Mwaha wowuluvala, oragala obe mwaha wa oredda, adhaari amodha a Yehova podi wera kinanda werana dhithu yandiwa werana kale. Teto amodha enofiyedha wanganyedha akala Yehova onowavaha thima mabasa enapariwa. Mwaha wa yeyo, aliwa podi wikohaga akala “Yehova onofuna walabihedha!” Namaleba Salmo 71, iwoona ninga muthu ahinna thima. Oliye ahilobela wa Yehova egi: ‘Kamugihiye mwaha ohukanna kopolo.’ (Sal. 71:9, 18) Teto Salmista ola ahikanna ebaribari wihina ahere adidela omulabela Yehova, naarive ahinna kopolo, Yehova eere omuholela ni eerege omukavihera. Ohiya eyo, oliye ahihudhera wihina Yehova anohagalala awonaga adhaari aye emulabelaga ni murima wewa waamutene, naarive yahandaga werana ele yandiwa werana kale. (Sal. 37:23-25) Addibila owunnuwelavo, mwiwoonege ndala ninga Yehova anuwoniyeni. Naarive mwahandaga werana dhithu dhowinjhiva, Yehova podi wukaviherani odhowagave mukalaga oolibeene epaddi yomuzimuni. (Sal. 92:12-15) Bumwahaya kamuthabwege wubuwela dhithu mwahinandinyu werana, ohiya eyo, mweregena ndhe munandinyu. Namasugwera 10/24 epaddi 28 ddima 14-16

Makiristawu ohithwelavo epaddi yomuzimuni, malabo mamodha enowarusa wubuwela mowiwanana ni malagano a mBibiliyani ni waaparihedha mabasa yafunaga werana yothoma. Amodha enubuwela wihina mwaha ohikalawo nlamulo mBibiliyani nnawoga wodhela museluya, aliwa podi werana ethu-sithu enafuniwa. Teto amodha, enowapandda malamulo yahinahoweleya. Motajhiha, enakala ninga makiristawu ooKorintiyu, yahiloba wihina murumiwi Pawulo apandde nlamulo wodhela oojha dhoojha dhaakutheliwe dhikwamuthu. Mbwenye ohiya wawaddela ethu aliwa yahoweliwa werana, murumiwi Pawulo wawaddela muselu onavolowelavo olabihedha mubuwelo wehu ni wawonelihamo wihina kadda muthu ohukanna ‘ofuru wosakula.’ Murumiwi Pawulo opendda ni addibila ooKorintiyu aalabihedhaga malagano a mBibiliyani. Ndo, kadda muthu eere werana yothoma mowiwanana ni mubuwelo waye wapama ahakwakwathuse athu amodha. (1 Kor. 8:7-9) Mwaha wavaha yolaga ela, murumiwi Pawulo anna waakavihera makiristawu ooKorintiyu wunnuwelavo epaddi yomuzimuni. Mwaha werana eyo, aliwa yere wanda olabihedha mubuwelo wewa, ohiya ojhehaga wihina muthu awaddele ethu yowerana obe wasayela malamulo yahiliwo. Namasugwera 04/24 epaddi 5 ddima 14

Malabo a Jonasi aNinivita yahikanna ofuru wothwaruwa. Teto sotikiniha onona wi Yesu ahiwoga wi were okalawo “ovenyihiwa wa otorihiwa” wa athu “yerilena dhithu dhabure.” (Juwa. 5:29) Bumwahaya podi wera athu yakala oSodoma ni Gomora enere ovenyihiwa muukwani. Podi wera amodha wa aliwa enere ovenyihiwa, teto iyo nnere okanna gaari yowahudhiha wodhela Yehova ni Yesu! Yehova ‘anoopendda murima ni mubuwelo dhavati vamurima.’ Mwebaribareene Yehova abajha waavenyiha athu muukwani, anere ‘omuhogolosela kadda muthu mowiwanana ni dhowera dhaye.’ Yehova anere olabihedha wogowa waye mudhidhi anafuniye wavenyiha athu muukwani. Mbwenye yahoweleyaga, anere wooniha thagaraga dhaye. Bumwahaya kannafuna owoga wi muthu kanaavenyihiwe muukwani, wula Bibiliya ahiwogile ethu wodhela muthu yoyo! Namasugwera 05/24 epaddi 5-6 ddima 15-16

Okuma kale madhu a Mulugu enowalibiha adhaari a Mulugu, yafuna wakwaneliha mutholo worusa. Kasugwa yotajhiha ya namavuhulela Jeremiya, oliye ahithuwathuwa vanlubale Yehova nunvaha mutholo woolaleya. Jeremiya ahiwoga egi: ‘Kaginanda owoga, mwaha gili muzombwe.’ (Jer. 1:6) Ddiniyani yamukavihere Jeremiya okala ooliba murima wihina ande olaleya? Ethu Yehova aawogiliye ni Jeremiya yahimulibiha ofiyedha oliye owoga egi: ‘Madhu enyu eli ninga mootho onahidda mmurimani ni onapaha mmakuvani mwaaga; miyo gahaagomana, kaganda wavilelana.’ (Jer. 20:8, 9) Naarive murudda alaleya Jeremiya ogaali worusa, muthenga akenliye wihina alaleye wahinvaha oliba murima ahoweliye wihina ande wapara mabasa aye. Peeno makiristawu enowakela kopolo enahoweliwa wihina yande wapara mabasa oolaleya wodhela Bibiliya. Murumiwi Pawulo nuwalebela karta addibila oooloso, oliye owoga naaddibila wi yahere ehudhera wodhela efunelo ya Yehova, eyo yere wakavihera ‘oharaga dila enaafwanelela adhaari a Yehova,’ ni odhowagave ‘evahaga dhowima mmabasani mwatemwene apama.’ — Kol 1:9, 10. Namasugwera 04/24 epaddi 14-15 ddima 2-4

Zadoki kaaselele okala oororomeleya wa Yehova, naarive Abiyatar agasakunle omukavihera mwaana a mwene Davidi athomme ompa Davidi. Teto Davidi ahinona wi Zadoki kaahiye okala oororomeleya. Vano Davidi nuwonelamo wi Abiyatar ahithoma okala oohiroromeleya, oliye omuthoma Zadoki, Nata ni Benaya wi emuthikithele Salomawu ninga mwene. (1 Reis 1:32-34) Mohanganyedha, yotajhiha ya Nata ni ya adhaari amodha a Yehova yaali oororomeleya yamukavihera Davidi, yahimulibiha vanlubale Zadoki. Vano Salomawu nuukala mwene, ‘omuthoma Zadoki ninga namakutha munlubale vamburoni va Abiyatar.’ (1 Reis 2:35) Onaamutajhihe aavi Zadoki, akala muthu onamudhiveliwe anohiya omulabela Yehova? We podi omutajhiha Zadoki wodhela omoniha Yehova wi ohuthoma okala oororomeleya wa oliye ni odidela omulabela, naarive ofwanyiwaga makathamiho bi makathamiho. (Jos. 24:15) Teto Yehova anere wuvaha kopolo onahoweliwe wihina werena ele eli yapama. Ohiya eyo, olobelege wa Yehova ni odidele wandana ni ale enamulabela oliye nuuroromeleya. Yehova anovaha thima ororomeleya wawo ni anere wureeliha wadidela omulabela nuuroromeleya. — 2 Sam. 22:26. Namasugwera 07/24 epaddi 6-7 ddima 16-17

Va Salmo 15:2 vinawoga wihina ole anna wandana ni Mulugu, ‘Dule onedda oororomeleyene [ni] aneerana dhego dhapama.’ Madhu owi ‘weedda’ ni ‘werana’ enooniha wi nnohowela odidela okala oororomeleya ni werana dhithu dhapama. Mbwenye nerege enowandeya ‘weedda nuuroromeleya?’ Hee, enowandeya. Ebaribari wi iyo kanlogomanne, mbwenye vamentoni va Yehova iyo ‘nnowedda nuuroromeleya’ nilibihedhaga wihina nimwiwelele. Niipeleka wa Yehova ni nabaddiziwa, nnobajha weedda ni Mulugu. Mbwenye kudduwale wi mudhidhi wa amwaana Ezarayeli muthu kaakanna wandana ni Yehova mwaha okala mwaana Ezarayeli baahi, mbwenye yohoweleya werana ethu-sithu. Amodha yawoga wi yomwebedha Yehova, mbwenye kayamulabela ni ‘murima wewa waatene vamodha ni ebaribari.’ (Isa. 48:1) Amwaana Ezarayeli yafuna okala aleddo muddammwani mwa Yehova, yohowela wahudhera malamulo a Yehova ni waparihedha mabasa. Ni makalelo mamodhave wihina nirumedhiwe ninga aleddo muddammwani mwa Yehova, nnohowela wilibihedha werana dhithu dhimodha, ohiya baahi obaddiziwa ni owoga wi nili Anamoona a Yehova. Nnohowela odhowagave neragana ‘dhego dhapama.’ Namasugwera 06/24 epaddi 9 ddima 4; epaddi 10 ddima 6

Ni makalelo baani Yehova aliye Mulugu oovaha? Kabiha wubuwela dhotajhiha ndha. Yehova anonisamalela epaddi yomwiilini. Yehova podi ohunivaha dhithu dhaatedhene nnafunihu, mbwenye oliye anere onivaha ele nnahowelihu. Motajhiha, Yehova anonivaha yoojha, yowara ni mburo wokala. (Sal. 4:8; Mat. 6:31-33; 1 Tim. 6:6-8) Nerege Yehova ananivaha dhithu nnahowelihu mwaha wowaddihedhiwa? Naari! Kasugwa ethu awogile Yesu va Matewuji 6:25, 26. Oliye osoriha eegi: “Balame dhodhulu, kadhinaala, kadhinahadda newene kadhinalogolela yoojha vasasarani.” Mbwenye kasugwa ethu aasorihiliye vasogolova: “Babinyu oodhulu anoojhiha.” Nuwindo Yesu owoga egi: “Nyu ni balame anna thima baani, kahi nyu?” Nnahudhera ddi ni yoladdaniha ela? Akala Yehova anowasamalela anenyama, iyo podi okanna ebaribari wihina Yehova anerege onisamalela malabo amatene! Ndala ninga baabi anasamaleliye emudhaye, Yehova anere onisamalela mwaha anonidhivela vanlubale. — Sal. 145:16; Mat. 6:32. Namasugwera 09/24 epaddi 26-27 ddima 4-6

Adhaari ookavihera addibila obaddiziwa enathomiwa ni muzimu wotxena wihina yakavihere anamaholela mulogo wakwanihedha mutholo dhewa mmulogoni. Adhaari ookavihera boororomeleya ni owithwelavo epaddi yomuzimuni, teto enoparihedha mabasa ndhe enahudheriwa mBibiliyani. Ohiya eyo, aliwa enowadhivela vanlubale addibila ni arogola. (Mat. 22:37-39) Ki akala ohubaddiziwa, onere ddi wihina othomiwe ninga mudhaari ookavihera. Bibiliya anowoga dhikalelo ddibila anahoweliye okanna wihina athomiwe ninga mudhaari ookavihera. (1 Tim. 3:8-10, 12) Ononamo aavi ohudhera dhikalelo ndha ni wilibihedha oparihedhe mabasa mwigumini mwawo? Mbwenye wahinathi wubuwela okala mudhaari ookavihera, waabihe opendda ethu enuthukulela okala mudhaari ookavihera. Namasugwera 11/24 epaddi 15 ddima 4-5

Athu owinjhiva enowoga wihina ehimwileri Bibiliya dila dhowinjhivadhene. Mbwenye nerege aliwa enorumedha ndhe anawoga Bibiliya? Aliwa enoparihedha mabasa mwigumini mwewa ndhe enahudheriwa mBibiliyani? Yowukulihaya sowihina athu owinjhiva kinaparihedha mabasa dhithu enasuziwa mBibiliyani. Mbwenye kahiyo yeyo, enerana adhaari a Yehova, mwaha wi aliwa enamuhudhera Bibiliya ni efunelo yoparihedha mabasa mwigumini mwewa. Teto yathimaya, iyo nnowerana dhithu dhatedhene nnandihu wihina niparihedhe mabasa mwigumini mwehu dholaga nnafwanyihu mBibiliyani. Owoga ebaribari kahiyo ethu yookweya omwileri Bibiliya ni oparihedha mabasa dhithu nnahudherihu. Podi wera makathamiho enanifwanya fuuhukanna mudhidhi womwileri Bibiliya obe ninna elemelelo yoowileri naguvihaga ni ohupurelamo ethu nnilerihu. Obe iyo podi okwerebeya mwaha ofwanya dhithu dhowinjhiva nnahowelihu owomihedha mwigumini mwehu. Naarive ofwanyiwaga makathamiho bi makathamiho, onere wanda wagonjhiha nnikavihero na Yehova. Bumwahaya wikome wi okale muthu anaparihedha mabasa madhu a Mulugu. Mohanganyedha nadhowagave nimwilerigi Bibiliya wula niparihedhaga mabasa ndhe nnahudherihu nnere okala athu oohagalala. — Tiya. 1:25. Namasugwera 09/24 epaddi 7 ddima 15-16

Yehova anolabihedha muzimu waye wotxena wihina anitodole nafwanyiwa makathamiho obe namuyelela muthu nnamudhivelihu muukwani. Akala we onna ofwanyiwa makathamiho enuthukulela okala owukuwene, olobele wa Yehova omwaddelaga dhithu dhaatedhene dhinupadduwela. We podi olobela mudhidhi bu mudhidhi ni dila dhowinjhivadhene wahowelaga. (Sal. 86:3; 88:1) Teto we podi oloba muzimu wotxena dila dhaatedhene onalobeliwe. Ororomele wi Yehova kanadha aapwaza malobelo awo. We onoona wi kunna kopolo yowerana ethu-sithu mwaha wa makathamiho enuufwanya? Akala onofwanyiwa makathamiho ninga yaala, muzimu wotxena podi wuvaha kopolo wihina odidele omulabela Yehova nuroromeleya. (Efe. 3:16) Wamala olobela wa Yehova omulobaga wihina uvahe muzimu wotxena, ethu baani onafuniwe werana eniwanana ni ndhe olobiliwe? Wilibihedhe werana dhithu dhinukavihere wakela muzimu wotxena. Motajhiha, odidele olaleya ni woona mutugumano. Omwilerigi Bibiliya malabo aamateene wihina wandege woona dhithudha ninga Yehova anoniye. (Fil. 4:8, 9) Wamwilerigi Bibiliya, opwasedhege wanona adhaari a Yehova akale yaafwanyiwe makathamiho ni osayela woona makalelo Yehova aakaviheriye wihina yande ovilela. Namasugwera 10/24 epaddi 9 ddima 12-14

Ndala ninga Yehova ni Yesu enaadhiveliwa athu, nihiyoya nnowadhivela athu. (Pro. 8:31) Iyo nnowaweddela thagaraga athu ‘ehimunonne Mulugu’ ni ehinna ‘ejhehedhelo.’ (Efe. 2:12) Aliwa eli ninga athu enaddadda mwaha wa makathamiho a mwigumini, vano iyo nihikanna salva vida wihina nande wavulusa aliwa, wodhela walaleya muthenga dhapama dhOmwene wa Mulugu. Odhivela ni thagaraga ninnihuna ni athu yaala, ononthukulela werana ele nnandihu wihina naalaleye muthenga dhapama. Vano athuya yavuruwana muthenga dhapama, enokanna ejhehedhelo yosogolo, enokanna egumi yohagalasa ovanene ni enokanna ofuru wowakela ‘egumi yeebaribari’ obe nere egumi yohimala mwilaboni exa. (1 Tim. 6:19) Odhivela ninnihuna naathu, ononthukulela waalaleya athu nawaddelaga wi omakuthulo wa elabo ela yabure onna waddamela. (Eze. 33:7, 8) Iyo nnofuna wi athu enone dhithu dhinapadduwe mudhidhi wa mahoso manlubale, onaakale ogujhuliwa wa gereja dhaatedhene dhowoota ni ogujhuliwa wa elabo ela yabure ya Saddana va koddo ya Armajedo. — Ovuhu. 16:14, 16; 17:16, 17; 19:11, 19, 20. Namasugwera 05/24 epaddi 16-17 ddima 8-9

Murumiwi Pawulo nuwavaha yolaga makiristawu wihina “emuhiye Mulugu oonihe owali waye,” oliye afuna awoge ddi? Mowiwanana ni mubuwelo wa yolebela ela, murumiwi Pawulo aagana ovaha mburo owali wa Yehova. Iyo nnovaha mburo owali wa Yehova, nahiya wihina Yehova erena ele anafuniye mudhidhi wofwanelela. Ddibila dhaala anithaniwa John eeddihiwe mwamakalelo abure anowoga egi: “Miyo gohowela wiisugwera wihina gaherena dhithudha mwamakalelo gafunimi, mwaha gahithabwa otakaleliwa. Mbwenye kayali yokweya werana eyo. Yolebela ya Romanu 12:19, yahigikavihera odidela omujheha Yehova.” Namujheha Yehova wi aamarihe makathamihoya, nnere wawakela mareeliho owinjhiva. Nahiya dhithudha mmadani mwa Yehova, nnohiya okala ootakaleliwene ni kannasayele werana dhithudha yekihu. Yehova anopaganya wi anere onikavihera. Bumwahaya neddihiwaga mwamakalelo abure, enakala ninga Yehova anawoga ni iyo egi: “Ohiye muladduya mmadani mwaaga miyo ginere weddiha.” Iyo naroromela mpaganyo wa Yehova onihina “ginere omuhogolosela” Iyo podi ohiya muladduya ovira, nroromelaga wihina Yehova anere werana ethu-sithu mudhidhi wofwanelela. Siyeyo yamukavihera ddibila John asorihiwe mundduli. Oliye anowoga eegi: “Miyo gowubuwela ayi, gahiya wihina Yehova atxokotxele muladduya, yokumelelavoya enere okala yapama opitha makalelo gafunimi otxokotxela muladduya.” Namasugwera 11/24 epaddi 6 ddima 14-15

Nnohowela okala pasope wihina dhithu dhomwilini dhinanivolowele ofiyedha okala dhathima mwigumini wehu. Iyo podi ohudhera ni ele murumiwi Pawulo alebenliye makiristawu ooKorintiyu. Oliye ahiwoga dhithu dhapadduwele amwaana Ezarayeli ni dhithu dhapaddunwe mudhidhi egaali waddamela mwango Sinayi. Nuwindo oliye wawaddela makiristawu aatene wihina “nihifunege werana dhithu dhabure, ninga [amwaana Ezarayeli.]” (1 Kor. 10:6, 7, 11) Yehova ahawerana matikiniho wihina aavahe amwaana Ezarayeli yojha, mbwenye mwaha aliwa ovaha thima dhoojha, eyo watotela makathamiho.” (Núm. 11:4-6, 31-34) Ohiya eyo, aliwa nuuthoma webedha ekwamuthu, yanna wooniha wihina yavaha thima dhoojha, dhong’wa ni dharedhelo, ohiya omwiwelela Yehova. (Êxo. 32:4-6) Murumiwi Pawulo olabihedha yopadduwa yamwaana Ezarayeli wihina awaddele makiristawu yakalawo mudhidhi Jeruzale aliye neena nugujhuliwa. Peeno iyo nnakalawo waddamela omakuthulo wa dhithu ndha dhabure. Bumwahaya, nnohowela opwasedha ovuruwana yolaga awogile murumiwi Pawulo ni oherana dhithu dhabure yerilena amwaana Ezarayeli. Namasugwera 12/24 epaddi 6 ddima 13

Yehova ‘Mulugu oohagalala,’ teto anafuna wi nihiyoya nihagalalege. (1 Tim. 1:11) Bumwahaya Yehova ohunivaha nvaho dhohiyana-iyana dhinanikavihera okanna egumi yohagalala. (Tiya. 1:17) Nvaho mmodha ananivahiye bi matelo. Mulobwana ni muhiyana yatelana, enopaganyana odhivelana ni orihana mmodha ni mukwaye. Anamatelana enalibiha odhivela enniwana mmodha ni mukwaye, enokanna ohagalala webaribari mwigumi mwewa. Yowukulihaya sowihina anamatelana owinjhiva ehiddiwala mpaganyo yeriliwana labo na matelo ewa. Bumwahaya anamatelana owinjhiva peeno kinahagalala. Yehova anafuna wi alobwana etenle yaweeddihege aavi amwaariwa? Yehova anowaruma alobwana etenle wihina yarihege amwaariwa. Oriha enovolowelavo makalelo nnamweddihihu muthu nnanvahihu thima. Mulobwana anamuriha mwariye, anomweddiha nuudhivela ni opama. — 1 Ped. 3:7. Namasugwera 01/25 epaddi 8 ddima 1-2; epaddi 9 ddima 4-5

Karta murumiwi Pawulo aalebeliiye mEberewu, mwebaribarene nahakavihera makiristawu a nsaka noobajha okala owiwegeredhene wihina yande owanana makathamiho yaafwanye osogolo. Bumwahaya murumiwi Pawulo ahakongomedha makiristawu ale wahudhera pamadhene madhu a Mulugu wi yawonelemo pama. Mwaha yaherena ndo, aliwa yere wanda onona ni osukuma dhohudhiha dhowoota. Teto oliye wakongomedha olibiha nroromelo newa wihina yande ohara dhoholela Yesu avahiliye ni ohara dhoholela dha ale yaholela ehubuwele dila biili. Teto oliye ahakavihera makiristawu wihina yande ovilela wodhela wawubusedha wi yawonege makathamiho yafwanya ninga ofuru yoxagihiwa ni Yehova. Nihiyoya nohowela ohara dholaga ndha, nerana ndo, nnere wanda odidela okala oororomeleya ofiyedha omakuthulo. — Ebe. 3:14. Namasugwera 09/24 epaddi 13 ddima 17, 19

Bibiliya anihina Yehova ahithoma wi yohoweleya oliviwa yowobola wi dhothega dhehu dhileveleliwe ni nandane ni Yehova. Mbwenye muthengo baani wahoweleya oliviwa wi nikanne ele Adawu ayeleliye? Kuddiwale wi Adawu ni Eva nuuthega aliwa yahiyelela egumi yologomana ni ofuru wokalawo nimukalakala. Bumwahaya muthengo wa yowobola, wohowela okala mmodhave ni ole Adawu ayeleliye. (1 Tim. 2:6) Yere ohoweleya muthengo oIa oliviwa ni muthu ali pogo ni aakale: (1) oologomana; (2) anna ofuru wokalawo ni mukalakala velaboni yavati; (3) aarumedhe ovelela egumaye ninga mukutho wi anoobole. Kasugwa dhithu tharu dhinoniha wi Yesu aali muthu oofwanelela oliva muthengo wa yowobola. (1) Oliye aali oologomana teto ‘kerilena yothega.’ (1 Ped. 2:22) (2) Ahikanna ofuru wokalawo ni mukalakala velaboni yavati. (3) Oliye ahirumedha ovelela egumaye ninga mukutho wi anoobole. — Ebe. 10:9. Namasugwera 02/25 epaddi 4-5 ddima 11-12

Kuwanganyedhe wi naarive ofwanyiwaga makathamiho bi makathamiho onahoweliwe wagonjhiha wihina obaddiziwe, onere wanda wagonjhiha. Mwaha Yehova onowudhivela vanlubale ni onofuna wihina okose epaddi ya emudhi yaye. Teto Yesu ahiwoga ni anamahara aye eegi: “Mwakanna nroromelo noyevela ninga thanga ya mostarda, munere owoga ni mwango ola mwegihina: ‘Katamela vale,’ mwangoya onere otamavo, [teto] kaavo ethu enurusegeni.” (Mat. 17:20) Yesu aawogile madhu ala ni athu yamuhara muwari mwa yaka vang’ono. Eyo enowoniha wihina aliwa yohowela wenjhedhedha nroromelo newa. Mbwenye Yesu ahapaganya wihina yahere ekanna nroromelo nooliba, Yehova eere wakavihera aliwa wagonjhiha makathamiho bi makathamiho, naarive egaali manlubale ninga mwango. Bumwahaya Yehova anere wukavihera, wilibihedha olibiha nroromelo nawo! Woonelamo wihina ehikalawo ethu enuhiha obaddiziwa, kulegele werana ethu-sithu wihina ogonjhihe ethu yeyo. Wipeleka wa Yehova ni obaddiziwa. Ela enakale yothoma yapama onahoweliwe werana mwigumini mwawo! Namasugwera 03/25 epaddi 7 ddima 18-20

Nihiyoya podi wanda wagonjhiha makathamiho bi makathamiho enanifwanya, nubuwela wi Mulugu ookalawo anerege onikavihera. Iyo nubuwela dhithu Yehova anereliye kale, nnolibiha nroromelo nehu ni Yehova, wi anerege onikavihera. (Isa. 37:17, 33-37) Ohiya eyo, we podi wileri dhopadduwa dha mwigumini dha addibila ni arogola, dhinafwanyeya mu sayiti yehu jw.org. Dhopadduwa ndha dhinowooniha wi Yehova anowaakavihera adhaari aye malabo yaala a peeno. Teto we podi wubuwela mudhidhi Yehova ukaviheriye kale. Ebaribariya sowihina Yehova ali ni we mudhidhi wamutene! Yehova duwithanile wi okale mukwaye. (Juwa. 6:44) Ononamo aavi olobela wa Yehova omulobaga wihina ukavihere wubuwela mudhidhi awakunliye malobelo awo, ukaviheriye mudhidhi wofwanelela obe mudhidhi worusa oliye aliye epaddawo? Wubuwela wodhela dhithu dhendha, winere wukavihera omuroromela Yehova ni murima wawo wamutene. Namasugwera 06/24 epaddi 21 ddima 8

Iyo podi othoma ohenya ethu-sithu onimwalaniha ni Yehova. Mbwenye kanidduwale wi mwaha okala athu ohilogomana, iyo podi werana ethu yabure nahifunaga. (Rom. 7:21-23) Teto malabo mamodha, iyo podi wehiwa wi nerena ethu yabure nahijhehedhaga. Mbwenye wihina ndideleve okala oororomeleya wa Yehova ni Yesu, nnohowela ohara yolaga ya Yesu yokala mento nafwanyiwaga yoweha. Aatene iyo nnofwanyiwa dhoweha dhanithukulele werana dhoothega dhinlubale. Teto iyo aatene nihikanna ethu enanikwerebeyiha. Dhithu ndha podi okala, werana yothega enlubale, werana ethu yonyakavala obe ovoloweliwa ni makalelo owubuwela amwilaboni. Podi wera amodha enna owanana yoweha yowawerana mararuwo, amodha enna owanana yoweha yowerana ethu yonyakavala ninga, wikeha ni omoona pornografiya. Amodhaya enowawoova athu, amodhaya enowanana ekalelo yowithukula, teto amodhaya kinarusa onyanyuwa obe podi okalawo dhithu dhimodha enawaniwana. Namasugwera 07/24 epaddi 14 ddima 3; epaddi 15 ddima 5

Mubuwele ethu yapadduwe yahere anamaholela mulogo ehimwenya mulobwana ole ohogolowela mmulogoni. Ki vano, ahere mulobwana ole ahogolowela mmulogoni vano addibila ehimooniha odhivela yapadduwe ddi? Oliye eere ‘ogonjhihiwa ni wukuuwa winlubale.’ Podi wera eerege wubuwela wihina kanna thima, teto wandana waye ni Yehova were oridha. Teto addibila ale yahere ehimwakela mulobwana ole aathwarunwe, yere opweha vangovini wandana wewa ni Yehova. Mwaha wa ddi? Mwaha aliwa kayatajhihe makalelo oolevelela a Yehova, mbwenye yatajhihe ekalelo yabure ni yohaweddela thagaraga athu ya Saddana. Aliwa yakale epano Saddana alabihedhiye wihina aridhihe wandana anna mulobwana ole ni Yehova. — 2 Kor. 2:10, 11; Efe. 4:27. Namasugwera 08/24 epaddi 17 ddima 7, 10-11

Alobwana amodha eli ninga “nvaho” banameeddela mulogo. Mudhidhi wa arumiwi, anamaholela mulogo oJeruzale yahimuthoma Pawulo, Barnabe ni amodha wihina ekale anameeddela mulogo. (Dho. 11:22) Mwahaya bwaddi aliwa edhe ethomiwege? Enathomiwa wihina elibihege mulogo ndala ninga enerana adhaari ookavihera ni anamaholela mulogo. (Dho. 15:40, 41) Anameeddela mulogo enowerana olenddo mudhidhi waatene. Amodha enowedda olenddo woolapa wihina yaredhele mulogo. Teto sumana dhatedhene anameeddela mulogo enowerana mwaha dhavathaddo dhowinjhiva, enowawaredhela addibila wihina yalibihe, enootugumana naapiyonero, enowerana mutugumano naanamaholela mulogo ni enowerana mutugumano wa mmabasani oolaleya. Ohiya eyo, aliwa enowegeredha mwaha dhavathaddo, enowegeredha musonkano wa nlabo nimodha ni wa malabo mararu. Teto yaka dhatedhene aliwa enokala anamahudhiha a Eskola ya Mapiyonero ni anowegeredha mutugumano wavayeka naapiyonero aatene a mulogo aneeddeliye. Ohiya eyo, malabo mamodha oliye anohowela wakwanihedha mutholo dhimodha dhathima dhinahoowela weriwana mowaguva. Namasugwera 10/24 epaddi 21 ddima 12-13

Namavuhulela Jeremiya onowasoriha madhu Yehova awogeliye eli yolebela ya peeno. Teto murumiwi Pawulo ohalabihedha madhu ooligana nuwoga eegi: ‘Kaginadha gihogolowelaga wubuwela dhothega dhewa.’ (Ebe. 8:12) Madhu ala enatapulela ddi? MBibiliyani madhu owi ‘wubuwela’ kinatapulela baahi wubuwela ethu epadduwile kale. Ohiya eyo, podi otapulela werana ethu-sithu obe ohidduwala. Mpanga aakomeliwe vamodha ni Yesu ahiloba egi: “Yesu, onagidduwale wavolowa mumweneni mwawo.” (Luk. 23:42, 43) Mulobwana ole kamuloba Yesu wi amubuwelege baahi, mwaha yowakula Yesu anvahiliye enowoniha wi oliye eere werana ethu-sithu wi amukavihere mulobwana ole, obe nere, eere onvenyiha muukwani. Bumwahaya Yehova awoga wi kanubuwela dhothega dhehu, eyo enatapulela wi oliye kananisinyuse mwaha dhothega amanliye olevelela. Namasugwera 02/25 epaddi 10-11 ddima 14-15

Iyo podi okanna thotho dhebaribari wodhela onona dhikalelo dha Yehova ni efunelo yaye wodhela dhithu dhinamudhivela ni aniddiye. Bumwahaya wikohe: “Gubuwelaga dhithu dhatedhene ginonnimi wodhela Yehova, gerege oliye anere ohagalala ni yothoma ginafunimi werana?” (Efe. 5:17) Malabo mamodha neegi nimuhagalase Yehova nnohowela werana yothoma enawukole akwihu ni amudhihu Motajhiha, abaabi amodha enowawaddihedha aniwa oteliwa ni alobwana enna korowa, naarive ahili muthu owithwelavo epaddi yomuzimuni. Ebaribari wi abaabi enowathuwathuwela aniwa ni enofuna wi ekanne egumi yapama. Mbwenye mulobwana oyo, anere omukavihera mwanawo wunnuwelavo epaddi yomuzimuni ni okanna wandana wooliba ni Yehova? Ki Yehova anubuwela aavi wodhela muselu oyo? Yowakulaya enafwanyeya va Matewuji 6:33. Va yolebela ela makiristawu aatene enokongomedhiwa odidela “waaja Omwene wa Mulugu.” Ebaribari wi nnoriha monelo wa makolo ehu ni athu amodha eli athima vamentoni vehu, mbwenye yathimaya nnahowelihu othuwathuwela fumuhagalasa Yehova. Namasugwera 01/25 epaddi 17 ddima 9-10

Nihiyoya peeno nnohowela nikavihero na Yehova wihina nande wapara mabasa olaleya nuviheya naarive niharahariwaga. (Ovuhu. 12:17) Mwahaya bwaddi kunahowela wanganyedha wihina Yehova anere wukavihera? Mwaha wa nlobelo, Yesu eriliyena enafwanyeya va Juwawu kapitulu 17. Va yolebela ela, Yesu ahimuloba Yehova wihina asamalelege anamahara aye teto Yehova ahaakula nlobelo nna. Yolebela dha dhowera dhaarumiwi enowoniha makalelo Yehova aakaviheriye anamahara a Yesu olaleya nuviheya, naarive eharahariwaga. Teto nlobelo neena Yesu eriliyena, oliye ahimuloba Yehova wihina aasamalele aale yarumedhe muthenga dhapama dhalaleya anamahara a Yesu. Eyo enatapulela nlobelo na Yesu nnowupwatha ni weya! Bumwahaya Yehova anoodidela wakula nlobelo nne ofiyedha peeno. Okanne ebaribari wihina walaleyaga Yehova anere wukavihera, ndala ninga aakaviheriye anamahara aye. (Juwa. 17:11, 15, 20) Woona wihina omakuthulo onowaddamela, podi wera enere okala ethu yorusa olaleya muthenga dhapama nuviheya, mbwenye Yesu ohupaganya wihina anere onikavihera nahowelaga nikavihero. — Luk. 21:12-15. Namasugwera 03/25 epaddi 18 ddima 13-14

Nlogo na Yehova ‘nnothaba mmurimani mwewa’ mwaha aliwa enomutamalela vanlubale Yehova. Ebaribari enafwanyeya mBibiliyani ni ejhehedhelo yolibiha ninnihuna wodhela osogolo mwaha wa mukutho wa Yesu Kiristu, dhinonithukulela ‘othaba mmurimani mwehu mwaha wohagalala.’ Owoga wodhela dhithu ndha, winonivaha ohagalala webaribari! (Sal. 34:8; 133:1-3) Odhivela ni wiwanana enna adhaari a Yehova, dhithu dhinoniha wihina aliwa eli mparayizuni oomuzimuni. ‘Wiwanana’ wula ninnihuna winonikavihera wubuwelela makalelo enakale egumi mwilaboni exa, mwaha wi mwilaboni exa adhaari a Yehova enere okanna odhivela mmodha ni mukwaye ni wiwanana winlubale opitha peeno. (Kol. 3:14) Muthu di muthu anafuna okanna ohagalala webaribari anohowela okala mparayizuni ehu oomuzimuni. Naarive athu a mwilaboni yubuwelaga dhithu dhohiyanahiyana wodhela adhaari a Yehova, aliwa ehikanna ekalelo yapama vamentoni va Yehova ni vamentoni va aatene yaale enamwebedha Yehova. — Isa. 65:15. Namasugwera 04/24 epaddi 21 ddima 7-8

Nnande aavi wakavihera ale eli addiye ni enafuna otela obe oteliwa? Makalelo apama owakavihera fuudhela okala pasope ni ndhe nnawogihu. (Efe. 4:29) Iyo podi wikoha: “Ginowerana masika yathukulele ale eli addiye wubuwelaga otela? Gamoona ddibila ni murogola ali muddiye ethapanyaga, ginubuwela wihina aliwa enofunana?” (1 Tim. 5:13) Ohiya eyo, kannafuna wi addibila ni arogola eli addiye yubuwelege wi kahi yapama okala muddiye. Ohiya wawaddihedha addibila ele addiye otela, sapama wathethela mwaha aliwa othoma okala addiye! Ki akala onubuwela wi ddibila ni murogola eli addiye yere ofwanelelana yahatelane? Nnohowela wubuwela ele anawoga Bibiliya wodhela oriha mubuwelo wa athu amodha. (Rom. 15:2) Addibila ni arogola owinjhiva eli addiye kinadhiveliwa wonihiwa muthu wi enonane, bumwahaya nnohowela oriha mubuwelo wewa. (2 Tes. 3:11) Teto ehikalawo addibila ni arogola eli addiye enafuna nikavihero wihina enfwanye muthu enafuniwa otelana, mbwenye akala kanlobiwe nikavihero, kayakale yapama onvedela muthu wi etelane. — Pro. 3:27. Namasugwera 05/24 epaddi 24-25 ddima 14-15

Iyo nnakala mwilaboni mwinapadduwa dhithu dhohiyana-hiyana dhabure, mwaha wa yeyo, egumihu podi osadduwa mwamakalelo nahajhehedhihu. Mbwenye iyo nnotamalela vanlubale mwaha Yehova onikavihera. Teto anikaviheraga, nnowanda wonelamo wi ‘Yehova Mulugu ookalawo!’ (Sal. 18:46) Mbwenye Davidi nuumala owooga wi Yehova Mulugu ookalawo, oliye omuliganiha Yehova ni ethu yahinna egumi, wodhela omwithana ‘Nibwe naaga.’ Mwahaya bwaddi Davidi adhe amuliganihege Yehova ni ethu yahinna egumi? Bibiliya anomuliganiha Yehova Nnibwe wihina anikavihere wonelamo dhikalelo dha Yehova. Teto malabo owinjhivene adhaari a Yehova yanvuwihaga oliye mwaha dhikalelo dhaye dhotikiniha, yomwithana Nibwe. Yolebela yobajha ya mBibiliyani enamwithana Yehova ninga Nibwe di Deuteronómio 32:4. Teto mudhidhi Ana alobelaga oliye owoga egi: ‘Kawo Nibwe nnaligana ni Mulugu ehu.’ (1 Sam. 2:2) Abakuki ahimwithana Yehova ninga ‘Nibwe naaga.’ (Hab. 1:12) Namaleba Salmo 73 ahimwithana Yehova ninga ‘Nibwe na murima waaga.’ (Sal. 73:26) Teto mwinnyene Yehova anowiliganiha Nnibwe. — Isa. 44:8. Namasugwera 06/24 epaddi 26 ddima 1, 3

Mamwene yamuhagalasa Yehova, yomudhivela ni yomwebedha ni murima wewa waatene. Teto awogaga wodhela Joziya, Bibiliya anihina: ‘Kanakalegewo mwene oligana ni Joziya, amwiwelele Yehova ni murima waye waatene.’ (2 Reis 23:25) Vano wodhela Salomawu erilena dhithu dhabure ahalaga neena nuukwa, Bibiliya anihina ‘kaamulabenle Yehova ni murima waye waatene.’ (1 Reis 11:4) Teto wodhela Abiyawu, mwene mmodha ohiroromeleya, Bibiliya anihina: ‘Kaamulabela Yehova ni murima waye waatene.’ (1 Reis 15:3) Dila dhowinjhivadhene Bibiliya anowalabihedha madhu owi “murima” wihina onihe ekalelo ya muthu. Eyo enovolowelavo dhofuna dhaye, ekalelo yaye, ethu enamuthukulela werana ethu-sithu ni dholuba dhaye anafuniye wakwanihedha. Omulabela Yehova ni murima wehu waatene enatapulela ddi? Muthu anamulabela Yehova ni murima waye waatene, kanamulabela mwaha owaddihedhiwa obe ninga elemelelo baahi. Ohiya eyo, anamulabela Yehova mwaha anomudhivela vanlubale ni anomuriha egumaaye yaatene. Namasugwera 07/24 epaddi 21 ddima 4-5

Yehova anolabihedha yoladdaniha emodha wihina anikavihere wonelamo makalelo anathimihiye dhothega dhehu. Oliye anawoga egi: ‘Ginere othimiha dhoviriganiha dhenyu ndala ninga murabo onakunela odhulu ni ginere okunela dhothega dhenyu ndala ninga ni murabo wooriba onakunela odhulu.’ (Isa. 44:22) Bumwahaya Yehova anilevelela, enakala ninga anakunela dhothega dhehu ni murabo munlubale wihina muthu di muthu ahoone. Dholaddaniha ndha dhinanihudhiha ddi? Yehova alevelela dhothega dhehu, kannahowela odidela wivaha nibili egumi yehu yaatene. Mwaha mukutho wa Yesu ohuthimiha dhothega dhehu dhatedhene nerilihuna kale. Teto enakala ninga kanneregena dhothegadha. Yehova baahi dinanilevelela mowakwanela nathwaruwa ni murima wehu waatene. Teto ononikavihera ohogolowela okanna wandana nuliye. Onona eyo enonikavihera ohithabwaga wivaha nibili. Namasugwera 02/25 epaddi 10 ddima 11-14

Anamaholela mulogo yathapanyaga ni muthu atheegile kidduwale wihina ehikanna mutholo wokavihera wihina mulogo okale woweela. (1 Kor. 5:7) Mbwenye enofuna wihina namatheegaya athwaruwe bumwahaya aliwa enojheha wihina asaddule emuthu yaye ni athwaruwe. Mwaha wa ddi? Mwaha enafuna emutajhihe Yehova “ali muthu athagaraga ni anthebwa.” (Tiya. 5:11) Moone makalelo murumiwi Juwawu aweddihiye addibila ni arogola nuudhivela. Oliye ahalebela egihina: “Anaaga, ginulebelani dhithu ndha wihina munaadhe mwerena yothega. Mbwenye muthu athega, nikanna namakavihera oli vamodha ni Ababa: Yesu Kiristu, muthu owogowa.” (1 Juwa. 2:1) Yowukulihaya sowihina malabo mamodha muthu aathegile kanafuna othwaruwa. Yereya ndo muthu yoyo anofwanelela okumihiwa mmulogoni. Namasugwera 08/24 epaddi 25 ddima 19-20

Podi wera ohukanna elemelelo yoliganiha dhithu oneeriwena ni dhithu enerana athu amodha. Akala siyeyo wilibihedhe wihina osukume elemelelo ela yowiliganiha naathu amodha. Mwaha wa ddi? Mwaha Yehova kanaliganiha ndhe nnerihuna ni dhithu enerana athu amodha. (Gal. 6:4) Motajhiha, Mariya ahimukuthulela Yesu makura ookwima. (Juwa. 12:3-5) Mbwenye maamukwele oohawa, aapwehe korowa biili dhahanna muthengo munlubale. (Luk. 21:1-4) Yesu kaaliganihe ahiyana ala wodhela dhithu yeriliwana. Ohiya eyo, Yesu aawonile ahiyana ala abiili ninga athu anroromelo. Ni makalelo mamodhave, Yehova anovaha thima dhithu oneriwena mwaha wa nroromelo ni odhivela onniwena nuliye, naarive ethuya oneriwena ekalaga ninga kinna thima. Iyo aatene malabo mamodha nnowanganyedha. Mbwenye madhu a Mulugu podi onikavihera okanna yowakula ya ethu-sithu nnanganyedhihu. Mwebaribarene Yehova anonipwatha ni anonithuwathuwela. Oliye anovaha thima dhithu dhatedhene oneriwena wihina opwehe Omwene waye mburo wobajha mwigumi mwawo. Teto oliye anofuna vanlubale wureeliha mwaha wa dhithu oneriwena. Yehova anowadhivela ni anowasamalela adhaari aye aatene eli oororomeleya. Namasugwera 10/24 epaddi 25 ddima 3; epaddi 29 ddima 17-18