Mwebaribarene neegi ntakune pawu ni ong’wa nikame na Yesu wi naakele egumi yohimala, nnohowela ororomela mukutho wowobola alivile Yesu. (Efe. 1:7) Ebaribari wi aatene Yesu awithaniye ninga “mambila mamodha,” kinahowela otakuna pawu newene omung’wa vinyu nlabo nowubuwela okwa waye. (Juwa. 10:16) Naarive dhigaali ndo, mukutho alivile Yesu ononipatha vanlubale. Nimakalelo baani? Wodhela ororomela mukutho wa Yesu ni mareeliho nnawakelihu mwaha wa mukutho ola. (Juwa. 6:53) Mbwenye ale enatakuna pawu ni enamug’wa vinyu, enowoniha wihina enokosa epaddi ya nipangano nixa ni ehikanna ejhehedhelo yodhowa odhulu wi yathongege vamodha ni Yesu mumweneni mwa Mulugu. Bumwahaya, naarive akala nnakosa epaddi ya nikuru ning’ono obe nili a mambila mamodha, nnohowela ororomela mukutho wowobola alivile Yesu wi naakele egumi yohimala. Namasugwera 12/24 epaddi 13 ddima 14, 16

Mudhidhi Yesu ni anamahara aye yeragana muthupo wowubuwela okwa waye, oliye wavaha anamahara aye pawu yahanna emela ni wawaddela wihina ele yatapulela mwiili waye. Voharela oliye wavaha vinyu ni wawaddela wihina anatapulela “nikame naye na nipangano.” (Mar. 14:22-25; Luk. 22:20; 1 Kor. 11:24) Yesu nuwoga wodhela nipangano, oliye aagana nipangano nixa eriliyena ni ‘nyumba ya Ezarayeli [omuzimuni]’ obe nere ni ale enaakale amwene a Omwene wa Mulugu. (Ebe. 8:6, 10; 9:15) Dhithu Yesu awogiliye nlabo nuwubuwela okwa waye, nnowapatha athu vang’ono nnoniwe ninga “nikuru ning’ono.” Nikuru nna nambele ni anamahara ale 11 aaliyena vamodha nlabo nowubuwela okwa waye. Baliweene baahi enadhowe odhulu wihina yakale amwene mumweneni mwa Mulugu ni Yesu. Namasugwera 12/24 epaddi 11 ddima 9-10

Yesu ogulihiwa, omagiwa, oruwaniwa, nuwindo otoriheliwa okwa. Anyakoddo omuthukulela mburo vafuniwa ompa nuwindo omukomela vantxikwani na goyi. Mudhidhi avilelagana okwa wule wa goyi ohukalawo muthu athabwa woona goyi. Muthu oyo di Yehova Mulugu. Naarive agaali akopolo dhatedhene oliye kamwakihedhe Mwanaye. Mwaha wa ddi? Mwaha wa odhivela. Mukutho wa Yesu makalelo a Yehova woniha wihina anowadhivela athu aateene. Eyo enowoniha pamadhene makalelo anuudhiveliyeni. Oliye oherana dhaatedhene, naarive ehili yokweya wihina anobole muuthegani ni muukwani. (1 Juwa. 4: 9, 10) Hee, oliye anafuna anikavihere owanana yothega ofiyedha iyo ogonjhiha! Namasugwera 08/24 epaddi 6 ddima 13-14

Iyo podi wonelamo pama odhivela wa Yehova anniyena ni iyo, napendda makalelo oliye ooniliye goyi wihina alive yowobola. Saddana ahiwoga wi kaavo mudhaari a Yehova ande okala ororomeleya ahere afwanyiwa makathamiho. Wihina Yehova oonihe wi ndhe awoga Saddana dhaali dhowoota, oliye wenya wi mwanaye akwe, Mbwenye aabihe wonihiwa goyi ahinathi okwa. (Jó 2:1-5) Yehova ahawona athu evadaga ni emunyemulaga mwanaye. Ohiya eyo, ahimoona Yesu akomeliwaga vantxikwani na goyi ni ahoona goyi yaatene yanfwanye Yesu mudhidhi agaali vantxikwani vale ofiyedha okwa waye. (Mat. 27:28-31, 39) Yehova ahikanna owedha womariha goyi yaatene mudhidhi mmodhave. (Mat. 27:42, 43) Mbwenye Yehova ahere amariha muladduya, yowobola kiyaliviwe, teto iyo kanakanne ejhehedhelo. Bumwahaya Yehova adhe enyege mwanaye woona goyi ofiyedha okwa. Namasugwera 01/25 epaddi 22 ddima 7

Naali labo na 16 a Nisa yaka ya 33 M.W. Anamahara a Yesu enna okubanya ni enna woova vanlubale. Anamahara abiili enna okuma oJeruzale edhowaga luwani ya Emawu. Mulobwana dhaala yahamunonniwa wawaddamela ni obajha weedda ni aliwa. Mwaha othabwa wukuuwa, aliwa omwaddela mulobwana ole dhithu dhampadduwele Yesu. Nuwindo mulobwana ole obajha wawaddela dhithu yahadhiwa edduwala. Oliye obajha watapulelamo “dholebela dha Moyizeji ni dhaanamavuhulela aatene.” Teto wawonelihamo wihina Mesiya ohowela wonihiwa goyi ofiyedha okwa. Vano alobwana ale nufiya luwani ya Emawu, aliwa wonelamo wihina mulobwana ole athapanya naaliwa, aali Yesu aavenyihiwe ni Mulugu muukwani! (Luk. 24:13-35) Muwari mwa malabo 40, numala ovenyihiwa muukwani, Yesu ahatwanyuwela anamahara aye dila dhowinjhivadhene. Muwari mwa malabo yaale 40, Yesu ahalibiha anamahara aye yoova ni yaali owukuwene wihina ehogolowele okala ohagalalene ni ahalibiha murima wihina yande olaleya muthenga dhapama Dhomwene. Namasugwera 10/24 epaddi 12 ddima 1-3

Mudhidhi waviraga mwaana anowunnuwa ofiyedha okala pogo, mbwenye kavo anunnuwelavo epaddi yomuzimuni, mwaha okala mwibaribarini mudhidhi wowinjhiva, enohowela wilibihedhaga. Motajhiha, addibila ni arogola oKorintiyu yahirumedha muthenga dhapama, yahibaddiziwa ni yahakela muzimu wotxena, teto yahihudhihiwa vanlubale ni murumiwi Pawulo. (Dho. 18:8-11) Mbwenye nuuvira mudhidhi wowinjhiva egamanle obaddiziwa, owinjhiva wa aliwa yaali yahinathi withwelavo epaddi yomuzimuni. (1 Kor. 3:2) Enere orusa okala mukiristawu owithwelavo epaddi yomuzimuni, nahikanna efunelo yowithwelavo epaddi yomuzimuni. Ale ‘yahinna enonelo,’ ni yahinafuna wunnuwelavo, kinadha yanda withwelavo epaddi yomuzimuni. (Pro. 1:22) Iyo kannafuna okala ninga ale eli apogo, mbwenye enaahowela makolo ewa wathomela dhithu dhaatedhene enafuniwa werana. Ohiya eyo, iyo nihikanna mutholo wowunnuwelavo epaddi yomuzimuni ni olibiha wandana wehu ni Yehova. Akala we onna wilibihedha wihina okale mukiristawu owithwelavo, olobele wa Yehova wihina Oliye uvahe ‘efunelo ni kopolo yowerana anafuniye.’ — Fil. 2:13. Namasugwera 04/24 epaddi 4 ddima 9-10

Yehova anonaddela makalelo anakaliiye mudhidhi aafunaga watoriha athu. (Eze. 33:11) Yehova kanadha amugujhula muthu di muthu ni mukalakala wahilivo muladdu wapameene. Oliye ohuthabwa okanna thagaraga ni anowoniha thagaraga dhaye yahoweleyaga. Ddiniyani nnonnihu wodhela athu yahinavenyihiwe muukwani? Bibiliya onowawoga athu vang’ono. Motajhiha Yesu ohuwoga wihina Judasi Iskariyoti kanaavenyihiwe muukwani. (Mar. 14:21; omusugwe João 17:12 ni nota de estudo mu Bibiliya Ezugu.) Judasi ahinona pamadhene wi amutheegela Yehova vamodha ni Yesu. (Omusugwe Marcos 3:29 ni notas de estudo mu Bibiliya Ezugu.) Teto Yesu ahiwoga wihina anamasogolela gereja kiyanna ejhehedhelo yovenyihiwa muukwani. (Mat. 23:33; Omusugwe João 19:11 ni notas de estudo madhu eni “o homem.”) Ohiya eyo murumiwi Pawulo ahiwoga wihina mapostata yahinaathwaruwe kayavenyihiwe muukwani. — Ebe. 6:4-8; 10:29. Namasugwera 05/24 epaddi 4 ddima 10-11

Nadidela okala muddammwani mwa Yehova, Saddana kanadha anitatamulela makathamiho bi makathamiho nihinandihu wawanana. (1 Juwa. 3:8) Ohiya eyo, mwilaboni exa, ohiya baahi Yehova onibarela epaddi yomuzimuni, oliye anerege onibarela wihina nnaakwe. (Ovuhu. 21:4) Ebaribari wi oneti munlubale okala muleddo muddammwani mwa Yehova ni okanna wandana wooliba nuliye ohunadha omala. (Eze. 37:27) Woona wihina nili aleddo muddammwani mwaaye, ddiniyani nnahowelihu werana negi nididele okala aleddo aye? Kubuwela, wahere withaniwa wihina waredhe vaade va muthu di muthu, mwebaribarene weere ofuna onona mweddelo wa mwanamuralaya. Ni makalelo mamodhave, iyo nnafuna nnone ethu baani Yehova anafuniye wihina ale eli muddammwani mwaaye yeregena. Odhivela ninnihuna ni Yehova, onere onthukulela werana dhatedhene nnandihu ‘wihina nihagalase murima waye.’ (Kol. 1:10) Mwaha wa yeyo, nnafuna nimutikinege vanlubale ni ohidduwala wi oliye di Baabi, mukwihu ni Mulugu ehu. Wubuwela ndo, onere onikavihera oherana ethu yaamukule Yehova. Mwebaribarene, iyo nnafuna ‘needdege nuwiyeviha’ ni Mulugu ehu. — Miq. 6:8. Namasugwera 06/24 epaddi 4 ddima 8-9

Yehova ahimuloba Abarawu wi ampe mwanaye Izaki ninga mukutho. Mwebaribarene kayali yokweya Abarawu wakwanihedha yoloba ele. Naarive dhigaali ndo oliye ahiiwelela. Mbwenye Abarawu ahalaga neena nuumpa mwanaye Yehova omukooddiha. Yopadduwa ela enowahudhiha athu aateene enna nroromelo, Yehova eere ompeleka Mwanaye athabwiye omudhivela ninga yowobola mwaha oliye anoothabwa wadhivela athu. Nuuvira yaka dhowinjhiva, nlamulo yavahiwe amwaana Ezarayeli novolowelavo opeleka mukutho wihina dhithimihiwena dhothega dha nlogo. (Lev. 4:27-29; 17:11) Mukutho ndhe dhatonyihedha mukutho munlubale waapelekiwe osogolo wihina wawobole athu aateene mutheegani. Anamavuhulela yahivetheliwa oleba wihina odhuulu wapaganyiwe, aali Mwaana a Mulugu, were otabusiwa ofiyedha okwa. Kubuwelani: Yehova eere ompeleka mwanaye ninga mukutho wihina awobole athu vamodha ni nyunwa, muuthegani ni muukwani. — Isa. 53:1-12. Namasugwera 08/24 epaddi 4 ddima 7-8

Wamala omwileri Bibiliya osayele makalelo ooparihedha mabasa dhithu omanliwe wileri. Wilerigi epaddi si epaddi ya Bibiliya wikohe: “Ginande aavi oparihedha mabasa peeno obe osogolo dhithu ndha ginilerimi?” Motajhiha, kabiha wubuwela wilerigi yolebela ya 1 Tesalonisense 5:17, 18. Vano, wamala wileri versu ndha biili, we podi wubuwela dila ngasi onalobeliwe kadda labo ni dhithu baani onasorihiwe walobelaga. Teto we podi wubuwela dhithu baani onatamaleliwe vanlubale. We podi othoma omutamalela Yehova wodhela dhithu tharu dhathima. Wasayela mudhidhi wihina opendde ndhe onahudheriwe mBibiliyani, eyo enere wukavihera omoonelamo Bibiliya ni oparihedha mabasa ndhe onahudheriwe. Wawubuwele mareeliho onaawakeliwe mwaha womwileri Bibiliya mwamakalelo yala. Mohanganyedha, wamwilerigi Bibiliya mwamakalelo yala, onere okala namavirihamo a madhu enawogiwa. Namasugwera 09/24 epaddi 4-5 ddima 9-10

Yehova anipaddusile mwamakalelo avayeka, wihina nihagalalege mwaha okala athu oovaha, ohiya mwaha ovahiwa. Teto iyo nnohagalala mwaha wakavihera addibilihu. Mwebaribareene sapama wawoona addibilihu enitamalelaga mwaha wa dhithu dhapama nnawerelihu. Mbwenye, naarive amodha ehinitamalelaga mwaha wa ele nnawerelihu, iyo nnerege ohagalala mwaha nihinona wi niherana ethu yapama. Kuddiwale wi ‘Yehova podi wuvaha okwaranya ele ovahiliwe.’ (2 Cró. 25:9) Ebaribariya sowihina kawo muthu anonne ovaha ompitha Yehova, teto kawo ethu enathabwa ohagalasa opitha oreelihiwa ni Yehova. Bumwahaya nnafuna nithome omutajhiha Babihu Yehova ali Mulugu oovaha. Namasugwera 09/24 epaddi 31 ddima 20-21

Yehova dathagaraga ni doodhivela. (Sal. 103:13; Isa. 49:15) Oliye anowonelamo dhithu dhinanipadduwela, bumwahaya anowoona goyi yehu. (Zac. 2:8) Teto Yehova anonikavihera omunona ni okanna wandana nuliye. (Sal. 25:14; Dho 17:27) Oliye dowiyeviha teto ‘anoworoma wihina asugwe elabo yodhulu ni yavati ni anowavenyiha athu owiyeviha vanthubini.’ (Sal. 113:6, 7) Onona dhithu ndha kadhinuthukulela omuthithimiha Mulugu? Iyo nnomuthithimiha Yehova mwaha nnafuna wi athu amodha emunone. Athu owinjhiva kinonne ebaribari wodhela Yehova. Mwaya bwaddi? Mwaha Saddana onofuga mubuwelo waathu wodhela wahudhiha dhowoota wodhela Yehova vamodha ni adhaari aye. (2 Kor. 4:4) Saddana onowathukulela athu wubuwela wihina Mulugu namvedegu ni kananipwatha teto makathamiho owinjhiva enanifwanya ananitatamulela duliye. Mbwenye iyo nihinona ebaribari wodhela Yehova! Teto nihikanna oneti wowoga dhithu dhinakavihera athu amodha wonelamo wi Yehova Mulugu apama. — Isa. 43:10. Namasugwera 01/25 epaddi 3 ddima 6-7

Yesu aali oologomana, ni ahawerana matikiniho owinjhiva. Naarive dhigaali ndo, Saddana ahaalabihedha athu wihina evuwihe dhowoota wodhela Yesu. Motajhiha, anamaholela gereja yowawaddela athu wi Yesu awigara ademoniyu ni kopolo dha “namathonga aademoniyu.” (Mar. 3:22) Teto mudhidhi Yesu atorihiwaga, anamaholela gereja omwinkedha Yesu wi oliye ahimuruwana Yehova ni wathukulela athu oloba wihina Yesu apiwe. (Mat. 27:20) Vasogolova anamahara a Yesu nuwambela olaleya muthenga dhapama, amwiddani ewa watujela athu amalogo wihina yarugunuwele. (Dho. 14:2, 19) Awogaga wodhela yolebela ya Dhowera Dhaarumiwi 14:2, Sentinela a 1 a Dezembro a 1998, anawoga egi: “Ohiya ohihagalalave mwaha wa muthenga yalaleya anamahara a Yesu, amwiddani amaJudewu yahaathukulela athu wanyemula anamahara ala, esayelaga makalelo owaweriha athu apama wawidda makiristawu.” Peeno Saddana anodhowave avuwihaga dhowoota. Oliye aana ‘waholosa athu aatene elabo yavati. Namasugwera 04/24 epaddi 11 ddima 15-16

Muthu kanaakele egumi yohimala mwaha wa mudhidhi anafuniye okwa. Yehova Namatoriha oologomana, teto dhothoma dhaye sapama ni sowogowa. (Sal. 33:4, 5.) Bumwahaya iyo podi okanna ebaribari wi: ‘Namatoriha eelabo yatene’ anere werana ele eli yapama. (Gén. 18:25) Teto iyo podi owoga wi muthu kanaakele egumi yohimala mwaha wa murudda anakaliyewo. Yehova kanaatorihe athu ninga “mbuzi” mwaha aliwa okala murudda wahifiyilewo muthenga dhapama. (Mat. 25:46) Akala iyo nnowathuwathuwela athu yala, nihikanna ebaribari wi Yehova ali ‘Namatoriha eelabo yatene’ anoothabwa wathuwathuwela aliwa. Iyo kannone makalelo Yehova anafuniye waatoriha athu yaala mudhidhi wa mahoso manlubale. Podi wera amodha wa athu yala yamala woona dhithu dhinapadduwe mudhidhi wa mahoso manlubale, enere wambela okanna nroromelo ni Yehova ni enere othoma omulabela, mudhidhi Yehova anafuniye otxeniha ndina naye velaboni yaatene yavati. — Eze. 38:16. Namasugwera 05/24 epaddi 12 ddima 14-15

Iyo ninga adhaari a Yehova nnodhiveliwa okaviherana mmodha ni mukwaye. (2 Kor. 8:4) Mbwenye malabo mamodha wihina nande okaviherana nnohowela okala ooliba murima. Motajhiha, mudhidhi wa koddo anamaholela mulogo enohowela walibiha addibila ammulogoni wodhela wakavihera epaddi yomuzimuni ni yahoweleyaga wakavihera epaddi yomwilini. Anamaholela mulogo enowadhivela mambila a Yehova, bumwahaya aliwa enopweha egumi yewa vangovini wihina yakavihere addibila enahowela nikavihero. Nafwanyiwaga makathamiho bi makathamiho obe ngovi, sathima vanlubale okala owiwanana ni addibila. Teto sathima ohara dhoholela dhinadhela oBeteli. (Ebe. 13:17) Anamaholela mulogo, enohowela ohudhera dila dhowinjhivadhene dhoholela dha nikuru nehu, dhinawoga wodhela makalelo owiwegeredha yapadduwa ngovi. (1 Kor. 14:33, 40) Okale ooliba murima, mudhidhi mmodhave okale pasope. (Pro. 22:3) Wabihege wubuwela ohunathi werana ethu-sithu ni kuthabwege wipweha vangovini. Omuroromelege Yehova. Kudduwale wi Yehova anothuwathuwela opama wawo ni wa addibila. Yehova podi wuvaha kopolo wi wande wakavihera addibila nuubareleya. Namasugwera 07/24 epaddi 4 ddima 8; epaddi 5 ddima 11

Mwene Davidi ahimunona pamadhene Yehova ni oomuroromela. Mudhidhi aharahariwaga ni amwiddani aye ninga mwene Sawuli, Davidi ahilobela wa Yehova amulobaga nikavihero. Vano Yehova numala wakula nlobelo naaye teto nuumukavihera, Davidi owoga egi: ‘Yehova Mulugu ookalawo!’ (Sal. 18:46) Madhu ala a Davidi enatapulela ddi? Livuru dhaala na referensiya nnawoga wi mudhidhi yoole, Davidi awoga wi oomuroromela Yehova ninga Mulugu mmodha baahi eebaribari ni anaakavihera adhaari aye. Mwaha wa yopadduwa ya mwigumini mwaaye, Davidi ahinona wi Yehova oowoona dhithu dhatedhene dhampadduwela ni eere omukavihera. Siyeyo yamukavihere Davidi odhowagave amulabelaga ni anvuwihaga Yehova. (Sal. 18:28, 29, 49) Okanna ebaribari wi Yehova Mulugu ookalawo, sithu enaanikavihere omulabela nuuviheya. Teto eyo enere onivaha kopolo yowanda ogonjhiha yoweha si yoweha ni odidela neragana ele nnandihu wi nimulabele Yehova, ni enere onikavihera okanna wandana wapama ni Yehova. Namasugwera 06/24 epaddi 20-21 ddima 3-4

Nnahudhera ddi ni ndhe murumiwi Pawulo awaddenliye addibila oTesalonika? Niiwa ethu-sithu ehiniwana ni ndhe nihudherihu mBibiliyani obe niiwa ethu yohifwanelela, nnohowela okanna thotho. Motajhiha, o Uniyawu Soviyetika amwiddani ehu, walebela karta addibilihu, nakala ninga nadhela osede Enlubale ya Anamoona a Yehova. Kartana naakongomedha addibila wegeredha nikuru newa, yahihowelaga nikavihero naathu amodha. Kartana nakala ninga nadhela osede Enlubale. Mbwenye addibila yaali oororomeleya, kayarumendhe dhowoota ndhe. Aliwa yahonelamo wi dhithu dhalebiwe mukartani mune, kadhiwanana ni ndhe yahudhenriwa mBibiliyani. Peeno amwiddani ehu enolabihedha interneti ni redes sociais wihina evuwihe muselu dhowoota ni enithukulele ohiwanana naaddibilihu. Ohiya ‘waguvela ohiya zelu dhehu,’ nnohowela opendda pamadhene dhithu nnavuruwanihu obe nnilerihu akala dhinowiwanana ni ebaribari enafwanyeya mBibiliyani. — 2 Tes. 2:2; 1 Juwa. 4:1. Namasugwera 07/24 epaddi 12 ddima 14-15

Yothoma enlubale muthu aneriyena fuusakula wipeleka wa Yehova ni obaddiziwa. Yehova anafuna wi athu aatene yipeleke ni ebaddiziwe. Mwaha wa ddi? Mwaha Yehova anafuna wi nandane ni oliye ni nikalewo nimukalakala. (Deut. 30:19, 20; Gal. 6:7, 8) Mbwenye Yehova kanamuwaddihedha muthu omulabela. Oliye anonvaha ofuru kadda muthu osakula anafuniye wera. Ki vano akala mukiristawu abaddiziwe, anowalupa malamulo a Mulugu ofiyedha werana yothega enlubale? Ahithwaruwa anofwanelela okumihiwa mmulogoni. (1 Kor. 5:13) Naarive akumihiwaga mmulogoni Yehova anafuna wi oliye athwaruwe, ni ahogolowele omulabela. Ethu emuthukulenle Yehova ompeleka mwanaye wihina anikwele so wihina athu aatene etheegile eleveleliwe. Yehova Mulugu odhivela ni anafuna wi athu aateene etheegile ethwaruwe. — Zac. 1:3; Rom. 2:4; Tiya. 4:8. Namasugwera 08/24 epaddi 14 ddima 1-2

Mudhidhi murumiwi Juwawu alebaga karta naye nanatharu, athu amodha yanna ovuwiha dhohudhiha dhowoota dhatotela makathamiho mmulogoni. Mbwenye yohagalasaya sowihina amodha, yahididela “weedda mwibaribarini,” teto yahididela “wawiwelela malamulo aye.” (2 Juwa. 4, 6) Alobwana ale oororomeleya kiyahagalanse baahi murima wa Juwawu, mbwenye yahimuhagalasa vanlubale ni Yehovaya. (Pro. 27:11) Nnahudhera ddi? Nakala oororomeleya wa Yehova, nnohagalala ni nnowahagalasa athu amodha. (1 Juwa. 5:3) Motajhiha, iyo nnohagalala vanlubale mwaha onona wihina nnohagalasa murima wa Yehova. Teto Yehova anohagalala anonaga nisukumaga dhoweha dha elabo ela ni nawiwelelaga malamulo aye. Ohiya eyo, angero enohagalala vanlubale yaanonaga nimwiwelelaga Yehova. (Luk. 15:10) Ni iyoya, nnohagalala vanlubale nawonaga addibilihu edidelaga okala oororomeleya wa Yehova. (2 Tes. 1:4) Teto, elabo ela ya Saddana yagujhuliwa, iyo nnere ohagalala mwaha onona wi nihanda okala ororomeleya wa Yehova ofiyedha omakuthulo. Namasugwera 11/24 epaddi 12 ddima 17-18

Ki vano mudhidhi mungasi onahoweliwe omala omusugwaga obe omunonaga muthu ohunathi omwaddela wi ononfuna? Waguvela omwaddela, oliye podi wubuwela wi oli muthu amarulu. (Pro. 29:20) Mbwenye wathabwa olegela, oliye podi wubuwelaga wi kunonne ethu onafuniwe, thabwa-thabwa akala oliyeya ohoona wi ononfuna. (Ecl. 11:4) Kuddiwale wi kinahoweleya okanna ebaribari, akala oneere otelana ni muthuya mudhidhi ohunathi odhowa omuwogana, mbwenye we onohowela okanna ebaribari wi oli owiwegeredhene wihina otele obe oteliwe ni wihina muthuya podi wera ohukanna dhikalelo onafuniwe. Ki vano wanona wi ohukala muthu anuufuna? Akala we kunanfuna, enohoweleya wooniha pamadhene eyo. Kayakale yapama weragana dhithu dhaamuthukulele muthuya wubuwela wi ononfuna wula ononaga wi kunanfuna. — Efe. 4:25. Namasugwera 05/24 epaddi 22-23 ddima 9-10

Makiristawu oothikitheliwa enaadidele okala ororomeleya wihina yathongege mumweneni mwaaye. Mukiristawu oothikitheliwa ahinakale mento epaddi yomuzimuni, kinaakale vamodha ni makiristawu amodha “oosakuliwa.” (Mat. 24:31) Ebaribariya sowihina, adhaari aatene a Yehova, naarive akala ejhehedho yewa, sodhowa odhulu obe okala elabo yavati, enohowela ohara yoxagiha ya Yesu yokala mento ni ororomeleya. Nihimunona pamadhene Yehova, teto nihinona wihina makalelo aye otoriha bowogowa. Iyo kanathuwathuwa akala Yehova ohuthoma wathikithela makiristawu ororomeleya malabo yaala a peeno. Iyo nnowubuwela yoladdaniha Yesu awogiliye wodhela alobwana yambele olaba mundda wa uva egaakwanne mawora 17. (Mat. 20:1-16) Ale yithaniwe wihina yambele olaba txiguwo yakele korowa emodhave ni ale yambele olaba mambesi. Ni makalelo mamodhave, makiristawu ethikitheliwe kale ni ale enathikitheliwa ovanene, enaamwakele padamari ewa yadidela okala ororomeleya ofiyedha omakuthulo. Namasugwera 09/24 epaddi 24 ddima 15-17

Yesu ohunihiyedha yotajhiha yapama nnahowelihu ohara neddihiwaga mwamakalelo abure. Kubuwela makalelo eddihiwiye mwamakalelo abure naathu amodha ni vemudhini vaye. Amudhaaye amodha yubuwela wihina Yesu eere osavuwa, teto anamaholela gereja yawoga wihina oliye ahikanna ademoniyu. Ohiya eyo, anyakoddo aaRomanu yomuteya ni yahimoniha goyi ofiyedha ompa. (Mar. 3:21, 22; 14:55; 15:16-20, 35-37) Naarive dhigaali ndo, Yesu ahanda ovilelana obure ole ahiwelihedhe kunyawunya. Nnahudhera ddi ni yopadduwa ya Yesu? (1 Ped 2:21-23) Yesu ohunihiyedha yotajhiha yapama nnahowelihu ohara neddihiwaga mwamakalelo abure. Oliye ahinona mudhidhi wowoga ni mudhidhi womala. (Mat. 26:62-64) Oliye kasayela wiwakihedha, athu amodha yamwinkedhaga. (Mat. 11:19) Teto oliye awogaga, kamuthusa newene kamuruwana muthu. Namasugwera 11/24 epaddi 4-5 ddima 9-10

Kabiha wubuwela oganvahile mukono wathima muthu onamudhiveliwe, naarive mukonoya ogaali woriya, we onowonelamo wi muthuya anohowela vanlubale mukono oyo. Mbwenye muthuya anokoya mukono oyo mukaxani, nuwindo oliye odduwala! Wahakale we, were ddi? Mohanganyedha were wukuuwa vanlubale. Mbwenye muthuya alabihedha pama mukono onvahiliwe ni ooniha wi anotamalela, we onere ohagalala vanlubale. Yehova ohunivaha mwanaye ninga mukono, mohanganyedha oliye onohagalala vanlubale nonihaga wi nnothabwa otamalela mukono ola wathima anivahiliye ni odhivela anonihiliye mwaha wonobola! (Juwa. 3:16; Rom. 5:7, 8) Mbwenye mudhidhi waviraga, nahikala pasope iyo podi odduwala mukono wathima Yehova anivahiliye, eli yowobola. Ni madhu mamodha, podi okalaga ninga nithukule mukono wathima anivahile Yehova nuwindo iyo okoya mukaxani. Iyo podi ohagalala mwaha onona wihina nihikoya mukaxani, mbwenye kannubuwela mukonoya. Wihina eyo yahipadduwe, mudhidhi waviraga nnohowela wooniha wi nnomutamalela Yehova ni Yesu, mwaha ele enereliwa. Namasugwera 01/25 epaddi 26 ddima 1-2

Wihina ddibila athomiwe ninga namaholela mulogo, ‘kaakale muthu obaddiziwe ovanene.’ Eyo enatapulela wi onohowela ovira mwana mudhidhi wihina alibihe wandana waye ni Yehova ni ohudhera omulabihedha pama Bibiliya wihina andege werana dhothoma dhapama. Ohunathi othomiwa ninga namaholela mulogo, onohowela omutajhiha Yesu wodhela okala muthu oovilela ni owiyeviha ojhehaga mudhidhi wofwanelela wihina Yehova uvahe mutholo dhimodha mmulogoni. (Mat. 20:23; Fil. 2:5-8) Wooniwa ninga muthu ‘oororomeleya’ enatapulela oparihedha mabasa malamulo ni malagano a Yehova mwigumini mwawo ni ohara dhoholela onakeliwe munikuruni mwa Yehova. Bibiliya anowoga mohihiyedhedha wihina anamaholela mulogo enohowela ‘onona ohudhiha pama.’ Eyo enatapulela wi anamaholela mulogo aatene enowanda owoga pama mwaha dhavathaddo? Naari! Anamaholela mulogo amodha, naarive yahandaga owoga pama mwaha dhewa, aliwa enowanda wahudhiha pama athu enafwanyiwa mmalaleyelo, teto enowawaredhela addibila wihina yalibihe. Namasugwera 11/24 epaddi 23-24 ddima 14-15

Wilibihedhe wawileri malivuru ehu, vano wawonelamo pama museluya, Osanyiheve. Wamala ohudhera, openddege dhithu omanliwe ohudhera wodhela Yehova, Yesu ni odhivela enniwana ni we. (Sal. 119:97, nota.) Ki wamwileri Bibiliya obe wasanyiha muselu bu muselu, vano wahifwanya ethu exa obe yudhivele? Kukwerebeye. Mwaha we oli ninga muthu anasayela woru. Muthu asayelaga oru, anolaba mudhidhi ni malabo wowinjhivene wihina afwanye ethu nibwe eng’ono ya oru. Naarive dhigaali ndo, aliwa kinaselela osayela oru, mwaha naarive egafwanye nibwe eng’ono ya oru, aliwa enovaha thima. Ni makalelo mamodhave, ebaribari nnafwanyihu mBibiliyani, sathima opitha oru! (Pro. 8:10) Bumwahaya kuselele, odidele osayela nuuvilela dhithu dhixa. — Sal. 1:2. Namasugwera 01/25 epaddi 25 ddima 14-15

Yehova anajheha wi iyo naalevelelege ale enanithegela. (Sal. 86:5; Luk. 17:4; Efe. 4:32) Podi wera malabo mamodha nnotakaleliwa vanlubale muthu anitheegela, thabwa-thabwa muthuya akala di mukwihu a vamurimani obe mmudhihu awogile obe erilena ethu enipihile mbani. (Sal. 55:12-14) Owogeliwa obe wereliwa ethu enapiha mbani, podi okala ninga olatiwa ni mbeni. (Pro. 12:18) Malabo mamodha iyo podi wisinjhedha ekalaga ninga ethu epadduwile kinipihile mbani. Mbwenye werana eyo, yakale ninga olatiwa ni mbeni nuwindo kuvenyihawo mbeniya. Nimakalelo mamodhave, iyo kannande ohiya okala ootakaleliwa nisinjhihedhaga ninga ethu epadduwile kinipihile mbani. Muthu anitheegela, ethu yobajha nnerihuna futakaleliwa ni muthuya. Bibiliya anawoga wi malabo mamodha iyo podi otakaleliwa, mbwenye anowoga wihina kanithabwege otakaleliwa ofiyedha walupa manddile. (Sal. 4:4; Efe. 4:26) Mwahaya bwaddi? Mwaha muthu athabwa otakaleliwa kanerana dhithu dhapama. (Tiya. 1:20) Sathima ohidduwala wi muthu anitheegela, iyo podi otakaleliwa, mbwenye okoya ntxiga yosakula ya kadda muthu. Namasugwera 02/25 epaddi 15 ddima 4-6

Nlabo dhaala Yesu owoga yoladdaniha enoniha wihina muthu anathabwa osayela korowa, wula ahithuwathuwelaga okanna wandana wapama ni Yehova taduwa, teto “vamentoni va Mulugu kahi muthu ooreela.” (Luk. 12:16-21) Mwaha kaavo anonne makalelo enafuna okala egumi yaye mangwaana. (Pro. 23:4, 5; Tiya. 4:13-15) Teto woona wihina nili anamahara a Yesu, nihikanna yoweha emodha, mwinnyene Yesu ohuwoga wihina ole anafuna okala namahara aaga anohowela “ohiya dhoreela dhaaye.” (Luk. 14:33) Siyeyo yapadduwe nsaka noobajha ni makiristawu oJudeya. Aliwa yahididela ohagalala naarive egayelele dhoreela dhewa. (Ebe. 10:34) Peeno addibila owinjhiva ehaayelela mabasa ewa ni dhoreela dhewa mwaha ohivolosiha mpulitikani. (Ovuhu. 13:16, 17) Ddiniyani yakavihera addibila ala werana yothoma eyo? Ethu yakavihere sowihina aliwa yororomela mpaganyo wa Yehova onihina: “Kagidha guhiya ni kagidha gunyanyala.” (Ebe. 13:5) Bumwahaya kahiyo yabure okoya korowa wihina nisamalele osogolo, mbwenye sapama omuroromela Yehova wihina anere onisamalela yapadduwa ethu nahajhehedhihu. Namasugwera 03/25 epaddi 29 ddima 13-14

Yehova kanajheha wihina nithwelevo epaddi yomuzimuni nihikaviheriwe nuliye. Addibila enalaba ninga anamakukula ni anamahudhiha mmulogoni, enoxagihiwa wihina emukavihere kadda ddibila withwelavo epaddi yomuzimuni, ‘wihina efwanye ekalelo yowakwanela ya Kiristu.’ (Efe. 4:11-13) Ohiya eyo, Yehova podi olabihedha muzimu waye wotxena wihina anikavihere okanna ‘mubuwelo wa Kiristu.’ (1 Kor. 2:14-16) Teto Yehova ohunivaha malivuru mannayi a Evanjelyu enoniha makalelo ubuwela Yesu, aawogiye ni eriyena dhithudha mudhidhi agaali mwilaboni yavati aaparaga mabasa aye oolaleya. Natajhiha makalelo Yesu awogiye ni eriyena dhithudha, podi onikavihera okala makiristawu owithwelavo epaddi yomuzimuni. Mbwenye wihina nikale makiristawu owithwelavo epaddi yomuzimuni, kanihudherege baahi ‘dhohudhiha dhokweya wodhela Kiristu,’ obe nere, dhithu dhobajha nihudherihu wodhela Yesu. Namasugwera 04/24 epaddi 4-5 ddima 11-12

Malabo aamateene nnowerana dhothoma dhihiyana-iyana. Dhothoma dhimodha sokweya wakwanihedha. Motajhiha, kadda labo nnothoma dhithu nnahowelihu ojha ni mudhidhi nnafunihu ogona. Mbwenye dhothoma dhimodha dhinorusa wakwanihedha. Teto podi onitotela makathamiho, ohanda ohagalala ni ovolowela wandana ninnihuna ni amudhihu vamodha ni webedha wehu. Bumwahaya nnafuna nerena dhothoma dhinaanikavihere ni dhinaakavihere amudhihu. Yathimaya nnafuna wihina dhothoma dhehu dhimuhagalase Yehova. (Rom. 12:1, 2) Ethu yobajha onahoweliwe werana wihina werena yothoma yapama, fuunona pamadhene dhithu dhinavolowelavo. Mwahaya bwaddi sapama werana eyo? Kabiha omubuwela muthu anamuloba nikavihero mediku mwaha wa oredda wowopiha anniyena. Nerege mediku anere onvaha murubwe ahirajhihile omukoha mureddaya newene woona ethuya enanvereya? Naari! Bumwahaya ndala ninga mediku apama, we onere wanda werana dhothoma dhapama warajhiha onona dhithu dhatedhene dhinavolowelavo wodhela museluya. Namasugwera 01/25 epaddi 14 ddima 1-3

Ddiniyani nnonnihu wodhela thagaraga dha Yehova? Yehova oonihile aavi wi ‘kanafuna wi muthu di muthu agujhuliwe?’ (2 Ped. 3:9) Kasugwa makalelo Yehova awonihiliye thagaraga athu amodha yerilena dhoothega dhinlubale. Motajhiha, mwene Davidi aherana dhoothega dhinlubale ninga okuma mba vamodha ni ompa muthu. Mbwenye Davidi ahithwaruwa, bumwahaya Yehova omweddela thagaraga ni omulevelela. (2 Sam. 12:1-12) Mwene Manaseji ahimuthegela vanlubale Yehova, mbwenye naarive dhigaali ndo, Yehova nuwoona wi Manaseji ohuthwaruwa ni murima waye waatene, oliye omulevelela. (2 Cró. 33:9-16) Dhopadduwa ndha dhinowoniha wi Yehova anowoniha thagaraga dhaye yahoweleyaga. Teto Oliye anere wavenyihiya muukwani athu yerilena dhoothega dhinlubale, mbwenye yonihile wi ehithwaruwa mwebaribarene. Namasugwera 05/24 epaddi 4 ddima 12