Lespri sin se lafors aktif Bondie. (Mishe 3:8; Lik 1:35, NTKM) Kan Labib dir ki Bondie avoy so lespri, savedir Li servi so lafors pou fer so volonte ninport kotsa.​—Psom 104:30; 139:7.

 Dan Labib, mo ki servi pou “lespri” an Ebre se rouah ek an Grek se pneuma. Bien souvan, sa bann mo-la fer referans ar lafors aktif Bondie, ouswa lespri sin. (Zenez 1:2) Me selman, dan Labib sa bann mo-la ena bann lezot sinifikasion osi, kouma par exanp:

•   Lavi.​—Abakuk 2:19; Revelasion 13:15.

•   Divan.​—Zenez 8:1; Zan 3:8, NTKM.

•   Lafors ki permet bann kreatir ki vivan azir.​—Zob 34:14, 15.

•   Latitid ouswa mantalite enn dimounn.​—Nonb 14:24.

•   Bann kreatir spiritiel, par exanp Bondie ek bann anz.​—1 Lerwa 22:21; Zan 4:24, NTKM.

 Tou sa bann sinifikasion ki nou’nn gete la fer referans ar enn kitsoz ki bann dimounn pa trouve, me selman nou kapav trouv lefe ki li ena. Lespri Bondie osi, li “parey kouma divan, ki invizib, ki pa kapav touse ek ki pwisan.”​—An Expository Dictionary of New Testament Words, by W. E. Vine.

 Labib souvan koz lor lespri sin Bondie kouma so “lame” ouswa so “ledwa.” (Psom 8:3, PKM; 19:1, PKM; Lik 11:20; konpar ar Matie 12:28, NTKM.) Parey kouma enn zouvriye servi so lame ek so bann ledwa pou fer so travay, Bondie finn servi so lespri pou fer sa bann kitsoz-la:

•   Liniver.​—Psom 33:6, PKM; Izai 66:1, 2.

•   Labib.​—2 Pier 1:20, 21, NTKM.

•   Bann mirak ki bann serviter dan lepase finn fer ek gran travay predikasion ki zot finn fer.​—Lik 4:18, NTKM; Zistwar Bann Apot 1:8, NTKM; 1 Korintien 12:4-11, NTKM.

•   Ed bann ki obeir Bondie pou ena bann zoli kalite.​—Galat 5:22, 23.

Lespri sin li pa enn dimounn

 Kan Labib fer referans ar lespri Bondie kouma so “lame” ouswa “ledwa,” li montre dan enn fason kler ki lespri sin li pa enn dimounn. (Exod 15:8, 10) Parey kouma enn zouvriye pa kapav servi so lame san so lespri ek so lekor; lespri sin osi pa kapav azir san direksion Bondie. (Lik 11:13, NTKM) Labib osi konpar lespri Bondie ar delo ek li asosie li ar bann kitsoz kouma lafwa ek konesans. Sa bann lide-la montre dan enn fason bien kler ki lespri sin li pa enn dimounn.​—Izai 44:3; Zistwar Bann Apot 6:5, NTKM; 2 Korintien 6:6, NTKM.

 Labib dir ki nom Bondie se Zeova ek nom so Garson, se Zezi Kris. Parkont, pena okenn plas dan Labib kot li dir ki lespri sin ena enn nom. (Izai 42:8; Lik 1:31, NTKM) Zis avan ki Etienn mor, li ti gagn enn vizion kot li ti trouv zis de personaz dan lesiel, pa trwa. Labib dir: “Me Etienn, ranpli ar Lespri Sin, get ver lesiel ek li trouv laglwar Bondie, ek Zezi pe dibout lor so kote drwat.” (Zistwar Bann Apot 7:55, NTKM) Se lespri sin, setadir lafors aktif Bondie ki ti permet Etienn trouv sa vizion-la.

 Seki dimounn panse: “Sintespri” ouswa lespri sin, li enn personaz ki form parti Trinite, kouma mansione dan 1 Zan 5:7, 8 dan Labib Nouvelle Segond Revisée (1978).

 Laverite: Dan Labib Nouvelle Segond Revisée (1978), 1 Zan 5:7, 8 servi sa bann mo-la: “Dan lesiel, Papa, Laparol, ek Lespri Sin: sa trwa-la form enn sel. Ek toule-trwa rann temwaniaz lor later.” Me selman, bann biblis finn dekouver ki lapot Zan pa finn ekrir sa bann parol-la, alor li pa sipoze dan Labib. Profeser Bruce M. Metzger ti ekrir: “Sa bann mo-la zot fos ek zot pena zot plas dan Nouvo Testaman.”​—A Textual Commentary on the Greek New Testament.

 Seki dimounn panse: Kan Labib koz lor lespri sin, li koumadir pe koz lor enn dimounn, ek sa prouve ki lespri sin li enn dimounn.

 Laverite: Se vre ki bann Lekritir parfwa koz lor lespri sin kouma enn dimounn. Par exanp, kan Zezi ti koz lor lespri sin, li ti dir ki li enn “asistan” (paraklêtos an Grek) ki pou donn bann prev, donn direksion, koze, ekoute, anonse, glorifie ek resevwar. (Zan 16:7-15) Me sa pa prouve ki lespri sin li enn dimounn. Kan Labib koz osi lor lasazes, lamor, ek pese, li koz lor zot koumadir li pe koz lor enn dimounn. (Proverb 1:20; Romin 5:17, 21, NTKM) Par exanp, Labib dir ki lasazes fer bann “aksion” ek gagn “rezilta,” ek li dir ki pese sedwir, touy ek tronp bann dimounn.​—Matie 11:19, NTKM; Lik 7:35; Romin 7:8, 11, NTKM.

 Seki dimounn panse: Kan nou batize o-nom lespri sin sa prouve ki lespri sin li enn dimounn.

 Laverite: Labib souvan servi lexpresion “o-nom” pou koz lor lotorite ek pouvwar. (Deteronom 18:5, 19-22; Ester 8:10) Li parey kouma an Franse, ena lexpresion “o-nom lalwa.” Sa pa vedir ki lalwa li enn dimounn. Ofet, enn dimounn ki batize “o-nom” lespri sin, li konpran rol ek pouvwar ki lespri sin ena pou ki volonte Bondie akonpli.​—Matie 28:19.

 Seki dimounn panse: Bann zapot Zezi ek lezot premie disip ti krwar ki lespri sin li enn dimounn.

 Laverite: Ni Labib, ni listwar pa dir sa. Encyclopædia Britannica dir: “An 381 Nou Lepok, se lavil Constantinople ki ti donn lexplikasion ki Sintespri li enn Dimounn, ek ki bizin ador li.” Sa ti pase 250 an apre lamor dernie zapot Zezi.