1, 2. 1) ¿Tlen neskayotl okintlapoui Jesús iyolikniuan? (Xikita tlaixkopinal tlen ika peua tlamachtil.) 2) ¿Tlen moneki ma tikmatikan itech neskayotl itech ichkamej uan tentsomej?

SE TONAL Jesús omotlapouijtoka iuan Pedro, Juan, Santiago uan Andrés itech itlaj tlen okintlajtlachialti. Okintlapoui itech neskayotl itech tlakeuali yolmelajki, majtlaktli ichpokamej uan itech talentos. Uan ijkuakon okintlapoui okse neskayotl. Okintlapoui itech ikaj akin omochi “tlakatl” uan ijkuak ye uits uan kinmixkomakas tlaltikpaktlakamej. Itech nin neskayotl nin tlakatl “kinxexelos” tlaltikpaktlakamej itech ome nechikolmej. Jesús kijtoa se nechikol kintokayotia “ichkameh” uan okse kintokayotia “tentsomeh”. Itech nin neskayotl noijki onka okse nechikol tlen miak ipati: iikniuan ueyi Tekiua (xiktlajtolti Mateo 25:31-46).

² Tejuan noijki tiknekij tikmatiskej itech nin neskayotl. ¿Tleka? Pampa Jesús okijto sekimej kipiaskej yolilistli tlen amo keman tlamis, uan oksekimej kinmixpoloskej. Ik non, miak ipati ma tikmatikan tlen kijtosneki nin neskayotl uan tlen moneki ma tikchiuakan pampa tikpiaskej yolilistli tlen amo keman tlamis. Noijki miak ipati ma tikmatikan intlanankilis ninmej tlajtlanilmej: ¿Ken techpaleuia Jehová ma tikmatikan tlen kijtosneki nin neskayotl? ¿Tleka tikijtoaj nin neskayotl noijki techititia miak ipati tetlapouilistli? ¿Akinmej moneki  tetlapouiskej? ¿Tleka tinochtin moneki ma tiyetokan tiyolmelajkej uan ma tikpaleuikan Tekiua uan iikniuan?

3, 4. 1) ¿Tlen eyi tlamantli moneki ma tikmatikan pampa ma tikajsikamatikan neskayotl itech ichkamej uan tentsomej? 2) Itech xiuitl 1881, ¿tlen okijto nin revista itech nin neskayotl?

³ Pampa tikajsikamatiskej tlen kijtosneki neskayotl itech ichkamej uan tentsomej, achto moneki ma tikmatikan eyi tlamantli. Achto, ¿akinmej kineskayotiaj tlakatl, ueyi tekiua, iikniuan ueyi tekiua, ichkamej uan tentsomej? Ome, ¿keman kijtos tlakatl akinmej ichkamej uan akinmej tentsomej? Uan eyi, ¿tleka kijtos sekimej tlaltikpaktlakamej ichkamej uan oksekimej tentsomej?

⁴ Itech xiuitl 1881, nin revista okijto tlakatl uan ueyi tekiua kineskayotiaj Jesús. ¿Akinmej kineskayotiaj iikniuan? Revista okijto okineskayotiayaj akinmej tlanauatiskej iuan Jesús itech iluikak uan noijki akinmej mokauaskej itech Tlaltikpak ijkuak ayakmo kipiaskej tlajtlakoli. ¿Keman kinpejpenas Jesús ichkamej uan tentsomej? Itech tekiuajkayotl tlen kipias Jesús uan uejkauas mil xiuitl. ¿Uan tleka kijtoaj sekimej katej ken ichkamej? Pampa yejuan okichijkej ken toTajtsin Dios uan nochipa otetlasojtlakej.

5. Itech xiuitl 1923, ¿tlen okijto nin revista itech ichkamej uan tentsomej?

⁵ Satepan Jehová okinpaleui itekipanojkauan kuali ma kajsikamatikan nin neskayotl. Itech 15 de octubre de 1923, nin revista ika okseki tlaxelolmej okse tlamantli okijto tlen kijtosneki nin neskayotl. ¿Akin kineskayotia tlakatl? Kineskayotia Jesús. ¿Akinmej iikniuan ueyi tekiua? Nin san kineskayotiaj akinmej tlanauatiskej iuan Jesús itech iluikak. ¿Akinmej ichkamej? Nochtin akinmej yetoskej itech Tlaltikpak ijkuak tlanauatijtos non tekiuajkayotl. ¿Keman kinpejpenaskej ichkamej? Nin mochiuas ijkuak iikniuan ok yetoskej itech Tlaltikpak, achto peuas mil xiuitl. ¿Tleka? Pampa akinmej mokauaskej itech Tlaltikpak kinpaleuiskej iikniuan, uan nin san uelis mochiuas ijkuak yejuan ok yetoskej itech Tlaltikpak. ¿Uan tleka kintokayotiaj ichkamej? Revista okijto pampa tlaneltokaj itech Jesús uan noijki tlaneltokaj Tekiuajkayotl kichiuas kuali ma yetokan.

6. Itech xiuitl 1995, ¿ken opejkej tikijtoaj kijtosneki nin neskayotl?

⁶ Miak xiuitl otikneltokakej tlaltikpaktlakamej omochiuayaj ichkamej noso tentsomej tla yejuan okiseliayaj noso amo ijkuak otikintlapouiayaj itech itlamian tonalmej. Pero itech xiuitl 1995 okse tlamantli opejki titlaneltokaj. Nin revista okitekitilti Mateo 24:29-31 uan Mateo 25:31, 32 (xikintlajtolti). Uan okijto Jesús kinmixkomakas tlaltikpaktlakamej ijkuak uits itech itlamian tonalmej. * (Xikita tlajtoli tlen kiualika tlakxitlan.)

7. Xikyekijto neskayotl itech ichkamej uan tentsomej.

⁷ Axkan kuali tikajsikamatij nin tlapoualistli. ¿Akinmej kineskayotiaj tlakatl uan ueyi tekiua? Jesús. ¿Akinmej kineskayotiaj iikniuan ueyi tekiua? Kineskayotiaj akinmej Jehová yokinpejpenki ika espíritu santo. Yejuan tlanauatiskej iuan Jesús itech iluikak (Romanos 8:16, 17). ¿Akinmej kineskayotiaj ichkamej uan tentsomej? Nochtin tlaltikpaktlakamej. ¿Keman kinmixkomakaskej?  Ijkuak tlamis ueyi tlajyouilistli, tlen ayakmo miak poliui peuas. ¿Uan akinmej kintokayotiaj ichkamej uan tentsomej? Jesús kijtos ijkuak kitas ken kinpaleuiaj tlapejpenalmej tlen ok katej itech Tlaltikpak. Tiktlasojkamatiliaj Jehová pampa techpaleuia ma tikajsikamatikan nin neskayotl uan okseki tlen ijkuilitokej itech Mateo 24 uan 25.

8, 9. ¿Tleka Jesús okijto ichkamej noijki yolmelauakej?

⁸ Itech nin neskayotl Jesús amo okijto tetlapouilistli. Pero tikmatij nin neskayotl techmachtia miak ipati tetlapouilistli. ¿Tleka ijkon tikijtoaj?

⁹ Achto ma tikilnamikikan nin san se neskayotl. Jesús amo otlajto itech ichkamej uan tentsomej tlen nemij itech tlalan. Noijki, amo okijto pampa timochiuaskej ichkamej moneki tikinmakaskej tlakuali uan intlaken tlapejpenalmej, nion okijto moneki tikinmaluiskej ijkuak mokokoskej nion tikintlajpalotiuij ijkuak tsaktoskej. ¿Tlen okinekiaya kijtos Jesús? San kinpejpenaskia ken ichkamej akinmej kintlakaitaskiaj tlapejpenalmej ken iikniuan Jesús uan kinpaleuiskiaj itech itlamian tonalmej. Ik non, Jesús noijki okijto yolmelauakej (Mateo 10:40-42; 25:40, 46; 2 Timoteo 3:1-5).

10. ¿Ken uelis ichkamej kinpaleuiskej iikniuan Cristo?

¹⁰ Pero ¿tleka iikniuan Jesús kinekiskiaj ma kinpaleuikan? Ma tikitakan. Achto kinmiluiskia neskayotl itech ichkamej uan tentsomej, Jesús okinmiluijtoka imachtijkauan tlen panoskia itech itlamian tonalmej (Mateo 24:3). Okinmilui ijkuakon omonekiaya tetlapouiskej itech nochi Tlaltikpak (Mateo 24:14). Noijki okinmilui neskayotl itech talentos. Ika nin neskayotl okinmiluijtoka tlapejpenalmej moneki ma mochijchikauakan pampa tetlapouiskej. Pero ¿ken uelis tetlapouiskiaj itech nochi Tlaltikpak tla axkan ayakmo miakej tlapejpenalmej? Itech neskayotl itech ichkamej uan tentsomej, Jesús okijto ichkamej kinpaleuiskiaj tlapejpenalmej. ¿Ken kinpaleuiskiaj? Okachi kinpaleuiskiaj itech tetlapouilistli. ¿San uelis kinpaleuiskej ika tomin noso kinyolchikauaskej pampa okachi ma tetlapouikan?

11. ¿Tlen uelis timotlajtlaniskej?

¹¹ Axkan kanaj ocho millones imachtijkauan Jesús. Uan miakej amo tlapejpenalmej. Jesús amo okinmakak yejuan talentos, kijtosneki tekitl itech tetlapouilistli. Nin san okinmakak tlapejpenalmej (Mateo 25:14-18). Ik non, uelis timotlajtlaniskej: “Tla Jesús okinmakak talentos tlapejpenalmej, ¿moneki tetlapouiskej ichkamej?”. Kema. Ma tikitakan naui tlamantli tlen kiteititiaj kema.

12. ¿Tlen techmachtia tlen okijto Jesús itech Mateo 28:19, 20?

¹² Achto, Jesús okinnauati nochtin imachtijkauan ma tetlapouikan. Satepan ijkuak okiyolitijkej, Jesús okinmilui imachtijkauan ma tetlapouikan uan ma kinmachtikan miakej tlaltikpaktlakamej pampa ma kichiuakan tlen ye otlanauati. Nin techmachtia akinmej peuas tlaneltokaskej noijki omonekiaya ma kitlakamatikan uan ma tetlapouikan (xiktlajtolti Mateo 28:19, 20). ¿Tlen techmachtia nin? Tinochtin moneki titetlapouiskej, maski titlapejpenalmej noso amo (Hechos 10:42).

13. ¿Tlen techmachtia amochtli Apocalipsis?

¹³ Ome, itech Apocalipsis techyekiluia amo san tlapejpenalmej tetlapouiskej. Itech se  kochtemikilistli, tlatitlanil Juan okitak “isiwa n Ichkatsi” kinyoleua tlaltikpaktlakamej ma konikan “nin atl, non kitemaka semijkak yolílistli”. Nin siuatl kineskayotia 144,000 tlapejpenalmej akinmej tlanauatiskej iuan Jesús itech iluikak (Apocalipsis 14:1, 3; 22:17). Atl kineskayotia imikilis Jesús, tlen kinmakixtia tlaltikpaktlakamej itech tlajtlakoli uan mikilistli (Mateo 20:28; Juan 3:16; 1 Juan 4:9, 10). Tlapejpenalmej kinmachtiaj tlaltikpaktlakamej ken uelis momakixtiskej (1 Corintios 1:23). Pero itech nin kochtemikilistli mota oksekimej tlen amo tlapejpenalmej uan tlen kichiaj yetoskej itech Tlaltikpak. Yejuan noijki kinnauatiaj ma kinmiluikan tlaltikpaktlakamej ma konikan atl tlen kitemaka yolilistli. Uan nin kichiuaj ijkuak tetlapouiaj. Ken tikitaj itech nin kochtemikilistli nochtin akinmej kikakij kuali tlajtolmej moneki tetlapouiskej.

14. ¿Tlen moneki ma tikchiuakan pampa ma tiktlakamatikan itlanauatil Cristo?

¹⁴ Eyi, nochtin akinmej kitlakamatij itlanauatil Cristo moneki ma tetlapouikan (Gálatas 6:2). Jehová kineki nochtin akinmej kiueyichiuaj ma kintlakamatikan itlanauatiluan. Yiuejkika israelitas uan akinmej amo israelitas pero kema ochantiayaj itech altepetl Israel omonekiaya ma kintlakamatikan tlanauatilmej tlen okintemakak Jehová (Éxodo 12:49; Levítico 24:22). Axkan amo moneki tikintlakamatiskej tlanauatilmej tlen Jehová okinmakak israelitas. Pero moneki tiktlakamatiskej itlanauatil Cristo, maski titlapejpenalmej noso amo. Jesús otechnauati ma titetlasojtlakan, uan non tlen okachi ipati (Juan 13:35; Santiago 2:8). Moneki ma tiktlasojtlakan Jehová, Jesús uan tlaltikpaktlakamej. Uan tikteititiaj tikintlasojtlaj tlaltikpaktlakamej tla tikintlapouiaj itech Tekiuajkayotl (Juan 15:10; Hechos 1:8).

15. ¿Tleka tikijtoaj Jesús kineki nochtin imachtijkauan ma tetlapouikan?

 ¹⁵ Naui, seki tlamantli tlen Jesús okinmilui seki imachtijkauan noijki moneki kichiuaskej oksekimej. Se neskayotl, Jesús okichi iuan 11 itlatitlaniluan se tlajtolsenkaualistli pampa tlanauatiskej itech iluikak. Pero tlanauatiskej 144,000 tlapejpenalmej (Lucas 22:29, 30; Apocalipsis 5:10; 7:4-8). Uan satepan ijkuak okiyolitijkej Jesús okinnauati san seki imachtijkauan ma tetlapouikan (Hechos 10:40-42; 1 Corintios 15:6). Pero itech achto siglo nochtin otetlapouijkej (Hechos 8:4; 1 Pedro 1:8). Nin kijtosneki tejuan noijki moneki ma titetlapouikan maski amo otikkakej tlanauatil tlen okitemakak Jesús. Uan axkan kanaj ocho millones tiiTlaixpantijkauan Jehová titetlapouiaj uan ijkon tikteititiaj titlaneltokaj itech Jesús (Santiago 2:18).

16-18. 1) ¿Ken uelis tikinpaleuiskej tlapejpenalmej? 2) ¿Tleka moneki ma tikinpaleuikan tlapejpenalmej?

¹⁶ Axkan Satanás okachi kintlajyouiltijtok tlapejpenalmej tlen ok katej itech Tlaltikpak. Uan noijki kimati ayakmo miak kauitl yoltos (Apocalipsis 12:9, 12, 17). Pero amo ueli kintsakuilia tlapejpenalmej pampa ayakmo ma kiyekanakan tetlapouilistli. Uan axkan okachi miakej tlaltikpaktlakamej tikintlapouijtokej. Tikitaj Jesús kinyekantok uan kinpaleuijtok tlapejpenalmej (Mateo 28:20).

¹⁷ Se ueyi tlateochiualistli tikinpaleuiskej tlapejpenalmej itech tetlapouilistli. ¿Uan ken uelis tikinpaleuiskej? Uelis tiktemakaskej tomin, uan titlapaleuiskej pampa ma mochijchiuakan okseki kalmej kanin timonechikoaj uan kanin kiyekanaj tekitl iTlaixpantijkauan Jehová. Noijki tikinpaleuiaj tlapejpenalmej tla tikintlakamatij tlayekankej uan okseki tokniuan tlen “tlakeuali yolmelajki uan ixtlamatki” yokintlali (Mateo 24:45-47, TNM; Hebreos 13:17).

¹⁸ Ayakmo miak poliui uan tlapejpenalmej tlen ok katej itech Tlaltikpak kiseliskej sello. Ijkuakon peuas ueyi tlajyouilistli (Apocalipsis 7:1-3). Uan achto peuas Armagedón, Jesús kinuikas iluikak tlapejpenalmej (Mateo 13:41-43). Ik non, tla tiknekij Jesús ma techita ken ichkamej, axkan ma tikinpaleuikan iikniuan.