Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2013

Mbela owu na ngaa ‘omwenyo gwokutseya’ Jehova?

Mbela owu na ngaa ‘omwenyo gwokutseya’ Jehova?

“Ongame otandi ya pe oomwenyo dhokutseya ndje, ongame Omuwa, oyo notaa ningi aantu yandje.” — JER. 24:7, OB-1954.

1, 2. Omolwashike aantu yamwe tashi vulika ya kale ya hala okutseya oshindji kombinga yoonkwiyu?

MBELA owu hole okulya oonkwiyu, kutya nduno oontalala nenge oonganye? Aantu oyendji oye hole oonkwiyu, nomolwaashono oyendji muuyuni oye na omikwiyu. Aajuda yonale oya li ye hole oonkwiyu noonkondo. (Nah. 3:12; Luk. 13:6-9) Oonkwiyu odhi na iitungithi yolutu, naantu oyendji ohaya ti kutya oombwanawa nomutima.

2 Oshikando shimwe Jehova okwa li a yelekanitha oonkwiyu nomitima. Kalunga ka li ta yelithile aantu shi na ko nasha niitungithi mbyoka hayi zi moonkwiyu. Ihe okwa li ta popi owala kombinga yomitima dhawo dhopathaneko. Shoka a popi okupitila momupolofeti Jeremia otashi vulu okukwathela omutima gwoye nosho wo dhaamboka wu hole. Sho tatu konakona shoka a li a popi, natu dhiladhile kutya oohapu dhe ndhoka otadhi ti shike kutse tu li Aakriste.

3. Oonkwiyu ndhoka dha popiwa muJeremia ontopolwa 24 otadhi thaneke shike?

3 Tango natu kundathaneni shi na ko nasha naashoka Kalunga a li a popi pethimbo lyaJeremia kombinga yoonkwiyu. Mo 617 K.E.N., (pwa pita ngashingeyi omimvo 2629) Aajuda oya li ya nkundipala pambepo. Kalunga okwa li a pe Jeremia emoniko lyaashoka sha li tashi ke ya ningilwa. Okwa li e ya lombwele kombinga yoonkwiiyu “oontoye, oondhiye” noonkwawo “omayamba gaa na omulyo.” (Lesha Jeremia 24:1-3.) Omayamba oga li taga thaneke omukwaniilwa Zedekia nosho wo yalwe mboka ya li yi iyadha moshipyu sho ya ponokelwa komukwaniilwa Nebukadnezzar netangakwiita lye. Ihe mbela oondhiye otadhi thaneke oolye? Otadhi thaneke Hesekiel, Daniel nosho wo ookuume ke yatatu mboka ya li nale muupongekwa muBabiloni nosho wo Aajuda yamwe mboka ya li ye li pokufalwa ko. Oshihupe shAajuda osha li tashi ka shuna shi ka tungulule Jerusalem nosho wo otempeli yasho, nomokweendela ko kwethimbo, shoka osha li sha gwanithwa. — Jer. 24:8-10; 25:11, 12; 29:10.

4. Etsomukumo lini tatu vulu okumona mwaashoka Kalunga a popi kombinga yoonkwiyu oontoye?

 4 Jehova okwa popi kombinga yaamboka taya thanekwa koonkwiyu oontoye a ti: “Ongame otandi ya pe oomwenyo dhokutseya ndje, ongame Omuwa, oyo notaa ningi aantu yandje.” (Jer. 24:7, OB-1954) Oohapu ndhika odho dhi li enyolo lyoshipalonyolo shoshitopolwa shika. Enyolo ndika itali tu tsu tuu omukumo! Kalunga oku na ehalo oku pa kehe gumwe ‘omwenyo gwoku mu tseya.’ Oshitya ‘omwenyo’ nenge omutima otashi ulike kegamo lyomuntu. Osha yela kutya, owa hala okukala u na omutima gwoku mu tseya nokukala wu li gumwe gwomoshigwana she. Opo wu kale ngaaka owa pumbwa okukatuka oonkatu dhontumba. Oonkatu ndhoka odha kwatela mo okukala ho konakona nokutula miilonga shoka shi li mOohapu dhe, okwiitedhulula nokwiigaluluka, oku mu iyapulila nokuninginithwa medhina lyaHe, nolyOmwana nolyombepo ondjapuki. (Mat. 28:19, 20, NW; Iil. 3:19) Otashi vulika wa katuka nale oonkatu ndhoka nenge tashi vulika ho endathana nOonzapo dhaJehova pandjigilile nowu li pokukatuka oonkatu ndhoka.

5. Etumwalaka lyaJeremia olya li lya nuninwa unene oolye?

5 Kutya nduno otwa katuka owala dhimwe dhomoonkatu ndhoka nenge otwa katuka adhihe, otwa pumbwa natango okugandja eitulomo kiikala yetu nokeihumbato lyetu. Omolwashike mbela? Eyamukulo otatu ke li mona mokutala kwaashoka Jeremia a nyola shi na ko nasha nomutima. Oontopolwa dhimwe dhembo lyaJeremia odha li tadhi popi kombinga yiigwana mbyoka ya kundukidha Juda. Ihe nonando ongaaka, oohapu dhe odha li tadhi popi unene kombinga yoshigwana shaJuda pethimbo sha li tashi lelwa kaakwaniilwa yasho yatano. (Jer. 1:15, 16) Uushili owo kutya, etumwalaka lyaJeremia olya li kombinga yaalumentu, aakiintu nosho wo aanona mboka ya li yi iyapulila Jehova. Oohekulululwa yoshigwana shAajuda oya li ya hogolola yo yene ya kale oshigwana shaKalunga. (Eks. 19:3-8) Shimwe ishewe, oya li ye shi koleke pethimbo lyaJeremia kutya yo oyi iyapulila Kalunga. Aajuda oya li ya ti: “Eeno, otatu ya kOMUWA, oshoka oye Kalunga ketu.” (Jer. 3:22) Ihe mbela sho to dhiladhila onkalo yomitima dhawo oya li yi li ngiini?

MBELA OMUTIMA GWOPATHANEKO OGWA PUMBWA ETANDO?

6. Omolwashike tu na okukala tu na ko nasha naashoka Kalunga a popi kombinga yomutima?

6 Kunena oondohotola ohadhi longitha iilongitho yoshinanena dhi tale kutya omutima gwomuntu ogu li monkalo ya tya ngiini nosho wo kutya otagu longo ngiini. Ihe Jehova oha konakona omitima shi vulithe mpoka, ngaashi a li e shi ningi pethimbo lyaJeremia. Kalunga okwa shiga ko mokuninga ngaaka, ngaashi tatu shi mono moohapu ndhika: ‘Omwenyo ogwo omunamakoto kombanda yiinima ayihe, nokagu shi kwaaludhwa. Olye ta vulu oku gu uva ko? Ongame, OMUWA, otandi yeleke oomwenyo dhaantu. Shaangoka otandi mu ningi pakukala kwe, otandi mu futu pailonga ye.’ (Jer. 17:9, 10) ‘Okuyeleka omwenyo’ inaku kwatela mo okukonakona omutima gwo gwenegwene paunamiti, ngoka hashi vulika gu dhenge lwiikando omabiliyona gatatu muule woomvula 70 nenge 80. Pehala lyaashono, Jehova okwa li ta popi kombinga yomwenyo nenge yomutima gwopathaneko. ‘Omwenyo’ nenge omutima otagu ulike kuuntu awuhe womuntu womeni mwa kwatelwa omahalo, omadhiladhilo, egamo, iikala nomalalakano ge. Ngoye owu na omutima gwa tya ngaaka, na Kalunga ota vulu oku gu konakona. Ihe nangoye oto vulu okuninga oonkambadhala wu konakone omutima gwoye.

7. Pakupopya kwaJeremia, Aajuda oyendji pethimbo lye oya li ye na oomwenyo dha tya ngiini?

7 Opo tu konakone omitima dhetu otu na okwiipula tatu ti: ‘Omitima dhopathaneko dhAajuda oyendji pethimbo lyaJeremia odha li monkalo ya tya ngiini?’ Opo tu mone eyamukulo kepulo ndyoka natu tale kuutumbulilo wa pumba lela mboka Jeremia a li a longitha sho a ti: ‘Ayehe yomegumbo lyaIsraeli oyo inaa pita etanda komwenyo.’ Jeremia ka li ta popi kombinga yokupita etanda ko kwenekwene sho aalumentu Aajuda ya li haya kenkwa. Okwa ti: ‘Tala, omasiku otage ya, Omuwa osho ta ti, ongame otandi kongolola ayehe ya pita etanda pamwe naamboka inaa pita etanda.’ Nokuli naalumentu Aajuda mboka ya li ya kenkwa, oya li “inaa pita etanda komwenyo.” (Jer. 9:24, 25, OB-1954 [Jer. 9:25, 26, OB-1986]) Shino osha li sha hala okutya shike?

8, 9. Shi na ko nasha nomitima dhawo, Aajuda oyendji oya li ya pumbwa okuninga shike?

 8 Shoka Kalunga a li a ladhipikile Aajuda, otashi tu kwathele tu uve ko uutumbulilo mboka “inaa pita etanda komwenyo.” Okwe ya lombwele a ti: ‘Ekeleheni onyata yokomwenyo, [kenkeni oomwenyo dheni, NW] one aalumentu Aajuda nAajerusalem, ondjahi yandje opo yaa hwame omolwuuwinayi wiilonga yeni.’ Mbela iilonga mbyoka iiwinayi oya li ya tamekele peni? Omomitima dhawo. (Lesha Markus 7:20-23.) Kalunga okwa li a konakona uuwinayi wAajuda okupitila muJeremia ngaashi ndohotola ta konakona omuvu a mone omukithi gwe. Kalunga okwa li a mono kutya omitima dhawo ndhoka dha tangalala nodha kukuta odho onzo yuuwinayi wawo. Ka li a hokwa omainyengotompelo nomadhiladhilo gawo. (Lesha Jeremia 5:23, 24; 7:24-26.) Kalunga okwa li e ya lombwele a ti: ‘Ifukikileni Omuwa, ne mu ekelehi onyata yokomwenyo [kenkeni oomwenyo dheni, NW].’ — Jer. 4:4, OB-1954; 18:11, 12.

9 Omitima dhAajuda yopethimbo lyaJeremia odha li dha pumbwa okutandwa pathaneko, ngaashi owala Aaisraeli yopethimbo lyaMoses nayo ya li ye na ‘okupititha omitima dhawo etanda.’ (Deut. 10:16; 30:6) ‘Okukenka oomwenyo dhawo,’ otaku ti oya li ye na okweekelahi kehe shimwe shono tashi ningitha omitima dhawo dhi kale dha tangalala. Shoka osha li sha kwatela mo omadhiladhilo gawo, omaiyuvo gawo nenge omainyengotompelo gawo ngoka ge li ompinge naangoka gaKalunga. — Iil. 7:51.

NKENE TATU VULU OKUKALA ‘NOMWENYO GWOKU MU TSEYA’ KUNENA

10. Ngaashi David, otu na okukala twa hala okuninga shike?

10 Inatu pandula tuu sho Kalunga he tu pe uunongo tu uve ko shoka shi li momitima dhetu dhopathaneko! Yamwe otashi vulika yi ipule taya ti: ‘Ihe omolwashike mbela Oonzapo dhaJehova dha pumbwa okukala dhi na ko nasha naashoka shi li momitima dhadho?’ Odhindji dhomudho otadhi longele Jehova nuudhiginini momagongalo moka dhi li nodhi na eihumbato lya yogoka nokadhi li nando ‘oonkwiiyu oombwinayi’ dha fa Aajuda oyendji yonale. Mepingathano naashono, aapiya yaKalunga kunena oye li oshigwana she, she mu iyapulila nosha yogoka. Ihe nonando ongawo, oya pumbwa okutala kwaashono David a li i indile Jehova okupitila megalikano sho a ti: ‘Konakona ndje, Kalunga, ngoye u tseye omutima gwandje; tala ndje, u dhimbulule omadhiladhilo gandje.’ — Eps. 17:3; 139:23, 24.

11, 12. (a) Omolwashike kehe gumwe gwomutse e na okukonakona omutima gwe? (b) Oshike Kalunga itee ke tu ningila?

11 Jehova okwa hala kehe gumwe e mu tseye nokukale aluhe a hokiwa kuye. Jeremia okwa popi kutya Jehova oha konakona aayuuki, sho a ti: “OMUWA Omunankondoawike, oto yeleke aayuuki; owa tseya shoka shi li momitima nomomatedho gawo.” (Jer. 20:12) Ngele Omunankondoawike ota konakona nokuli nomitima dhaayuuki, mbela tse yene katu na okwiikonakona nawa? (Lesha Episalomi 11:5.) Sho tatu shi ningi, otashi vulika tu dhimbulule kutya otu na iikala, elalakano nenge omaiyuvo gomomitima dhetu ngoka ga pumbwa okupukululwa. Otashi vulika tu dhimbulule kutya otwa pumbwa ‘okukenka oomwenyo dhetu’ pathaneko, opo tu kuthe mo onyata ndjoka tashi vulika hayi dhi ningitha kaadhi kukuke. Shoka otashi kala nduno wa fa to tanda omutima gwoye gwopathaneko. Ngele owu wete kutya owa pumbwa okukonakona omutima gwoye gwopathaneko, mbela oto ka gandja eitulomo kushike? Owu na oku shi enda ngiini wu ninge omalunduluko ngoka ga pumbiwa? — Jer. 4:4.

12 Oshinima shimwe shoka tu na okukala tu shi osho kutya katu na okukala twa tegelela Jehova e tu kondjithe tu lunduluke. Okwa popi kombinga ‘yoonkwiyu  oontoye’ kutya ‘ote dhi pe oomwenyo dhoku mu tseya.’ Ina tya nando ote ke dhi kondjitha dhi lundulule omitima dhadho. Odha li dha pumbwa okukala dhi na ehalo lyokukala nomitima hadhi kukuka shoka tashi ku ulika kutya odhi shi Kalunga. Mbela natse katu na okuninga ngaaka?

Okukonakona omutima nokuvudha mo omahalo ga puka otaku tu etele omalaleko nuuyamba

13, 14. Omeityo lini Omukriste tashi vulika a kale nomutima ngoka tagu mu etele oshiponga?

13 Jesus okwa ti: “Momwenyo ohamu zi omadhiladhilo omawinayi, omadhipago, uuholume, oluhondelo, uufuthi, omalundilathano nokusheka.” (Mat. 15:19) Uushili owo kutya ngele omutima gwomumwatate ngoka ihaagu kukuka ogwe mu ningitha a ye moluhondelo e ta kala inii iyela ombedhi, Kalunga ita ka kala e mu hokwa ngele ita lundulula. Natango, nokuli nomuntu ngoka inaa ya meyono ndyoka, otashi vulika e ethe omahalo ga puka ga koke momutima gwe. (Lesha Mateus 5:27, 28.) Ngele shoka osha ningwa, otashi vulika nduno a pumbwa a konakone omutima gwe. Ngele owe gu konakona, mbela oto ka mona mo omahalo ga puka ngoka Kalunga inaa hokwa, ngoka tashi vulika wu nine omuntu guukashikekookantu wa yooloka ko kuwoye? Mbela owa pumbwa okuvudha mo omahalo ngoka momutima gwoye?

14 Sha faathana, Omukriste otashi vulika a kale a geyela omumwahe sigo a tameke okukala e mu tonde. (Lev. 19:17) Mbela ita ka ninga oonkambadhala a vudhe mo eiyuvo lya tya ngaaka momutima gwe ndyoka tali vulu okukukutika omutima gwe? — Mat. 5:21, 22.

15, 16. (a) Gandja oshiholelwa shankene Omukriste ta vulu okuulika kutya ‘ina pita etanda komwenyo.’ (b) Omolwashike to dhiladhila kutya Jehova ita hokwa ‘omutima inaagu pita etanda’?

15 Shinyanyudha, Aakriste oyendji kaye na uupyakadhi womutima wa tya ngaaka. Ihe Jesus okwa li wo a popi kombinga ‘yomadhiladhilo omawinayi.’ Omadhiladhilo ngoka omawinayi oga kwatela mo omataloko nenge iikala mbyoka tayi vulu okunyateka onkalamwenyo yetu momikalo odhindji. Pashiholelwa, omuntu otashi vulika a kale e na etaloko kaa li li pandunge shi na ko nasha nokukala omudhiginini kaapambele ye. Eeno, Aakriste oya hala okukala ye ‘hole’ aapambele yawo, ihe hangaashi aantu oyendji mboka ‘yomomasiku gahugunina’ mboka kaaye na ohole. (2 Tim. 3:1, 3, NW) Ihe otashi vulika omuntu u uve ko pambambo okukala omudhiginini kaapambele ye. Aantu oyendji ohaya ti kutya “ezimo ezimo owala.” Omuntu otashi vulika a popile omukwanezimo gwe kutya nee oye e li mondjila nenge oye a puka noha kala a fa e wete oye a hindwa uuna omukwanezimo lye a yematithwa. Dhiladhila kunkene ongeyo ya tya ngaaka ya li ya ningitha aamwayina yaDina ya katuke oonkatu dha puka. (Gen. 34:13, 25-30) Dhiladhila wo sho omutima gwaAbsalom gwa li gwe mu ningitha a dhipage omumwayina Amnon. (2 Sam. 13:1-30) Mbela aantu ayehe mboka kaya li ye na ‘omadhiladhilo omawinayi’ momitima dhawo?

16 Aakriste yashili ihaya dhipaga. Ihe mbela ohashi vulika ya kwatele onkone omumwatate nenge  omumwameme ngoka ye wete kutya okwa ninga nayi gumwe gwomaapambele yawo? Otashi vulika kaaya kale nomwiitaali omukwawo ngoka ye wete kutya okwa ninga nayi omupambele gwawo nenge otashi vulika kaaye mu yakule nando. (Heb. 13:1, 2) Okukala nomaiyuvo omawinayi ge li ngaaka nokukala itaatu yakula ooitaali ooyakwetu itashi ulike ohole, nokashi shi okwiidhidhimikilwa nando. Eeno, Omukonakoni gwomitima otashi vulika a mone kutya ‘inatu pita etanda koomwenyo.’ (Jer. 9:25, 26, OB-1954) Dhimbulukwa mboka Jehova a lombwele a ti: ‘Ekeleheni onyata yokomwenyo, [kenkeni oomwenyo dheni, NW].’ — Jer. 4:4, OB-1954.

NINGA OMALUNDULUKO NOKUKALA WU NA ‘OMWENYO GWOKUTSEYA’ KALUNGA

17. Ongiini okutila Jehova taku vulu oku tu kwathela tu kale tu na omutima hagu kukuka?

17 Ongiini ngele owa konakona omutima gwoye gwopathaneko e to mono kutya ihagu kukuka komalombwelo gaJehova, ano gwa fa ‘inaagu pita etanda’? Sho we shi ningi otashi vulika wa dhimbulula kutya owu na uumbanda wokutila aantu, wa hala ondondo yopombanda nenge iinima yuuzeko, nenge nokuli wu na ombepo yemanguluko nenge omanganga. Hangoye to shi itoto. (Jer. 7:24; 11:8) Jeremia okwa li a nyola kutya Aajuda yopethimbo lye mboka ya li kaaye shi aadhiginini oya li ya ‘tangalala noya kukutika omitima dhawo.’ Okwa gwedha ko a ti: “Yo inaa pulathana noomwenyo dhawo, ya tye: ‘Natu tileni Omuwa, Kalunga ketu, he tu lokithile omvula yokwenye nomvula yothinge.’” (Jer. 5:23, 24, OB-1954) Mbela shoka inashi hala okutya opo tu ‘kenke omitima dhetu’ otu na okutila shili Jehova nokukala twe mu simaneka? Eeno, etilo ndyoka otali vulu okukwathela kehe gumwe gwomutse a kale nomutima hagu kukuka nokulonga shoka Kalunga a hala tu ninge.

18. Jehova okwa li u uvanekele shike mboka ye li oshitopolwa shehangano epe?

18 Sho tatu tsikile okuninga oonkambadhala ndhoka, Jehova ote ke tu pa ‘omwenyo gwoku mu tseya.’ Shoka osho u uvanekela aagwayekwa mboka ye li oshitopolwa shehangano epe: “Ompango yandje otandi yi tula momadhiladhilo gawo notandi yi nyolele moomwenyo dhawo. Otandi ningi Kalunga kawo, noyo taa ningi aantu yandje.” Oshike sha kwatelwa moku mu tseya shili? Okwa gwedha ko a ti: “Itaku kala we omuntu ta longo mukwawo nenge omuntu ta lombwele mumwayina ta ti: ‘Tseya OMUWA.’ Oshoka ayehe otaa ka tseya ndje, aagundjuka naakuluntu. Otandi dhimi po omayono gawo, nuulunde wawo itandi u dhimbulukwa we.” — Jer. 31:31-34. *

19. Aakriste yashili oye na etegameno ewanawa lini?

19 Kutya nduno owu na etegameno lyoku ka mona uuwanawa okuza mehangano epe megulu nenge okombanda yevi, owu na okukala wa hala okutseya Jehova nokukala gumwe gwomoshigwana she. Opo tu mone uuwanawa mboka otu na okukala twa dhiminwa po omayono getu pakankameno lyekuliloyambo lyaKristus. Okukala wu shi kutya oto vulu okudhiminwa po, oshi na oku ku inyengitha wu kale ho dhimine po yalwe, nokuli naamboka tashi vulika wu uvitile nayi. Okuvudha mo momutima gwoye kehe shimwe shoka sha puka, otaku ke ku kwathela wu kale wu na omutima gu li nawa. Kungawo ito ka ulika owala kutya owa hala okulongela Jehova ihe oto ke mu tseya wo nawa. Oto ka kala wa fa mboka Jehova a li a popi okupitila muJeremia a ti: “Otamu ka konga ndje notamu ka mona ndje, oshoka otamu ka konga ndje nomwenyo aguhe. Eeno, otandi ti, otamu ka mona ndje.” — Jer. 29:13, 14.

^ okat. 18 Ehangano epe olya kundathanwa mOshungolangelo yo 15 Januali 2012.