Anamaholela mulogo enowilibihedha otajhiha thagaraga dha Yehova yadhowaga owoga ni muthu akumihiwe mmulogoni. Motajhiha, Yehova kajhehile amwaana Ezarayeli othwaruwa wi aakavihere, mbwenye Yehova aali obajha naarive ehoonihile wi ehithwaruwa. Yehova ahiwoga ni Ozeya wihina amulevelele ni amuhogolowele mwadhiye,naarive oliye ahithwaruwile. Nimakalelo yala, Yehova woniha nlogo naaye wihina oofuna olevelela. (Ose. 3:1; Mal. 3:7) Ndala ninga Yehova, anamaholela mulogo enofuna wihina muthu atheegile athwaruwe ni ahogolowele mmulogoni, aliwa kinaarusihe dhithudha ninga eliwa yorusa wa namathegaya. Munowubuwela nladdaniho na mwaana adduddumandhe vaade, Baabi ole nuumona mwanaye ahogolowelaga vaade oliye “omuthamagela, omukubarela ni ombejari.” (Luk. 15:20) Baabi ole kajhehile mwanaye omuloba nikurumuwelo. Oliye aali obajha omukavihera. Baabi odhivela eere werana emodhave ahamoone mwanaye adduddumadhe ahogolowelaga vaade. Namasugwera 08/24 epaddi 28 ddima 7-8

Ninga enawogela yolebela ya peeno, Yehova anonivaha thotho. Madhu ala enowoniha wihina Yehova kanakalela nrima thotho dhaye, ohiya eyo, oliye anowavaha athu aatene enamuloba. Teto yolebela ela enowoniha wihina Yehova avahaga thotho dhaye, oliye anowerana eyo ‘ahimwimanne muthu’ obe ahimotorihile.’ Yehova kanafuna wihina iyo noovege omuloba thotho. Mwebaribareene oliye anonikongomedha omuloba thotho dhaye. (Pro. 2:1-6) Iyo podi omutajhiha Yehova wodhela wawaddela athu amodha dhithu nnonnihu. (Sal. 32:8) Nlogo na Yehova nihikanna ofuru munlubale yowawaddela athu amodha dhithu enahudheriwa. Motajhiha, iyo nnowaxagiha anamalaleya axa wihina yandege wapara pama mabasa oolaleya. Teto nuuvilela anamaholela mulogo enowaxagiha adhaari ookavihera ni addibila emanle obaddiziwa wihina yandege wakwanihedha mutholo dhewa dha mmulogoni. Addibila enonne wapara pamadhene mabasa oomaga ni oosamalela Nyumba Dhomwene, enowaxagiha ale eli axa onona wapara pama mabasa ala oomaga Nyumba Dhomwene dhinalabihedhiwege wihina athithimihiwegemo Yehova. Namasugwera 09/24 epaddi 28-29 ddima 11-12

Addibila, wihina mukale anamaholela mulogo munohowela okala ‘Athu ehinna muladdu.’ Eyo enatapulela wihina we ohukanna ekalelo yapama mmulogoni, mwaha kaavo anuwinkedhe wodhela ethu yabure. (1 Tim. 3:2) Ohiya eyo, onohowela ‘ononiwa ninga muthu apama naathu ode.’ Ebaribari wi athu amodha podi wuteyaga mwaha we okala mukiristawu. Mbwenye kaavo anahowela wanganyedha akala we oli oororomeleya ni akala oli muthu apama. (Dan. 6:4, 5) Wikohe, “miyo ginoniwa ninga muthu apama naaddibila vamodha ni athu oode?” Akala we ‘onodhiveliwa opama,’ mwebaribarene onerege osayela dhikalelo dhapama dha athu amodha ni onerege watamalela mwaha wa dhikalelo dhewa dhapama. (Titu 1:8) Teto onohowela waweddiha athu amodha nuupama, malabo mamodha wodhela werana dhithu aliwa yahajhehedhiwa. Mwahaya bwaddi sathima addibila anafuna okala namaholela mulogo odhiveliwa opama? Mwaha enere wakavihera olabihedha mudhidhi wewa wowinjhiva yakukulaga mambila a Yehova ni wakwanihedha mutholo dhewa nuuhagalala. (1 Ped. 5:1-3) Naarive eyo yahile ethu yokweya, aliwa enohagalala vanlubale mwaha wakavihera amodha. — Dho. 20:35. Namasugwera 11/24 epaddi 20-21 ddima 3-5

Adhaari ookavihera, addibila enaapara mabasa athima mmulogoni. Murumiwi Pawulo owavaha thima alobwana ala oororomeleya. Motajhiha, alebelaga karta addibila ooFilipo, oliye wavahedhela malojhelo adhaari ookavihera ni anamaholela mulogo. (Fil. 1:1) Addibila owinjhiva ebaddiziwe enna yaka dhohiyana-hiyana, enohagalala mwaha okavihera mulogo ninga adhaari ookavihera. Motajhiha, ddibila Devan athomiwe ninga mudhaari ookavihera aganna yaka 18. Vano ddibila Luis athomiwe ninga mudhaari ookavihera aganna yaka 50. Ddibila Luis anowoga eegi: “Miyo ginohagalala vanlubale okanna oneti wokavihera mulogo ninga mudhaari ookavihera, thabwathabwa gubuwelaga odhivela enagoniha addibila!” Mwebaribarene adhaari ookavihera owinjhiva enowoona odhivela waddibila ndala ninga ddibila Luis. Akala we ohubaddiziwa ni kunathi othomiwa ninga mudhaari ookavihera, ononamo aavi okanna yoluba ela? Namasugwera 11/24 epaddi 14 ddima 1-3

Mwene Ezekiya ooJuda aganna yaka 39, oliye onona wi ahikanna oredda wahanna murombwe. Vano Yehova omuruma namavuhulela Izayiya wihina amwaddele mwene Ezekiya wi eere ookwa mwaha wa oredda anniyena. (2 Reis 20:1) Mwaha wa oredda anna mwene Ezekiya, oliye iwoona ninga kanna ejhehedhelo yoovulumuwa. Oliye nuwiwa muselu ole awogile namavuhulela Izayiya, obajha wunla vanlubale. Nuwindo mwene Ezekiya olobela wa Yehova nuviheya. Vano Yehova numoona mwene Ezekiya alobelaga mwaha wa oredda ole, Yehova omweddela thagaraga ni owoga eegi: ‘Gihiwa nlobelo nawo ni gihoona mitori dhawo. Bumwahaya ginere wuvulumusa.’ Yehova omweddela thagaraga mwene Ezekiya ni ompaganya amulabihedhaga namavuhulela Izayiya, wihina eere omwenjhedhedha mwana yaka ngasi-ngasi ni eere omoobola Jeruzale mmadani mwakudda Asiriya. (2 Reis 20:4-6) We onna owanana oredda ononiwe wi kunadha ovulumuwa? Akala oni hee! Olobele wa Yehova naarive wunlaga ni ohandaga owoga ethu-sithu. Bibiliya ononipaganya wi “Baabi a thagaraga ni Mulugu ootodola watewene” anere onitodola mmakathamihoni mwehu mwatemwene. — 2 Kor. 1:3, 4. Namasugwera 12/24 epaddi 24 ddima 15-17

Kubuwela ohagalala onakanniwena mwaha wawakela anookwa! Kubuwela makalelo enakaliwa yapama woona dhithu dhowinjhiva apaddusile Yehova ni ohudhera ni dhopaddusa. (Sal. 104:24; Isa. 11:9) Teto yathimaya, nnerege omulabela Yehova nahinna ethu-sithu yowivahana nibili! Nerege nnohowela wawakakaniha mareeliho ala aamateene enadha osogolo ni ‘ohagalala wa mudhidhi vang’ono wa yothega?’ (Ebe. 11:25) Naari! Egumi yohagalasa nnafunihu wakela osogolo, kinaligana newene kinaddamela ni ethu-sithu nnakannihuna mwilaboni muna. Kudduwale ela: Parayizu kannakalegeve mpaganyo najhehedhihu omwaakela osogolo, mbwenye nere ofiya nlabo nnakalegihu mparayizu malabo maatene. Eyo enere wenyeya mwaha Yehova anonidhivela ni ofiyedha onipelekela mwanaye anamudhiveliye! Namasugwera 01/25 epaddi 29 ddima 12

Livuru na Eberewu nnowawoga athu owinjhiva yamuroromela Yehova. Mmodha waaliwa anasorihiwa di Moyizeji, anna nroromelo nooliba. (Ebe. 3:2-5; 11:23-25) Moyizeji kaathukule manyazo, mwaha wihina Yehova ahavaha yoojha ni manjhe amwaana Ezarayeli mwamakalelo ootikiniha. Nimakalelo yaala, amwaana Ezarayeli yahanda okala mwiddeddereni mune mwahaali manjhe newene yoojha. (Êxo. 15:22-25; Sal. 78:23-25) Naarive Moyizeji amuroromelaga vanlubale Yehova, oliye wambela wikoha akala Yehova eere wanda wakwanihedha mpaganyo ole. Mwaha wihina amwaana Ezarayeli yahithabwa winjhiva, teto mwiddeddereni mune kamwali yoojha Wihina aakule nikoho anna Moyizeji, Yehova omukoha eegi: ‘Onubuwela wihina nlada na Yehova nihithabwa okwiiva?’ (Núm. 11:21-23) Ni madhu mamodha Yehova afuna amwaddele Moyizeji eegi: ‘We onubuwela wi miyo kaginanda werana ele ginapaganyimi?’ Namasugwera 03/25 epaddi 26 ddima 1-2

Nerege yere okala yapama owoga wi kadda ethu epadduwile mudhidhi wa mutokora, ehikanna yotapulela wa dhithu dhinafuna opadduwa osogolo? Yowakulaya sowihina naari. Mwaha Bibiliya kanawoga. Ebaribari wi Yesu ohuliganiha “malabo a Nowe” ni mudhidhi ola nnakalihu. Mbwenye oliye kawogile wi dhithu dhaapadduwile mudhidhi wa Nowe ninga ofugiwa wa musiwo wa mwanddeya were okanna wakwanela wewa osogolo. Ddiniyani Nowe eriliyena nuwiwa ndhe Yehova awogiliye wodhela mutokora? Oliye ahoniha wi ahikanna nroromelo wodhela osasanya mwanddeya. (Ebe. 11:7; 1 Ped. 3:20) Nimakalelo mamodhave, athu yavuruwana muthenga wapama wOmwene, enohowela oparihedha mabasa dhithu enahudheriwa. (Dho. 3:17-20) Murumiwi Peduru ahimwithana Nowe ninga ‘namalaleya a muselu dhowogowa.’ Peeno iyo nnowalaleya athu owinjhiva wapela elabo yaatene, teto nnowerana eyo nuuviheya. Mbwenye naarive nilibihedhaga vanlubale, iyo kannande waalaleya athu aatene omakuthulo wahinathi ofiya. Namasugwera 05/24 epaddi 9-10 ddima 4-5

Nnohowela osayela makalelo owaweddiha nuupama ni waariha ale yandanne ni Yehova. (Rom. 12:10) Makalelo mamodha owathithimiha ale enna wandana ni Yehova, enasorihiwa va yolebela emodhave ya Salmo 15:4. Muthu ali muleddo muddammwani mwa Yehova, ‘kanahiya werana ele alibeliye, naarive aganonne wi enere omutotela makathamiho.’ Nahakwanihedhaga ndhe nipaganyilihu, eyo podi wawukula athu amodha. (Mat. 5:37) Motajhiha, Yehova anajheha wi anamatelana yakwanihedhe mpaganyo yeriliwana nlabo na matelo ewa. Teto Yehova anohagalala vanlunbale awoonaga ababi yilibihedhaga wihina yakwanihedhe mpaganyo enawereliwa aniwa. Mwaha womudhivela Yehova ni athu amodha, iyo nnere wilibihedha wihina nerena ele nnandihu, wi nakwanihedhege mpaganyo dhehu. Makalelo mamodha owathithimiha ale enna wandana ni Yehova, fuudhela okala athu oovaha ni anamakela aleddo. (Rom. 12:13) Ojha mudhidhi naaddibilihu nakala mmutugumanoni ni mmalaleyelo, winere onikavihera olibiha wandana ninnihuna ni Yehova vamodha naaddibilihu. Ohiya eyo, mwaha okala anamakela aleddo, nnomutajhiha Yehova. Namasugwera 06/24 epaddi 12 ddima 15-16

Yehova anaahudhiha ebaribari ale ali owiyeviha. (Mat. 11:25) Teto iyo nandile ohudhera ebaribari, mwaha okala athu owiyeviha. (Dho. 8:30, 31) Naarive dhigaali ndo, nnohowela okala pasope wihina nihikale athu owithukula. Mwaha wihina nabajha withukula, iyo podi wambela wubuwela wi mubuwelo wehu bwathotho, opitha malagano a mBibiliyani ni dhoholela nnakelihu munikuruni mwa Yehova. Negi ndhowegeve nikalaga athu owiyeviha, nnohowela ohidduwala wi kanili ethu niliganiha ni Yehova. (Sal. 8:3, 4) Teto iyo podi olobela wa Yehova nimulobaga wihina anikavihere okala athu owiyeviha ni orumedha ohudhihiwa nuliye. Yehova anonihudhiha makalelo anubuweliye wodhela omulabihedha Bibiliya nnikuru naaye. Teto oliye anere onikavihera ovaha thima makalelo aye owubuwela, ohiya mubuwelo wehu. Wamwilerigi Bibiliya, opwasedhege woona makalelo Yehova anavahiye thima wiyeviha ni aniddiye withukula. Teto wakela mutholo bu mutholo munikuruni mwa Yehova, wilibihedhe okala muthu owiyeviha. Namasugwera 07/24 epaddi 10 ddima 8-9

Okuma yaka ya 1919, Yesu anolabihedha nikuru ning’ono wihina awegeredhe mabasa oolaleya ni wavaha yoojha yomuzimuni anamahara aye mudhidhi wofwanelela. (Luk. 12:42) Mwebaribarene nnowanda woona pamadhene wihina Yehova anna wareeliha mabasa enapariwa ni Nikuru Nolamulela. (Isa. 65:13, 14) Nahere nihikala owegeredheyene, kanande wapara mabasa oolaleya anihiyedhile Yesu. (Mat. 28:19, 20) Kubuwela yahere addibila yahegeredhile murudda wihina nilaleyege, mwaha wa yeyo kadda muthu aalaleyege mburo anafuniye. Teto murudda dhimodha dherege olaleyiwa dila dhowinjhivadhene ni addibila ohiyanahiyana, mbwenye murudda dhimodha kadhalaleyiwege. Onowawubuwela mareeliho mamodha nnawakelihu mwaha okala owegeredheyene? Ndala ninga Yesu awegeredhiliye anamahara aye mudhidhi agaali elabo yavati, oliye anowerana emodhave peeno ni nlogo na Mulugu. Namasugwera 04/24 epaddi 8-9 ddima 2-4

Kayini aali mwaana oobajha a Adawu ni Eva. Ninga iyo aatene Kayini ahivalihiwa yothega ni makolo aaye. Bibiliya anihina: ‘dhowera dhaye dhaali dhabure.’ (1 Juwa. 3:12) Podi wera siyeyo yamuthukulele Yehova ‘ohuhagalala ni Kayini newene ni mukutho waye.’ Ohiya osaddula ekalelo yaye, ‘Kayini onyanyuwa ni okala owuukuweene.’ Ethu baani eerilena Yehova wihina amukavihere? Yehova othapanya ni Kayini. (Gén. 4:3-7) Moone wihina Yehova ahipendda ni Kayini egi eerana dhithu dhapama Yehova eere omureeliha. Teto Yehova ahiwoga dhithu dhaampadduwele adidela werana dhithu dhabure. Mowukuula, Kayini kaavuruwane, oliye kafuna onvuruwana Mulugu ni kafuna othwaruwa. Mwebaribarene Yehova ahithabwa wukuuwa. Nerege mwaha wa yeyo, Yehova ohuthoma ohumukavihera muthu di muthu ofiyedha othwaruwa? Naari! Namasugwera 08/24 epaddi 10 ddima 8

Amwaana Ezarayeli yahikanna monelo wapama wodhela osogolo. Ni mareeliho a Yehova, aliwa yere okala mudhidhi wowinjhivene elabo yathomeliwiwa ovahiwa ni Yehova. Elabo ele yaali yapama ni dhokuma dhoojha dhowinjhiva! Teto Moyizeji ahileba makalelo yaali elaboya egihina: munere ofwanya ‘nyumba muli dhithu dhowinjhiva dhapama muhulabelinyu, matxela muhatimbinyu, mundda dha uva ni dha olivera muhudhalilenyu.’ (Deut. 6:10, 11) Ohiya eyo, Moyizeji ahawaddela amwaana Ezarayeli ethu yahoweliwa werana yahafune okala elabo yothomeliwa mudhidhi wowinjhivene. Oliye wakongomedha wi ‘esakula egumi’ wodhela odidela omwiwelela Yehova ni ‘oparihedha mabasa’ ndhe yavuruwaniwa. (Deut. 30:20) Mbwenye amwaana Ezarayeli kayafuna omwiwelela Yehova, bumwahaya nuuvira mudhidhi Yehova weenya wihina akudda Asiriya ni vasogolova aBabiloniyu wathukula ninga adhaari. — 2 Reis 17:6-8, 13, 14; 2 Cró. 36:15-17, 20. Namasugwera 11/24 epaddi 9 ddima 5-6

Anyagereja owinjhiva, enorumedha wi enere ovuluwa mwaha “emurumedha Yesu” ni orumedha wi Yesu di namavulusa ewa. (Juwa. 6:29) Mwebaribarene ohiya omurumedhave Yesu, enohoweleya werana ethu emodha. Mwaha oGalileya wahikala athu yamurumedha Yesu, mbwenye vasogolova aliwa ohihiya omuhara. Ddiniyani yathukulenle ohiya omuhara Yesu? Athu owinjhiva yamuhara Yesu mwaha oliye wavaha ele yafuniwa. Aliwa yafuna ovulumusiwa, ojha ni wiwa ele yafuniwa baahi. Mbwenye Yesu wawoniha wi aliwa yohowela werana ethu-sithu wi ekale anamahara aye. Yesu wawonelihamo wi kadhele velaboni yavati wihina aavahe baahi ele yafuniwa, mbwenye yohowela “odhowa wa oliye,” obe nere, ovuruwana ndhe ahudhihiye ni oparihedha mabasa mwigumi mwewa. — Juwa. 5:40. Namasugwera 12/24 epaddi 12 ddima 12-13

Ddiniyani enaamukavihere mulobwana atenle omuriha mwariye? Makalelo apama omuriha mwariye fuudhela wilibihedha omutajhiha Yesu. Makalelo oliye aweddihiye anamahara aye, yotajhiha yapama wi alobwana etenle eharege. kabeni noone makalelo alobwana etenle enafuniwa omutajhiha Yesu wodhela makalelo awogiye ni aweddihiye anamahara aye. Yesu owaweddiha anamahara aye ni nriho vamodha nuupama. Oliye kaali abure newene kiwona ninga namathonga. Naarive agaali Nabwiya ni namahudhiha, oliye kaalabihedha owedha waye wihina awonihe goyi anamahara aye wi emoovege. Ohiya eyo, Yesu owapara mabasa ni owakavihera anamahara aye. (Juwa. 13:12-17) Labo dhaala, oliye ahiwoga ni anamahara aye eegi: “Muhudhere ni miyo, mwaha wi gili oopwaseya teto murima waga bowiyeviha, mwindo murima dhenyu dhinere otodoleya.” (Mat. 11:28-30) Yesu aali muthu oopwaseya. Muthu oopwaseya kahiyo oolodhowa, ohiya eyo oliye ohukanna kopolo ni anowanda wisugwera. Naarive agaali ootakaleliwene, oliye anakala oopwaseyene ni onowanda wisugwera aaligiwaga. Namasugwera 01/25 epaddi 10 ddima 10-11

Mwebaribarene mudhidhi nnaddameligihu omakuthulo wa elabo, makathamiho enerege othabwa. Mwaha elabo enna othabwa ogaweya mwaha wa pulitika, ohiwanana, ngovi ni mutipa dhohiyana-iyana dhinakumelela malabo yaala. Teto dhithu ndha podi onithukulela ohikanna korowa, wayelela mabasa obe wubuwelaga otamela mburo mmodhaya. Wihina odidele osamalela emudhaawo dhaapadduwaga dhithu ninga ndha dhisorihiwe, enukavihere ddi werana dhothoma dhapama enoniha wi onororomela nlada na Yehova Ethu yobajha nnahowelihu werana ni enakavihera, fulobela wa Yehova nimwaddelaga dhithu dhatedhene dhinanithuwathuwiha. Teto iyo podi olobela wa Yehova nimulobaga wi anivahe thotho wihina nande werana dhothoma dhapama ni omuloba wi anikavihere okurumusa murima wehu wihina ‘nihithabwege othuwathuwa.’ (Luk. 12:29-31) Ohiya eyo, nikanne elemelelo yoolobela wi nihagalalege ni dhithu ninnihuna. (1 Tim. 6:7, 8) Teto nisayelege mmalivuruni mwehu wihina nnone makalelo oowawanana makathamiho oohukanna korowa. Musayitini mwehu jw.org muhukala vidiyu ni artigu dhinawoga wodhela muselu ola wohikanna korowa ni makalelo wakaviheriwa athu owinjhiva. Namasugwera 03/25 epaddi 28-29 ddima 10-11

Nuuvira mudhidhi, Peduru wooniha wihina oofuna okanna mubuwelo wa Yehova. Oliye ahonelamo eyo, Yehova numuruma wihina aalaleye athu yahaali maJudewu, obe neere, athu yahakosa epaddi ya nlogo na Mulugu wihina vano ekosege epaddi ya nlogo na Mulugu. Motajhiha, naarive Korneliyu ahili muJudewu, Yehova omuthoma Peduru wi amulaleye wihina akale mukiristawu. Ohiya eyo, Korneliyu aali oobajha olaleyiwa ninga muthu ahaali muJudewu wihina akale mukiristawu. Teto mudhidhi yoole maJudewu kayitaganyiha ni aale yahaali maJudewu. Bumwahaya wihina Peduru ande omulaleya Korneliyu, ohowela osaddula mubuwelo waye. Yehova nuumukavihera Peduru woonelamo efunelo yaye, oliye osaddula mubuwelo waye wodhela athu amalogo ni odhowa omwaredhela Korneliyu “ahikooddile.” (Dho. 10:28, 29) Vano yokumelelavoya sowihina Peduru ahanda omulaleya Korneliyu ni emudhi yaye yaatene. Mwaha wa yeyo, aatene obaddiziwa. (Dho. 10:21-23, 34, 35, 44-48) Nuuvira yakadhene, murumiwi Peduru wakongomedha makiristawu wihina ‘ekanne mubuwelo mmodhave.’ (1 Ped 3:8 nota.) Iyo podi okanna mubuwelo oyo wodhela ohudhera mBibiliyani makalelo owubuwela a Yehova ninga anawogela Bibliya. Namasugwera 03/25 epaddi 9-10 ddima 7-8

Makalelo owubuwela aathu amwilaboni, onna odhowave othabwaga ohiyana ni mubuwelo wa Yehova. (Pro. 17:15) Bumwahaya, sathima onona mubuwelo ola wabure wihina nande osukuma. Kanenye wihina muthu di muthu anikwerebeyihe ni anihihe omulabela Yehova. Murumiwi Pawulo ahakongomedha makiristawu yaali meberewu withwelavo epaddi yomuzimuni. Teto ni iyoya, nnohowela ohara yolaga emodhave. Negi nande okala makiristawu owithwelavo epaddi yomuzimuni, nnohowela omuhudhera Bibiliya pamadhene wihina nimunone Yehova ni makalelo aye owubuwela. Teto naarive nigabaddiziwe, nnohowela odhowagave niithwelagavo epaddi yomuzimuni. Ohiya eyo, naarive nigaali mwibaribarini muwari mwa yaka dhowinjhivadhene, iyo aatene nnohowela odidela omwileri ni omuhudhera Bibiliya malabo aamateene. (Sal. 1:2) Okanna elemelelo yomuhudhera Bibiliya, enere onikavihera olibiha nroromelo nehu, eli ekalelo murumiwi Pawulo anathabwiye osoriha va karta aalebenliye meberewu. — Ebe. 11:1, 6. Namasugwera 09/24 epaddi 10 ddima 7-8

Enere okala ethu yokweya okalave oororomeleya wa Yehova, namonaga ninga muthu. Siyeyo yapaddunwe ni Juze. Oliye ahikoodda wawerana mararuwo, mwaha ahinona wi eyo yeere omuukula vanlubale Yehova. (Gén. 39:9) Akala nnafuna nimonege Yehova ninga muthu, nnohowela opatha mudhidhi wi nthapanye nuliye ni omuhudhera Bibiliya. Nerena ndo, wandana wehu ni Yehova, onerege oliba kadda labo. Vano, ndala ninga Juze, nakanna wandana wooliba ni Yehova, kanneregena dhithu yamukule Oliye. Ale enadduwala wi Yehova muthu, podi warusa okalave oororomeleya wa Yehova. Kasugwa yapadduwe ni amwaana Ezarayeli mudhidhi egaali mwiddeddereni. Aliwa yahinona wi Yehova ohukalawo, mbwenye aliwa wambela wanganyedha akala Yehova eere wasamalela. (Êxo. 17:2, 7) Yokumelelavoya sowihina amwaana Ezarayeli omurugunuwela Yehova. Iyo kannafuna okala athu oohiwelela, ndala ninga amwaana Ezarayeli yamurugunuwele Yehova. — Ebe. 3:12. Namasugwera 06/24 epaddi 24 ddima 14-15

Iyo nnakalawo mudhidhi wothabwa orusa, eli malabo ookuthula. Mwaha wa yeyo, nnerege ofwanyiwa makathamiho othabwa orusa enanthukulelege wunla. Yehova anowoona mitori dhehu dhaatedhene ni anowukuwa anonaga nunlaga. Mitori dhehu sathima vamentoni va Yehova mwaha dhinowoniha wi nnomuroromela, naarive nifwanyiwaga makathamiho. Bumwahaya wafwanyiwaga makathamiho, olobele wa Yehova onfugulelaga murima wawo, ojhege mudhidhi naaddibila ni arogola, omwilerigi Bibiliya wihina otodoliwe ni wafwanye madhu okurumusa a Yehova. Teto okanne ebaribari wihina wadidela ovilela ni omuroromela Yehova, oliye anere wureeliha. Teto mareeliho anafuna wuvaha Yehova onovolowelavo mpaganyo anafuna wakwanela mohilegela. Ohiya eyo, Yehova anere ofufutha mitori dhaatedhene dhinadha mwaha wa goyi. (Ovuhu. 21:4) Mudhidhi oyo wafiya, nnere wunla, mbwenye kinakale mwaha wa makathamiho, enakale mwaha wohagalala. Namasugwera 12/24 epaddi 20 ddima 3; epaddi 25 ddima 19

Yehova ohunisakula wihina nikale Anamoona aye. Teto Oliye ohunipaganya wihina anere onikavihera okala athu ooliba murima. (Isa. 43:10-12) Nnere woona makalelo mannayi Yehova ananikaviheriye wihina nikale athu ooliba murima. Makalelo oobajha, Yesu anakala ni iyo mudhidhi wamutene naalaleyaga muthenga dhapama. (Mat. 28:18-20) Anabiili, Yehova ohathoma angero wihina enikavihere wapara mabasa oolaleya. (Ovuhu. 14:6) Anatharu, Yehova anonivaha muzimu wotxena wihina nandege wubuwele dhithu nihudherihu. (Juwa. 14:25, 26) Anennayi, nnokaviheriwa ni addibilihu nnakalihuna naaparaga mabasa oolaleya. Nnikavihero na Yehova ni naaddibilihu, iyo nihikanna dhaatedhene nnahowelihu wihina nidhowegeve naaparaga mabasa oolaleya. Onakala ookwerebeyene wahafwanyaga athu mmavaade mwewa murudda onalaleyiwe? Akala siyeyo sapama wikoha: ‘Athu a murudda waaga eli wuuvi mudhidhi yola?’ (Dho. 16:13) Akala siyeyo, ononamo aavi olaleya murampani wihina wande othapanya ni athu owinjhiva? Namasugwera 04/24 epaddi 17 ddima 10-11

Akala we ohutela ni onofuna okala namaholela mulogo, emudhi yawo enohowela okanna ekalelo yapama. Bumwahaya, ‘onohowela osamalela pama emudhaawo.’ Obe onohowela wooniwa ninga muthu apama anonne osamalela emudhi nuudhivela vamodha nuupama. Teto eyo, enatapulela ojhiha emudhaawo epaddi yomuzimuni. Akala oli baabi, onande aavi wahudhiha anawo wihina ‘ekale ooleleya ni oowiwelela?’ (1 Tim. 3:4) Onohowela waxagiha ni wahudhiha anawo nuudhivela. Ebaribari wi onofuna vanlubale wihina anawo ekale oohagalala ni yaredhege ninga ahima amodha, mbwenye makalelo onaxagihiwe, winere wakavihera aliwa okala ahima oowiwelela, anriho ni ooleleya. Ohiya eyo, onohowela wilibihedha wihina wakavihere anawo okanna wandana ni Yehova, wahara malagano a mBibiliyani ni wunnuwelavo epaddi yomuzimuni ofiyedha obaddiziwa. Namasugwera 11/24 epaddi 22 ddima 10-11

Naamulabelaga Yehova nuviheya, nnowona nikavihero ananivahiye, teto yokumelelavoya sowihina nroromelo nehu nooliba (1 Kor. 3:9) Kudduwale, Yehova kanaliganiha nde onandiwe werana ni enerana addibila amodha, mwaha Yehova anasugwa ndhe dhili mmurimani mwawo. Yehova anohagalala uwoonaga omutamalelaga mwaha wa mukono wathima anivahiliye, eli yowobola. (1 Sam. 16:7; Mar. 12:41-44) Mwaha wa yowobola, peeno nooleveleliwa dhothega dhehu, nnokanna wandana ni Yehova ni nihikanna ejhehedhelo yowakela egumi yohimala. Bumwahaya kadda labo nnafuna nimutamalele Yehova mwaha odhivela waye, omuthukulele onivaha mareeliho ala aamateene (1 Juwa. 4:19) Ohiya eyo, nnafuna noonihe wi nnomutamalela Yesu anidhivele ofiyedha onikwela! Namasugwera 01/25 epaddi 31 ddima 16-18

Kubuwela madhu enafwanyeya va Salmo 73. Salmista ola ahawoona athu yanna egumi yapama, yahathuwathuwela ethu ni yaali oreela, mbwenye kayamulabela Yehova. (Sal. 73:3-5, 12) Yakala ninga athu yaala, dhewa dhanna waweddela pama mwigumini mwewa. Eyo yahimuthukulela oliye wubuwela wihina wilibihedha waye wi amulabele Yehova waali ebewene. Mubuwelo ola womukwerebeyiha ni ‘womutotela makathamiho ‘malabo aamateene’ mwigumini mwaaye. (Sal. 73:13, 14) Ddiniyani oliye eriliyena wihina agonjhihe mubuwelo ola wowanganyedha? Salmista ole odhowa otempulu mwa Yehova. (Sal. 73:16-18) Nufiya wule, nupwaseya oliye wubuwela pama. Vano wonelamo wihina naarive athu ale aganna egumi yapama, aliwa kayanna ejhehedhelo yosogolo. Nuwubuwela ndo, oliye okanna murenddele. Teto ahonelamo wihina ompweha Yehova mburo wobajha, yaali yothoma yapama eriliyena. Mwaha wa yeyo, oliye othoma odidela omulabela Yehova. — Sal. 73:23-28. Namasugwera 10/24 epaddi 27 ddima 11-12

Yehova ohunisakula wi nikale “anamoona” aye. (Isa. 43:10-12) Yaka dhamundduli, karta dhaala na Nikuru Nolamulela nawoga negi: “Oneti munlubale aatene iyo ninnihuna fuwithaniwa Namoona a Yehova.” Mwahaya bwaddi nigawoga ndo? Kubuwela yoladdaniha ela: Ahere we ofuna omusakula muthu wi akale namoona awo otiribunale, mwebaribarene were omusakula muthu onamuroromeliwe ni anoniwe ninga muthu apama ni oororomeleya. Siyeyo Yehova eriliyena, mwaha onisakula ninga anamoona aye enowoniha wi Oliye ohunnona pama ni anororomela wi nnere wanda wawaddela athu wihina oliyeene baahi dili Mulugu eebaribari. Mwebaribarene okala namoona a Mulugu ehu Yehova oneti winlubale ninnihuna, bumwahaya nnafuna nipathe ofuru waatene nnakannihuna wi nawaddele athu amodha ndina na Yehova ni wihina dhithu dhaatedhene dhinawogiwa wodhela oliye sowoota. Neragana eyo, nnowawoniha athu aatene wi mwebaribarene nili Anamoona a Yehova! — Rom. 10:13-15. Namasugwera 05/24 epaddi 18 ddima 13

Ethu yathabwa omuhagalasa Yesu yaali wakavihera athu amodha. Motajhiha, ohiya wahudhihave, Yesu ahakavihera athu ale mwamakalelo mamodha. Yesu ahisamalela muthithi ole waathu epaddi yomwilini. Labo nenne, Yesu ahawerana matikiniho wodhela wenjhedhedha pawu ni oba ni waruma anamahara aye wihina yagawele athu yafwanyeya mburo yoole. (Mar. 6:41) Ni makalelo yaala, Yesu ahahudhiha anamahara aye makalelo owakavihera athu amodha. Teto ahahudhiha wi sathima wakavihera athu amodha ni ndhe enandiwa werana. Kubuwela ohagalala yanna anamahara ale nuumukavihera Yesu wi yagawele dhoojha athu aatene ofiyedha ojha ni orubala!” (Mar. 6:42) Ela kayaali dila yobajha Yesu opweha mburo wobajha efunelo yaathu amodha. Oliye aherana eyo, egumaye yaatene agaali velaboni ela yavati. (Mat. 4:23) Yesu ohagalala vanlubale mwaha wahudhiha ni wapara mabasa owiyeviha. Namasugwera 11/24 epaddi 16 ddima 10-11

Woona wihina ‘malabo ala ookuthula’ nnakalihu, dhithudha dhinerege othabwa orusa, nnere ohowela wakavihera addibilihu. Mbwenye ohiya wakavihera ni dhithu dhomwilini baahi, nnohowela walibiha ni wooniha wi nnowadhivela. Makalelo apama owalibiha fuudhela othapanya ni aliwa nakala mmutugumanoni ni watodola yahowelaga. Iyo nnafuna wi mmulogoni wikale mburo wa murenddele ni wohagalasa, addibilihu enakaliwa obareleyene ni oopwaseyene. Bumwahaya, iyo nnafuna nilibihedhe wihina addibila yakala mmutugumanoni, ekalege oobareleyene, oopwaseyene ni yonege wi nnowadhivela. Teto anamaholela mulogo podi okala ninga nikungu nothawelawo, addibila yafwanyiwaga dhoweha dhohiyana-hiyana. Yapadduwa ngovi obe wakumelela oredda morurumusa, anamaholela mulogo enowiwegeredha mowaguva wihina yakavihere addibila. Teto aliwa enomulabihedha Bibiliya wihina yalibihe addibila. Addibila enere okala ootapuwene wi yaalobe nikavihero anamaholela mulogo enoniwe mwaha dhikalelo dhewa dhapama ni enaavuruwanesa addibila. Namaholela mulogo anoniha dhikalelo ndha, anere wakavihera addibila wonelamo wi boofuneya mmulogoni. Teto enere okala yokweya addibila ohara dhoholela dhinadhela mBibiliyani enakeliwa ni anamaholela mulogo.— 1 Tes. 2:7, 8, 11. Namasugwera 06/24 epaddi 29 ddima 12-13

Kanubuwele wi mwaha Yehova okala Akopolo Dhaatedhene, kadhinanpiha mbani awonaga makathamiho aathu! Oliye anipaddusile ni ekalelo yowukuwa, yohagalala ni yowunla. Vano woona wihina Bibiliya anihina nipaddusiwe moligana nuliye, eyo enatapulela wi nuliyeya onowukuwa. Teto Bibiliya anihina Yehova “onowukuwa.” (Sal. 78:40, 41) Eyo enonikavihera woona makalelo Yehova aaliye owuukuweene mudhidhi amoonaga mwanaye Yesu oonihiwaga goyi ni akwaga vang’ono vang’ono. Yowobola enonihudhiha wihina kaavo anna odhivela ompitha Yehova. Kaavo mukwihu avamurimani ni mmudhihu nnathabwihu omudhivela, aana odhivela ni iyo ompitha Yehova. (Rom. 8:32, 38, 39) Okanne ebaribari wi odhivela Yehova anniyena ni iyo, onookwaranya makalelo nnadhivelihu. We onofuna okalawo ni mukalakala? Yehova anofuna vanlubale wi okalewo nimukalakala. We onofuna wi dhothega dhawo dhileveleliwe? Yehova anofuna vanlubale wi dhothega dhawo dhileveleliwe. Ethu emodha Yehova analobiye, sowihina wonihege wi onotamalela yowobola, okanne nroromelo ni omwiwelelege. Mwebaribarene yowobola nvaho wathima ononiha wi Yehova ononidhivela. — Ecl. 3:11. Namasugwera 01/25 epaddi 22-23 ddima 8-9

Ebaribari wi iyo aatene nnowerana dhothoma dhiniwanana nindhe nnonihu, nniwihu ni nnubuwelihu. Mbwenye kiyakale yapama ororomela baahi dhithu nnonihu, nniwihu ni nnubuwelihu. Needda ni dhithu nnonihu ni mento, eyo podi onithukulela werana dhothoma dhihinamudhivela Yehova. (Ecl. 11:9; Mat. 24:37-39) Mbwenye needda ni nroromelo, nnere werana dhothoma ‘dhinamuhagalasa Nabwiya’ Ohiya eyo, nahara dholaga dha Mulugu dhinonivaha murenddele wavati vamurima ni ohagalala webaribari. (Sal. 16:8, 9; Isa. 48:17, 18) Teto nadidela weedda ni nroromelo, nnere okalawo ni mukalakala. (2 Kor. 4:18) Nnande aavi onona akala nnedda ni nroromelo obe ni dhithu nnoonihu ni mento? Nnohowela wikoha neegi: Dhithu baani ginuubuwelimi gafunaga werana dhothoma dhathima? Gafunaga werana dhothoma ginubuwela baahi dhithu ginandimi woona obe ginowawubuwela malagano a Yehova? Namasugwera 03/25 epaddi 20-21 ddima 3-4

Iyo aatene podi werana ethu yathima wihina nakavihere athu amodha okanna efunelo yovolowa mparayizuni oomuzimuni. Iyo podi werana eyo wodhela omutajhiha Yehova, mwaha wi Oliye kanamuwaddihedha muthu ovolowa mparayizuni oomuzimuni. Ohiya eyo, Oliye “anowawithana” athu nuudhivela wihina ekale epaddi ya nikuru naye. (Juwa. 6:44; Jer. 31:3) Bumwahaya muthu ahudhera dhikalelo dha Yehova vamodha ni emuthu yaye, anofuna wandana nuliye. Mbwenye ni makalelo baani dhikalelo dhehu dhapama ni mweddelo wehu wapama, winaathukuleliwa athu owinjhiva okanna efunelo yovolowa mparayizuni oomuzimuni? Makalelo apama owakavihera athu owinjhiva ovolowa mparayizuni oomuzimuni fuudhela waweddiha addibilihu nuupama vamodha nuudhivela. Iyo nnafuna wihina muthu adha woona mutugumano dhehu dila yobajha, akale ninga ale yadhowile woona mutugumano dila yobajha mulogo wo Korintu, aliwa kiyanganyedha wihina ehifwanya ebaribari ofiyedha owoga: ‘Mwebaribarene Mulugu ali vaari veenyu.’ (1 Kor. 14:24, 25; Zac. 8:23) Wihina eyo epadduwe, nnohowela odhowagave niharaga yolaga eli yolebela ya peeno.’ Namasugwera 04/24 epaddi 23-24 ddima 16-17