Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2013

Hekelekwa, ngoye to hekeleke wo yalwe

Hekelekwa, ngoye to hekeleke wo yalwe

Omolwokwaagwanena, atuheni otwa li twe ehama, nayamwe oya li ya kwatwa nokuli komikithi dhoshinamenena. Uuna tatu ehama, oolye taya vulu oku tu kwathela tu idhidhimike?

Ekwatho limwe ndyoka hali tu kwathele tu idhidhimike, olyo ndyoka hatu mono kaanegumbo, kookuume nosho wo kooitaali ooyakwetu.

Oohapu dhohenda nodhohole tadhi popiwa kukuume otadhi vulu okukala dha fa omagadhi ngoka tage tu ndjangeke noku tu talaleka. (Omayel. 16:24; 18:24; 25:11) Ihe Aakriste yashili ihaya kala owala tayi ipula unene nehekeleko ndyoka ye na okupewa. Ohaya “[hekeleke mboka ye li muupyakadhi kehe, NW], opo [ya] vule wo okukwatha mboka ye li momaudhigu gi ili [nogi] ili. Ekwatho ndika olyo ndyoka, tse yene twa kwathwa nalyo kuKalunga.” (2 Kor. 1:4; Luk. 6:31) Omumwatate Antonio ngoka e li omutonateli gwoshitopolwa muMeksiko, okwa li e shi ningilwa.

Okwa li a nika oluhodhi sho a monika okaankela yomombinzi hayi ithanwa lymphoma. Nonando okwa li a nika oluhodhi, okwa li a kambadhala okupangela omaiyuvo ge. Ngiini mbela? Okwa li ha kambadhala okudhimbulukwa omaimbilo gUukwaniilwa noku ga imba, naasho ti imbi oha tedhatedha kiitya yeimbilo ndyoka. Okugalikana mokule nokulesha Ombiimbeli mokule okwa li kwe mu hekeleke wo unene.

Antonio okwa li e shi mono kutya ekwatho enene olya li lye mu zile kooitaali ooyakwawo. Okwa ti: “Ngele ngame nomukulukadhi gwandje twa li tu uvite twa gwililwa po, otwa li hatu pula omukwanezimo ngoka e li omukuluntugongalo e ye kegumbo lyetu a galikane pamwe natse. Shika osha li she tu hekeleke noku tu etela epepelelo.” Okwa gwedha ko a ti: “Otu na nokuli olupandu omolwekwatho ndyoka twa pewa kaakwanezimo nosho wo kooitaali ooyakwetu, nomethimbo efupi otwa li twa vulu okusinda omaiyuvo omawinayi.” Ka li tuu e na olupandu sho e na ookuume ye mu hole noye na ko nasha naye!

Ekwatho lilwe ndyoka hatu vulu okumona pethimbo lyuudhigu olyo ombepo ondjapuki ndjoka tu uvanekelwa. Omuyapostoli Petrus okwa popi kutya Kalunga oha gandja ombepo ondjapuki “omagano.” (Iil. 2:38) Shoka osha li sha ningwa shili pethimbo sho oyendji ya li ya gwayekwa nombepo ondjapuki pOpentekoste 33 E.N. Kakele koku yi longitha mokugwayeka, ombepo ondjapuki oyi li omagano ngoka taga vulu okumonika kukehe gumwe. Omagano ngaka ihaga pu po, onkee ano, omolwashike itoo kala ho pula wu ga pewe aluhe? — Jes. 40:28-31.

KALA WU NA KO NASHA LELA NAANTU MBOKA TAYA MONO IIHUNA

Omuyapostoli Paulus okwa li i idhidhimikile omaupyakadhi ogendji, nokuli nopoompito dhimwe okwa li a zi koshakapalwa. (2 Kor. 1:8-10) Ihe nonando ongaaka, Paulus ka li unene a tila okusa. Okukala e shi kutya Kalunga ote mu ambidhidha, osha li she mu hekeleke. Okwa li a nyola a ti: “Kalunga, He yOmuwa gwetu Jesus Kristus, na hambelelwe! Oye Tate omunahenda, Kalunga, ngoka kuye haku zi ekwatho [ehekeleko, NW] alihe. Oye ngoka he tu kwatha [hekeleke, NW] muudhigu wetu auhe.” (2 Kor. 1:3, 4) Paulus ka li e etha omaupyakadhi ge mu gwilile po. Ihe uudhigu mboka a li a mono owa li we mu kwathele a kale e na ohenda, nokukale e shi nawa okuhekeleka yalwe pethimbo ya pumbwa ehekeleko.

Antonio sho a aluka, okwa li a shuna miilonga ye yuuyendi. Okwa kala aluhe e na ko nasha nooitaali ooyakwawo, ihe ye nomukulukadhi gwe oya li ya ningi oonkambadhala dha gwedhwa po ya talele po nokuladhipika mboka taye ehama. Pashiholelwa, sho a li a talele po Omukriste gumwe ngoka a li ta kondjo nuuwehame wa kwata miiti, Antonio okwa li e shi ndhindhilike mo kutya omumwatate ngoka ka li a hala okuya kokugongala. Antonio okwa ti: “Kashi shi andola kutya ka li e hole Jehova nenge aamwatate, ihe uuwehame owala wa li we mu gwilila po pamadhiladhilo e ta kala u uvite kutya ke na nando oshilonga.”

Oshinima shimwe shoka Antonio a ningi opo a tse omukumo omumwatate ngoka a li te ehama, okwa li e mu pula a galikane pokatuthi hoka ya li ye na. Nonando omumwatate okwa li u uvite kutya ina gwana, okwa li a zimine a galikane. Antonio okwa ti: “Okwa li a galikana egalikano tali gumu omutima, nokonima yaashono, okwa li a lunduluka. Okwa li u uvite ishewe e na oshilonga.”

Odhoshili kutya atuheni otwa li twa adhika kuupyakadhi uunene nenge uushona notwa li tu na oku wu idhidhimikila. Ngaashi Paulus e shi popi, shoka ohashi vulu oku tu dheula tu kale tu shi okuhekeleka yalwe uuna ya pumbwa ehekeleko. Onkee ano, natu kale hatu uvile Aakriste ooyakwetu mboka taya mono iihuna uukwawo wanankali nokuholela Kalunga ketu, Jehova, mokukala hatu hekeleke yalwe.