Bibiliya onowawoga athu owinjhiva yaali owogowa, mbwenye vasogolova okala athu ohogowa. Yopadduwa modha sa mwene Salomawu, oliye ahimunona pamadhene Yehova ni ahinona makalelo Yehova afuniye wi ebedhiwege, teto Yehova ahimureliha vanlubale. Mbwenye yowukulihaya sowihina Salomawu wambela wawebedha amulugu owoota, Yehova otakaleliwa vanlubale mwaha wa dhoothega ndhe. Ohiya eyo, dhithu Salomawu eriliyena dhahatotela makathamiho nlogo naatene muwari mwa yakadhene. Ebaribari wi Bibiliya anowoga wi Salomawu nuukwa ‘aakoyiwe mahame yaakoyiwe makolo aye,’ teto mmodha wa makolo aye, aali Davidi aali mwene oororomeleya. (1 Reis 11:5-9, 43; 2 Reis 23:13) Mbwenye nerege oliye anere ovenyihiwa muukwani mwaha wa makalelo akoyiwiye? Iyo kannonne, mwaha Bibiliya kanawoga. Mbwenye ovenyihiwa muukwani, nvaho wa Yehova. Teto Yehova anere wavenyiha yaale anafuniye wihina emulabelege ni mukalakala. (Jó 14:13, 14; Juw. 6:44) Ki vano nerege Salomawu anere ovenyihiwa muukwani? Yehova baahi dinonne, mbwenye iyo kannonne. Ethu nnonnihu sowihina Yehova anere werana ele eli yapama ni yowogowa. Namasugwera 05/24 epaddi 4 ddima 9

Iyo niipeleka wa Yehova nnakala aleddo muddammwani mwaaye. Muddammwani muna, iyo nihikanna dhoojha dhomuzimuni nnahowelihu wihina nidhowegeve nilibihaga wandana ninnihuna ni Yehova, teto nihikanna akwihu eli aleddo muddammwani mwa Yehova. Naarive nikalaga mburo bu mburo, iyo aatene podi okala aleddo muddammwani mwa Yehova. Ddammwa a Yehova anafwanyeya mburo dhaatedhene wili adhaari aye. (Ovuhu. 21:3) Mbwenye ki owoga wodhela adhaari a Yehova ekwile? Naaliwaya aleddo muddammwani mwa Yehova? Hee! Mwahaya bwaddi nigawoga ndo? Mwaha vamentoni va Yehova, athu yaala nivanove ehikalawo. Yesu ahiwoga wodhela muselu ola egi: “Mbwenye anookwa eneere ovenyihiwa muukwani mwaha Moyizeji ohuwoga agaali vanikupuni numwithana Yehova egi, ‘Mulugu Abaraawu, Mulugu a Izaki, Mulugu a Jako.’ Oliye kahiyo Mulugu aanokwa mbwenye aathu ookalawo, mwaha vamentoni vaye athu aatene ekwile ehikalawo.” — Lukaji 20:37, 38. Namasugwera 06/24 epaddi 3 ddima 6-7

Zadoki kaadhowile wEbro baahi wihina aajhe mathanga yegeredhiwe, Davidi nuthikitheliwa ninga mwene, mbwenye oliye aadhowile owiwegeredhene, agathukunle futhaye wihina awane yakumelela amwiddani. (1 Cró. 12:38) Oliye ahivelela wihina amukavihere Davidi ni abarele nlogo naamwaana Ezarayeli mmadani mwa amwiddani ewa. Podi wera Zadoki kaali munyakoddo aanonne owana pama, mbwenye oliye aali ooliba murima. Ddiniyani yamukavihere Zadoki okala muthu ooliba murima? Oliye akalesa naalobwana akopolo ni ooliba murima. Mwebaribarene oliye ahihudhera naaliwa okala ooliba murima. Motajhiha, Davidi aali namaholela ni munyakoddo ooliba murima. Bumwahaya, amwaana Ezarayeli aatene yahimukavihera wihina oliye akale mwene. (1 Cró. 11:1, 2) Davidi amuroromelesa Yehova aadhowaga owana ni amwiddani aye. (Sal. 138:3) Mbwenye yahikalawo athu amodha ooliba murima Zadoki aatajhihiye, ninga Jeyoyada, Benaya vamodha ni anamaholela anlogo naamwaana Ezarayeli owakwana 22, yamukavihera Davidi. — 1 Cró. 11:22-25; 12:26-28. Namasugwera 07/24 epaddi 3 ddima 5-6

Saawulu ooTarsu, oothabwa waharahara makiristawu. Monelo wa makiristawu owinjhiva, Saawulu kafwanelela oleveleliwa, teto aali muthu ahande okaviheriwa ofiyedha osaddula mweddelo waye. Mbwenye monelo wa Yesu wahihiyana ni moonelo waathu amodha. Yesu ahinona wi Saawulu eere wanda osaddula egumi yaye ni othwaruwa. Yesu ni Yehova yowoona wi Saawulu ahikanna dhikalelo dhapama. Bumwahaya Yesu adhe awogege eraga: “Mulobwana oyo amusakule dimiyo.” (Dho. 9:15) Yesu ahifiyedha werana matikiniho wihina amukavihere Saawulu othwaruwa. (Dho. 7:58–8:3; 9:1-9, 17-20) Saawulu anoniwe ninga murumiwi Pawulo nuukala mukiristawu, ohoniha dila dhowinjhivadhene wihina ootamalela opama wa Yehova ni wa Yesu. (1 Tim. 1:12-15) Labo dhaala Pawulo onona wodhela yothega yonyakavala eerilena mulobwana dhaala aali mulogo woKorintiyu. Mulobwana oyo eere oraruwa mbwenye odidela okala mmulogoni. Ethu baani eerilena murumiwi Pawulo? Ethu Pawulo aalebeliye akudda Korintiyu enonihudhiha makalelo Yehova anonihiye odhivela mwaha wasinyusa adhaari aye ni makalelo anamooniye thagaraga muthu athwaruwa. Namasugwera 08/24 epaddi 13 ddima 15-16

Muwari mwa yakadhene Yehova uhoniha makalelo athu yafuniwa wandana nuliye. Mwaana a nabiili a Adawu ni Eva daali obajha omuroromela Yehova nupadduwa dhithu ndhe mu Ideni. Ni makalelo baani? Mwaha Abeli omudhivela Yehova oosayela omuhagalasa ni wandana ni oliye, bumwahaya adhe ampahelege mukutho. Abeli aali namakukula, bumwahaya owalabihedha mambila aaye wihina ampahele Yehova mukutho. Yehova akala aavi? Oliye ‘ahihagalala ni Abeli vamodha ni mukutho waye.’ (Gén. 4:4) Yehova oorumedha mukutho dhimodha dha athu ororomeleya ni yamudhivela ninga motajhiha, Nowe. (Gén. 8:20, 21) Mwaha woorumedha mukutho ndha Yehova ohoniha wihina athu ohulogomana podi wandana ni oliye ni onfiyedha. Namasugwera 08/24 epaddi 3 ddima 5-6

Iyo podi okala owukuwene ni ootakaleliwene neddihiwaga mwamakalelo abure. (Ecl. 7:7) Adhaari owinjhiva a Yehova yaali oororomeleya, ninga Jo ni Abakuki yaheddihiwa mwamakalelo abure, teto aliwa yahukuuwa ni yaali ootakaleliwene. (Jó 6:2, 3; Hab. 1:1-3) Bumwahaya okala owukuwene ni ootakaleliwene neddihiwaga mwamakalelo abure, kahi ethu yabure. Mbwenye nnohowela okala pasope wihina naherena ethu-sithu yanitatamulele makathamiho mamodha. Malabo mamodha, enakala ninga athu enaneddiha mwamakalelo abure, kinasinyusiwa. Mwaha wa yeyo, iyo podi wambela wanganyedha akala niherana yothoma yapama ohumuwelihedha muthuya kunyawunya. Kasugwa yaapadduwe ni Salimista dhaala, oliye owawoona athu yerana dhithu dhabure dhewa dhoweddelaga pama, mbwenye ale yerena dhithu dhapama yakala ninga dhewa kadhaweddela pama. Oliye owoga eegi: ‘Ala baathu abure yahinathuwathuwela ethu.’ (Sal. 73:12) Oliye ahithuwathuwa vanlubale mwaha woona obure ofiyedha wanganyedhaga akala yaali yapama omulabela Yehova. Oliye ofiyedha owoga egi: ‘Nuuxixa wonelamo dhithudha, kagandile wonelamo ethu.’ — Sal. 73:14, 16. Namasugwera 11/24 epaddi 3 ddima 5-7

Iyo nnomuthithimiha Yehova mwaha nnomuriha. Nihikanna dhithu dhohiyana-iyana dhinanithukulela omuriha Yehova. Oliye da kopolo dhatedhene, teto kopolo dhaye kadhinamala. (Sal. 96:4-7) Ohiya eyo, iyo podi woona thotho dha Yehova wodhela osugwa dhithu apaddusiliye. Duliyene anipaddusile, teto duliyene ananivaha dhithu dhatedhene nnahowelihu wihina nikalegewo. (Ovuhu. 4:11) Yehova dororomeleya. (Ovuhu. 15:4) Dhatedhene oliye aneriyena dhinomweddela pama, teto apaganya werana ethu-sithu, oliye anowakwanihedha. (Jos. 23:14) Kahiyo ebewene, namavuhulela Jeremiya awogiliye wodhela Yehova eegi: “Vaari va malogo aatene athotho ni omweniwa, kaavo analigana ni nyu!” (Jer. 10:6, 7) Mohanganyedha nihikanna dhithu dhowinjhiva dhinanithukulela omuriha baabihu odhulu. Mbwenye Yehova kahi Mulugu anafwanela baahi orihiwa, mbwenye nnofwanelela omooniha wi nnomudhivela. Nnomuthithimiha Yehova mwaha nnomudhivela vanlubale. Namasugwera 01/25 epaddi 3 ddima 5-6

Amwiddani a Mulugu enoxixa werana dhithu dhinathukulela athu wubuwela wi dhithu dhapama dhinereya munikuruni na Yehova sabure. Motajhiha, iyo nnohudhera mBibiliyani wihina adhaari a Yehova enohowela okala oweela epaddi yomwilini, yomuzimuni ni yomubuweloni. Teto Bibiliya anawoga wihina muthu di muthu anerana ethu yabure, nuwindo ahithwaruwa, kanahowela okala mmulogoni. (1 Kor. 5:11-13; 6:9, 10) Mbwenye woona wihina iyo nnowiwelela nlamulo nna, amwiddani ehu enowoga wihina iyo kaninna odhivela ni athu amodha. Teto enowoga wihina nnowatoriha ni kannamurumedha muthu di muthu ahinaligana ni iyo. Kumudduwale muthu anaharahara nikuru na Yehova. Saddana dhinavuwiha dhowoota wodhela nikuru nehu, oliye di “baabi owoota.” (Juwa. 8:44; Gén. 3:1-5) Bumwahaya kannatikina naamoonaga Saddana aalabihedhaga athu amodha wihina evuwihege dhowoota wodhela nikuru nehu. Siyeyo yapadduwile ni Yesu teto ni makiristawu ansaka noobajha. Namasugwera 04/24 epaddi 10-11 ddima 13-14

Mahoso manlubale yabajha, podi wera athu amodha yonile ogujhuliwa wa ‘Babiloniya Munlubale’ enere wubuwela wi Anamoona a Yehova yowogesa wi ele yere opadduwa. Nerege mwaha wa yeyo athu amodha enerege ofuna ohudhera wodhela Yehova ni osakula omulabela? (Ovuhu. 17:5) Akala athu amodha enere othoma omulabela Yehova, eyo kinantikinihe, mwaha wi ethu ninga yela yahipadduwa Wijipitu mudhidhi wa Moyizeji. Mudhidhi amwaana Ezarayeli ekumaga Wijipitu, ‘athu owinjhiva yahali amwaana Ezarayeli yahahara.’ Podi wera athu amodha yabanjhe omuroromela Yehova nuwoona wi mulili ndhe kumi Moyizeji aawogiliye dhahipadduwa. (Êxo. 12:38) Vano ethu ninga yela yapadduwa mudhidhi Babiloniya Munlubale agujhuliwa, nnere otakaleliwa ni wubuwela wihina aliwa kinafwanelela okala ni iyo? Naari kannatakaleliwe! Mwaha iyo nnafuna nikale ninga Babihu Yehova ali ‘Mulugu athagaraga ni oohaguvela onyanyuwa, oojheha, anna odhivela ohunamala ni eebaribari.’ — Êxo. 34:6. Namasugwera 05/24 epaddi 11 ddima 12-13

Ddiniyani yanipadduwele, nahere ‘naasukuma madhu eebaribari?’ Kasugwa ethu yapadduwile nsaka noobajha. Makiristawu dhaala, yanna ovuwiha muselu dhowoota wodhela nlabo na Yehova ewogaga wi nihifiya. Podi wera yahakela karta nakala ninga naalebiwe ni murumiwi Pawulo. Vano makiristawu amodha oTesalonika orumedha dhowoota ndhe ni wambela wawaddela addibila wodhela muselu ndhe dhowoota. Yahere makiristawu ale yubuwela dhithu yahudheriwa ni murumiwi Pawulo, kayalekethiwe ni muselu ndhe dhowoota. (2 Tes. 2:1-5) Mwaha murumiwi Pawulu ahawaddela wihina addibila ale, enarumedhege muselu bu muselu eniwiwa. Teto wihina aakavihere wi yahilekethiwe, murumiwi Pawulo omuleba asinaturaye egi: ‘Ala malojhelo aaga miyo Pawulo, ginaalebimi ni mada aaga. Enoniha makarta aatene ginalebimi, ola mulebelo waaga.’ — 2 Tes. 3:17. Namasugwera 07/24 epaddi 12 ddima 13-14

Makiristawu yaali mEberewu yohowela ovilela wihina yande owanana dhoweha dhaafwanye nuuroromeleya. Naarive kale amodhaya egafwanyiwe oharahariwa, owinjhiva wa aliwa yaathomile okala makiristawu mudhidhi yanniwana mwana murenddele. Bumwahaya murumiwi Pawulo ahawubusedha wihina yohowela okala owiwegeredha wihina yande owanana oharahariwa ni okala oororomeleya ofiyedha okwa, ninga yampadduwele Yesu. (Ebe. 12:4) Mudhidhi makiristawu yenjhedhedheyaga, maJudewu yaharahara weraga othabwa otakaleliwa ni okala oowali mwaha maJudewu owinjhiva othoma okala makiristawu. Teto maJudewu ookwaranya 40 “opangana wihina empe ni olibela othukula nibili wodhela ohujha newene ohung’wa ethu ofiyedha ompa Pawulo.” (Dho. 22:22; 23:12-14) Naarive makiristawu ale yiddiwaga ni eharahariwaga aliwa yohowela odidela otugumana, olaleya muthenga dhapama ni olibiha nroromelo newa. Namasugwera 09/24 epaddi 12 ddima 15

Juwawu aali murumiwi Yesu amudhiveliye vanlubale. (Mat. 10:2) Juwawu eeddesa ni Yesu mudhidhi waamutene. Bumwahaya ahawona matikiniho ohiyanahiyana ni ahikala ni Yesu mudhidhi worusa. Oliye ahimoona Yesu akomeliwaga vantxikwani na goyi ni nuvenyihiwa muukwani. Teto oliye ahoona mudhidhi makiristawu yenjhedhedheyaga. Ohiya eyo, oliye ahikalawo mudhidhi wowinjhivene wihina oone “muthenga dhapama dhilaleyiwaga dhopaddusiwa dhatedhene dha veelaboni yavati.” (Kol. 1:23) Nuwuluvala, murumiwi Juwawu ahikanna oneti woleba livuru notikiniha na Ovuhulela. Livuru nna nnodhana ‘dhovuhulela dha Yesu Kiristu.’ (Ovuhu. 1:1) Teto Juwawu ohuleba livuru nnathukula ndina naye ni makarta mararu enoniwe ni ndina naye. Karta naye nanatharu, aamulebele mukiristawu ithaniwa Gayu, Juwawu omudhivela vanlubale oliye ni amoona ninga mwanaye. (3 Juwawu 1) Dhithu alebile Juwawu, dhinowalibiha vanlubale anamahara a Yesu ofiyedha peeno. Namasugwera 11/24 epaddi 12 ddima 15-16

Mulobwana anamudhivela mwariye, anamoona ninga nvaho onadhela wa Yehova. (Pro. 18:22; 31:10) Bumwahaya kanahiya omweddiha nuupama vamodha ni nriho ni mudhidhiya wogonihana. Mwaha womuriha mwariye, oliye kanaamuwaddihedhe mwariye werana ethu oliye ahinafuniye, anooniye ninga yonyakavala ni enamunyemeliha mubuwelo waye. Ohiya eyo, mulobwana anamuriha mwariye anere wilibihedha okanna mubuwelo wapama vamentoni va Yehova. (Dho. 24:16) Alobwana otela, Yehova onohagalala mwilibihedhaga wariha amwaarinyu wodhela dhowoga dhenyu ni dhowera dhenyu. Bumwahaya othome ohiselela omuriha mwariyo wodhela oherana ethu-sithu yampihe mbani obe omuukula. Ohiya eyo, omweddihege nuupama, ninriho ni omonihege wi onomudhivela vanlubale. Werana eyo, mwariyo anere wonelamo wi onomudhivela ni onomuthuwathuwela. Bumwahaya, odidele omuriha mwariyo wihina obarele wandana onniwena ni Yehova. — Sal. 25:14. Namasugwera 01/25 epaddi 13 ddima 17-18

Ethu enahiyaniha nlogo na Yehova ni ale enawoga wihina makiristawu, sowihina nlogo na Yehova enoviheyana mabasa oolaleya. Ki vano, enaanikavihere ddi wapara mabasa oolaleya nuuviheya obe wenjhedhedha oviheya wehu ni mabasa oolaleya? Iyo podi okanna efunelo yowapara mabasa oolaleya nuuviheya wodhela ohudhera yotajhiha ya Yesu. Oliye oowaviheyana mabasa aye oolaleya, teto ahudhere oviheyana wula nuuvira mudhidhi. Va yoladdaniha dhaala awogiliye, Yesu ahaladdaniha mabasa oolaleya ni mulobwana dhaala anasamalela mundda wa nfigera. Mulobwana oyo amusorihile Yesu ahimala yaka 3 alimaga mundda wa nfigera, mbwenye kayakumile newene yowima modha. Ni makalelo mamodhave Yesu ahimala yaka tharu aalaleyaga maJudewu, mbwenye owinjhiva wa aliwa kiyarumedhile muthenga aalaleya Yesu. Teto ndala ninga mulobwana ole ahaselele mundda ole wa nfigera, Yesu kaselele wapara mabasa oolaleya. (Luk. 13:6-9) Ohudhera ni otajhiha dhithu Yesu ahudhihiliye, winere onikavihera odidela wapara mabasa oolaleya nuuviheya. Namasugwera 03/25 epaddi 14-15 ddima 1-4

Ki akala ohumala onfwanya muthu onanfuniwe? Nerege onohowela waguvela omwaddela wi ononfuna? Bibiliya anihina, muthu athotho anorajhiha wubuwela ahinathi owoga. Bumwahaya, yere okala yathotho omunona pamadhene muthuya ohunathi omwaddela wi ononfuna. Onande aavi omusugwa obe omunona pamadhene muthu, wula oliyeya ahinonaga? We podi werana eyo mwakala mmutugumanoni obe muthuya akala naakwaye. Mudhidhi ninga yoyo, onere okanna ofuru wowona ekalelo yaye, akala dowithwelavo epaddi yomuzimuni obe naari ni makalelo aneriyena dhithudha. We podi wikoha: “Akwayeya baani? Anathapanyesa wodhela ddi?” (Luk. 6:45) “Dholuba dhehu dhimodhave?” We podi othapanya ni anamaholela mulogo aye obe ni addibila amodha owithwelavo epaddi yomuzimuni emunonne pamadhene muthuya. (Pro. 20:18) Teto we podi wakoha athu amodha wodhela mweddelo waye. (Rute 2:11) Mbwenye wamusugwaga obe wamunonaga muthuya, onohowela okala pasope wi ohuthabwege omusugwa mudhidhi waatene. Teto kuthabwege ovolowela muselu dha mwigumi mwaaye. Namasugwera 05/24 epaddi 22 ddima 7-8

Anamaholela mulogo kinathamagela werana yothoma yubuwelaga yubuwelaga wihina namatheegaya kanaathwaruwe. Amodha podi wera enoothwaruwa labo noobajha enaathapanyiwa ni anamaholela mulogo, mbwenye amodha enohowela mudhidhi wowinjhivene wihina yonelemo wi ethu yeriliwana sabure. Bumwahaya anamaholela mulogo enohowela othapanya ni muthuya ohiya dila modha baahi. Podi wera dila yobajha anamaholela mulogo enamuthapanyiwana oliye anobajha wonelamo wihina oherana yothega enlubale. Nuwindo, anobajha olobela wa Yehova asayelaga nlevelelo. (Sal. 32:5; 38:18) Ndo, anamaholela mulogo yahogolowela omuthapanyana anowoniha wihina ohuthwaruwa mohiyana ni dila yoobajha. Wihina emukavihere muthu atheegile anamaholela mulogo enomweeddiha nuupama ni enowoniha wihina enoompwatha. Aliwa enolobela wihina Yehova areelihe wilibihedha waye teto enojheha wihina ddibiliwa anere wonelamo yothega yaye nuwindo athwaruwe. — 2 Tim. 2:25, 26. Namasugwera 08/24 epaddi 22-23 ddima 12-13

Yehova kanafuna wihina athu etolosiwe! Mbwenye oliye anafuna wihina athu etheegile ethwaruwe ni emuhogolowele. (2 Kor. 5:20) Bumwahaya Yehova adhe akongomedhege adhaari aye etheegile othwaruwa ni omuhogolowela oliye. Anamaholela mulogo ehikanna oneti wolaba vamodha ni Yehova wihina yakavihere ale etheegile othwaruwa. (Rom. 2:4; 1 Kor. 3:9) Kubuwelani makalelo Yehova, Yesu ni angero enahagalaliwa yamoona muthu atheegile agaathwaruwile! Thabwa-thabwa babi ehu Yehova anoothabwa ohagalala oonaga nimbila naye narimenle nihogolowelaga mmulogoni. Odhivela ninnihuna nuliye onowenjhedhedheya nubuwelaga thagaraga, nthebwa ni opama waye wohinifwanelela ananoonihiye. — Luk. 1:78. Namasugwera 08/24 epaddi 31 ddima 16-17

Yesu ahere arumedha ohaba omwene, oliye eere wivolosiha ni muselu dha pulitika dha maJudewu ni aRomano. Mbwenye Yesu kaarumedhe wivolosiha mpulitikani newene ohaba omwene. Ninga anawogela Bibiliya, Yesu “ovenyavo odhowa omwangoni.” Naarive Yesu awaddihedhiwaga wivolosiha mpulitikani, oliye kaarumedhile. Ddiniyani nnahudherihu ni ele erilena Yesu? Ebaribari wi peeno kavo ananilobe wi nawerena matikiniho owenjhedhedha pawu obe wavulumusa aredda. Teto kaavo ananiwaddihedhe wi nikale amwene. Mbwenye iyo podi owaddihedhiwa osakula partidu obe okavihera mubuwelo wa athu amodha, enubuwela baani anakale namathonga apama. Mbwenye yopadduwa ya Yesu enonikavihera werana yothoma yapama. Oliye ahikoodda wivolosiha mpulitikani. Teto nlabo dhaala oliye ahifiyedha owoga eegi: “Omwene waaga kahiyo weelabo yela.” (Juwa. 17:14; 18:36) Ninga makiristawu nnafuna nubuwelege ndala ninga Yesu. Bumwahaya iyo nnakavihera baahi Omwene wa Mulugu. Teto nnalaleya ni nnalobela wodhela Omwene yoola. — Mat. 6:10. Namasugwera 12/24 epaddi 4 ddima 5-6

Wahudheraga osayele makalelo oparihedha mabasa mwigumini mwawo dhithu ohudheriwe. Motajhiha, we podi otajhiha wogowa wa Yehova wodhela ohumweddiha muthu di muthu ni nsakulo. Ohiya eyo, we podi otajhiha odhivela wa Yesu awonihiliye aBabe ni athu amodha. Makalelo apama otajhiha odhivela wa Yesu, fuudhela werana ele Yehova anafuniye ni wakavihera athu amodha, naarive erusaga werana eyo. Makalelo mamodha, fuudhela walaleya athu amodha wihina ekanne ofuru wohudhera dhithu dhotikiniha Yehova anawereliye athu ni eroromele yowobola. Nahudheraga wodhela yowobola, nnerege othabwa omudhivela Yehova ni Yesu. Yokumelelavoya, sowihina Yehova vamodha ni Yesu enerege othabwa onidhivela. (Tiya. 4:8) Bumwahaya, nnafuna nlabihedhe pama dhipano ananivaha Yehova wihina nididele ohudhera wodhela yowobola. Namasugwera 01/25 epaddi 25 ddima 16-17

Yolebela ya peeno podi otapuleliwa ayi: ‘Nyu muhuvenyihavo dhothega dhaaga dhatedhene vamentoni venyu.’ Madhu ala enowoniha wihina Yehova anovokedha wolapela dhothega dha muthu athwaruwile ni kanahogolowela wubuwela ethu eriliyena. Madhu aasorihile mwene Ezekiya, podi otapuleliwa ayi: ‘Nyu muhurimeliha dhothega dhaaga vano okalaga ninga kaginuthegelegeni.’ Bibiliya anowogave wodhela muselu ola wolevelela alabihedhaga yoladdaniha emodhaya enafwanyeya va Miqueias 7:18, 19. Yolebela ela enihina Yehova anovokedha dhothega dhehu mburo wooddiha wa niya. Kale ethu-sithu yamorela mburo wooddiha muniya, yorusa vanlubale ofwanya ethuya. Dholaddaniha ndha, dhinonihudhiha wihina Yehova anilevelela dhothega dhehu, anonirula mutholo onaninyemela mwaha werana yothega. Enoligana ni madhu aawogile Davidi egi: “Oohagalala baathu yaale yenrena dhithu dhabure enoleveleliwa, teto dhothega dhewa dhibibiddeliwe.” (Rom. 4:7) Mohanganyedha wula olevelela webaribari! Namasugwera 02/25 epaddi 9 ddima 7-8

Peeno velaboni yavati ohukalawo parayizu muli athu enerena dhithu dhapama. Mparayizuni muna muhukalamo matxikwi ni matxikwi aathu enajhavo murenddele weebaribari, teto athu enafwanyeya mparayizuni muna ehithoma ohukumamo. Ohiya eyo, aliwa enofuna wihina athu owinjhiva evolowe mparayizuni muna. Parayizu baani nnamuwogihu vala? Parayizu oomuzimuni! Sotikiniha vanlubale onona wi Yehova ohumwegeredha parayizu oomuzimuni enakalamo adhaari aye ni murenddele vamodha ni wiwanana, naarive nikalaga mwilaboni muna yabure ni yowopiha enathongiwa ni Saddana ni muhili odhivela. (1 Juwa. 5:19; Ovuhu. 12:12) Mulugu ehu oodhivela anowoona dhithu dhabure dhinapadduwa mwilaboni muna, mbwenye oliye anonibarela wihina nidhowegeve nimulabelaga nuuhagalala. Bibiliya anomuliganiha parayizu oomuzimuni ninga ‘nikungu nothawelawo’ ni ‘mundda onaheliwa manjhe pamadhene.’ (Isa. 4:6; 58:11) Mwaha oreelihiwa ni Yehova, athu enakala mparayizuni oomuzimuni enohagalala ni eli oobareleyene. — Isa. 54:14; 2 Tim. 3:1. Namasugwera 04/24 epaddi 20 ddima 1-2

Akala we onofuna otela obe oteliwa, mwebaribarene ohulobela wodhela muselu oyo. Ebaribari wi Yehova kanapaganya wuvaha muthu oofwanelela wi mutelane. Mbwenye oliye anonisamalela epaddi yomubuweloni ni anonivaha ele nnahowelihu teto anere wukavihera onfwanya muthu oofwanelela. Bumwahaya omwaddelege Yehova dhithu onafuniwe ni onubuweliwe. (Sal. 62:8) Olobele olobaga wi okale muthu oovilela ni athotho. (Tiya. 1:5) Naarive ehoweleyaga ojheha mudhidhi wowinjhivene wi onfwanye muthu oofwanelela, Yehova anopaganya odhowagave anisamalelaga epaddi yomwilini ni yomubuweloni. (Sal. 55:22) Mbwenye onohowela okala pasope, kuwenye wi muselu ola wotela okale wathima vanlubale mwigumini mwawo. (Fil. 1:10) Mwaha wihina wegi okale oohagalala, kunahowela okala muddiye obe naari otela obe oteliwa, mbwenye ohagalala weebaribari onadha mwaha wandana wawo onniwena ni Yehova. (Mat. 5:3) Mwaha okala muddiye we onere okanna ofuru wowawenjhedhedha mabasa awo onampareliwe Yehova. (1 Kor. 7:32, 33) Bumwahaya olabihedhe pama mudhidhi wawo. Namasugwera 05/24 epaddi 21 ddima 4; epaddi 22 ddima 6

Mudhidhi mungasi munafuninyu omala nvevanaga? Neragana dhithudha ni marulu dhehu kadhinaneddela pama. (Pro. 21:5) Bumwahaya omwenddi weenyu onohowela olegela wihina munonane pama. Mbwenye kahi othabwa olegelawa, mwaha Bibiliya anihina: ‘Ethu nnajhehihu yahereya enopiha mbani.’ (Pro. 13:12) “Ethu emodha ginahowelimi ohudhera wodhela oliye, wihina gande werana yothoma yapama siivi?” Akala ohaanona athu enavevana, onakavihere aavi? Makalelo apama owerana eyo, fuuwawithana wihina mwaajhe vamodha vaade vawo, okala vamodha labo na ohudhera weenyu weemudhi ni waredha vamodha. (Rom. 12:13) Teto iyo, podi wakavihera wodhela wavelela wihina enaakale yekiwa, wavaha boleya obe waaboliha nyumba yehu wihina ethapanye, wula naasugweraga. (Gal. 6:10) Ale enavevana yuloba wihina wavelele, orumedhe, mwaha eyo enere wakavihera. Okale pasope wihina onahiye yekiwa, mbwenye wavahege mudhidhi wihina ethapanyedhege muselu dhewa dhathima. Namasugwera 05/24 epaddi 30 ddima 13-14

Anamaholela mulogo enosayela onona ethu emuthukulele muthu yole ofiyedha otheega. Nerege wandana anniyena ni Yehova wera oridha? Nerege oliye vang’ono vang’ono eere ohiya omuhudhera Bibiliya ni odhowa mmalaleyelo? Eere ohiya olobela wa Yehova kadda labo? Nerege eere ohiya owanana ogonjhiha dhithu dhabure? Anaaredhesa nnaani? Anaaredhesa ni dhithu baani? Dhithu ndha dhivolowele aavi mubuwelo waye ni murima waye? Oliye anowonelamo wihina dhothoma dhaye ni dhowera dhaye dhinomukuula Yehova Mulugu? Anamaholela mulogo podi omukoha dhithu dhinamukavihere wubuwela dhithu dhimuthukulele oridhiha wandana waye ni Yehova ni dhimuthukulele otheega. Ebaribari wihina aliwa enaamukohege nuudhivela mbwenye kinahowela omukoha dhithu dhihinahoweleya onona. (Pro. 20:5) Teto aliwa podi olabihedha yoladdaniha wihina emukavihere muthuya opendda wihina oonelemo wi ele eeriliyena sabure. Yerana ndo dila yoobajha enaathapanyiwa nuliye, podi wera anere wonelamo wihina ele eriliyena sabure. Ndo podi othwaruwa ni murima waatene. Namasugwera 08/24 epaddi 22 ddima 9-11

Yesu oolaleya nuviheya “muthenga Womwene,” mwaha ahinona wihina ele yaali efunelo ya Yehova. Mabasa oolaleya yaali athima mwigumi mwa Yesu. Bumwahaya naarive ahalaga neena nuupiwa, Yesu ahididela weedda “sidadi ni sidadi, murudda ni murudda” aalaleyaga athu muthenga dhapama. (Luk. 13:22) Yesu ahaxagiha anamahara aye wihina yaparege mabasa oolaleya nuviheya ndala ninga oliye. (Luk. 10:1) Peeno, mabasa oolaleya muthenga dhapama enodhowave ekalaga mabasa athima, teto Yehova ni Yesu enafuna wihina nididele wapara nuviheya. (Mat. 24:14; 28:19, 20) Iyo podi oviheyana mabasa oolaleya wodhela okanna moonelo mmodhave anna Yehova wodhela ohasakula athu. Mwaha Yehova anafuna wi athu owinjhiva evuruwane muthenga dhapama wi evuluwe. (1 Tim. 2:3, 4) Bumwahaya oliye anonikavihera owomihedha makalelo ehu oolaleya. Naarive athuya yahimulabelaga Yehova, aliwa podi okanna ofuru yowiwa muthenga dhapama mahoso manlubale yahinathi wambela. Namasugwera 03/25 epaddi 15-16 ddima 5-7

Kadda mukiristawu podi othoma mowiwanana ni mubuwelo waye oxagihiwe ni Bibiliya akala anere omulojhela obe naari. Athu amodha podi omulojhela obe podi owoga yegi odha wawo wapama. Mbwenye kannafuna ojha mudhidhi wowinjhiva nuliye obe okala vamodha neragana dhithu dhimodha. Athu amodha podi wikoha yegi: ‘Bibiliya kanawoga wihina kanalojhelegeweene?’ (2 Juwa. 9-11) Mowiwanana ni versu ndha, dhinawagana mapostata ni athu enathukulela amodha werana dhithu dhabure. (Ovuhu. 2:20) Bumwahaya, anamaholela mulogo kinaamwaredhelege muthu yole ali apostata ni anathukulela amodha werana dhithu dhabure. Naarive dhigaali ndo, ehikalawo ejhehedhelo wihina aliwa enere othwaruwa ni osaddula ekalelo yewa. Mbwenye yahithwaruwa, kannalojhelege newene kannawithanelege omutugumanoni. Namasugwera 08/24 epaddi 30-31 ddima 14-15

Yesu numala ojhiha muthithi waathu, oliye waloba anamahara aye wihina edhowe oKafarnawu ni mwanddeya, mbwenye Yesu othoma ohala. Nuwindo odhowa yeeka omwangoni. Ni makalelo yaala, oliye ahanda wasukuma athu yafuna omuhabiha omwene. (Juwa. 6:16-20) Mudhidhi Anamahara ale yabuwaga niya, wambela nipevo ninlubale naatonte otekuma wa niya. Vano Yesu odhowa waaliwa eeddaga vadhulu vamanjhe. Oliye omwithana murumiwi Peduru wihina adhowe waali Yesu eeddaga vadhulu va manjhe. (Mat. 14:22-31) Vano Yesu nuugwela mmwanddeyani nipevo nne omaalawo. Anamahara ale otikina vanlubale ofiyedha owoga yeegi: “Mwebaribarene, nyu muli Mwaana a Mulugu.” (Mat. 14:33) Sotikiniha onona wi anamahara ale, yawonge wi Yesu mwana Mulugu numoona eeddaga vadhulu va manjhe, ohiya mudhidhi enjhedhedhiye pawu. Kasugwa ethu yootikiniha asorihile Marku. Oliye onowoga eegi: “Aliwa otikina vanlubale, mwaha kayonelemo yotapulela wodhela pawu ndhe.” (Mar. 6:50-52) Mwebaribarene, anamahara ale kayanda wonelamo kopolo dhaatedhene Yehova anvahiliye Yesu wihina aweregena matikiniho ninga yaale. Namasugwera 12/24 epaddi 5 ddima 7

Makalelo mamodha owooniha wi nnomutamalela Yehova mwaha onidhivela, fuudhela olabihedha mudhidhi wowubuwela okwa wa Yesu wihina nimoonihe Yehova wi nnothabwa ovaha thima yowobola. Ohiya odhowa vamuthuponi wowubuwela okwa wa Yesu, nnohowela wawithana athu amodha wi nikale vamodha. Wawonelihemo dhithu dhinapadduwe nlabo nno nowubuwela okwa wa Yesu, athu onawithaniwe. Wafuna we podi wawoniha vidiyu enna musolo Yesu akwele ddi? obe Wubuwela okwa wa Yesu dhinafwanyeya mu jw.org. Anamaholela mulogo enohowela ompandda porogarama wihina yawithane ale edduddumadhe mmulogoni. Kubuwela ohagalala onakala odhulu ni elabo yavati, mwaha nimbila nimodha narimenle, ohogolowela mmulogoni! (Luk. 15:4-7) Bumwahaya nlabo nuwubuwela okwa wa Yesu, ohiya walojhelave addibilihu baahi, nalojhele thabwa-thabwa ale eli axa obe emanle mudhidhi wowinjhivene ehoonaga mutugumano. Nnafuna wihina aliwa yiwoonege ninga eli vadeviwa! — Rom. 12:13. Namasugwera 01/25 epaddi 29 ddima 15

Yowobola kinoniha baahi wogowa wa Yehova, mbwenye enonikavihera wonelamo wi Yehova anonidhivela vanlubale. (Juwa. 3:16; 1 Juwa. 4:9) Yowobola enonihudhiha wi Yehova anafuna wi nikalegewo ni mukalakala ni wihina nikose epaddi ya emudhi yaye. Kubuwela, Adawu nuuthega, oliye ohiya okosa epaddi ya emudhi ya Yehova. Bumwahaya aatene iyo nibaliwe nahikosaga epaddi ya emudhi ya Yehova. Mbwenye mwaha wa yowobola, athu aatene enathoma omuroromela ni omwiwelela Yehova, nlabo nimodha enere okosa epaddi ya emudhi ya Yehova. Mbwenye peeno, Yehova anolevelela dhothega dhehu ni anowenya wi nikanne wandana nuliye vamodha ni addibilihu. Teto kannahowela wanganyedha wi Yehova anonidhivela vanlubale! — Rom. 5:10, 11. Namasugwera 01/25 epaddi 21 ddima 6

We ohukanna ebaribari wihina yowobola nvaho wathima anivahile Yehova! (2 Kor. 9:15) Mwaha wa mukutho Yesu apelekiliye, ononikavihera okanna wandana wooliba ni Yehova. Ohiya eyo, yowobola ehifugula musiwo wihina nikanne ofuru wowakela egumi yamukalakala. Teto nihikanna dhithu dhowinjhiva dhinanithukulela omutamalela Yehova wodhela odhivela anitonyihedhiye mwaha ompeleka mwanaye anamudhiveliye wi anoobole! (Rom. 5:8) Vano wihina nididele wooniha otamalela wehu ninnihuna wodhela ele Yehova eriliyena, Yesu oloba wihina yaka dhaatedhene Nubuwelege Okwa Waye. (Luk. 22:19, 20) Yaka ela ya 2026, muthupo wowubuwela okwa wa Yesu, onaakale Txinayi labo na 2 a Abril. Mwebaribarene aatene iyo nnerege wiwegeredha wihina nikalevo nlabo nna navayekiwa. Teto nnere opurelamo pamadhene muthupo ola, naapenddaga dhithu Yehova ni mwanaye Yesu enanereliwa. Namasugwera 01/25 epaddi 20 ddima 1-2

Enowandeya odidela ohudhera wodhela odhivela wa Yehova ni Yesu enniwana ni iyo, niilibihedha opendda dhithu dhaatedhene eneriwana ofiyedha peeno Yaka ela ya 2026, we podi wileri nupwaseya livuru nimodha obe malivuru mateene a envajelyu muthupo wowubuwela okwa wa Yesu wahinathi ofiya obe wavira. Mbwenye kuwilerigi kapitulu dhaatedhene mudhidhi mmodhave. Ohiya eyo, kuwaguvihege, mbwenye wilerigi vang’ono vang’ono wihina ofwanye dhithu dhinukavihere wenjhedhedha odhivela onniwena ni Yehova vamodha ni Yesu Teto kuddiwale wawaddela athu amodha dhithu onahudheriwe. Akala we obaddiziwa yakadhene mundduli, podi wera onubuwela wi kaawo ethu exa onahoweliwe ohudhera wodhela wogowa wa Yehova, odhivela waye ni yowobola. Mbwenye ebaribariya sowihina dhihikalawo dhithu dhixa nnahowelihu ohudhera wodhela muselu ndha. Wilibihedhe wawileri malivuru ehu, vano wahonelamo pama museluya, osanyiheve. Namasugwera 01/25 epaddi 24-25 ddima 13-15