Mateo 20:1-34

  • Okintlaxtlauijkej ika se tomin de plata nochtin tlen okitekitoj uva (1-16)

  • Jesús oksepa okijto ken mikiskia (17-19)

  • Se siuatl otlajto inpatka itelpochuan (20-28)

    • Jesús okitemakako iyolilis para miakej kintlaxtlauas (28)

  • Jesús okinpajti ome tlakamej tlen amo otlachiayaj (29-34)

20  “Porque Tekiuajkayotl tlen kajki iluikak yetoskia ken se tlakatl tlen kipia itlal uan kualkan oyajki okintemoto akinmej kitekiskej uva.  Ye okinmilui tlakeualmej se tonal kintlaxtlauiskia se denario* uan satepan okintitlanki makitekitij uva.  Kanaj las 9 kualkan oksepa oyajki uan tiankisko okinmitak omoketokaj oksekimej tlakamej tlen amo okipiayaj tekitl.  Ye okinmilui: ‘Namejuan noijki xiktekitij uva uan kuali namechtlaxtlauis’.  Yejuan otekipanotoj. Kanaj tlajkotonal tlakatl oksepa oyajki okintlakeuato oksekimej. Uan kanaj las 3 tiotlak oksepa oyajki okintlakeuato oksekimej.  Saiktlami oyajki kanaj las 5 tiotlak uan okinmajsito oksekimej tlakamej omoketokaj tiankisko uan okintlajtlani: ‘¿Tleka nikan onantiotlakijkej uan amo onantekipanotoj?’.  Yejuan okinankilijkej: ‘Amikaj otechtlakej’. Ye okinmilui: ‘Namejuan noijki xiktekitij uva’”.  “Ijkuak otlayouak, tlakatl okilui akin okitaya tekitl: ‘Xikinnotsa tlakeualmej uan xikintlaxtlaui. Achto xikintlaxtlaui akinmej yikin opejki tekipanouaj uan saiktlami xikintlaxtlaui akinmej achto opejki tekipanouaj’.  Ijkuak oajsitoj akinmej opejki tekipanouaj kanaj las 5 tiotlak, okintlaxtlauijkej se denario.* 10  Pero ijkuak oajsitoj akinmej achto opejki tekipanouaj, omokuayejyekojkej* okachi kintlaxtlauiskiaj pero noijki okintlaxtlauijkej se denario.* 11  Yejuan amo okinpakti ken okintlaxtlauijkej, okitlauelitakej inteko 12  uan okiluijkej: ‘Akinmej yikin opejki tekipanouaj san se hora otekipanojkej uan otikintlaxtlaui ijkon ken tejuan. Tejuan otikxikojkej se tonal otitekipanojkej uan otitonaltlatlakej’. 13  Tlakatl okilui se itlakeual: ‘Noyolikni, ne amitlaj onimitstokti. ¿Amo otimokajkej nimitstlaxtlauiskia se denario?* 14  Xikonana motlaxtlauil uan xio. Akin saiktlami opejki tekipanoua, noijki nikneki niktlaxtlauis ijkon ken te onimitstlaxtlaui. 15  ¿Amo uelis nikchiuas san tlen ne niknekis ika tlen noaxka? ¿Timoxikoua porque nikinchiuilia tlen kuali?’. 16  Porque akinmej katej tlayekapan, mokauaskej tlakuitlapan uan akinmej katej tlakuitlapan, panoskej tlayekapan”. 17  Ijkuak oyayaj Jerusalén, Jesús sekan okinuikak 12 discípulos uan okinmilui itech ojtli: 18  “Axkan tiauij* Jerusalén, uan ompa kitemaktiskej iKone Tlakatl inmak teopixkej tlen tlayekanaj uan inmak akinmej tlamachtiaj tlanauatil. Noijki tlanauatiskej makimiktikan 19  uan kitemaktiskej inmak akinmej amo judíos. Yejuan kipinauiskej, kiuitekiskej ika mekatl uan kimiktiskej itech se kouitl, pero ipan eyi tonal toTajtsin Dios kiyolitis”. 20  Ijkuakon isiua Zebedeo uan itelpochuan omotokijkej inauak Jesús. Isiua Zebedeo omotlankuaketski ixpan Jesús porque okinekiaya itlaj kitlajtlanilis. 21  Jesús okitlajtlani: “¿Tlen tikneki?”. Siuatl okinankili: “Xikinkauili ninmej ome notelpochuan mouan mamotlalikan itech moTekiuajkayo, se moyekma uan okse moopochma”. 22  Jesús okijto: “Namejuan amo nankimatij tlen nankitlajtlanij. ¿Uelis nankoniskej copa tlen ne yinikonis?”. Yejuan okinankilijkej: “Uelis tikoniskej”. 23  Jesús okinmilui: “Kema, nankoniskej nocopa. Pero amo ne nikijtos akin motlalis noyekma uan noopochma. San noTajtsin kijtos akinmej ompa motlaliskej kanin ye okintlayektlalili”. 24  Ijkuak majtlaktli discípulos okimatkej, okinkualankaitakej Santiago uan Juan. 25  Pero Jesús okinnotski nochtin idiscípulos uan okinmilui: “Namejuan nankimatij nochtin tekiuajkej tlanauatiaj san ken yejuan kinekij. Noijki akinmej ueyititokej san tetlajyouiltiaj. 26  Pero namejuan amo ijkon xikchiuakan. Porque akin kineki okachi ueyititos, moneki kinpaleuis oksekimej. 27  Uan akin kineki tlayekapankisas, makinpaleui oksekimej ken se tlakeuali. 28  Ijkon okichi iKone Tlakatl. Ye ouala okinpaleuiko oksekimej uan amo ye makipaleuikan. Noijki okitemakako iyolilis para miakej kintlaxtlauas”.* 29  Ijkuak Jesús uan idiscípulos okiskej Jericó, miakej inuan oyajkej. 30  Itempa ojtli okatkaj* ome tlakamej tlen amo otlachiayaj. Yejuan okikakej ik ompa opanotoka Jesús uan okitsajtsilijkej: “¡ToTeko, iKone David, techiknomati!”. 31  Akinmej ompa okatkaj okinmajuakej uan okinmiluijkej mamotenkauakan. Pero yejuan okachi chikauak okitsajtsiliayaj: “¡ToTeko, iKone David, techiknomati!”. 32  Jesús omoketski, okinnotski uan okintlajtlani: “¿Tlen nankinekij manikchiua?”. 33  Yejuan okinankilijkej: “ToTeko, tiknekij titlachiaskej”. 34  Jesús sapanoua okinmiknomatki uan okintlali imauan inpan inmixtololouan. San niman oksepa otlachixkej uan okitokakej.

Notas

Xikita diccionario.
Xikita diccionario.
Noso “omonejneuilijkej”.
Xikita diccionario.
Xikita diccionario.
Noso “titlejkoj”.
Xikita diccionario kanin kijtoua okitlaxtla.
Noso “oeuatokaj”, “oyetokaj”.