshigwana she. Ohaya tindi nokuli ekwatho lya tya ngaaka uuna taye li pewa. Mepingathano naashono, mboka ‘ye hole ompango’ yaJehova kapu na shoka tashi vulu oku ya pundukitha ya gwe mo thiluthilu methigathano lyoku ka mona omwenyo. — Lesha Episalomi 119:165.

7, 8. Ongiini omuntu ta vulu ‘okugwila po’ eta kala ishewe a hokiwa kuKalunga?

7 Omolwuunkundi wontumba yamwe ohaya gwile momayono omashona lwiikando yontumba. Ihe oye li aayuuki natango koshipala shaJehova ngele oya kala ‘nokuyambuka po,’ sha hala okutya okwiiyela ombedhi shili nokukambadhala okutsikila ishewe niilonga yawo yuudhiginini. Shika otatu vulu oku shi imonena munkene Kalunga a li u ungaunga noshigwana shaIsraeli shonale. (Jes. 41:9, 10) Omayeletumbulo 24:16 ngoka ga popiwa metetekelo, otaga tsu omuthindo ‘kokuyambuka po,’ kekwatho lyaKalunga ketu ngoka omunahenda, pehala lyokutsa omuthindo ‘kokugwila pevi.’ (Lesha Jesaja 55:7.) Molwaashoka Jehova Kalunga naJesus oye tu inekela, otaye tu ladhipike pahole tu ‘yambuke po.’ — Eps. 86:5; Joh. 5:19.

8 Ngele omumatuki methigathano lyiinano iile okwa punduka nenge i ihata po, otashi vulika a kale e na ompito yokuyambuka po e ta tsikile nokumatuka sigo opethikilo ngele okwa katuka oonkatu meendelelo. Katu shi “esiku notundi” uuna ethigathano lyetu lyoku ka mona omwenyo gwaaluhe tali ka hula. (Mat. 24:36) Natango, ngele ihatu punduka lwiikando oyindji, otatu ka vula okutsikila nethigathano noku li mana. Oshike nduno tashi vulu oku tu kwathela kaatu punduke?

OMANDANGALATI NGOKA TAGA VULU OKU TU IMBA TU HUME KOMEHO

9. Otatu ka kundathana kombinga yomandangalati geni ngoka taga vulu oku tu pundukitha?

9 Natu ka kundathaneni kombinga yomandangalati gatano ngoka taga vulu oku tu pundukitha. Omandangalati ngoka ongaashi uunkundi wetu, omahalo gopanyama, uuna twa ningilwa oshinima kaashi li pauyuuki komwiitaali omukwetu, uudhigu kehe nenge omatidhagano nosho wo okwaagwanenena kwayalwe. Dhimbulukwa wo kutya, ngele otwa punduka, Jehova omwiidhidhimiki noonkondo. Ita ka thika pehulithodhiladhilo nziya kutya katu shi aadhiginini.

10, 11. David okwa li a kondjo nuunkundi wuni?

10 Uunkundi wetu otawu vulu okuyelekanithwa nomamanya ngoka ge li mooha dhondjila moka tamu ningilwa ethigathano. Onkalamwenyo yomukwaniilwa David nosho wo yomuyapostoli Petrus, otayi tu kwathele tu dhimbulule uunkundi wopaali mboka ya li ye na. David ka li e na eipangelo, omanga Petrus a li e na uumbanda wokutila aantu.

11 Omukwaniilwa David okwa li u ulike uunkundi wokwaaipangela sho a yi moluhondelo naBatseba. Naasho David a li a tukwa kuNabal okwaale a ninge oshinima oshiwinayi. David okwa li a kanitha eipangelo, ihe ka li nando e etha po okuninga shoka tashi nyanyudha Jehova. Omolwekwatho lyayalwe okwa li a vulu okuyambuka po e ta tsikile methigathano. — 1 Sam. 25:5-13, 32, 33; 2 Sam. 12:1-13.

12. Oshike sha li sha kwathele Petrus a tsikile methigathano, nonando okwa li a punduka unene?

12 Petrus okwa li e na uumbanda wokutila aantu, niikando yimwe okwa li a punduka unene. Ihe nonando ongaaka, okwa li a kala omudhiginini kuJesus naJehova. Pashiholelwa, okwa li i idhimbike Omuwa gwe, nokuli lwiikando itatu. (Luk. 22:54-62) Ethimbo limwe, Petrus ka li i ihumbata momukalo gwopaKriste, sho u ungaunga nooitaali mboka ya za miigwana yilwe, ya fa ye vulike kAakriste Aajuda mboka ya pita etanda. Ihe omuyapostoli Paulus okwa li e shi shi nawa kutya megongalo lyopaKriste kamu na ngoka a simana e vule Aakriste ooyakwawo. Eihumbato lyaPetrus olya li lya puka. Manga eihumbato lye inaali yona po ombili yuumwayinathana, Paulus okwa li a katuka onkatu e mu pukulule shu ukilila pethimbo opo tuu mpoka. (Gal. 2:11-14) Mbela Petrus okwa li a geye sho a pewa omayele e te etha po okumatuka methigathano lyomwenyo? Aawe. Okwa li a taamba ko omayele gaPaulus e te ga tula miilonga nokwa li a tsikile nokumatuka methigathano.

13. Ongiini uunkundi wopalutu tawu vulu oku tu pundukitha?

13 Omathimbo gamwe uunkundi wetu otawu vulu okukala wa kwatela mo uukolele mboka tashi  vulika wu tu pundukithe. Okwaahe na uukolele otaku vulu wo okuya moshipala uupambepo wetu noku tu ningitha nokuli tu thathale po nenge tu ethe po okumatuka. Pashiholelwa, omumwameme gumwe gwokoJapani okwa li a kwatwa kuuvu konima yoomvula 17 sho a ninginithwa. Okwa kala owala ta gandja eitulomo lya pitilila kuukolele we sigo a nkundipala pambepo. Mokweendela ko kwethimbo, ka li we ipyakidhila niinima yopambepo. Aakuluntugongalo yaali oya li ye mu talele po. Okwa li a ladhipikwa koohapu dhawo dhohenda nokwa tameke ishewe okukala pokugongala. Okwa ti: “Onda li nda tameke okulila molwaashoka aamwatate oya li ya popitha ndje nohamu.” Ngashingeyi omumwameme ngoka oku li ishewe methigathano.

14, 15. Etokolo toko lini tu na okukala tu na ngele mutse mwe ya omahalo ga puka? Gandja oshiholelwa.

14 Omahalo gopanyama oga pundukitha aantu oyendji. Uuna tatu makelwa momukalo nguka, otwa pumbwa okukatuka oonkatu tu kale twa yogoka pamadhiladhilo, pamikalo nosho wo pambepo. Dhimbulukwa omayele gaJesus ‘gokweekalahi’ momukalo gwopathaneko kehe shimwe shoka tashi vulu oku tu pundukitha, kutya nduno eho lyetu nenge oshikaha shetu. Mbela shoka inashi kwatela mo okudhiladhila kwa nyata nosho wo oonkatu ndhoka dha ningitha yamwe ya gwe mo methigathano lyoku ka mona omwenyo gwaaluhe? — Lesha Mateus 5:29, 30.

15 Omumwatate gumwe ngoka putudhilwa megumbo lyAakriste okwa nyola a ti kutya okwa kala olundji nokukondjitha omahalo guushenge. Okwa ti: “Kanda li handi kala nda manguluka. Onda li handi kala ndi wete oshidhigu kungame okupanga uukuume nayalwe.” Sho e na oomvula 20 okwa ningi omukokolindjila gwondjigilile nokwa li a langekwa po e li omuyakuligongalo. Ihe okwa li a punduka sho a yono sha kwata miiti, nokwa li a pewa egeeloputudho lyopamanyolo nokukwathelwa kaakuluntugongalo. Egalikano, okukonakona Oohapu dhaKalunga nosho wo okugandja eitulomo kokukwathela yalwe okwa li kwe mu kwathele a yambuke po nokushune methigathano lyoku ka mona omwenyo. Konima yoomvula dhontumba okwa ti: “Omathimbo gamwe omahalo ngoka ohage ya mo mungame, ihe ihandi etha ga gwilile ndje po. Onda li ndi ilongo kutya Jehova ite ku ethele memakelo li vule oonkondo dhoye. Onkee ano, ondi na uushili kutya Kalunga oku wete kutya otandi vulu okupita mo memakelo ndika.” Omumwatate nguka okwa hulitha ta ti: “Omaupyakadhi agehe nda kala nokwiidhidhimikila itaga ka kala po we muuyuni uupe. Onda hala shoka shi ka ningwe. Sigo okunena, otandi tsikile nokukondja.” Omumwatate nguka okwa tokola toko okukala methigathano.

16, 17. (a) Oshike sha li sha kwathele omumwatate gumwe ngoka a li e wete kutya okwa ningilwa oshinima kaashi li pauyuuki? (b) Otwa pumbwa okugandja eitulomo kushike, opo kaatu punduke?

16 Uuna twa ningilwa oshinima kaashi li pauyuuki komwiitaali omukwetu, otatu vulu wo okupunduka. Omumwatate gumwe ngoka a li omukuluntugongalo moFulaanisa, okwa li e wete kutya okwa ningilwa oshinima kaashi li pauyuuki nokwa li a geye noonkondo. Omolwoshinima shoka, okwe etha po okweendathana negongalo e ta kala inii ipyakidhila we. Aakuluntugongalo yaali oya li ye ke mu talela po noya li ye mu pulakene nohenda, noinaye mu kwata melaka sho ta hokolola shoka aniwa sha li sha ningwa po. Oya li ye mu ladhipike u undulile omutengi gwe kuJehova etaye mu lombwele kutya shoka sha simanenena okunyanyudha Kalunga. Okwa li a taamba ko omayele nokwa li a shuna methigathano lyoku ka mona omwenyo nokukala ishewe i ipyakidhila miinima yegongalo.

17 Aakriste ayehe oya pumbwa okukala taya gandja eitulomo kuJesus Kristus ngoka a langekwa po e li Omutse gwegongalo, ihe hakaantu inaaya gwanenena. Jesus ngoka omeho ge “ga fa oohandje dhomulilo,” oha tala ko iinima ayihe momukalo gwu uka nohe yi tala ko momukalo ngoka itaatu vulu okuuva ko. (Eh. 1:13-16) Pashiholelwa, oha mono kutya oshinima shoka tashi monika sha fa shaahe li pauyuuki kutse otashi vulika tu kale twe shi tala ko pambambo nenge inaatu shi uva ko nawa. Jesus ote ku ungaunga niinima yegongalo momukalo omwaanawa nosho wo pethimbo lyo opala. Onkee ano, katu na okweetha oonkatu nenge omatokolo gOmukriste omukwetu ge tu pundukithe.

18. Ongiini tatu vulu okwiidhidhimikila omashongo nenge oonkalo oondhigu?

18 Omandangalati galwe gaali ngoka taga vulu  oku tu pundukitha ogo uudhigu nenge etidhagano nosho wo okwaagwanenena kwayalwe megongalo. Jesus okwa popi meyele lye lyomukuni a ti kutya “uudhigu nenge etidhagano” otali vulu okupundukitha yamwe. Kutya nduno omuntu ota tidhaganwa kuyaandjawo, kaashiinda nenge kepangelo ota vulu okupunduka unene tuu ngele oohapu ‘inadhi ningina muye,’ ano tu tye omuntu ngoka inaa kola nawa pambepo. (Mat. 13:21) Onkee ano, ngele otwa kala tu na omutima omwaanawa, ombuto yUukwaniilwa otayi ka ningina mutse e tatu kala tu na eitaalo lya kola. Uuna tu li momaupyakadhi, otu na okukambadhala tu kale hatu konakakona pamwe negalikano kutya iinima yini ya gwana okusimanekwa. (Lesha Aafilippi 4:6-9.) Pakwatho lyaJehova, otatu ka vula okukondjitha omashongo noitatu ke etha oonkalo oondhigu dhi kale einda mondjila yetu.

Ino etha nando osha shi ku imbe wu thike kethikilo!

19. Uuna tu uvithwa nayi, oshike tashi vulu oku tu kwathela kaatu punduke?

19 Shinikitha oluhodhi, yamwe oya gwa mo methigathano lyoku ka mona omwenyo omolwokwaagwanena kwayalwe. Yamwe oya pundukithwa omolwomataloko ga yoolokathana miinima moka kehe gumwe e na okulongitha eiyuvo lye. (1 Kor. 8:12, 13) Ngele omuntu gwontumba okwe tu uvitha nayi, mbela otatu ka etha oshinima shoka shi ninge endangalati mondjila yetu? Ombiimbeli otayi kumagidha Aakriste ya hulithe po okupangula yalwe, ya kale haya dhimine po yalwe, nokuhenuka okukala ye wete kutya oye na uuthemba wokuuva nayi. (Luk. 6:37) Ngele owa mono endangalati mondjila yoye, ipula to ti: ‘Mbela ohandi pangula yalwe shi ikolelela ketaloko lyandje mwene? Ngele ondi shi shi nawa kutya aamwatate inaya gwanenena, mbela otandi ka etha ngaa okwaagwanenena kwagumwe ku kuthe ndje methigathano lyoku ka mona omwenyo?’ Ohole yokuhola Jehova otayi vulu oku tu kwathela tu kale twa tokola toko kaatu ethe nando osha nenge omuntu gulwe e tu imbe tu ka thike kethikilo.

INO GWA MO METHIGATHANO, NGOYE INO PUNDUKITHWA KUSHA

20, 21. Owa tokola toko okuninga shike sho wu li methigathano lyoku ka mona omwenyo gwaaluhe?

20 Mbela owa tokola ngaa toko wu ‘matuke oshinano ashihe’? (2 Tim. 4:7, 8) Ngele osho, owu na okukala wu na ekonakono lyopaumwene. Longitha Ombiimbeli nosho wo iileshomwa yetu wu konge uuyelele wa gwedhwa po, wu tedhatedhe, nowu konenene omandangalati ngoka taga vulu oku ku pundukitha. Indila Jehova e ku pe ombepo ondjapuki yi ku nkondopaleke. Dhimbulukwa kutya omumatuki kehe ngele a punduka nenge a gwile po ota vulu okuyambuka po nokutsikila methigathano lyoku ka mona omwenyo gwaaluhe. Otashi vulika a londele komandangalati ngoka ge mu pundukitha opo a ye komeho, nokwiilonga iiyilongomwa ya simana uuna eitaalo lye tali makelwa.

21 Ombiimbeli otayi ulike kutya mboka ye li methigathano lyoku ka mona omwenyo gwaaluhe oye na okukala taya matuka. Mboka ye li methigathano inaya fa aantu mboka taya londo mombesa yi ya fale kehala lyontumba. Pehala lyaashono, kehe ngoka e li methigathano oku na okumatuka a ka mone omwenyo gwaaluhe. Sho tatu matuka, Jehova ote ke tu pa “ombili oyindji.” (Eps. 119:165, OB-1954) Otatu vulu okukala neinekelo kutya ota ka tsikila oku tu laleka nuuyamba ngashingeyi note ke tu pa omalaleko nuuyamba gaa na hulilo monakuyiwa ngele otwa matuka sigo opethikilo. — Jak. 1:12.