Ohiya baahi wilibihedha withwelavo epaddi yomuzimuni, nnohowela odidela okala makiristawu owithwelavo epaddi yomuzimuni. Eyo enatapulela wi nnohowela ohuthabwaga wiroromela. (1 Kor. 10:12) Ohiya eyo, nnohowela ‘odidela wipendda’ wihina nikanne ebaribari akala ninna wunnuwelavo epaddi yomuzimuni. Karta murumiwi Pawulo aalebenliye akudda Kolosense ahiwoga wodhela muselu ola wodhowagave yithwelagavo epaddi yomuzimuni. Addibila ooKoloso yaali makiristawu owithwelavo epaddi yomuzimuni. Naarive dhigali ndo, murumiwi Pawulo ahawaddela wodhela yowopiha elivo yowubuwela ninga athu a mwilaboni. (Kol. 2:6-10) Teto Epafra, aanonne pamadhene addibila ale, owalobelela malabo aamateene wihina ‘ekale owakwanela,’ obe owithwelavo. (Kol. 4:12) Nnahudheravo ddi ni ethu erilena Pawulo vamodha ni Epafra? Murumiwi Pawulo ni Epafra yahinona wihina egi mukiristawu akaleve owithwelavo epaddi yomuzimuni enohoweleya wilibihedha vanlubale ni okaviheriwa ni Mulugu. Aliwa yafuna wihina addibila ooKoloso ekaleve makiristawu owithwelavo epaddi yomuzimuni, naarive efwanyiwaga makathamiho bi makathamiho mwigumi mwewa. Namasugwera 04/24 epaddi 6-7 ddima 16-17

Nasayelaga omoova Yehova mwamakalelo apama, nnerege omudhivela ofiyedha ohifunaga werana ethu-siithu yaamukuule. Bumwahaya iyo nnofuna vanlubale onona ohiyaniha ethu yapama ni yabure, muselu webaribari ni wowoota wihina nirumedhiwe ni Yehova. (Pro. 2:3-6; Ebe. 5:14) Nathabwaga wawoova athu ompitha Yehova, iyo podi wambela osukuma ebaribari. Kasugwa yopadduwa ya amwaana Ezarayeli owakwana 12 yadhowile weddelela elabo yooKana. Anameddelela 10 yahenya wihina wawoova athu okale munlubale opitha odhivela yanniwana ni Yehova. Aliwa wawaddela amwaana Ezarayeli aatene yegi: ‘Kanidhowe owana naaliwa, mwaha aliwa bakopolo onipitha iyo.’ (Núm. 13:27-31) Ebaribari wi ni moonelo waathu, akananewu yaali akopolo. Mbwenye nuwoga wi kanidhowe owana naaliwa, mwaha kannande wagonjhiha, yowoniha wihina kiyamuroromela Yehova. Namasugwera 07/24 epaddi 9 ddima 5-6

Iyo podi okanna ebaribari wi makalelo a Yehova watoriha athu bapama. Abarawu ahonelamo wi Yehova, Mulugu ologomana, athotho, athagaraga ni ‘Namatoriha eelabo yatene.’ Teto Yehova ohumuxagiha mwanaye Yesu ni ohunvaha mutholo wowatoriha athu. (Juwa. 5:22) Mwaha wa yeyo, Yehova ni mwanaye Yesu ehinona ethu kadda muthu ali mwilaboni yavati anubuweliye ni makathamiho enanfwanya. (Mat. 9:4) Bumwahaya yamutorihaga kadda muthu, aliwa enamutorihe “nuwogowa!” Kuwanganyedhege wi Yehova anere werana dhothoma dhapama. Woona wi iyo nili athu ohulogomana kannanda waatoriha athu amodha mwamakalelo owogowa, mbwenye Yehova anowanda werana eyo! (Isa. 55:8, 9) Bumwahaya nnafuna nihiye dhaatedhene mmadani mwa Yehova ni mwa mwanaye Yesu Kiristu, ali mwene anatajhiha pamadhene thagaraga ni wogowa wa Ababe.— Isa. 11:3, 4. Namasugwera 05/24 epaddi 7 ddima 18-19

Iyo podi ohudhera wodhela thima yokala muthu oororomeleya wodhela opendda ele Yesu awogiliye numoona Nataniyeli nlabo noobajha. Naarive ahimunonne Nataniyeli, Yesu ahiwoga egi: “Kamusugweni, Mwizarayelita ebaribari, ahinoota anna ofiya.” (Juwa. 1:47) Yesu ahoona wi Nataniyeli aali oothabwa ororomeleya. Teto ndala ninga iyo, Nataniyeli aali ohilogomana, mbwenye oliye kaali muthu oogwalamgwambi. Nataniyeli aali oororomeleya mwadhatedhene, teto Yesu ahitikina ni ekalelo yaye, bumwahaya adhe amuthethelege. Dhithu dhowinjhiva nnahowelihu werana dhinafwanyeya va Salmo 15 dhinawoga wodhela makalelo nnaweddihihu athu amodha. Va Salmo 15:3 vinawoga wi muleddo anaka muddammwani mwa Yehova ‘kanalabihedha nlumi naaye wi oote, kanamwerela obure mwanddamanaye, ni kanaanyemula akwaye.’ Iyo nawaba obe nawinkedha athu amodha, eyo podi wapiha mbani.— Tiya. 1:26. Namasugwera 06/24 epaddi 10 ddima 7, 9; epaddi 11 ddima 10

Wiwegeredha pama wahinathi odhowa mmalaleyelo, enere okala yokweya othapanya ni athu amodha. Yesu ahawegeredha anamahara aye ahinathi waruma wi yalaleye. (Luk. 10:1-11) Teto aliwa yahiparihedha mabasa dhithu dhaatedhene Yesu ahudhihiliye, bumwahaya aliwa yahihagalala vanlubale mwaha wa dhithu dhaatedhene yandiliwa werana. Nniwegeredhe aavi nihinathi odhowa mmalaleyelo? Nnohowela wubuwela dhithu nnafunihu owoga, wihina nande owoga ni murima wehu waatene, mudhidhi nathapanyaga ni mwanamurala. Teto sapama wubuwela dhithu biili obe tharu anamurala a murudda wawo enawogiwa wihina yugwadde wawogaga, wamala wegeredhe makalelo owawakula aliwa eyo yapadduwa. Vano nafiya wi nthapanye ni mwanamuralaya, iyo podi okala oopwaseyene, woniha emwerumweru ni okala owandaneyana. Namasugwera 04/24 epaddi 16 ddima 6-7

Ethu enlubale enanthukulela olaleya muthenga dhapama fudhivela ninnihuna ni Yehova vamodha ni ndina naaye noweela. Teto mabasa oolaleya, makalelo apama oomuthithimiha Mulugu ehu nnamudhivelihu, Yehova. Iyo nnorumedha ni murima wehu waatene madhu enasorihiwa ni dhopaddusa dhakopolo dhinafwanyeya odhulu dhinanvuwiha Yehova yegi: Yehova, Mulugu ehu, nyu difwanelele wakela nthithimiho, orihiwa ni kopolo wa aatene yale eli oororomeleya wa nyu. Iyo nnomuthithimiha ni nnomuriha Yehova nawaddelaga athu ebaribari enooniha wi oliye ‘ohupaddusa dhego dhatedhene’ ni wihina iyo niliwo mwaha Oliye onipaddusa. Teto iyo nnonvaha Yehova kopolo dhehu wodhela olabihedha mudhidhi wehu, dhokanna dhehu, vamodha ni kopolo dhehu dhaatedhene wihina naapare mabasa oolaleya mowiwanana ni ele nnandihu. (Mat. 6:33; Luk. 13:24; Kol. 3:23) Mogwaddela ethu enanithukulela waalaleya athu, fudhivela ninnihuna ni Yehova, teto mwaha nnafuna nawaddele athu ndina na Yehova ni dhikalelo dhaye. Namasugwera 05/24 epaddi 17 ddima 11

Yehova anowareeliha ale enamuroromela ni murima wewa waatene. Yehova anonivaha murenddele ni osogolo anere onivaha egumi yohimala. Iyo nnomuroromela Yehova ni murima wehu waatene, mwaha nihikanna ebaribari wi Yehova anere onireeliha, teto oliye ohukanna efunelo ni kopolo yowerana eyo. Ebaribari ela ninnihuna yowi Yehova anere onreeliha, enonikavihera vanlubale odhowagave nimulabelaga Oliye, ndala ninga adhaari a Yehova akale yeriliwana. Teto siyeyo erilena Timotiyu. (Ebe. 6:10-12) Timotiyu oomuroromela Mulugu ookalawo. (1 Tim. 4:10) Bumwahaya oliye ahiilibihedha wihina amulabele Yehova ni aakavihere addibila. Ni makalelo baani oliye eriliyena eyo? Murumiwi Pawulo ahimukongomedha wihina oliye akale namahudhiha apama mmulogoni ni mmabasani oolaleya. Teto Pawulo ahimwaddela Timotiyu wi akale yotajhiha yapama wa addibila yaali azombwe ni owunnuwelavo. Ohiya eyo, Timotiyu ahakela mutholo dhorusa, dhavolowelavo walaga addibila yahoweleyaga, mbwenye nuudhivela. (1 Tim. 4:11-16; 2 Tim. 4:1-5) Timotiyu ahinona wi Yehova owawoona mabasa aatene aapariye ni eere omureeliha. — Rom. 2:6, 7. Namasugwera 06/24 epaddi 22-23 ddima 10-11

Kabeni noone makalelo Yehova alabihedhiye anamavuhulela wihina yawaddele amwaana Ezarayeli, ethu yapadduwele mwaha wa dhithu dhabure yeriwana ni makalelo aakaviheriye othwaruwa ni wawerana masadduwo. Motajhiha, Yehova omuruma Jeremiya wi awoge ni nlogo eraga: ‘Gihogoloweleni avuruvuru nyu . . . Kaginusugweni ngaali oonyanyuweene mwaha gili oororomeleya . . . Kaginukoyeleni ntxiga. Mbwenye murumedhe yothega yenyu, mwaha kammwiwelele Yehova, Mulugu enyu.’ (Jer. 3:12, 13) Amulabihedhaga Joweli Yehova weera: ‘Muhogolowele wa miyo ni murima weenyu waatene.’ (Joel 2:12, 13) Teto Yehova ahimulabihedha Izayiya wihina awaddele eraga: ‘Mwiisuwe, mwiifufuthe, nvenyihevo vamentoni vaaga obure waatene munerinyuna; muhiye werana dhithu dhabure.’ (Isa. 1:16-19) Vano Yehova omulabihedha Ezekiyeli wihina akohe nlogo egihina: ‘Nerege miyo ginohagalala nuukwa wa muthu abure? . . . Miyo kaginafuna wihina muthu abure ahiye dila yaye wi akalegewove? Miyo kaginahagalala nuukwa wa muthu, . . . bumwahaya, muthwaruwe wihina mukalegewove.’ (Eze. 18:23, 32) Yehova onohagalala amoona muthu agaathwarunwe, mwaha anafuna wihina aakele egumi yohimala! Namasugwera 08/24 epaddi 9 ddima 5-6

Adhaari aatene a Yehova enowakela yoojha yomuzimuni, dhoholela ni obareliwa enahoweliwa. Ethu emodha enoniha wi Yehova namakela aleddo ahinna nsakulo, sowihina Oliye anoweriha wi Bibiliya atapuleliwe ni dhiwogelo dhowinjhiva. Omambelelowene Bibiliya aalebiwe ni dhiwogelo tharu: Ebarayiko, Aramayiku ni eGerego. Nerege ela enatapulela wi athu enanda omwileri Bibiliya ni dhiwogelo ndha tharu, ehikanna wandana woliba ni Yehova waapitha ale ehinanda owoga dhiwogelo ndha? Naari! (Mat. 11:25) Wihina nikanne wandana woliba ni Yehova, kinahoweleya okanna ohudhera wavadhulu obe onona owoga pama dhiwogelo dhilabihedhiwe mudhidhi alebiwaga Bibiliya ninga Ebarayiku, Aramayiko ni eGerego. Yehova anofuna wandana ni wavaha enonelo athu aatene, naarive akala athuya bothabwa ohudhera obe naari. Bibiliya ohutapuleliwa ni dhiwogelo dhowinjhiva wihina aakavihere athu wapela elabo yaatene omwiwelela Yehova ni okanna wandana woliba nuliye. — 2 Tim. 3:16, 17. Namasugwera 06/24 epaddi 6-7 ddima 13-15

Mwaha ogujhuliwa wa Jeruzale awogile Yesu wanna waddamela. Bumwahaya makiristawu ale yohowela olabihedha mudhidhi yanniwana wihina yiwegeredhe wodhela osayela okanna dhikalelo dhapama ninga nroromelo ni ovilela. (Ebe. 10:25; 12:1, 2) Mohulegela nnere ofwanyiwa mahoso manlubale wakwaranya ale yaafwannye makiristawu yaali mEberewu. (Mat. 24:21; Ovuhu. 16:14, 16) Bumwahaya nnere woona dholaga Yehova aavahiliye makiristawu ale, dhinanikavihere nihiyoya. Murumiwi Pawulo alebenliye mEberewu ahakongomedha addibila wahudhera pamadhene madhu a Mulugu. (Ebe. 5:14–6:1) Murumiwi Pawulo olabihedha dholebela dha Ebarayiku ni owoga mwahaya bwaddi makalelo owebedha a makiristawu yaaliwa athima opitha makalelo maJudewu yamwebedhiwa Yehova kale. Pawulo ahinona wihina makiristawu ale yahere ehudhera ni yonelamo pamadhene ebaribari, kiyalekethiwege ni dhohudhiha dhowoota. Namasugwera 09/24 epaddi 8-9 ddima 2-3; epaddi 10 ddima 6

Anamahara a Yesu yohowela vanlubale olibihiwa. Mwaha waddi? Mwaha wihina amodha yahihiya nyumba dhewa, emudhiwa ni malondda ewa wihina emuhare Yesu. (Mat. 19:27) Amodha yoweddihiwa nuubure mwaha othoma okala anamahara a Yesu. (Juwa. 9:22) Anamahara ala, yaherana dhithu dhatedhene ndha mwaha wihina yorumedha wi Yesu aali Mesiya. (Mat. 16:16) Mbwenye Yesu nupiwa, aliwa oyelela ejhehedhelo yewa ni kiyanna yowera. Yesu ahinona pamadhene wihina wukuuwa wule, kiyatapulela wi aliwa kayali makiristawu owithwelavo epaddi yomuzimuni. Mbwenye oliye ahonelamo wihina aliwa yaali owukuwene mwaha omuyelela muthu yamudhiveliwa muukwani. Bumwahaya oliye abajhe walibiha anamahara aye, nlabo nenne avenyihiwiye muukwani. Motajhiha, Yesu ahimuthwanyuwela Mariya Madalena, mudhidhi agaali mahame akoyiwiye. (Juwa. 20:11, 16) Teto oliye ahathwanyuwela anamahara abiili esorihiwe omambelelo wa ohudhera wula ni ahimuthwanyuwela murumiwi Peduru. Namasugwera 10/24 epaddi 13 ddima 5-6

Omukavihere mwanawo onona owoga ethu enamuthukulela orumedha wi ohukalawo mpaddusi. Yere okala yapama ohudhera ni mwanawo artigu a seriye enna musolo “Os Jovens Perguntam— Criação ou evolução?” enafwanyeya mu jw.org. Ndo mwanawo podi osakula pontu ananoniye wihina anere wanda wakavihera amodha wonelamo wi ohukalawo mpaddusi. Wamala we podi omukavihera wi anone makalelo owakihedha muselu oyo akohiwaga naathu amodha. Akala ohukalawo muthu anafuna onona wodhela muselu oyo, omukavihere mwanawo onona othapanya mwamakalelo owoneleyamo, oopwaaseya. Motajhiha, mukwaye ooskola podi owoga eegi: “Miyo ginarumedha baahi ele ginonimi ni mento aaga, miyo kaginamonege Mulugu.” Vano mwanawo podi omwakula muthuya eegi: “Kubuwela weddaga mukokolani, teto kaamo muthu. Nuwindo we woona ntxela nisasanyiwe ni boloku. Vano ethu baani wafuniwe wubuwele? Mohanganyedha we were wubuwela wi akala asasanye. Akala ethu yokweya ninga ntxela yere osasanyiwa, ki owoga wodhela elabo ela!” Namasugwera 12/24 epaddi 18 ddima 16

Aatene iyo nnohowela nikavihero naathu amodha, nafuna werana dhothoma dhathima mwigumini mwehu. Teto anamaholela mulogo ni addibila owithwelavo epaddi yomuzimuni podi onikavihera nafunaga werana dhothoma dhathima. Naarive aliwa egaali owunnuwelavo onipitha iyo, kanubuwele wihina dholaga dhewa sakale ni kadhinalabela dhithu. Yehova anafuna wihina iyo nihudherege ni addibila owunnuwelavo, mwaha wihina aliwa ehinona dhithu dhowinjhiva onipitha iyo. Kale Yehova ahaalabihedha alobwana oororomeleya yaali owunnuwelavo wihina elibihe nlogo naye ni eholelege. Motajhiha, Yehova ahimulabihedha Moyizeji, Davidi ni murumiwi Juwawu wihina eholelege nlogo naye. Alobwana ala kayakalawo mudhidhi mmodhave teto egumi yewa yahihiyana vanlubale. Ehalaga neena nuukwa, aliwa yahaavaha dholaga ale yaali azombwe, ohiya eyo, kadda muthu wa aliwa ahiwoga mwahaya bwaddi sathima omwiwelela Mulugu. Aatene iyo naarive akala nili azombwe obe anakalaba podi ohudhera dhithu dhowinjhiva ni madhu yasorihile alobwana ala. — Rom. 15:4; 2 Tim. 3:16. Namasugwera 11/24 epaddi 8 ddima 1-2

Malabo a Nowe, Yehova ahivaha nlamulo nawoga wihina muthu di muthu anaajhe nikame. (Gén. 9:3, 4) Nuuvira mudhidhi, Yehova wavaha nlamulo nimodhave amwaana Ezarayeli nawoga wodhela ohijha nikame. Teto nlamulona nawoga wi muthu aajhe nikame na ethu-sithu ‘ohowela opiwa.’ (Lev. 7:27, nota) Ohiya eyo, Yesu owiwelela nlamulo nna ni ahahudhiha maJudewu wi yiwelelege nlamulo nna. (Mat. 5:17-19) Bumwahaya, Yesu kaawoga wihina maJudewu ale yohowela otakuna mwiili waye ni eng’we nikame naye nomaningoni. Ni madhu ookweya Yesu awoga mwamakalelo oladdaniha ninga awogiliye malabo amundduli ni muhiyana dhaala ooSamariya. Nlabo nenne Yesu ahiwoga ni muhiyana ole eegi: “Manjhe ayo ginaanvahimi enovaha egumi yohimala.” (Juwa. 4:7, 14) Yesu nuwasoriha madhu ala, kaafuna awoge wihina muhiyana ole eere wakela egumi yohimala mwaha wag’wa manjhe bi manjhe. Ni makalelo mamodhave, madhu a Yesu kiyatapulela wihina maJudewu yeegi yakele egumi yohimala yohowela otakuna mwiili waye ni ong’wa nikame naye nomaningoni. Namasugwera 12/24 epaddi 9 ddima 4-6

Mukiristawu atenle anohowela okala pasope wihina ahikanne mubuwelo wabure wodhela ahiyana. Mwaha wa ddi? Mwaha malabo owinjhiva iyo nnerana ndhe nnubuwelihu. Teto murumiwi Pawulo ahakongomedha makiristawu oothikitheliwa wihina “ehiye wuubiwa ni elabo ela.” (Rom. 12:1, 2) Murumiwi Pawulo nuwalebela karta makiristawu oRoma, mudhidhi yoole wahikala mulogo. Naarive dhigaali ndo, madhu a murumiwi Pawulo enowoniha wihina addibila amodha yanna ovoloweliwa ni dhilemelelo ni makalelo owubuwela a elabo. Bumwahaya murumiwi Pawulo adhe aalagege wihina esaddule makalelo ewa owubuwela ni dhikalelo dhewa. Teto peeno, yolaga ela enowapwatha makiristawu aatene etenle. Mbwenye yowukulihaya sowihina, makiristawu amodha etenle enna ovoloweliwa ni mubuwelo wa elabo ela. Vano eyo, enowathukulela alobwana etenle waweddiha amwaariwa mwamakalelo abure. Namasugwera 01/25 epaddi 9 ddima 4

Anamaholela mulogo a malabo yaala, eneedda oopinyaminyeyene. Aliwa anamalaleya. (2 Tim. 4:5) Anamaholela mulogo enonivaha yotajhiha yapama wodhela wapara mabasa oolaleya nuuviheya. Teto aliwa enowawegeredha mabasa oolaleya wihina epariwege mwamakalelo apama ni enonixagiha wihina nikale anamahudhiha ni anamalaleya apama. Anamaholela mulogo enolaba ninga anamatoriha owogowa ni athagaraga. Ddibila obe murogola erana yothega enlubale, anamaholela mulogo enowilibihedha wihina emukavihere muthuya ohogolowela okanna wandana wapama ni Yehova. Mudhidhi mmodhave aliwa enowilibihedha wihina mulogo okale woweela. (1 Kor. 5:12, 13; Gal. 6:1) Mbwenye mutholo munlubale anamaholela mulogo enniwana, fuukala anamakukula. (1 Ped. 5:1-3) Teto aliwa enowegeredha pamadhene mwaha dhewa dhinakumela mBibiliyani. Ohiya eyo, aliwa enowilibihedha wihina emunone kadda muthu mmulogoni mwewa ni wawaredhela addibila. Anamaholela mulogo amodha enowakavihera mabasa oomaga Nyumba Dhomwene, wegeredha musonkano wa malabo mararu ni wa nlabo nimodha, amodha enalaba Komisawu dhiniwanana ni muselu dhoospitale ni amodha enalaba ninga anamaredhela aredda ospitale ni ehikanna mutholo dhimodha enahoweliwa wakwanihedha. Mwebaribarene anamaholela mulogo enowapara mabasa owinjhiva! Namasugwera 10/24 epaddi 20 ddima 9

Mbibiliyani madhu owi, woboliwa enagiwana woboliwa nakenlihu mwaha oliviwa yowobola. Murumiwi Peduru ohuwoga wodhela woboliwa wula, nuuleba egi: ‘Nyu muhunona wi kahiyo ni dhithu dhinavudda ninga parata ni oru moboliwinyuna, ‘[obe mutapuliwinyuna]’ mwaha wa yothega muvalihiwinyu ni makolo enyu, mbwenye moboliwe nnikame nathima, ninga nikame na nimbila nahiraganle ni nahinna nihonya nili nikame na Kiristu.’ (1 Ped. 1:18, 19) Mwaha wa yowobola, nihoboliwa muuthegani ni muukwani vamodha ni goyi yaatene enanifwanya mwaha wa yothega ni okwa. (Rom. 5:21) Mwebaribarene iyo nihikanna mangawu manlubale ni Yehova vamodha ni Yesu, mwaha Yehova anobole nnikame nathima na Yesu, obe neere ni egumi ya Yesu. Namasugwera 02/25 epaddi 5 ddima 15-16

Nnande aavi okala mento ni orabela yoweha yanthukulele werana yothega? Iyo podi ohudhera ethu yathima ni yopadduwa ya muzombwe anasorihiwa va Provérbios kapitulu 7. Oliye aherana mararuwo ni muhiyana aali namararuwa. Va versu 22 vinihina ‘mohulegela’ muzombwe ole ahimuhara muhiyana ole amararuwo. Mbwenye versu dha mundduli, dhinowoniha dhithu muzombwe ole ambeliye werana vang’ono vang’ono, ofiyedha werana yothega ele enlubale. Ddiniyani yamuthukulele muzombwe ole werana yothega ele enlubale? Ethu yobajha, muzombwe ole ‘ovira dila waddamela mburo [muhiyana ole amararuwo] vakalesiye’ vati viribaga. Nuwindo oliye ohara dila yathukulela vaade va muhiyana ole. (Pro. 7:8, 9) Ethu yanabili, numoona muhiyana ole oliye kaamuthanwe, ohiya eyo, muzombwe ole wenya wihina muhiyana ole ambejare ni wambela ovuruwana dhithu awogiye. Muhiyana ole owoga wi ahivelela mukutho wowandaniha, podi wera oliye aawonge madhu ala wihina muzombwe ole amoonege ninga muthu apama. (Pro. 7:13, 14, 21) Ahere muzombwe ole ahivira dila ele, eere orabela yoweha ele ni kaafiyedhe wawerana mararuwo. Namasugwera 07/24 epaddi 16 ddima 8-9; epaddi 19 ddima 19

Yehova, kaneenya wihina athu enerana dhithu dhabure ekaleve mmulogoni. Ebaribari wihina Yehova dathagaraga, mbwenye kaneenya wihina athu ehinathwaruwa ekaleve mmulogoni newene wihina yanyigalelege malamulo aye. Yehova kaneenya wihina muthu enerana dhithu dhabure adidele weedda naathu enilibihedha werana dhithu dhapama. (Jud. 4) Yehova ahahiyege athu yayo mmulogoni kayakale makalelo owooniha thagaraga, mbwenye erege wapweha adhaari aye vangovini. (Pro. 13:20; 1 Kor. 15:33) Naarive dhigaali ndo Yehova kanafuna wihina athu etolosiwe. Efunelo yaye sowihina athu aateene evuluwe. Oliye anowaweeddela thagaraga ale enooniha wihina ethwaruwa ni enoniha wihina enoofuna omuhogolowela oliye. (Eze. 33:11; 2 Ped. 3:9) Bumwahaya, mulobwana ole ooKoritiyu nuthwaruwa ni nuuhiya werana dhithu dhabure, Yehova omulabihedha murumiwi Pawulo wi awaddele addibila wi mulobwana ole ohowela wakeliwa ni wooniha odhivela. Namasugwera 08/24 epaddi 17 ddima 7; epaddi 18-19 ddima 14-15

Va yoladdaniha ya mambila ni mbuzi, Yesu ahiwoga wodhela otorihiwa wa athu enna ofuru wowakavihera addibile oothikitheliwa. (Mat. 25:31-46) Yesu anere watoriha mambila ni mbuzi va “mahoso manlubale,” ohalaga mudhidhi vang’ono wihina koddo ya Armajedo yambele. (Mat. 24:21) Ndala ninga namakukula anahiyanihiye mambila ni mbuzi, Yesu anere wahiyaniha athu enaakavihera addibile oothikitheliwa ni ale yahinaakavihera. Yehova ohumuthoma Yesu ninga namatoriha. Teto yovuhulela ya Izayiya enowoniha wi Yesu anere okala namatoriha owogowa. (Isa. 11:3, 4) Yesu anopwasedha osugwa pamadhene dhithu kadda muthu aneriyena, anawogiye ni anubuweliye. (Mat. 12:36, 37; 25:40) Mwaha wa yeyo, Yesu anere wanona baani aakavihere addibile oothikitheliwa ni mabasa yapanriwa. Ethu modha yathima enooniha wihina mambila enowakavihera addibila a Kiristu, fuudhela wapara mabasa oolaleya. Namasugwera 09/24 epaddi 20-21 ddima 3-4

Iyo podi okanna ebaribari ela wodhela oliganiha dhithu nnarumedhihu ni ndhe dhinawoga Bibiliya. Motajhiha, kasugwa yopadduwa ya muzombwe ole anubuwela wi Yehova kanamuthuwathuwela. Nerege oliye podi orumedha mubuwelo ola wowi Yehova kanamuthuwathuwela? Naari, oliye anohowela ‘orajhiha opendda kadda ethu,’ teto oliye podi werana eyo, wodhela omuhudhera Bibiliya wihina anone mubuwelo wa Yehova wodhela museluya. Namwilerigi Bibiliya enakala ninga nnanvuruwana Yehova. Mbwenye wihina nonelemo makalelo anubuwela Yehova wodhela muselu nnanganyedhihu, nnohowela wilibihedha. Ethu yobajha nnahowelihu werana, fuwileri epaddi ya Bibiliya eniwanana ni muselu nnanganyedhihu. Iyo podi olabihedha dhipano dhowinjhiva dhohudherana dhinadhela munikuruni mwa Yehova wihina dhinikavihere ofwanya dhowakula dha makoho ninnihuna. (Pro. 2:3-6) Teto iyo podi olobela wa Yehova nimulobaga wihina anikavihere wonelamo dhithu nnasayelihu ni wonelamo makalelo oliye anubuweliye wodhela museluya. Nuwindo naasayele malagano a mBibiliyani ni dhopadduwa dhiniwanana ni muselu nnahowelihu. Namasugwera 10/24 epaddi 25 ddima 4-5

Yehova kanareeliha athu enerana dhithudha mwaha wowithukula obe enasayela wooniwa ninga athu athima wapitha amodha. (1 Kor. 10:24, 33; 13:4) Malabo mamodha anamahara a Yesu, yosayela okanna mutholo dhathima ni efunelo yabure. Motajhiha, kasugwa yapadduwe ni anamahara abiili a Yesu, Tiyagu ni Juwawu. Aliwa omuloba Yesu wihina aavahe mburo wathima Mumweneni. Mbwenye Yesu kathethenle mwaha aliwa okanna efunelo yokala athima wapitha amodha. Ohiya eyo, oliye owoga ni anamahara aye 12 eegi: “Ole anafuna okala munlubale vaari veenyu akale mudhariya, teto ole anafuna okala owambela vaari veenyu akale mudhariya.” (Mar. 10:35-37, 43, 44) Ddibila ubuwelaga okala mudhaari ookavihera ni efunelo yapama, eli wakavihera amodha, oliye anookala ninga nvaho ammulogoni. — 1 Tes. 2:8. Namasugwera 11/24 epaddi 15-16 ddima 7-8

Opendda onere onikavihera oriha mubuwelo wewa. Teto odhivela onere onithukulela “osayela opama waathu amodha” ni okala amanddile. (1 Kor. 10:23, 24, 32; 1 Tim. 2:9, 10) Ndala nnere wanda werana yothoma enoniha wihina nnowadhivela ni nnowariiha athu amodha Akala we onafuna werena yothoma yathima, wabihe wubuwela dhatedhene dhinavolowelavo wihina wande werana yothomaya. Yesu ohunihudhiha “ohelela konta.” (Luk. 14:28) Bumwahaya wahinathi werana yothoma si yothoma, wubuwele mudhidhi, kopolo ni dhithu onafuniwe ononga wihina wande wakwanihedha yothoma yawo. Malabo mamodha onere ohowela othapanya ni emudhi yawo wihina yande wukavihera wakwanihedha yothoma yawo. Mwahaya bwaddi sapama oloba nikavihero na emudhaawo? Mwaha we podi ohowelaga wawerana masadduwo obe aliwa podi okanna monelo mmodha onuukavihere. Teto waloba nikavihero na emudhi yawo, opwasedhe ovuruwana monelo wewa. Werana ndo, enere okala yokweya werana yothoma yapama. Namasugwera 01/25 epaddi 18-19 ddima 14-15

Izayiya ahidhowave awogaga wodhela dhithu dhinanthukulela okala ‘ohagalala ni othaba’ mparayizuni oomuzimuni. Parayizu ola oomuzimuni di Yehova amwegeredhile. (Isa. 65:18, 19) Bumwahaya nnowonelamo mwahaya bwaddi Yehova aganiruma wihina naakavihere athu okumamo mugereja dhowoota, dhihinahudhiha ebaribari wodhela Mulugu ni nakavihere aliwa ovolowa mparayizuni oomuzimuni! Nnohagalala vanlubale mwaha wa mareeliho nnawakelihu mwaha okala mwiibaribarini, teto eyo enonthukulela owawaddela athu amodha dhithu nnahudherihu. (Jer. 31:12) Mwaha okala mparayizuni oomuzimuni iyo nnotamalela ni nnohagalala mwaha wa ejhehedhelo yosogolo ninnihuna. Bibiliya anopaganya eegi Iyo ‘nnerege omaga nyumba dhehu wi nikalegemo [ni] nnerege odhalela mvidera dhewu wi nijhege dhowimmadha.’ ‘Kannaparege mabasa ebewene’ mwaha wihina nnere ‘oreelihiwa ni Yehova.’ Teto, Yehova anopaganya onivaha egumi yapama, enakale yohagalasa ni yobareleya. Ohiya eyo, Yehova anere onona ethu kadda muthu anahoweliye ni anere ‘wakwaneliha efunelo ya dhithu dhaatedhene dhinakalamo.’— Isa. 65:20-24; Sal. 145:16. Namasugwera 04/24 epaddi 22-23 ddima 11-12

Naamuroromelaga Yehova ni murima wehu wamutene nnowooniha wi oliye di Nibwe nehu. Iyo nihikanna ebaribari wi naamwiwelelaga Yehova naarive nifwanyiwaga makathamiho, dhehu dhinerege oneeddela pama. (Isa. 48:17, 18) Vano nubuwelaga makalelo Yehova anikaviheriye, nroromelo nehu nuliye nnooliba teto nnokanna ebaribari wi Yehova baahi dinna ewedhelo yoonikavihera wawanana makathamiho bi makathamiho enanifwanya, naarive ekale oorusa. Ndala ninga nibwe ninlubale, nihinasadduwiwa, ekalelo ya Yehova vamodha ni efunelo yaye kinasadduwa. (Mal. 3:6) Naarive Adawu ni Eva egamurugunuwele Yehova, Oliye kasaddunle efunelo yaye ni athu. Murumiwi Pawulo ohuwoga wihina Mulugu ‘kananda wikoodda mwinya.’ (2 Tim. 2:13) Eyo enatapulela wi naarive epadduwe ethu-sithu obe athu yeragana dhithu dhohiyana-hiyana, Yehova kanadha asaddula efunelo yaye newene malamulo aye. Iyo podi omuroromela Yehova ali Mulugu ahinasadduwa ni okanna ebaribari wi Oliye anerege onikavihera mudhidhi worusa ni anere wakwanihedha mpaganyo dhaye osogolo. — Sal. 62:6, 7. Namasugwera 06/24 epaddi 27-28 ddima 7-8

Akala ohubajha omwenddi, ddiniyani enuukavihere onona akala onere otelana ni muthuya obe naari? Ethu enuukavihere fumunona pamadhene muthuya. Podi wera we ohunona dhithu dhimodha wodhela muthuya ohunathi obajha omwenddi. Mbwenye vano mwambelinyu omwenddi ohunona ‘emuthu yowikoya ya mmurimani’ mwaye. Wambela omwenddi, we podi onona pamadhene makalelo oli wandana waye ni Yehova, ekalelo yaye ni makalelo aye owubuwela. Ni makalelo yala we onere wanda wawakula makoho ala: “Ddibila ola obe murogola ola, anere okala muhiyana oteliwa obe mulobwana otela apama?” (Pro. 31:26, 27, 30; Efe. 5:33; 1 Tim. 5:8) “Ginere wanda omudhivela muthuya ni ompwatha? Ki oliyeya anerege ogidhivela ni ogipwatha? Ginere wanda ovilelana dhoviriganiha dhaye?” (Rom. 3:23) Mudhidhi mwanonanaga, kuddiwale wi yathimaya kahi wiwananave baahi, mbwenye akala munerege wanda werana efunelo ya mmodha ni mukwaye. Namasugwera 05/24 epaddi 27 ddima 5

Ninga nonilihu mwene Davidi aherana dhoothega dhinlubale. Mbwenye namavuhulela Nata nudhowa omuwogana, Davidi ahiyeviha ni ahithwaruwa ni murima waye waatene. (Sal. 51:3, 4, 17 ni wawileri madhu enadha vadhulu ya kapituluya) Mwene Ezekiya ahimuthegela Yehova. (2 Cró. 32:25) Mbwenye ndala ninga Davidi, Ezekiya wiyeviha ni othwaruwa ni murima waye waatene. (2 Cró. 32:26) Bumwahaya vamentoni va Yehova, Ezekiya aali mwene oororomeleya ‘erilena dhithu dhapama.’ (2 Reis 18:3) Nnahudhera ddi? Nerena yothega, nnohowela othwaruwa ni wilibihedha ohuhogolowela werana yothega emodhave. Teto anamaholela mulogo yanivaha yolaga wodhela ethu-sithu nnerihuna, nnonihu ninga eng’ono, kanubuwele wihina Yehova kananidhivela obe anamaholela mulogo, enna ntxiga ni iyo. Mwaha ni mamweneya yaali oororomeleya, yovahiwa yolaga ni yosumululiwa. (Ebe. 12:6) Navahiwa yolaga, nnohowela (1) orumedha yolagaya nuwiyeviha, (2) werana masadduwo enahoweleya ni (3) ndhowegeve nimulabelaga Yehova ni murima wehu waatene. Mwebaribarene nathwaruwa ni murima wehu waatene, Yehova aneere onilevelela. — 2 Kor. 7:9, 11. Namasugwera 07/24 epaddi 21 ddima 8; epaddi 22 ddima 9, 11

Ddibila aathegile anasakula okumihiwa mmulogoni, aakooddaga wavuruwana anamaholela mulogo egaxinxe omukavihera dila dhowinjhivadhene wihina othwaruwa. (2 Reis 17:12-15) Dhowera dhaye sinoniha wihina oliye kanafuna wahara malagano a Yehova. (Deut. 30:19, 20) Muthu ahithwaruwaga ni akumihiwa mmulogoni, addibila enowaddeliwa wihina oliye kahi Namoona a Yehova. Eyo, kinatapulela wihina muthuya anafuna atotiwe manyazo. Mbwenye enubusedhiwa addibila ohara yolaga ‘yoheedda nuliye’ ni ohujha nuliye.’ (1 Kor. 5:9-11) Dhihikala dhithu dhapama dhimuthukulele Yehova opweha yolaga ela mBibiliyani. Murumiwi Pawulo ohuwoga egihina: “emela vang’ono enonyakuwiha othu waatene wakanddiwa.” (1 Kor. 5:6) Ale ehinathwaruwa podi wathukulela athu amodha oridhiha efunelo yewa yowahara malamulo owogowa a Yehova. — Pro. 13:20; 1 Kor. 15:33. Namasugwera 08/24 epaddi 27 ddima 3-4

Ebaribari wi iyo kannande wavaha athu amodha kopolo ninnihuna, mbwenye iyo podi olabihedha kopolo ninnihuna wihina naakavihere athu amodha. Motajhiha, iyo podi wakavihera addibila owunnuwelavo obe ale eli aredda wodhela odhowa omerkado wi nakavihere ogula ethu-sithu enahoweliwa obe wodhela wakavihera ni mabasa a vaade. Teto iyo podi wakavihera mabasa ooxela ni oowomihedha Nyumba Yomwene. Kuddiwale wihina madhu ehikanna kopolo. Motajhiha, onomubuwela muthu anahagalale mwaha womutamalela ni murima wawo wamutene? Obe ohumunona muthu anahowela otodoliwa? Akala siyeyo, onoonamo aavi omwaddela muthuya wi onomudhivela vanlubale? We podi omwaddela muthuya thoo-thoo obe wodhela omuligarela, omwinviyarela mensaje ni emeyili obe karta. We kunahowela othuwathuwa vanlubale wasayelaga madhu onafuniwe wawoga. Madhu ookweya, mbwenye enadhela vati va murima podi okala ethu enaamukavihere ddibila wavilelana makathamiho a kadda labo obe ahogolowele okanna ejhehedhelo. — Pro. 12:25; Efe. 4:29. Namasugwera 09/24 epaddi 28 ddima 8-10

Akala onna okavihera mulogo muwari mwa mudhidhi wowinjhiva ninga mudhaari ookavihera, mwebaribarene we ohilibihedha vanlubale wihina okanne dhikalelo dhinukavihere olaba ninga namaholela mulogo. Onofuna waapara ‘mabasa apama’ anamaholela mulogo enaapariwa? Anamaholela mulogo enaapara mabasa baani? Aliwa enowasogolela mabasa oolaleya, enolaba nuviheya wihina yakukule mambila a Yehova, teto enohudhiha ni enokavihera mulogo wodhela ndhe enawogiwa ni eneriwana. Bumwahaya Bibiliya agawogaga anamaholela mulogo ninga ‘alobwana [eli ninga] nvaho.’ (Efe. 4:8) Ddiniyani onahoweliwe werana wihina okale namaholela mulogo? Osayela dhikalelo onahoweliwe okanna, kinaligana ni osayela dhikalelo wi orumedhiwe vamabasani. Sokweya orumedhiwa vamabasani wakanna dhikalelo dhinahoweliya vamabasaniva. Mbwenye akala onofuna othomiwa ninga namaholela mulogo, ethu enahoweleya kahiyo baahi onona ohudhiha ni olaleya pama, onohowela okanna dhikalelo Bibiliya anasorihiye dhinafwanyeya va 1 Timotiyu 3:1-7 ni Titu 1:5-9. Namasugwera 11/24 epaddi 20 ddima 1-3