Sapama wakela dhoholela munikuruni na Yehova, dhinanikavihera omulabela Yehova mwamakalelo apama. Iyo podi wakela dhoholela ndho ni anamaholela mulogo, anameeddela mulogo ni addibila ooBeteli obe Nnikuru Nolamulela. Ki naakela dhoholela nahinandihu wonelamo pama? Nahikala pasope iyo podi wambela wuubuwela makathamiho enaadhe mwaha wa yoholelaya ofiyedha obajha wubuwela ohilogomana wa addibila enanivaha dhoholeladha. Needdaga ni nroromelo, nnowoniha wihina nnororomela wi Yehova anoholela nikuru naye ni ohunona dhithu dhatedhene wodhela iyo. Bumwahaya nnowiwelela dhoholela mowaguva, teto nnowerana eyo nuuhagalala. (Ebe. 13:17) Iyo nihinona wi wiwelela winodhana wiwanana mmulogoni. (Efe. 4:2, 3) Teto naarive addibila enaniholela egaali athu ohilogomana, nihikanna ebaribari wi Yehova anere onireeliha nathoma wawiwelela. (1 Sam. 15:22) Wakala masadduwo bi masadduwo nnohowela okanna ebaribari wi Yehova anere onikavihera wonelamo dhithudha mudhidhi wofwanelela. Namasugwera 03/25 epaddi 23-24 ddima 13-14

Iyo nnakalawo mudhidhi wohagalasa vanlubale! Kadda labo nnavira, iyo nnowoona dhovuhulela dha mBibiliyani dhakwanelaga. Motajhiha, nnomoona ‘mwene oonorti’ ni ‘mwene oosuli’ ewanelaga othonga elabo. (Dan. 11:40, nota.) Ohiya eyo, nnowoona muthenga wapama wOmwene wa Mulugu, olaleyiwaga mwamakalelo ootikiniha, nahinoonigihu. Teto matxikwi ni matxikwi aathu enna osakula omulabela Yehova. (Isa. 60:22; Mat. 24:14) Nahidduwalaga wi ninna wakela “yoojha [yomuzimini] mudhidhi wofwanelela.” (Mat. 24:45-47) Yehova anonikavihera vang’ono vang’ono wonelamo dhithu dhathima dhinafuna opadduwa mohilegela. (Pro. 4:18) Iyo podi okanna ebaribari wi mahoso manlubale yabajha, nnere onona ethu nnahowelihu werana wi nikale oororomeleya wa Yehova ni owiwanana. Mbwenye sathima wubuwela wi dhihikalawo dhithu nihinonnihu dhinafuna opadduwa osogolo. Namasugwera 05/24 epaddi 8 ddima 1-2

Ebaribari wi Davidi ahiwoga wodhela waaba. Mbwenye waaba ddiniyani? Ni madhu ookweya, enatapulela ovuwiha muselu dhowoota wodhela muthu mmodha yaatakaliye emuthu yaye. Va Salmo 15:3 vinowoga wi ale eli aleddo muddammwani mwa Yehova, kinafwanelela wawerela obure athu amodha, teto kanaanyemula obe kanathukuliha manyazo akwaye. (Sal. 15:1) Eyo enatapulela ddi? Podi wera nihifunaga, iyo podi obajha omunyemula mukwihu, wodhela ovuwiha muselu nihinonnihu pama. Motajhiha, iyo podi obajha ovuwiha muselu dhowoota wodhela (1) murogola ahiyile okala piyonera, (2) anamatelana ehiyile olaba oBeteli obe (3) ddibila ahiyile okala mudhaari ookavihera obe namaholela mulogo. Kiyakale yapama iyo obajha owoga wi addibila ala yere werana ethu yabure, bumwahaya edhe eyelelege mutholo dhewa. Mwebaribarene podi wera dhihikalawo dhithu dhowinjhiva nihinonnihu, dhaathukulele aliwa ohiya mutholo dhewa. Bumwahaya muthu ali muleddo muddammwani mwa Yehova ‘kanamwerela obure mwanddamanaye, ni kanaanyemula akwaye.’ Namasugwera 06/24 epaddi 11 ddima 11-13

Wihina nthabwege omoova Yehova, nafunaga werana yothoma si yothoma, nnohowela orajhiha wubuwela akala yothomaya enere omuhagalasa Yehova. Teto wilerigi dhopadduwa dha mBibiliyani, wikohege: “Gahere gikala wamburoni va muthu yoola, gerena yothoma baani?” Motajhiha, kubuwela wavuruwanaga alobwana ale kumi (10) yadhowe weddelela elabo Yehova aavahiliye, aliwa nuhogolowa, aliwa wawoga madhu ookwerebeyiha. Wahakale we, were orumedha dhithu yawogiwa? Obe were okala epaddi ya Yehova wihina werena ele Yehova afuniye? Amwaana Ezarayeli kayaroromela ndhe yawoga Jozuwe ni Kalebe, bumwahaya kayandile ovolowa elabo yothomeliwa. — Núm. 14:10, 22, 23. Namasugwera 07/24 epaddi 10 ddima 7

Goomer, mwadha namavuhulela Ozeya. Ahimuhiya Ozeya odhowa oraruwaga naalobwana amodha. Ethu eeriliyena yahithabwa okala yabure ofiyedha ohukanna makalelo ookaviheriwa? Yehova anoona dhithu dhili mmurima owoga ni Ozeya egi: ‘Ohogolowele omudhivela muhiyana anadhiveliwa ni mulobwana mmodha ni anawerana mararuwo, ndo ninga Yehova anaadhiveliye nlogo naamwaana Ezarayeli wula aliwa yaahogolowelaga amulugu amodha.’ (Ose. 3:1; Pro. 16:2) Moone wihina mwaadha Ozeya annave werana dhithu dhabure obe yothega yinlubale. Naarive dhigaali ndo, Yehova omuruma Ozeya wihina anvede Goomer ni amuhogolowele. Nimakalelo mamodhave, Yehova kaanyanyanle amwaana Ezarayeli naarive edidelaga werana dhithu dhabure. Eyo enowoniha wihina Yehova owadhivela ni oofuna wakavihera ofiyedha othwaruwa ni ohiya mweddelo wewa. Mwaha yopadduwa ela noonilihu podi okumelela nikoho ninga nna: ‘Eyo enatapulela wihina Yehova napendda dhithu dhili mmurimani anowasayela athu enerana dhotheega dhinlubale wihina aakavihere ofiyedha othwaruwa?’ Namasugwera 08/24 epaddi 10 ddima 7

MaJudewu yaathomile okala makiristawu yohowela wawerana masadduwo manlubale mwigumini mwewa, teto eyo kayali ethu yookweya. Kale maJudewu yaali nlogo nasakuliwe ni Yehova. Teto Yehova aamusakunle Jeruzale wihina atikitere omwene waye, ohiya eyo, athu yafuna omwebedha Yehova yadhowa otempulu yafwanyeya oJeruzale. MaJudewu aatene yaali oororomeleya yowahara malamulo a Moyizeji ni dhithu yahudhihiwiwa nanamasogolela gereja. Dhithu ndha yahudheriwa, dhoovolowelavo dhithu yafwaneleliwa ojha obe naari, muselu wowineliwa ni makalelo owaweeddiha athu yahali maJudewu. Mbwenye Yesu nuukwa, Yehova ohiya ovaha thima dhithu ndhe yahara maJudewu. Mbwenye maJudewu yaathomile okala makiristawu kayali ethu yokweya ohiya ohara dhilemelelo ndhe. (Ebe. 10:1, 4, 10) Teto makiristawu mamodha owithwelavo epaddi yomuzimuni ninga Peduru, yaharusa wawerana masadduwo ala. (Dho. 10:9-14; Gal. 2:11-14) Vano mwaha wa dhithu ndha dhixa yarumedhiwa, makiristawu obajha oharahariwa ni anamasogolela gereja yaali maJudewu. Namasugwera 09/24 epaddi 9 ddima 4

Yehova ohathomela mabasa adhaari aye ni anajheha wihina aliwa yakwanelihe mabasa ala mwamakalelo owegeredheya. (1 Kor. 14:33) Motajhiha, Yehova anafuna wihina muthenga dhapama dhilaleyiwe elabo yaatene yavati. (Mat. 24:14) Yehova amuthomile Yesu wihina aahoolelege mabasa ala oolaleya. Teto Yesu onowaholela mabasa ala wihina epariwege mwamakalelo owegeredheya. Nsaka noobajha, mulogo dheekiristawu dhifuguliwaga mburo dhohiyana-iyana, yothomiwa anamaholela mulogo wihina evahege dhoholela ni eholelege mulogo. (Dho. 14:23) OJeruzale wahikala Nikuru Noolamulela. Addibila ala yalaba ninga Nikuru Nolamulela, yaali arumiwi vamodha ni anamaholela mulogo, aliwa yowerana dhothoma wihina mulogo dhaatedhene yiwelelege. (Dho. 15:2; 16:4) Mwaha addibila wiwelela dhoholela yakeliwa, “addibila ammulogoni yolibihiwa munroromeloni ni yowinjhivana.” — Dho. 16:5. Namasugwera 04/24 epaddi 8 ddima 1

Emambesi ya labo na 16 a Nisa, ahiyana dhaala yahidhowa omahame waakoyiwe Yesu. (Luk. 24:1, 10) Muhiyana mmodha adhowile omahame aali Mariya Madalena. Vano nufiya omahame, oliye wonelamo wihina muruthu wa Yesu kawali mmahame mune, nuwindo oliye othamaga wihina amwaddele Peduru ni Juwawu dhithu dhaapadduwe. Voharela oliye ohogolowela omahame vamodha ni aliwa. Vano aliwa numala woona wihina ele awogile Mariya yaali ebaribari, Peduru ni Juwawu ohogolowela vaade. Mbwenye Mariya ohala omahame wewule unlaga. Oliye konelamo wihina Yesu anna omusugwa. Yesu numoona muhiyana ole oororomeleya unlaga, oliye weddiwa thagaraga. Nuwindo Yesu omuthwanyuwela ni wawoga madhu ookweya, mbwenye yaali oolibiha vanlubale. Oliye onvaha Mariya mutholo munlubale, yaali wawaddela addibile aatene wihina Yesu ohuvenyihiwa muukwani. — Juwa. 20:17, 18. Namasugwera 10/24 epaddi 13 ddima 7

Moyizeji ahilaba ninga namavuhulela, namatoriha, namaholela ni namaleba. Ohiya eyo, duliyene alabihedhiwe ni Yehova wihina awobole aamwaana Ezarayeli yaali adhaari Wijipitu. Teto ahiwoona matikiniho owinjhiva a Yehova. Ohiya eyo, Yehova ahimulabihedha Moyizeji wihina aalebe malivuru 5 oobajha a mBibiliyani, ninga Salmo 90 ni podi wera Salmo 91. Ohiya eyo, enakala ninga duliye alebile livuru na Jó. Moyizeji aganna yaka 120, ahalaga neena nuukwa, watugumana aamwaana Ezarayeli wihina awubusedhe dhaatedhene Yehova awereliye. Amwaana Ezarayeli amodha yahawoona matikiniho Yehova aweriliyena ni makalelo Yehova aasinyunsiye Mejipisiyu. (Êxo. 7:4) Ohiya eyo, aliwa yahimoona Yehova afugulaga niya yofila wihina evire, teto makalelo Yehova aamutolonsiye Farawo ni anyakoddo aye. (Êxo. 14:29-31) Mudhidhi amwaana Ezarayeli egaali mwiddeddereni Yehova ahabarela ni ahasamalela. (Deut. 8:3, 4) Vano ehalaga neena wihina evolowe elabo yothomeliwa, Moyizeji opatha mudhidhi yole ahinathi okwa wihina aalibihe dila yogomihedha. Namasugwera 11/24 epaddi 8-9 ddima 3-4

Madhu asorihile Yesu nlabo nuwubuwela okwa waye, oliye aagana nikuru ning’ono naathu. Mbwenye madhu asorihiliye agaali oGalileya, oliye aagana muthithi waathu. Yesu agaali oGalileya yaka ya 32 M.W., athu owinjhiva yanvuruwana awogaga, yamusayela baahi mwaha yafuna yojha. Mbwenye Yesu osayela makalelo owawonelihamo wihina ehikalawo ethu yathima yahoweliwa opitha yojha. Ethu eyo yere wakavihera ofwanya egumi yohimala. Yesu wawaddela wihina muthu di muthu aakwe, eere ovenyihiwa wihina aakele egumi yohimala. Madhu asorihiliye va Juwawu kapitulu 6 enowoniha wi oliye kawoga wodhela muthupo wa wubuwela okwa waye, mbwenye aagana muthithi waathu. Namasugwera 12/24 epaddi 11 ddima 10-11

Yehova anowawidda athu oowali. (Sal. 11:5) Teto Bibiliya anowatoriha alobwana enaweddiha amwaariwa mwamakalelo abure. (Mal. 2:16) Mulobwana ahinamweddiha pama mwariye, kanakanna wandana wapama ni Yehova, teto Yehova podi ohavuruwanaga malobelo aye. (1 Ped. 3:7) Alobwana amodha enowawobela owali amwaariwa ni enowawogela madhu overeyiha murima. Mbwenye Yehova anowawidda alobwana “oonyanyuwa, oowali, ooruwana ni enawoga madhu oovereyiha murima.” (Efe. 4:31, 32) Mulobwana anawoga nuuwali ni mwariye, anowanonga matelo aye ni wandana anniyena ni Yehova. (Tiya. 1:26) Teto akala mulobwana ootela anomoona pornografiya onononga wandana waye ni Yehova ni kanamuriha mwariye. Yehova anajheha wi mulobwana akale oororomeleya ni mwariye. Mwaha wi mulobwana oororomeleya kanubuwela newene kanerana ethu yonyakavala. Teto Yesu ohuwoga wihina mulobwana anadidela omusugwa muhiyana ofiyedha omukalela “munigwa mmurimani,” ohumukumiha mba. — Mat. 5:28, 29. Namasugwera 01/25 epaddi 9 ddima 6-8

Wooniwa ninga athu owogowa enatapulela wi Yehova ananoona ninga athu nahinna nihonya ni kananikukusa mwaha wa dhothega nnerihuna. Naarive dhigaali ndo, Yehova anajheha wi nawiwelelege malamulo aye. Mwaha akala Yehova anonoona ninga athu owogowa, kahi wihina nili athu oofwanelela, mbwenye mwaha wa opama wohinifwanelela. Teto kahi wihina Yehova anodhiveliwa naamuthegelaga obe anorumedha dhothega dhehu. Mbwenye oliye anothoma odduwala dhothega dhehu, nooniha wi nnororomela mukutho wa Yesu. (Rom. 3:24) Mareeliho baani nnawakelihu, nambela wooniwa ni Yehova ninga athu owogowa? Ale esakuliwe wihina yathonge ni Yesu odhulu, enooniwa ninga ahima owogowa a Mulugu. (Titu 3:7; 1 Juwa. 3:1) Mwaha dhothega dhewa dhihileveleliwa, teto enakala ninga aliwa kineregena yothega. Bumwahaya enorumedhiwa wihina yathongege Mumweneni mwa Mulugu. (Rom. 8:1, 2, 30) Athu amodha Yehova anawonihe ninga owogowa, baale enna ejhehedhelo yokala velaboni yavati ni mukalakala. Athu yala ehikanna wandana nuliye, teto Yehova ohumala olevelela dhothega dhewa. — Tiya. 2:21-23. Namasugwera 02/25 epaddi 5 ddima 17; epaddi 7 ddima 18

Nlabo dhaala murumiwi Peduru ahikanna mubuwelo wohiyana ni mubuwelo wa Yehova. Yesu wawaddela anamahara aye wihina ohowela odhowa oJeruzale, nuwindo oliye eere omagiwa ni anamasogolela gereja ni eere wonihiwa goyi ofiyedha opiwa. (Mat. 16:21) Peduru ahinona wihina Yesu aali Mesiya aapaganyiwe wihina avuluse nlogo na Mulugu. Bumwahaya wa Peduru, yaali yorusa orumedha wihina Yehova eere wenya wi Yesu apiwe ni makalelo yaale. (Mat. 16:16) Mwaha wa yeyo, Peduru omwithana Yesu ni owoga eegi: “Nabwiyani, kiweddeleni thagaraga! Ethu ninga yeyo kidha yupadduwelani.” (Mat. 16:22) Mbwenye Yesu kaarumedhile moonelo wa Peduru, mwaha Peduru kubuwela ninga Yehova ubuweliye. Mwebaribarene yakala ninga madhu asorihile Peduru yeere omukavihera Yesu, mbwenye Yesu ahikoodda ohara yolaga ya Peduru. Mwaha Yesu ahinona wihina Yehova afuna wi Yesu ahithabwege withuwathuwela. Nlabo nenne Peduru ahihudhera thima yowubuwela ninga Yehova. Teto nihiyoya, nnohudhera ethu yathima ni yopadduwa ela. Namasugwera 03/25 epaddi 9 ddima 5-6

We oli owuukuweene mwaha muthu wamuroromeliwe ohuwerela ethu wahajhehedhiwe? Naarive athu amodha yuweddihaga mwamakalelo abure, Baabi awo oodhivela Yehova, anowuudhivela vanlubale. Weddihiwaga mwamakalelo abure we podi otodoliwa mwaha wawileri madhu ooriya a Davidi enafwanyeya va yolebela ya peeno. Niwogaga wodhela Salmo ola, livuru dhaala nnowoga wihina ale eli ‘ookwerebeyene’ podi wagiwagana “athu yahinna ejhehedhelo yapama wodhela osogolo.” Ki Yehova anere ddi wihina akavihere athu eneddihiwa mwamakalelo abure? Ndala ninga baabi anamukubarela mwanaye wihina amutodole mudhidhi wa makathamiho, Yehova aali ‘vokwivelavene’ ni ale eli ookwerebeyene. Oliye anoneeddela thagaraga ni ononikavihera nakala owukuwene mwaha wokwerebeya, nereliwa obure obe nayelela ethu-sithu. Yehova anofuna vanlubale onitodola ni onikurumusa nakala othuwathuwene obe nereliwa ethu yabure. Teto oliye onopaganya onivaha dhithu dhapama nnajhehihu wakela osogolo ni dhinanikavihera wavilelana makathamiho enanifwanya peeno. — Isa. 65:17. Namasugwera 12/24 epaddi 23 ddima 13-14

Peeno anamaholela mulogo podi okanna ebaribari wi Yehova anowoona ni anovaha thima dhatedhene eneriwana. Ohiya baahi, wakukula mambila a Yehova, wahudhiha ni olaleya, anamaholela mulogo owinjhiva enowakavihera mabasa oomaga Nyumba Dhomwene ni mabasa ookavihera yapadduwa ngovi. Anamaholela mulogo amodha enalaba ninga anamaredhela aredda a ospitale ni amodha enowakavihera mabasa a komisawu yospitale. Anamaholela mulogo enaakavihera mabasa ala, ehinona wi mabasa enaapariwa ba Yehova. Bumwahaya, aliwa enowilibihedha werana ele enandiwa, teto ehikanna ebaribari wi Yehova anere wareeliha mwaha wa mabasa aatene enapariwa. (Kol. 3:23, 24) Ebaribari wi kinenyeya iyo aatene olaba ninga anamaholela mulogo, mbwenye aatene iyo podi onvaha Yehova ethu-sithu. Mulugu ehu anohagalala vanlubale, nilibihedhaga wihina nimulabele. Oliye anowoona dhovelela dhehu nnavahihu wi epariwena mabasa waapela elabo yaatene, teto Yehova anoothabwa ohagalala aanoonaga nimulevelelaga ddibila anitheegele. Bumwahaya, okanne ebaribari wi oliye anovaha thima ele onandiwe werana. Yehova anowuudhivela vanlubale, bumwahaya anere wureeliha. — Luk. 21:1-4. Namasugwera 06/24 epaddi 23 ddima 12-13

Yopadduwa ela enowoniha wihina ethu ninga yela podi onipadduwela. Nahikala pasope iyo podi werana yothega ‘mohulegela,’ vano obajha wubuwela wi nerilena yothegaya nahifunne. Mbwenye nubuwela pamadhene, iyo podi wonelamo wi nerilena yothega ele, mwaha wa dhothoma dhohiyana-iyana dhabure nerilihuna. Podi wera ethu enithukulele werana yothega ele, yaali mwaha ohasakula pama akwihu, yaredhelo yonyakavala, obe odhowa mburo dhihinafwanela mukiristawu odhowawo obe wodhela ovolowa sayiti dhohufwanelela mwinterneti. Teto podi okala mwaha ohulobela, ohumwileri Bibiliya, ohoona mutugumano ni ohapara mabasa oolaleya. Ndala ninga yampadduwele muzombwe ole anasorihiwa va Provérbios kapitulu 7, podi wera nerilena yothegaya mwaha wa dhothoma dhohiyana-hiyana dhabure nerilihuna. Nnahudhera ddi ni yopadduwa ya muzombwe ole anasorihiwa va Provérbios 7? Ohiya baahi orabela werana yothega, nnohowela orabela dhithu dhanthukulele werana yothegaya. Salomawu ahooniha pamadhene nuwoga wodhela yopadduwa ya muzombwe ole ni muhiyana a mararuwo. — Mat. 5:29, 30. Namasugwera 07/24 epaddi 16 ddima 10-11

Mbwenye dhoreela ndha dhinaagiwana ddi? Enagiwana mabasa oolaleya enavulusa dhigumi dhaathu ni enawoga wodhela Omwene wa Mulugu. (2 Kor. 4:1) Ki muno enagiwana ddi? Enagiwana adhaari a Mulugu, enalaleya muthenga wa Mulugu athu amodha. Mudhidhi wa murumiwi Pawulo, anameeddiha malondda yolabihedha muno wihina ethukulena obe ekoyemo dhithu dhathima, ninga dhoojha, korowa ni vinyu. Nimakalelo mamodhave iyo nili ninga muno, Yehova anonilabihedha wihina nilaleye muthenga dhapama dhili dhathima vanlubale. Nnikavihero na Yehova, nnowanda okanna kopolo nnahowelihu wihina nidhowegeve nlaleyaga muthenga dhapama nahiselenle. Malabo mamodha iyo podi woovaga olaleya, mwaha wawoova athu. Nnande aavi ogonjhiha woova wula? Kasugwa nlobelo yerilena arumiwi nukoddihiwa olaleya. Ohiya ogonjhihiwa ni woova wule, aliwa omuloba Yehova nikavihero wihina “yahiselele walaleya madhu [a Yehova] nuuliba murima.” Teto Yehova ahaakula nlobelo newa mohilegela. (Dho. 4:18, 29, 31) Nabajha wawoova athu nakala mmabasani oolaleya ofiyedha okala oothuwathuwene, nnohowela olobela nlobaga oliba murima wihina nande olaleya. Omulobe Yehova wihina odhivela onniwena ni athu okale munlubale opitha woova onniwena. Namasugwera 04/24 epaddi 16 ddima 8-9

Odhivela ninnihuna ni Yehova winonthukulela ofuna otxeniha ndina naaye. Eyo enatapulela wi nnafuna nawaddele athu wihina dhithu dhaatedhene anawoga Saddana wodhela Yehova sowoota. (Gén. 3:1-5; Jó 2:4; Juwa. 8:44) Iyo naaparaga mabasa oolaleya, nnafuna wi athu enna efunelo, emunone pamadhene Yehova vamodha ni dhikalelo dhaye dhapama. Teto nnofuna wi athu enoone wi ekalelo yinlubale ya Yehova fuudhivela, makalelo aye oothonga bapama ni bowogowa, Omwene waye onere omariha mohilegela goyi yaatene ni onere odhana murenddele veelaboni yaatene yavati. (Sal. 37:10, 11, 29; 1 Juwa. 4:8) Nawogaga ebaribari wodhela Yehova, ninna otxeniha ndina naaye. Teto naalaleyaga nnohagalala mwaha ninna wakwanihedha mutholo wehu wokala Anamoona a Yehova. Namasugwera 05/24 epaddi 18 ddima 12

Addibila, munohowela woniha wihina ‘muli athu enawakela aleddo’ wodhela waweddiha athu amodha nuupama, naaleya wahanonniwe pama. (1 Ped. 4:9) Livuru dhaala na referensiya, nnowoga wodhela muthu ali namakela aleddo neegi: “Mulago wa vaade vaye ni wa mmurimani mwaaye, onohowela okala wofuguwene wihina awakele aleddo ahanonniye.” Bumwahaya wikohe: “Miyo gihinoniwa ninga muthu anawakela nuupama athu enadhela waredhela mulogo waaga?” (Ebe. 13:2, 16) Mulobwana ali namakela aleddo, anowawoniha opama ni anogawana ele anniyena naathu aatene enadha omwaredhela. Ninga ale eli oohawa, addibila nnawithanihu wihina edhe ewoge mwaha mmulogoni mwehu ni addibila enalaba vanlubale wihina yalibihe addibilihu ninga anameeddela mulogo. — Gén. 18:2-8; Pro. 3:27; Dho. 16:15; Rom. 12:13. Namasugwera 11/24 epaddi 21 ddima 6

Va yoladdaniha ya anamwali yahinagonege ni alobwana, Yesu ahiwoga wodhela anamwali owakwana kumi yadhowile ogumana ni namatela. (Mat. 25:1-4) Anamwali aatene yafuna envelele namatela vamathangani a matelo. Yesu owoga wi atanu waaliwa yaali “ooxaga” mbwenye amodhaya atanu yaali “oolodhowa” Anamwali ale ooxaga yaali owiwegeredhene ni yahithoma omujheha, naarive akala namatelaya aafiye vaari va mahiyu. Bumwahaya anamwali ale oxaga yahadhana makura wihina panti dhewa dhihiddegeve, teto aliwa yahadhana makura mamodha wihina ale yaali mpantini yamalamo yapwehemo mamodha, akala namatelaya eere olegela ofiya. Ni makalelo yaala aliwa yaali owiwegeredhene wihina panti dhewa dhinathime. (Mat. 25:6-10) Vano namatela nufiya anamwali ooxaga odhowa vamodha nuliye omathangani a matelo. Ni makalelo mamodhave makiristawu oothikitheliwa enakale owiwegeredhene mwaha wodidela okala oororomeleya ofiyedha mudhidhi anaafiye Yesu. Vano ale enakale owiwegeredhene, enere woniwa ninga athu oofwanelela okala ni namatela Yesu Kiristu mumweneni mwaaye odhulu. — Ovuhu. 7:1-3. Namasugwera 09/24 epaddi 21 ddima 6

Iyo nnokanna efunelo yodidela wapara mabasa olaleya nubuwelaga makalelo muthenga dhapama onakaviheriwa athu wapela elabo yatene. Yaka dhatedhene, athu enna efunelo enowoona muthupo wowubuwela okwa wa Yesu ni enothoma omuhudhera Bibiliya ni iyo. Ohiya eyo, matxikwi ni matxikwi athu enna obaddiziwa ni enothoma wariganela nihiyo mabasa olaleya. Ethu nnonihu sowihina Yehova anotugumana muthithi waathu, wihina yande ovuluwa mudhidhi wa mahoso manlubale. (Ovuhu. 7:9, 14) Yehova, ddimwinya a mundda, bumwahaya oliye ohunona wihina athu owinjhiva enere orumedha muthenga dhapama. Nimakalelo yala, nihikanna ethu enanithukulela odidela wapara mabasa olaleya! (Luk. 10:2) Ethu enathabwa wawoneyiha anamahara a Yesu fuuviheya aliwa enakanniwana mmabasani olaleya. Motajhiha, anamahara a Yesu yahilaleya nuuliba murima vamodha nuviheya ofiyedha athu owinjhiva “wonelamo wi Peduru ni Juwawu yaheedda ni Yesu.” (Dho. 4:13) Peeno, athu yaanonaga naaparaga mabasa olaleya, nnafuna wihina aliwa enone wi nnatajhiha oviheya anna Yesu wodhela wapara mabasa olaleya. Namasugwera 03/25 epaddi 18 ddima 15; epaddi 19 ddima 17-18

Bibiliya anowoga wi Yehova anowathuwathuwela athu enakala ninga kinna thima. Motajhiha, Yehova ahimuruma namavuhulela Samuweli wihina adhowe vaade va Jese wi amuthikithele mwaana mmodha aakale mwene aamwaana Ezarayeli. Vano Jese wawithana anaaye aatene 7, mbwenye kamwithanne Davidi aali ethogohi. Naarive dhigaali ndo, Davidi daasakuliwe wihina akale mwene aamwaana Ezarayeli. (1 Sam. 16:6, 7, 10-12) Yehova ahimunona pamadhene Davidi ni ahinona ekalelo yaye. Ohiya eyo, Yehova ahinona wi Davidi oomudhivela. Kabiha wubuwela dhithu Yehova anuwereliye, dhinoniha wi oliye anowuthuwathuwela. Motajhiha, Yehova anowuvaha dholaga wodhela muselu bu muselu onahoweliwe onoona. (Sal. 32:8) Eyo enowoniha wihina Yehova ohunona pamadhene ni ohunona ele onahoweliwe. (Sal. 139:1) Waparihedhaga mabasa dholaga dha Yehova ni woonaga makalelo dholaga ndha dhinukaviheriwa, kunanganyedhege wihina Yehova anowuthuwathuwela. (1 Cró. 28:9; Dho. 17:26, 27) Yehova anowoona dhithu dhatedhene oneriwena wihina omulabele ni omwiwelele. Ohiya eyo, Yehova ohunona dhikalelo dhawo dhapama ni anofuna wandana ni we.— Jer. 17:10. Namasugwera 10/24 epaddi 25-26 ddima 7-9

Mohanganyedha we onomudhivela Yehova ni onofuna vanlubale wakavihera athu amodha. Ki onande aavi wenjhedhedhe efunelo yawo yowakavihera athu amodha? Ethu enuukavihere, fuwubuwela ohagalala onakanniwe mwaha wakavihera addibila ni arogola. Yesu ohuwoga eegi: “Ovaha winothabwa ohagalasa opitha ovahiwa.” (Dho. 20:35) Ohiya owogave baahi, Yesu owerana ele awogiye. Bumwahaya Yesu ahikanna ohagalala webaribari, mwaha owakavihera athu amodha. Kabeni noone ethu enawooga yolebela ya Marku 6:31-34, nlabo dhaala Yesu ni anamahara aye yaali oogomene. Bumwahaya aliwa osayelaga mburo wopwaseya wihina yithuwe. Mbwenye yahinathi ofiya waali mburo ole, muthithi waathu ofiya, Yesu ni anamahara aye ehinafiye. Muthithi ole waathu, wafiye mburo ole wihina emujhehe Yesu wahudhiha. Yesu ahafune eere okoodda wahudhiha, mwaha oliye ni anamahara aye “kiyanna mudhidhi wowithuwa newene woojha ethu.” Obe ahafune eere owoga vang’ono baahi, nuwindo arume wihina edhowege.” Mbwenye, Yesu owadhivela athuya. Teto Yesu ahididela wahudhiha ofiyedha “vati oriba.” — Mar. 6:35. Namasugwera 11/24 epaddi 16 ddima 9-10

Abaabi mwakavihere aninyu osayela makalelo oothapanya naathu amodha wodhela muselu dha mBibiliyani. (Rom. 10:10) Iyo podi owoga wi othapanya wodhela muselu dha mBibiliyani naathu amodha enaligana ni orumiha dhipano dha jhibo. Omambelelowene muthuya anabajha orumiha jhibo dhokweya. Mbwenye mudhidhi waviraga, oliye anohudhera orumiha jhibo dhimodha. Ni makalelo mamodhave, muzombwe podi wambela owoga ndhe anarumedhiya awogaga dhithu dhokweya. Motajhiha, oliye podi omukoha mukwaye ooskola eegi: “We wahinona wi mahenjinyero owinjhiva enatajhiha dhopaddusa? Kajheha guwoonihe vidiyu yoriya vanlubale. Amala woniha vidiyu ya seriye enna musolo “Teve um Projeto?” Oliye podi omukoha eegi: “Akala mahenjinyero enothithimihiwa mwaha wa dhopaddusa enatajhihiwa, baani anahowela wakela nthithimiho naatene mwaha wa dhopaddusa dhatedhene dhiliwo?” Omoonelihamo muthu ni makalelo yaala, podi omuthukulela ofunaga ohudhera dhithu dhimodha. Namasugwera 12/24 epaddi 19 ddima 17-18

Wihina noboliwe, Yehova omuruma mwanaye wihina adhe anikwele. Mbwenye dhinandeya aavi mukutho wa muthu mmodha baahi wawobole mbwabwadda ni mbwabwadda waathu? Murumiwi Pawulo anowoga yowakulaya eegi: “Mwaha wa yothega ya muthu mmodha baahi [Adawu], athu aatene ehithega, mwamakalelo mamodhave, mwaha wiwelela wa muthu mmodha [Yesu], athu owinjhiva enowooniwa okala owogowa.” (Rom. 5:19; 1 Tim. 2:6) Ni madhu mamodha, iyo nili adhaari a yothega mwaha wohiwelela wa muthu mmodha baahi, mbwenye ehandeya ovulusiwa mwaha wowiwelela wa muthu mmodha baahi. Yesu ohowela okwa wihina anivuluse? Mwahaya bwaddi Yehova keenyile wihina odhuulu wowiwelela wa Adawu okalewo ni mukalakala? Iyo podi wubuwelaga wi ahere Yehova eenya odhulu wa Adawu okalawo ni mukalakala, ala yakale makalelo apama oomariha muladduya. Mbwenye eyo kiyonihe wogowa wologomana wa Yehova. Mwaha Yehova dowogowa. Ahere ahiya ndo, yakalege ninga Adawu ni Eva kiyerilena yothega enlubale. Namasugwera 01/25 epaddi 21 ddima 3-4

Murumiwi Pawulo ahinona wihina wahale mudhidhi vang’no wihina apiwe. Mbwenye ubuwela makalelo eddihiliye egumi aye oliye ohagalala vanlubale. Ni owoga eegi: “Gihithamaga ofiyedha omakuthulo, gihikalawo ni nroromelo.” (2 Tim. 4:6-8) Pawulo aherana dhothoma dhapama mwigumini mwaaye ninga mukiristawu, teto oliye ahinona wihina ahihagalasa murima wa Yehova. Nihiyoya nnafuna nerena dhothoma dhapama wihina nirumedhiwe vamentoni va Yehova. Ddiniyani nnafunihu werana wihina nirumedhiwe vamentoni va Yehova? Murumiwi Pawulo ahiwoga wodhela oliye ni anamahara amodha eegi: “Nnedda ni nroromelo ohiya ni dhithu nnoonihu ni mento.” Mbibiliyani, madhu owi “weedda” enagiwana makalelo muthu anathomiye weddiha egumi yaye. Muthu aneedda ni nroromelo, anowerana dhothoma dhaye mowiwanana nindhe Yehova anubuweliye. Teto dhowera dhaye dhinowoniha wihina Mulugu anomureeliha ni ohunona wihina dholaga dha Yehova dhinafwanyeya mBibiliyani, dhinokavihera vanlubale mwigumini mwehu. — Sal. 119:66; Ebe. 11:6. Namasugwera 03/25 epaddi 20 ddima 1-2

Nnikavihero na muzimu wotxena wa Yehova, athu owinjhiva yaali oowali, owoopiha ni ohiroromeleya, ehawerana masadduwo ootikiniha mwigumini mwewa. (Isa. 65:25) Mwaha wilibihedha wewa, aliwa ehanda ohiya emuthu yewa ya kale. (Efe. 4:22-24) Ebaribari wihina mwaha ohilogomana, nnoviriganiha malabo mamodha. Mbwenye Yehova anna wawiwananiha ‘athu aatene’ enamudhivela ni enadhivelana mmodha ni mukwaye. Yokumelelavoya, sowihina nnokanna murenddele ni wiwanana. (Titu 2:11) Murenddele ni wiwanana ninnihuna, matikiniho enadhela wa Yehova baahi! Teto iyo nihinona wi mpaganyo dhaatedhene dha Yehova dhinowakwanela. (Isa. 55:10, 11) Peeno parayizu oomuzimuni ohukalawo ninga Yehova aapaganyiliye. Yehova ohutugumana emudhi yowiwanana ehinaligana nnikuru nimodha velaboni yavati. Mwaha okala epaddi ya emudhi ela yowiwanana, nihikanna murenddele ni obareleya. (Sal. 72:7) Bumwahaya nnofuna wakavihera athu owinjhiva wihina ekale ni iyo mu emudhi ela yowiwanana, yapele elabo yaatene yavati. Iyo podi wakavihera athu owinjhiva wodhela walaleya wihina ekale anamahara a Yesu. — Mat. 28:19, 20. Namasugwera 04/24 epaddi 23 ddima 13, 15

Yesu onomudhivela vanlubale Yehova ni mubuwelo waye waatene. Oliye ahinona ethu Yehova afuniye wihina oliye eerena, teto ahithoma werana eyo, naarive afwanyiwaga makathamiho. Yesu ahithoma werana efunelo ya Yehova, bumwahaya keenyile wihina ethu-sithu ekale yathima mwigumini mwaaye, opitha werana efunelo ya Yehova. Peduru ni anamahara amodha yahikanna oneti wokala vamodha ni Yesu ni woona makalelo oliye ubuweliye. Murumiwi Peduru nuuleba karta naye noobajha, oliye wakongomedha makiristawu aatene eegi: Mwiwegeredhe mu yubuwelo ya Kiristu obe neere, wubuwela ninga Kiristu. (1 Ped. 4:1) Madhu murumiwi Peduru alabihedhiye owi ‘mwiwegeredhe,’ yothabwa olabihedhiwa okoddoni. Bumwahaya, iyo podi owoga wihina okanna mubuwelo wa Kiristu, eli ninga okanna epano yakopolo nnahowelihu wihina nande owanana ethu-sithu enanithukulela werana yothega mwilaboni ela ya Saddana. — 2 Kor. 10:3-5; Efe. 6:12. Namasugwera 03/25 epaddi 8-9 ddima 1-3

Dhithu dhimodha onahoweliwe opwasedha mudhidhi mwavevanaga siivi? Mwahinathi wandana vanlubale, podi wera onere ofuna othapanya ni mwenddawo wodhela dhithu dhathima. Onande aavi onona pamadhene ekalelo ya mwenddawo? Makalelo apama fuwawerana makoho ni onvuruwana pamadhene awogaga. (Tiya. 1:19) Wihina wande wawerana makoho ala, podi wera enere ohoweleya ojha mudhidhi wowinjhiva mugaali vamodha wihina mukanne ofuru wothapanya. Ninga motajhiha, ojha vamodha, weedda vamodha mburo winavira athu owinjhiva obe okuma vamodha mmalaleyelo. Teto nyu podi ononana pama mwajhaga mudhidhi ni akwinyu vamodha ni amudhinyu. Osayele werana dhithu dhohiyana-iyana wihina woone makalelo muthuya anafuniye werana dhithudha. Namasugwera 05/24 epaddi 27-28 ddima 6-7

Mohulegela nnere ofwanyiwa makathamiho oorusa vanlubale ni nnerege ohowela omuroromela vanlubale Yehova. Wileri dhopadduwa dha adhaari a Yehova a kale ni dhopadduwa dha mwigumini dha addibila ni arogola a malabo yala, yandile ovilela nnikavihero na Yehova, winere onikavihera wubuwela makalelo Yehova aakaviheriye aliwa. Teto sapama osayelege mudhidhi wihina nipendde dhopadduwadha. Werana eyo, enere onikavihera omoona Yehova ninga Nibwe nawo. Teto nnerege woona makalelo ootajhiha dhikalelo ndha dha Yehova, mwaha niilibihedha otajhiha dhikalelo ndha, nnere wanda walibiha addibilihu. Motajhiha Yesu ahinvaha Simawu ndina na Sefaji (enatapulela Peduru). Ndina nna nnatapulela “Ndongolomwa na nibwe.” (Juwa. 1:42) Yesu afuna amukavihere murumiwi Peduru wonelamo wi eere watodola addibila mmulogoni ni olibiha nroromelo newa. Anamaholela mulogo, eli ‘ninga murunti wa nibwe ninlubale.’ Eyo enatapulela wi anamaholela mulogo enowaabarela addibila ammulogoni. (Isa. 32:2) Eyo kinatapulela wi baanamaholela mulogo baahi, enahowela otajhiha dhikalelo dha Yehova ni walibiha addibila ni arogola, mbwenye iyo aatene nnohowela werana. Namasugwera 06/24 epaddi 28 ddima 10-11

Mamwene yaali oororomeleya vamentoni va Yehova, yaali ale yadidenle omwebedha Yehova mwamakalelo apama egumiwa yaatene. Mamwene owinjhiva Yehova atorihiliye ninga oohuroromeleya vamentoni vaye, baale yahiile wahara malamulo ni yamusukume Yehova wihina yambela wawebedha amulugu owoota. (1 Reis 21:25, 26; 2 Cró. 12:1) Mwahaya bwaddi muselu ola womwebedha Yehova baahi bwathima? Mwaha wi mamwene ale yahikanna mutholo wokavihera nlogo naatene odidela omwebedha Yehova baahi. Ohiya eyo, webedha wowoota wowathukulela werana dhothega dhimodha dhinlubale. (Ose. 4:1, 2) Teto ethu emodhaya yathima, sowihina mamwene ale ni nlogo naatene, naali nlogo noosakuliwa na Yehova. Bumwahaya Bibiliya agaliganiha webedha wowoota ni okuma mba. (Jer. 3:8, 9) Mwaha muthu akuma mba, oliye anowooniha wi kahi oororomeleya ni mwadhiye obe ni mamune. Okuma mba winopiha mbani vanlubale, bumwahaya mudhaari a Yehova amanle wipeleka, avolowela webedha wowoota, oliye anamuthegela Yehova. Teto eyo enompiha mbani Yehova.— Deut. 4:23. Namasugwera 07/24 epaddi 22-23 ddima 12-15