Xikita nochi

Tlen kiualika

¿Uelis tiijsatos uan titlachixtos?

¿Uelis tiijsatos uan titlachixtos?

“Xiijsatokah nomejwah, porke amo nonkimatih tlan tonati nion tlan ora.” (MATEO 25:13)

1, 2. 1) ¿Tlen okiyekijto Jesús itech tlen panoskia ijkuak tlamiskia tlen amo kuali? 2) ¿Tlen timomachtiskej axkan?

JESÚS uan Pedro, Andrés, Santiago uan Juan okatkaj itech Olivostepetl, oeuatokaj kanin omotaya teokali tlen okatka Jerusalén. Ijkuakon Jesús opejki kinmachtia itech seki tlamantli tlen panoskia itech itlamian nochi tlamantli tlen amo kuali, ijkuak yetoskia ueyi Tekiua itech iTekiuajkayo toTajtsin Dios. Jesús okinmilui ijkuakon itech Tlaltikpak yetoskia se “tlakeuali yolmelajki uan ixtlamatki” tlen ipatka yetoskia itech nochi Tlaltikpak. Nin tlakeuali kinmakaskia akinmej kichiuaj ken Cristo tlen moneki pampa ma mochikaua intlaneltokilis, uan nin kichiuaskia ijkuak okachi kinekiskiaj (Mateo 24:45-47).

2 Satepan, Jesús okintlapoui itech majtlaktli ichpokamej (xiktlajtolti Mateo 25:1-13). Axkan timomachtiskej itech inneskayo ninmej ichpokamej. Timomachtiskej eyi tlamantli. 1) ¿Tlen okinekiaya tlamachtis Jesús ika nin neskayotl? 2) ¿Ken ijkon kichiuaj tlapejpenalmej? 3) ¿Ken mopaleuiaj oksekimej ika nin neskayotl?

 ¿TLEN OKINEKIAYA TLAMACHTIS JESÚS?

3. 1) Achto, ¿ken okiyekijtoayaj toamatlajkuiloluan tlen okijtosnekiaya neskayotl itech majtlaktli ichpokamej? 2) Ken sapanoa otikitayaj okseki tlamantli, ¿tlen amo otikchiuayaj?

3 Yichikome otimomachtijkej ken axkan tlakeuali yolmelajki okse tlamantli kiyekijtoa seki tlapoualismej tlen katej itech Biblia. Achto sapanoa okitaya tlen kijtosneki se tlapoualistli. Pero axkan okachi techmachtia itech tlen techmachtia seki tlapoualismej. Se neskayotl, ma timokuayejyekokan tlen techmachtia neskayotl itech majtlaktli ichpokamej. Achto toamatlajkuiloluan otechmachtiayaj tlen kijtosneki sejse tlamantli tlen mota itech neskayotl, ken lámparas, chiauak uan noijki tlen ika kiuikaj chiauak. Pero ken sapanoa okitayaj tlamantli tlen mota itech neskayotl, uelis tlen okachi ipati amo otimomachtiayaj. Ik non, axkan timomachtiskej tlen techmachtia nin neskayotl uan ken techpaleuia axkan.

Ichpokamej omonekiaya ijsatoskej ika inlámparas pampa ijkuak ajsiskia novio

4. 1) ¿Akin novio, uan tleka ijkon tikijtoaj? 2) ¿Akinmej ichpokamej, uan tleka ijkon tikijtoaj?

4 Pampa tikmatiskej tlen okinekiaya techmachtis Jesús, achto moneki tikmatiskej tlen kijtosneki sejse akin mota itech neskayotl. ¿Akin novio? Jesús. ¿Tleka ijkon tikijtoaj? Pampa itech okse neskayotl okijto ye ken se novio (Lucas 5:34, 35). ¿Akinmej ichpokamej? Yejuan kineskayotiaj tlapejpenalmej. ¿Ken tikmatij? Pampa itech okse neskayotl Jesús okijto tlapejpenalmej okatkaj ken tlakeualmej tlen okipiayaj inlámparas uan okichiayaj novio ma mokuepa satepan monamiktiskia (Lucas 12:32, 35, 36). Uan non techilnamiktia tlen omonekiaya kichiuaskej ichpokamej tlen katej itech neskayotl. Yejuan omonekiaya kinxotlaltiskej inlámparas pampa kichiaskiaj novio ma mokuepati. Uan noijki tlatitlanil Pablo uan Juan okinneskayotijkej tlapejpenalmej ken ichpokamej tlen inselti (2 Corintios 11:2; Apocalipsis 14:4). Nochi nin techpaleuia ma tikmatikan nin neskayotl kinmachtia tlapejpenalmej.

5. 1) ¿Keman mochiua neskayotl itech majtlaktli ichpokamej? 2) ¿Tleka ijkon tikijtoaj?

5 ¿Keman mochiua nin neskayotl? Mochiua itech itlamian nochi tlen amo kuali, uan tlami ijkuak mochiua ueyi tlajyouilistli. ¿Tleka ijkon tikijtoaj? Pampa ijkuak yitlantok neskayotl Jesús okijto novio oajsik (Mateo 25:10). Itech La Atalaya (ika náhuatl del centro Akin Tetlapouijtok) 15 de julio de 2013, otimomachtijkej tlen kijtoa Mateo tlakotonal 24 uan 25 kanin chikueyi uelta kijtoa ijkuak uits Jesús. Uan otimomachtijkej Jesús uits ijkuak tlamis nochi tlen amo kuali ijkuak kitlajtlamis nochi tlen amo kuali. Ik non, tikijtoaj neskayotl itech majtlaktli ichpokamej mochiua itech itlamian nochi tlen amo kuali, uan okachi ijkuak mochijtok ueyi tlajyouilistli.

6. ¿Tlen okinekiaya tlamachtis Jesús ika nin neskayotl?

6 ¿Tlen okinekiaya techmachtis Jesús ika nin neskayotl? Pampa tikmatiskej, ma tikitakan tlen techmachtiaj okseki tlaxelolmej. Itech Mateo tlakotonal 24 Jesús otechtlapoui itech “tlakeuali yolmelajki uan ixtlamatki”, sekimej tlapejpenalmej tlen kinyekanaj akinmej kichiuaj ken Cristo itech itlamian nochi tlen amo kuali. Jesús okinmilui omonekiaya yetoskej yolmelajkej. Ika neskayotl itech majtlaktli ichpokamej Jesús okinekiaya kinmachtis itlaj tlen miak ipati. Pero nin kinpaleuiskia nochtin tlapejpenalmej tlen yetoskiaj itech itlamian nochi tlen amo kuali. ¿Uan tlen okinekiaya kinmachtis?  Nochtin yejuan moneki ma tlachixtokan tla kinekij yaskej iluikak (Mateo 25:13). ¿Ken kitlakamatij tlapejpenalmej tlen okinekiaya kinmachtis Jesús? Ma tikitakan.

¿KEN KICHIUAJ TLAPEJPENALMEJ IJKON KEN OTLAMACHTI JESÚS?

7, 8. 1) ¿Tleka oijsatokaj ichpokamej tlen ixtlamatkej? 2) ¿Ken moyektlaliaj tlapejpenalmej?

7 Itech neskayotl Jesús okijto makuili ichpokamej amo kuali omokuayejyekoayaj. Okijto amo okipiayaj tlen omonekiaya pampa kichiaskej novio. Jesús noijki okijto ok makuili ichpokamej okatkaj ixtlamatkej pampa san okichixtokaj novio. ¿Tleka san okichixtokaj? Pampa kuali omoyektlalijkej uan oijsatokaj. Nochtin yejuan omonekiaya ijsatoskej uan kichiuaskej ma xotlatokan inlámparas nochi yoak. Ichpokamej ixtlamatkej okiuikayaj okachi chiauak, pero akinmej amo kuali omokuayejyekoayaj amo okiuikayaj. Tla ijkon, ¿ken moyektlaliaj tlapejpenalmej pampa ijkuak uits Jesús?

8 Tlapejpenalmej moyektlaliaj pampa nochipa kichiuaskej tlen Jehová kinnauatia. ¿Ken omoyektlalijkej? Onka miak tlamantli. Achto, kimatij akinmej kinekij kitekichiuiliskej Jehová moneki kikauaskej miak tlamantli, pero kichiuaj ika miak yolpakilistli. Ome, maski amo kimatij keman tlamis nochi tlen amo kuali, yejuan amo keman kikauaskej Jehová, pampa kitlasojtlaj Jehová uan Jesús. Uan eyi, amo kichiuaj ken tlaltikpaktlakamej, pampa amo auilnemij, nion kitemoaj kipiaskej tomin. Tlapejpenalmej kichiuaj ken ichpokamej akinmej ixtlamatkej, tlen oijsatokaj uan okichijkej ma xotlatokan inlámparas. Tlapejpenalmej noijki ijsatokej uan kichixtokej novio maski mota uejkaua (Filipenses 2:15).

Jesús okinmilui tlapejpenalmej ma ijsatokan

9. 1) ¿Itech tlen kinmiluia Jesús ma momaluikan tlapejpenalmej? 2) ¿Ken tlanankiliaj tlapejpenalmej ijkuak kikakij moijtoa “¡Ompa wits n novio!”? (Xikita tlajtoli tlen kiualika tlakxitlan.)

9 Ichpokamej akinmej ixtlamatkej noijki oijsatokaj pampa san okichixtokaj novio. Tla ijkon, ¿tleka okijto Jesús majtlaktli ichpokamej okochkej ijkuak okitakej novio ouejkauaya? Okijto pampa kinmachtis tlapejpenalmej ijkuak kichixtoskiaj novio ma ajsi uelis kochiskiaj. Jesús kimati akinmej kinekij ijsatoskej uelis kochiskej. Ik non, tlapejpenalmej melauak mochijchikauaj pampa amo kochiskej. ¿Ken kichiuaj? Ma tikilnamikikan, itech neskayotl Jesús okijto ichpokamej kikakij peua kijtoaj: “¡Ompa wits n novio!”. Majtlaktli otlanankilijkej, pero san akinmej ixtlamatkej okichixkej (Mateo 25:5, 6; 26:41). Noijki tlapejpenalmej kuali tlanankiliaj ijkuak kikakij peua moijtoa “¡Ompa wits n novio!”. ¿Uan ken kichiuaj? Kuali kajsikamatij nochi tlamantli tlen kiteititia Jesús yiualajsitok uan kichixtokej. * (Xikita tlajtoli tlen kiualika tlakxitlan.) Axkan ma timotlapouikan itech tlen panoa ijkuak tlami neskayotl, tlen techmachtia tlen panos itech seki kauitl tlen miak ipati.

IXTLAMATKEJ KISELIAJ SE TLATEOCHIUALISTLI PERO AKINMEJ AMO IXTLAMATKEJ TLAJYOUIAJ

10. ¿Tlen uelis timokuayejyekoskej itech tlen motlapouiaj majtlaktli ichpokamej?

10 Uan ijkuak yiualajsitok novio ichpokamej ixtlamatkej uan akinmej amo ixtlamatkej motlapouiaj. Akinmej amo ixtlamatkej kinmiluiaj  oksekimej ichpokamej ma kinmakakan seki chiauak. Pero akinmej ixtlamatkej amo kinekij kinmakaskej (xiktlajtolti Mateo 25:8, 9). Uelis nochi nin mochiua seki kauitl achto uits Jesús, ijkuak yitlantos ueyi tlajyouilistli. Pero uelis timotlajtlaniaj: ¿Tleka tlapejpenalmej amo kinekij kipaleuiskej ikaj? Pampa tikajsikamatiskej nin tlamantli moneki tikajsikamatiskej ijkuakon nochtin tlapejpenalmej yokintlalilijkej sello.

11. 1) ¿Tlen panos achto peuas ueyi tlajyouilistli? 2) ¿Tlen kijtosneki ijkuak akinmej ixtlamatkej kinmiluiaj ma yakan uan ma kikoakan chiauak?

11 Seki kauitl achto peuas ueyi tlajyouilistli, nochtin tlapejpenalmej tlen yolmelajkej tlen ok yetoskej itech Tlaltikpak kiseliskej sello (Apocalipsis 7:1-4). Nin sello kinmititis yiyaskej iluikak. Pero ¿tlen kinpanos tlapejpenalmej tlen moxeloskej? Yejuan amo kintlaliliskej sello. Ijkuak peuas ueyi tlajyouilistli uan kitaskej ken kinmixpoloskej nochtin tlaneltokalismej tlen amo melauak, tlapejpenalmej tlen omoxelojkej sapanoa motlajtlachialtiskej. Uelis ijkuakon kimatiskej amo omoyektlalijkej pampa kiseliskej ijkuak uits Jesús. ¿Tlen kinpanos tla ijkuakon kinekiskej ma kinpaleuikan? Tlanankilistli tikajsij itech neskayotl itech majtlaktli ichpokamej. Akinmej ixtlamatkej amo kinekij kinmakaskej chiauak akinmej amo ixtlamatkej uan kinmiluia ma yakan uan ma kikoakan. Pero ken tlajko yoak amo ikaj kinnemakiltia chiauak. Nin kinmachtia yiyoak pampa uelis kalakiskej iuan Jesús.

12. 1) Itech ueyi tlajyouilistli, ¿tlen kinpanos tlapejpenalmej tlen moxeloskej achto kiseliskej sello? 2) ¿Tlen kinchiuilis Jesús nochtin akinmej kichiuaskej ken ichpokamej akinmej amo ixtlamatkej?

12 Itech ueyi tlajyouilistli, akinmej yolmelajkej amo uelis kinpaleuiskej akinmej omoxelojkej. Pampa ayakmo itlaj uelis kichiuaskej. ¿Tlen kinpanos akinmej omoxelojkej? Kinpanos ijkon ken ichpokamej akinmej oyajkej okikoatoj chiauak: “Novio owalkalakiko. N ichpokameh non omotlatlalijkah okalakeh iwa n novio kan monamiktilo iwa owalmotsak n kaltentli”. Jesús ualajsis ijkuak yitlantok ueyi tlajyouilistli uan kinnechikos itech iluikak nochtin tlapejpenalmej yolmelajkej (Mateo 24:31; 25:10; Juan 14:1-3; 1 Tesalonicenses 4:17). Pero akinmej omoxelojkej amo kinselis. Uelis yejuan kijtoskej ken makuili ichpokamej akinmej amo ixtlamatkej: “¡Noteko, Noteko, techtlatlapoli!”. Pero Jesús kinmiluis ijkon ken nochtin akinmej omoxelojkej: “De milajka nomechilia, ne amo nomechixmati” (Mateo 7:21-23; 25:11, 12).

Sejse tlapejpenal kijtos kox ijsatos noso kikauas Jehová

13. 1) ¿Tleka tikijtoaj Jesús amo okijto miakej tlapejpenalmej moxeloskiaj? 2) ¿Tleka tikijtoaj ika nin neskayotl Jesús okiteititi otlaneltokaya itech tlapejpenalmej? (Xikita tlaixkopinal tlen ika peua tlamachtil.)

13 ¿Jesús okijto miakej tlapejpenalmej moxeloskej uan omonekiaya ma kinpatlakan? Amo. Pampa tikmatiskej tleka ijkon tikijtoaj, ma timomachtikan tlen kijtoa Mateo tlakotonal 24. Ijkuak Jesús okilui itlakeual ma momalui pampa amo kichiuaskia tlen amo kuali, amo okijto ijkon panoskia. San okilui ma momalui. Ika neskayotl itech majtlaktli ichpokamej noijki ijkon kinpanoa. Jesús okinmilui tlapejpenalmej ma momaluikan. Ijkon ken makuili ichpokamej okipejpenkej kichiuaskej tlen kuali uan makuili okipejpenkej kichiuaskej tlen amo kuali, axkan noijki sejse tlapejpenal moneki kipejpenas kox ijsatos uan amo moxelos. Pablo noijki okinmilui iikniuan tlapejpenalmej ma momaluikan (xiktlajtolti  Hebreos 6:4-9; itech Deuteronomio 30:19 tikajsis itlaj tlen noijki miak ipati). Tlatitlanil Pablo kuali okinyekilui tlen omonekiaya ma kichiuakan, pero noijki okinmilui intech otlaneltokaya amo keman moxeloskiaj. Tlen okinmilui Jesús ika neskayotl itech majtlaktli ichpokamej, techititia noijki tlaneltoka itech tlapejpenalmej. Kimati sejse yejuan amo keman moxelos uan kiselis tlateochiualistli.

¿KEN UELIS MOPALEUISKEJ AKINMEJ MOKAUASKEJ ITECH TLALTIKPAK?

14. ¿Tleka noijki uelis mopaleuiskej akinmej mokauaskej itech Tlaltikpak?

14 Tlen okijto Jesús techmachtia itlaj tlen miak ipati: ma tiijsatokan. Uan maski okinmilui tlapejpenalmej, noijki akinmej timokauaskej itech Tlaltikpak techpaleuia (Juan 10:16). ¿Tleka? Pampa Jesús okijto: “Tlan nomejwah nomechilia, noiwa nochteh nikinmilia: Xiijsatokah” (Marcos 13:37). Jesús kineki nochtin ma tiijsatokan. Nochtin yejuan uelis kichiuaskej ken tlapejpenalmej uan sapanoa kipatioitaskej tetlapouiskej. Noijki ma tikilnamikikan ichpokamej akinmej amo ixtlamatkej okintlajtlanilijkej chiauak akinmej ixtlamatkej. Amo keman ijkon ma techpano. Amo ma tikchiakan oksekimej tlaltikpaktlakamej ma yetokan yolmelajkej, ma momachtikan uan ma ijsatokan topatka. San tejuan uelis tikchiuaskej nochi nin tlamantli. Ayamo miak poliui Jesús kinmixkomakas nochtin, uan sejse kintlajtlanis tlen okichijkej. Ik non, ma tiijsatokan.

Ma tikilnamikikan sejse tejuan moneki ma tiijsatokan uan amo ma tikkauakan Jehová

15. ¿Tleka tinochtin tiyolpakij ijkuak monamiktia Jesús iuan inovia?

15 Tinochtin tejuan techyolpaktia namiktilistli tlen Jesús okijto mochiuas. Ijkuak tlamis Armagedón, tlapejpenalmej mochiuaskej inovia Cristo tlen yetoskej iluikak (Apocalipsis19:7-9). Uan noijki mopaleuiskej nochtin akinmej mokauaskej itech Tlaltikpak. ¿Tleka? Pampa nin namiktilistli kinmilnamiktia kinnauatis se kuali tekiuajkayotl. Ik non, akinmej yaskej iluikak uan akinmej mokauaskej itech Tlaltikpak, ma timochijchikauakan pampa ma tiijsatokan. Ijkon uelis tikseliskej tlateochiualismej tlen Jehová techmakas.

^ párr. 9 Itech neskayotl panoa seki kauitl, pampa itech tlaxelol 6 moijtoa: “¡Ompa wits n novio!”, uan itech tlaxelol 10 ajsi novio. Itech saiktlami tonalmej tlapejpenalmej ijsatokej uan kajsikamatij Jesús yokitlalijkej ken ueyi Tekiua itech iTekiuajkayo toTajtsin Dios. Pero moneki nochipa ijsatoskej hasta ijkuak uits.