Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Marzo de 2015

 TLAMACHTIL TLEN IKA PEUA | ¿ITECH TLEN TECHMAKIXTIA JESÚS?

¿Ken techpaleuia imikilis uan iyolitilis Jesús?

¿Ken techpaleuia imikilis uan iyolitilis Jesús?

“Xikneltoka n Toteko Cristo Jesús iwa mitsmakixtis.” (Hechos 16:31)

Tlatitlanil Pablo uan Silas ijkon okiluijkej se tlakatl akin otetsakuaya itech altepetl Macedonia tlen opouiaya Filipos. Pampa tikajsikamatiskej ken mouika tlaneltokilistli itech Jesús uan temakixtilistli itech mikilistli, achto moneki ma tikmatikan tleka timikij. Ma tikitakan tlen techmachtia Biblia itech nin.

Tlakatl amo okichijchijkej pampa ma miki

“Jehová okonanki tlakatl uan okitlali itech xochitlali Edén pampa itech ma tekiti uan ma kimalui. Jehová okimakak tlakatl nin tlanauatil: ‘Itlakilo nochi kuauitl tlen kajki itech xochitlali uelis tikkuas pampa tiixuis. Pero kuauitl itech ixtlamatilistli tlen kuali uan tlen amo kuali, amo moneki tikkuas pampa itech tonal ijkuak tikkuas, timikis’.” (Génesis 2:15-17.)

ToTajtsin Dios okitlali Adán itech xochitlali Edén, se kuajkualtsin xochitlali kanin okatkaj yolkamej, xiuitl uan kuajmej. Okatka miak tlakilotl tlen Adán uelis kikuaskia. San okatka se kuauitl tlen Jehová okijto amo uelis kikuaskia. Uan noijki okilui tla amo tetlakamatiskia mikiskia.

¿Tlen okajsikamatki Adán ika nin tlanauatil? Ye kuali okimatiaya tlen mikilistli. Okinmitaya ken omikiayaj yolkamej. Tla Adán kichijchiuaskiaj ken yolkamej, amo kipiaskia miak ipati tlen toTajtsin Dios okilui pampa noijki mikiskia. Adán kuali okajsikamatiaya tla kitlakamatiskia toTajtsin Dios uan amo kikuaskia tlakilotl, amo keman mikiskia.

Miakej kijtoa kuauitl kineskayotia ijkuak se tlakatl moteka iuan se siuatl, pero amo melauak, pampa Jehová okinmilui Adán uan Eva: “Xikinpiakan namokoneuan uan ximomiaktilikan uan xiktemitikan Tlaltikpak uan xikmaluikan” (Génesis 1:28). Kijtosneki okatka se kuauitl. Jehová okitokayoti “kuauitl itech ixtlamatilistli tlen kuali uan tlen amo kuali” okineskayotiaya san ye kinamiki kijtos tlen kuali uan tlen amo kuali pampa tlaltikpaktlakatl. Tla Adán amo kikuaskia tlakilotl, amo san kiteititiskia tetlakamati, noijki kiteititiskia okitlasojkamatiliaya akin okichijchi pampa nochi tlamantli kuali tlen okiseli.

 Adán omikik pampa amo okitlakamatki toTajtsin Dios

ToTajtsin Dios okilui Adán: “Opejki tikkua tlakilotl tlen onimitsnauati: ‘Amo moneki tikkuas’ [...]. Ika momitonil tlen moixko temoa tikkuas pan hasta ijkuak timokuepas tlali, pampa ika omitschijchijkej. Pampa te titlali uan timokuepas tlali” (Génesis 3:17, 19).

Adán okikua itlaj tlen okiluijkej amo ma kikua, uan toTajtsin Dios amo san ijkon okika, pampa ijkuak amo otetlakamatki okiteititi amo okitlasojkamatiliaya nochi tlen okimakak uan ijkon okixnamik. Ijkuak okikua tlakilotl okixtope Jehová uan san ye okinek moyekanas, nin sapanoa kitlajyouiltiskia.

Ijkon ken Jehová okilui, satepan Adán omikik. ToTajtsin Dios okichijchi Adán ika tlalpinoli uan okilui oksepa mokuepaskia tlalpinoli. Achto tlakatl Adán ayakmo oyoltoka nion oksekan yoltok. Omikik, ayakmo oyoltoka ijkon ken tlalpinoli tlen ika okichijchijkej (Génesis 2:7; Eclesiastés 9:5, 10).

Timikij pampa tiixuiuan Adán

“Ijkó kiné, por itlajtlakol se tlakatl n tlajtlákoli okalak itech nin tlaltíkpaktli iwa okualík mikílistli, ijkó noiwa nochteh mikkih porke nochteh otlajtlakolchijkeh.” (Romanos 5:12.)

Sapanoa titlajyouiaj pampa Adán otlajtlakolchi. Adán amo yoltoskia san kanaj 70 noso 80 xiuitl, ye uelis yoltoskia nochipa. Axkan ayakmo okipiaya itlalnakayo chipauak, ik non, tinochtin titlajtlakolejkej.

Tinochtin tiixuiuan Adán, ik non, amo tikpiaj totlalnakayo chipauak uan titlajtlakolchiuaj uan timikij. Tlatitlanil Pablo okiyekijto tlen techpanoa: “Pero ne ni tlaltikpaktlakatl onimonamák imak tlajtlákoli. ¡Nimialma! ¿Akin weletis nechmakixtis itech nin kuerpo non nechwika manimiki? Sanwel Dios weleti ika tlan Cristo Jesús okichiwako. ¡Niktlasojkamati Dios!” (Romanos 7:14, 24, 25).

 Jesús okitemakak iyolilis pampa ma tikpiakan yolilistli tlen amo keman tlamis

“Totajtsi Dios okwaltítlanki Ikone, para kinmakixtikis nochteh n tlaltikpaktlakah.” (1 Juan 4:14.)

Jehová okichi seki tlamantli pampa techmakixtis itech tlajtlakoli uan mikilistli. ¿Tlen okichi? Okiualtitlanki iKone pampa ma nesi ken se tlaltikpaktlakatl tlen amo kipia tlajtlakoli ijkon ken okatka Adán. Pero Jesús “amayik okichi tlajtlákoli” (1 Pedro 2:22). Ik non, uelis yoltoskia nochipa uan amo keman mikiskia.

Pero Jehová okinkauili akinmej okikokoliayaj ma kimiktikan Jesús, uan eyi tonal satepan okiyoliti. Okiyoliti ken se espíritu uan oyajki iluikak. Ompa iixpan iTajtsin okitemakak iyolilis chipauak tlen sapanoa miak ipati pampa ma tikpiakan tlen Adán okipolo. Jehová okiseli tlaxtlauili tlen okitemakak iKone uan ijkon nochtin tlen tlaneltokaskej itech Jesús uelis kipiaskej yolilistli tlen amo keman tlamis (Romanos 3:23, 24; 1 Juan 2:2).

Ika tlen Jesús okichi uelis tikpiaskej tlen Adán okipolo. Omikik pampa ma tiyoltokan nochipa. Biblia kijtoa: “Dios itech itlasojtlalis okinek mamiki n Cristo por tinochteh” (Hebreos 2:9).

Nochi nin techmachtia miak itech Jehová. Pampa imelajkayo Jehová sapanoa ueyi amo uelis san ijkon timomakixtiskiaj. Pampa techtlasojtla uan techiknomati omokuayejyeko kichiuas itlaj pampa kiyektlalis ouijkayotl. Pero omonekiaya kitlaxtlauas sapanoa patio: kitemakaskia iKone pampa kinmakixtis tlaltikpaktlakamej (Romanos 5:6-8).

Jesús okiyolitijkej, uan oksekimej noijki kinyolitiskej

“¡Cristo omikki iwa omoyoliti! Ye omochi Akin achto omoyoliti para ayakmó mikkis. Axa kuali tikmatokeh, akimeh yomikkeh, moyolitiskeh.Porke ijkó yej n mikílistli owala por se tlakatl (Adán), ijkó noiwa por se tlakatl (Jesús) moyolitiskeh non yomikkeh. Ijkó kemi nochteh n tlaltikpaktlakah mikkih porke walewatokeh de Adán, ijkó noiwa nochteh akimeh tiktlakitah Cristo, nochipa yolitoskeh por Ye.” (1 Corintios 15:20-22.)

Tikneltokaj Jesús melauak okatka uan omikik, pero ¿tleka tikijtoaj melauak okiyolitijkej? Pampa satepan ijkuak okiyolitijkej miakej tlaltikpaktlakamej okitakej. Se tonal okitakej kanaj 500 tlaltikpaktlakamej. Ijkon okijto tlatitlanil Pablo ijkuak okintlajkuilili Corintios. Noijki okijto sekimej ok oyoltokaj uan uelis kijtoskiaj tlen okitakej uan okikakej (1 Corintios 15:3-8).

Tlatitlanil Pablo okijto Jesús ye akin achto okiyolitijkej, non kijtosneki akinmej yomikej kinyolitiskej. Jesús okijto “nochteh non yomikkeh iwa tooktokeh kikakiskeh itlajtol” (Juan 5:28, 29).

 Tla tiknekij tiyoltoskej nochipa, moneki titlaneltokaskej itech Jesús

“Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami.” (Juan 3:16.)

Kanin peua Biblia techtlapouia ken opejki mikilistli uan ken opoliuik xochitlali Edén. Kanin tlami Biblia techtlapouia ken kipojpolos toTajtsin Dios mikilistli uan kikuepas Tlaltikpak se xochitlali. Ijkuakon tlaltikpaktlakamej nochipa yolpakiskej. Apocalipsis 21:4 kijtoa “ayakmó yetos mikílistli”, uan pampa ma tikneltokakan tlen toTajtsin Dios kijtoa kichiuas, tlaxelol 5 kijtoa: “Porke tlan nimitsilijtok milák iwa kuali se kinneltokas”. Nochi tlen Jehová kijtoa melauak kichiua.

¿Tejuatsin tikneltoka melauak mochiuas? Tla ijkon, ximomachti okachi itech Jesús uan itech xitlaneltoka; ijkon mitsselis Jehová. Amo san axkan mitsteochiuas, noijki uelis tiyoltos nochipa itech xochitlali, kanin “ayakmó yetos mikílistli, nion chokílistli, nion neyolkókoli”.