Addibila enna dhikalelo dhapama, ehikanna thima mmulogoni. Mulobwana ali ‘okweya,’ anowilibihedha okala muthu amurenddele. Akala we onofuna ononiwa ninga muthu ookweya, wavuruwanege athu amodha yawogaga ni okalege otapuwene wihina wonelemo enubuwela athu amodha. Motajhiha, wahakale vaari va mutugumano wa anamaholela mulogo, were orumedha mubuwelo waddibila oniwanana ni malagano a mBibiliyani, naarive oganna mubuwelo mmodha? Kudidelege werana dhithudha ninga munafuneliwe. (Gén. 13:8, 9; Pro. 15:22) Mbwenye ohiya okala muliba ovanya, okale muthu ookweya ni owogege ni murenddele. Werana ndo, onerege wukweyela odhana murenddele, naarive dhithudha dhirusaga. (Tiya. 3:17, 18) Wakanna elemelelo yowoga naathu aatene nuupama naaleya ehili addibila, onere wakavihera okala athu oopwaseya ni kinatakaleliwege bure-bure. — Juí. 8:1-3; Pro. 25:15; Mat. 5:23, 24. Namasugwera 11/24 epaddi 23 ddima 13

Ebaribari wi Yesu “akwile dila modha baahi,” mbwenye nivanove anna onikavihera. (Rom. 6:10) Nimakalelo baani? Oliye anoodidela olaba wihina anivahe dhithu dhapama, peeno dhinenyeya baahi nnikavihero na yowobola. Yesu ali oopinyaminyeyene alabaga ninga Mwene ehu, Namakutha Munlubale ni Musolo wa mulogo. (1 Kor. 15:25; Efe. 5:23; Ebe. 2:17) Teto oliye ohukanna mutholo wowatugumana addibila oothikitheliwa ni muthithi waathu. Mutholo ola onere omala mahoso manlubale ehinathi wambela. (Mat. 25:32) Ohiya eyo, oliye anna omulabihedha mudhaari oororomeleya ni athotho wihina anivahe dhoojha dhomuzimuni nnahowelihu wi nididele omulabela Yehova nuuroromeleya malabo ala ookuthula. (Mat. 24:45) Vano ambela othonga elabo yavati muwari mwa yaka txikwi, oliye anere odidela onikavihera. Mwaha Yehova ohumpeleka mwanaye Yesu mwaha wa iyo! Namasugwera 01/25 epaddi 24 ddima 12

Yehova alevelela dhothega dhehu, oliye anoothimiha ofiyedha okala ninga kannamuthegelege, teto oliye kanadha anisinyusa mwaha wa dhothega anileveleliye. Mwaha wa yeyo enowandeya okanna wandana wapama ni Babihu oodhulu, Yehova. Ohiya eyo oleveleliwa webaribari mukono munlubale Yehova ananivahiye. Ni yowoniha wa odhivela winlubale ni opama wohinifwanelela anniyena ni athu aatene ohulogomana. Teto iyo nihinona wi kannafwanelela dhithu dhatedhene ndha Yehova ananereliye. Iyo nnotamalela vanlubale mwaha Yehova ‘onilevelela nibaribari,’ obe mowakwanela. (Sal. 130:4; Rom. 4:8) Mbwenye nafunaga wi Yehova anilevelele, nnohowela werana ethu yathima. Yesu ohuwoga ethuya egi: “Mwahalevelelaga athu amodha dhothega dhewa, Babinyu kanuleveleleni dhothega dhenyu.” (Mat. 6:14, 15) Ela enowoniha pamadhene wi sathima omutajhiha Babihu Yehova wodhela walevela athu amodha. Namasugwera 02/25 epaddi 13 ddima 18-19

Kawubuwele athu yakala luwani yoSodoma ni Gomora. Lo aali muthu owogowa akala vaari va athu yaale abure. Nerege Lo ahanda omulaleya kadda muthu akala luwani dhendhe? Naari. Ebaribari wi athu ala yowerana dhithu dhowinjhiva dhabure. Mbwenye nerege kadda muthu wa aliwa ahinona ohiyaniha ethu yabure ni yapama? Podi wera naari. Kudduwale wihina nikuru na alobwana yakala luwani yeele, yahixixa wagoniha aleddo yadhile vaade va Lo. Bibiliya anihina nikuru nne na alobwana yahikalavo ‘azombwe ni anakalaba.’ (Gén. 19:4; 2 Ped. 2:7) Nerege iyo podi owoga ni ebaribari wi Mulugu ehu athagaraga, ohuthoma wi kananvenyihe newene muthu mmodha wa athu yaale yakala luwani ndhe? Naari, iyo kannonne. Mwaha wi Yehova ahiwoga ni Abarawu wihina luwani ndhe kawali newene muthu mmodha owogowa. (Gén. 18:32) Eyo enowoniha wihina athu ala yaali ohogowa, bumwahaya Yehova adhe athomege waagujhula. Mbwenye nerege iyo podi owoga ni ebaribari yaatene wi kaavo newene muthu mmodha anavenyihiwe mudhidhi “yavenyihiwaga athu ohogowa?” Naari iyo kannonne! Namasugwera 05/24 epaddi 2 ddima 3; epaddi 3 ddima 8

Addibila amodha ehahiya amudhiwa ni ehitamela elabo emodha wi yasayele mabasa. Mbwenye owinjhiva wa aliwa ehonelamo wihina yothoma yeriliwana yohiya emudhiwa kahi yapama. Bumwahaya akala onasayela mabasa, ohunathi warumedha mabasa bi mabasa, kuwubuwelege baahi korowa onakeligiwe, wubuwelege dhithu onafuniwe oyelela epaddi yomuzimuni. (Luk. 14:28) Teto we podi wikoha ohunathi warumedha mabasaya: ‘Gakala wolapela ni emudhaga murala waaga onaakale aavi? Mabasaya enerege ogeenya odhowa omutugumanoni, wapara mabasa oolaleya obe waredha ni addibila?’ Akala oli baabi, sapama wikoha: ‘Ginande aavi walela anaaga “malagano a Yehova” gakala wolapela ni aliwa? (Efe. 6:4) Sapama werana dhothoma dhiniwanana ni mubuwelo wa Yehova ohiya ohara mubuwelo wa amudhawo obe akwawo yahinamuriha Bibiliya. Namasugwera 03/25 epaddi 29 ddima 12

Mukiristawu oohithwelavo epaddi yomuzimuni podi olekethiwa bure-bure ni ‘oxaga wa athu’ vamodha ni ‘enonelo yowoota.’ Ohiya eyo, anorumedha muselu dhowoota dhinavuwihiwa munotisiyani vamodha ni muselu enavuwiha mapostata. Teto oliye anowakalela ajhe athu amodha, doorabwe, kanarusa otakaleliwa, ohiya eyo afwanyiwa yoweha kanarusa omotha. (1 Kor. 3:3) Bibiliya analiganiha wunnuwelavo epaddi yomuzimuni ni wunnuwa wa muthu. (Efe. 4:15) Dhihikalawo dhithu dhowinjhiva mwaana ahinonniye, bumwahaya oliye anohowela obareliwa ni osamaleliwa ni muthu ali pogo. Motajhiha, mayi podi omuloba mwanaye mung’ono wihina amuhiddele nlada yafunaga omulupa rampa, vano mudhidhi mwaana ole unnuwaga mayi ole podi omweenya mwanaye omulupa rampa yeka, mbwenye oliye anere omubusedha mwanaye wihina anaadduwale osugwa mmambalo ahinathi omulupa rampa. Vano mwaanaya akala pogo, anerege wanda omulupa rampa yeka nuubareleya ahihowelaga wubusedhiwa ethu-sithu. Nimakalelo mamodhave makiristawu owithwelavo epaddi yomuzimuni yaafunaga werana yothoma, enoliganiha yothoma yewa akala enowiwanana ni malagano a mBibiliyani wihina ekanne moonelo mmodhave wa Yehova wodhela museluya. Vano vasogolova enowerana dhithudha mowiwanana ni malagano a mBibiliyani. Namasugwera 04/24 epaddi 3 ddima 5-6

Muwari mwa yaka dhowinjhivadhene aleddo a Yehova yaali ale yakala nuliye odhulu. Mbwenye Yehova othoma omunnuwiha ddammwa aye wihina athu enakala velaboni yavati ekale aleddo aye. Athu a velaboni yavati Yehova awakenliye ninga aleddo aye aali Inoki, Nowe, Abarawu, Jo ni amodha. Bibiliya anawoga wi aliwa yahandana ni Yehova mwaha yomwiwelela ni yeedda ‘ni Mulugu eebaribari.’ (Gén. 5:24; 6:9; Jó 29:4; Isa. 41:8) Muwari mwa yakadhene Yehova anowawithana akwaye wi ekale aleddo muddammwani mwaaye. (Eze. 37:26, 27) Motajhiha, va yovuhulela ya Ezekiyeli nnohudhera wihina Yehova anafuna wi adhaari aye ekanne wandana wooliba nuliye. Teto oliye anopaganya werana ‘nipangano na murenddele naliwa.’ Yovuhulela ela enowoga wodhela mudhidhi makiristawu oothikitheliwa vamodha ni ale enna ejhehedhelo yokala velaboni yavati, enafuniwa okala owiwanana muddammwani mwaaye, emulabelaga oliye mowiwanana ninga “nikuuru nimodha.” (Juwa. 10:16) Teto yovuhulela ela enna wakwanela malabo yala! Namasugwera 06/24 epaddi 2 ddima 2, 4; epaddi 3 ddima 5

Woona wihina nili nlogo na Mulugu, iyo nnokavihera Omwene waye ni murima wehu waatene. Malabo mamodha kahi yokweya okavihera Omwene wa Mulugu, bumwahaya enohoweleya okala ooliba murima. (Mat. 6:33) Motajhiha, nnohowela okala ooliba murima wihina nande wawiwelela malamulo a Yehova ni olaleya muthenga dhapama dhOmwene, mwilaboni muna yabure nnakalihu. Teto nnohowela okala ooliba murima wihina nahivolosihe mpulitikani, woona wi elabwela enna othabwa ogaweya mwaha muselu dha pulitika. (Juwa. 18:36) Ohiya eyo, mwaha adhaari owinjhiva a Yehova othoma ohivolosiha mpulitikani ni ohukavihera koddo, ehonihiwa goyi ni anamathonga, ehiyelela dhoreela dhewa, teto amodha ehifiyedha ovolosihiwa mukambura mwaha odidela okala oororomeleya wa Yehova. Ni iyoya podi okala athu ooliba murima, nahudheraga dhopadduwa dha adhaari amodha a Yehova yaali ooliba murima wihina ekavihere Omwene wa Mulugu nuuroromeleya. Mwene ehu Yesu ahikoodda okavihera muselu dha pulitika ya elabo ela ya Saddana. (Mat. 4:8-11; Juwa. 6:14, 15) Oliye amuroromelesa Yehova wihina ande okala ooliba murima ni okanna kopolo yowerana ele eli yapama. Namasugwera 07/24 epaddi 3 ddima 4; epaddi 4 ddima 7

Yehova enyile wihina elebiwe yopadduwa ela wihina enikavihere. Ndo nnowanda wonelamo ethu enamuthukulela oliye widda yothega. Yothega enononga wandana wehu ni Yehova ni enonthukulela okwa. (Isa. 59:2) Bumwahaya Saddana aatatamunle makathamiho maatene, agadhiveliwa yothega ni anowathukulela amodha werana emodhave. Podi wera oliye owubuwela wihina ahimugonjhiha Yehova. Mbwenye kanonne wihina Yehova Mulugu oodhivela. Mulugu kaasaddunle ethu aampaganyiliye Adawu ni Eva. Oliye anowadhivela athu, bumwahaya adhe avahege ejhehedhelo. (Rom. 8:20, 21) Yehova ahinona wihina athu amodha yerege omudhivela ni yerege oveda nikavihero naye wihina egonjhihe yothega. Woona wihina di baabiwa ni mpaddusi ewa, eere wakavihera ogonjhiha yothega wihina yandane ni oliye. Namasugwera 08/24 epaddi 3 ddima 3-4

Adhaari owinjhiva a Yehova eneedda oopinyaminyeyeene, owinjhiva wa iyo nnohowela olaba wihina nisamalele emudhihu ni iyo nannya. (1 Tim. 5:8) Teto addibila owinjhiva enohowela wasamalela amudhiwa eli anakalaba ni aredda. Ohiya eyo, iyo aatene nnohowela mwana mudhidhi wihina nisamalele egumi yehu. Ohiya wakwanihedha dhithu ndha baahi, iyo nihikanna mutholo dhimodha mmulogoni. Teto mutholo wathima ninnihuna wihina naakwanihedhe, fuwapara mabasa oolaleya. Omwileri Bibiliya ethu ‘yathima’ mwigumini mwa makiristawu, bumwahaya nnohowela opweha mburo woobajha mwigumini mwehu. Yolebela ya Salmo 1:1, 2 enihina muthu oohagalala duule ‘anadhiveliwa madhu a Yehova, teto anawileri malamulo aye ni ndhu na vati-vati, mutana ni mahiyu.’ Ela ethu enoniha wihina nnohowela osayela mudhidhi wi nimwileri Bibiliya. Mbwenye mudhidhi wofwanelela wihina nimwileri Bibiliya buuvi? Kadda muthu podi osakula mudhidhi wofwanelela wihina amwileri Bibiliya. Mbwenye sapama ohuddiwala wi mudhidhi wofwanelela buyole onandiwe omwileri Bibiliya malabo aamateene. Namasugwera 09/24 epaddi 3 ddima 5-6

Eyo enatapulela wi mukiristawu owithwelavo epaddi yomuzimuni kanahowela nikavihero naathu amodha? Naari! Ni makiristawuya owithwelavo epaddi yomuzimuni malabo mamodha enoloba nikavihero. Mbwenye mukiristawu oohithwelavo epaddi yomuzimuni enajheha wihina athu amodha emuthomelege ethu anahoweliye werana. Mbwenye mukiristawu owithwelavo epaddi yomuzimu aloba nikavihero na makiristawu mamodha enna thotho, oliye kanajheha wi athu amodha emuthomele ethu anafuniye werana, mwaha oliye ohunona wi Yehova anajheha wi kadda muthu ‘athukule mutholo waye. Ndala ninga athu eli apogo enahiyaniwa wodhela makalelo oli mwiili wewa, makiristawu owithwelavo epaddi yomuzimuni ehikanna dhikalelo dhohiyana. Motajhiha, amodha bathotho, amodha ooliba murima, amodha oovaha ni amodha banthebwa. Ohiya eyo, makiristawu abiili owithwelavo epaddi yomuzimuni podi werana dhothoma dhohiyana, mbwenye dhiniwanana ni Bibiliya, naarive museluya ogaali mmodhave. Eyo enopadduwa malabo owinjhiva akala museluya onavolowelavo ohara mubuwelo wehu oxagihiwe ni Bibiliya. Mwaha wonelamo wi kadda mukiristawu ohukanna ofuru wosakula ele anafuniye, makiristawu owithwelavo epaddi yomuzimuni enorabela watoriha amodha. Ohiya eyo, aliwa enowilibihera okala owiwanana.— Rom. 14:10; 1 Kor. 1:10. Namasugwera 04/24 epaddi 4 ddima 7-8

Onere ddi wubuwelaga wi kunna thima vamentoni va Yehova? Wilerigi dholebela dhinoniha wi Yehova anowuvaha thima ni osayelege mudhidhi wihina wubuwele dholebela omanliwe wileri. Akala we oli oowukuwene mwaha ohanda wakwanihedha yoluba yawo obe akala oli ookwerebeyene mwaha ohanda werana dhithu athu amodha enandiwa werana, kuwiliganihege ni athu amodha, newene kupwasedhege wubuwela dhithu ononniwe wi kunanda werana. Yehova kanajheha wihina werena dhithu ohunandiwe, mbwenye anajheha wi werena ele onandiwe nuudhivela. (Sal. 103:13, 14) Akala onowonihiwaga goyi wodhela wukuthiwa, orarusiwa obe oruwaniwa, kuwivahe nibili mwaha dhithu dhupadduwele. Mwebaribarene we kuwafwanelela wereliwa dhithu ninga dhendha. Mwaha wi vamentoni va Yehova anna nibili duule anerana obure ohiya ole ereliwe obure. (1 Ped. 3:12) Kuddiwale wi Yehova podi wulabihedha wihina wakavihere athu amodha. Yehova ohuvaha gari yolaba vamodha nuliye mmabasani oolaleya. (1 Kor. 3:9) Teto dhithu dhupadduwele mwigumini mwawo, podi wukavihera wawonelamo athu amodha enafwanyiwa makathamiho mamodhave. Mwaha wa yeyo, we podi wanda wakavihera vanlubale athu yayo. Namasugwera 10/24 epaddi 7-8 ddima 6-7

Yehova anonipwatha vanlubale oonaga makalelo athu amodha enaneddihiwa. Mwaha wi ‘Yehova anadhiveliwa opama.’ (Sal. 37:28) Yesu ohupaganya wihina Yehova “[anere] weenya wihina athu aye yeddihiwe nuupama . . . Mohulegela,” wafiya mudhidhi wofwanelela. Teto mohulegela Yehova anere omariha dhithu dhatedhene dhinanitatamulela makathamiho ni obure waateene oliwo peeno. (Sal. 72:1, 2) Mbwenye nnohowela ojheha mudhidhi Yehova anafuniye wamariha makathamiho mateene. Wula nimujhehaga, oliye anonihudhiha ethu nnahowelihu werana neddihiwaga mwamakalelo abure. (2 Ped. 3:13) Yehova anonihudhiha ethu nnahowelihu werana wihina nahitatamulele makathamiho. Ohiya eyo, amulabihedhaga mwanaye Yesu, Yehova onihiyedha yotajhiha yapama nnahowelihu ohara neddihiwaga mwamakalelo abure. Teto ohunivaha dholaga dhinafwanyeya mBibiliyani dhinanikavihera ononona ethu baani nnahowelihu werana neddihiwaga mwamakalelo abure. Namasugwera 11/24 epaddi 2-3 ddima 3-4

Wajhiha athu aatene yaali mburo yoole kayali ethu yokweya mwaha mburo ole yahikalavo alobwana owakwana 5000, teto yahere yakontari ahiyana ni ahima, podi wera yere wakwana 15 000. (Mat. 14:21) Bumwahaya Andire adhe awogege eegi: “Vala ukalavo muzombwe anna pawu tanu dha Sevada ni mwana oba biili. Dhendha baahi dhinere wawakwana athu yaala aatene?” (Juwa. 6:9) Pawu yaSevada, yaali yoojha ya athu oohawa, yajhiwa malabo aamateene. Teto oba ndhe podi wera dhahekiwa mwinnyu wihina dhahivudde. Naarive dhigaali ndo, pawu ni oba anna muzombwe ole kadhakwane wihina muthithi ole waathu ejhe.Yesu aheddiha muthithi ole waathu nuudhivela. Oliye waloba wihina ekarati mwamakalelo owegeredheya. (Mar. 6:39, 40; Juwa. 6:11-13) Nuwindo, ninga munawogela Bibiliya, Yesu othukula pawu olobela wa Yehova ni werana emodhave ni oba. Mwebaribarene Yesu oohowela omutamalela Yehova, mwaha dhoojha dhaatedhene ndhe dhadhela wa Yehova. Yesu ohuhiya yotajhiha yapama aatene iyo nnahowelihu ohara. Malabo aamateene nafunaga oojha, nnohowela olobela wa Yehova nimutamalelaga. Numala olobela, Yesu wagawela yoojha athu aatene ofiyedha aliwa ojha ni orubala. Namasugwera 12/24 epaddi 2-3 ddima 3-4

Yesu agaali velaboni yavati, ahaavaha nthithimiho Ababe wodhela owoga wihina Yehova dili ntxela na kopolo dhamukavihera wawerana matikiniho. (Mar. 5:18-20) Yesu ahahakavihera athu amodha woona wihina Yehova Mulugu ootikiniha wodhela wawoga opama Ababe ni makalelo aweddihiye amodha. Nlabo dhaala Yesu ahudhihaga musinagoga, muhiyana dhaala avoloweliwe ni demoniyu muwari mwa yaka 18, aali wewule anvuruwanaga. Demoniyu ole ahiragaliha mutana wa muhiyana ole, mwaha wa yeyo oliye kaanda wiinuwa. Yaali yowuukuliha yampadduwela muhiyana ole. Teto Yesu owanda woonelamo goyi yafwanya muhiyana ole. Mwamakalelo apama, Yesu omwaddela eegi: “Muhiyanawe, oreddaawo ohumala.” Vano Yesu omutapulela maladaaye, nuwindo mutana wa muhiyana ole woogowa ni “wambela omuthithimiha Mulugu.” Muhiyana ole ahimutamalela vanlubale Yehova mwaha ovulumuwa! (Luk. 13:10-13) Mwebaribarene muhiyana ole ahikanna dhithu dhamuthukulela omuthithimiha Yehova. Teto nihiyoya nihikanna. Namasugwera 01/25 epaddi 2-3 ddima 3-4

Yekihu, kadhandeya ohogolowela okanna dhithu Adawu ni Eva yayeleliwa. (Sal. 49:7-9) Ahere Yehova ahinikavihera, iyo kanakanne ejhehedhelo yowakela egumi yohimala osogolo, newene ejhehedhelo yovenyihiwa muukwani. Ohiya eyo, nerege okwa baahi nahinna ejhehedhelo yohogolowela okalawo, ndala ninga enapadduwa ni anenyama. (Ecl. 3:19; 2 Ped. 2:12) Babihu oodhivela Yehova, ohunivaha mukono onanikavihera oliva yothega Adawu anivalihiliye. Yesu ohuwoga pamadhene wodhela mukono ola, nuwoga eegi: “Mulugu ohudhivela vanlubale elabo, [ofiyedha] omuleva mwanaye mmodha, wi athu aatene enaamuroromele yahitolosiwe, mbwenye ekanne egumi yohimala.” (Juwa. 3:16) Ohiya eyo, mukono ola onoonivaha ofuru wowandana ni Yehova. Teto Yehova anivahiliye mukono ola wihina dhothega dhehu dhileveleliwe. Namasugwera 02/25 epaddi 3 ddima 3-6

Ddiniyani yamukavihere Sawulu obaddiziwa? Yesu agaali odhulu nuwoga ni Sawulu, waara wahimweriha wihina oliye ahoonege. (Dho. 9:3-9) Oliye ahimala malabo mararu ahijhile newene ohing’wile ethu. Mohanganyedha mudhidhi yoole oliye oopendda wodhela dhithu ndhe dhapadduwele. Mwaha a yeyo, oliye wonelamo wihina Yesu aali Mesiya, teto makiristawu naali nikuru neebaribari. Nnahudhera ddi ni yopadduwa ya Sawulu? Nnohudheravo ethu yathima, mwaha ahere Sawulu afuna oliye kaarumedhe obaddiziwa, withukula ni wawoova athu. Mbwenye Sawulu keenyile wi withukula ni wawoova athu omuhihe obaddiziwa. (Dho. 9:15, 16; 20:22, 23) Numala obaddiziwa, Sawulu odidela ororomela nikavihero na Yehova, naarive afwanyiwaga makathamiho ohiyana-iyana. (2 Kor. 4:7-10) Podi wera we onere ofwanyiwa dhoweha obe makathamiho ohiyana-iyana wathoma okala Namoona a Yehova. Mbwenye, ororomele wihina Yehova ni Yesu enere wuvaha kopolo onahoweliwe wihina odidela okala oororomeleya. — Fil. 4:13. Namasugwera 03/25 epaddi 4 ddima 8-9

Omwileri Bibiliya ethu yapama, mbwenye wihina nipurelemo ndhe nnahudherihu mBibiliyani, nnohowela werana ethu emodhaya. Kubuwela yotajhiha ela: Muzongwe dofuneya wihina egumi ekalewo velaboni yavati, mbwenye arubwa muzongwe owinjhiva muwari wa mudhidhi vang’ono elaboya enodhaala manjhe. Eyo yapadduwa, naarive muzongweya adideleve orubwa, anarubwela ebewene. Bumwahaya sapama muzongweya aarubwege vang’ono vang’ono, mwaha anookavihera theya ovaha dhoojha dhowinjhiva. Ni makalelo mamodhave, kahiyo yapama omwileri Bibiliya naguvihaga, mwaha nerana ndo, kannande opurelamo newene wubuwela ndhe nimanlihu wileri. (Tiya. 1:24) Enowupadduwelaga omwilerigi Bibiliya vano we wonelamo wihina wamwileri waguvihaga? Akala ethu ninga yela enowupadduwela, onere ddi? Wilerigi vang’ono vang’ono wihina wande opurelamo ndhe onileriwe. Wafuna we podi ovugula mudhidhi ni kapitulu onileriwe wihina okanne mudhidhi wowubuwelela ndhe onileriwe mBibiliyani. Namasugwera 09/24 epaddi 4 ddima 7-9

Anamaholela mulogo yakela dhoholela enopwasedha wileri ni enowilibihedha oparihedha mabasa dhoholeladha. Motajhiha, ohiya baahi wakela dhoholela wodhela makalelo owerana dhipaddi ni olobela yakala mmutugumanoni, aliwa enowakela dhoholela wodhela makalelo owasamalela mambila a Kiristu. Anamaholela mulogo yaharaga dhoholela enakeliwa munikuruni na Yehova, addibila enowanda woona wihina Yehova anowadhivela ni anowasamalela. Naakela yoholela si yoholela ni anamaholela mulogo, nnohowela wiwelela. Naharaga dhoholela nnakelihu ni anamaholela mulogo, enere wakweyela aliwa wapara mabasa ewa ooholela mulogo. Bibiliya anonikongomedha wawilela ale enaniholela ni ohara dhoholela dhewa. (Ebe. 13:7, 17) Mbwenye malabo mamodha podi ohikala ethu yokweya wawiwelela anamaholela mulogo. Mwaha wa ddi? Mwaha wi aliwa athu oohilogomana. Vano iyo napwasedha osugwa dhoviriganiha dhewa ohiya osugwa dhikalelo dhapama enniwana, yakalege ninga nnaakavihera amwiddani ehu. Ni makalelo baani? Amwiddani ehu enafuna wi nubuwelege wi Yehova kanalabihedha nikuru nna wihina aniholele. Iyo naapwasedhaga osugwa dhoviriganiha dha addibila enaniholela, eyo yere onthukulela wubuwelaga dhithu dhabure wodhela nikuru nehu. Namasugwera 04/24 epaddi 10 ddima 11-12

Nerege athu aatene enaakwe mudhidhi wa mahoso manlubale, kinavenyihiwe muukwani? Bibiliya anawoga wi athu yaale enamurugunuwele Yehova, enere ogujhuliwa va koddo ya Armajedo, teto kinakanne oneti wovenyihiwa muukwani. (2 Tes. 1:6-10) Mbwenye athu amodhaya podi wera enere okwa mudhidhi wa mahoso manlubale mwaha wa dhithu dhohiyanahiyana, ninga: Oredda, wuluvala, ngovi, obe opiwa ni athu amodha. Ddiniyani enafuna wapadduwela athu yaala? (Ecl. 9:11; Zac. 14:13) Nerege amodha wa athu yaala enere ovenyihiwa vamodha ni athu ohogowa enaavenyihiwe mwilaboni exa? (Dho. 24:15) Iyo kannonne yowakulaya. Iyo nihinona dhithu dhimodha dhinafuna opadduwa osogolo. Motajhiha, iyo nihinona wi mudhidhi wa koddo ya Armajedo, athu enere otorihiwa wodhela makalelo yaweddihiwa addibile a Kiristu, obe nere, addibila ni arogola oothikitheliwa. (Mat. 25:40) Ale enaatorihiwe ninga mambila, biyaale yakavihenre makiristawu oothikitheliwa. — Ovuhu. 12:17. Namasugwera 05/24 epaddi 10-11 ddima 9-11

Bibiliya anawoga wihina nnakalawo ‘mudhidhi wabure worusa ovilela.’ (2 Tim. 3:1) Ohiya makathamiho enanifwanya iyo aatene mwaha okala mwilaboni muna yabure, adhaari a Yehova enofwanyiwa makathamiho mamodha ninga oharahariwa. Mbwenye ddiniyani enanikavihera odidela omwebedha Yehova naarive nifwanyiwaga makathamiho owinjhiva? Ethu modha enanikavihera, fuunona wi ‘Yehova Mulugu ookalawo!’ (Jer. 10:10; 2 Tim. 1:12) Yehova muthu, teto oliye anonikavihera nafwanyiwaga makathamiho bi makathamiho. (2 Cró. 16:9; Sal. 23:4) Nubuwela makalelo Yehova ananthuwathuweliye ni ananikaviheriye, nnokanna kopolo yowagonjhiha makathamiho bi makathamiho enanifwanya. Namasugwera 06/24 epaddi 20 ddima 1-2

Iyo nnohowela ororomela nikuru na Yehova, mwaha wi wakumelela moonelo muxa wodhela dhithu nnarumedhihu dhinafwanyeya mBibiliyani obe wodhela makalelo nnamulabelihu Yehova, addibila enaniholela enowawerana masadduwoya mowaguva yahubuwele dila biili. Addibila ala enaniholela enowawerana masadduwo ala mwaha wi enafuna emuhagalase Yehova. Ohiya eyo, aliwa enowilibihedha vanlubale wihina dhothoma dhewa dhiwananege ni madhu a Mulugu, teto siyeyo adhaari aatene a Yehova enahoweliwa werana. Murumiwi Pawulo ohunivaha yolaga ela enihina: Waparihedhege mabasa madhu eebaribari.’ (2 Tim. 1:13) ‘Madhu eebaribari,’ enagiwana dhohudhiha dhatedhene dhinafwanyeya mBibiliyani. (Juwa. 17:17) Dhohudhiha ndha, thinikoma wa dhithu nnarumedhihu. Nikuru na Yehova nnonihudhiha makalelo ooparihedha mabasa dhohudhiha ndha. Teto naparihedhaga mabasa dhohudhiha ndha, nnerege oreelihiwa. Namasugwera 07/24 epaddi 11-12 ddima 12-13

Mwaha Peduru oleveleliwa ni Yehova vamodha ni Yesu, eere wanda wahudhiha amodha wodhela othwaruwa ni olevelela. Nuuvira mudhidhi, nuujhiwa mathanga a Pentekoste, Peduru owoga mwaha vamentoni vamaJudewu yahamurumedhe Yesu egihina aliwa yahikanna nibili mwaha opiwa wa Mesiya. Naarive dhigaali ndo, nuudhivela Peduru owoga naaliwa egihina: “Muthwaruwe ni musaddule murima dhenyu wihina dhothega dhenyu dhileveleliwe, vano Yehova uvaheni malabo a murenddele.” (Dho. 3:14, 15, 17, 19) Peduru ahakavihera athu ale woonelamo wihina futhwaruwa winamuthukulela muthu ohiya mubuwelo ni dhowera dhaaye dhabure. Ni madhu mamodha muthu ole atheegile anothukula mweddelo muxa wi amuhagalasege Yehova. Peduru wakavihera wonelamo wihina Yehova eere othimiha dhothega dhaathu. Muthenga ola boolibiha vanlubale mwaha onowoniha wihina Yehova podi walevelela ale emutheegenle oliye! Namasugwera 08/24 epaddi 12 ddima 14

Nakanna ebaribari wihina Yehova anere omariha dhithu dhaatedhene dhabure dhili mwilaboni muna mohilegela, kannubuwelege wi okanna korowa ni dhoorela ethu yathima. Mwaha wihina mudhidhi wa mahoso manlubale korowa kadhinakanne mabasa. Bibiliya anihina athu ‘enere orahilela parata yewa murampani,’ mwaha wihina aliwa enere wonelamo wi ‘newene parata, newene oru kadhinavuluse nlabo noowali na Yehova.’ (Eze. 7:19) Ohiya opwasedha wugela korowa dhowinjhiva, nnohowela werana dhothoma dhinanikavihere wisamalela, wasamalela amudhihu ni omulabela Yehova. Bumwahaya kayakale yapama wawerana mangawu bure-bure obe othabwa ononga mudhidhi nisamalelaga dhithu dhomwilini. Teto nnohowela okala pasope wihina nihithabwege odhivela dhithu dhomwilini ninnihuna. (Mat. 6:19, 24) Woona wi omakuthulo onowaddamela, nnohowela othoma akala nnamuroromelege Yehova obe dhoorela dhehu. Namasugwera 09/24 epaddi 11 ddima 13-14

Ebaribari wi iyo podi wanda osukuma dhithu dhimodha dhinanikwerebeyiha. Mbwenye podi wera nnere ohowela owanana dhokwerebeyiha dhimodha muwari mwa mudhidhi wowinjhivene. Kasugwa yopadduwa ya murumiwi Peduru, oliye aahoniha wi owawoova athu wodhela omukoodda Yesu dila tharu. (Mat. 26:69-75) Mbwenye nuuvira mudhidhi, Peduru woniha oliba murima wodhela ovaha onamoona oSinediriyu. Vano yakala ninga murumiwi Peduru ahigonjhiha ekalelo ele yowawoova athu. (Dho. 5:27-29) Mbwenye nuuvira yaka dhowinjhiva, Peduru ohiya ojha naathu yahali majudewu, ‘awoovaga athu owineliwa.’ (Gal. 2:11, 12) Ela enowoniha wi Peduru ahihogolowela wawoova athu. Ethu emodhave yampadduwele Peduru podi onipadduwela nihiyoya. Bumwahaya nakanna yokwerebeyiha nahinandihu ogonjhiha, iyo podi ohara yolaga ya Yesu “yokala mento.” (Mat. 26:41) Naarive woonaga wi oli oolibeene obe onowanda osugwera yokwerebeyiha yawo, orabelege dhithu dhuthukulele omorela muwehiwani. Teto wubuwelege dhithu dhuukavihere ogonjhiha yokwerebeyiha yawo ni odidele werana dhithu dhendho. Podi wera murumiwi Peduru kandile osukuma ekalelo ela yowawova athu egumi yaye yatene. — 2 Ped. 3:14. Namasugwera 07/24 epaddi 18-19 ddima 17-19

Velaboni yavati, kanakalegewo muthu oovaha ompitha Yesu. Mudhidhi agaali velaboni yavati, Yesu ahawerana matikiniho owinjhiva wihina aakavihere ale yahowela okaviheriwa. (Luk. 9:12-17) Oliye ohunivaha mukono wathima vanlubale opitha dhatedhene, eli ovelela egumaye ninga yowobola. (Juwa. 15:13) Nuvenyihiwa muukwani Yesu kahiyile okala muthu oovaha. Oliye ahiwoga wi adhowa odhulu, eere omuloba Yehova wihina anivahe muzimu wotxena wihina onihudhihe ni onilibihe, teto oliye aherana eyo nuufiya odhulu. (Juwa. 14:16, 17; 16:13) Teto wodhela mutugumano, Yesu anonixagiha wihina nande wahudhiha athu, wapela elabo yaatene wihina ekale anamahara aye. (Mat. 28:18-20) Murumiwi Pawulo ohuwoga wi Yesu nudhowa odhulu, oliye “waruma alobwana wihina ekale nvaho.” (Efe. 4:7, 8) Murumiwi Pawulo owoga wihina Yesu ohunivaha alobwana ala ninga nvaho wihina ekaviherege mulogo mwamakalelo oohiyanahiyana. (Efe. 1:22, 23; 4:11-13) Ebaribari wi alobwana ala bohulogomana ni enoviriganiha malabo mamodha. (Tiya. 3:2) Mbwenye Nabwiya ehu Yesu Kiristu anowalabihedha alobwana ala. Mwebaribarene aliwa nvaho oliye ananivahiye. Namasugwera 10/24 epaddi 18 ddima 1-2

Davidi owoga ni mwanaye Salomawu wi dhithudha dhamweddelege pama, ahathome omwiwelela Yehova baahi. Yowukulihaya sowihina Salomawu nuwuluvala, oliye obajha wawebedha amulogo amodha. Mwaha wa yeyo, Yehova ohiya omureeliha Salomawu. Ohiya eyo, oliye kandile othonga nlogo ni thotho vamodha nuwogowa. (1 Reis 11:9, 10; 12:4) Nnahudhera ddi? Namwiwelaga Yehova, oliye anonireeliha ni anonikavihera. (Sal. 1:1-3) Ebaribari wihina peeno, iyo kannaakale athu ooreela ni oovuwa ndala ninga Yehova aamweriliyena Salomawu. Mbwenye nathoma omwiwelela Mulugu ehu, oliye anere onivaha thotho nnahowelihu wihina nande werana dhothoma dhapama. (Pro. 2:6, 7; Tiya. 1:5) Dholaga dha Yehova dhinonikavihera wihina nande werana dhothoma dhapama nasayelaga mabasa, dhowaredhana, muselu wa korowa ni ohudhera wa vadhulu. Teto oparihedha mabasa thotho ndha, enere onibarela wihina nahifwanyiwe makathamiho owinjhiva enaakumelelavo mwaha oherana dhothoma dhapama. (Pro. 2:10, 11) Ohiya eyo, nnere okanna akwihu oororomeleya ni nnere onona ethu nnahowelihu werana wihina nikanne emudhi yohagalasa. Namasugwera 11/24 epaddi 10-11 ddima 11-12

Abaabi, musayelege mudhidhi wothapanya ni aninyu wodhela muselu dha mBibiliyani munonninyu wi aninyu enohowela onona. Nyu podi werana eyo wodhela waredhela muzewu, nyu podi omooniha mwaninyu ethu-sithu obe thalako enafwanyeya mmalivuruni mwehu, nindo omonelihemo makalelo eniwananiwa ni Bibiliya. Motajhiha, mwanawo ohunona wihina nihikalawo nibwe ninna yaka 3000 nlebiwe ndina na Yehova, teto ninoniwe ninga nibwe namowabita? Ohiya eyo osede enlubale ya Anamoona Yehova enafwanyeya oWarwick Nova York, nyu podi ofwanya kopiya ya nibwe nno. Muselu mmodha onafwanyeya vanibweni nno namowabita sowihina mamwene amowabita ahirugunuwela nlogo naamwaana Ezarayeli, teto siyeyo Bibiliya anawogiye. (2 Reis 3:4, 5) Mwanawo oonaga dhithu ndha ni mento aye, enere omukavihera ororomela wi Bibiliya anawoga ebaribari. Teto anere okanna nroromelo nooliba. Namasugwera 12/24 epaddi 14 ddima 4; epaddi 15 ddima 6