Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Marzo de 2015

¿Tlen techmachtia neskayotl itech talentos?

¿Tlen techmachtia neskayotl itech talentos?

“Seme de yejwah okimák mákuili sentenario, ok se okimák ome sentenario, iwa non ok se okimák san se sentenario.” (MATEO 25:15)

1, 2. ¿Tleka Jesús otlajto itech neskayotl itech talentos?

JESÚS otlajto itech neskayotl itech talentos pampa tlapejpenalmej ma kimatikan tlen kineki ma kichiuakan. Pero tinochtin uelis timomachtiskej miak tlamantli itech nin neskayotl. Ik non, miak ipati ma tikmatikan tlen kijtosneki nin neskayotl.

2 ¿Keman okintlapoui imachtijkauan itech nin neskayotl? Okintlapoui ijkuak okinmilui seki tlamantli tlen mochiuaskia ijkuak kitlaliskiaj ken ueyi tekiua uan peuaskia itlamian tonalmej (Mateo 24:3). Ik non, tikmatij nin neskayotl mochiua itech itlamian nochi tlen amo kuali ijkon ken nochi tlen ijkuakon okintlapoui.

3. ¿Tlen techmachtiaj neskayomej tlen ijkuilitokej itech Mateo tlakotonal 24 uan 25?

3 Ijkuak Jesús okijto tlen panoskia itech itlamian tonalmej, okijto naui neskayomej tlen techmachtiaj tlen moneki ma tikchiuakan itech itlamian tonalmej. Ninmej neskayomej ijkuilitokej itech Mateo 24:45 a 25:46. Achto neskayotl techtlapouia itech tlakeuali yolmelajki, tlen kineskayotia sekimej tlapejpenalmej tlen kinmachtiaj nochtin itekipanojkauan toTajtsin Dios. Jesús otlajto itech nin neskayotl pampa tlapejpenalmej ma kimatikan omonekiaya yetoskej yolmelajkej uan  ixtlamatkej. * (Xikita tlajtoli tlen kiualika tlakxitlan.) Noijki okintlapoui itech majtlaktli ichpokamej. Ika nin neskayotl Jesús okinmachti tlapejpenalmej moneki ma moyektlalikan uan ma ijsatokan pampa amo kimatij keman uits. * (Xikita tlajtoli tlen kiualika tlakxitlan.) Neskayotl eyi techtlapouia itech talentos. Jesús otlajto itech nin neskayotl pampa tlapejpenalmej ma mochijchikauakan uan pampa chikauak ma tekitikan pampa uelis kichiuaskej nochi tlen okinnauatijkej. Naui neskayotl techtlapouia itech ichkamej uan tentsomej. Nin neskayotl kinmachtia nochtin akinmej mokauaskej itech Tlaltikpak moneki yetoskej yolmelajkej uan ma kinpaleuikan tlapejpenalmej. * (Xikita tlajtoli tlen kiualika tlakxitlan.) Axkan timomachtiskej itech talentos.

SE TLAKATL KINMAKA MIAK TOMIN ITEKIPANOJKAUAN

4, 5. 1) ¿Akin kineskayotia tlakatl tlen yaui itech okse altepetl? 2) ¿Tlen okatka se talento? (Xikita tlajtoli tlen kiualika tlakxitlan.)

4 (Xiktlajtolti Mateo 25:14-30.) Itech nin neskayotl Jesús okijto se tlakatl oyajki itech okse altepetl. Itech okse neskayotl Jesús noijki okijto se tlakatl oyajki itech okse altepetl pampa mochiuaskia ueyi tekiua (Lucas 19:12). * (Xikita tlajtoli tlen kiualika tlakxitlan.) Yiuejkika toamatlajkuiloluan kijtoaj  itech ome neskayomej tlakatl kineskayotia Jesús uan ye oyajki iluikak itech xiuitl 33. Pero Jesús amo omochi ueyi Tekiua itech non xiuitl. Omochixki hasta xiuitl 1914 ‘asta ijkuak Dios okintlali itlampa ikxiwah akimeh kikokoliah’ (Hebreos 10:12, 13).

5 Jesús okijto achto yaskia tlakatl okinnotski itekipanojkauan uan okinmakak chikueyi talentos. Sapanoa miak tomin. * (Xikita tlajtoli tlen kiualika tlakxitlan.) Okinmilui ma kitekitiltikan chikueyi talentos pampa ma momiaktili tomin. Nin tlakatl okipatioitiaya chikueyi talentos. Uan Jesús noijki okipatioitaya seki tlamantli. ¿Tlen tlamantli? Tekitl tlen okichi ijkuak okatka itech Tlaltikpak.

“Xiyektlachiakah iwa xikimitakah n tlátookteh, yotlachikawak iwa ya kuali se pixkas”

6, 7. ¿Tlen kineskayotiaj talentos?

6 Jesús okipatioitaya miak tetlapouilistli. Ika tetlapouilistli miakej tlaltikpaktlakamej omochijkej imachtijkauan Jesús (xiktlajtolti Lucas 4:43). Pero ye okimatiaya omonekiaya okachi ma tetlapouikan. Ik non, okinmilui imachtijkauan: “Xiyektlachiakah iwa xikimitakah n tlátookteh, yotlachikawak iwa ya kuali se pixkas” (Juan 4:35-38). Jesús okijto tetlapouilistli ken ijkuak se tlapixka. Uan ye ken akin tlatoka, akin kitemoa ma tlapixkakan nochi. Ik non, achto yaskia iluikak okinmilui imachtijkauan ma kichiuakan tekitl tlen sapanoa miak ipati: tetlapouilistli (2 Corintios 4:7). Okinmilui: “Xiakan, uan ijkon, xikinchiuakan nomachtijkauan” (Mateo 28:18-20, TNM).

7 Ijkon ken tlakatl okinmakak itekipanojkauan talentos, Jesús noijki okinmilui tlapejpenalmej ma tetlapouikan (Mateo 25:14). Ik non, talentos kineskayotiaj tetlapouilistli uan ma tikinmachtikan oksekimej.

8. Maski sejse okiseli tlatlamantli tomin, ¿tlen okichiaya tlakatl ma kichiuakan?

8 Jesús okijto itech nin neskayotl tlakatl okinmakak itekipanojkauan makuili talentos, ome talentos uan se talento (Mateo 25:15). Ken tikitaj, sejse okiseli tlatlamantli tomin. Pero tlakatl okichiaya eyi tlakamej ma kimiaktilikan itomin. Jesús noijki okichiaya tlapejpenalmej ma mochijchikauakan ma tetlapouikan (Mateo 22:37; Colosenses 3:23). Itech xiuitl 33, itech iluitl tlen okichiuayaj judíos tlen itoka Pentecostés, imachtijkauan Jesús opejkej kintlapouiaj akinmej tlatlamantli inmialtepe. Uan itech amochtli Hechos techiluia sapanoa chikauak otekitikej  (Hechos 6:7; 12:24; 19:20). * (Xikita tlajtoli tlen kiualika tlakxitlan.)

TLAKEUALMEJ KINTEKITILTIAJ TALENTOS

9. 1) ¿Tlen okichijkej ome tlakeualmej yolmelajkej? 2) ¿Tlen techmachtiaj ika tlen okichijkej? 3) ¿Tlen moneki ma kichiuakan akinmej mokauaskej itech Tlaltikpak?

9 Ome tlakeualmej tlen okitlankej tomin, kineskayotiaj tlapejpenalmej tlen yolmelajkej tlen katej itech itlamian tonalmej. Yejuan chikauak tetlapouiaj, uan okachi itech xiuitl 1919 pampa tlayekapan. Itech neskayotl tlen okijto Jesús, sejse tlakatl okiseli tlatlamantli tomin noso talentos. Pero nin amo kijtosneki onka ome nechikolmej tlen kiyektlaliaj tokniuan tlapejpenalmej. Ma tikilnamikikan ome tlakamej chikauak otekitikej uan okinmakakej okachi miak tomin. Pero ¿san tlapejpenalmej moneki chikauak tekitiskej? Amo. Neskayotl itech ichkamej uan tentsomej techmachtia akinmej mokauaskej itech Tlaltikpak moneki chikauak tekitiskej uan kinpaleuiskej tlapejpenalmej. Uan yejuan kipatioitaj kichiuaskej nin tekitl. Uan nochtin katej ken san se tlanechikol tlen mochijchikaua pampa tetlapouiskej uan kinmachtiskej oksekimej (Juan 10:16).

10. ¿Tlen tlamantli miak ipati itech tlen okijto Jesús mochiuaskia itech itlamian tonalmej?

10 Jesús kineki nochtin imachtijkauan ma mochijchikauakan pampa kinmachtiskej oksekimej. Uan non tlen okichijkej tokniuan itech achto siglo. Uan itech ninmej tonalmej, ¿tokniuan chikauak tekititokej? Kema. Uan amo keman omotetlapouiaya ken axkan. Pampa chikauak tetlapouiaj sejse xiuitl moapolaktiaj sapanoa miakej tokniuan. Uan yejuan noijki tetlapouiaj. ¡Jesús sapanoa yolpaki! Nochi nin techmachtia tetlapouilistli miak ipati itech tlen okijto Jesús panoskia itech itlamian tonalmej.

Jesús okinmakak itekipanojkauan se tekitl tlen miak ipati, tetlapouilistli (Xikita párrafo 10)

TLAKATL UITS

11. ¿Tleka tikijtoaj Jesús uits itech ueyi tlajyouilistli?

11 Jesús okijto: “Miakeh tonatijmeh satepa, omokopato inteko, iwa okintlajtlani itlakawah tlan okichijkeh ika itomi” (Mateo 25:19). ¿Keman uits Jesús? Uits ijkuak yitlantos ueyi tlajyouilistli. ¿Tleka ijkon tikijtoaj? Ma tikitakan. Itech tlen ijkuilitok itech Mateo 24 uan 25, Jesús miak uelta okijto uits. Se neskayotl,  Jesús okijto miakej kitaskiaj “wits ipan mextli de ilwikak”. Nin mochiuas itech ueyi tlajyouilistli, ijkuak Jesús kinmixkomakas tlaltikpaktlakamej. Jesús noijki okijto itekipanojkauan omonekiaya ma ijsatokan. Okinmilui: “Amo nonkimatih kemania walmuikas Nomoteko”. Uan noijki okinmilui: “Ne Non onimochi ni tlakatl niwalkalakiki ijkuak nomejwah mach nonnechchiah” (Mateo 24:30, 42, 44). Ik non, itech neskayotl itech talentos, Jesús noijki okijto uits pampa kinmixkomakas tlaltikpaktlakamej uan kixpolos nochi tlen kichiua Satanás. * (Xikita tlajtoli tlen kiualika tlakxitlan.)

12, 13. 1) ¿Tlen okinmilui tlakatl ome itlakeualuan? 2) ¿Tleka ijkon okinmilui? 3) ¿Keman kintlaliliskej sello tlapejpenalmej? (Xikita recuadro tlen itoka “ToTajtsin Dios kinselia ijkuak mikij”.) 4) ¿Tlen tlateochiualistli kinmakas Jesús akinmej kinpaleuiaj tlapejpenalmej itech tetlapouilistli?

12 Ijkuak tlakatl omokuepki, okinmilui sejse itech ome itekipanojkauan: “Kuali otikchi, te kuali tlakéwale iwa titetlakitak. Te kuali otiktekitilti tlan san achitsi onimitsmák, ne nimitsmakas okachi miak” (Mateo 25:21, 23). ¿Tleka ijkon okinmilui? Pampa okitak achto tlakeuali okitlanki ok makuili talentos uan okse okitlanki ok ome talentos. ¿Tlen kijtosneki nochi nin? ¿Tlen kichiuas Jesús ijkuak uits?

13 Achto mochiuas ueyi tlajyouilistli, Jehová kintlalilis sello sejse tlapejpenalmej yolmelajki tlen ok yetoskej itech Tlaltikpak. Nin kijtosneki Jehová yokinseli (Apocalipsis 7:1-3). Ijkuakon, achto peuas Armagedón, Jesús kinuikas iluikak. ¿Tlen kinpanos akinmej kichiaj mokauaskej itech Tlaltikpak uan kinpaleuiaj tlapejpenalmej itech tetlapouilistli? Jesús kinmixkomakas uan kinselis ken ichkamej. Kijtosneki kinteochiuas uan kinkauilis ma mokauakan itech Xochitlali kanin tlanauatijtos iTekiuajkayo toTajtsin Dios (Mateo 25:34).

TLAKEUALI AMO YOLKUALI UAN TLATSIJKI

14, 15. ¿Tleka tikijtoaj Jesús amo okijto miakej tlapejpenalmej mokuepaskiaj amo yolkualmej uan tlatsijkej?

14 Neskayotl noijki techtlapouia itech okse tlakeuali.  ¿Tlen okipanok nin tlakeuali? Jesús okijto nin tlakeuali amo okitekitilti talento pampa okachi ma momiaktili tomin. Nion okiuikak itech banco pampa ma momiaktili tomin. Ye san okitlalpacho. Itech nin neskayotl tlakatl okijto nin tlakatl okatka amo yolkuali uan tlatsijki. Ik non, okikixtili talento uan okimakak achto tlakeuali. Satepan tlakeuali amo yolkuali okikixti itech ikalijtik kan tlayoa. Ompa tlakeuali sapanoa ochokak (Mateo 25:24-30; Lucas 19:22, 23).

15 Ijkuak Jesús okijto se itech eyi itlakeualuan amo okatka yolkuali, ¿kijtosneki se itech eyi tlapejpenalmej amo yolkuali? Amo. ¿Tleka ijkon tikijtoaj? Ijkon tikijtoaj pampa tikitaj okseki neskayomej ken itech majtlaktli ichpokamej uan tlakeuali yolmelajki. Itech neskayotl itech tlakeuali yolmelajki, Jesús okijto se tlakeuali amo yolkuali kintlajyouiltia oksekimej tlakeualmej. Jesús amo okijto tlapejpenalmej tlen katej itech tlakeuali yolmelajki satepan kintlajyouiltiskiaj oksekimej. San okinmiluijtoka amo ma kichiuakan tlen amo kuali ken nin tlakeuali. Noijki ijkon okijto Jesús itech neskayotl itech majtlaktli ichpokamej. Okijto makuili amo kuali omokuayejyekojkej. Pero amo okijto tlajko tlapejpenalmej amo kuali mokuayejyekoskiaj. San okinmiluijtoka nochtin tlapejpenalmej ma ijsatokan uan ma tlachixtokan. * (Xikita tlajtoli tlen kiualika tlakxitlan.) Noijki ijkon panoa ika neskayotl itech talentos. Jesús amo okijto itech itlamian tonalmej miakej tlapejpenalmej mochiuaskiaj amo yolkualmej. Jesús okinmilui chikauak ma tekitikan uan amo ma mochiuakan amo yolkualmej ken okse tlakeuali amo yolkuali (Mateo 25:16).

Jesús kinteochiuas nochtin akinmej chikauak tetlapouiaj

16. 1) ¿Tlen techmachtia neskayotl itech talentos? 2) ¿Ken techpaleuia nin tlamachtil pampa ma tikajsikamatikan tlen kijtosneki neskayotl itech talentos? (Xikita recuadro tlen itoka “¿Tlen kijtosneki neskayotl itech talentos?”.)

16 ¿Tlen techmachtia neskayotl itech talentos? Ome tlamantli. Achto, Jesús okinmakak tlapejpenalmej itlaj tlen miak ipati. ¿Tlen okinmakak? Tetlapouilistli uan kinmachtiskej oksekimej pampa ma tlaneltokakan itech Jehová uan Jesús. Ome, Jesús kichia tinochtin chikauak ma titetlapouikan. Tla chikauak titetlapouiaj uan timochijchikauaj pampa tikchiuaskej nochi tlen Jesús techiluia, ye techteochiuas (Mateo 25:21, 23, 34).

^ párr. 3 Tla tikneki tikmatis okachi itech tlakeuali yolmelajki, xiktlajtolti La Atalaya (ika náhuatl del centro Akin Tetlapouijtok) 15 de julio de 2013, páginas 21 uan 22, párrafos 8 a 10.

^ párr. 3 Tla tikneki tikmatis akinmej ichpokamej, xiktlajtolti itech nin revista tlamachtil tlen itoka “¿Uelis tiijsatos noso titlachixtos?”.

^ párr. 3 Pampa tikajsikamatis neskayotl itech ichkamej uan tentsomej, xiktlajtolti okse tlamachtil, noso xiktlajtolti La Atalaya (ika náhuatl del centro Akin Tetlapouijtok) 15 de octubre de 1995, páginas 23 a 28.

^ párr. 5 Maski itech Biblia tlen ijkuilitok ika náhuatl del centro kijtoa “mákuili sentenario”, “ome sentenario” uan “se sentenario”, itech tlajtoli griego tlen omotekitilti ijkuak omoijkuilo Biblia kijtoa 5 talentos, 2 talentos uan 1 talento. Ijkuak Jesús okatka itech Tlaltikpak se tlakatl tlen otekitiaya nochi tonal omonekiaya tekitis 20 xiuitl pampa uelis kipiaskia se talento.

^ párr. 8 Seki kauitl satepan omikej itlatitlaniluan Jesús, miakej ayakmo otetlakamatkej uan opejkej tlamachtiaj tlen amo melauak itech tlanechikolmej. Uan miak xiuitl amo miakej otetlapouiayaj. Pero Jesús noijki okijto itech itlamian tonalmej oksepa motetlapouiskia (Mateo 13:24-30, 36-43). Nochi nin moyekijtoa itech La Atalaya (ika náhuatl del centro Akin Tetlapouijtok) 15 de julio de 2013, páginas 9 a 12.

^ párr. 11 Xikita La Atalaya (ika náhuatl del centro Akin Tetlapouijtok) 15 de julio de 2013, páginas 7 uan 8, párrafos 14 a 18.

^ párr. 15 Xikita itech nin revista tlamachtil tlen itoka “¿Uelis tiijsatos noso titlachixtos?” itech párrafo 13.