Motajhiha, mwaha wa yowobola Yehova anolevelela dhothega dhehu. (Sal. 103:3, 10-13) Athu amodha podi wubuwelaga wi kinafwanelela oleveleliwa ni Yehova. Mbwenye ebaribariya sowihina aatene iyo, kavo anafwanelela oleveleliwa ni Yehova. Murumiwi Pawulo ahinona wi “kafwanelela withaniwa murumiwi.” Naarive dhigaali ndo oliye owoga eegi: “Miyo gili murumiwi.” (1 Kor. 15:9, 10) Nathwaruwa mwaha wa dhothega dhehu, Yehova anonilevelela. Mwahaya waddi? Yehova kananilevelela mwaha wi nnofwanelela, mbwenye mwaha anonidhivela vanlubale. Bumwahaya wakala owukuwene wubuwelaga wi kunafwanelela oleveleliwa, kudduwale wi Yehova alinve yowobola wihina awobolena athu ohilogomana enatheega mbwenye enathoma othwaruwa, ohiya athu oologomana ehinatheega. — Luk. 5:32; 1 Tim. 1:15. Namasugwera 01/25 epaddi 26-27 ddima 3-4

Iyo kannanda osugwera dhithu dhabure athu amodha enanereliwa ni enaniwogeliwa. Mbwenye iyo podi wiisugwera. Teto malabo owinjhiva, makalelo apama owiisugwera fulevelela. Mwaha iyo nnomudhivela Yehova, teto Yehova anafuna wi naalevelelege athu amodha. Nadidela okala ootakaleliwa ni nahalevelelaga athu amodha, enere okala yokweya werana yothoma yabure, ofiyedha witotela makathamiho mwigumini mwehu. (Pro. 14:17, 29, 30) Nahakoyelaga ntxiga athu amodha, iyo nnowaweddiha athu amodhaya mwamakalelo apama. Teto ohakoyela ntxiga athu amodha, enakala ninga wivaha mukono naanya. Iyo podi odduwala dhithu dhatedhene, nuwindo nihogolowele okanna egumi yohagalala. Onere ddi wihina wande ohiya okala ootakaleliwa? Motajhiha muthu iporosa, onoovira mudhidhi wihina nikwaddana nivole. Nimakalelo mamodhave, iyo nnohowela mudhidhi wihina nande omulevelela ni murima wehu waatene muthu anitheegele. (Ecl. 3:3; 1 Ped. 1:22) Olobele wa Yehova omulobaga wihina ukavihere walevelela athu amodha yuthegela. Namasugwera 02/25 epaddi 16-17 ddima 8-11

Motajhiha, dhithu dhobajha ni dhokweya nihudherihu wodhela Yesu sindha: othwaruwa, nroromelo, obaddiziwa ni ovenyihiwa wanookwa. (Ebe. 6:1, 2) Ndha dhohudhiha dhokweya makiristawu aatene enahoweliwa onona ni orumedha. Bumwahaya murumiwi Peduru adhe awogege wodhela dhohudhiha ndha mudhidhi alaleyaga muthithi waathu nlabo na Pentekoste. (Dho. 2:32-35, 38) Wihina nikale anamahara a Yesu, nnohowela orumedha dhohudhiha ndha. Motajhiha, murumiwi Pawulo ohoniha pamadhene wihina egi muthu akale namahara a Yesu ohowela orumedha muselu wovenyihiwa wanookwa. (1 Kor. 15:12-14) Mbwenye negi nikale makiristawu owithwelavo epaddi yomuzimuni nnohowela odhowagave nihudheraga dhithu dhimodha wodhela Yesu. Moohiyana ni dhohudhiha dhokweya, yoojha yovaadda kinavolowelavo baahi malamulo a Yehova, mbwenye enovolowelavo malagano enanikavihera wonelamo makalelo Yehova anubuweliye. Wihina nande opurelamo pamadhene yoojha yomuzimuni, nnohowela ohudhera, opendda ni oparihedha mabasa dhithu nnahudherihu mBibiliyani. Neragana dhithu ndha, nnohudhera werana dhothoma dhinamuhagalasa Yehova. Namasugwera 04/24 epaddi 5 ddima 12-13

Yehova ahimubusedha thagaraga dhaye namavuhulela Jonasi wihina aNinivita ale ‘kayahanonne ohiyaniha ethu yapama ni yabure.’ (Jonas 1:1, 2; 3:10; 4:9-11) Nuuvira yaka dhowinjhiva, Yesu olabihedha yopadduwa ya Jonasi wihina ahudhihe wodhela wogowa ni thagaraga dha Yehova. Mudhidhi baani “wotoriha” aNinivita enafuniwa “ovenyihiwa?” Yesu ahiwoga wi winere okalawo ‘ovenyihiwa wa otorihiwa.’ (Juwa. 5:29) Yesu awoga wodhela ovenyihiwa onafuna wereya muwari mwa Onamathonga wa Yaka Txikwi, mudhidhi “athu owogowa ni athu ohogowa” enafuniwa ovenyihiwa. (Dho. 24:15) Mbwenye athu oohogowa enere “ovenyihiwa wi etorihiwe.” Eyo enatapulela wi Yehova ni Yesu enerege wasugwa athu yala akala enerege wiwelela ni oparihedha mabasa dhithu enafuniwa ohudhera. Vano muNinivita avenyihiwe muukwani akoodda omwebedha Yehova mwamakalelo Oliye anafuniye, Yehova kanenye wi oliye akalegewove. (Isa. 65:20) Mbwenye aatene yaale enaathome omwebedha Yehova, enere okanna ofuru wokalawo ni mukalakala! — Dan. 12:2. Namasugwera 05/24 epaddi 5 ddima 13-14

Dhithu ndha erana Yesu afuna awonihe athu wihina baabe dathagaraga. (Juwa. 14:9) Wodhela dhowera dhaye oliye ahoniha wihina baabi aye dokweya, athagaraga, oodhivela ni ofuna wakavihera athu wihina egonjhihe yothega. Yesu owakavihera athu wihina esaddule mweddelo wewa wi ekale anamahara aye. (Luk. 5:27, 28) Yesu ahinona pamadhene dhithu dhaampadduwele. Dila dhowinjhivadhene Yesu owawaddela anamahara aye wihina eere ogulihiwa ni opiwa vantxikwani na goyi. (Mat. 17:22; 20:18, 19) Oliye ahinona wihina mukutho waye were othimiha yothega mwilaboni. Yesu ahasuziha wihina apeleka egumi yaye eere, ‘odahinya murima dhaathu ohiyana-hiyana.’ (Juwa. 12:32) Wihina athu oohilogomana emuhagalase Yehova yohowela omurumedha Yesu ninga Nabwiya ewa ni ohara thalo dhaye. Yahere ndo, yere ‘woboliwa muuthegani.’ (Rom. 6:14, 18, 22; Juwa. 8:32) Vano Yesu ahiipeleka nuuliba murima wihina apiwe vantxikwani na goyi. — Juwa. 10:17, 18. Namasugwera 08/24 epaddi 5 ddima 11-12

Kabiha wubuwela makalelo waliwe nuwiwa wodhela ebaribari enafwanyeya mBibiliyani. We wahihudhera wi Yehova anowuudhivela vanlubale ni anafuna wi we okale epaddi ya emudhi yaye enamulabela, teto wahihudhera wi Yehova anopaganya omariha goyi ni wavenyiha amudhawo ni akwawo ekwile. Ndha si dhithu vang’no ohudhenriwe. (Mar. 10:29, 30; Juwa. 5:28, 29; Rom. 8:38, 39; Ovuhu. 21:3, 4) We wahihagalala vanlubale nuuhudhera dhithu ndha. (Luk. 24:32) Teto dhithu wahudheriwe dhahudhivela vanlubale ofiyedha ofunaga wawaddela athu amodha! (Omuliganihe ni Jeremias 20:9.) naadhivelaga ebaribari enafwanyeya mBibiliyani, iyo kannanda omaalana mmurimani dhithu nnahudherihu. (Luk. 6:45) Teto podi wera nnokala ninga anamahara a Yesu yawogile yegi: “Iyo kannaaselele owoga dhithu nonilihu ni niwalihu.” (Dho. 4:20) Iyo nnodhivela vanlubale ebaribari, bumwahaya nnowerana dhaatedhene nnandihu wihina naalaleye athu owinjhiva. Namasugwera 05/24 epaddi 15 ddima 5; epaddi 16 ddima 7

Ninga nlogo na Yehova, iyo nnowalaleya athu amodha mwaha wi nnomudhivela Baabihu oodhulu Yehova, teto iyo nnafuna nakavihere athu amodha omunona Oliye. Anamalaleya owinjhiva enodhiveliwa wapara mabasa ala oolaleya, mbwenye anamalaleya amodha kinadhiveliwa. Ddiniyani enaathukulela aliwa ohidhiveliwa wapara mabasa oolaleya? Amodha kinadhiveliwa olaleya mwaha okala athu a manyazo, amodha enubuwela wi kinonne ohudhiha pama, amodha podi okala oothuwathuwene mwaha odhowa vaade va athu amodha wula yahithaniwe, amodha podi woovaga othamagihiwa ni anamuralaya, amodha enowoova onfwanya muthu anafuna okangana. Naarive emudhivelaga vanlubale Yehova, addibila ni arogola ala, enowarusa vanlubale wawaddamela athu yahanonniwa wihina yalaleye muthenga dhapama. Naarive eganna woova wula, aliwa ehinona wihina mabasa ala oolaleya bathima. Teto aliwa enowapara mabasa ala malabo aamateene. Malabo mamodha enowurusa wapara mabasa oolaleya nuuhagalala? Akala oni hee, kuwuukuwe! Podi wera akala onubuwela wi kunonne ohudhiha pama, eyo enoniha wi oli muthu owiyeviha ni kunafuna withithimiha wamwinnyo, teto kunafuna muladdu ni muthu. Ohiya eyo, kaavo anadhiveliwa wakeliwa ni makalelo abure, thabwathabwa wafunaga wawerela opama athu amodha. Okanne ebaribari wihina Yehova ohunona pamadhene dhithu dhinupadduwela ni anofuna wukavihera ni ele onahoweliwe. — Isa. 41:13. Namasugwera 04/24 epaddi 14 ddima 1-2

Wamwilerigi Bibiliya, ohiya wawerana masadduwo maatene mudhidhi mmodhave, osayele oparihedha mabasa mwigumini mwawo ethu modha obe biili ohudheriwe. We podi oleba lista na dhithu onahoweliwe osaddula, nuwindo osakule modha obe biili wihina oparihedhe mabasa, vano dhimodha ohiye wihina wakwanihedhe osogolo. Ki akala dhithu olebeliwe va listani dhihithabwa winjhiva, ethu baani onahoweliwe obajha oparihedha mabasa mwigumini mwawo? We podi obajha wodhela osakula ele eli yokweya oparihedha mabasa mwigumini mwawo. Obe we podi wambela ni yoluba ononniwe wihina enohoweleya vanlubale mwigumini mwawo. Wafwanya yolubaya, osayele mmalivuruni mwehu muselu onawoga wodhela yoluba eyo. Olobele wodhela yolubaya, omulobaga Yehova wihina uvahe ‘efunelo ni kopolo yowerana anafuniye.’ (Fil. 2:13) Nuwindo obajhe werana dhithu ohudhenriwe. Wanda wakwanihedhe yoluba yobajha, onere okanna efunelo yowakwanihedha dholuba dhimodha. Vano wonelamo wi ohanda wawerana masadduwo mwigumini mwawo obe owomihedha ekalelo yawo yekiristawu, onere okanna efunelo yodhowagave waweragana masadduwo mwigumini mwawo ni enere okala yokweya wakwanihedha dholuba dhimodha osogolo. Namasugwera 09/24 epaddi 6 ddima 13-14

Podi wera onowivaha nibili mwaha dhothega weriliwena kale dhihawukula athu amodha. Akala siyeyo enupadduwela, enukavihera ddi? Werena ele onandiwe wihina owomihedhe dhithudha, owogege ni weregena dhithu dhinoniha wi ohuthwaruwa. Ohiya eyo, olobele wa Yehova omulobaga wihina aakavihere ale enoona goyi mwaha wa dhoviriganiha dhawo. Okanne ebaribari wi Yehova anere wukavihera we vamodha ni ale enoona goyi mwaha dhoviriganiha dhawo okanna murenddele ni wanda ovilela. Ohudhere ni dhoviriganiha dhawo dhakale ni ohiye wihina Yehova uulabihedhe mwamakalelo anafuniye. Kasugwa ethu yampadduwele namavuhulela Jonasi. Yehova numuloba wihina adhowe luwani yoNinive, oliye othoma othawela luwani emodha. Mbwenye Yehova numusumulula, Jonasi ohudhera ethu yathima ni yoviriganiha yaye. (Jon. 1:1-4, 15-17; 2:7-10) Naarive dhigaali ndo, Yehova kahile omulabihedha Jonasi. Yehova omuthoma dila yanabili wihina adhowe oNinive, oliye wiwelela ahubuwele dila biili. Mwebaribarene podi wera Jonasi ahukuuwa mwaha ohiwelela dila yobajha, mbwenye oliye keenyile wihina yoviriganiha yaye emuthukulele ohirumedha mutholo ole ni othomiwa dila yanabili. — Jon. 3:1-3. Namasugwera 10/24 epaddi 8-9 ddima 10-11

Yehova kanaalevelela mangawu ehu obe dhothega dhehu baahi, ohiya eyo, oliye anothimiha dhothega dhatedhene mohihiyedhedha. Muthu athoma walevelela mangawu ehu, iyo podi omubuwela oliye akweretaga ni kaneta mangawu ehu alebiliye mukadernuni, mbwenye naarive dhigaali ndo, manumero a mangawu ale nivanove enowoneya. Mbwenye othimiha ethu ehihiyana vanlubale ni okwereta. Wihina nande wonelamo ohiyana wula, nnohowela wubuwela tinta yalabihedhiwa mudhidhi wa kale. Motajhiha, tinta yalabihedhiwa kale yaali yokweya othimiha, mwaha yasasanyiwa ni karbonu, goma ni manjhe. Ni makalelo yala muthu aleba ethu-sithu ni tinta ela, yakala yokweya othimiha ethuya. Bumwahaya mangawu yalebiwe ni tinta yela ‘yathimihiwa,’ manumeroya enoorimela ofiyedha okala ninga kavinalebiwege ethu. Iyo nnomutamalela vanlubale Yehova, mwaha onona wi oliye aafunaga onlevelela kanokweretha baahi dhothega dhehu, mbwenye anoothimiha ofiyedha okalaga ninga kannamuthegelege! — Sal. 51:9. Namasugwera 02/25 epaddi 10 ddima 11

Athu amodha yaneeddihaga obe yanitorihaga mwamakalelo abure, iyo podi ororomela wi Yehova anowoona dhinapadduwa. Okanna nroromelo nna, enere onikavihera ovilela naatorihiwaga obe neddihiwaga mwamakalelo abure. Mwaha iyo nihikanna ebaribari wi Yehova anere omariha obure waateene. Nahiya dhithu dhaatedhene mmadani mwa Yehova, nnosukuma otakaleliwa ni wakoyela ntxiga athu amodha. Okoya ntxiga ni otakaleliwa, podi onthukulela werana ethu yabure, oyelela ohagalala ni ononga wandana wehu ni Yehova. Ebaribari wi kannande ohara pamadhene yotajhiha ya Yesu. Mwaha wihina malabo mamodha iyo podi owoga obe werana ethu yanthukulele othwaruwa. (Tiya. 3:2) Malabo mamodha podi okala yorusa odduwala makalelo athu amodha eneddihiliwa mwamakalelo abure. Akala we onoweddihiwaga mwamakalelo abure, okanne ebaribari wihina Yehova ohunona makalelo oliwe. Teto woona wihina Yesu aheeddihiwa mwamakalelo abure, okanne ebaribari wi nuliyeya anere wonelamo makalelo oliwe. (Ebe. 4:15, 16) Yehova anonivaha dholaga dhinafwanyeya mBibiliyani dhinanikavihera ovilela neddihiwaga mwamakalelo abure. Namasugwera 11/24 epaddi 6 ddima 12-13

Enohoweleya omuroromela Yesu neegi “nikanne egumi yohimala.” (Juwa. 3:16-18, 36) Majudewu ale kiyamuroromela Yesu, aliwa yahifiyedha omukoha Yesu yeegi: “Nabwiya yintelelo baani munafuninyu werana wihina iyo noone ni nurumedheni?” (Juwa. 6:30) Nuwindo aliwa owoga wihina mudhidhi wa Moyizeji, amwaana Ezarayeli yahaawakela motikiniha yojha yithaniwa mana yaali ninga pawu yajhiwa malabo maatene. (Nee. 9:15; Sal. 78:24, 25) Eyo enowoniha wihina aliwa yasayela yojha yomwilini baahi. Bumwahaya Yesu nuwoga wodhela “pawu yeebaribari enadhela odhulu,” yaavahe egumi yohimala, teto yaali yohiyana ni mana, aliwa newene kiyasayenle omukoha yotapulelaya. (Juwa. 6:32) Aliwa yahithabwa othuwathuwela yojha yomwilini, ofiyedha ohonelamo ebaribari yathima Yesu ahudhihiye. Namasugwera 12/24 epaddi 5-6 ddima 10-11

Podi wera oskola mwanawo anohudhera obe anere ohudhera wodhela makalelo dhipaddusiwe dhithu dhaatedhene. Motajhiha, Muthanko dhowinjhiva dhipaddusiwe wihina dhimelege naarive dhigakakathiwe. Makalelo ala omela enithaniwa fractais. Ekalelo ela enofwanyeya mu dhopaddusa dhimodha. Mbwenye baani apadduse dhithu dhotikiniha ndala? Mwanawo awubuwelaga makoho ninga yaala, oliye enere olibiha nroromelo naye ni anere wonelamo wi dhithu dhatedhene dhipaddusiwe ni Yehova. Mudhidhi waviraga, onere ohowela omukavihera mwanawo wonelamo wihina sathima wawiwelela malamulo a Yehova. Wihina wande omukavihera mwanawo wawiwela malamulo a Yehova onohowela omukoha: “Akala Mulugu dinipadduse, kunoonelamo wi oliye dinafwanelela onaddela ethu nnahowelihu werana wihina nikale athu ohagalala?” Vano we podi omwaddela wi dhithu dhatedhene anawoga Mulugu wihina nerena dhinafwanyeya mBibiliyani. Namasugwera 12/24 epaddi 16 ddima 8

Yehova ahinvethela Pawulo oleba wihina mulobwana ole erana dhithu dhonyakavala akumihiwe mmulogoni. (1 Kor. 5:13) Makiristawu yaali oororomeleya yamoonege aavi? Murumiwi Pawulo ahavaha dholaga wihina “ehiye weedda” nuliye. Eyo yatapulela ddi? Pawulo owoga wihina aliwa “newene enajhege ni mulobwana ole.” (1 Kor. 5:11) Okarati wihina nijhe ni muthu di muthu podi onithukulela wihina ojha mudhidhi wowinjhiva nuliye. Ni madhu mamodha Pawulo afuna awoge wihina addibila enajhege mudhidhi wowinjhiva nuliye. Yahere ehara yolaga ya Pawulo yere obarela mulogo mwahaya wa dhithu dhabure erana mulobwana ole. (1 Kor. 5:5-7) Teto yere omukavihera mulobwana ole wonelamo makalelo amukuunliye Yehova, eere wukuuwa mwaha ndhe eriliyena ni eere othwaruwa. Namasugwera 08/24 epaddi 15 ddima 4-5

Wizarayeli yaka dhaatedhene yowajha mathanga a nlabo nooleveleliwa dhothega. Nafiya nlabo nenna, namakutha munlubale owakutha anenyama wi dhileveleliwe dhothega dha nlogo. Ebaribari wi mukutho ndhe dha anenyama kadhakunela dhothega dha muthu di muthu, mwaha wi anenyama kinna thima wapitha athu. Mbwenye amwaana Ezarayeli yathwaruwa ni murima wewa waatene ni yanvaha Yehova mukutho wa anenyama aalobiye, Yehova oolevelela dhothega dhewa. (Ebe. 10:1-4) Ohiya eyo, waakutha mukutho anenyama malabo maatene, yowawubusedha aliwa wi yaali athu oothega. Teto yowawubusedha wi yegi dhothega dhewa dhileveleliwe mowakwanela, yohowela mukutho munlubale opitha wa anenyama. Ddiniyani Yehova eriliyena wihina athu eleveleliwe dhothega dhewa ni mukalakala? Oliye ohenya wi mwanaye anathabwiye omudhivela, Yesu, avelele egumaye ‘dila modha wihina athukule dhothega dhaathu owinjhiva.’ (Ebe. 9:28) Yesu ohuvelela “egumaye wihina awobole anamwinjhi.” — Mat. 20:28. Namasugwera 02/25 epaddi 4 ddima 9-10

“Ebaribarene muzimu onofuna, mbwenye mwiili oli wokwerebeyene.” (Mat. 26:41b) Madhu ala enowooniha pamadhene wi Yesu ahinona wi iyo nili athu oohilogomana ni nnere werana yothega. Teto madhu ala enonxagiha wihina nnohowela ohuthabwaga wiroromela. Emahiyu yele, Yesu ahinathi wawoga madhu ala, anamahara aye yahiwoga wi kiyamusukume. (Mat. 26:35) Yothoma ele ya anamahara a Yesu yaali yapama, mbwenye aliwa yaali ehinathi wonelamo wi yahafwanyiwe yoweha yorusa, ohiya werana ethu yapama, yere werana ethu yabure. Bumwahaya Yesu adhe awogege madhu ele yolebela ya peeeno. Yowukulihaya sowihina anamahara a Yesu kayandile okala mento. Mwaha wihina Yesu nuumagiwa anamahara aye yahithawa mwaha wawoova athu. Vano mwaha ohikala mento, anamahara a Yesu werana ethu yathomiliwa oherana wodhela othawa ni omuhiya Yesu yeka. — Mat. 26:56. Namasugwera 07/24 epaddi 14 ddima 1-2

Adawu ni Eva nuuthega kiyayelenle baahi ofuru wokalawo ni mukalakala, mbwenye yahiyelela wandana yanniwana ni Yehova. Omambelelowene Adawu ni Eva nupaddusiwa, yokosa epaddi ya emudhi ya Yehova. (Luk. 3:38) Mbwenye nuumuthegela Yehova, aliwa ohiya okala epaddi ya emudhi ya Yehova, yahinathi wabaala ahima. (Gén. 3:23, 24; 4:1) Bumwahaya iyo ninga ahima a Adawu, noohowela wandanihiwa ni Yehova. (Rom. 5:10, 11) Ni madhu mamodha, nnohowela okanna wandana wapama nuliye. Madhu owi “wandanihiwa” ni Egerego, enatapulela “okanna wandana ni mwiddani awo.” Ethu enathabwa otikiniha sowihina Yehova dambele wandana ni iyo, naarive nigaali amwiddani aye. Ni makalelo baani? Yehova ohenya wi athu ohulogomana ekanne wandana nuliye. Bibiliya anowoniha wi ethu enikavihere okanna wandana ni Yehova fuleveleliwa wa dhothega dhehu. Oleveleliwa wa dhothega, winatapulela ovenyihavo ethu ni ohogoloselavo ethu enna muthengo mmodhave. Ni makalelo yaala, Yehova ohusayela makalelo oohogolosa ethu enna muthengo mmodhave Adawu ayeleliye. Namasugwera 02/25 epaddi 3-4 ddima 7-8

Murumiwi Pawulo ahileba egihina, “Makalelo asinyusiwe mulobwana oyo naathu owinjhiva ehakwana.” (2 Kor. 2:5-8) Ni madhu mamodha, osinyusiwa wule wahimukavihera vanlubale. (1 Kor. 5:1) Nimakalelo baani? Wahimuthukulela mulobwana ole othwaruwa. (Ebe. 12:11) Vano Pawulo wavaha dholaga addibila ale egihina: “Mmulevelele ni murima waateene ni mmutodole” mulobwana oyo atheegile ni, “mmoonihe odhivela weenyu winlubale.” Moone wihina Pawulo kafuna baahi wihina mulobwana ole aakeliwe mmulogoni, oliye afuna wihina addibila ale yoonihege ni madhu ewa vamodha ni dhowera dhewa wihina ehimulevelela ni wi enomudhivela vanlubale. Ndo mulobwana ole eere onona wihina addibila ehihagalala vanlubale mwaha oliye ohogolowela mmulogoni. Namasugwera 08/24 epaddi 15 ddima 4; epaddi 16-17 ddima 6-8

Murumiwi Pawulo ahinona pamadhene ethu makiristawu ale yahoweliwa werana wihina evilele. Oliye ahawubusedha makiristawu ale wihina yaharahariwaga yohowela omuroromela Yehova, ohiya wiroromela. Teto aliwa yere wanda owanana oharahariwa nuuliba murima, yahere yawubuwela madhu enihina: ‘Yehova dinagikavihera; kaginoove. Muthu anaagerele ddi?’ (Ebe. 13:6) Peeno addibilihu amodha enna oharahariwa, iyo podi wakavihera aliwa wodhela walobelela ni osayela makalelo mamodha owakavihera ni ethu-sithu enahoweliwa. Mbwenye Bibiliya anowooniha pamadhene wi ‘aatene ale enaafunege omuhagalaliha Mulugu, emuharaga Yesu, enerege oharahariwa.’ (2 Tim. 3:12) Bumwahaya iyo aatene nnohowela wiwegeredha wihina nande owanana makathamiho enanifwanye osogolo. Nimakalelo yaala, nnohowela odidela omuroromela Yehova ni okanna ebaribari wihina oliye anere onikavihera wawanana makathamiho bi makathamiho enanifwanye. Iyo kannanganyedha wi mudhidhi wofwanelela Yehova anere wawobola ale enamwebedha nuuroromeleya. — 2 Tes. 1:7, 8. Namasugwera 09/24 epaddi 13 ddima 17-18

Ddiniyani yakavihere aKorintiyu obaddiziwa? (2 Kor. 10:4, 5) Muzimu wotxena ni madhu a Mulugu yahakavihera aliwa wawerana masadduwo manlubale mwigumini mwewa. (Ebe. 4:12) Athu owinjhiva yakala oKorintiyu yahanda okala makiristawu wodhela ohiya dhilemelelo ni dhimanya dhewa dhabure ninga olezela, wiiya ni ogonihana alobwanave obe ahiyanave. (1 Kor. 6:9-11) Ninga noonilihu, naarive aKorintiyu eganna dhimanya yeresiwana muwari mwa yakadhene, aliwa yofuna obaddiziwa. Bumwahaya, aliwa wilibihedha ovolowa dila yopurana yaathukulela wakela egumi. (Mat. 7:13, 14) We onna owanana elemelelo obe emanya enuhiha obaddiziwa? Akala siyeyo, kuselele owanana! Olobele wa Yehova ni murima wawo waatene omulobaga wihina uvaha muzimu waye wotxena. Eyo enere wukavihera wafwanyiwa yoweha yowerana ele eli yabure. Namasugwera 03/25 epaddi 6 ddima 15-17

Olobele wa Yehova omulobaga wihina ukavihere wonelamo makalelo anubuweliye wodhela museluya. Yehova anowavaha thotho ndha ‘aatene mwamahala, ahimwimanne muthu Wamala olobela wa Yehova omulobaga dhoholela, opwasedhe wonelamo makalelo anafuniye wawakula malobelo awo. Kubuwela nladdaniho nna: “Wahere oholowa weddaga olenddo, were ddi? Mohanganyedha were omuloba nikavihero muthu anakala murudda yole. Mbwenye nerege were omaruwa ni weeddege olenddo wawo, muthuya ahinathi wuwaddela ethu onahoweliwe werana? Naari kuwerena eyo! Were onvuruwana pamadhene muthuya ni ohariha dhithudha uwaddeliye. Nimakalelo mamodhave, wamala omuloba nikavihero Yehova, osayele woona yowakulaya. We podi werana eyo wodhela osayela mBibiliyani malamulo ni malagano eniwanana ni muselu wawo. Motajhiha, wathomaga akala onere oyawo obe naari ofestani, yere okala yapama wubuwela wodhela wandana wa bure ni opweha mburo wobajha Omwene wa Mulugu ohiya dhofuna dhehu. — Mat. 6:33; Rom. 13:13; 1 Kor. 15:33. Namasugwera 01/25 epaddi 16 ddima 6-7

Yovuhulela ya Izayiya enowoga wodhela makalelo yakale egumi ya athu enafwanyeya mparayizuni oomuzimuni, ni makalelo yakale egumi ya athu ehili mparayizuni oomuzimuni. Yehova anowavaha dhoojha dhowinjhiva dhomuzimuni adhaari aye. Motajhiha, Yehova anonivaha muzimu waye wotxena, madhu aye ali Bibiliya, malivuru vamodha ni vidiyu wihina nandege ‘ojha, . . . ong’wa, . . . [ni] ohagalala.’ (Omuliganihe ni Ovuhulela 22:17.) Mbwenye athu ehili okala mparayizuni oomuzimuni ‘enokwa dala . . . , enokwa nthona . . . , [ni] enokanna manyazo.’ Ni madhu mamodha aliwa kinna wandana ni Mulugu. (Amós 8:11) Mbwenye Yehova ononivaha dhaatedhene nnahowelihu wi nikanne nroromelo nooliba ni anonivaha dhoholela dhinakumela mBibiliyani. (Joel 2:21-24) Yehova anonivaha dhoojha ndha dhomuzimuni wodhela Bibiliya, malivuru enakumihiwa nnikuru nehu, sayiti yehu, mutugumano, musonkano wa nlabo nimodha vamodha ni musonkano wa malabo mararu. Iyo podi wijhiha epaddi yomuzimuni malabo aatene, mwaha wa yeyo epaddi yehu yomuzimuni enakala yolibene. Namasugwera 04/24 epaddi 21 ddima 5-6

Akala onofuna obajha omwenddi, we podi opangana ni oliye wi mugumane mburo wili athu obe othapanya nuliye olabihedhaga telefoni. Omwaaddele pamadhene ethu onafuniwe ni oliye. (1 Kor. 14:9) Yahowelaga onvahe mudhidhi wihina ubuwele ahinathi wuwakula. (Pro. 15:28) Vano akala muthuya kanafuna kumuwaddihedhe, oriihe yothoma yaye. Ki muthu uwaaddela wi anowufuna? Mwebaribarene muthu oyo ohilibihedha vanlubale wihina uwaddele wi anowufuna, bumwahaya omwakule mwamakalelo apama ni anriho. Akala onohowela mudhidhi wihina omwakule, omwaaddele muthuya. Mbwenye kulegele omwakula. (Pro. 13:12) Akala kunanfuna muthuya, owoge ni makalelo apama ni mowoneleyamo. Vano akala we ononfuna muthuya, owoge dhithu dhili mmurimani mwawo ni makalelo munafuninyu weddiha omwenddi weenyu. Dhithu we onafuniwe, podi ohiyana ni ndhe anubuwela muthu mmodhaya. Namasugwera 05/24 epaddi 23-24 ddima 12-13

Nuuvira mudhidhi, Davidi ahidhowa mburo amwaana Ezarayeli yawaniwawo koddo ni mafilistewu. Vano oliye wonelamo wi anyakoddo aamwaana Ezarayeli yoomoova vanlubale mfilistewu akopolo ni oothabwa olapa ithaniwa Goliya, nuwoga egi: ‘Peeno miyo ginafuna giwane ni anyakoddo aamwaana Ezarayeli.’ (1 Sam. 17:10, 11) Anyakoddo aamwaana Ezarayeli yoomoova mwaha wi yapwasendhe osugwa malapelo wa Goliya ni dhithu oliye awogiye. (1 Sam. 17:24, 25) Mbwenye Davidi apwaasendhe wubuwela ethu emodha. Davidi ahinona wi Goliya kaanyemula baahi anyakoddo aamwaana Ezarayeli, mbwenye amunyemula Mulugu ookalawo. (1 Sam. 17:26) Teto Davidi amuroromela Yehova baahi. Oliye ahinona wi Mulugu mmodhave aamukavihere mudhidhi agaali namakukula, eere omukavihera mudhidhi yole. Davidi kanganyedha wi Yehova eere omukavihera, bumwahaya oliye ahanda omugonjhiha Goliya! — 1 Sam. 17:45-51. Namasugwera 06/24 epaddi 21 ddima 7

Karajhiha wubuwela makalelo yakale egumi yawo, ahere ohumulabelaga Yehova. Wubuwela dhithu Yehova ananereliye, podi onikavihera okalave oororomeleya wa Yehova nafwanyiwaga makathamiho bi makathamiho. Teto ndala ninga Salmista, iyo nnere owoga negi: ‘Mbwenye wa miyo sapama onfiyedha Mulugu.’ (Sal. 73:28) Iyo podi wanda wagonjhiha makathamiho owinjhiva enanifwanya malabo ala ookuthula, mwaha nili ‘adhaari a Mulugu ookalawo ni eebaribari.’ (1 Tes. 1:9) Yehova Mulugu aliwo, bumwahaya Oliye anofuna vanlubale onikavihera. Yehova kanaasukumege adhaari aye mudhidhi wa kale, teto kanadha anisukuma ni iyoya peeno. Mohulegela, mahoso manlubale enere wambela. Mbwenye kannaakale yekihu, Yehova anaakale ni iyo. Bumwahaya iyo aatene nnere ‘oliba murima, ni nnere owoga negi: “Yehova dinagikavihera; kaginoove.”’ — Ebe. 13:5, 6. Namasugwera 06/24 epaddi 25 ddima 17-18

Bibiliya anowawoga mandina a mamwene ookwaranya 40, yathongile elabo Yowizarayeli. Mamwene amodha apama, yahifiyedha werana dhithu dhabure. Siyeyo yapadduwe ni mwene Davidi. Awogaga wodhela Davidi, Yehova ahiwoga egi: ‘Mudhaari aaga Davidi, awiwelela malamulo aaga ni aahara ni murima waye waatene wodhela werana baahi ele yaali yapama vamentoni vaaga.’ (1 Reis 14:8) Mbwenye kudduwale wihina Davidi ahimukumiha mba mwadha mwinnya ni olamula wihina mamuneya apiwe okoddoni. (2 Sam. 11:4, 14, 15) Teto Bibiliya anowaawoga mamwene amodha abure, yaherana dhithu dhapama. Kasugwa yopadduwa ya mwene Robowawu. Vamentoni va Yehova oliye ‘aherana dhithu dhabure.’ (2 Cró. 12:14) Naarive dhigaali ndo, oliye ahimwiwelela Yehova, nuwoga wihina anaadhowe owana ni mahimo 10 aamwaana Ezarayeli ni aahiye aliwa omusakula mwene mmodhaya. Teto oliye aahibarela luwani dhowinjhiva mumweneni mwaaye wihina nlogo na Yehova nikale nobareleyanene. (1 Reis 12:21-24; 2 Cró. 11:5-12) Ki Yehova athoma aavi akala mweneya aali oororomeleya vamentoni vaye obe naari? Yowakula ya nikoho nna, podi onikavihera wonelamo ethu kadda muthu wa iyo. Namasugwera 07/24 epaddi 20 ddima 1-3

Ki anamaholela mulogo enere ddi akala muzombwe obe namwali ahinna yaka 18 mbwenye amanle obaddiziwa ohuthega? Anamaholela mulogo enowathoma anamaholela abiili wihina ethapanye nuliye vamodha ni makolo aye eli makiristawu. Anamaholela mulogo enere wakoha makolo aye dhithu yeriliwana wihina emukavihere mwaniwa osaddula ekalelo yaye ni othwaruwa. Akala mwaana ole anowavuruwana makolo aye nuwindo osaddula ekalelo yaye anamaholela ale podi othoma ohususana museluya. Ndo makolo aye enere odidelave omukavihera epaddi yomuzimuni teto anamaholela mulogo kinaahogolowele omuthapanyana mwaha Yehova avahile abaabi mutholo wowasumulula aniwa mwamakalelo apama. (Deut. 6:6, 7; Prov. 6:20; 22:6; Efe. 6:2-4) Malabo mamodha anamaholela mulogo enere osayela onona akala makolo aye enna omukaviherave epaddi yomuzimuni. Ki akala oliye kanathwaruwa ni anodidelave werana dhithu dhabure? Yakala ndo, anamaholela mulogo enere osayela othapanya nuliye vamodha ni makolo aye eli anamoona a Yehova. Namasugwera 08/24 epaddi 24 ddima 18

Aatene iyo nnohagalala naavahiwaga ethu-sithu, mbwenye nnathabwa ohagalala naavahaga athu amodha ethu-sithu. Mwaha Yehova ohunivaha ofuru wothoma akala nnafuna nikale athu oohagalala obe naari. Iyo podi othoma okala athu oohagalala wodhela osayela makalelo owakavihera athu amodha. Kunoonelamo wi sapama Yehova onipaddusa ni ekalelo yela yovaha? (Sal. 139:14) Bibiliya anowoga wihina wawerela opama athu amodha winothabwa ohagalasa. Bumwahaya kannatikina Bibiliya aamwithanaga Yehova ninga ‘Mulugu oohagalala.’ (1 Tim. 1:11) Mwaha Yehova doobajha wawerela opama athu amodha, teto kaavo muthu anavaha omukwaranya Yehova. Mwaha woliye “nihikanna egumi, nnowiddiginya ni nnokalawo,” ndala ninga murumiwi Pawulo awogiliye va Dhowera Dhaarumiwi 17:28. Ebaribariya sowihina ‘dhego dhaatedhene dhapama ni nvaho wapama dhinakuma odhulu,’ obe neere, dhinadha wa Yehova. (Tiya. 1:17) Mohanganyedha iyo aatene nnofuna ohagalala mwaha wawerela opama athu amodha. Iyo podi wanda okala athu oovaha wodhela omutajhiha Yehova. — Efe. 5:1. Namasugwera 09/24 epaddi 26 ddima 1-4

Numala woona dhikalelo onahoweliwe okanna wihina okale namaholela mulogo, adhaari ookavihera amodha podi wubuwelaga wihina kinande okanna dhikalelo ndha. Kudduwale wihina Yehova nnikuru naye, kinajheha wihina addibila ekale ologomana wihina yonihe dhikalelo ndha. (1 Ped. 2:21) Mbwenye muzimu wotxena, onere wukavihera wihina okanne dhikalelo ndha. (Fil. 2:13) Ononamo wi ehikalawo ekalelo onahoweliwe okanna? Akala siyeyo, olobele wa Yehova omulobaga wihina ukavihere okanna ekalelo onilibihedhiwe okanna. Osayele mmalivuruni mwehu muselu anawoga wodhela ekalelo eyo ni omulobe namaholela mulogo wihina ukavihere woona makalelo okanna ekalelo eyo. Wilibihedhe wi okale namaholela mulogo! Omulobe Yehova wihina uxagihe ni ukavihere okanna dhikalelo dhinahoweleya wihina odidele olabihedhiwa mmulogoni. (Isa. 64:8) Mwebaribarene Yehova anere woona wilibihedha wawo ni anere wukavihera wihina okale namaholela mulogo. Namasugwera 11/24 epaddi 25 ddima 17-18

Kanubuwele wi nnofwanelela oleveleliwa ni Yehova, mwaha womulabela muwari mwa yaka dhowinjhivadhene. Ebaribari wi Yehova anovaha thima ni kanadduwala dhithu dhaatedhene nimwerelihu. Mbwenye Yehova anivahile mwanaye ninga mukono, ohiya ninga yoliva anapagariye dhithu nnamwerelihu. Kiyakale yapama wubuwela wi nnofwanelela oleveleliwa obe weddihiwa mwamakalelo apama. Wubuwela ndo, si emodhave wubuwela wihina Yesu kahowela onikwela. (Omuliganihe ni Gaalata 2:21.) Murumiwi Pawulo ahinona wihina kafwanelela orumedhiwa ni Yehova. Akala oliye ahinona eyo, mwahaya bwaddi adhe ilibihedhege omulabela Yehova? Yowakulaya sowihina, oliye afuna oonihe wi omutamalela Yehova mwaha opama waatene wohinfwanelela Yehova amonihiliye. (Efe. 3:7) Ndala ninga murumiwi Pawulo, iyo nnodidela omulabela Yehova nuviheya, ohiya mwaha osayela oleveleliwa, mbwenye wihina noonihe wi nnotamalela dhithu dhatedhene Yehova ananereliye. Namasugwera 01/25 epaddi 27 ddima 5-6