Iyo nnolobela nlobaga wi athu owinjhiva erumedhe muthenga dhapama ni ethome omulabela Yehova vamodha ni iyo. Mbwenye ki owoga wodhela athu amodha ni amudhihuya yahinanivuruwana nalaleyaga? podi wera athu enamoone Babiloniya Munlubale agujhuliwaga, enere wambela okanna nroromelo ni Yehova wi evulusiwe. Akala dhinereye ndo, sathima vanlubale wawaddela athu dhithu dhinapadduwe osogolo., athu enande wubuwela baahi dhithu nawaddenlihu, nilibihedha wawaddela ovanene. (Omuliganihe ni Ezequiel 33:33.) Podi wera wubuwela dhithu nawaddenlihu kale, enere wathukulela othoma omulabela Yehova vamodha ni iyo vati vahinase. Ndala ninga namasugwera a kambura akala oFilipu aabajhile ororomela muthenga dhapama, numala woona “oddiginyeya weelabo winlubale,” podi wera ale ehinanivuruwana peeno, enere osaddula murima wewa mwaha woona ogujhuliwa wa Babiloniya Munlubale onapadduwe morurumusa. — Dho. 16:25-34. Namasugwera 05/24 epaddi 17 ddima 9-10

Nnohudhera ethu emodha yathima ni ele murumiwi Pawulo aalebenliye makiristawu yaali mEberewu. Amodha wa aliwa yaali yahinathi withwelavo epaddi yomuzimuni ‘yahihogolowela dhithu dhinakala ninga mukaka ni yahihiya dhithu dhinavaha enonelo.’ (Ebe. 5:12) Aliwa kiyahudhera ni kiyarumedha dhithu dhixa Yehova aahudhihiye. (Pro. 4:18) Motajhiha, Yesu nuvelela egumi yaye ninga mukutho Nlamulo na Moyizeji kananna mabasa. Mbwenye makiristawu amodha yaali majudewu yahididela ohara Nlamulo na Moyizeji naarive dhigavinre yaka 30 Yesu agavelenle egumi yaye ninga mukutho. (Titu 1:10) Muthu di muthu iileri karta nna murumiwi Pawulo aalebenliye mEbereu, ere wonelamo wihina dhithu dhalebiwe mukartani mune yaali yoojha yovaadda obe yomuzimuni. Karta nna, nahakavihera mEberewu wonelamo makalelo maxa oomwebedha Yehova, yaali apama vanlubale ni yahavaha oliba murima wihina edhowegeve elaleyaga. — Ebe. 10:19-23. Namasugwera 04/24 epaddi 6 ddima 15

Okuma mudhidhi Saddana, Adawu ni Eva yamurugunuwenliwa Yehova, matxikwi ni matxikwi athu enna okwa ofiyedha peeno. Ki vano, enaapadduwe ddi ni athu aatene ekwile? Nikuru ning’ono naathu oororomeleya owakwana 144 000, enere ovenyihiwa wihina yakele egumi yohimala odhulu. (Ovuhu. 14:1) Teto matxikwi ni matxikwi aathu oororomeleya yamulabela Yehova ekwile kale, enere ohogolowela okalawo mudhidhi yavenyihiwaga athu apama. Vano yadidela okala oororomeleya wa Yehova mudhidhi wa Onamathonga wa Yaka Txikwi wa Yesu ni mudhidhi wa wehiwa wogomihedha, enerege okalawo ni mukalakala mwilaboni yavati. (Dan. 12:13; Ebe. 12:1) Mudhidhi yoyo, “athu abure” ni ale ekwile yahimunonne Yehova, enere ovahiwa ofuru wosaddula egumiwa wihina ekale adhaari oororomeleya a Yehova. (Juwa. 5:29; Luk. 23:42, 43) Mbwenye athu amodha yerilena dhoothega dhinlubale yapudhave, kinavenyihiwe muukwani. — Luk. 12:4, 5. Namasugwera 05/24 epaddi 2 ddima 3; epaddi 5 ddima 15; epaddi 6 ddima 17

Ole anafuna okala muleddo muddammwani mwa Yehova, anohowela ‘owoga ebaribari mmurimani mwaaye.’ (Sal. 15:2) Owoga ebaribari mmurimani kinatapulela ohoota baahi, mbwenye enovolowelavo dhithu dhimodha. Ohiya okala oororomeleya baahi nawogaga, nnohowela okala oororomeleya mwa dhatedhene. (Ebe. 13:18) Werana eyo sathima, ‘mwaha Yehova onootakaleliwa aliba woota, mbwenye onowandana naale eli owoogowa murima.’ (Pro. 3:32) Muthu ‘anawoga ebaribari mmurimani mwaaye,’ kaniisinjhihedha okala muthu apama akala vaari va addibila, mbwenye akalavo yeka weragana dhithu dhabure. Ohiya eyo, muthu anawoga ebaribari, kaanaleketha athu amodha. Muthu ooleketha podi wambela wubuwela wi malabo mamodha wahara malamulo a Yehova kahi ethu yapama. (Tia. 1:5-8) Teto oliye podi obajha ohawiwelela malamulo a Yehova enakala ninga kinna thima, vano oona wihina naarive eragana dhithu dhabure kavo enapadduwa, oliye podi othabwaga werana dhithu dhabure. Naarive oliye ubuwelaga wi anomulabela Mulugu, Yehova kanamurumedha muthu yoola. (Ecl. 8:11) Mbwenye iyo nnafuna nikale oororomeleya mwa dhatedhene. Namasugwera 06/24 epaddi 10 ddima 7-8

Ninga nlogo na Yehova, iyo nnodhiveliwa ebaribari enafwanyeya mBibiliyani, teto nnororomela ebaribari ela. (Rom. 10:17) Iyo nihikanna ebaribari wi Yehova diitile mulogo weekiristawu wihina okale ‘ntxikwa ni obareleya webaribari.’ (1 Tim. 3:15) Saddana eere ohagalala vanlubale ahere anoona nanganyedhaga ebaribari eli mBibiliyani teto nahiroromelaga nikuru na Yehova. (Efe. 4:14) Mohilegela Saddana anere ovuwiha dhowoota ni anere wathukulela malogo orugunuwela nlogo na Yehova. (Ovuhu. 16:13, 14) Teto Saddana anere werana dhatedhene anandiye wi alekethe nlogo na Mulugu. (Ovuhu. 12:9) Bumwahaya sathima wiwegeredha ovanene wihina nandege ohiyaniha ebaribari nnahudherihu wodhela Yehova ni dhowoota anavuwiha Saddana. (Rom. 6:17; 1 Ped. 1:22) Mwaha wi negi nande ovuluwa mudhidhi wa mahoso manlubale, nnohowela onona ohiyaniha muselu webaribari ni wowoota! Namasugwera 07/24 epaddi 8 ddima 1-3

Yehova nuwegeredha nlogo naamwaana Ezarayeli oliye werana nipangano naaliwa. Yehova ahavaha amwaana Ezarayeli malamulo yabarele ni yakavihere, vano aliwa orumedha wawiwelela. Yahere amwaana Ezarayeli ehawiwelela malamulo ale, obe neere, esakula wawebedha amulugu amodha, Yehova eere ohiya wareeliha teto aliwa yerege woona goyi. Naarive dhigaali ndo, eyo kiyatapulela wihina Yehova eere waanyanyala. Aliwa yohowela ‘omuhogolowela Yehova, Mulugu ewa, ni ovuruwana ndhu naye.’ (Deut. 30:1-3, 17-20) Ni madhu mamodha, aliwa yahikannave ofuru wothwaruwa. Teto yahathwaruwe, yere ohogolowela okanna wandana ni Yehova ni eere ohogolowela wareeliha. Naarive amwaana Ezarayeli egaali nlogo nosakuliwa ni Mulugu, dila dhowinjhivadhene aliwa kiyamwiwelela. Mwaha wa yeyo, yahithabwa woona goyi. Mbwenye Yehova kaaselele wakavihera aliwa naarive yeragana dhithu dhabure. Dila dhowinjhivadhene owaaruma anamavuhulela wihina yaalobe aliwa wihina ethwaruwe ni emulabelege Yehova ni murima waatene. — 2 Reis 17:13, 14. Namasugwera 08/24 epaddi 9 ddima 4-5

Makiristawu yaali mEberewu yakala oJeruzale ni oJudeya yahifwanyiwa makathamiho Yesu nuukwa. Ohunavire mudhidhi wowinjhiva ogiitiwe mulogo, makiristawu wambela oharahariwa. Nuuvira yaka 20, makiristawu ale yahifwanyiwa makathamiho manlubale oohawa, podi wera ohawa wule watatamuwile mwaha wa dala enlubale yafwanyile. (Dho. 11:27-30) Vano muwari mwa yaka 61 M.W, makiristawu ale yahikanna mwana murenddele. Muwari mwa yaka yele, makiristawu ale yahakela karta murumiwi Pawulo avetheliwiye oleba, teto mwebaribareene karta nne, nafiyile mudhidhi wofwanelela mwaha wa dhithu dhafuna opadduwa osogolo. Karta yakenle mEberewu nafiyile mudhidhi wofwanelela, mwaha mwana murenddele ole yanniwana kuwalegele. Murumiwi Pawulo wavaha dholaga makiristawu ale dhakavihere wawanana makathamiho yafwanye osogolo. Namasugwera 09/24 epaddi 8 ddima 1-2

Nafwanyiwaga makathamiho, addibilihu podi okala “ntxela nolibiha vanlubale.” Yehova anowalabihedha addibilihu ni arogola wihina anonihe odhivela waye. Addibila ala enonlibiha mwaha enonipwasedha onivuruwana ni enowilibihedha wonelamo dhithu dhinanipadduwela. Malabo mamodha, naarive ehiwogile ethu, mbwenye mwaha okala epaddi yehu nnokala oolibeene. Aliwa podi ononiha yolebela yolibiha obe olobela vamodha ni iyo. (Rom. 15:4) Malabo mamodha, aliwa podi onikavihera wubuwela makalelo Yehova anooniye dhithu dhinanipadduwela. Ndo iyo podi okala oopwaseyene ni wanda ovilela. Teto nakala owukuwene addibila podi onikavihera ni ethu-sithu ninga onivaha yoojha wihina nikanne kopolo. Wihina addibila enikavihere, aliwa enohowela onona ethu nnahowelihu. (Pro. 17:17) Mwaha aliwa podi ohunona makalelo nilihu ni dhithu nnahowelihu. (Pro. 14:10) Bumwahaya omwaaddele mukwawo onamuroromeliwe obe ddibila owithwelavo epaddi yomuzimuni. Wawaddele ethu onahoweliwe wihina yukavihere. We podi othoma othapanya ni namaholela mulogo mmodha obe aabili walemeliwe. Akala oli murogola we podi othoma othapanya ni murogola mmodha withwelavo epaddi yomuzimuni. Namasugwera 10/24 epaddi 10 ddima 15-16

Athu owinjhiva enokosa exersisiyu ni enojha pama wihina ekanne egumi yapama ni ekalewo malabo owinjhiva. Naarive yilibihedhaga ojha pama ni omwerana exersisiyu, aliwa ehinona wi enere okwa. Vano mwaha aliwa onona wi enere okwa, aliwa enubuwela wi kinandeya okalawo ni mukalakala. Mbwenye Yesu owoga mwamakalelo owoneleyamo wodhela “egumi yohimala” va yolebela ya Juwawu 3:16 ni 5:24. Nlabo dhaala Yesu ahavaha muthithi waathu pawu vamodha ni oba mwamakalelo ootikiniha. Ele yahahagalasa vanlubale, mbwenye ethu awogiliye nlabo noharela yaali yothabwa otikiniha. Muthithi ole Yesu ajhihiliye yahimuhara oKafarnawu. Vano nufiya waddamela oGalileya, Yesu wawaddela wi athu ekwile enere ovenyihiwa ni enere okalawo ni mukalakala. (Juwa. 6:39, 40) Madhu Yesu awogiliye enonivaha ebaribari wihina athu ekwile enere ovenyihiwa, nihiyoya nnere okanna egumi yamukalakala! Namasugwera 12/24 epaddi 8 ddima 1-2

Muselu dhaala ovuwihiwe nnikuru naakudda egumi, nnawoga wihina alobwana owinjhiva etenle enowawoniha goyi amwaariwa wodhela waavada, waruwana ni werana dhithu dhinapiha mbani. Alobwana amodha enariha baahi amwaariwa yakala vaari va athu, mbwenye yakalavo abiili kinaariha. Mwahaya bwaddi alobwana amodha egaweddiha amwaariwa mwamakalelo abure? Aliwa podi wubuwelaga wi dhithu dhatedhene eneriwana kahi dhabure. Amodhaya enahara mweddelo wa murudda wewa. Motajhiha, dhilabo dhimodha athu enowoga wi mulobwana eebaribari, anohowela olabihedha kopolo dhaye wihina amoonihe mwariye wi duliye anathonga vaade. Teto alobwana amodha kinanda osugwera mubuwelo ni owali wewa. Ohiya eyo, alobwana amodhaya enokanna monelo wabure wodhela ahiyana ni ogonihana, mwaha enothabwa omoona pornografiya. Teto yothabwaya sowihina, muselu dhimodha dhivuwihiwe mudhidhi wa koronaviru, dhinawoga wihina alobwana amodha yahibajha waweddiha amwaariwa mwamakalelo abure. Naarive dhipadduwaga dhithu dhohiyana-iyana ninga ndha dhisorihiwe vala, alobwana etenle enohowela odidela waariha amwaariwa. Namasugwera 01/25 epaddi 8 ddima 2-3

Yesu ahiwoga nlamulo nathima nnafwanyeya mu nlamulo na Moyizeji, nuwoga eegi: “Omudhivelege Yehova Mulugu awo ni murima wawo waatene, emuthu yawo yatene, kopolo dhawo dhatedhene, mubuwelo wawo waatene.” (Luk. 10:27) Omudhivela Yehova enovolowelavo murima wehu, dhofuna dhehu, mubuwelo wehu ni dhithu nnubuwelihu. Teto enovolowelavo omwebedha Yehova ni emuthu yehu yaatene vamodha ni kopolo dhehu dhatedhene. Ohiya eyo, omudhivela Yehova enovolowelavo mubuwelo wehu ni makalelo nnalabihedhihu mubuwelo wehu. Ebaribari wi kannadha noonelamo pamadhene mubuwelo wa Yehova. Mbwenye iyo podi otajhiha makalelo owubuwela a Yehova wodhela ohudhera “mubuwelo wa Kiristu.” Mwaha wihina Yesu ootajhiha pamadhene makalelo owubuwela a Yehova. — 1 Kor. 2:16. Namasugwera 03/25 epaddi 8 ddima 1

Yesu aali oologomana ndala ninga Adawu ahinathi otheega. (1 Kor. 15:45) Bumwahaya Yesu nuukwa mwaha wa dhothega dhehu, oliye ahanda oliva muthengo wa dhithu dhatedhene Adawu aayeleliye. (Rom. 5:19) Ni makalelo yala, Yesu okala “Adawu oogomihedha.” Kinahoweleya odha muthu mmodha oologomana wi alive muthengo wa ele Adawu ayeleliye. Mwaha Yesu akwile ‘dila modha ni mukalakala.’ (Ebe. 7:27; 10:12) Ohiyana baani olivo wa oleveleliwa wa dhothega ni yowobola? Oleveleliwa wa dhothega, sithu Yehova aneriyena wihina nandane nuliye. Mbwenye yowobola, muthengo oliviwe wi dhothega dhehu dhileveleliwe. Muthengo wa yowobola, thi nikame nathima na Yesu nikuthuliwe wihina dhileveleliwe dhothega dhehu.— Ebe. 9:14. Namasugwera 02/25 epaddi 5 ddima 12-13

Omoona Yehova ninga Mulugu ookalawo enere onikavihera woonaga dhoweha mwamakalelo apama. Ni makalelo baani? Nafwanyiwaga yoweha, nnohowela wubuwela ethu eli yathima vanlubale. Saddana anawoga wi naafwanyiwaga makathamiho, nnere ohiya omulabela Yehova, bumwahaya ethu nnerihuna nafwanyiwa makathamiho enompatha pamadhene Yehova. (Jó 1:10, 11; Pro. 27:11) Iyo nadidela okala oororomeleya wa Yehova naarive nifwanyiwaga makathamiho, nnowoniha wi nnomudhivela ni nnowooniha wi Saddana muliba woota. Makathamiho baani onawaniwena mudhidhi yoola? Oharahariwa ni anamathonga, ohikanna korowa, widdiwa wakala mmabasani oolaleya obe makathamiho mamodha? Akala onofwanyiwa makathamiho bi makathamiho esorihiwe vala, kudduwale wi makathamiho ayo enuufwanya enowuvaha ofuru womuhagalasa Yehova. Teto kudduwale, Yehova kanuhiye ofwanyiwa makathamiho ohunandiwe wavilelana. Oliye anerege wuvaha kopolo wihina wande ovilelana. Namasugwera 06/24 epaddi 22 ddima 9

We ohunona dhithu dhinukwerebeyiha? Ethu yowopiha wubuwela wihina kaninna dhithu dhinanikwerebeyiha obe wubuwela wi kannadha nerana yothega mwaha nili athu owithwelavo epaddi yoomuzimuni. (1 Juwa. 1:8) Mbwenye kudduwale ethu murumiwi Pawulo aawogiliye egi: Naleya eli ‘owithwelavo omuzimuni’ podi werana yothega yahikala pasope. (Gal. 6:1) Bumwahaya nnohowela orumedha wi aatene iyo nihikanna ethu-sithu enanikwerebeyiha. (2 Kor. 13:5) Ki namala onona dhithu dhinanikwerebeyiha, nnere ddi? Nnohowela olibiha efunelo yehu yohimorela muwehiwani! Motajhiha, mudhidhi wa kale epaddi ya txinga yaali yokweya amwiddani ovolowa, waali omusuwoni wa txinga, bumwahaya yopwehiwawo anamasugwera owinjhiva wihina esugwerege musiwodha. Ni makalelo mamodhave, iyo nnohowela okala pasope ni dhithu dhinanikwerebeyiha, wi nande ogonjhiha yoweha yanthukulele werana yothega. — 1 Kor. 9:27. Namasugwera 07/24 epaddi 15 ddima 5-7

Mabasa apama enasorihiwa va yolebela ela, enovolowelavo mabasa oolaleya muthenga dhapama. Bumwahaya namwilerigi Bibiliya ni naapenddaga dhithu nnilerihu, nroromelo nehu ni Yehova nnooliba ni nnowanda wonelamo mwahaya bwaddi sathima wapara mabasa ala oolaleya. Wihina nande wapurelamo pamadhene madhu a Mulugu, kuthabwege waguviha mudhidhi wilerigi, wahudheraga ni wapenddaga madhu a Mulugu. Wahudheraga opwasedhege pamadhene. Wileri yolebela ni wahonelagamo, kulupe. Ohiya eyo omulabihedhe Índice das Publicações da Torre de Vigia obe Guia de Pesquisa para Testemunhas de Jeová wihina ofwanye yotapulela ya yolebela ele. Wasayela mudhidhi wihina ohudhere nupwaseya, onere okanna ebaribari wi ndhe anawoga Bibiliya sebaribari. (1 Tes. 5:21) Vano wakanna ebaribari wihina Bibiliya madhu a Mulugu, ohagalala wawo onere wenjhedhedheya ni onerege ofuna othapanya ni athu amodha wodhela ndhe onahudheriwe. Namasugwera 04/24 epaddi 15 ddima 4-5

Davidi ohuwoga eegi: “Mwaha wi nyu Yehova, muli apama ni owaguva olevelela.” (Sal. 86:5) Mikeya ohuleba eraga: ‘Mulugu baani analigana ni nyu, analevelela dhoviriganiha ni anadduwala dhothega dha nlogo naaye?’ (Miq. 7:18) Vano Izayiya owoga egi: ‘Athu abure ehiye weedda dila yewa, athu a murima wabure, mubuwelo wewa; emuhogolowele Yehova, anere waweddela thagaraga, wa Mulugu ehu, mwaha anolevelela ni murima wamutene.’ (Isa. 55:7) Wihina emutajhihe Yehova, makiristawu oKorintiyu yohowela omulevelela mulobwana ole ni omooniha wihina yoomudhivela. Mwaha ohara dhoholela dha murumiwi Pawulo, makiristawu ale yere wooniha wihina yaali “owiwelela mwadhatedhene.” Ebaribari wihina mulobwana ole muwari ahogolonwe muwari mwa mweri dhing’onove, mbwenye osinyusiwa wule wahimukavihera vanlubale. Bumwahaya woona wihina mulobwana ole ahithwaruwa kayahooweleya ojheha mudhidhi wowinjhivene wihina ahogoloseliwe mmulogoni. Namasugwera 08/24 epaddi 17-18 ddima 12-13

Iyo nnakalawo mudhidhi dhinapadduwa dhithu dhowinjhiva dhotikiniha! Teto mohulegela Yesu anere watoriha athu aateene. Yesu ahiwoga dhithu dhaapadduwege ofiyedha mudhidhi wotoriha wodhela wavaha “yintelelo” anamahara aye dhonihege wihina oliye ohambela othonga ni “omakuthulo wa dhithu dhatedhene” ohaddamela. (Mat. 24:3) Yintelelo ela enafwanyeya livuru na Matewuji, kapitulu 24 ni 25, ni yolebela ya Marku kapitulu 13 ni Lukaji kapitulu 21. Yesu ahawaddela anamahara aye muselu dhofuneya dhawoga wodhela dholaddaniha tharu. Yoladdaniha yobajha, enawoga wodhela mambila ni mbuzi. Yanabili, wodhela anamwali yahinagonege ni alobwana ooxaga ni oolodhowa ni yanatharu, ya talentu. Kadda yoladdaniha enonikavihera wonelamo wihina ekalelo ya kadda muthu, enere ovolowela makalelo anafuniye otorihiwa. Namasugwera 09/24 epaddi 20 ddima 1-2

Yesu ohunihiyedha yotajhiha yapama nnahowelihu ohara. Mwaha dhithu dhaatedhene eriyena, eerana mwaha wa odhivela anniyena ni Yehova vamodha ni athu. Odhivela anna Yesu, wahimuthukulela wakavihera athu ni wapara mabasa owiyeviha. (Mat. 20:28; Juwa. 13:5, 14, 15) Ddibila ni weya weragana dhithu dhaatedhene nuudhivela, Yehova anere wureeliha ni anere wukavihera wihina wande wakwanihedha yoluba yawo yomuzimuni yokala mudhaari ookavihera. (1 Ped. 5:5) Peeno, athu owinjhiva enowaatikina athu owithukula ni enasayela okala oovuwa. Mbwenye nlogo na Yehova kanili ndo. Mudhaari ookavihera anaakavihera addibila amodha mwaha wa odhivela ndala ninga Yesu, kanasayela okala akopolo, owithukula, newene kanasayela okala athima wapitha amodha. Motajhiha, ahere ddibila owithukula athomiwa ninga mudhaari ookavihera, podi wera oliye kaarumedhe waapara mabasa owiyeviha, enahoweleya wihina mambila a Yehova esamaleliwe. Mwaha wihina oliye anoothabwa wivaha thima ni anubuwela wi kanahowela wapara mabasa owiyeviha. — Juwa. 10:12. Namasugwera 11/24 epaddi 15 ddima 6-7

Wapela elabo yaatene, enohoweleya “alobwana [eli ninga] nvaho.” (Efe. 4:8) Akala we oli ddibila oobaddiziwa ‘ohukanna efunelo yokavihera?’ (Pro. 3:27) Ohukanna efunelo yowilibihedha wihina okale mudhaari ookavihera? Akala oli mudhaari ookavihera, ohukanna efunelo yokala namaholela mulogo wihina othabwege wakavihera addibila ammulogoni? Enowandeya wawerana masadduwo mwigumini mwawo wihina okursari Eskola ya Anamalaleya Oomwene? Eskola ela enere wuxagiha ni enere wukavihera wihina othabwege olabihedhiwa ni Yesu. Akala we onubuwela wi kunande wakwanihedha dholuba ndha, olobele wa Yehova. Teto we podi omuloba Yehova muzimu waye wotxena wihina wukavihere wakwanihedha mutholo bu mutholo onakeliwe. (Luk. 11:13) Addibila enalabihedhiwa ni Yesu, eli ninga “nvaho,” ethu enooniha wi Yesu anna onisamalela malabo yaala ookuthula. (Mat. 28:20) Mwebaribarene iyo nnotamalela vanlubale mwaha okanna Mwene ananithuwathuwela, ananidhivela, ali oovaha, ni ananivaha addibila eli owegeredheyene wihina enisamalele ni ethu-sithu nnahowelihu. Namasugwera 10/24 epaddi 23 ddima 16-17

Ki owoga wodhela goyi ni makathamiho aatene enaafwanya adhaari a Mulugu? Osogolo goyi yaatene ela, ‘eneere odduwaliwa ni eneere okala wolapela ni mento [a Mulugu].’ (Isa. 65:16) Yehova anere wamariha makathamiho aatene enanifwanya, teto nnere oddiwala dhithu dhaatedhene dhabure dhinipadduwenle. Peeno naarive nihinathi ovolowa mwilaboni exa, nnowanda waddiwala makathamiho enanifwanya mwilaboni muna yabure, ni kannathabwa othuwathuwa nakala mmutugumanoni. Iyo nnokavihera wihina opwaaseya ninnihuna mparayizuni ehu oomuzimuni odhowegeve wodhela woniha dhikalelo dhinakosa epaddi ya yowima ya muzimu wotxena, ninga: Odhivela, ohagalala, murenddele, opama, ni opwaaseya. (Gal. 5:22, 23) Oneti winlubale okala epaddi ya nikuru na Yehova! Athu yaale enaadidele okala mparayizuni oomuzimuni, enere woona wakwanela wa mpaganyo dhaatedhene dha Mulugu dhowavaha ‘elabo yodhulu ni elabo yavati exa.’ Namasugwera 04/24 epaddi 22 ddima 9-10

Ebaribari wi mudhidhi wovevana podi okala wohagalasa, mbwenye sathima ohudduwala wi omwenddi, thalo enlubale yamwigumini enaathukulela athu abiili otelana. Labo na matelo, mulobwana ni muhiyana enopaganya vamentoni va Yehova wi enerege odhivelana ni orihana mmodha ni mukwaye egumiwa yaatene. Ndala ninga nafunaga werana mpaganyo bu mpaganyo, iyo nnohowela wubuwela pamadhene. Nimakalelo mamodhave muthu ahinathi werana mpaganyo ola wotelana anohowela wubuwela pamadhene. Ethu enaathukulela athu abiili ovevana, funonana pamadhene wi yerena yothoma yapama. Malabo mamodha, yothomaya podi okala otelana obe naari. Vano akala athuya enavevana enothoma omariha omwenddi wewa, eyo kinatapulela wi omwenddi wewa kaweddile pama. Mbwenye, eyo enatapulela wi omwenddi wewa ohakavihera werana yothoma yapama. Teto yothomaya podi okala otelana obe naari. Mwahaya bwaddi sathima onona ethu enaathukulela athu abiili ovevana? Muthu ali muddiye anona pamadhene yotapulela ya omwenddi, kanaabajhe onveva muthu ahinna efunelo yootela. Namasugwera 05/24 epaddi 26-27 ddima 3-4

Malabo mamodha azombwe owinjhiva enowarusa wakihedha ndhe enarumedhiwa. Motajhiha, Podi wera aliwa enowoova owoga ele enarumedhiwa yakohiwaga wodhela muselu bu muselu. Mwahaya bwaddi egovaga? Mwaha purusori podi owogaga wihina dhihikalawo dhithu dhinoniha wihina dhopaddusa dhere oruthuwa. Akala we oli baabi, onamukavihera aavi mwanawo wonelamo wi ele anarumeedhiye seebaribari? Omwaaddele mwanawo wi kanahowela okanna manyazo mwaha orumedha wi ohukalawo mpaddusi. Mwahaya bwaddi kanahowela okanna manyazo? Mwaha masiyentista owinjhiva kinarumedha wi elabo yere oruthuwa. Aliwa yahudheraga makalelo epaddusiwe egumi, enowoona wihina ohukalawo muthu athotho eegeredhile dhithu dhatedhene. Ndala enowarusa orumedha muselu wa oruthuwa. Ethu emodha enaamukavihere mwanawo olibiha nroromelo naye, futhapanya ni addibila ni arogola yandile wonelamo wi dhithu dhatedhene kadhere oruthuwa, mbwenye dhere opaddusiwa. Namasugwera 12/24 epaddi 18 ddima 14-15

Yesu ahithoma ovilela wodhela odidela wapara mabasa olaleya. Teto eyo yahimukavihera oliye wilibihedha wihina erena ele andiye. Motajhiha, egavinre yaka modha Yesu alaleyaga muthenga dhapama, Oliye wonelamo wihina athu owinjhiva yahithoma orumedha muthenga dhapama. Mwaha wa yeyo Yesu ahifiyedha waliganiha athu ale ninga mundda oona dhoojha dhinahoweliwa ohaddiwa. (Juwa. 4:35) Bumwahaya vasogolova, oliye owoga ni anamaharaye eegi: “Mwebaribarene mabasa ala ohadda ehinjhiva, mbwenye anamalabaya kahiyo anene.” (Mat. 9:37, 38) Podi wera oliye asorihile madhu ala egavinre yaka modha, teto nuuvira mudhidhi oliye owoga ni anamaharaye eegi: “Bumwahaya mmulobe mwinnya amunddaya wihina aarume anamalaba amodha edhe ehaddege.” (Luk. 10:2) Yesu ahikanna ebaribari wihina athu yere orumedha muthenga dhapama. Teto oliye ohagalala vanlubale awonaga athu erumedhaga muthenga dhapama. Wihina Yesu akavihere anamahara aye oviheyana mabasa olaleya, Yesu wawonelihamo wi muthenga aliwa yalaleyiwa yere wadhana mareeliho owinjhiva. Namasugwera 03/25 epaddi 18-19 ddima 15-16

Iyo podi othawela onikuguni wa nibwe, nafwanyiwaga nipevo ninlubale. Ni makalelo mamodhave, Yehova podi onibarela naafwanyiwaga makathamiho oorusa mwigumini mwehu. Oliye anonibarela wi nidhowegeve nandanaga nuliye. Teto anonipaganya wi kaawo makathamiho enanifwanya peeno, ehinadha emala. Ohiya eyo, anopaganya wi osogolo anere wamariha makathamiho maatene enanithuwathuwiha. (Eze. 34:25, 26) Makalelo oomusayela Yehova ninga nikungu nehu nothawelawo, fuudhela olobela. Iyo nalobelaga, Yehova anonivaha ‘murenddele [waaye]’ onaakurumusa murima ni mubuwelo wehu. (Fil. 4:6, 7) Yehova kanadha ahiya onikavihera. Teto iyo podi omuroromela, mwaha oliye ‘Nibwe namukalakala.’ (Isa. 26:3, 4) Yehova anerege okalawo ni mukalakala, teto anere wakwanihedha mpaganyo dhaye, wavuruwana malobelo ehu ni onikavihera. Ohiya eyo, iyo podi omuroromela Yehova, mwaha oliye dororomeleya ni ale enamulabela. (2 Sam. 22:26) Oliye kanadha addiwala ndhe nimwerelihu ni anere onreeliha mwaha mabasa maatene nnamparelihu. — Ebe. 6:10; 11:6. Namasugwera 06/24 epaddi 27 ddima 4-6

Nnohowela orabela ethu-sithu yanthukulele ononga wandana ninnihuna ni Yehova. Motajhiha, nnohowela okala pasope ni dhithu nnasistirihu obe yaredhelo yehu. Teto nnohowela wasakula pama akwihu ni ohubuwela wi okanna korowa dhowinjhiva obe okala muthu oorela sili ethu yathima mwigumini mwehu. Vano noonelamo wi ehikalawo ethu-sithu enaridhiha wandana wehu ni Yehova, nnohowela osukuma ethu yeyo mowaguva. (Mat. 5:29, 30) Kanenye werana dhithu biili mudhidhi mmodhave, wodhela omwebedha Yehova ni werana dhithu oliye aniddiye. Iyo podi wileketha nubuwelaga wi mwaha wapara mabasa owinjhiva omuzimuni, dhithu dhabure kadhinanivolowele. Motajhiha, kabiha wubuwela ogamanle oxela mba, nuwindo wafugula majanela ni musiwo wihina nivolobwe nipevo nithukunle lixu. Kunonelamo wi woonile goyi ebewene? Nnahudhera ddi ni yoladdaniha ela? Nnahudhera wihina ohiya baahi werana dhithu dhapama dhinalibiha wandana wehu ni Yehova, nnohowela orabela dhithu dhabure dhanonge wandana wehu ni Yehova. Ni madhu mamodha, nnohowela ofuga majanela ni musiwo wa murima ni mubuwelo wehu wihina nnavolowe lixu na elabo ela ya Saddana. Nerana ndo, nipevo nnadhana lixu na elabo ela, kannanivolowele ofiyedha ogawa murima wehu. — Efe. 2:2. Namasugwera 07/24 epaddi 21 ddima 6-7

Mwebaribarene iyo kannanda wonelamo goyi yaatene Yesu ooniliye mudhidhi yole, mwaha ahithabwa wonihiwa goyi ni aheeddihiwa mwamakalelo abure. Yesu kaahiile okala ororomeleya ni oodhivela, naarive eeddihiwaga mwamakalelo abure. Ohiya omuloba Yehova wihina asinyuse anyakoddo ale yamoniha goyi, Yesu ahalobelela eegi: “Babani, kaaleveleleni, eneriwa kinoona.” (Luk. 23:34) Nalobelelaga ale enaneddiha mwamakalelo abure, nnorabela okoya ntxiga nuutakaleliwa, teto eyo podi onikavihera wawonaga mwamakalelo apama athu enaneddiha mwamakalelo abure. Woona wi nnakala mwilaboni muna yabure, nlabo nimodha nnere weddihiwa mwamakalelo abure. Mbwenye naarive needdigiwaga mwamakalelo abure, kahiye omuloba Yehova nikavihero. Ohiya eyo, nididele oparihedha mabasa malagano a mBibiliyani, teto kanidduwale omutajhiha Yesu neddihiwaga mwamakalelo abure. Neragana dhithu ndha, nikanne ebaribari wi Yehova anere onireeliha nimukalakala. — 1 Ped 3:8, 9. Namasugwera 11/24 epaddi 6 ddima 16; epaddi 7 ddima 17, 19

Yehova kanarumedha mweddelo dhaatedhene. Oliye onowidda yothega. (Sal. 5:4-6) Yehova anajhehedha wihina iyo aatene nawiwelelege malamulo aye eli mBibiliyani. Mbwenye Yehova kanajhehedha wihina nikale ologomana mwaha nili athu otheega. (Sal. 130:3, 4) Mudhidhi mmodhave Yehova kanawenya “athu enerana dhithu dhamanyazo yinkedhaga opama wohinifwanelela wa Mulugu.” (Juda. 4) Mwebaribarene Bibiliya anowoga “otolosiwa wa athu abure” mukoddoni ya armajedo. (2 Ped. 3:7; Ovuhu. 16:16) Mbwenye Yehova kanafuna wi muthu di muthu atolosiwe, ohiya eyo Bibiliya anawoga wihina oliye ‘anafuna wi athu aatene ethwaruwe.’ (2 Ped. 3:9) Anamaholela mulogo enoomutajhiha Yehova wodhela okala ovilela yakaviheraga ale ekumihiwe mmulogoni osaddula mweddelo wewa ni ohogolowela wandana ni Yehova. Namasugwera 08/24 epaddi 26 ddima 1-2

Ndala ninga Yehova anasamaleliye athu mwaha wadhivela vanlubale. Iyo podi wakavihera athu amodha ni dhithu enahoweliwa epaddi yomwilini. Motajhiha, we ohumunona ddibila obe murogola anahowela yoojha obe yowara? Yehova podi wulabihedha we wihina omukavihere ddibila oyo. Nlogo na Yehova nihinoniwa ninga athu oovaha thabwathabwa yapadduwa ngovi. Motajhiha, mudhidhi wa mutipa wa Koronaviru addibila ni arogola owinjhiva, yahakavihera athu amodha yahowela nikavihero ni dhoojha, dhowara ni dhithu dhimodha. Teto owinjhiva yaherana dhovelela wihina yakavihere mabasa ehu enapariwa wapela elabo yaatene. Teto dhovelela ndha dhihilabihedhiwa wihina ekaviheriwena addibila yaafwanyiwe ngovi. Addibila ala oovaha, ehiparihedha mabasa ele enafwanyeya va yolebela ya Eberewu 13:16 enihina: ‘Kamuddiwale werana opama ni ogawana ele munninyuna, mwaha Mulugu onodhiveliwa mukutho ndho.’ Namasugwera 09/24 epaddi 27 ddima 6-7

Kabiha wubuwela yoladdaniha ela. We onna wasayela mabasa wihina wande wasamalela amudhawo. Vano we wafwanya mabasa menli. Teto mabasa ayo kinalupa malagano a mBibiliyani. Onere ddi? We onere wubuwela dhithu dhinavolowela kadda mabasa. Ninga motajhiha, mabasa baani onaparegiwe, olenddo oneddigiwe okuma omabasani odhowa vadevawo, aporogarama onapanddigiwe akala onerege wanda wawakwanihedha ni dhithu dhimodha onaafunegiwe werana. Podi wera onere wasakula mabasa onaadhiveliwe obe onasakula ale ononiwe wihina enovaha korowa dhowinjhiva. Mbwenye dhihikalawo dhithu dhimodha onahoweliwe wubuwela wahinathi werana yothoma si yothoma. Motajhiha, mabasaya enere wuthukulela ohanda woona mutugumano? Obe onerege wanda okala ni emudhaawo mudhidhi wowinjhiva ni wasamalela epaddi yomuzimuni? Yowakula yamakoho ala, enere wukavihera osogoliha “dhithu dhili dhathima” obe webedha wawo ni dhofuna dha amudhaawo, ohiya othuwathuwela okanna korowa dhowinjhiva. Wubuwela ni makalelo yaala, onere wanda werana yothoma enaamuhagalase Yehova, teto oliye anere wureeliha. Namasugwera 01/25 epaddi 17 ddima 11-13

Naarive akala athu amodha ehuweddiha mwamakalelo abure, okanne ebaribari wi Yehova anoothabwa wudhivela ni anowuvaha thima. Akala we oli ‘ookwerebeyene,’ kuddiwale wi Yehova ohunona dhikalelo dhapama onniwena, bumwahaya adhe usakulege wihina omulabelege. (Juwa. 6:44) Yehova anofuna vanlubale wukavihera mwaha wi we ohuthabwa okanna thima vamentoni vaye. Iyo podi ohudhera makalelo anubuwela Yehova wodhela ohudhera yotajhiha ya mwanaye Yesu Kiristu. Mudhidhi agaali velaboni yavati, Yesu owapwatha athu yeeddihiwa mwamakalelo abure ni yooniwa ninga athu yahanna thima. (Mat. 9:9-12) Motajhiha, muhiyana dhaala anna oredda wowopiha nuhidda yowara ya Yesu wihina avulumuwe, Yesu omutodola ni omuthethela mwaha oliye woniha nroromelo naye. (Mar. 5:25-34) Iyo nihinona wi Yesu ootajhiha pamadhene dhikalelo dha Ababe. (Juwa. 14:9) Bumwahaya okanne ebaribari wi Yehova anowuvaha thima ni anowoona dhikalelo dhawo dhapama vamodha ni nroromelo nuudhivela onniwena. Namasugwera 10/24 epaddi 7 ddima 4-5

Davidi ahifwanyiwa makathamiho oorusa yamuthukulela wunla mwigumi mwaaye. Oliye oowawanana makathamiho yamutotala athu amodha ni ahifiyedha orugunuweliwa ni akwaye aaroromeliye. (1 Sam. 19:10, 11; 2 Sam. 15:10-14, 30) Davidi ahifiyedha owoga egi: ‘Gihigoma mwaha wa makathamiho, emahiyu yaatene kamaaga enoonyetha mwaha wa mitori, ginowunla ofiyedha onyethiha ni mitori mburo ginagonimi.’ (Sal. 6:6) Athu owinjhiva yahimwerela Davidi dhithu dhabure. Eyo yahimpiha mbani Davidi ofiyedha ohandaga omaala wunla. Naarive Davidi afwanyiwaga makathamiho oohiyana-hiyana, oliye kaanganyedha wihina Yehova Mulugu oomudhivela. Oliye ohuleba eegi: ‘Yehova aneere ovuruwana wunla waaga.’ (Sal. 6:8) Dhithu Davidi asorihiliye va yolebela ya peeno dhinodahinya murima, mwaha dhinowoniha makalelo Yehova ananidhiveliye ni ananithuwathuweliye. Wa Davidi yakala ninga Yehova anakoya mitori dhaye muthumbani obe analeba mulivuruni mudhidhi wamuteene unliye. Davidi ahikanna ebaribari wihina Yehova owoona goyi yaye ni ompwatha vanlubale. Teto ahinona wihina Baabi aye oodhivela Yehova, owonelamo dhithu dhaatedhene dhampadduwela ni makalelo aaliye. Namasugwera 12/24 epaddi 22 ddima 11-12