1 Pedro 1:1-25

  • Pedro otetlajpalo (1, 2)

  • “Oksepa matinesikan para mayolto tlen tikchiaj” (3-12)

  • Xiyetokan nanyolchipauakej ken konemej tlen tetlakamatij (13-25)

1  Ne niPedro uan niiapóstol Jesucristo. Namechtlajkuililia namejuan tlen onankikajkej namoaltepe uan onanyajkej Ponto, Galacia, Capadocia, Asia uan Bitinia. Namejuan onamechpejpenkej  porque toTajtsin Dios ijkon yokimatiaya. Ye onamechmakak espíritu santo para xiyetokan nanyolchipauakej. Ijkon okichi para xiktlakamatikan* uan para namechchipauas ika ieso Jesucristo: ToTajtsin Dios okachi manamechtliokoli tlen kuali uan manamechmaka yolseuilistli.  Makiueyichiuakan iDios uan iTajtsin toTeko Jesucristo. Ye techiknomati ikinon okichi oksepa matinesikan* para mayolto tlen tikchiaj porque Jesucristo okiyolitijkej.  ToTajtsin Dios namechaxkatilis itlaj chipauak tlen amo pojpoliui nion amo ijtlakaui uan ye namechtlatilijtok ompa iluikak.  ToTajtsin Dios namechmaluijtok ika ichikaualis porque nantlaneltokaj para ximomakixtikan. Yikajki namechmakixtis uan non moteititis itlamian tonalmej.  Ikinon namejuan sapanoua nanpakij maski axkan moneki nantlajyouiskej kanaj keski tonal uan nankixnamikiskej miak ouijkayotl.  Ijkon namotlaneltokilis tlen kiyejyekouaj namechpaleuis manamechselikan, manamechtlakaitakan uan manamechueyitlalikan ijkuak monextis Jesucristo. Namotlaneltokilis okachi ipati amo ken oro tlen tlajtlami maski kipanoltiaj ijtik tlitl.  Namejuan nankitlasojtlaj Cristo maski amo keman onankitakej. Maski axkan amo nankitaj nankiteititiaj nankineltokaj uan sapanoua nanpakij.  Yonankimotlanilijkej tlen nankiseliskej porque nantlaneltokaj uan non kijtosneki namechmakixtiskej. 10  Profetas tlen okitematiltijkej toTajtsin Dios kitetliokolia tlen kuali, otlajtlankej tlen kijtosneki namechmakixtiskej uan kuali otlatemojkej. 11  ToTajtsin Dios ika iespíritu okinmatilti Cristo tlajyouiskia uan satepan kiueyitlaliskiaj, ikinon yejuan okachi otlatemojkej tlen kipanoskia Cristo uan keman panoskia. 12  ToTajtsin Dios okinpaleui makajsikamatikan namejuan namechpaleuia tlen okitematiltijkej uan amo yejuan kinpaleuia. Tlen yejuan okitematiltijkej kijtosneki kuali tlajtoli tlen onamechmatiltijkej ika espíritu santo tlen uits iluikak. Hasta ángeles ika nochi inyolo kinekij kimatiskej non tlamantli. 13  Ikinon xikyektlalikan namotlayejyekol* para chikauak nantekipanoskej uan kuali ximokuayejyekokan* ijkuak itlaj nankichiuaj. Xikchiakan ika nochi namoyolo ken namechtliokoliskej tlen kuali ijkuak monextis Jesucristo. 14  Axkan namejuan nanikoneuan toTajtsin Dios tlen nankitlakamatij,* ikinon ayakmo xikchiuakan tlen onamechyoltilanaya ijkuak amo onankimatiayaj tlen onankichiuayaj. 15  Nochipa xiyetokan nanyolchipauakej ijkuak itlaj nankichiuaskej ijkon ken yolchipauak akin onamechnotski. 16  Porque iTlajtol toTajtsin Dios kijtoua: “Moneki nanyetoskej nanyolchipauakej porque ne niyolchipauak”. 17  Tla nankitlatlaujtiaj toTajtsin Dios tlen amo techikoita ijkuak sejse kinmixkomaka tlen okichijkej, xikteititikan nankimauiliaj ika tlen nankichiuaj ijkuak ok nanchantiskej nikan tlaltikpak. 18  Namejuan onamechmakixtijkej imak namonemilis tlen amitlaj ipati tlen onamechpanoltilijkej namouejkatatajuan. Pero nankimatij amo onamechmakixtijkej ika plata noso oro tlen ijtlakaui. 19  Onamechmakixtijkej ika ieso Cristo tlen miak ipati ken yetoskia ieso se ichka tlen chipauak uan amo kipia itlaj tlen amo kuali. 20  Ye okipejpenkej ijkuak ayamo ikaj okatka, pero namopatka omoteititi itlamian ninmej tonalmej. 21  Tlen okichi Jesús namechpaleuia xikneltokakan toTajtsin Dios. Ye okiyoliti Jesús uan okiueyitlali para xikneltokakan uan xikchiakan toTajtsin Dios. 22  Namejuan yonanmochipajkej porque nankitlakamatij* tlamachtil tlen melauak uan amo nankipiaj ome namoixko ijkuak nantetlasojtlaj, ikinon sapanoua ximosepantlasojtlakan ika nochi namoyolo. 23  Porque onamechkauilijkej oksepa xinesikan* ika iTlajtol toTajtsin Dios tlen yoltok uan nochipa kajki. Namejuan oksepa onanneskej* ika se semilla tlen amo palani uan amo ika se semilla tlen palani. 24  Porque “nochtin personas katej ken xiuitl uan motaj ken se xochitl tlen moskaltia tlala. Xiuitl uaki uan xochitl uetsi, 25  pero iTlajtol Jehová nochipa yetos”. Non “tlajtoli” kijtosneki kuali tlajtoli tlen onamechmatiltijkej.

Notas

Noso “xikuelkakikan”.
Noso “matitlakatikan”.
Noso “namotlanemilil”.
Noso “ximonejneuilikan”.
Noso “nankiuelkakij”.
Noso “nankiuelkakij”.
Noso “xitlakatikan”.
Noso “onantlakatkej”.