Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Marzo de 2015

Jehová kipaktia amo oui tlamachtis

Jehová kipaktia amo oui tlamachtis

“Otikinmajsikamatilti akimeh amitla kimatih iwa amo akimeh kimoliah ixtlamatih.” (LUCAS 10:21)

1. ¿Tleka Biblia techiluia Jesús sapanoa oyolpakik? (Xikita tlaixkopinal tlen ika peua tlamachtil.)

JESÚS okintitlanki 70 imachtijkauan ma tetlapouikan itech iTekiuajkayo toTajtsin Dios. * (Xikita tlajtoli tlen kiualika tlakxitlan.) Pero kinpanoskia miak ouijkayotl pampa miakej amo okintlasojtlayaj. Se neskayotl, tlayekankej teopixkej oixtlamatiayaj pampa sapanoa omomachtijkej. Yejuan okinekiayaj tlaltikpaktlakamej ma kitakan Jesús san ken se kuajxinki (Marcos 6:3). Uan okinekiayaj nochtin tlaltikpaktlakamej ma kineltokakan imachtijkauan Jesús amo okipiayaj inpati nion omomachtijkej (Hechos 4:13). Ik non, Jesús okinekiaya ma mokuepakan imachtijkauan pampa kimatiskia ken otetlapouijkej. Ijkuak omokuepkej, Jesús okinmitak sapanoa oyolpakiayaj. Maski okintlajyouiltijkej seki demonios, yejuan okichijkej tlen Jesús okinnauati. Ik non, Biblia techiluia ijkuak okinmitak ‘sapanoa oyolpakik’. Uelis timokuayejyekoskej itech iixko uan iixtololouan omotaya sapanoa oyolpakiaya. Pero ¿ken oyolpakej imachtijkauan uan okiteititijkej yolchikaualistli? (Xiktlajtolti Lucas 10:1, 17-21.)

Axkan ialtepe Jehová amo oui techmachtia uan nochi kuali moajsikamati

2. 1) ¿Tleka Jesús okijto imachtijkauan okatkaj ken konemej? 2) ¿Tleka imachtijkauan Jesús okajsikamatkej tlamachtilmej tlen okachi oui?

2 Jesús okilui Jehová: “Tlasojkamati miak Notajtsi, Tejwatsi Ti Tekowa  de ilwikak iwa de nin tlaltíkpaktli, porke nochi ni otikintlaatili n ixtlamatkeh iwan teajsikamatkeh iwa otikinnextili non tsitsikitikeh. Ijkó Notajtsi, ijkó Tejwatsi satlawel omitspakti [titlamachtis, TNM]” (Mateo 11:25, 26). ¿Tleka Jesús okijto imachtijkauan okatkaj ken “tsitsikitikeh” noso konemej? Pampa imachtijkauan amo omoueyinekiayaj, okatkaj yolyamankej. Tlayekankej teopixkej sapanoa omomachtiayaj uan okijtoayaj okatkaj ixtlamatkej, pero imachtijkauan Jesús okinekiayaj ma kinmachtikan ijkon ken kichiuaj konemej (Mateo 18:1-4). Ken okatkaj yolyamankej, Jehová ika iespíritu okinpaleui ma kajsikamatikan tlamachtilmej tlen okachi oui katej itech Biblia. Pero tlayekankej teopixkej omoueyinekiayaj uan okikajkej ma kinyekana Satanás uan amo okajsikamatkej tlen toTajtsin Dios otlamachti.

3. ¿Tlen timomachtiskej axkan?

3 Jesús sapanoa oyolpakik ijkuak okitak Jehová kinpaleuia akinmej yolyamankej ma kajsikamatikan tlen okachi oui itech Biblia. ¿Uan axkan? Jehová amo oui tlamachtia pampa akinmej yolyamankej ma kajsikamatikan tlen tlamachtia. ¿Tleka ijkon tikijtoaj? Axkan non timomachtiskej. Axkan tikitaskej ken toTajtsin Dios kinpaleuia tlaltikpaktlakamej akinmej yolyamankej ma kimatikan tlen okachi oui itech Biblia.

TLAMACHTILISTLI TLEN AMO OKACHI OUI MOAJSIKAMATI

4. ¿Tleka se tetliokolil revista Akin Tetlapouijtok ika tlajtoli tlen amo oui?

4 Axkan ialtepe Jehová okachi kuali tlamachtia. ¿Ken kichiua? Axkan nochi tlen kiyekijtoa amo oui moajsikamati. Ma tikitakan eyi tlamantli tlen kiteititia melauak ijkon. Achto, ialtepe Jehová yokichijchi revista Akin Tetlapouijtok ika tlajtoli tlen amo oui. * (Xikita tlajtoli tlen kiualika tlakxitlan.) Nin revista mochijchiua pampa akinmej kitaj oui kitlajtoltiskej se amatl noso amo kimatij miak se tlajtoli. Noijki kinpaleuia tetajmej, pampa konemej okachi amo oui kajsikamatij tlamachtilmej. Uan miakej kalchanejkej kintitlanij amatlajkuilolmej kanin kijtoaj kitlasojkamatiliaj Jehová. Se tokni kijtoa ika okse revista amo otlanankiliaya, pero ika nin yankuik revista axkan ayakmo majmaui tlanankilis itech tlanechikol.

5. ¿Tlen tlamantli kuali kipia yankuik Biblia Traducción del Nuevo Mundo ika tlajtoli inglés?

5 Ome, itech tonal sábado 5, metstli octubre, xiuitl 2013, ialtepe Jehová okichijchi Traducción del Nuevo Mundo ika tlajtoli inglés. * (Xikita tlajtoli tlen kiualika tlakxitlan.) Itech nin Biblia axkan miakej tlaxelolmej amo kipiaj miakej tlajtolmej, pero kema kijtoaj tlen melauak kijtosneki. Uan noijki amo oui moajsikamatij. Se neskayotl, Job 10:1 okipiaya 27 tlajtolmej, pero axkan san kipia 19 tlajtolmej. Uan Proverbios 8:6 okipiaya 20 tlajtolmej, pero axkan kipia san 13 tlajtolmej. Axkan okachi kuali moajsikamati tlen nikan kijtoa. Se tokni tlapejpenal tlen yiuejkika kitekichiuilia Jehová okitlajtolti amochtli Job ika yankuik Biblia, okijto axkan yikin kuali okajsikamatki tlen kijtosneki. Miakej tokniuan noijki ijkon mokuayejyekoaj.

6. ¿Tlen timokuayejyekoa itech yankuik tlamachtilistli tlen kajki itech Mateo 24:45-47?

6 Eyi, axkan ialtepe Jehová okachi kuali kajsikamati seki tlaxelolmej. Se neskayotl, itech La Atalaya (ika náhuatl del centro Akin Tetlapouijtok) 15 de julio 2013, okachi kuali omoijto tlen kijtosneki tlen kijtoa Mateo 24:45-47. Ompa omoijto “tlakeuali yolmelajki uan ixtlamatki” kijtosneki  tokniuan akinmej kiyekanaj tekitl tlen kichiuaj iTlaixpantijkauan Jehová. Noijki omoijto akinmej kinyekanaj kijtosneki tlapejpenalmej uan tokniuan akinmej mokauaskej itech Tlaltikpak, nochtin akinmej kiseliaj tlakuali tlen kitemaka tlakeuali yolmelajki (Juan 10:16). ¿Melauak tiyolpakij tikseliskej nin tlamachtilistli uan tikinmachtiskej oksekimej? Axkan ma tikitakan ken Jehová kipaktia amo oui tlamachtis.

TLAPOUALISMEJ TLEN KATEJ ITECH BIBLIA OKACHI AMO OUI MOAJSIKAMATIJ

7, 8. Xikinmijto seki neskayomej tlen kineskayotiaj ikaj noso itlaj okachi ipati

7 Ialtepe Jehová kipatlatiuits tlamachtilistli itech tlapoualismej tlen katej itech Biblia. Achto omoajsikamatiaya seki tlapoualismej okijtosnekiayaj tlamantli miak ipati tlen panoskia satepan. ¿Uelis moajsikamatiskej ijkon seki tlapoualismej tlen katej itech Biblia? Kema. Jesús ijkon otlamachti itech seki tlapoualismej. Se neskayotl, okijto eyi tonal tlen Jonás okatka ijtik ueyi michin okineskayotiaya Jesús panoskia eyi tonal itech koyoktli (xiktlajtolti Mateo 12:39, 40).

Ijkuak timomachtiaj tlapoualismej uan tlen kijtosnekij, totlaneltokilis mochikaua

8 Pero amo san ye nin tlapoualistli kineskayotia ikaj noso itlaj miak ipati. Se neskayotl, tlatitlanil Pablo okijto Abrahán, Agar uan Sara okineskayotiayaj ken Jehová omouikaya iuan altepetl Israel uan ialtepe toTajtsin Dios tlen kajki iluikak (Gálatas 4:22-26). Tlatitlanil Pablo okijto tlanauatilmej tlen okinseli altepetl Israel okatkaj tlatlamantli tlen okineskayotiayaj ikaj noso itlaj tlen panoskia satepan. Ken tabernáculo, teokali, Tonal ijkuak Okintlapojpoluiayaj intlajtlakoluan israelitas uan ueyi teopixki (Hebreos 9:23-25; 10:1). Ijkuak timomachtiaj itech nin tlapoualismej uan tikinmajsikamatij tlen kijtosnekij, totlaneltokilis  mochikaua. Pero ¿nin kijtosneki nochtin tlaltikpaktlakamej uan okseki tlamantli itlaj kineskayotiaj?

9. ¿Ken otikijtoayaj achto tlen okipanok Nabot?

9 Achto toamatlajkuiloluan okijtoayaj nochtin tlaltikpaktlakamej uan seki tlamantli itech tlapoualismej okineskayotiayaj ikaj noso itlaj tlen panoskia. Se neskayotl tikajsij itech 1 Reyes 21:1-16, ompa techtlapouia itech ueyi tekiua Acab uan siuatl ueyi tekiua Jezabel. Jezabel okichi ma kimiktikan se tlakatl tlen omotokayotiaya Nabot pampa tekiua Acab kimokauiskia iviña. Itech xiuitl 1932 nin revista okijto Acab uan Jezabel okineskayotiayaj tlen Satanás kinauatia. Noijki okijto Nabot kineskayotia Jesús, uan imikilis Nabot kineskayotia imikilis Jesús. Pero itech xiuitl 1961, amochtli “Santificado sea tu nombre”, ika tlajtoli inglés, okijto Nabot okineskayotiaya tlapejpenalmej uan Jezabel okineskayotiaya tlaneltokalistli tlen amo melauak. (Nin amochtli okitlajtolkuepkej ika tlajtoli español itech xiuitl 1964.) Noijki okijto ken Nabot okitlajyouiltijkej okijtosnekiaya tlapejpenalmej noijki kintlajyouiltiskiaj. Itech nochi nin xiuitl ialtepe Jehová techmaka ninmej tlamachtilmej pampa ma mochikaua totlaneltokilis. Pero axkan okse tlamantli techmachtia. ¿Tleka?

10. 1) ¿Ken kinextia axkan tlakeuali yolmelajki okachi ixtlamatki? 2) ¿Axkan ken techmachtiaj toamatlajkuiloluan?

10 Seki tlamachtilmej tlen achto otechmachtiayaj oui okatka pampa tikinmajsikamatiskej, tikinmilnamikiskej uan tikinchiuaskej. Toamatlajkuiloluan otechmachtiayaj tlen kijtosnekij tlapoualismej tlen katej itech Biblia uan amo itech tlamantli miak ipati pampa tonemilis. Ik non, Jehová kipaleuia “tlakeuali yolmelajki uan ixtlamatki” pampa okachi kuali ma tekiti. ¿Ken tekiti axkan tlakeuali yolmelajki uan ixtlamatki? Axkan tlamachtia tlen kijtosneki se tlapoualistli tla Biblia ijkon kinextia. Axkan toamatlajkuiloluan techmachtiaj tlamantli tlen okachi ipati pampa ma mochikaua totlaneltokilis, ma titlaxikokan, ma tiktlasojtlakan toTajtsin Dios uan pampa okachi kuali ma tikpiakan toyelis. * (Xikita tlajtoli tlen kiualika tlakxitlan.)

Ineskayo Nabot techmachtia itlaj tlen miak ipati (Xikita párrafo 11)

11. 1) ¿Axkan ken tikyekijtoaj tlen okipanok Nabot? 2) ¿Tlen techmachtia ineskayo Nabot?

11 Oksepa ma timotlapouikan itech Nabot. ¿Ken tikyekijtoaj axkan tlen techmachtia ineskayo? Axkan okachi kuali uan amo oui kajsikamatij. Axkan ayakmo tikijtoaj omikik pampa kineskayotia Jesús noso tlapejpenalmej. Nabot omikik pampa okinek kitlakamatis Jehová. Maski se tekiua okimikti, ye okitlakamatki Jehová (Números 36:7; 1 Reyes 21:3). ¿Tlen techmachtia tinochtin akinmej tiktekichiuiliaj Jehová? Tla techtlajyouiltiaj ijkon ken okipanok Nabot, moneki nochipa ma tiktlakamatikan Jehová (xiktlajtolti 2 Timoteo 3:12). Nochtin akinmej tikchiuaj ken Cristo uelis tikajsikamatiskej, tikilnamikiskej uan tikchiuaskej ken Nabot. Nin tlapoualistli kichikaua totlaneltokilis.

12. 1) ¿Tlen moneki timokuayejyekoskej itech tlapoualismej tlen tikinmajsij itech Biblia? 2) ¿Tlen kinpaleuia tokniuan okachi kuali ma kajsikamatikan tlen okachi oui itech Biblia? (Xikita tlajtoli tlen kiualika tlakxitlan.)

12 Pero amo moneki timokuayejyekoskej san itlaj techmachtiaj pero amo itlaj kineskayotiaj. Seki tlapoualismej kema kineskayotiaj tlamantli tlen okachi ipati. Pero toamatlajkuiloluan amo san techmachtiaj tlen kijtosnekij. Okachi  techmachtiaj ken mouikaj iuan okseki tlapoualismej uan tlen techmachtiaj. Se neskayotl, ijkuak timomachtiaj Nabot okitlakamatki Jehová maski okimiktijkej, techilnamiktia Jesús uan tlapejpenalmej noijki nochipa kitlakamatij Jehová. Pero amo san non, noijki techilnamiktia miakej tokniuan kitlakamatij Jehová maski kinmiktiaj. Ika nochi nin tikajsikamatij Jehová techmachtia ika tlajtolmej tlen amo oui. * (Xikita tlajtoli tlen kiualika tlakxitlan.)

TLEN OTLAMACHTI JESÚS AMO OUI TIKAJSIKAMATIJ

13. ¿Tlen neskayomej tlen okinmijto Jesús axkan okachi amo oui tikyekijtoaj?

13 Neskayomej sapanoa tlapaleuiaj pampa kichiuaj okachi amo oui ma tikajsikamatikan tlen moneki. Noijki kichiuaj ma timokuayejyekokan uan noijki ajsi itech toyolo. Jesús akin okachi kuali otlamachti, uan ye sapanoa otlamachtiaya ika neskayomej (Mateo 13:34). Axkan toamatlajkuiloluan amo okachi oui techyekiluiaj neskayomej tlen okinmijto Jesús. Se neskayotl, revista Akin Tetlapouijtok 1 de diciembre 2014 otechpaleui okachi amo oui ma tikajsikamatikan neskayomej itech levadura, se xinatsintli de mostaza uan se michayatl. Axkan kuali tikinmajsikamatij ninmej neskayomej kijtosneki iTekiuajkayo toTajtsin Dios yokichi miakej tlaltikpaktlakamej ma kitekichiuilikan Jehová.

Neskayomej tlapaleuiaj pampa kuali ma moajsikamati itlaj, kichiuaj ma timokuayejyekokan uan ma ajsikan itech toyolo

14. 1) ¿Tlen otikneltokayaj okijtosnekiaya neskayotl itech samaritano? 2) ¿Axkan tlen tikyekijtoaj itech nin neskayotl?

14 Ualeua Jesús okinmijtoaya seki neskayomej tlen okipiayaj miak tlamantli. Seki neskayomej okijtosnekiayaj itlaj tlen satepan mochiuaskia, uan okseki san otlamachtiayaj tlamantli tlen miak ipati. ¿Ken uelis tikmatiskej tlen tlapoualismej satepan mochiuaskej uan tlen tlapoualismej techmachtiaj itlaj tlen miak ipati? Ijkuak panoa xiuitl okachi kuali tikajsikamatij. Se neskayotl, ma timokuayejyekokan tlen otikijtoayaj itech neskayotl tlen okitlali itech samaritano (Lucas 10:30-37). Itech xiuitl 1924 nin revista okijto samaritano okijtosnekiaya Jesús. Ken pampa yaskiaj Jericó de Jerusalén omonekiaya tlejkoskej itech tepemej, omoijto nin ojtli okijtosnekiaya tlaltikpaktlakamej, pampa desde ijkuak Adán uan Eva amo otetlakamatkej axkan okachi oui. Noijki omoijtoaya akinmej otlachtekiayaj okatkaj ken akinmej otlanemakayaj, teopixki uan levita okijtosnekiayaj tlaneltokalismej tlen tlamachtiaj tlen amo melauak. Pero ¿axkan tlen tikyekijtoaj itech nin neskayotl? Toamatlajkuiloluan techmachtiaj amo moneki tikinchikoitaskej pampa oneskej itech okse altepetl, noso tlatlamantli motaj, uan noijki techmachtiaj moneki tikinpaleuiskej ma kixmatikan Jehová. Tiyolpakij tikmatiskej ken Jehová kichiua okachi kuali ma tikajsikamatikan tlen melauak.

15. ¿Tlen timomachtiskej chikome?

15 Chikome timomachtiskej itech neskayotl itech majtlaktli ichpokamej tlen inselti (Mateo 25:1-13). ¿Ken okinekiaya Jesús ma tikajsikamatikan nin neskayotl? ¿Sejse tlaltikpaktlakatl uan sejse tlamantli itlaj kijtosnekij? ¿Noso san techmachtia itlaj tlen miak ipati axkan? Ma timomachtikan.

^ párr. 1 Itech seki Biblias kijtoaj “70”, uan itech okseki kijtoaj “72”.

^ párr. 4 Nin revista omochijchi ika tlajtoli inglés itech metstli julio xiuitl 2011. Axkan noijki tikajsij ika miakej tlatlamantli tlajtolmej.

^ párr. 5 Nin Biblia satepan noijki mochijchiuas ika okseki tlatlamantli tlajtolmej.

^ párr. 10 Se neskayotl, amochtli Ejemplos de fe techtlapouia itech 14 tlaltikpaktlakamej tlen tikinmajsij itech Biblia. Pero nin amochtli amo techtlapouia tlen kijtosneki sejse tlapoualistli, techmachtia tlen okachi ipati.

^ párr. 12 Itech Biblia onka miak tlamantli tlen uelis tikitaj oui tikajsikamatiskej. Pero Jehová ika iespíritu santo otlanauati ma moijkuilokan. Axkan Jehová noijki ika iespíritu kinpaleuia itekipanojkauan ma kajsikamatikan tlen okachi oui itech Biblia (2 Pedro 3:16, 17; 1 Corintios 2:10).