Numala wawobola amwaana Ezarayeli mudhaarini Wijipitu, Yehova wathoma anamakutha wihina elabege mutabernakulu. Teto oliye ahathoma malevita amodha wihina yasamalelege mabasa, mburo ole wotaleleya. Ki vano, nerege ale yalaba mutabernakulu obe yakala waddamela otabernakulu, bathabwa osamaleliwa ni Yehova? Naari! Yehova kanna nsakulo, teto vamentoni vaye athu aatene bathima.. Motajhiha, Yehova aheriha wi amwaana Ezarayeli aatene yonege murabo waweddiha ni mutana ni mootho waweddiha ni mahiyu, wakala vadhulu va tabernakulu. (Êxo. 40:38.) Vano murabo ole wabajha weedda, naleya yakala wolapela yowanda woona. Ni makalelo yaala, athu aatene yowiwegeredha ni yoothukula dhoobo dhewa wihina ehogolowele olenddo wewa. (Núm. 9:15-23) Ni makalelo mamodhave, naarive nikalaga mburo bu mburo, iyo aatene nnowanda woona wi Yehova anonidhivela, anonisamalela ni anonibarela. Namasugwera 06/24 epaddi 4 ddima 10-12

Egumi ya Davidi yaali vangovini, mwaha mwanaye Abisalawu afuna ampe ni akale mwene. (2 Sam. 15:12, 13) Mwaha wa yeyo, Davidi oohowela othawa oJeruzale mowaguva! Mudhidhi Davidi ni adhaari aye ethawaga, wonelamo wihina yohoweleya adhaari amodha ohala oJeruzale wihina emwaddelege Davidi dhithu Abisalawu afuniye weragana. Bumwahaya oliye omuruma Zadoki ni anamakutha amodha wihina ehogolowele oJeruzale. (2 Samuel 15:27-29) Mbwenye alobwana ale yahale oJeruzale yohowela okala pasope. Davidi ahikanna palanu, mbwenye ohoowela nikavihero na Zadoki vamodha ni mukwaye mmodhaya oororomeleya ithaniwa Uzayi. (2 Sam. 15:32-37) Palanuya yaali ela, Uzayi ohoowela wiisinjhihedha ekalaga ninga amukavihera Abisalawu ni onvaha yolaga wodhela makalelo omwihidda Davidi. Vano Abisalawu nuuthoma ohara yolaga ya Uzayi, Uzayi omwaddela Zadoki ni Abiyatar dhithu dhaapadduwile. (2 Sam. 17:8-16) Nuwindo Zadoki ni Abiyatar omuruma muthu wihina aamwaddele Davidi ele Abisalawu afuniye, mwaha wa yeyo yahanda ombarela Davidi. — 2 Sam. 17:21, 22. Namasugwera 07/24 epaddi 4-5 ddima 9-10

Adhaari amodha a Yehova enowukuuwa ni enothuwathuwa mwaha dhothega yeriliwana ehinathi obaddiziwa ni ndhe yeriliwana numala obaddiziwa. Mbwenye sapama ohidduwala wi Yehova ohunivaha yowobola mwaha odhivela anniyena ni iyo, teto oliye anafuna wi iyo nrumedhe nvaho ola wa yowobola. Yehova anopaganya wi iyo ‘natxokotxela muladdu dhehu’ nuliye, oliye anere onilevelela ni murima waye waatene. Nnomutamalela vanlubale mwaha Babihu oodhivela Yehova odduwala dhothega dhehu nerilihuna kale. Teto oliye anopaganya ohidduwala dhithu dhaatedhene dhapama nerilihuna. (Sal. 103:9, 12; Ebe. 6:10) Akala we oli ookwerebeyene mwaha dhithu dhabure weriliwena kale, wilibihedhe wubuwelaga dhithu dhapama oneriwena ovanene ni onafuniwe werana osogolo. Mwaha we kannande owomihedha dhithu dhabure weriliwena kale. Mbwenye we podi omuthithimiha Yehova ni dhithu oneriwena peeno ni odidela osugwa osogolo wula njhehaga wakela mpaganyo dhoriya dha Yehova. Namasugwera 10/24 epaddi 8 ddima 8-9

Podi wera omambelelowene onere okwerebeya vang’ono wabajha omwileri Bibiliya, mwaha woona dhithu dhowinjhiva onahoweliwe owomihedha mwigumini mwawo. Kabiha wubuwela wilerigi livuru na Tiyagu kadda labo kapitulu modha, vano nlabo noobajha we wileri wodhela muselu wohukanna nsakulo. (Tiya. 2:1-8) Nuwindo we wonelamo wihina onohowela osaddula makalelo awo owaweddiha athu amodha. Teto eyo sapama! Vano labo nanabiili, onowileri epaddi emodha enawoga wodhela makalelo oosugwera dhithu onawogiwe. (Tiya. 3:1-12) Nuwindo we wonelamo wihina nlabo dhaala wahiwoga dhithu dhokwerebeyiha. Mwaha wa yeyo, onothoma wilibihedha owoga dhithu dholibiha. Nlabo nanatharu, onowileri epaddi enawoga wihina sowopiha wandana ni elabo. (Tiya. 4:4-12) Mwaha wa yeyo, onoothoma osakula pama yaredhelo yawo. Yahinavire malabo owinjhiva, we ohunfwanya dhithu dhowinjhiva onahoweliwe osaddula mwigumini mwawo. Eyo yapadduwa kuthuwathuwe, teto kudduwale wi owara “emuthu exa” ethu nnahowelihu odidela weragana egumihu yaatene. Namasugwera 09/24 epaddi 5-6 ddima 11-12

Yesu ahinona wihina Yehova owawoona makathamiho mateene yanfwanya. Teto oororomela wi Yehova eere wamariha makathamiho mateene mudhidhi wofwanelela. Neddihiwaga mwamakalelo abure, iyo podi omutajhiha Yesu wodhela osugwera ndhe nnawogihu. Malabo mamodha muthuya aniwogela obe anerela ethu yabure, mbwenye noonelamo wi museluya kuthabwile onipiha mbani, iyo podi othoma odduwala muladduya. Mwaha nathoma owoga ethu-sithu, iyo podi othabwiha muladduya. (Ecl. 3:7; Tiya. 1:19, 20) Mbwenye malabo mamodha, iyo podi othoma omwakihedha muthu aneeddihiwa mwamakalelo abure obe wakihedha ebaribari. (Dho. 6:1, 2) Mbwenye naakihedhaga ethu-sithu, nnohowela wilibihedha wihina niwoge nupwaseya nonihaga nriho. — 1 Ped. 2:23. Namasugwera 11/24 epaddi 5-6 ddima 10-12

Ddibila athwaruwa iyo aatene nnohagalala! (Luk. 15:7) Naarive anamaholela mulogo yilibihedhaga wihina emukavihere ddibila othwaruwa, nthithimihona thawani? Newa? Mubuwele ethu asorihile murumiwi Pawulo wodhela anamathega: “Podi wera Mulugu anere osaddula murima wewa.” (2 Tim. 2:25) Yehova, dinamukavihera mukiristawu osaddula mubuwelo ni dhowera dhaye, ohiya muthu di muthu. Pawulo anowoga dhithu dhapama dhinapadduwa muthu athwaruwa: “Oliye anokanna enonelo yeebaribari, nroromelo naye nnooliba teto anogonjhiha murako wa Saddana. (2Ti 2:26) Ddibila athwaruwa, anamaholela mulogo enerege omwaredhela wihina emukaviherege epaddi yomuzimuni wi ande owanana dhoweha dha Saddana ni eregena dhithu dhapama. — Ebe. 12:12, 13. Namasugwera 08/24 epaddi 23 ddima 14-15

Muthithi ole waathu Yesu aajhihiliye ohogolowela mburo ole Yesu aweriyena matikiniho ale a pawu. Mbwenye Yesu ni anamahara aye, kiyaali mburo yoole. Vano athuya ogwela mwanddeya wadhela oTiberiyadi ni odhowa omusayela Yesu oKafarnawu. (Juwa. 6:22-24) Nerege aliwa yamusayele Yesu ni efunelo wovuruwana muthenga wa Omwene alaleyesiye? Yowakulaye sowihina, naari! Mwebaribarene aliwa yamusayela, mwaha yanna dala ni yafuna wi Yesu aavahe pawu wi ejhe. Ddiniyani enanithukulela owoga ndo? Kasugwa ethu yapadduwe muthithi ole waathu nufiya mburo waali Yesu waddamela oKafarnawu. Yesu wawaddela pamadhene athu ale wihina yamusayela mwaha yafuna etakune pawu. Oliye owoga wihina aliwa “yahitakuna pawu ofiyedha orubala.” Vasogolova, Yesu wawaddela wihina pawu ele yatakuniwa yaali ninga “yojha enuudda.” Nuwindo oliye wakongomedha wi yilibihedhege osayela “yojha enakalawo malabo aamateene.” (Juwa. 6:26, 27) Yesu owoga wihina yojha ele enakalawo malabo aamateene yavahiwe ni Baabe Yehova. Namasugwera 12/24 epaddi 5 ddima 8-9

Wihina ekale namahudhiha apama, addibila enomulabihedha Bibiliya malabo aamateene yafunaga ohudhiha ni ovaha dholaga. Okale namahudhera apama a Bibiliya ni malivuru ehu. (Pro. 15:28) Wahudheraga, opwasedhege woona makalelo malivuru ehu enatapuleliwa versu dha mBibiliyani. Eyo enere wukavihera oparihedha mabasa ndhe onahudheriwe mwamakalelo apama. Teto wahudhihaga, wilibihedhe oodahinya murima dha athu enuvuruwana. Ohiya eyo, we podi waloba anamaholela mulogo amodha enonne ohudhiha pama wihina yukavihere owomihedha makalelo awo ohudhiha. (1 Tim. 5:17) Anamaholela mulogo enohowela ‘walibiha’ addibila ni arogola. Teto malabo mamodha aliwa enohowela wavaha yolaga obe ‘wasumulula.’ Mbwenye yasumululaga obe yaalibihaga addibila, aliwa enohowela werana eyo nuudhivela. Wakala ookweya, oodhivela ni wamulabihedhaga Bibiliya wahudhihaga, onere okala namahudhiha apama. Mwaha wihina onaamutajhihege namahudhiha Munlubale Yesu Kiristu. — Mat. 11:28-30; 2 Tim. 2:24. Namasugwera 11/24 epaddi 24 ddima 16

Iyo podi onvaha Yehova nthithimiho mwaha dhithu nnawogihu wodhela oliye. Nlogo na Yehova nnohowela ‘omwibela Yehova,’ ‘othithimiha ndina naaye’ ni “olaleya kadda labo muthenga dhaye dhapama dhinavulusa,’ vamodha ni ‘ovuwiha nthithimiho naye [vaari] va malogo maatene.’ (Sal. 96:1-3) Ala makalelo apama nnahowelihu woniha wi nnomuthithimiha Baabihu odhulu. (Dho. 4:29) Teto iyo podi omuthithimiha Yehova ni dhithu dhathima ninnihuna. Obajha kale nlogo na Yehova nnomuthithimiha mwamakalelo yaala. (Pro. 3:9) Motajhiha, amwaana Izarayeli yovaha dhithu dhathima dhanniwana wihina emagiwe tempulu ni ewomihedhegena. (2 Reis 12:4, 5; 1 Cró. 29:3-9) Anamahara amodhaya yomukavihera Yesu ni arumiwi aye ni “dhoreela dhewa” wihina aliwa ekanne dhithu yahoweliwa. (Luk. 8:1-3) Teto makiristawu amodhaya ansaka noobajha yovaha dhithu dhathima yanniwana wihina yakavihere addibila ni arogola ammulogoni. (Dho. 11:27-29) Peeno, iyo podi omuthithimiha Yehova wodhela opeleka dhovelela dhehu. Namasugwera 01/25 epaddi 4 ddima 8; epaddi 5 ddima 11

Ddiniyani yamukavihere Korneliyu obaddiziwa? Bibiliya anihina “oliye vamodha ni muralaye waatene, yomwebedha Mulugu.” Siyela yamukavihere Korneliyu obaddiziwa. Teto oliye ahikanna elemelelo yoolobela wa Mulugu. (Dho. 10:2) Bumwahaya Peduru nuumulaleya muthenga dhapama, oliye ni emudhi yaye wambela omuroromela Yesu ni othoma obaddiziwa mohilegela. (Dho. 10:47, 48) Mohanganyedha Korneliyu ahithoma wawerana masadduwo yahoweleya wihina adidele omwebedha Yehova vamodha ni emudhi yaye. (Jos. 24:15; Dho. 10:24, 33) Korneliyu ahafune kaarumedhe okala mukiristawu, mwaha oliye aali muthu oovuwa. Mbwenye Korneliyu keenyile wihina dhithu ndho dhimuhihe obaddiziwa. Nerege onohowela wawerana masadduwo manlubale mwigumini mwawo wihina obaddiziwe? Akala siyeyo onahoweliwe werana, Yehova anere wukavihera. Teto wathoma waparihedha mabasa malagano enafwanyeya mBibiliyani wihina omuhagalase Yehova, mwebaribarene oliye anere wureeliha. Namasugwera 03/25 epaddi 5 ddima 12-13

Wiwa dhowoota wodhela nikuru na Yehova obe wodhela addibila enaniholela, kuddiwale makalelo amwiddani a Mulugu yamwinkedhiliwa Yesu vamodha ni anamahara aye nsaka noobajha. Ndala ninga Bibiliya aawogiliye, athu a malabo yaala yerege oharahara ni owoga obure nikuru na Yehova. (Mat. 5:11, 12) Iyo kannarumedhe dhowoota ndha, nahimudduwala muthuya ananiharahara ni nerana ethu-sithu mowaguva wihina niibarele mwaha wa dhowoota ndha. Ddiniyani nnahowelihu werana wihina niibarele wa dhowoota ndha? Orabele ovuruwana muselu dhowoota. Murumiwi Pawulo ahivaha dhoholela dhowooneleyamo wodhela ethu nnahowelihu werana niiwaga muselu dhowoota. Oliye omwaddela Timotiyu wihina ‘awaddele athu amodha wi . . . newene kipwasedhe ovuruwana thalako dhowoota’ ni ‘kamuvuruwanege thalako dhowoota dhahinna mabasa. (1 Tim. 1:3, 4; 4:7) Nimakalelo mamodhave, iyo nnorabela muselu dhowoota mwaha nihimunona pamadhene muthuya anavuwiha dhowoota ndha. Ohiya eyo, iyo nnavuruwana baahi ‘madhu’eebaribari. Namasugwera 04/24 epaddi 11 ddima 16; epaddi 13 ddima 17

Okaleve owiwanana naale eli oororomeleya wa Yehova. Yehova anafuna wi nimwebedhege mowiwanana naaddibilihu. Mbwenye nnere wanda omwebedha mowiwanana nahiddelela ebaribari. Muthu anavuwiha muselu dhowoota anoodhana ohiwanana mmulogoni, teto Yehova anonaddela wi “naarabele athu yayo.” Mwaha naharabela, iyo podi wambela orumedha muselu dhowoota aliwa enavuwihiwa ni okala oohiroromeleya wa Yehova. (Rom. 16:17) Nanda ohiyaniha muselu webaribari ni wowoota ni ohiddelela pamadhene ebaribari, nnere wanda omwaddamela Yehova ni olibiha nroromelo nehu nuliye. (Efe. 4:15, 16) Teto kannadha nilekethiwa ni dhohudhiha dhowoota dha Saddana ni nnere okala obareleyene mmadani mwa Yehova mudhidhi wa mahoso manlubale. Bumwahaya kabeni aatene niparele pamadhene ebaribari, nerana ndo “Mulugu a murenddele anere okala ni [iyo].” — Fil. 4:8, 9. Namasugwera 07/24 epaddi 13 ddima 16-17

Yesu athabwa wakavihera ale yakala owukuwene mwaha wa dhothega dhewa ni owawithana wi ekale anamahara aye. Oliye ahinona wihina makathamiho maatene enadha mwaha wa yothega. Bumwahaya oliye owakavihera alobwana ni ahiyana yoona goyi mwaha wa yothega yeriliwana. Motajhiha, mudhidhi alabihedhaga nladdaniho oliye wera: “Athu agumi kinamuhoowela mediku, mbwenye aredda binamuhoowela.” Teto wenjhedhedha eraga: “Mwaha miyo kagidhele wawithana athu owogowa mbwenye athu oothega.” (Mat. 9:12, 13) Yesu keere wawogave madhu ala, mbwenye ahiwakwanihedha. Motajhiha, oliye ahimulevelela muhiyana dhaala asunwe manyalo aye ni mitori. (Luk. 7:37-50) Oliye ahimusuziha ebaribari yathima ya mBibiliyani muhiyana dhaala ali oSamariya, naarive anonaga wihina aali namararuwa. (Juwa. 4:7, 17-19, 25, 26) Teto Mulugu ahivaha kopolo Yesu wihina ogonjhihe okwa. Aavi? Yesu owavenyiha athu yaakwile ninga, alobwana, ahiyana, ahima ni anakalaba. — Mat. 11:5. Namasugwera 08/24 epaddi 4 ddima 9-10

Yehova anaathithimihe aavi ndina naye mohilegela? Oliye anere werana eyo wodhela odhana woogowa. Teto ovaneneve Yehova aneere omugujhula Babiloniya munddimuwa mwaha wowerana dhithu dhabure ni ohudhiha dhowoota wodhela Yehova. (Ovuhu. 17:5, 16; 19:1, 2) Vano Babiloniya agujhuliwa, podi weera amodha eneere osakula okala vamodha ni iyo wi emwebedhege Yehova. Teto Armajedo afiya, Yehova anere ogujhula onamathonga wa Saddana ni aleya enatakaliha ndina naye. Mbwenye Yehova aneere wavulusa aateene enamudhivela, enamwiwelela ni enamuthithimiha. (Mar. 8:38; 2 Tes. 1:6-10) Teto omakuthulo wa yaka txikwi wa onamathonga wa Yesu wamala, Yehova anere otxeniha ndina naye ni mukalakala, wehiwa wogomihedha wavira. (Ovuhu. 20:7-10) Yehova amala otxeniha ndina naye, ‘elabo enere odhaala enonelo ya nthithimiho na Yehova ndala ninga manjhe a muniya.’ (Hab. 2:14) Ola onaakale mudhidhi wohagalasa, okala velaboni yavati ni wawona athu aatene envahaga nthithimiho Yehova anafwaneleliye! Namasugwera 01/25 epaddi 7 ddima 15-16

Ddiniyani yakavihere makiristawu ale ovilele naarive eharahariwaga? Murumiwi Pawulo afuna aakavihere makiristawu ale wonelamo wi oharahariwa winodhana mpurelo. Bumwahaya adhe awogege wi makiristawu yaharahariwaga, Mulugu podi olabihedha oharahariwa wula wihina aaxagihe. Oharahariwa obe oxagihiwa wula, were wakavihera aliwa okanna dhikalelo makiristawu enahoweliwa. Makiristawu ale yahawonege makathamiho ale ninga ethu yapama yere wakweyela ovilela. (Ebe. 12:11) Murumiwi Pawulo ahakongomedha makiristawu ale okala ooliba murima ni ohiselela yaharahariwaga. Murumiwi Pawulo ahinona ovaha pama dholaga wodhela muselu ole woharahariwa, mwaha kale oliye ahaharahara makiristawu, bumwahaya oliye ahinona pamadhene dhithu dhaafwanya makiristawu ale yaharahariwa. Teto nuukala mukiristawu oliye ahiharahariwa vanlubale. — 2 Kor. 11:23-25. Namasugwera 09/24 epaddi 12-13 ddima 16-17

Kadda labo nnavira, mabasa ehu oolaleya enothabwa okala owaguveya. Mwaha wa ddi? Mwaha mudhidhiya onna ogwaddeya. Kasugwa ethu Yesu awogiliye wodhela mabasa oolaleya malabo ookuthula, enafwanyeya va Marku 13:10. Va Matewuji 24:14 Yesu ahiwoga wi muthenga ola wapama wa Omwene weere olaleyiwa elabo yatene yavati wihina athu aatene yiiwe, “windo omakuthulo wifiye.” (Mat. 24:14) Madhu owi “omakuthulo” enatapulela omakuthulo wa elabo ela yabure enasugweriwa ni Saddana. Yehova ohumala othoma “labo ni maworaya” anafuniye ogujhula elabo ela yabure. (Mat. 24:36; 25:13; Dho. 1:7) Kadda labo nnavira, ninna waddamela omakuthulo. (Rom. 13:11) Bumwahaya, wula njhehaga nlabo nna ofiya, nnohowela odidela wapara mabasa oolaleya nuuviheya. Nawubuwelaga mabasa oolaleya, nnohowela wikoha: Mwahaya bwaddi nigalaleya muthenga dhapama? Yowakula yokweya sowihina, nnalaleya mwaha wa odhivela. Iyo nnalaleya mwaha nnodhivela muthenga dhapama, mwaha wadhivela athu, teto yathimaya mwaha odhivela ninnihuna ni Yehova vamodha ni ndina naaye. Vano kabeni nipwasedhe ohudhera dhithu ndha dhinanthukulela olaleya. Namasugwera 05/24 epaddi 14-15 ddima 2-3

Abaabi mwakavihere aninyu wubuwela dhopaddusa dhotikiniha dha Yehova. Weddaga ni mwanawo mukokolani obe ojardi, omukavihere mwanawo wonelamo makalelo Yehova eegeredhiliye dhopaddusa dhaye nnonihu mwilaboni. Mwahaya bwaddi? Mwaha makalelo dhili dhopaddusa, enowoiha wihina muliba eegeredhile dathotho. Motajhiha, dhithu dhowinjhiva dhipaddusiwe mwamakalelo a Espiral. Teto mansiyetista ehihudhera vanlubale wodhela Espiral. Biyofiziku dhaala anithaniwa Nicola Fameli, anihina muthu di muthu akontari manumero enafwanyeya kadda yopaddusa enna Espiral, anere wonelamo wi ehikanna mburo onambeliwa. Makalelo ala yegeredhiwe dhopaddusa ndha, enithaniwa Fibonacci. Wasugwa dhopaddusa dhowinjhiva, onere woona wihina ehikanna Espiral. Motajhiha, Galakisiya, nigurumba na kono, jirasoli ni makupu mamodha, ehikanna Espiral. Namasugwera 12/24 epaddi 16 ddima 7

Mudhidhi akalawo, Moyizeji, Davidi, ni Juwawu, ohuhiyana vanlubale ni mudhidhi wehu. Naarive dhigaali ndo, dhihikalawo dhithu dhowinjhiva dhiniwanana ni dhithu dheriwana mudhidhi wewa, eli omwebedha Mulugu ebaribari Yehova. Teto ndala ninga aliwa, iyo nnolobela wa Yehova, nnomuroromela ni nnosayela dhoholela dhaye. Ohiya eyo, ninga aliwa, iyo nihikanna ebaribari wihina Yehova anowareeliha athu aatene enamwiwelela. Nnafuna nilibihedhe oparihedha mabasa dholaga dhihile alobwana ala owunnuwelavo wodhela omwiwelela Yehova. Nerena ndo, nnere oreelihiwa vanlubale ni Mulugu ehu. Teto nnere okanna ofuru wokalawo ‘malabo owinjhiva velaboni yavati!’ Ni nnere okanna murenddele mwaha womuhagalasa Baabihu oodhivela Yehova, ananireelihege mwamakalelo nahinandihu wubuwela. — Efe. 3:20. Namasugwera 11/24 epaddi 13 ddima 20-21

Mudhidhi wa arumiwi, addibila amodha yothomiwa ninga adhaari ookavihera. (1 Tim. 3:8) Enakala ninga madhu owi “wakavihera amodha” enafwanyeya va 1 Korintiyu 12:28, murumiwi Pawulo awagana adhaari ookavihera. Eyo enowoniha wihina adhaari ookavihera yowapara mabasa athima wi yakavihere anamaholela mulogo opwasedha walibiha addibila wihina edhowegeve yaparaga mabasa oolaleya. Motajhiha, podi wera adhaari ookavihera yothomiwa wihina elebe kopiya dha Bibiliya obe ogula dhithu dhahoweleya wihina dhilebiwena kopiya. Kawubuwele mabasa athima enaapara adhaari ookavihera a mulogo wawo. (1 Ped. 4:10) Podi wera aliwa ehithomiwa osamalela korowa, murudda mulogo wawo onahoweleya oolaleya obe wagawela addibila malivuru ammulogoni. Amodha podi wera ethomiwe wihina yaparege mabasa a awudiyu ni vidiyu, amodha ninga anamatonyihedha, amodha podi wera enasamalela mabasa owomihedha Nyumba Yomwene. Mabasa aatene ala bathima, teto enokavihera wi addibilihu epurelemo mutugumano ni mabasa oolaleya weedda mwamakalelo owegeredheya. — 1 Kor. 14:40. Namasugwera 10/24 epaddi 19 ddima 4-5

Wubuwela wi Yehova Mulugu ookalawo podi onikavihera wanda ogonjhiha makathamiho bi makathamiho naarive ekale manlubale obe mang’ono., mwaha oliye Mulugu akopolo dhatedhene, teto podi onivaha kopolo nnahowelihu wi nande ogonjhiha makathamiho enanifwanya. Bumwahaya iyo nihikanna ebaribari yaatene yowihina nnere wanda wagonjhiha makathamiho aatene enanifwanya. Noonaga makalelo Yehova ananikaviheriye ni dhithu dhing’ono, nnokanna ebaribari wi oliye anere onikavihera naafwanyiwaga makathamiho manlubale. Kasugwa dhopadduwa biili dha mwigumini mwa mwene Davidi dhamukavihere olibiha nroromelo naye ni Yehova. Mudhidhi agaali muzombwe ahipa nikurukumwa ni poddogoma yafuna watakuna mambila aababe. Mbwenye Davidi kubuwela wi andile werana dhithu ndhe mwaha wa kopolo dhaye. Ohiya eyo, oliye ahinona wi di Yehova anvaha kopolo nuuliba murima wihina ande werana dhithu ndhe. (1 Sam. 17:34-37) Oliye ubuwelaga dhithu ndhe dhampadduwele, nroromelo naye ni Yehova nowenjhedhedheya ni ahinona wi Mulugu eerege omukavihera osogolo. Namasugwera 06/24 epaddi 21 ddima 5-6

Kubuwela ogithaneliwe vafestani. Onere oyawo obe naari? Akala kumunonne muthuya anegeredha festaya obe dhithu dhinapadduwewo, we podi okohedha weegi: “Festaya enakale waani ni enereye alini? Ki ithaneliwewo baani? Athu angasi enakalevo? Athuya eneregevo ddi? Dhinere okalavo dhong’wa dholezeliha?” Dhowakula dha makoho ala, dhinere wukavihera werana yothoma yapama. Wamala wonelamo pama dhithu dhatedhene dhinavolowelavo, we podi werana yothoma onahoweliwe. Motajhiha, ki wanona wihina athu amodha enakale vafestaniva kinaariha malagano a mBibiliyani? Obe ahikalavo muthu anaasugwerege athuya wihina yahithabwe olezela? Onoonamo aavi festa eyo, yere weedda pama? (1 Ped. 4:3) Wamala wonelamo dhithu dhaatedhene, onere wanda werana yothoma yapama. Namasugwera 01/25 epaddi 15 ddima 4-5

Yehova anolabihedha yoladdaniha emodha wihina anikavihere othabwa ovaha thima mukutho wa Yesu. Oliye anosuwa obe anothimiha dhothega dha muthu athwaruwile ni murima waye waatene. Kahi ethu yokweya ovenyihavo musuzu woofila wa thimathi wamorela guwo yotxena. Bumwahaya Yehova adhe alabihedhege yoladdaniha ela wihina onihe wi dhothega dhehu podi othimihiwa ofiyedha iyo okala oweela, ekalaga ninga kannamuthegelege Yehova. Dhothega dhehu dhinoliganihiwa ni “mangawu.” (Mat. 6:12; Luk. 11:4) Bumwahaya kadda labo nnamuthegelihu Yehova enakala ninga mangawu ehu ennawenjhedhedheya. Mangawu ehu ehithabwa winjhiva, mbwenye Yehova anilevelela enakala ninga ohulevelela mangawu ninnihuna. Oliye kananikukusa oliva mangawu obe dhothega anilevelenliye. Ndala ninga muthu anahagalaliye mwaha oleveleliwa mangawu aye, nihiyoya nnohagalala vanlubale, Yehova alevelela dhothega dhehu! Namasugwera 02/25 epaddi 9-10 ddima 9-10

Ebaribari wi abaabi yuluvala enere ohowela nikavihero na aniwa, teto ahima owinjhiva enohagalala wakavihera makolo ewa. (1 Tim. 5:4) Mbwenye abaabi enamuroromela Yehova ehinona wi ohagalala webaribari, kunadha mwaha walela aniwa wihina mangwaana aliwa yuluvala aniwa yakaviherege ni korowa, mbwenye ohagalala wewa winadha mwaha wakavihera aniwa omulabela Yehova. (3 Juwa. 4) Abaabi mwahudhihaga aninyu makalelo owisamalela, mukale yotajhiha yewa wodhela wawoniha wi munomuroromela Yehova. Mwambele wahudhiha egaali ahimeene wi sapama oviheyana mabasa (Pro. 29:21; Efe. 4:28) Ohiya eyo, mwakavihere wihina yilibihedhege oskola. Teto sapama wasayela malagano a mBibiliyani wihina yakavihere aninyu werana dhothoma dhathotho wodhela muselu dha oskola. Mutholo weenyu okale wakavihere aninyu wihina yandege wisamalela ni wapara mabasa oolaleya. Yandeya aliwa podi okala apiyonero. Namasugwera 03/25 epaddi 30-31 ddima 15-16

Va Isaías kapitulu 65, Yehova onowoga makalelo yaakale egumi ya ale yaasakule okala parayizu oomuzimuni. ahinvethela namavuhulela Izayiya wihina alebe wodhela makalelo yakale egumi ya athu yaakalege mparayizuni oomuzimuni. Yovuhulela ela yambele wakwanenle yaka ya 537 M.W.O. Mudhidhi yole, majudewu yaali muudharini oBabiloniya, yahoboliwa wihina ehogolowele elabo yewa. Yehova ahireeliha nlogo naye ni ahakavihera ovenyihedha luwani yoJeruzale vamodha ni tempulu, waali mburo womwebedhamo Yehova. (Isa. 51:11; Zac. 8:3) Wakwanela wanabili wa yovuhulela ya Izayiya, obanjhe yaka ya 1919 M.W. adhaari a Yehova a malabo yala nuwoboliwa mBabiloniya Munlubale. Ni makalelo yala parayizu oomuzimuni obajha omwadheya elabo yatene yavati. Anamalaleya oOmwene ooviheya, obajha wiita mulogo dhowinjhiva ni obajha wooniha dhikalelo dheekiristawu. Athu yaali abure ni oowali vano ‘yahiwara emuthu exa, epaddusiwe ni efunelo ya Mulugu.’ Namasugwera 04/24 epaddi 20-21 ddima 3-4

Dhilabo dhimodha, ababi obe athu amodha eli apogo ehikanna mutholo womusayela muthu wi atelane ni mmudhiwa ali muddiye. Teto murudda dhimodha amudhi obe akwaye a muthu ali muddiye enomusayela muthu, yindo werana dhaatedhene enandiwa wihina aabilene egumane ni enonane wi epangane akala enere otelana obe naari. Akala we ohulobiwa wihina omukavihere ddibila obe murogola ali muddiye omusayela muthu anafuniye otelana, onohowela onona pamadhene dhikalelo kadda muthu wa aliwa anafuniye wi mamune obe mwadhiye akanne. Vano wamala onfwanya muthu oofwanelela, wilibihedhe onona pamadhene mweddelo waye, dhikalelo dhaye, teto enlubaleya akala dowithwelavo epaddi yomuzimuni obe naari. Kuddiwale wi okanna wandana wapama ni Yehova ethu yathima vanlubale opitha korowa, ohudhera wa vadhulu obe okala muthu ooreela. Teto kudduwale wi ddibila obe murogola ole ulobile wi onvedele muthu, dinna mutholo wosakula akala anere otelana obe naari ni muthu omusayenliwe. Namasugwera 05/24 epaddi 23 ddima 11

Teto iyo podi wakavihera ale enavevana wodhela osugwera makalelo ehu oowoga. Malabo mamodha podi okala yorusa omaalana muselu. (Pro. 12:18) Iyo podi ofunaga wawaddela athu amodha wi ddibila ni murogola ali muddiye ehambela ovevana. Kayakale yapama eyo, mwaha wihina aliwa podi ofunaga wawaddela athu amodha yekiwa wi enna ovevana. Teto kannahowela wawaba ni wawoga obure, mwaha wa dhothoma dhewa. (Pro. 20:19; Rom. 14:10; 1 Tes. 4:11) Ohiya eyo, kayakale yapama wawerana makoho obe owoga dhithu dhinaathukulele aliwa otelena mowaguva mwaha wowaddihedhiwa. Mbwenye ki akala athu abiili enothoma omariha omwenddi wewa, nnere ddi? Kayakale yapama wawerana makoho yahinanipatha obe osayela omunona anna nibili baani wihina omwenddi wewa omale. (1 Ped. 4:15) Ale enavevana yathoma omariha omwenddi wewa kinatapulela wihina omwenddi wewa kaweddile pama, mbwenye enatapulela wi omwenddi wewa ohakavihera werana yothoma yapama. Yothomaya podi okala otelana obe naari. Naarive dhigaali ndo, nnohowela wonelamo wi omariha omwenddi kahi ethu yokweya. Bumwahaya sathima wakavihera ale emarihile omwenddi wewa. Namasugwera 05/24 epaddi 31 ddima 15-16

Ethu enathabwa weeha nroromelo nehu ni enarusa ovilelana, bu mudhidhi mmudhihu obe mukwihu nnamudhivelihu athoma ohiya omulabela Yehova. (Sal. 78:40) Iyo naathabwaga omudhivela muthu yoola, enorusa vanlubale ovilelana widdelawa. Akala we onna ofwanyiwa makathamiho ninga yaala, ohudhera yopadduwa ya Zadoki enere wulibiha vanlubale. Oliye kaselele okala oororomeleya wa Yehova, mudhidhi mukwaye Abiyatar, nuuthoma okala ohiroromeleya. Teto eyo yapadduwe Davidi ahalaga neena nuukwa, Adoniya othoma okala mwene, naarive Yehova agaapaganyile onvaha Salomawu omwene. (1 Cró. 22:9, 10) Teto Abiyatar othoma omukavihera Adoniya wi akale mwene. (1 Reis 1:5-8) Ni makalelo yaala, Abiyatar ohiya okala oororomeleya, ohiya baahi ni Davidi vamodha ni Zadok, mbwenye ni Yehovaya. Yaka 40 mundduli Zadoki ni Abiyatar yahilaba vamodha ninga anamakutha. — 2 Sam. 8:17; 15:29; 19:11-14. Namasugwera 07/24 epaddi 6 ddima 4-15

Nikanne ebaribari wi nilibihedha okala mento wihina nnamorele muwehiwani yanthukulele werana yothega, nnere wawakela mareeliho owinjhiva. Naarive akala muthu erana yothega, anokanna ‘ohagalala wa mudhidhi vang’ono,’ iyo nihinona wi ohagalala webaribari winadha mwaha wawiwelela malamulo a Yehova. (Ebe. 11:25; Sal. 19:8) Mwaha wi Yehova anipaddusile wihina naharege malamulo aye. (Gén. 1:27) Namwiwelelaga Yehova nnokanna mubuwelo wapama ni ejhehedhelo yokalawo ni mukalakala mwilaboni exa. (1 Tim. 6:12; 2 Tim. 1:3; Juda. 20, 21) Ebaribari wi “mwiili oli wokwerebeyene,” mbwenye eyo kinatapulela wi kannahowela werana ethu-sithu wi nande ogonjhiha dhokwerebeyiha dhehu. Teto Yehova anere onivaha kopolo nnahowelihu wihina nande ogonjhiha dhokwerebeyiha dhehu. (2 Kor. 4:7) Ohiya eyo, kudduwale wi Yehova anonivaha kopolo dhohikala dha masika. Mbwenye nnohowela olabihedha kopolo dhehu wihina nigonjhihe dhoweha dhinanifwanya kadda labo, mwaha oyo mutholo wehu. Teto Yehova anere wawakula malobelo ehu wi nande owanana dhokwerebeyiha dhehu. (1 Kor. 10:13) Iyo kannanganyedha wi nnikavihero na Yehova, nnere wanda okala mento ni ogonjhiha yoweha si yoweha enanifwanya. Namasugwera 07/24 epaddi 19 ddima 19-21

Murumiwi Pawulo aamulebenle madhu ala eli yolebela ya peeno, mukwaye Timotiyu. Woona wihina Timotiyu aali namaholela mulogo, amwaddelaga makalelo owaweddiha ‘ale enerana yothega.’ Eyo enatapulela ddi? Eyo kinatapulela wihina addibila aatene ammulogoni enohowela onona makalelo weddile museluya. Mbwenye, podi wera awagana ale yaanonne museluya. Podi wera athu ayo yahimoona oliye eeragana yothegaya obe podi wera mudhidhi awogaga wihina gihithega aliwa yaali venvo. Anamaholela mulogo enowawithana athu ayo moviteya wihina yawaddele wi muthuya ohukaviheriwa. Malabo mamodha podi wera addibila owinjhiva ehinona yothegaya obe enere onona, yereya ndo podi wera athuya enahowela onona podi okala mulogo waateene. Bumwahaya anosakuliwa namaholela mulogo wihina aanusiyari wi ddibila obe murogola ohusumululiwa. Mwaha wa ddi? Ninga murumiwi Pawulo awogiliye: “Wihina amodha enerena emodhave” obe nere wihina amodha enaamorele yoweha emodhave. Namasugwera 08/24 epaddi 23-24 ddima 16-17

Iyo nohowela odidela wapara mabasa a Yehova nuviheya ofiyedha omakuthulo. Makiristawu oothikitheliwa enohowela okala mento yegi “ethukuliwe” ni Yesu wihina emwakele padamari ewa odhulu. (Mat. 24:40) Makiristawu oothikitheliwa eli ethakwithakwive wihina ‘etugumanihiwe’ ni Yesu odhulu. Koddo ya Armajedo yavira, makiristawu ale oothikitheliwa enakale muteliwi a Yesu vamatelo a mwana nimbila. (2 Tes. 2:1) Mudhidhi Yesu anafuniye watoriha athu ohaddamela, mbwenye iyo kannahowela woova. Nadidela okala oororomeleya wa Babihu oodhivela Yehova, oliye anere onivaha “kopolo dhohikala dha masika” wihina nande “wimela txithi vamentoni va Mwaana Muthu.” (2 Kor. 4:7; Luk. 21:36) Naarive akala ejhehedhelo yehu sodhowa odhulu obe okala velaboni yavati, aatene iyo nafuna nimuhagalase Babihu Yehova wodhela opwasedha ovuruwana dhoxagiha dhinafwanyeya mu nladdaniho asorihile Yesu. Teto mwaha wa opama wohinifwanelela wa Yehova, mandina ehu enere ‘olebiwa mulivuruni’ neegumi. — Dan. 12:1; Ovuhu. 3:5. Namasugwera 09/24 epaddi 24-25 ddima 19-20

We podi okanna murenddele. Ni makalelo baani? Okanne elemelelo yowubuwela dhithu dhapama onniwena ni mareeliho Yehova anuvahiiye. Ohiya eyo, ale yahinamulabela Yehova, enaroromela dhithu elabo ela enavahiwa, mwaha wi kinna ejhehedhelo wa dhithu nnafunihu wakela osogolo. Mbwenye Yehova anowukavihera ovanene ni anopaganya wureeliha osogolo mwamakalelo wahinandiwe wubuwela. (Sal. 145:16) Teto kubuwela, we kunonne makalelo yafuna okala egumi yawo peeno, wahere werana yothoma yohiyana ni ele weriliwena ogaali muzombwe. Mbwenye ebaribariya siila, ole anerana yothoma mwaha wa odhivela onniyena ni Yehova vamodha ni aathu, anere okanna dhithu dhinamuthukulela okala muthu ohagalala. Namasugwera 10/24 epaddi 27 ddima 12-13