သမ္မာကျမ်းစာက ဘဝပုံစံကို ပြောင်းလဲပေးနိုင်

ဘာသာတရားကိုင်းရှိုင်းတဲ့ ကက်သလစ်ခရစ်ယာန်မိသားစုကနေ ကြီးပြင်းလာပြီး အောင်မြင်တဲ့တရားသူကြီးတစ်ဦးဟာ ယေဟောဝါသက်သေခရစ်ယာန် ဘယ်လိုဖြစ်လာတာလဲ။ ဘယ်အရာက အကြမ်းဖက်သမားတစ်ယောက်ကို ဘုရားသခင့်အမှုတော်ဆောင်တစ်ယောက် ဖြစ်လာအောင် လှုံ့ဆော်ပေးခဲ့သလဲ။ သူတို့ပြောတာတွေကို ဖတ်ကြည့်ရအောင်။

“အမှန်အမှားကို အရင်ကထက် ပိုပြီး သဘောပေါက်လာတယ်။”—ဆာဘာချော့ အယ်လ်ဘတ်စ် ဇွန်ကဲရာ

မွေးဖွားတဲ့နှစ်– ၁၉၄၆

နေရင်းနိုင်ငံ– ဘရာဇီး

နောက်ခံ– ကက်သလစ်ဘာသာတရားကို ကိုင်းရှိုင်းသူ

အတိတ်– ပီကတ်အီမြို့ကနေ လေးမိုင်လောက်ဝေးတဲ့ တောရွာမှာ ကျွန်တော်တို့မိသားစု နေထိုင်ကြတယ်။ မိဘပိုင်လယ်ယာလေးကနေ မိသားစုအခြေခံလိုအပ်ရာတွေ ရရှိတယ်။ ကျွန်တော်တက်တဲ့ကျောင်းက ပီကတ်အီမြို့မှာရှိတဲ့အတွက် စက်ဘီးဟောင်းတစ်စီး ဝယ်လိုက်မှပဲ ကျောင်းသွားရတာ အဆင်ပြေသွားတယ်။ ကျွန်တော်တို့ရပ်ကွက်က လူတွေဟာ ဆင်းရဲကြတယ်။ မြို့က သန့်ရှင်းသပ်ရပ်ပြီး ရာဇဝတ်မှု မရှိသလောက်ပါပဲ။ မြို့သားအများစုက စစ်လက်နက်တွေ ထုတ်လုပ်တဲ့စက်ရုံမှာ အလုပ်လုပ်ကြတယ်။

မြို့နားက လေကြောင်းသိပ္ပံစစ်တက္ကသိုလ်ကို တက်နိုင်ဖို့ ကျွန်တော် စာကြိုးစားခဲ့တယ်။ အဲဒီကျောင်းကနေ ၁၉၆၆ ခုနှစ်မှာ တပ်ကြပ်ကြီးအနေနဲ့ ဘွဲ့ရခဲ့တယ်။ အဲဒီနောက် ဥပဒေကျောင်းကို တက်ပြီး ဥပဒေဘွဲ့ရရှိခဲ့တယ်။ နောက်ပိုင်းမှာ ရဲမှူးကြီးရာထူးအတွက် လျှောက်လွှာတင်လိုက်တယ်။ ၁၉၇၆ ခုနှစ်မှာ အစိုးရစာမေးပွဲတစ်ခုကို ကျွန်တော် အောင်သွားပြီး အလုပ်ရခဲ့တယ်။ တစ်ခါတလေ ထောင်မှူးလည်း လုပ်ရတယ်။ အဲဒီအချိန်မှာ ယေဟောဝါသက်သေတွေ ရောက်လာတတ်ပြီး အကျဉ်းသားတွေကို ဟောပြောဖို့ ခွင့်တောင်းကြတယ်။ ကျွန်တော့်ကိုလည်း ကျမ်းစာအကြောင်း ပြောပြတတ်ကြတယ်။ ဘုရားသခင်ကို ကျွန်တော် လေးစားတဲ့အတွက် ဘုရားသခင့်နာမည် ယေဟောဝါဖြစ်တယ်၊ ဘုရားသခင်နဲ့ ရင်းနှီးနိုင်တယ်ဆိုတာကို သိလိုက်ရတော့ ကျွန်တော် သဘောကျသွားတယ်။

ကျွန်တော်ဟာ အလုပ်မှာ တဖြည်းဖြည်းနဲ့ အောင်မြင်လာတယ်။ ၁၉၈၁ ခုနှစ်မှာ အစိုးရစာမေးပွဲ နောက်တစ်ခု အောင်သွားတဲ့အတွက် ပြည်နယ်တရားသူကြီး ဖြစ်လာတယ်။ အဲဒီနောက် ၂၀၀၅ ခုနှစ်မှာ ဆောပိုလိုမြို့က အယူခံတရားရုံးမှာ တရားသူကြီးအဖြစ် ခန့်အပ်ခံရတယ်။

သမ္မာကျမ်းစာက ကျွန်တော့်ဘ၀ပုံစံကို ပြောင်းလဲပေးခဲ့ပုံ- ဥပဒေဘွဲ့ရပြီး မကြာခင်မှာ သမ္မာကျမ်းစာကို ကျွန်တော် စဖတ်ခဲ့တယ်။ ကျမ်းစာကိုဖတ်တဲ့အခါ ကျွန်တော့်ရဲ့ စဉ်းစားတွေးခေါ်မှု အတော်လေးကို ပြောင်းလဲလာတယ်။ တကယ်တော့ ကျွန်တော်ဟာ ကက်သလစ်ဘာသာတရားကို ကိုင်းရှိုင်းတဲ့သူပါ။ ကျွန်တော့်ဆွေမျိုးအသိုင်းအဝိုင်းမှာ ကက်သလစ်ဘုန်းကြီးတွေရှိပြီး တစ်ယောက်ဆိုရင် ဘုန်းတော်ကြီးတောင်ဖြစ်တယ်။ မားစ်ပွဲတော်မှာ ခရစ်ယာန်ဘုန်းကြီးကို ကျွန်တော် ကူညီပေးရတယ်။ ဟောပြောချက်ကို သူမပေးခင် ဆုတောင်းစာအုပ်ထဲက ကျွန်တော့်ကိုတာဝန်ပေးထားတဲ့အပိုင်းကို ဖတ်ပြရတယ်။ ကက်သလစ်မိသားစုဝင်တွေဟာ ကျမ်းစာဖတ်လေ့မရှိကြဘူး။ ကျွန်တော် ကျမ်းစာဖတ်တာကို အမေ သိသွားတဲ့အခါ အရမ်းဝမ်းနည်းသွားတယ်။ ကျမ်းစာဖတ်ရင် ရူးသွားနိုင်တယ်လို့ပြောပြီး ကျွန်တော် စိတ်ပျက်သွားအောင် အမေ ကြိုးစားတယ်။ ဒါပေမဲ့ ကျမ်းစာကို ကျွန်တော် ဆက်ဖတ်ဖြစ်ခဲ့တယ်။ ကျမ်းစာထဲမှာ အန္တရာယ်ဖြစ်စေတဲ့အရာ ဘာမှမရှိပါဘူး။

ကျွန်တော့်ရဲ့ စပ်စုချင်တဲ့စိတ်ကြောင့် ကျမ်းစာကို အရင်ကထက် ပိုဖတ်လာတယ်။ ခရစ်ယာန်ဘုန်းကြီးတွေနဲ့ သူတို့ရဲ့တာဝန်တွေ အကြောင်း ပိုပြီးသိချင်လာတယ်။ ဒါ့အပြင် လွတ်မြောက်ရေးဘာသာတရား လှုပ်ရှားမှုအကြောင်းကိုလည်း ဖတ်ဖြစ်တယ်။ ဒါပေမဲ့ အဲဒီလှုပ်ရှားမှုကို ထောက်ခံသူတွေရဲ့ ကျိုးကြောင်းဆင်ခြင်တွေးခေါ်မှုတွေဟာ အတော့်ကို လွဲမှားနေတယ်။ ဘာကြောင့်အဲဒီလိုဖြစ်ရသလဲဆိုတာ ကျွန်တော် နားမလည်နိုင်ဘူး။

အဲဒီအချိန်မှာပဲ ဗုဒ္ဓဘာသာဝင် သွားဆရာဝန်တစ်ယောက်က သူရထားတဲ့ စာအုပ်တစ်အုပ် ကျွန်တော့်ကို ပေးတယ်။ ဆင့်ကဲဖြစ်စဉ်ကြောင့် သို့မဟုတ် ဖန်ဆင်းခြင်းကြောင့် ဤတွင် လူဖြစ်လာခဲ့ရခြင်းလော [အင်္ဂလိပ်] ဆိုတဲ့ စာအုပ်ဖြစ်တယ်။ * အဲဒီစာအုပ်ကို ကျွန်တော်ရလာတော့ ချားလ်စ်ဒါဝင်ရဲ့ မျိုးစိတ်များ၏မူလအစ စာအုပ်နဲ့ တွဲဖတ်မယ်ဆိုရင် ပိုပြီးစိတ်ဝင်စားဖို့ကောင်းမှာပဲလို့ ထင်ခဲ့တယ်။ ဆင့်ကဲဖြစ်စဉ်ကြောင့် သို့မဟုတ် ဖန်ဆင်းခြင်းကြောင့် ဤတွင် လူဖြစ်လာခဲ့ရခြင်းလော စာအုပ်မှာပါတဲ့ ကျိုးကြောင်းဆင်ခြင်မှုတွေက ခိုင်လုံပြီး ယုတ္တိရှိတဲ့အပြင် ယုံကြည်စိတ်ချလို့ရတယ်။ ဒါကြောင့် ဆင့်ကဲသီအိုရီက မမှန်ဘူးဆိုတာ ကျွန်တော် သိသွားတယ်။

ဖန်ဆင်းခြင်းအကြောင်းကို ဖတ်လိုက်တော့ ကျွန်တော့်ရဲ့သိချင်စိတ်က ပိုပြီးပြင်းထန်လာတယ်။ ဒါကြောင့် ယေဟောဝါသက်သေတွေ ထုတ်ဝေတဲ့ စာအုပ်တွေကို ထပ်လိုချင်လာတယ်။ စက်ပြင်ဆရာတစ်ယောက်က ယေဟောဝါသက်သေဖြစ်တယ်ဆိုတာ ကျွန်တော် သိလိုက်ရတယ်။ ဒါနဲ့ စာအုပ်တွေပေးပါလို့ သူ့ကို ပြောပြခဲ့တယ်။ အဲဒီတုန်းက သက်သေခံတွေနဲ့ ကျမ်းစာသင်အံမှုလုပ်ဖို့ ကျွန်တော် လက်မခံခဲ့ဘူး။ ကိုယ့်ဘာသာကိုယ် လေ့လာလို့ ရတယ်ဆိုပြီး ထင်ခဲ့တယ်။

ကျမ်းစာကို ကျွန်တော် စဖတ်တဲ့အခါ ကျွန်တော်ဟာ အိမ်ထောင်သည်ဖြစ်နေတော့ မိသားစုနဲ့အတူ ကျမ်းစာဖတ်တာက ပိုအကျိုးရှိမယ်လို့ တွေးမိတယ်။ ဒါနဲ့ အပတ်တိုင်း မိသားစုလိုက် လေ့လာမှုပြုပြီး ကျမ်းစာဖတ်ခဲ့ကြတယ်။ ကက်သလစ်တွေအနေနဲ့ ကျွန်တော်တို့က ခရစ်ယာန်ဘုန်းကြီးတွေနဲ့ ဘုန်းတော်ကြီးတွေကိုပဲ အားထားနေကြတယ်။ ယေရှုက တပည့်ဖြစ်သူ သောမကို “ငါသည် လမ်းခရီးဖြစ်၏။ အမှန်တရားလည်းဖြစ်၏။ အသက်လည်းဖြစ်၏။ ငါ့ကိုအမှီမပြုဘဲ အဘယ်သူမျှ ခမည်းတော်ထံသို့ မရောက်ရ” လို့ပြောခဲ့တဲ့ ကျမ်းချက်ကို ဖတ်လိုက်ရတော့ ကျွန်တော် အရမ်းစိတ်ဝင်စားသွားတယ်။ (ယောဟန် ၁၄:၆) အဲဒီအချက်ကို အသေအချာ လေ့လာသုံးသပ်ကြည့်လိုက်တဲ့အခါ ကယ်တင်ခြင်းက ယေရှုကနေတစ်ဆင့် ယေဟောဝါဘုရားသခင်ဆီက ရရှိတယ်ဆိုတာ ကျွန်တော် ယုံကြည်သွားတယ်။ ဒါကြောင့် ကယ်တင်ခြင်းက ခရစ်ယာန်ဘုန်းကြီးတွေဆီကနေ ရမယ်ဆိုတဲ့ယုံကြည်ချက်ကို ကျွန်တော် စွန့်လိုက်တယ်။

နောက်ကျမ်းချက် နှစ်ချက်ကြောင့်လည်း ကက်သလစ်အသင်းနဲ့ သူတို့ရဲ့ သွန်သင်ချက်တွေအပေါ် ကျွန်တော့်ရဲ့ စိတ်သဘောထား ပြောင်းလဲသွားတယ်။ ကျမ်းချက်တစ်ချက်မှာ ဒီလိုဖော်ပြထားတယ်– ‘ထာဝရဘုရားသခင်ကို ကြောက်ရွံ့သောသဘောသည် ပညာ၏အချုပ်အခြာ ဖြစ်၏။ လူမိုက်တို့သည် ပညာနှင့်ဥပဒေသကို မထီမဲ့မြင်ပြုတတ်ကြ၏။’ (သုတ္တံ ၁:၇) နောက်ကျမ်းချက်တစ်ချက်က ဒီလိုဖော်ပြတယ်– “သင်တို့တွင် တစ်ဦးတစ်ယောက်သည် ဉာဏ်ပညာလိုနေလျှင် ဘုရားသခင်ကို ဆက်၍တောင်းလျှောက်ပါစေ။ ကိုယ်တော်သည် လူအပေါင်းကို ကဲ့ရဲ့ ခြင်းမရှိဘဲ ရက်ရောစွာ ပေးကမ်းတော်မူသောကြောင့် တောင်းလျှင် ရလိမ့်မည်။” (ယာကုပ် ၁:၅) ဒါနဲ့ အသိပညာနဲ့ ဉာဏ်ပညာကို အငမ်းမရ ရှာဖွေလေ့လာခဲ့တယ်။ ကျွန်တော်လိုချင်တဲ့ အသိပညာနဲ့ ဉာဏ်ပညာကို ကက်သလစ်အသင်းက မပေးနိုင်တဲ့အတွက် နောက်ပိုင်း အဲဒီအသင်းကို သွားမတက်တော့ဘူး။

၁၉၈၀ ပြည့်နှစ်မှာ ကျွန်တော့်ဇနီးက သက်သေခံတွေနဲ့ ကျမ်းစာလေ့လာခဲ့တယ်။ ကျွန်တော် အိမ်မှာရှိရင်တော့ ကျမ်းစာသင်တဲ့အချိန်မှာ ဝင်ထိုင်ခဲ့တယ်။ နောက်ပိုင်းမှာ ကျွန်တော်ကိုယ်တိုင်လည်း ကျမ်းစာသင်အံမှုကို လက်ခံခဲ့တယ်။ ဒါပေမဲ့ အချိန်အတော်ကြာပြီးမှ ယေဟောဝါသက်သေအနေနဲ့ အပ်နှံဆက်ကပ်ပြီး နှစ်ခြင်းယူခဲ့တယ်။ ကျွန်တော့်ဇနီးက ၁၉၉၄ ခုနှစ်မှာ၊ ကျွန်တော်ကတော့ ၁၉၉၈ ခုနှစ်မှာ နှစ်ခြင်းယူခဲ့တယ်။

အကျိုးကျေးဇူးရရှိခဲ့ပုံ– ကျွန်တော့်ကလေး လေးယောက်လည်း ယေဟောဝါဘုရားသခင်ရဲ့ စံနှုန်းတွေနဲ့အညီ အသက်ရှင်နေထိုင်ဖို့ ဆုံးမသွန်သင်ခံရလို့ အကျိုးကျေးဇူးရရှိခဲ့ပါတယ်။ (ဧဖက် ၆:၄) သားနှစ်ယောက်က သူတို့တာဝန်ကျတဲ့အသင်းတော်မှာ ကြိုးစားလုပ်ဆောင်နေကြတယ်။ သမီးနှစ်ယောက်လည်း ဟောပြောခြင်းလုပ်ငန်းမှာ ထက်ထက်သန်သန် ပါဝင်နေကြတယ်။ ကျွန်တော့်ဇနီးလည်း အချိန်အများကြီးအသုံးပြုပြီး တခြားသူတွေကို ကျမ်းစာသင်ပေးနေတယ်။ ကျွန်တော်က ဒေသန္တရအသင်းတော်မှာ အကြီးအကဲအနေနဲ့ အမှုဆောင်နေပါတယ်။

ကျွန်တော် ယေဟောဝါသက်သေဖြစ်မှပဲ အမှန်အမှားကို အရင်ကထက် ပိုပြီးသဘောပေါက်လာတယ်။ တရားသူကြီးတစ်ယောက်အနေနဲ့ တရားရေးကိစ္စတွေကို ကိုင်တွယ်တဲ့အခါ ကိစ္စရပ်တွေကို ဘုရားသခင် ကိုင်တွယ်တဲ့နည်းအတိုင်း လုပ်ဆောင်ဖို့၊ အခြေအနေအရပ်ရပ်ကို ထည့်သွင်းစဉ်းစားဖို့၊ ကျိုးကြောင်းဆင်ခြင်ဖို့ ကြိုးစားတယ်။  သက်ညှာလို့ရတဲ့အခြေအနေမှာဆိုရင် ကရုဏာပြပြီး သက်ညှာပေးလိုက်တယ်။

အကြမ်းဖက်မှု၊ ရာဇဝတ်မှု၊ ကလေး မတော်မတရားပြုမှုအပြင် တခြားပြစ်မှုကြီးတွေကိုပါ ကျွန်တော် ကိုင်တွယ်ရတယ်။ အဲဒီလိုကိစ္စတွေကို နေ့တိုင်းလိုလိုကိုင်တွယ်နေရပေမဲ့လည်း သာမန်ကိစ္စတွေလို သဘောမထားဘူး။ သတင်းတွေကို ကြည့်တဲ့အခါ ဒီကမ္ဘာမှာ ပျံ့နှံ့နေတဲ့ အကျင့်ပျက်မှုတွေနဲ့ ယုတ်မာမှုတွေကို ကျွန်တော် ရွံမုန်းတယ်။ ရာဇဝတ်မှုတွေ တိုးများလာတဲ့အကြောင်းရင်းကို သိရှိခွင့်ရတဲ့အပြင် အနာဂတ်မျှော်လင့်ချက်ပါ ရရှိတဲ့အတွက် ယေဟောဝါဘုရားသခင်ကို အရမ်းကျေးဇူးတင်တယ်။

“အကျဉ်းထောင်က ကျွန်တော့်ကို လူကောင်း ဖြစ်အောင် မလုပ်ပေးနိုင်ဘူး။”—ကိသ် ဝုစ်

မွေးဖွားတဲ့နှစ်– ၁၉၆၁

နေရင်းနိုင်ငံ– မြောက်ပိုင်းအိုင်ယာလန်

နောက်ခံ– အကြမ်းဖက်သမား

အတိတ်– ၁၉၆၁ ခုနှစ်၊ မြောက်ပိုင်းအိုင်ယာလန်က လူစည်ကားတဲ့ ပို့တဒေါင်မြို့မှာ ကျွန်တော့်ကို မွေးဖွားတယ်။ ကျွန်တော့်ရဲ့ ဘာသာရေးနောက်ခံက ပရိုတက်စတင့်ပါ။ ကက်သလစ်နဲ့ ပရိုတက်စတင့် ရောနှောနေထိုင်တဲ့ စုပေါင်းအိမ်ရာမှာ ကျွန်တော် ကြီးပြင်းလာတယ်။ အဲဒီမှာနေတဲ့ မိသားစုအများစုက ဆင်းရဲကြတယ်။ သူတို့က ငွေကြေးမချမ်းသာပေမဲ့ တစ်ယောက်နဲ့တစ်ယောက် ရင်းရင်းနှီးနှီးနဲ့ သင့်မြတ်စွာ နေထိုင်ကြပါတယ်။

ကျွန်တော့်ဘဝပုံစံက အထင်ကြီးစရာမရှိဘူး။ ၁၉၇၄ ခုနှစ်ရောက်တော့ မြောက်ပိုင်းအိုင်ယာလန်က ဆူပူအုံကြွမှုမှာ ကျွန်တော် ပါဝင်ခဲ့တယ်။ အဲဒီအချိန်လောက်မှာ ကျွန်တော်တို့ရပ်ကွက်ရဲ့ အခြေအနေက ဆိုးသည်ထက်ဆိုးရွားလာတယ်။ ဥပမာပြရရင် တစ်ညမှာ အာလ်စတာကော်ဇောစက်ရုံရဲ့ မန်နေဂျာဖြစ်တဲ့ ကျွန်တော့်အဖေက အိမ်နီးချင်း ကက်သလစ်လူငယ်နှစ်ယောက်ကို အလုပ်ရုံမှာ လေ့ကျင့်ပေးနေတယ်။ ဒီအချိန်မှာ အဲဒီလူငယ်တွေရဲ့အိမ်ထဲကို တစ်ယောက်ယောက်က ဗုံးပစ်သွင်းလိုက်တဲ့အတွက် သူတို့ရဲ့မိဘတွေနဲ့ ညီလေး သေဆုံးခဲ့ရတယ်။

တဖြည်းဖြည်းနဲ့ ပြဿနာတွေတက်လာပြီး နောက်ဆုံး စစ်ဖြစ်သွားတယ်။ ကက်သလစ်တွေနေတဲ့ နေရာကနေ ပရိုတက်စတင့်တွေ ထွက်သွားအောင် သူတို့အိမ်တွေကို မီးရှို့ကြတယ်။ ပရိုတက်စတင့်ရပ်ကွက်မှာနေတဲ့ ကက်သလစ်တွေကလည်း အမြဲနှောင့်ယှက်ခံရတယ်။ ကျွန်တော်တို့ရဲ့ စုပေါင်းအိမ်ရာက ပရိုတက်စတင့်တွေ အများစုနေထိုင်တဲ့ နေရာဖြစ်လာတယ်။ ဗုံးဖောက်ခွဲရေးမှာ ကျွန်တော် ပါဝင်ခဲ့တယ်။ သိပ်မကြာပါဘူး၊ ကျွန်တော် အဖမ်းခံရပြီး ထောင်သုံးနှစ်ကျသွားတယ်။

ထောင်ထဲမှာ ကျွန်တော် ရှိနေတုန်း နိုင်ငံရေးလှုပ်ရှားမှုမှာ နာမည်ကြီးတဲ့ အကျဉ်းသားတစ်ယောက်နဲ့ မိတ်ဆွေဖြစ်ခဲ့တယ်။ ကျွန်တော်တို့ဟာ ညီအစ်ကိုတွေလို ချစ်ကြတယ်။ နောက်ပိုင်းမှာ သူလက်ထပ်တော့ ကျွန်တော်က သတို့သားအရန်တောင် လုပ်ပေးခဲ့တယ်။ အကျဉ်းထောင်က ကျွန်တော့်ကို ဒါမှမဟုတ် သူ့ကို လူကောင်းဖြစ်အောင် မလုပ်ပေးနိုင်ပါဘူး။ ကျွန်တော်တို့ ထောင်ကနေ လွတ်လာတာနဲ့ နိုင်ငံရေးလှုပ်ရှားမှုမှာ ပြန်ပါဝင်ခဲ့တယ်။ ဒီတစ်ခါတော့ အရင်ကထက် ပိုပြီးကျယ်ကျယ်ပြန့်ပြန့် လှုပ်ရှားခဲ့ကြတယ်။ ဒီလိုနဲ့ ကျွန်တော့်မိတ်ဆွေ ပြန်အဖမ်းခံရပြီး ထောင်ချခံရတယ်။ အဲဒီမှာပဲ သူ အသတ်ခံလိုက်ရရှာတယ်။

ကျွန်တော်လည်း စောင့်ကြည့်ခံနေရတယ်။ တစ်ခါတုန်းက ကျွန်တော့်ကားကို ဗုံးဖောက်ခွဲခဲ့ကြတယ်။ အဲဒီအဖြစ်အပျက်တွေကြောင့် နိုင်ငံရေးလှုပ်ရှားမှုတွေမှာ အရင်ကထက် ပိုပြီးပါဝင်လာတယ်။

 အဲဒီအချိန်မှာပဲ ဆူပူအုံကြွမှုနဲ့ပတ်သက်တဲ့ မှတ်တမ်းပြုစုပြီး ဗြိတိန်ရုပ်မြင်သံကြားဌာနကနေ လွှင့်နိုင်ဖို့ ကျွန်တော် ကူညီပေးခဲ့တယ်။ အဲဒီမှတ်တမ်းကြောင့် ကျွန်တော် ပိုပြီးပြဿနာတက်ခဲ့ရတယ်။ ဥပမာပြောရရင်၊ တစ်ညမှာ ကျွန်တော် အိမ်ပြန်ရောက်တော့ ကျွန်တော့်ဇနီးကို မတွေ့တော့ဘူး။ ကျွန်တော့်ကို ထားသွားခဲ့ပြီ။ မကြာခင်မှာ ကလေးစောင့်ရှောက်ရေး အေဂျင်စီတစ်ခုကလည်း ကျွန်တော့်သားကို ခေါ်သွားခဲ့တယ်။ ဖြစ်ပျက်သမျှတွေ စိတ်ထဲပြန်ပေါ်လာတဲ့အခါ “ဘုရားသခင်ရှိရင် ကျွန်တော့်ကို ကူညီပါ” လို့ ပြောမိတယ်။

နောက်စနေနေ့မှာ ပေါလ်လို့ခေါ်တဲ့ ကျွန်တော့်မိတ်ဆွေနဲ့ ပြန်တွေ့တယ်။ သူက ယေဟောဝါသက်သေတစ်ယောက်ပါ။ ဒါနဲ့ သူက ကျွန်တော့်ကို ကျမ်းစာအကြောင်း စပြောပါတော့တယ်။ နောက်နှစ်ရက်အကြာမှာ ပေါလ်က ကျွန်တော့်အတွက် ကင်းမျှော်စင် တစ်စောင် ပို့ပေးလိုက်တယ်။ ဆောင်းပါးတစ်ပုဒ်မှာ ယေရှုရဲ့စကားကို ဒီလိုကိုးကားဖော်ပြထားတယ်– “ငါ၏နိုင်ငံသည် ဤလောကနှင့် မသက်ဆိုင်။ သက်ဆိုင်လျှင် ငါသည် ဂျူးလူမျိုးလက်သို့ မရောက်ရန် ငါ၏လူတို့ တိုက်လှန်ကြပေမည်။ ယခုမူကား ငါ၏နိုင်ငံသည် ဤလောကမှ မဟုတ်။” (ယောဟန် ၁၈:၃၆) ယေရှုရဲ့ဒီစကားတွေကြောင့် ကျွန်တော် အရမ်းစိတ်ထိမိသွားတယ်။ အဲဒီနေ့ကစပြီး ကျွန်တော့်ရဲ့ဘဝပုံစံ ပြောင်းလဲလာပါတော့တယ်။

သမ္မာကျမ်းစာက ကျွန်တော့်ဘဝပုံစံကို ပြောင်းလဲပေးခဲ့ပုံ- ပေါလ်က ကျွန်တော့်ကို ကျမ်းစာသင်ပေးခဲ့တယ်။ နောက်ပိုင်းမှာ သက်သေခံတစ်ယောက်ဖြစ်တဲ့ ဘီလ်က ကျမ်းစာဆက်သင်ပေးခဲ့တယ်။ ကျွန်တော်က အမေးအမြန်းထူလွန်းလို့ ကျွန်တော့်ကို သင်ပေးရတာ သိပ်ခက်မှာပဲ။ ဘီလ်သင်ပေးတာတွေ မှားတယ်ဆိုတာ ထောက်ပြဖို့ တခြားတရားဟောဆရာတွေကို ခေါ်လာပြီး ဆွေးနွေးခိုင်းတယ်။ ဒါပေမဲ့ သမ္မာကျမ်းစာက မှန်တယ်ဆိုတာ ကျွန်တော် သဘောပေါက်သွားတယ်။

ကျွန်တော်တို့ စုပေါင်းအိမ်ရာမှာ လမ်းတွေပိတ်ထားတယ်၊ ကားကို သိမ်း၊ မီးရှို့ပစ်လိမ့်မယ်လို့ အကြောင်းပြပြီး ဘီလ်ကို ကျမ်းစာလာမသင်ဖို့ ပြောတဲ့အချိန်ကို သတိရသေးတယ်။ ဒါပေမဲ့ ဘီလ်ကတော့ ခါတိုင်းလိုပဲ ကျမ်းစာလာသင်ပေးတယ်။ သူ့ရဲ့ကားကို အိမ်မှာထားခဲ့ပြီး စက်ဘီးနဲ့ရောက်လာတယ်။ သူ့စက်ဘီးကို ဘယ်သူက သိမ်းချင်မှာလဲ။ အိမ်မှာ ဘီလ်နဲ့ ကျွန်တော် ကျမ်းစာသင်နေတုန်း ရဲတွေနဲ့ စစ်သားတွေ ရောက်လာပြီး ကျွန်တော့်ကို ဖမ်းသွားတဲ့အချိန်မှာ ဘီလ်က ယေဟောဝါဘုရားသခင်ကို ယုံကြည်ကိုးစားပါလို့ အော်ပြောတယ်။ အဲဒါကို ကျွန်တော် ဘယ်တော့မှ မေ့မှာမဟုတ်ဘူး။

ယေဟောဝါသက်သေတွေရဲ့ ဝတ်ပြုရာစည်းဝေးကို ကျွန်တော် ပထမဦးဆုံး သွားတက်တဲ့အချိန်မှာ ကျွန်တော့်ကိုကြည့်ပြီး တချို့ လန့်သွားကြတယ်။ ကျွန်တော့်ဆံပင်က အရှည်ကြီး၊ နားကွင်းကလည်း တပ်ထားတဲ့အပြင် ရုပ်ပုံတွေပါတဲ့ သားရေဂျာကင်လည်း ဝတ်ထားတယ်။ ဒါပေမဲ့ သက်သေခံတွေ ကျွန်တော့်ကို ဖော်ဖော်ရွေရွေနဲ့ကြင်ကြင်နာနာဆက်ဆံတာကို တကယ်မယုံနိုင်ဘူး။ ကျွန်တော် စွဲမှတ်သွားတယ်။

ကျမ်းစာကို ကျွန်တော် လေ့လာနေပေမဲ့ တစ်ဖက်မှာ ကျွန်တော့်ရဲ့ မိတ်ဆွေဟောင်းတွေနဲ့ ပေါင်းနေတုန်းပဲ။ သမ္မာကျမ်းစာကနေ သိရှိလာတဲ့ အမှန်တရားတွေက ကျွန်တော့်နှလုံးထဲကို တဖြည်းဖြည်း စိမ့်ဝင်လာပါပြီ။ တကယ်လို့ ယေဟောဝါဘုရားသခင်ကို ကျွန်တော် ဝတ်ပြုချင်တယ်ဆိုရင် ကျွန်တော့်ရဲ့ နိုင်ငံရေးရှုမြင်ချက်တွေကို ပြောင်းလဲပြီး မိတ်ဆွေဟောင်းတွေကို အဆက်ဖြတ်ရမယ်ဆိုတာ သဘောပေါက်ခဲ့တယ်။ အဲဒီလိုလုပ်ရတာ မလွယ်ပါဘူး။ သမ္မာကျမ်းစာအကြောင်းတွေ သိလာပြီး ဘုရားသခင်နဲ့ ရင်းနှီးသည်ထက် ရင်းနှီးလာတဲ့အခါမှာတော့ ပြုပြင်ပြောင်းလဲရတာ မခက်တော့ပါဘူး။ ဆံပင်ကိုညှပ်၊ နားကွင်းကို ဖြုတ်ပစ်လိုက်တယ်။ နောက်တော့ လူကြီးလူကောင်းဆန်တဲ့ ဝတ်စုံတစ်စုံကို ဝယ်ဝတ်ခဲ့တယ်။ ဒါ့အပြင် ကျမ်းစာကနေ သိရှိခဲ့ရာတွေကြောင့် တခြားသူတွေအပေါ်မှာထားရှိတဲ့ ကျွန်တော့်ရဲ့စိတ်သဘောထားတွေလည်း ပြောင်းလဲသွားပါပြီ။

အကျိုးကျေးဇူးရရှိခဲ့ပုံ- ကျွန်တော်ဟာ ရာဇဝတ်မှုတွေ ပြုလုပ်ပြီး အကြမ်းဖက်သမား ဘဝပုံစံနဲ့ အသက်ရှင်ခဲ့တာပါ။ ရပ်ကွက်ထဲက ဥပဒေစိုးမိုးရေးအဖွဲ့ဟာ ကျွန်တော့်ကို ကောင်းကောင်း မှတ်မိနေတယ်။ အခုဆိုရင် အစစအရာရာ ပြောင်းလဲသွားပါပြီ။ ဥပမာပြောရရင် နာဗာန်မြို့မှာ ကျင်းပတဲ့ ယေဟောဝါသက်သေတွေရဲ့ စည်းဝေးကြီးကို ကျွန်တော် ဦးဆုံးတက်ရောက်ခဲ့တုန်းက အာဏာပိုင်တွေဟာ ကျွန်တော်သွားမယ့် လမ်းခရီးတစ်လျှောက်မှာ အစောင့်တွေချထားတယ်။ အခုဆိုရင်တော့ ကျွန်တော် စည်းဝေးကြီးသွားရင် အစောင့်အကြပ်တွေ မထားတော့ဘူး။ ဒါ့အပြင် ပေါလ်၊ ဘီလ်၊ အသင်းတော်က ညီအစ်ကိုညီအစ်မတွေနဲ့ ဟောပြောခြင်းလုပ်ငန်းမှာ လွတ်လွတ်လပ်လပ် ပါဝင်လာနိုင်ပြီ။

ကျွန်တော့်ရဲ့ဘဝပုံစံကို အရင်ကထက် ကောင်းအောင် ပြောင်းလဲလိုက်တဲ့အတွက် ယေဟောဝါသက်သေ တစ်ယောက်ဖြစ်လာပါပြီ။ လာဝီစ်ဆိုတဲ့ သက်သေခံညီအစ်မတစ်ယောက်နဲ့ ကျွန်တော် လက်ထပ်လိုက်တယ်။ ဒါ့အပြင် ကျွန်တော့်သားနဲ့လည်း ပြန်လည်ပေါင်းစည်းရပါပြီ။

ကျွန်တော့်ရဲ့ဘဝကို ပြန်စဉ်းစားလိုက်တိုင်း တခြားသူတွေကို နာကျင်အောင်၊ ဒုက္ခရောက်အောင် ပြုလုပ်မိတဲ့အတွက် ကျွန်တော် စိတ်မကောင်းဖြစ်ခဲ့ရတယ်။ ဒါပေမဲ့ ရည်ရွယ်ချက်တစ်ခု၊ မျှော်လင့်ချက်တစ်ခုအတွက် လွဲမှားစွာလုပ်ဆောင်ခဲ့တဲ့ ကျွန်တော့်လို လူစားမျိုးတွေကို သမ္မာကျမ်းစာက ပြောင်းလဲပေးနိုင်တယ်ဆိုတာ အခိုင်အမာယုံကြည်တယ်။

[အောက်ခြေမှတ်ချက်]

[စာမျက်နှာ ၁၂ ပါ အကျဉ်းဖော်ပြချက်]

ကျွန်တော် ကျမ်းစာဖတ်တာကို အမေ သိသွားတဲ့အခါ အရမ်းဝမ်းနည်းခဲ့