ISAMBILILO 21
Vino Ilyasi Lisuma Likasimikilwa
Likwene sile, Yeova alaomvya Uwene wakwe ukufumyapo intazi zyonsi zino tukakwata. Lii i lyasi lisuma lino wensi alinzile ukumanya. Yesu walondanga alondezi yakwe ukunenako antu yonsi ilyasi lii. (Mateo 28:19, 20) Uzye ya Nte Yakwe Yeova yakacita uli vino Yesu walanzile?
1. Uzye ilembo lyakwe Mateo 24:14 likufikiliziwa uli ndakai?
Yesu wasoowile ukuti: “Lyasi lisuma lii ilya Wene lilasimikilwa umu nsi yonsi.” (Mateo 24:14) Ya Nte Yakwe Yeova yakaomba umulimo uu ucindame ni nsansa. Tukasimikila ilyasi lisuma umu nsi yonsi umu ndimi ukucila pali 1,000. Umulimo uu ukulu ukalondekwa ukuombesya nu kuombela pamwi. Tutange tuuombe ukwaula ukwazwa kwakwe Yeova.
2. I vyani vino tukacita pakuti tusimikile uku antu?
Tukasimikila konsi kuno tungazana antu. Wakwe vino aina Klistu ya kutandikilako yacitanga, naswe kwene tukasimikila uku “ng’anda ni ng’anda.” (Milimo 5:42) Ukuomvya inzila ii kukalenga twalanda na antu aingi sana cila mwaka. Pa mulandu wakuti asi lyonsi lino antu yakazanwa pa mang’anda, tukasimikila nu ku ncende ukukazanwa antu aingi. Lyonsi tukaezya na maka ukunena antu pali Yeova na pali vino akalonda ukucita.
3. Aaweni aakwata umulimo wa kusimikila ilyasi lisuma?
Aina Klistu ya cumi yonsi yakwata umulimo wa kunenako yauze ilyasi lisuma. Tukaika sana mano uku mulimo uno twakwata. Tukasimikila ukufika pano tungapezya pano twamanya ukuti umulimo uu, ungapususya maumi ya antu. (Belengini 1 Timoti 4:16.) Tusilipilwa lino tukuomba umulimo uu, pano Baibo ikalanda ukuti: “Mwapeezilwe sile uwila, namwe mwapeela uwila.” (Mateo 10:7, 8) Asi yonsi aakauvwa kuli vino tukasimikila. Nomba tukatwalilila ukusimikila pano tukauvwila Yeova nupya tukamuzanzya.
LONDELEZYINI NA VYUZE
Sambililini na vyuze pali vino ya Nte Yakwe Yeova yakasimikila umu nsi yonsi nu kulola vino Yeova akatwazwa.
Kusimikila umu nsi yonsi: (A) ku Costa Rica, (B) ku United States, (C) ku Benin, (D) ku Thailand, (E) ku Yap, (F) ku Sweden
4. Tukaombesya pakuti tusimikile antu yonsi
Ya Nte Yakwe Yeova yakaomvya inzila iziiyele pakuti yasimikile ilyasi lisuma ukuli konsi. Tambini VIDYO, alino mulanzyanye iuzyo ilyatililondelelapo.
-
I vyani vikamukomelezya pali vino ya Nte Yakwe Yeova yakaombesya lino yakusimikila?
Belengini Mateo 22:39 na Loma 10:13-15, alino mulanzyanye mauzyo yaa:
-
Uzye umulimo wa kusimikila ukalanga uli ukuti twatemwa yauze?
-
Uzye Yeova akayuvwa uli pali yayo aakasimikila ilyasi lisuma?—Lolini cikomo 15.
5. Tukaombela pamwi na Leza
Ivingi vikacitika vikalangilila ukuti Yeova aakatungulula umulimo witu. Wakwe, uku New Zealand umwina uwizina lyakuti Paul wazanyile mama umwi lino wasimikilanga uku ng’anda ni ng’anda kasanya. Ala katondo mama wii alakupepa kuli Leza ukuomvya izina lyakuti Yeova nu kuleenga ukuti umwi amutandalile. Ya Paul yatiile: “Lino papisile maawazi yatatu nafisile apa ng’anda pakwe.”
Belengini 1 Kolinto 3:9, alino mulanzyanye iuzyo lii:
-
Uzye ivikacitika, wakwe ivyacitike uku New Zealand vikalangilila uli ukuti Yeova aakatungulula umulimo wa kusimikila?
Belengini Milimo 1:8, alino mulanzyanye iuzyo lii:
-
U mulandu ci uno tukalondekwa ukwazwiwa na Yeova pakuti tuombe umulimo wa kusimikila?
Uzye imumanya?
Cila mulungu, pa kulongana kwa mukasi ka mulungu tukasambilila ivya kutwazwa lino tukusimikila. Ndi cakuti mwatala mwazanwapo pa kulongana kuu, uzye mukwelenganya uli pali vino tukasambiliziwa?
6. Tukalondela isunde lyakwe Leza ilya kusimikila
Mu nsita ya ina Klistu ya kutandikilapo, ya kakanya yezizye ukulesya alondezi yakwe Yesu kusimikila. Aina Klistu ya kutandikilako yacingilile insambu zyao izya kusimikila lino yaposile “insambu zya kusimikila ilyasi lisuma.” (Filipi 1:7) Ya Nte Yakwe Yeova yakacita ivili vimwi ndakai. a
Belengini Milimo 5:27-42, alino mulanzyanye iuzyo lii:
UMWI ANGAMUZYA UKUTI: “U mulandu ci uno ya Nte Yakwe Yeova yakasimikilila uku ng’anda ni ng’anda?”
-
Mungasuka mutuuli?
VINO TWASAMBILILA
Yesu wanenyile alondezi yakwe ukulasimikila ilyasi lisuma umu nko zyonsi. Yeova akwazwa antu yakwe ukuomba umulimo uu.
I vyani vino mwasambilila?
-
Uzye ilyasi lisuma likusimikilwa uli umu nsi yonsi?
-
Uzye umulimo wa kusimikila ukalanga uli ukuti twatemwa yauze?
-
Uzye mukwelenganya ukuti umulimo wa kusimikila ungalenga tuye ni nsansa? U mulandu ci?
LONDELEZYINI
Lolini vino ya Nte Yakwe Yeova yakasimikila umu misumba ikalamba.
I vyani vino ya Nte Yakwe Yeova yacita pa kwazwa imbutusi?
Uvwini vino umwi akulondolola vino waya ni nsansa pa mulandu wa kuomba umulimo wa kusimikila.
Lolini ivintu vimwi ivicindame vino amu cilye yapingwile ivyalenga ukuti canguke ukulaomba ningo umulimo wa kusimikila ilyasi lisuma.
a Leza aliwe watunena ukuti twasimikila. Fwandi ali mulandu uno ya Nte Yakwe Yeova yasipokela ulusa uku yamu uteeko pakuti yasimikila ilyasi lisuma.
Limwi Mungatemwa Ukulolako na Vii
MAUZYO YANO ANTU YAKAUZYA SANA
Uzye Isambililo Lya Baibo Ali Cani?
Zanini masuko ku mauzyo pali vino tukasambilizya antu Baibo ukwaula ukuyalipilisya.
