Mudhidhi onathabwa wahagalasa anamatelana, bu mudhidhi enambaliwa mwaana. Naarive ababi emudhivelaga mwaniwa ali nnyenya, aliwa enofuna wi mwaniwaya unnuwege. Mwebaribarene aliwa yere othuwathuwa vanlubale ahere mwaniwaya ahunnuwaga. Ni makalelo mamodhave, Yehova anohagalala neragana thalo dhobajha wi nunnuwelevo epaddi yomuzimuni, mbwenye oliye kanafuna wihina nidhowegeve nikalaga ninga ahima epaddi yomuzimuni. (1 Kor. 3:1) Ohiya, eyo oliye ananiloba wihina nikale ‘ninga apogo.’ (1 Kor. 2:6) Ndala ninga mwaana anunnuwiye ofiyedha okala pogo, nihiyoya nnohowela odhowagave nunnuwelagavo epaddi yomuzimuni. Ni makalelo yala, nnere wanda okala athu owithwelavo epaddi yomuzimuni. Naarive nigaali makiristawu owithwelavo, nnohowela odhowagave nunnuwelagavo epaddi yomuzimuni. — 1 Tim. 4:15. Namasugwera 04/24 epaddi 2 ddima 1, 3

Ahere muthu ukoha egi: Yehova baanawo? Waamwakule aavi? Podi wera were omwakula wegi: “Yehova di Mulugwaga, mukwaaga ni Baabi aaga.” Ebaribari wi ehikalawo makalelo owinjhiva oomwithana Yehova, mbwenye onowabihaga omubuwela Yehova ninga namakela aleddo? Awogaga wodhela wandana Yehova anniyena ni adhaari aye, mwene Davidi ahimuliganiha Yehova ninga namakela aleddo, vano adhaari aye ninga aleddo. Davidi ahimukoha Yehova egi: ‘Babani Yehova, baani onaakale muleddo muddammwani mweenyu? Onaakale mwanamurala vamwangoni veenyu wotxena baani?’ (Sal. 15:1) Wodhela versu ndha, nnowanda woona wi iyo podi okala aleddo muddammwani mwa Yehova, obe nere, iyo podi wandana ni Yehova. Yehova aali yeka mudhidhi ahinathi obajha opaddusa dhithu dhaatedhene. Vano vasogolova oliye othoma ompaddusa mwanaye oobajha, numpaddusa, yakala ninga Yehova amwithana mwanaye wi akale muleddo muddammwani mwaaye. Teto Yehova ahihagalala vanlubale mwaha ompaddusa Yesu. Bibiliya anawoga wi kadda labo Yehova ‘oohagalala vanlubale’ mwaha okala vamodha ni Yesu. Teto Yesu ‘oohagalala vamentoni va [Yehova] mudhidhi wamutene.’ — Pro. 8:30. Namasugwera 06/24 epaddi 2 ddima 1-3

Kabiha wubuwela yopadduwa ela, muthithi waathu ookwaranya 340 000, yahitugumana wihina emuthikithele Davidi ninga mwene, aamwaana Ezarayeli. Teto yahivira malabo mararu, athu yala egatugumanne mwango dhaali waddamela luwani ya Ebro. Aliwa yaali oohagalalene, ethapanyaga ni emwibelaga Yehova. (1 Cró. 12:39) Teto vaari va muthithi yoola, ahikalavo muzombwe ithaniwa Zadoki. Naarive vigaali athu owinjhiva, Yehova oheriha wi iyo nnone wi Zadoki aali vaari muthithi yoole. (1 Cró. 12:22, 26-28) Mbwenye Zadoki aali aani? Zadoki aali namakutha, alaba vamodha ni namakutha munlubale Abiyatar. Mulugu ahinvaha Zadoki thotho ni enonelo yowonelamo efunelo yaye. (2 Sam. 15:27) Mbwenye ohiya baahi okala muthu athotho, Zadoki aali ooliba murima. Woona wihina nnakalawo malabo ookuthula, Saddana anna werana dhaatedhene anandiye wihina anikwerebeyihe. (1 Ped. 5:8) Mbwenye njhehaga mudhidhi Yehova anafuniye omutolosa Saddana, vamodha ni elabo ela yabure, nnohowela okala athu ooliba murima. (Sal. 31:24) Nerana eyo natajhiha oliba murima wa Zadoki. Namasugwera 07/24 epaddi 2 ddima 1-3

Yehova nuunpaddusa Adawu ni Eva afuna wihina aliwa ehagalalege. Oliye ahavaha murala wowoma, matelo ni mabasa oohagalasa. Efunelo ya Yehova yaali wihina aliwa ekalena ahima, wihina edhaale elabo yaatene ni wihina esaddule elabo akale parayizu. Oliye ahavaha nlamulo nookweya. Mbwenye wakongomedha wi yapwaza nlamulo nne yeere oyelela egumi yewa. Nihinona epaddunwe. Mungero abure ahaadhivela aliwa ni ahimudhivela Mulugu, waleketha wihina elupe nlamulo nne. Adawu ni Eva wiwelela dhawogile mungero ole. Aliwa opwaza ndhe dhawogile baabiwa aadhivela, mwaha wa yeyo aliwa oothega. Ninga nnoonihu madhu a Yehova yahakwanela. Obajha labo nenne aliwa ohiya okala ologomana vano, wuluvala, omakuthulowa aliwa okwa. Mohanganyedha aliwa ohogolowela okala nthubi. — Gén. 1:28, 29; 2:8, 9, 16-18; 3:1-6, 17-19, 24. Namasugwera 08/24 epaddi 3 ddima 3

Yehova vamodha ni mwanaye Yesu, enofuna wi nikale athu oohagalala. Namaleba a Salmo 119:2, ohuwoga egi: ‘Oohagalala baale enaparihedha mabasa dhoolaga dhaaye, ni enamusayela ni murima wewa waateene.’ Teto Yesu ahiwoga egi: “Oohagalala baale enawiwa madhu a Mulugu ni yaaparihedhaga mabasa!” (Luk. 11:28) Iyo nnothabwa ohagalala mwaha okala adhaari a Yehova. Mbwenye ethu yathimaya, sowihina iyo nnomwileri Bibiliya malabo aamateene ni nnowilibihedha oparihedha mabasa dhithu nnahudherihu. (Tiya. 1:22-25) Teto naparihedhaga mabasa ndhe nnahudherihu mBibiliyani, nnomuhagalasa Yehova ni nnohagalala. (Ecl. 12:13) Teto naparihedha mabasa dhithu nnahudherihu mBibiliyani, nnokanna egumi yohagalala vamuralani ni nnothabwa wandana naaddibilihu ammulogoni. Ohiya eyo, iyo nnowarabela makathamiho owinjhiva enaafwanya athu ehinamulabela Yehova. Mwebaribareene iyo nnorumedha ele mwene Davidi awogiliye. Mudhidhi ibaga wodhela malamulo ni makalelo ootoriha a Yehova oliye okuthula jhibwaaye egihina: ‘Ehikalavo yowakela enlubale wa ole onavirihamo.’ — Sal. 19:7-11. Namasugwera 09/24 epaddi 2 ddima 1-3

Yehova anowawona makathamiho aatene enaafwanya adhaari aye velaboni yavati. Oliye onowanda onoona nakala oohagalalene obe owukuwene. (Sal. 37:18) Teto awonaga adhaari aye emulabelaga naarive efwanyiwaga makathamiho, oliye anohagalala vanlubale! Ohiya eyo, Yehova anofuna vanlubale onikavihera ni onitodola naafwanyiwaga makathamiho. Salmo 147:3 anihina: Yehova ‘anowapotha makwadda’ aathu enna murima woohoseya. Yolebela ela, enamooniha Yehova ninga muthu oodhivela anapotha nikwadda na muthu anna murima woohoseya. Mbwenye ddiniyani nnahowelihu werana negi nipurelemo nikavihero na Yehova? Kasugwa yoladdaniha ela: Mediku anonne pama wasamalela aredda, podi werana dhaatedhene andiye wihina amukavihere muthu aporeye wihina nikwadda naye nivole. Mbwenye muthuya anna nikwadda eegi avulumuwe mowaguva anohowela wiwelela dhoholela dhaatedhene anafuniye ovahiwa ni medikuya. Nimakalelo mamodhave Yehova onowakavihere ale enna murima woohoseya obe ale eli owukuwene. Teto onowavaha dholaga nuudhivela. Namasugwera 10/24 epaddi 6 ddima 1-2

Kale, malivuru ehu yowoga ethu yaapadduwele athu Yehova awoniye ninga ohogowa. Iyo nawogesa wihina athu yaala, kiyadhe evenyihiwa muukwani. Kabiha wubuwela makalelo Yehova aatorihiliye athu ohogowa mudhidhi wa kale. Dila yobajha, mudhidhi wa mutokora malabo a Nowe, dila yanabili, mudhidhi yaagujhuliwe malogo ale 7, yakala elabo yothomeliwa ni dila yanatharu, anyakoddo ale owakwana 185 000 owAsiriya yapiwe ni mungero a Yehova emahiyu emodha baahi. (Deut. 7:1, 3; Isa. 37:36, 37) Vano we podi wikoha: Nerege athu ale ohogowa yaagujhuliwe ni Yehova, ehigujhuliwa ni mukalakala obe kinnawene ejhehedhelo yovenyihiwa muukwani? Nerege Bibiliya anowoga dhithu dhaatedhene dhinanthukulela okanna ebaribari wi aliwa kinaavenyihiwe? Naari! Dhopadduwa ndha noonilihu, iyo kannonne makalelo Yehova amutorihiliye kadda muthu, newene kannonne akala athu ale egujhuliwe yahikanna ofuru wohudhera wodhela Yehova ni othwaruwa mwaha wa dhoothega dhewa. Namasugwera 05/24 epaddi 3 ddima 5-7

Yesu owoga nladdaniho wodhela mwihiyana dhaala aadhowile owoga ni namatoriha, alobaga wihina eeddihiwe mwamakalelo apama. Podi wera yoladdaniha ela yahadahinya murima anamahara a Yesu, mwaha mudhidhi yole yaali yokweya wawoona athu yeeddihiwaga mwamakalelo abure. (Luk. 18:1-5) Teto yoladdaniha ela podi onikavihera nihiyoya. Mwaha nnowawoona athu owinjhiva yeeddihiwaga mwamakalelo abure. Peeno athu owinjhiva enowawoniha goyi athu amodha, teto bamrima ni bansakulo. Bumwahaya kannatikina neddihiwaga mwamakalelo abure. (Ecl. 5:8) Teto ethu nahinajhehedhihu, fuweddihiwa mwamakalelo abure naaddibilihu. Mbwenye mohujhehedha eyo podi opadduwa. Ebaribariya sowihina addibilihu kinafuna oneeddiha mwamakalelo abure, aliwa enoneddiha mwamakalelo abure mwaha ohulogomana. Mbwenye iyo podi ohudhera ni yotajhiha ya Yesu ni dhaathu amodha. Mwaha aliwa yahivilela, naarive yeeddihiwaga mwakalelo abure. Akala nnowanda ovilela naarive weddihiwaga ni athu yahinamulabela Yehova, mwebaribarene nnohowela wilibihedha wavilelana addibilihu. Namasugwera 11/24 epaddi 2 ddima 1-2

Kale pawu yaali yojha yathabwa ojhiwa kadda labo. (Gén. 14:18; Luk. 4:4) Mwebaribarene pawu yaali yoojha yathima mudhidhi yoole, bumwahaya Bibiliya malabo mamodha, anowalabihedha madhu owi pawu wihina awoge yojha si yojha. (Mat. 6:11; Dho. 20:7) Yesu ahawerana matikiniho owenjhedhedha pawu dila biili mburo dhohiyana-hiyana. Teto eyo enowoniha wi pawu yaali yojha yathima mudhidhi yoole. (Mat. 16:9, 10) Juwawu kapitulu 6, anowaawoga matikiniho Yesu aweriliyena owenjhedhedha pawu. Anamahara a Yesu yere ohogolowa mmabasani oolaleya, teto yohowela withuwa. Bumwahaya Yesu wathukulela mburo mmodhaya ni mwanddeya waddamela niya yoGalileya. (Mar. 6:7, 30-32; Luk. 9:10) Aliwa odhowa mburo womaleya, waddamela sidadi yithaniwa Betizayida. Mbwenye muthithi waathu nunona mburo waaliwa, aliwa odhowa wi yagumane ni Yesu. Vano Yesu nuwawoona kisinjhedhile ekalaga ninga kawonile athu ale. Ohiya eyo, Yesu wawakela nuudhivela ni wahudhiha dhithu dhowinjhiva wodhela Omwene wa Mulugu ni wavulumusa aredda. Nuwindo vati viribaga, anamahara a Yesu othuwathuwa ni athu ale, yubuwelaga makalelo oofwanya yoojha wihina aathu aatene ejhe. Podi wera mudhidhi yoole, athu amodha yahidhana yojha vang’ono. Mbwenye athu owinjhiva kiyadhilena dhoojha, bumwahaya yohowela oosayela yojha. — Mat. 14:15. Namasugwera 12/24 epaddi 2 ddima 1-2

Makolo ehu oobajha Adawu ni Eva, yaali athu oologomana, teto yakala mparayizu mwilaboni yeela yavati. (Gén. 1:27; 2:7-9) Yahere aliwa edidela omwiwelela Yehova, aliwa yere okanna egumi yapama mparayizu mwilaboni yeela. Yowukulihaya, aliwa othoma ohiya omwiwelela Yehova, mwaha wa yeyo, aliwa othamagihiwa mparayizu yaliwamo ni oyelela ofuru wokalawo ni mukalakala. Mbwenye ethu baani aliwa yahiyedhiwa aniwa? Bibiliya anihina: “Mwaha wa yothega ya muthu mmodha [Adawu], yothega ehivolowa mwilaboni teto okwa ohuvolowa mwaha wa yothega. Nimukalelo mmodhave okwa ohafwanya athu aatene mwaha wi aatene ehithega.” (Rom. 5:12) Ethu Adawu anihiyedhiliye si yothega, enanithukulela okwa. Yothega Adawu anivalihiliye eli ninga mangawu, kaavo muthu velaboni yavati ananda oliva yowobola vamburoni vehu. (Sal. 49:8) Bibiliya analiganiha yothega ni mangawu. (Mat. 6:12; Luk. 11:4) Iyo nerana yothega, enakala ninga ninna mangawu ni Yehova. Teto Yehova ahafune eere onikukusa wi naalive mangawu ninnihuna. Vano nahaliva mangawuya, nakwa kanakanne ejhehedhelo yovenyihiwa muukwani. — Rom. 6:7. Namasugwera 02/25 epaddi 2-3 ddima 2-3

Gari enlubale olaleya muthenga ola Womwene! Teto kahi athu aatene enakanna gaari ela. Motajhiha, mudhidhi Yesu agaali velaboni yavati, keenyile wi ademoniyu ewogege ethu-sithu wodhela oliye. (Luk. 4:41) Teto peeno enapadduwa emodhave. Muthu di muthu ahinathi obajha wapara mabasa oolaleya nnikuru na Yehova, anohowela openddiwa akala anowaparihedha mabasa malagano a Yehova mwigumini mwaaye. Bumwahaya iyo nnowooniha wi nnowavaha thima mabasa ala oolaleya wodhela olaleya mudhidhi waatene, mburo bu mburo nnafwanyihu athu. Teto ndala ninga Yesu efunelo yehu fuudhala bewu yOmwene mmurimani mwa athu ni wahudhiha ebaribari. (Mat. 13:3, 23; 1 Kor. 3:6) Yesu ahahudhiha athu amodha ndina na Mulugu. Eharaga yotajhiha ya Yesu, nikuru na Yehova peeno nnohara yotajhiha ya Yesu wodhela werana dhaatedhene enandiwa wihina yahudhihe athu ndina na Mulugu. Tradução do Novo Mundo da Bíblia Sagrada. Bibiliya ola anofwanyeya aatene obe epaddi modha ni dhiwogelo dhokwaranya 270, teto mBibiliyani muna mwihogoloseliwa ndina na Mulugu mburo dhaatedhene mwafwanyeyiwa ndina nna. Namasugwera 04/24 epaddi 9 ddima 8-9

Alobwana amodha etenle ni enna matelo ohagalala, kadda labo aliwa enowerana ethu-sithu wihina yawonihe amwaariwa wi enowadhivela. (1 Juwa. 3:18) Mulobwana atenle podi woniha odhivela anniyena ni mwariye wodhela werana dhithu dhing’ono. Ninga motajhiha, ohiddela nlada naye, omwabarasari, omwinviyarela mensaje owogaga wi “gihikanna munukwela ninga guwoone” obe podi omukoha weegi: “Peeno dhawo dhinuweddela aavi?” Teto malabo mamodha we podi omulebela karta wawogaga madhu ooriya enoniha makalelo onamudhiveliwe mwariyo. Mulobwana atenle eragana dhithu ndha onowoniha wi onomuriha mwariye ni onowalibiha matelo aye. Mulobwana anamuriha mwariye onowoga dhithu dhinamuhagalasa mwariye. Motajhiha, oliye kanadduwala omutamalela mwariye mwaha wa dhithu dhaatedhene aneriyena wi amukavihere. (Kol. 3:15) Mulobwana amutamalelaga mwariye ni amwaddelaga dhithu dhinamuthukulela omudhivela vanlubale, mwariye anakala oobareleyene ni onowoona wi mamunaga anogidhivela ni anogiriha. Namasugwera 01/25 epaddi 11 ddima 15; epaddi 13 ddima 16

Salmo 15 anookuthula ni madhu ala: ‘Oneerana dhithu ndo, kadha oona goyi.’ Vala, Davidi anowoniha ethu enamuthukulela Yehova oniloba dhithu dhowinjhiva. Yehova anafuna wi iyo nihagalalege. Bumwahaya, neragana ele Mulugu ananilobiye, nnokanna egumi yapama, teto oliye anonibarela. Ale eli aleddo muddammwani mwa Yehova, ehikanna ejhehedhelo yosogolo wapama. Makiristawu oothikitheliwa enaadidele okala oororomeleya, enere withaniwa wihina yakalege wule “wahiramile mburo,” obe nere, odhulu. (Juwa. 14:2) Vano ale enna ejhehedhelo yokala velaboni yavati, enna ojheha nuuthaba wakwanela wa mpaganyo onafwanyeya va Ovuhulela 21:3. Mohanganyedha oneti winlubale withaniwa ni Yehova wihina nikale aleddo muddammwani mwaaye ni mukalakala! — Sal. 15:1-5. Namasugwera 06/24 epaddi 13 ddima 19-20

Nthithimiho enatapulela ddi? MBibiliyani madhu owi ‘nthithimiho,’ enatapulela ethu enamweriha muthu okala ootikiniha. Yehova numala wawobola amwaana Izarayeli muudharini Wijipitu, oliye werana ethu yakavihere amwaana Izarayeli woona nthithimiho naye. Ddiniyani Yehova eriliyena wihina onihe nthithimiho naye? Yopadduwaya enihina: Mbwabwadda ni mbwabwadda wa amwaana Izarayeli yahitugumana omwangoni Sinayi wihina envuruwane Mulugu. Vano murabo wooriba okuneela mwango waatene wa Sinayi. Morurumusa mburo yimenliwa wambela oddiginyeya mwaha wa oddiginyeya weelabo. Teto enakala ninga oddiginyeya wule, wahitaganyihedheya ni vulkawu. Ohiya eyo, aliwa wambela woona ojerima, oruma wa dari ni onyagula winlubale wa buzina. (Êxo. 19:16-18; 24:17; Sal. 68:8) Mohanganyedha amwaana Izarayeli yahitikina vanlubale nuwoona dhithu dhatedhene ndhe dhoniha nthithimiho na Yehova. Makalelo onvaha nthithimiho Yehova fuudhela owoga ni athu amodha wodhela kopolo dhinlubale ni dhikalelo dhapama anna Yehova. Teto iyo podi onvaha nthithimiho natenene Yehova, natamaleliwaga mwaha wa dhithu dhatedhene nnerihuna nnikavihero naye. — Isa. 26:12. Namasugwera 01/25 epaddi 2 ddima 2-3

Mudhidhi amwaana Ezarayeli edhowaga elabo yothomeliwa, alobwana dhaala oovuwa yahambela onvanya Moyizeji ni okoodda ohara dhoholela avahiwiye. Mwaha wa yeyo aliwa yahifiyedha owoga yegi: ‘Nlogo naatene thoweela [ohiya Moyizeji baahi,] teto Yehova ali vaari vewa.’ (Núm. 16:1-3) Ebaribari wihina ‘nlogo naatene’ naamwaana Ezarayeli naali noweela vamentoni va Yehova, mbwenye Yehova aamusakunle Moyizeji wihina aholelege nlogo naamwaana Ezarayeli. Alobwana ale owithukula kayanvanya Moyizeji baahi, mbwenye yanvanya Yehova. Aliwa kayapwasedha dhithu Yehova afuniye, ohiya eyo yapwasedha ndhe yafuniwa, yaali okanna mutholo ni okala athu oovuwa. Mwaha wa yeyo, Yehova watolosa alobwana ale ni athu yaakavihera. (Núm. 16:30-35, 41, 49) Ni makalelo mamodhave, peeno Yehova kanaarumedha ale enakoodda ohara dhoholela dha nikuru naye. Namasugwera 07/24 epaddi 11 ddima 11

Nnakalawo mudhidhi athu owinjhiva ehinarumedhiwa wihina nnakalawo malabo ookuthula. Teto aliwa enoniteya mwaha iyo orumedha wi nnakalawo malabo ookuthula. (2 Ped. 3:3, 4) Ebaribari wi dhihikalawo dhithu dhowinjhiva nihinonnihu. Bumwahaya nnohowela okanna ebaribari wihina omakuthulo oneere ofiya mudhidhi wofwanelela. Teto mudhidhi ola wafiya Yehova anere onibarela. Peeno iyo nnohowela okanna ebaribari wihina Yehova anna omulabihedha mudhaari oororomeleya ni athotho wihina aniholele. (Mat. 24:45) Podi wera mahoso manlubale yabajha, nnere wakela dhoholela dhinanikavihere ovulusa egumi yehu. Bumwahaya ola mudhidhi wofwanelela wihina nihudhere waroromela ale Yehova anaalabihedhiye wihina eniholele. Akala enonirusa waroromela ni wawiwelela ale enaniholela, mwebaribarene enere okala yorusa ororomela dhoholela enaanivahigiwa mudhidhi wa mahoso manlubale. Namasugwera 09/24 epaddi 11 ddima 11-12

Abaabi eli makiristawu ehinona wihina ahima kinabaliwa emuroromelaga Yehova. Sapama ohuddiwala wi nroromelo ethu yahinavaliwa. Bumwahaya malabo mamodha mwanawo podi wikohaga eegi: “Mwebaribarene Mulugu ohukalawo? Ginande aavi orumedha wi ele enawoga Bibiliya ebaribari?” wikoha ndala kahi ethu yabure. Mwaha Bibiliya anonikongomedha olabihedha “makalelo ehu owubuwela” ni ‘opendda kadda ethu.’ (Rom. 12:1; 1 Tes. 5:21) Mbwenye onande aavi omukavihera mwanawo okanna nroromelo nooliba? Omukongomedhe mwanawo osayela dhithu dhinamukavihere orumedha wi Bibiliya anawoga ebaribari. Abaabi, mwanawo awerana makoho, opathe mudhidhi yoyo wihina omukavihere ofwanya yowakulaya. We podi werana eyo olabihedhaga dhipano ninga Índice das Publicações da Torre de Vigia ni Guia de Pesquisa para Testemunhas de Jeová. Motajhiha, Guia de Pesquisa epaddi vilebiwe Bibília ni mwana musolo onihina “Inspirada por Deus” oliye anere ofwanya dhithu dhinoniha wihina Bibiliya kahiyo livuru nilebiwe naathu, mbwenye ‘madhu a Mulugu.’ — 1 Tes. 2:13. Namasugwera 12/24 epaddi 14-15 ddima 4-5

Anamaholela mulogo, enamutajhihe aavi Yesu? Anamaholela mulogo enohowela waxagiha addibila wihina yandege osamalela mutholo enaakeliwa mmulogoni, naarive addibila enaxagihiwa egaali azombwe. Anamaholela mulogo kijhehege wihina addibila enaaxagihiwa yeregena pamadhene dhithudha omambelelowene, ohiya eyo aliwa enohowela waxagiha azombwe nuudhivela. Anamaholela mulogo yaaxagiha addibila ni makalelo yaala, aaddibila enere ohudhera okala athu owiyeviha, oororomeleya ni enerege ofuna wakavihera athu amodha. (1 Tim. 3:1; 1 Ped. 5:5) Yesu ahavaha anamahara aye mutholo woolaleya ni ohudhiha. Podi wera anamahara ale yubuwela wihina kayande wakwanihedha mutholo ole, mbwenye Yesu ahinona wihina aliwa yere wanda wakwanihedha. Bumwahaya oliye adhe awogege egi: “Mowindala ninga Ababa egirumiliwa ni miyoya ginowurumani.” — Juwa. 20:21. Namasugwera 10/24 epaddi 16 ddima 15; epaddi 17 ddima 17

Davidi aali mwene oororomeleya vamentoni va Yehova. Oliye aali namwiba namaleba, munyakoddo ni namavuhulela. Naarive dhigaali ndo, oliye ahifwanyiwa makathamiho owinjhiva mwigumini mwaaye. Motajhiha, muwari mwa yaka dhowinjhiva oliye ahiharahariwa ni Sawuli aali mwene anrima. Teto Davidi nuukala mwene, ahiharahariwa ni mwanaye Abisalawu. Mwaha oliye afuna akale mwene vamburoni vaababe Davidi. Naarive aharahariwaga, oliye ahikanna dhithu dhamwigumini mwaaye dhamukwerebeyiha. Mbwenye Davidi ahididela okala oororomeleya ofiyedha okwa waye. Teto Yehova ohumuwoga Davidi ninga mulobwana “anahagalasa murima waye.” Bumwahaya sapama opwasedha ohara dholaga dhihile mwene Davidi! (1 Reis 15:5) Motajhiha, kasugwa yolaga mwene Davidi anvahiliye mwanaye Salomawu, aakale mwene oharela a nlogo naamwaana Ezarayeli. Yehova ahimusakula Salomawu wihina amage tempulu wi ebedhiwegemo. (1 Cró. 22:5) Salomawu ahikanna dhithu dhowinjhiva afuniye werana osogolo ni ohowela nikavihero na Yehova wihina ande othonga nlogo naamwaana Ezarayeli. Davidi owoga ni mwanaye wi athoma omwiwelela Yehova, dhaye dherege omweddela pama. — 1 Reis 2:2, 3. Namasugwera 11/24 epaddi 10 ddima 9-11

Mulobwana anamoniha goyi mwariye, onohowela werana ethu-sithu mowaguva wihina awomihedhe wandana anniyena ni Yehova vamodha ni mwariye. Vobajha, oliye anohowela wonelamo wi oyo muladdu munlubale. Teto kaavo ethu anawogiye ni aneriyena eli yoviteya vamentoni va Yehova. (Sal. 44:21; Ecl. 12:14; Ebe. 4:13) Yanabili, oliye onohowela ohiya emanya yomweddiha mwariye mwamakalelo abure. (Pro. 28:13) Yanatharu, oliye onohowela omuloba mwariye ni Yehova wihina emulevelele ni werana dhithu dhinatonyihedha wi ohuthwaruwa mwebaribarene. (Dho. 3:19) Teto oliye onohowela olobela wa Yehova amulobaga wihina anvahe efunelo yosaddula ekalelo yaye ni kopolo wihina andege osugwera mubuwelo waye, dhowera ni dhowoga dhaye. (Sal. 51:10-12; 2 Kor. 10:5; Fil. 2:13) Yanennayi, oliye onohowela weragana dhithudha mowiwanana ni malobelo aye ni ohudhera widda dhithu dhaatedhene dhabure ni wawoga madhu opiha mbani. (Sal. 97:10) Yanetanu, oliye onohowela osayela mowaguva nikavihero na anamaholela mulogo. (Tiya. 5:14-16) Yanetanu-nammodha, oliye onohowela ompandda porogarama anaamukavihere ohuhogolowela omwerela dhithu dhabure mwariye. Namasugwera 01/25 epaddi 11 ddima 14

We onomudhivela Yehova, ole uvahile dhithu dhapama, vamodha ni egumi yawo? Ohukanna efunelo yomooniha wi onomudhivela? Makalelo apama owooniha wi onomudhivela, fuudhela wipeleka ni obaddiziwa. Wabaddiziwa we onowawakela mareeliho owinjhiva ninga motajhiha, onowambela okosa epaddi ya emudhi ya Yehova, ohiya eyo, onakala mmadani mwa Yehova, teto oliye anerege wusamalela ni oholela egumi yawo, ninga mukwawo ni Baabi. (Sal. 73:24; Isa. 43:1, 2) Vadhuluva, we oneere okanna ejhehedhelo yokalawo ni mukalakala. (1 Ped. 3:21) Ehikalawo ethu enuthukulela ohibaddiziwa? Akala oni hee, kuli weka! Athu owinjhiva ehawerana masadduwo mwigumini mwewa wodhela makalelo ewa owubuwela wihina ebaddiziwe. Yapamaya sowihina aliwa enomulabela Yehova nuviheya vamodha nuuhagalala. Namasugwera 03/25 epaddi 2 ddima 1-2

Malabo mamodha Bibiliya anoladdaniha dhothega ni mutholo wonyemela. Motajhiha mwene Davidi ahiwoga wodhela dhothega dhaye egi: ‘Dhothega dhaaga dhinoginyemela vamusoloni vaaga ninga mutholo wonyemela gihinandimi othukula.’ (Sal. 38:4) Mbwenye Yehova anolevelela dhothega dha athu enathwaruwa. (Sal. 25:18; 32:5) Madhu owi “olevelela” ni Ebarayiko enatapulela “ovenyiha” obe “othukula.” Iyo podi omubuwela Yehova ninga mulobwana akopolo dhinlubale, anathukula dhothega dhehu dhinaligana ni mutholo wonyemela ni orahilela wolapela. Bibiliya anowoga nladdaniho nimodha nnooniha wi Yehova anothukulela wolapela dhothega dhehu. Yolebela ya Salmo 103:12 enihina: ‘Ndo ninga omadhelo nduwa ni omayelo nduwa wilapeliwana, oliye anohiya woolapela dhothega dhehu.’ Omadhelo nduwa ni omayelo nduwa kawindha wigumanaga. Mwaha mudhidhi ni mburo winakuma nduwa, wihiyana vanlubale ni mudhidhi ni mburo nnamothelamo nduwa. Ni madhu mamodha, yolebela ela enafuna ewoge wihina Yehova anothukulela dhothega dhehu mburo wothabwa olapa nahinandihu ofiyawo. Yoladdaniha ela enowoniha wihina Yehova anonilevela ni murima waye waatene. Teto onona eyo, enonikurumusa vanlubale! Namasugwera 02/25 epaddi 9 ddima 5-6

Yesu nuuhogolowela odhulu, murumiwi Peduru ahawerana matikiniho wodhela onvulumusa mulobwana dhaala abaliwe ooragalene. (Dho. 1:8, 9; 3:2, 6-8) Nuwindo muthithi ole waathu omurijha Peduru mwaha wa matikiniho ale aweriliyena. (Dho. 3:11) Nerege Peduru eere opatha mudhidhi yole wihina akale muthu owithukula, woona wihina athu amudhidhi yole yodhiveliwa withukula? Naari. Peduru ahididela okala muthu owiyeviha, teto kasayenle ootamaliwa, mbwenye ahinvaha nthithimiho naatenene Yehova vamodha ni Yesu, nuwoga eegi: “Wodhela nroromelo ninnihuna ni ndina [na Yesu], fivala mulobwana ola mmunonninyu teto munamooninyu eeddaga.” (Dho. 3:12-16) Iyo podi ohara yotajhiha ya murumiwi Peduru wodhela odidela okala athu owiyeviha. nnowakavihera athu, mwaha nnomudhivela Yehova vamodha ni athuya, teto kanakavihera athu wihina nitamaliwe. Ohiya eyo, nnowoniha wi nili athu owiyeviha naamulabelaga Yehova ni naakaviheraga addibilihu nuuhagalala, naarive athu amodha ehoonaga dhithu nnerihuna. — Mat. 6:1-4. Namasugwera 03/25 epaddi 10-11 ddima 11-12

Iyo podi wenjhedhedha ohagalala wehu mmabasani oolaleya wodhela wubuwela odhivela ninnihuna ni Yehova vamodha ni athu nnaalaleyihu. (Mat. 22:37-39) Kubuwela makalelo Yehova anahagalaliye aanoonaga nlaleyaga ni makalelo athuya enafuniwa ohagalala mwaha wambela omuhudhera Bibiliya! Teto kudduwale wi ale enarumedha muthenga nnalaleyihu ni enathoma omulabela Yehova podi okalawo ni mukalakala. (Juwa. 6:40) Ki akala kunanda olaleya nyumba ni nyumba mwaha makathamiho enuufwanya? Akala siyeyo enupadduwela, wubuwele makalelo owoniha odhivela onniwena ni Yehova vamodha ni athu. Mudhidhi wa mutipa wa Koronaviru, Samuel ni Dania kayanda ovenyavo vaade. Muwari mwa mudhidhi ole worusa, aliwa yolaleya elabihedhaga telefoni, karta ni yowahudhiha Bibiliya anamahudhera ewa emulabihedhaga Zoom. Makathamiho yaafwanya, Samuel ni Dania kayanda werana dhithu yeriwana kale, mbwenye yahihagalala vanlubale ni mareeliho yawakenliwa. Namasugwera 04/24 epaddi 18 ddima 15-16

Ebaribari wihina egi muthu akale oohagalala kanahowela otela obe oteliwa. Naarive dhigaali ndo, addibila ni arogola owinjhiva eli addiye enofuna vanlubale onfwanya muthu oofwanelela wihina etelane. Mbwenye wahinathi obajha omwenddi, onohowela okala owiwegeredhene epaddi yomuzimuni, yomubuweloni ni yomwilini. (1 Kor. 7:36) sathima vanlubale ohunambele omwenddi, onona dhikalelo baani onafuniwe wi mamuno obe mwadhiyo akanne. Mwaha wahinona dhikalelo onafuniwe, we podi omuyelela muthu aakale mwadhiyo obe mamuno apama, obe onere obajha omwenddi ni muthu ohufwanelela. Mbwenye kudduwale wi mwenddawo anohowela okala mukiristawu oobaddiziwa. (1 Kor. 7:39) Eyo kinatapulela wi muthu di muthu abaddiziwe anofwanelela okala mamuno obe mwadhiyo. Bumwahaya wikohe: ‘Dholuba baani ginnimina? Dhikalelo baani dhathima ginafunimi wi mwadhaaga obe mamunaga akanne? Dhithu ginajhehimi wi ginere okanna gatela obe gateliwa, dhinere wereya mwebaribarene obe ginothabwiha?’ Namasugwera 05/24 epaddi 20 ddima 1; epaddi 21 ddima 3

Ale enavevana enande aavi owanana makathamiho ni ohiwanana? Ki akala malabo mamodha kamuniwananege? Nerege eyo enatapulela wi omwenddi weenyu kunadhowe osogolo? Naari kahi yeyo, athu aatene enavevana enofwanyiwa makathamiho. Teto matelo ooliba baathu abiili enarihana ni enapweha dhofuna dha muthu mmodha mburo wobajha. Bumwahaya makalelo munatxokotxelinyu muladdu dhenyu ovanene muhunatelane, enere woniha akala matelo enyu enere okala ooliba obe naari. Nyu podi wikoha: “Nerege nnowanda othapanyedha muselu bu muselu mwamakalelo oopwaseya ni anriho? Iyo nnorumedha dhoviriganiha dhehu ni nnowilibihedha wihina niiwomihedhe? Nnorumedha mubuwelo wa muthu mmodha, nnoloba nikurumuwelo ni nnolevelelana mowaguva?” (Efe. 4:31) Mbwenye akala munothabwa okangana mudhidhi mwavevanaga, eyo enowooniha wi mwatelana kamuniwananege. Vano akala we obe mwenddawo muhonelamo wi kamunafwanelelana, yere okala yapama omariha omwenddi weenyu. Namasugwera 05/24 epaddi 29 ddima 12

Namwiwelelaga Yehova nafunaga werana ethu-sithu ni neragana dhothoma dhiniwanana ni malagano a mBibiliyani, nnere okala yotajhiha yapama. Teto naamuhudheraga Bibiliya ni nadidela olibiha nroromelo nehu ni Yehova, nnere okala oororomeleya wa Yehova ni nnerege wahara malagano aye mudhidhi waatene. Teto kannavoloweliwe ni dhohudhiha dhowoota ni makalelo owubuwela ehiniwanana ni ndhe Yehova anahudhihiye mBibiliyani. (Efe. 4:14; Tiya. 1:6-8) Ohiya eyo, nakanna nroromelo nooliba, nnere wanda wakavihera ale enafwanyiwa makathamiho ni dhoweha. (1 Tes. 3:2, 3) Anamaholela mulogo, enohowela okala athotho, owegeredheya, ookweya ni owipimelela yeragana ethu-sithu. Teto anamaholela mulogo, enowakavihera addibila okala oopwaseya ni olibiha nroromelo enniwana ni Yehova. Ohiya eyo, ‘wahiddelela pamadhene madhu oororomeleya.’ (Titu 1:9; 1 Tim. 3:1-3) Teto anamaholela mulogo podi walibiha addibila wodhela yotajhiha yewa ni wodhela waapada wihina yalibihe. Anamaholela mulogo enowakavihera addibila ohijhomba mmutugumanoni, odhowa mmabasani oolaleya ni werana ohudhera wewa wa vayeka. Teto addibila yafwanyiwaga makathamiho enathuwathuwiha, anamaholela mulogo enowawubusedha aliwa wihina enohowela odidela omuroromela Yehova ni wubuwelaga mpaganyo dhaye dhosogolo. Namasugwera 06/24 epaddi 31 ddima 16-18

Yesu agaali mwilaboni yavati, ahahudhiha anamahara aye wihina Yehova onofuna vanlubale walevelela athu. Teto oliye ahiwoga nladdaniho na mwaana aadduddumadhe vaade. Nladdaniho nno, nnomuwoga muzombwe anathoma ovenya vaade nuwindo odhowa weddelaga dhaye. Mbwenye nuuvira mudhidhi oliye ‘othwaruwa’ ni ohogolowela vaade. Ki baabe amwaakele aavi? Yesu owoga egi, mwanaye “agaali wolapelawene, ababe omoona ni omuthamagela, omukubarela ni ombejari.” Muzombwe ole afuna aalobe ababe wihina emoonege ninga namalaba ewa, mbwenye ababe owoga yegi: “Mwanaga ola . . . ahirimela vano ukumelela.” Ndo ababe omwaakela vaade vewa. (Luk. 15:11-32) Mwebaribarene, Yesu agaali odhulu dila dhowinjhivadhene owawoona ababe yaweeddelaga athu thagaraga ni yalevelelaga mowaguva ale yathwaruwa. Nladdaniho nna awonge Yesu nnoonlibiha ni nnowoniha wihina baabihu Yehova anoneeddela thagaraga! Namasugwera 08/24 epaddi 11 ddima 11-12

Mukiristawu ali ooxaga onowerana dhaatedhene anandiye wihina eerena dhothoma dhiniwanana ni mubuwelo wa Yehova. Oliye anowonelamo wihina kawo ethu yathima mwigumini mwaaye okwaranya wandana anniyena ni Yehova. Ohiya eyo, oliye onowipimelela teto anowonelamo wihina kannone dhithu dhatedhene. Muthu ooxaga anowooniha wihina anomuroromela Yehova wodhela olobela alobaga dhoholela, aafunaga werana ethu-sithu.nnohowela odidela olobela wa Yehova, naarive niganonne dhithu dhowinjhiva. Nafunaga werana dhothoma dhathima, nnohowela olobela wa Yehova nimulobaga dhoholela dhaye. Teto nnohowela ororomela wihina oliye ohunona ele eli yapama wahiyo.Sapama vanlubale onona wi Yehova anipaddusile ni ekalelo yoomutajhiha! (Gén. 1:26) Ebaribari wi kannanda omutajhiha Yehova mowakwanela. — Isa. 55:9. Namasugwera 03/25 epaddi 11 ddima 13; epaddi 13 ddima 17-18

Kuwubuwelege wihina athu amodha kinonne otamalela. Muthu di muthu ahutamalela mwaha wa ethu yapama omwereliwe, wikohe: Muthu ola kanatamalela obe eere oddiwala ogitamalela? Podi wera ehikalawo ethu-sithu emuthukulele ohitamalela. Athu amodha enofuna otamalela, mbwenye enowarusa vanlubale owoga wi ginotamelela. Podi wera athu amodha enowarusa okaviheriwa, mwaha kale baaliwene yaakaviheresa athu amodha. Ebaribariya sowihina iyo naadhivelaga addibilihu ni murima wehu waatene, kannubuwelege wihina aliwa kinatamalela. Ohiya eyo, nnere odidela wakavihera amodha nuuhagalala. (Efe. 4:2) Okale muthu oovilela. Awogaga wodhela ovaha, mwene Salomawu ohusoriha egi: ‘Ovokedhe pawu yawo mmanjheni, mwaha wihina yavira malabo owinjhivene oneere ofwanya.’ (Ecl. 11:1) Ninga enawogela yolebela ela, podi wera amodha enanitamalela ‘wavira mudhidhi wowinjhivene.’ Namasugwera 09/24 epaddi 30 ddima 18-19

Malabo mamodha enovuwihiwa mmulogoni wihina muthu ohusinyusiwa, eyo yapadduwa, iyo podi odidela waredhaga ni oliye, mwaha nihinona wihina ohuthwaruwa ni ohuhiya werana ethu yabure eriliyena. Teto muthu oyo anokosa epaddi ya mulogo, bumwahaya onohowela nikavihero naaddibila vamodha ni naarogola wihina adidele werana ele eli yapama. (Ebe. 10:24, 25) Mbwenye akala muthuya akumihiwe mmulogoni kannerana emodhave. Akumihiwa mmulogoni ‘nnooselela weedda ni oliye’ teto newene ‘kannajha vamodha.’ (1 Kor. 5:11) Eyo enatapulela wihina nawoonege athu ale ekumihiwe mmulogoni ninga ohufwanelela? Naari. Ebaribari wihina kannajhege mudhidhi naaliwa, mbwenye makiristawu podi olabihedha mubuwelo waye oxagihiwe ni Bibiliya wihina ethome akala enere omwithanela muthu akumihiwe mmulogoni wihina adhe oone mutugumano. Podi wera muthu oyo di mmudhihu obe mukwihu. Namasugwera 08/24 epaddi 30 ddima 13-14