Aacitwaline yakaenekela ukuti yalatwalilila ukuya ni nsansa wakwe ziizi kwene zino yakweti lino yatwalananga. Nupya vii vingacitika. Aina Klistu aatwalana mpiti nupya aakaombesya ukulondela ivisinte vya muli Baibo yamanya ukuti vingacitika.

1. I vyani vino Baibo ikanena ya iya ukucita?

Yeova wapeela ya iya umulimo wa kutungulula ulupwa. (Belengini Efeso 5:23.) Yeova akalonda ya iya ukupingula pa vintu umu nzila iingazwa amu lupwa yonsi. Baibo ikanena ya iya ukuti: “Twalililini ukutemwa aci inu.” (Efeso 5:25) Uzye amazwi yaa yakapiliula cani? Iya uwaya nu kutemwa lyonsi akalanga icikuuku kuli mamakwe, lino yali pa ng’anda na lino yali na antu yauze. Akamucingilila, ukumulenga ukuya ni nsansa nupya akamupeela vyonsi vino akulondekwa. (1 Timoti 5:8) Ni cicindame sana icakuti akamwazwa ukuya na ucuza usuma na Yeova. (Mateo 4:4) Wakwe, angapepa nu kubelengela pamwi nawe Baibo. Ndi cakuti iya akusakamala umuci, akatwalilila ukuya cuza wakwe Yeova.—Belengini 1 Petulo 3:7.

2. I vyani vino Baibo ikanena aci ukucita?

Izwi lyakwe Leza likanena aci ukuti: “Umuci nawe alinzile ukucindika sana iya.” (Efeso 5:33) Uzye aci yangalanga uli ukuti yakacindika ya iya? Aci yangelenganya pa miyele isuma ino ya iya yakwata na pali vino yakaombesya ukuyasakamala pamwi na ana yao. Yangalanga ukuti yacindika ya iya ndi cakuti yakutungilila vino yapingulapo, ukulanda nayo umu cikuuku alino nu kulanda ivisuma pali aliyo nanti ya iya yasipepa Yeova.

3. Uzye atwalane yangakomya uli icupo cao?

Baibo ikalanda pa yatwalane ukuti: “Yoili yalaya umwili onga.” (Mateo 19:5) Cii cikupiliula ukuti yalinzile ukwezya na maka ukukanacita ivintu ivingalenga yate ukutemwana. Yangacita vivyo ndi cakuti yakuzanwa pamwi insita izingi nupya yakulanzyanya vino yakwelenganya na vino yakuyuvwa ukwaula ukupita umu mbali. Yatalinzile ukuleka icili consi nanti aliwensi kufumyako sile Yeova ukuya icicindame ukucila ya iya nanti aci. Yalinzile ukucenjela kuti yataya sana na ucuza nu muntu wino yatatwalana nawe.

 LONDELEZYINI NA VYUZE

4. Mwe ya iya mwatemwa nu kusakamala sana aci inu

5. Mwe yaci mwatemwa nu kucindika ya winu

Baibo ikakomelezya aci ukucindika ya iya asi mulandu yakaombela Yeova nanti foo. Belengini 1 Petulo 3:1, 2, alino mulanzyanye mauzyo yaa:

• Ndi cakuti ya winu yasiombela Yeova ukwaula nu kutwisika mukalonda ukuti yakatandike ukumupepa. Inzila ci isuma ino mukulola ukuti ingaomba pakuti muyazwe ukutandika ukuombela Yeova? Uzye ukulayasimikila lyonsi nanti ukuya ni miyele isuma, icikuuku alino nu kuyacindika? U mulandu ci?

Ya iya na aci yangaombela pamwi pakuti yapingulapo ningo pa vintu. Nanti ciye vivyo insita zimwi umuci angakana ukuzumila vino iya walanda. Umuci angalondolola vino akwelenganya ala atateeka umwenzo nupya umu mucinzi, nomba alinzile ukwiusya ukuti Yeova wapeela ya iya umulimo wakupingula pa vintu ivingazipila ulupwa. Alinzile ukwezya na maka ukutungilila vino iya wapingulapo. Ukucita vivyo kungalenga umu  lupwa muye insansa. Belengini 1 Petulo 3:3-5, alino mulanzyanye iuzyo lii:

• Uzye Yeova akauvwa uli ndi cakuti umuci akucindika iya?

6. Mungacimvya intazi umu cupo cinu

 VINO TWASAMBILILA

Iya nu muci yangaya ni nsansa ndi cakuti yakutemwana, ukucindikana nu kulondela ivisinte vya muli Baibo.

I vyani vino mwasambilila?

• I vyani vino iya angacita pakuti umu lupwa muye insansa?

• I vyani vino umuci angacita pakuti umu lupwa muye insansa?

• Ndi cakuti mwatwala nanti ukutwalwa, i cisinte ci ica muli Baibo icingamwazwa ukukomya icupo cinu?