Nitgħallmu mill-għasafar
“Staqsi, jekk jogħġbok, . . . lill-ħlejjaq bil-ġwienaħ tas-smewwiet, u jgħidulek. Min fost dawn kollha ma jafx tajjeb li id Ġeħova għamlitu dan?”—Ġob 12:7, 9.
IKTAR minn 3,000 sena ilu, il-patrijarka tal-qedem Ġob irrealizza li l-għasafar tas-sema jistgħu jgħallmuna ħafna dwar ix-xogħol t’Alla. Imma l-karatteristiki partikulari tagħhom jagħmluhom ukoll suġġetti ideali biex jintużaw fit-tixbihat u l-metafori. Fil-Bibbja, ħafna mir-referenzi għall-għasafar tas-sema jgħallmuna lezzjonijiet importanti dwar il-ħajja u r-relazzjoni tagħna m’Alla. Ejja naraw ftit eżempji.
FEJN JAGĦMEL IL-BEJTA L-ĦUTTAF
Dawk li kienu joqogħdu Ġerusalemm kienu familjari mal-ħuttaf, li normalment jagħmlu l-bejtiet tagħhom taħt ix-xifer tal-bjut tal-bini. Xi ftit minnhom kienu jagħmlu l-bejta fit-tempju taʼ Salamun. X’aktarx li l-ħuttaf li kull sena kien jagħmel il-bejta fit-tempju kien isibu bħala post taʼ sigurtà fejn setaʼ jrabbi ċ-ċkejknin tiegħu bla tfixkil.
Il-kompożitur taʼ Salm 84—wieħed minn ulied Koraħ, li kien jaqdi fit-tempju ġimgħa kull sitt xhur—innota dawn il-bejtiet fit-tempju. Hu xtaq ikun bħall-ħuttaf li kellu dar permanenti fid-dar taʼ Ġeħova. Hu qal: “Kemm hu sabiħ it-tabernaklu grandjuż tiegħek, O Ġeħova taʼ l-armati! Ruħi xxennqet u nfniet għall-btieħi taʼ Ġeħova . . . Anki l-għasfur sab dar, u l-ħuttafa sabet bejta għaliha, fejn poġġiet iż-żgħar tagħha—l-artal grandjuż tiegħek, O Ġeħova taʼ l-armati, Sultan tiegħi u Alla tiegħi!” (Salm 84:1-3) Qegħdin aħna, flimkien maċ-ċkejknin tagħna, nuru li għandna xewqa u apprezzament simili biex inkunu b’mod regulari fejn jiltaqaʼ l-poplu t’Alla?—Salm 26:8, 12.
IĊ-ĊIKONJA TAF META JKUN ŻMIENHA
“Iċ-ċikonja fis-smewwiet taf meta jkun żmienha,” kiteb il-profeta Ġeremija. Hu żgur li kien konxju taċ-ċikonji li jpassu minn fuq l-Art Imwiegħda. Fir-rebbiegħa, jingħad li jpassu iktar minn 300,000 ċikonja bajda mill-Afrika għall-pajjiżi fl-Ewropa. Huma u jpassu jgħaddu minn fuq il-Wied tal-Ġordan. L-arloġġ bijoloġiku tagħhom iġegħelhom imorru lura għall-post fejn ibejtu fis-sajf. Bħall-għasafar l-oħra li jpassu, huma jafu ż-żmien meta għandhom imorru lura.—Ġeremija 8:7.
“Il-meravilja vera tal-għasafar tal-passa hi l-istint tagħhom,” jgħid Collins Atlas of Bird Migration. Filwaqt li Alla Ġeħova ta lill-għasafar tal-passa l-istint, lill-bniedem tah l-abbiltà li jagħraf iż-żminijiet u l-istaġuni. (Luqa 12:54-56) B’differenza għall-istint taċ-ċikonja, l-għarfien dwar Alla hu s-sigriet biex il-bniedem jagħraf is-sinifikat tal-ġrajjiet li qed ngħixu fihom. L-Iżraelin taʼ żmien Ġeremija għalqu għajnejhom għal sinjali bħal dawn. Alla spjega l-problema li kien hemm billi qal: “Huma ċaħdu kelmet Ġeħova, u issa x’għerf għandhom?”—Ġeremija 8:9.
Illum għandna bosta evidenza li turi li qed ngħixu f’dawk li l-Bibbja ssejħilhom “l-aħħar jiem.” (2 Timotju 3:1-5) Se timita int liċ-ċikonja u tinduna biż-żmien?
L-AJKLA TARA FIL-BOGĦOD
L-ajkla tissemma kemm-il darba fil-Bibbja, u hu komuni li tara dan it-tajr fl-Art Imwiegħda. Mill-bejta tagħha li tkun fl-għoli fl-irdum, l-ajkla “tfittex l-ikel; fil-bogħod jibqgħu jħarsu għajnejha.” (Ġob 39:27-29) Tant hi tajba l-vista tagħha li jingħad li l-ajkla tistaʼ tara fenek li jkun kilometru ’l bogħod!
Bħalma l-ajkla tistaʼ tara fil-bogħod, Ġeħova jistaʼ jara x’se jiġri fil-futur. Infatti, Alla Ġeħova ddikjara: “Mill-bidu ngħid it-tmiem, u minn żmien twil ilu l-affarijiet li ma sarux.” (Isaija 46:10) Billi nagħtu kas il-pariri taʼ Ġeħova, aħna nistgħu nibbenefikaw mill-għerf u l-abbiltà li jaf x’se jiġri fil-futur. Dawn ma jistgħu jitqabblu maʼ xejn.—Isaija 48:17, 18.
Ukoll, il-Bibbja tqabbel lil dawk li jafdaw f’Alla mal-ajkli: “Dawk li jittamaw f’Ġeħova se jiksbu l-qawwa mill-ġdid. Se jogħlew bil-ġwienaħ bħall-ajkli.” (Isaija 40:31) Ajkla togħla ’l fuq billi tuża termali, li huma kolonni li fihom kurrent tielaʼ t’arja sħuna. Meta l-ajkla ssib wieħed minn dawn it-termali, hi tiftaħ ġwinħajha u tibda ddur ġol-kolonna tal-arja, u b’hekk dejjem togħla iktar u iktar ’il fuq. L-ajkla ma tiddependix fuq is-saħħa tagħha stess biex togħla ’l fuq u biex ittir distanzi twal mingħajr tbatija. Bl-istess mod, dawk li jafdaw f’Ġeħova jistgħu jfittxu lilu bħala l-wieħed li jwiegħed li jagħtihom “il-qawwa iktar min-normal.”—2 Korintin 4:7, 8.
“KIF QROQQA TIĠBOR IL-FLIELES”
Ftit jiem qabel mewtu, Ġesù waqaf u ħares lejn il-belt kapitali Lhudija. Hu qal: “Ġerusalemm, Ġerusalemm, il-qattiela tal-profeti u l-ħaġġara taʼ dawk li ntbagħtulha! Kemm-il darba ridt niġbor lil uliedek flimkien, kif qroqqa tiġbor il-flieles tagħha taħt ġwinħajha! Imma intom dan ma ridtuhx.”—Mattew 23:37.
Istint qawwi li jispikka fost l-għasafar hu x-xewqa li jkollhom biex jipproteġu liċ-ċkejknin tagħhom. It-tjur li jbejtu mal-art, bħat-tiġieġ, iridu joqogħdu b’sebaʼ għajnejn għall-periklu. Jekk it-tiġieġa tinduna li hemm seqer idur fl-ajru, hi tibda tqaqi b’ħoss għoli bħala twissija u l-flieles minnufih imorru jiġru taħt ġwinħajha għas-sigurtà. Hemmhekk il-flieles żgħar jistgħu wkoll isibu kenn mis-sħana taħraq tax-xemx u minn xita qalila. Bl-istess mod, Ġesù ried jagħti lill-abitanti taʼ Ġerusalemm kenn u protezzjoni spiritwali. Illum, Ġesù jistidinna mmorru għandu biex insibu serħan u protezzjoni mid-diffikultajiet u l-ansjetajiet tal-ħajja taʼ kuljum.—Mattew 11:28, 29.
Hu minnu li hemm ħafna x’nitgħallmu minn dawn il-ħlejjaq bil-ġwienaħ. Hekk kif tosservahom, ipprova ftakar fil-metafori li titkellem dwarhom il-Bibbja. Jalla l-ħuttaf jgħinek tapprezza d-dar taʼ qima taʼ Ġeħova. Jalla titlob lil Alla biex jagħtik il-qawwa li tippermettilek tittajjar fl-għoli bħall-ajkla. Jalla tmur għand Ġesù għall-verità spiritwali li tipproteġik bħalma qroqqa tipproteġi l-flieles tagħha. U jalla ċ-ċikonja tfakkrek biex tibqaʼ attent għas-sinifikat tal-ġrajjiet tad-dinja li jimmarkaw żmienna.