Anamahara a Yesu, yowavuruwana madhu a Mulugu ni yowilibihedha omwiwelela Yehova. (Juwa. 17:6) Naarive dhigaali ndo, aliwa yahithuwathuwa vanlubale mwaha Yesu opiwa mwamakalelo abure ni winkedhiwa ninga mpanga. Yesu ahinona wihina anamahara aye yahikanna nroromelo ni yomudhivela Yehova. Mbwenye oliye ahonelamo wihina aliwa yohowela wonelamo pamadhene Dholebela. (Luk. 9:44, 45; Juwa. 20:9) Vano oliye wakavihera aliwa wonelemo dhithu yiileriwa mBibiliyani. Kasugwa makalelo Yesu eriliyena eyo, mudhidhi anamahara ale abiili edhowaga luwani yoEmawu. Omambelelowene Yesu kawaddele wi oliye aali Yesu. Ohiya eyo, oliye ambele othapanya naaliwa wodhela wakoha. Mwahaya bwaddi Yesu adhe eregena ndo? Podi wera Yesu afuna anone dhithu yubuweliwa. Teto siyeyo aliwa yeriliwana. Aliwa omwaddela wihina yajheha wi Yesu akale mwene a nlogo naamwaana Izarayeli ni awobole maJudewu yaali adhaari oRoma. (Luk. 24:18-27) Nuwindo, oliye olabihedha Dholebela wihina aakavihera alobwana ale wonelamo wihina dhovuhulela dhatedhene dhahimala wakwanela. Vasogolova emahiyu yeele, Yesu wafwanya anamahara amodha ni wawonelihamo yovuhulela ele. — Luk. 24:33-48. Namasugwera 10/24 epaddi 14 ddima 9-10

Yesu aahudhenre ni Ababe ethu yowerana ni yowoga. Nikuru na Yehova peeno, nnohara yotajhiha ya Yesu wodhela omulabihedha Bibiliya wihina enihudhihe ele eli yapama ni yabure ni onikavihera werana dhithu dhinamuhagalasa Yehova. (2 Tim. 3:16, 17) Nikuru na Yehova nnonubusedha dila dhowinjhivadhene omwileri Bibiliya ni oparihedha mabasa mwigumini mwehu dhithu nnahudherihu mBibiliyani. Wiwelela yolaga ela, enanikavihera ni makalelo baani? Iyo nnopurelamo vanlubale naamuhudheraga Bibiliya ninaalabihedhaga malivuru ehu. Motajhiha, nnoliganiha ndhe Bibiliya anawogiye ni dhoholela nnakelihu munikuruni mwa Yehova. Vano noonelamo wi dhoholela nnakelihu dhinadhela mBibiliyani, nnothabwa ororomela nikuru na Yehova. (Rom. 12:2) Yesu “oolaleya muthenga Womwene wa Mulugu.” (Luk. 4:43, 44) Teto, Yesu aharuma anamahara aye olaleya muthenga ola wa Omwene. (Luk. 9:1, 2; 10:8, 9) Peeno, aatene iyo nnahara dhoholela dha nikuru na Yehova, nnolaleya nihipwathile mburo nnakalihu. Namasugwera 04/24 epaddi 9 ddima 5-7

Ororomelege nikuru na Yehova. Kale Yehova ahimulabihedha Moyizeji ni Jozuwe wihina yavahege dhoholela amwaana Ezarayeli. (Jos. 1:16, 17) Amwaana Ezarayeli yorelihiwa vanlubale, yaharaga dhoholela yaakeliwa ni alobwana ala. Teto nuuvira yaka dhowinjhiva, mulogo weekiristawu nuwitiwa, yaali arumiwi owakwana 12 yaholela nlogo na Yehova. (Dho. 8:14, 15) Vasogolova nikuru nne na arumiwi nahenjhedhedheya ni anamaholela amodha ooJeruzale. Vano makiristawu yaharaga dhoholela yakeliwa ni alobwana ale oororomeleya, “addibila ammulogoni yolibihiwa munroromeloni ni yowinjhivana kadda labo.” (Dho. 16:4, 5) Nihiyoya peeno nnorelihiwa vanlubale, naharaga dhoholela nnakelihu munikuruni mwa Yehova. Namasugwera 07/24 epaddi 10 ddima 10

Yehova oothabwa omudhivela mwene Davidi, ofiyedha owoga egihina oliye muthu: ‘anahagalasa murima waaga.’ Mbwenye Davidi ahithabwa werana dhotheega dhinlubale ninga okuma mba ni ompa muthu. Mowiwanana ni Nlamulo aavahiwe Moyizeji, Davidi afwanelela opiwa baahi. (Lev. 20:10; Núm. 35:31) Naarive dhigaali ndo, Yehova oofuna omukavihera mwene Davidi othwaruwa. Oliye omuruma namavuhulela Nata wihina amwaredhele Davidi, naarive Davidi ahonihile wihina ahithwaruwa. Nata olabihedha nladdaniho niwanana ni museluya wihina adahinye murima wa Davidi, vano Davidi wonelamo museluya. Oliye wonelamo wihina ahithabwa omuukula Yehova vano oliye wukuuwa vanlubale. (2 Sam. 12:1-14) Madhu enafwanyeya mulivuruni na Salmo enowooniha wihina Davidi ahithwaruwa. (Sal. 51, musolo) Athu owinjhiva enafiyedha otheega yawileri madhu enafwanyeya va Salmo enawona madhu ala ninga elebeliwe aliwa. Wuubuwela makalelo Yehova amonihiliye odhivela Davidi ni omukavihera ofiyedha othwaruwa, onakala aavi? Namasugwera 08/24 epaddi 10 ddima 9

Athu owinjhiva enorumedha wi walela ahima winovaha mabasa. Akala oli baabi mwebaribarene onowilibihedha vanlubale wihina omukavihere mwanawo olibiha nroromelo naye, teto Yehova anohagalala vanlubale. (Deut. 6:6, 7) Mudhidhi mwanawo anunnuwegiye, oliye podi wambela wawerana makoho ninga mwahaya bwaddi Bibiliya agawogaga wi dhithu dhimodha sabure? Omambelelowene, we podi othuwathuwa wubuwelaga wihina mwanawo anawerana makoho ala mwaha kanna nroromelo nooliba ni kanamuroromela Mulugu. Ebaribariya sowihina ahima aatene enodhiveliwa wawerana makoho wihina yonelegemo ndhe eniwiwa. (1 Kor. 13:11) Bumwahaya kunahowela woova mwanawo ukohaga ethu-sithu. Oliye awerana makoho, opathe mudhidhi yoyo wihina omukavihere mwanawo wonelamo museluya omulabihedhaga Bibiliya wihina olibihe nroromelo naye ni Mulugu. Namasugwera 12/24 epaddi 14 ddima 1-2

Makiristawu yaali oJudeya, yohowela okanna nroromelo nooliba wihina yande ovuluwa mwaha wa mahoso yaddamela. (Ebe. 10:37-39) Yesu ahawaddela anamahara aye wihina yamoona Jeruzale agarijhiwe ni anyakoddo, aliwa yohowela othawa. Vano makiristawu aatene yakala muluwani naale yakala muthemba, yohowela othawa. (Luk. 21:20-24) Mudhidhi yoole yambela koddo, athu yakalesa muthemba, yathawelesa muluwani wihina ekale oobareleyene mwaha wa txinga. Vano ohara yolaga ya Yesu yothawela mmwangoni yakala ninga otaduwa. Bumwahaya makiristawu aatene yohowela okanna nroromelo nooliba. Makiristawu yaali mEberewu yohowela waroromela ale Yesu aathomiliye wihina eholelege mulogo. Podi wera ale yasogolela mulogo, yahaavaha dhoholela dhowooneleyamo wodhela mudhidhi ni makalelo oothawa. — Ebe. 13:17. Namasugwera 09/24 epaddi 10 ddima 9-10

Mudhidhi Yesu agaali velaboni yavati, owawiwelela Ababe. (Juwa. 17:4) Mbwenye, Yesu kuubuwela wihina oliye baahi dinonne werana efunelo ya Yehova. Oliye ahaxagiha athu amodha werana efunelo ya Yehova. Oliye owaroromela anamahara aye ni ahavaha mutholo woolaleya muthenga dhapama, wahudhiha athu ni wowasamalela mambila a Yehova. Alobwana amodha yathomiwe wihina yasogolele mabasa ala. Yesu ahavaha anamahara aye dholaga dhaakavihere, mbwenye erilena eyo mwamakalelo apama. Anamahara amodha yowanganyedha akala mwebaribarene Yesu ahivenyihiwa muukwani. Bumwahaya Yesu adhe aavahege yolaga wihina aakavihere wonelamo wi mwebaribarene oliye ahivenyihiwa muukwani. (Luk. 24:25-27; Juwa. 20:27) Teto Yesu ahakongomedha wihina epwasedhe wasamalela mambila a Yehova, ohiya othuwathuwela korowa. (Juwa. 21:15) Ohiya eyo, Yesu wawubusedha wihina kadda muthu ahaliganihege mabasa enaapariwa munikuruni mwa Yehova ni mabasa enaapara addibila amodha. (Juwa. 21:20-22) Teto Yesu ahakavihera osaddula mubuwelo wewa wodhela mudhidhi wafuna otikiteriwa Omwene wa Mulugu ni wakongomedha wapwasedha wapara mabasa oolaleya. — Dho. 1:6-8. Namasugwera 10/24 epaddi 15-16 ddima 13-14

Wiwelela winere ovulusa egumi yehu. Ndala ninga amwaana Ezarayeli yaali neena wihina evolowe elabo yothomeliwa, nihiyoya nili neena wihina nivolowe elabo exa Yehova anipaganyiliye. Mohulegela elabo yaatene enakale Parayizu. (Isa. 35:1; Luk. 23:43) Saddana naademoniyu kinadha eniholosaga. (Ovuhu. 20:2, 3) Kaavo analekethiwege ni gereja dhowoota mwaha wihina kadhinakalewo. (Ovuhu. 17:16) Teto kaavo anoonege goyi mwaha wa anamathonga. (Ovuhu. 19:19, 20) Kawinaakale athu enanitotelege makathamiho. (Sal. 37:10, 11) Athu aatene enawiwelelege baahi malamulo a Yehova, mwaha wa yeyo, nnere okanna murenddele ni wiwanana. Ohiya eyo, enerege ororomelana ni enerege odhivelana mmodha ni mukwaye. (Isa. 11:9) Mwebaribarene iyo nnojheha nuuthabwa wawoona mareeliho ala yakwanelaga! Nadidela omwiwelela Yehova, nnere okanna ofuru wokala mparayizu elabo yela yavati. Teto kannakalegewo mudhidhi vang’ono, mbwenye nnakalegewo nimukalakala. — Juwa 3:16. Namasugwera 11/24 epaddi 9 ddima 7

Yovuhulela enafwanyeya va yolebela ya peeno enna wakwanela mwamakalelo ootikiniha. Muthenga wOmwene onofwanyeya ni dhiwogelo dhokwaranya 1000, teto wodhela sayiti yehu jw.org, athu owinjhiva enohudhera wodhela Yehova. Naarive akala muthenga dhapama dhinna olaleyiwa dhilabo dhowinjhiva, sathima wubuwela ethu Yesu awogiliye ni anamahara aye egi: “Kamunaafiyedhe olaleya sidadi dhaatedhene,” obe nere, aliwa kayande omulaleya kadda muthu akala velaboni yavati, labo nootoriha nihinathi ofiya. (Mat. 10:23; 25:31-33) Madhu a Yesu enonipatha ni iyoya peeno, athu owinjhiva enakala mburo nahinandihu olaleya, mwaha wi mabasa ehu oolaleya enookoddihiwawo. Ohiya eyo, kadda labo enobaliwa anamwani. Iyo nnowilibihedha vanlubale wodhela werana ele nnandihu wihina naalaleye athu a ‘malogo matene, mahimo, ni adhiwogelo dhatedhene.’ (Ovuhu. 14:6) Mbwenye ebaribariya sowihina kannande walaleya athu aatene enakala velaboni yavati omakuthulo ohunafiye. Namasugwera 05/24 epaddi 10 ddima 6-7

Yesu owalabihedha madhu aye wihina alibihe ni atodole athu amodha. Teto kawoobela owali anamahara aye. (Luk. 8:47, 48) Ela yotajhiha yapama wihina alobwana etenle ele makiristawu eharege! Yesu ohuwoga wihina alobwana etenle edidele okala ororomeleya wa amwaariwa. Oliye ahaalabihedha madhu aababe wihina aakongomedhe alobwana odidela “okala ni mwariwa.” (Mat. 19:4-6) Madhu owi okala ni mwariwa ni egerego, enatapulela “obanda obe omagelela.” Eyo enatapulela wi odhivela onna mulobwana ni mwariye onohowela okala woliba ninga yere obandana mmodha ni mukwaye. Mwaha wihina aliwa yathoma omwalana, eyo podi watotela makathamiho aabilene. Mulobwana anna wandana wapama ni mwariye, onosukuma dhithu dhatedhene dhonyakavala dhiniwanana ni pornografiya. Teto oonaga ethu-sithu eli yonyakavala, ahubuwele dila biili oliye ‘onowarabeliha mento aye wa dhithu dhihinna mabasa.’ (Sal. 119:37)Teto ninga Jo, oliye anowerana nipangano ni mento aye ni anothoma ohimusugwa ni munigwa muhiyana ahili mwariye. — Jó 31:1. Namasugwera 01/25 epaddi 10 ddima 12-13

Makalelo Yehova ananileveleliye, ehihiyana ni makalelo iyo nnalevelelihu athu amodha yanithegela. Kaavo ananda olevelela ninga Yehova ananileveleliye. Salmista dhaala ahiwoga wodhela makalelo oolevelela a Yehova egi: ‘Olevelela weebaribari oli nyu wihina muvuwihiwege.’ (Sal. 130:4) Ebaribariya sowihina, makalelo oolevelela a Yehova ‘beebaribari.’ Oliye baahi dinonne olevelela mowakwanela. Alobwana emulebile Bibiliya, ehalabihedha madhu owi olevelela ni ebarayiku, enahiyana ni makalelo oolevela aathu. Yehova amulevelela muthu, oliye anothimiha mowakwanela yothegaya. Ni makalelo yaala, muthuya podi ohogolowela okanna wandana woliba ni Yehova. Iyo nnothabwa omutamalela Yehova mwaha onilevelela ni makalelo yaala. Namasugwera 02/25 epaddi 8 ddima 1-3

Naarive athu yahifunaga ovuruwana muthenga nnalaleyihu, iyo nnowakwanihedha mutholo naakenlihu. Mwaha wa ddi? Mwaha iyo nnerana ele Yehova ni mwanaye Yesu enafuniwa wihina nerena, eli “ovaha onamoona wowakwana.” Naarive nahafwanyaga athu wihina naalaleye obe athuya yakooddaga onivuruwana, iyo podi okanna ohagalala mwaha wihina ninna omuhagalasa Babihu Yehova. (Pro. 27:11) Teto iyo nnohagalala vanlubale nanona wihina ddibila obe murogola ohunfwanya muthu anna efunelo mmalaleyelo. Namasugwera dhaala ahiliganiha mabasa oolaleya ni mabasa oomusayela mwaana arimeenle. Athu owinjhiva enomusayela mwaana ole mburo dhohiyana-hiyana. Vano mwaana ole afwanyiwa, ole anfwanye ni aatene yamusayela enoohagalala vanlubale. Ni makalelo mamodhave addibila aatene a mmulogoni enowapara mabasa oolaleya ni enokavihera olaleya murudda waatene, teto addibila aatene enohagalala vanlubale yaamoonaga muthu alaleyiwe ambela woona mutugumano. Namasugwera 04/24 epaddi 18 ddima 13-14

Nubuwelaga wodhela dhithu dhinapadduwe osogolo, nnohagalala vanlubale! Nnojheha wihina ni mareeliho a Yehova, athu owinjhiva enere orumedha ebaribari mahoso manlubale yahinathi obajha. Teto nnohagalala mwaha onona wi mudhidhi wa mahoso manlubale, podi wera athu amodha enere othoma okala epaddi ya nikuru nehu ni ebajhe onvuwiha Yehova vamodha ni iyo! Wula nijheehaga mudhidhi oyo wohagalasa ofiya, nihikanna oneti wowapara mabasa yahinadha ehogoloweliwa opariwa, eli mabasa oolaleya muthenga dhapama dhOmwene wa Mulugu velaboni yaatene yavati. Mudhidhi mmodhave nnohowela odhowagave nawaddelaga athu wodhela dhithu dhinapadduwe osogolo. Aliwa enohowela onona wi omakuthulo wa elabo ela yabure wihaddamela. Vano mudhidhi yoyo wafiya, aliwa enere wonelamo wi muthenga nalaleyihu wadhela wa Yehova Mulugu. Iyo aatene nnafuna nididele olaleya mwaha wa odhivela. Odhivela ninnihuna ni muthenga dhapama, odhivela ninnihuna naathu, teto enlubaleya mwaha wa odhivela ninnihuna ni Yehova vamodha ni ndina naaye. Bumwahaya nnafuna nididele olaleya nuuviheya ni mowaguveya, ofiyedha labo Yehova anafuniye owoga egi: “Mmaale olaleya!” Namasugwera 05/24 epaddi 19 ddima 14-16

Emahiyu ahinathi okwa, Yesu ahimuhudhiha Peduru ni anamahara amodha thima yokala muthu owiyeviha. Yesu wapara mabasa yapariwesa ni mudhaari. Teto ele Yesu eriliyena yahatikiniha vanlubale anamahara aye. Bibiliya anawoga wihina Yesu waarula malayaaye oode, vano othukula tuwalya omagelela muyinuni mwaaye. Nuumala, waweka manjhe mbasiyani ni wambela wasuwana manyalo anamahara aye. (Juwa. 13:4, 5) Yesu ahasuwa manyalo a anamahara aye 12 vamodha ni a Judasi afuna omuguliha vasogolova. Podi wera wahivira mudhidhi wowinjhiva Yesu aasuwaga manyalo a anamahara aye, mbwenye Yesu aali owiyeviha ni ahamariha mabasa ale. Numala wasuwa, oliye owoga ni anamahara aaye nupwaseya eegi: “Muhonelamo ethu guwerelimini? Nyu munagithana ‘Namahudhiha’ ni ‘Nabwiya’ eyo ebaribari, dimiyene. Akala miyo Nabwiya ni Namahudhiha gihasuwa manyalo enyu, ni nyunwa musuwanege manyalo mmodha ni mukwaye.” — Juwa. 13:12-14. Namasugwera 03/25 epaddi 10 ddima 9-11

Kahi ethu yokweya wandana ni Yehova malabo yala oorusa nnakalihu. Peeno athu owinjhiva enorumedha wi Mulugu kaawo. Teto enakala ninga ale ehinna wandana ni Mulugu, enokanna egumi yapama. Noonaga dhithu ninga dhendha dhipadduwaga nroromelo nehu podi wehiwa. Ebaribari wi kannadha nirumedha wi Mulugu kaawo, mbwenye iyo podi wambela wanganyedha akala Mulugu anere onikavihera. Namaleba a Salmo 73 ahifiyedha okanna mubuwelo ninga yola. Athu yaamwapenle, kiyawiwelela malamulo a Yehova ni yerana baahi dhithu yafuniwa. Mwaha wa yeyo namaleba Salmo ola, obajha wanganyedha, akala wilibihedha waye wi amulabele Yehova kawali weebewene. (Sal. 73:11-13) Ddiniyani yamukavihere salmista ola osaddula mubuwelo waye? Ethu yamukavihere yaali wubuwela dhithu dhafuna wapadduwela ale yamusukuma Yehova. (Sal. 73:18, 19, 27) Teto oliye ahawubuwela mareeliho enawakela ale enamulabela Yehova. Ni iyoya, podi wawubuwela mareeliho maatene Yehova anivahiliye. Namasugwera 06/24 epaddi 25 ddima 16-17

Kale, athu amodha yowaboliha korowa addibiliwa yaali oohawa, ejhehaga ohogoloseliwa ni juru yahandiwa ohogolosa. Ohiya eyo anamatoriha amodha yorumedha onyigaliwa ni korowa wihina yavahe nibili ale yahanna muladdu. Mbwenye Yehova oothabwa otakaleliwa oonaga dhithu dhendha dhipadduwaga. (Eze. 22:12) Sapama kadda muthu wa iyo wikoha: “Ginoona aavi korowa? Ginojha mudhidhi wowinjhiva gubuwelaga wodhela korowa ni dhithu gafunimi ogula gahakanne korowa dhowinjhiva? Gaboliha korowa yannya ginolegela ohogolosa, gubuwelaga wi mwinnya kanahowela? Ginowivaha thima vanlubale mwaha okanna korowa, wapitha athu amodha? Enogirusa wakavihera athu amodha ni dhithu ginnimina? Gerege mwaha muthu okanna korowa, miyo ginowubuwela wi oliye anothabwa ovaha thima dhoreela? Miyo ginathabwa wandana naathu oreela ni kaginaavaha thima ele eli ohawa?” Akala nnofuna odhowagave nikalaga aleddo muddammwani mwa Yehova, nnohowela okala pasope wihina nahithabwege odhivelawa korowa. Naathabwaga omudhivela Yehova opitha korowa, Yehova kanadha aninyanyala! Namasugwera 06/24 epaddi 12-13 ddima 17-18

Wihina niibarele wa dhoweha, iyo aatene nnohowela okanna efunelo yowerana ele eli yapama. Nahudhera ‘widda obure ni odhivela opama,’ nnere olibiha efunelo yehu yowerana ele eli yapama. (Amós 5:15) Okanna efunelo yowerana ethu yapama, enere onikavihera ogonjhiha dhoweha dhinadha morurumusa. Iyo podi okanna efunelo yowerana dhithu dhapama wodhela oviheyana dhithu dhomuzimuni. Iyo nakanna elemelelo yowona mutugumano ni wapara mabasa oolaleya, ninna olibiha efunelo yehu yomuhagalasa Yehova. (Mat. 28:19, 20; Ebe. 10:24, 25) Teto namwilerigi ni namuhudheraga Bibiliya ni napenddaga ndhe nnilerihu, nnolibiha efunelo ninnihuna yodhivela ele eli yapama ni widda ele eli yabure. (Jos. 1:8; Sal. 1:2, 3; 119:97) Teto kudduwale werana ele Yesu awaddenliye anamahara aye egi: “Mudidele olobela wihina muhimorele muwehiwani.” (Mat. 26:41) Nnonvaha ofuru wonikavihera ni nnolibiha efunelo yehu yomuhagalasa.— Tiya. 4:8. Namasugwera 07/24 epaddi 17-18 ddima 14-16

Omutajhihege Yehova wafunaga waxagiha athu amodha. Kudduwale wihina Yehova kanakalela nrima dhithu anonniye. Ni makalelo mamodhave, iyo kannafuna okalela nrima dhithu nnonnihu mudhidhi naxagihaga ale eli axa, noovaga wihina osogolo aliwa enere ohala vamburoni vehu. Teto kannafuna wubuwela negi: “Miyo kaginaxagihiwege ni muthu, bumwahaya oliye anere osayela makalelo owerana dhithudha yeeka.” Ninga adhaari a Yehova kannahowela wubuwela ni makalelo yaala. Ohiya eyo, iyo nnohagalala vanlubale, ohiya baahi mwaha wawaddela dhithu nnonnihu, mbwenye mwaha ovelela egumi yehu wihina naakavihere ale nnaxagihihu. (1 Tes. 2:8) Iyo nnajheha wihina aliwa ‘yandege wahudhiha athu amodha.’ (2 Tim. 2:1, 2) Iyo aatene nakala athu oovaha wodhela wawaddela athu amodha dhithu nnonnihu, nnere wathukulela amodha okala athu oovaha ni oohagalala. Namasugwera 09/24 epaddi 29 ddima 12-13

Athu amodha enubuwela wi kinanda werana ethu enakavihera mulogo. Akala we onubuwela ndo, kukwerebeye. Mwebaribarene we ohukanna dhikalelo dhapama dhinaakavihere addibila. Ononamo aavi wileri yolebela ya 1 Korintiyu 12:12-30, wamala olobele wodhela muselu ola! Va yolebela ela murumiwi Pawulo anowoniha wi kadda mudhaari a Yehova dathima ni anohoweleya mmulogoni. Werena ele onandiwe wihina omulabela Yehova ni wakavihere addibila. Teto okanne ebaribari wihina anamaholela mulogo, enere wuthoma wihina werena dhithu enonniwa wihina onere wanda wakwanihedha. (Rom. 12:4-8) Ebaribariya sowihina makiristawu aatene enohowela olibiha wandana wewa ni Yehova, wivahedhela wi yakavihere athu amodha nuuhagalala ni ononiwa ninga muthu apama. Namasugwera 11/24 epaddi 17 ddima 12-13

Ana ahifwanyiwa makathamiho ohiyana-hiyana yamuthukulela wunla. Ethu yobajha yamuthukulela wukuuwa yaali ovalanyiwa, teto mwanamayaye ithaniwa Penina, omwidda vanlubale. Teto yothabwaya, Ana kaabaala, mbwenye Penina oobaala. (1 Sam. 1:1, 2) Ohiya eyo, mudhidhi wamutene Penina akala omuteyave Ana mwaha ohubaala. Ana ahukuuwa vanlubale, ‘akala wunlave [teto] kaajha.’ Ohiya eyo, murima waye ‘wahithabwa wukuuwa.’ (1 Sam. 1:6, 7, 10) Ddiniyani yamutodole Ana? Yaali odhowa otabernakulu waali mburo webedhiwa Yehova. Nuufiya otabernakulu, Ana ‘obajha olobela wa Yehova unlaga mohihiyedhedha.’ Teto oliye omuloba Yehova wihina ‘asugwe osegedheya waye ni ahimudduwale.’ (1 Sam. 1:11) Yehova ahawona makathamiho yanfwanya Ana ni ahiiwa wunla waye. Mwaha wa yeyo, omureeliha wodhela onvaha ahima. — 1 Sam. 1:19, 20; 2:21. Namasugwera 12/24 epaddi 21 ddima 5-7

Yowobola enowoniha wi Yesu anowathuwathuwela vanlubale athu, thabwathabwa anamahara aye. (Juwa. 13:1) Motajhiha, Yesu ahinona wi afiya velaboni yavati eere ofwanyiwa makathamiho ni eere opiwa. Mbwenye Yesu kakwanihedhe dhithu dhaatedhene ndhe dhorusa mwaha othomeliwa baahi ni Yehova, mbwenye yaali mwaha wodhivela anniyena ni athu yamuthukulela olaleya, wahudhiha ni wakavihera. Teto nlabo nogomihedha, Yesu ahipatha mudhidhi wihina asuwe manyalo a anamahara aye, walibiha ni wavaha dhoholela yahoweliwa. (Juwa. 13:12-15) Naarive agaali vantxikwani na goyi, Yesu ahinvaha ejhehedhelo mpanga ole aali epaddi yaye ni omuloba Juwawu wihina asamalelege amaye. (Luk. 23:42, 43; Juwa. 19:26, 27) Eyo enowoniha wi Yesu owadhivela vanlubale athu, ohiya baahi mwaha ovelela egumaye, mbwenye mwaha wa dhithu eriliyena agaali velaboni yavati. Namasugwera 01/25 epaddi 23 ddima 11

Bibiliya anolabihedha yoladdaniha enanikavihera wonelamo makalelo nnakalihu Yehova anilevelela mowakwanela. Iyo naali ninga “adhaari a yothega.” Mbwenye mwaha Yehova onilevelela, iyo nili ninga adhaari “yoboliwe muuthegani.” (Rom. 6:17, 18; Ovuhu. 1:5) Olevelela wa Yehova ononobola muuthegani, teto woboliwa wula, winonihagalasa vanlubale. Mbwenye mwaha wa mukutho wa Yesu, enakala ninga iyo nihivulumusiwa mwaha oredda nannihuna. (1 Ped. 2:24) Ndala ninga muthu anahagalaliye vanlubale mwaha ovulumusiwa, nihiyoya nnohagalala vanlubale mwaha oleveleliwa dhothega dhehu ni ohogolowela okanna wandana wapama ni Babihu Yehova. Dhatedhene ndha dhinandeya mwaha wa yowobola. Namasugwera 02/25 epaddi 11 ddima 16; epaddi 13 ddima 17

Va yoladdaniha ya talentu, Yesu ahiwoga wodhela adhaari abiili yaali oororomeleya ni mudhaari mmodha ahaali oororomeleya. (Mat. 25:14-30) Adhaari ale abiili oororomeleya, enatapulela makiristawu oothikitheliwa eli oororomeleya. Nabwiya Yesu anowawithana wihina evolowe wi “ehagalale nnabwiya ewa” obe neere aliwa enomwakela padamari ewa odhulu wodhela okala oobajha ovenyihiwa muukwani. (Mat. 25:21, 23; Ovuhu. 20:5b) Mbwenye yotajhiha ya mudhaari ole abure aali mangonya, enowaxagiha vanlubale makiristawu othikitheliwa. Nimakalelo baani? Woonihe wi onolaba nuuviheya ni onowerana ele onandiwe. Va yoladdaniha ya talentu ni yaanamwali yahinagonege ni alobwana, Yesu kafuna awoge wi makiristawu amodha oothikitheliwa yeere okala amangonya. Ohiya eyo, oliye afuna awoge dhithu dhapadduwele yahere aliwa ehiya olaba nuuviheya. Eyo yahapadduwe makiristawu ale kayande ‘ohiddelela withaniwa ni osakuliwa’ ni kayarumedhiwe odhowa odhulu. Namasugwera 09/24 epaddi 22 ddima 10; epaddi 23 ddima 12-13

Aatene iyo nnofuna wisamalela ni osamalela emudhi yehu. (Ecl. 7:12; 1 Tim. 5:8) Bumwahaya nasayelaga mabasa, nnohowela onona korowa ngasi nnafunigihu wakela. Mbwenye naathabwaga wubuwela muselu wa korowa baahi, eyo enatapulela wihina nnedda ni dhithu nnandihu woona ni mento. Nathoma weedda ni nroromelo, nnere wanda wonelamo makalelo mabasaya enavoloweliwa wandana wehu ni Yehova. Wihina nande werana eyo, iyo podi wikoha: ‘Mabasa ginaparegimi enere ogithukulela werana dhithu Yehova aniddiye?’ (Pro. 6:16-19) ‘Mabasaya enerege ogithukulela oyelela mutugumano obe wapara mabasa oolaleya ni weragana ohudhera waaga wa Bibiliya?’ Teto iyo podi wikoha neegi: ‘Gerege mabasaya enere ogithukulela okala wolapela ni emudhaga mudhidhi owinjhivene?’ Akala yowakula ya makoho ala sowi hee, yere okala yapama oharumedha mabasa ayo, naarive elabo onakaliwe egaali yorusa ofwanya mabasa. Woona wihina nnedda ni nroromelo, nnowerana dhothoma dhinoniha wihina Yehova anere onisamalela. — Mat. 6:33; Ebe. 13:5. Namasugwera 03/25 epaddi 21 ddima 5-6

Malabo aamateene, nnohowela wilibihedha wawoonaga addibila ni arogola, ndala ninga Yehova anawoniye. Iyo podi omutajhiha Yehova wodhela opwasedha osugwa dhikalelo dhapama dha addibilihu ohiya dhoviriganiha dhewa, mwaha wihina mohilegela dhoviriganiha enna addibilihu kadhinakalewo. Nakanna muladdu ni addibila nnohowela otxokotxela muladduya mowaguva nuudhivela. Neddihanaga nuudhivela, athu amodha enere okanna efunelo yovolowa mparayizuni oomuzimuni, mwaha wihina naaliwa enofuna weddihiwa ni makalelo yala. Bumwahaya nididele omutamalela Yehova ni mukalakala, mwaha omwegeredha parayizu ola oomuzimuni wihina nikalegemo. Akala muthu di muthu anofuna okala oohagalala, oopwaseya ni oobareleyene, anohowela ovolowa mparayizuni muna oomuzimuni ni othoma ohukumamo! Mbwenye nnohowela okala pasope mwaha wi Saddana anowerana dhaatedhene anandiye wihina anilekethe ni anikumihemo mparayizuni muna. (1 Ped. 5:8; Ovuhu. 12:9) Bumwahaya kanenye Saddana onleketha ni onikumihamo mparayizuni oomuzimuni. Kabeni aatene nilibihedhe wihina parayizu ola oomuzimuni akalegeve mburo wowomela, woweela ni wa murenddele. Namasugwera 04/24 epaddi 24-25 ddima 18-19

Ababi podi wakavihere aniwa okanna efunelo enlubale yomulabela Yehova. Teto wawonihe anawo wihina webedha webaribari bwathima wodhela ohujhomba omutugumanoni, omuhudhera Bibiliya, wapara mabasa oolaleya ni wakongomedha wunnuwelavo epaddi yomuzimuni. We waheragana dhithu ndha, anawo podi wambela wubuwela wi okala Namoona a Yehova eli ninga okala “gereja ya makolo ewa baahi.” Mwaha wa yeyo, aliwa podi opweha webedha weebaribari mburo wanabili mwigumini mwewa obe podi ohiya omulabela Yehova. Muthu ahiya omulabela Yehova, nerege oliye kanadha ahogolowa? Naari, kahi yeyo. Oliye podi othwaruwa ni athome ohogolowela omulabela Yehova mwamakalelo apama. Wihina muthuyoyo ande omuhogolowela Yehova, anohowela wiyeviha ni orumedha nikavihero na anamaholela mulogo. (Tiya. 5:14) Mbwenye ebaribariya sowihina, niilibihedha wi nimuhogolowele Yehova nnere wawakela mareeliho owinjhiva! Namasugwera 07/24 epaddi 24-25 ddima 18-19

Munere ddi wihina omwenddi weenyu omuhagalasege Yehova? Mudhidhi waviraga munerege othabwa odhivelana. Munere ddi wihina mwaherena dhithu dhinamuukule Yehova? Kamuthapanyedhege dhithu dhonyakavala, kamukalege abiili baahi, newene kamug’wege bure ofiyedha olezela. (Efe. 5:3) Mwaha mwerana dhithu ndha, munere okanna ethakwi-thakwi yowerana mararuwo, eli yothega vamentoni va Yehova. Ononamo aavi othapanyedha dila dhowinjhivadhene wodhela dhithu munahowelinyu werana wihina omwenddi weenyu omuhagalasege Yehova? (Pro. 22:3) Ki wodhela makalelo owoonihana odhivela? Mudhidhi odhivela weenyu onafuniwa wunnuwa, podi wera munere othoma wonihana odhivela mwamakalelo oofwanelela. Mbwenye mwathabwiha makaleloya owonihana odhivela, podi othabwaga okanna ethakwithakwi yowawerana mararuwo, mwaha wa yeyo, enere okala yorusa wubuwela mwamakalelo apama ni werana dhothoma dhapama. (Cân. 1:2; 2:6) Teto woonihana odhivela podi wuthukulelani ohanda wisugwera ni werana ethu yaamuukule Yehova. (Pro. 6:27) Bumwahaya mwambelagawene omwenddi weenyu, nyu podi othapanyedha wodhela manddile mwahinahowelinyu walupa eniwanana ni malagano a mBibiliyani. — 1 Tes. 4:3-7. Namasugwera 05/24 epaddi 29 ddima 10-11

Iyo nnafuna wi akwihu enone wi podi oniroromela yafwanyiwaga makathamiho. (Pro. 17:17) Mbwenye ddiniyani nnahowelihu werana wihina addibila enroromelege? Ethu nnahowelihu werana fuwilibihedha wi nimutajhihe Yehova malabo aamateene. Motajhiha, wodhela wakwanihedha ele nipaganyilihu ni wilibihedha ofiya mambeseene, akala nihipangana ogumana ni muthu mmodha. Anamaholela mulogo eli oororomeleya eli ninga nvaho onadhela wa Yehova. Ni makalelo baani? Anamaholela mulogo yakala oororomeleya, addibila ammulogoni podi okala ootapuwene wi ethapanye naliwa mudhidhi bu mudhidhi yahowelaga nikavihero. Teto addibila enowanda woona wi anamaholela mulogo enowadhivela, yanona wi aliwa enofuna wakavihera. Ohiya eyo, addibila enerege othabwa waroromela anamaholela mulogo, yonelamo wi ohiya olabihedha mubuwelo wewa aliwa enomulabihedha Bibiliya ni malivuru ehu yaafunaga ovaha yolaga. Teto addibila enowaroromela anamaholela mulogo ehinavuwiha muselu enawadeliwa ni enakwanihedha ele enapaganyiwa. Namasugwera 06/24 epaddi 30 ddima 14-15

Ebaribari wi peeno Yehova kanaamarihe makathamiho maatene enanifwanya. Mbwenye iyo podi omwaddela dhithu dhaatedhene dhinanipadduwela wihina anikavihere ni anitodole. (Sal. 41:3) Yehova onolabihedha muzimu waye wotxena wihina anivahe kopolo, thotho ni murenddele wi nande wawanana makathamiho oohiyana-iyana. (Pro. 18:14; Fil. 4:13) Makalelo mamodha Yehova ananilibihiye fudheela ejhehedhelo enafwanyeya mBibiliyani enawoga wi mohulegela anere omariha dhiredda dhatedhene ni kaawo anaabulelege. (Isa. 33:24) Yehova ohenya wihina mBibiliyani mwilebiwe madhu enanikurumusa ni enanihagalasa naafwanyiwaga makathamiho. (Rom. 15:4) Kasugwa yopadduwa dhaala ya murogola anakala elabo yowAfirika akalesa wunlave nuunona wi ahikanna oredda wa Kanser. Oliye anowoga eegi: “Yolebela yagitodola yaali ya Izayiya 26:3. Yolebela ela enogubusedha wi Yehova podi ogivaha murenddele webaribari onaagikavihere wawanana makathamiho enagifwanya.” Ki we? Ehikalawo yolebela enukurumusa wafwanyiwaga makathamiho enakala ninga kinadha emala? Namasugwera 12/24 epaddi 24 ddima 17-18

Anamaholela mulogoya enowilibihedha werana emodhave ni muthu yole akumihiwe mmulogoni. Aliwa enafuna wihina nimbila nirimele “nihogolowele vaade.” (Luk. 15:22-24, 32) Muthu athwaruwa Yehova, Yesu ni angero enothabwa ohagalala, teto siyeyo mulogo waatene onahoweliwa werana. (Luk. 15:7) Yehova kanafuna wihina muthu atheegile ahithwaruwa adidele okala mmulogoni. Mbwenye eyo, kinatapulela wihina oliye anomureya edduli muthuya. Yehova anofuna wihina oliye ahogolowele mmulogoni. Ozeya 14:4 onowoniha pamadhene makalelo Yehova anakaliiye amoona muthu athwaruwile. Yolebelaya enihina: ‘Ginere olevelela ohuroromeleya wewa. Gineerege wadhivela ni murima waga waateene, mwaha ginere warabeliha owali waaga amwaana Ezarayeli.’ Anamaholela mulogo yakanna monelo mmodhave wa Yehova aliwa enerege wilibihedha woona akala muthuya ohubajha othwaruwa. Vano niwogaga ni ale emusukumme Yehova, madhu ala enowoniha wihina Yehova anowudhivelani vanlubale, teto anafuna wihina mohulegela muhogolowele mmulogoni. Namasugwera 08/24 epaddi 28 ddima 8-9

Mbwenye nnohowela ohuddiwala wi malabo mamodha, athu amodha kinaanitamalelege mwaha wa dhithu dhapama nnawerelihu. Teto malabo mamodha, iyo podi wonelamo wihina muthuya kavahile thima dhithu nnongilihu wihina nimwerele dhithu dhapama. Motajhiha, oliye podi ohonelamo wi nihinonga korowa, kopolo ni mudhidhi wehu wihina nimukavihere. Ethu ninga yeela yanipadduwela, nnere ddi wihina nihiyelele ohagalala obe nahikwerebeye? Kubuwela ohagalala wehu kunadha mwaha athu onitamalela obe naari, iyo podi osakula okala athu oovaha naarive athu amodha ehinitamalelaga. (Dho. 20:35) Nnande aavi werana eyo? Kasugwa ethu enaanikavihere okala athu oovaha naarive nahitamaleliwaga. Kudduwale wihina okala muthu oovaha makalelo oomutajhiha Yehova. Yehova anowavaha dhithu dhapama athu aatene, naarive amodhaya yahimutamalelaga. (Mat. 5:43-48) Teto Yehova anopaganya wihina naavahaga athu amodha “nahijhedhaga ohogoloseliwa, . . . mareeliho ehu enere winjhiva.” (Luk. 6:35) Madhu owi “nahijhedhaga” enovolowelavo otamaleliwa. Bumwahaya akala athu amodha kinuutamalela mwaha wa dhithu dhapama onawereliwe, kukwerebeye. Teto kudduwale wihina Yehova anere wureeliha ni dhithu dhapama mwaha wakavihera athu amodha ni okala “namavaha oohagalala.” — Pro. 19:17; 2 Kor. 9:7. Namasugwera 09/24 epaddi 29 ddima 14-16