Wi, Diab li existe. Limem ki “diriz lemonn.” Li enn kreatir spiritiel ki’nn vinn move ek ki’nn rebel kont Bondie. (Zan 14:30, NTKM; Efezien 6:11, 12, NTKM) Labib ed nou pou kone kouma Diab ete gras-a sa bann nom-la ek sa bann deskripsion-la:

•   Satan, ki vedir “Opozan.”​—Zob 1:6.

•   Diab, ki vedir “Kalomniater.”​—Revelasion 12:9, NTKM.

•   Serpan, dan Labib li vedir “Sa Kikenn ki tronp dimounn la.”​—2 Korintien 11:3, NTKM.

•   Tantater.​—Matie 4:3.

•   Manter.​—Zan 8:44, NTKM.

Eski Diab li zis lemal ki ena dan nou?

 Sertin panse ki Diab se lemal ki ena dan sakenn parmi nou. Me selman, Labib koz lor enn konversasion ki ti ena ant Bondie ek Satan. Bondie li parfe, alor li pa kapav koz ar lemal ki ena dan Limem. (Deteronom 32:4; Zob 2:1-6) Dan mem fason, Satan ti tant Zezi, ki san pese. (Matie 4:8-10, NTKM; 1 Zan 3:5, NTKM) Alor, Labib montre nou ki Diab vremem existe, ek li pa zis enn reprezantasion bann kitsoz ki pa bon.

 Eski sa bizin etonn nou ki boukou dimounn pa krwar ki Diab li vremem existe? Non, parski Labib dir ki Diab tronp bann dimounn pou akonpli so lobzektif. (2 Tesalonisien 2:9, 10, NTKM) Enn parmi so bann pli gran piez se fer bann dimounn krwar ki li pa existe.​—2 Korintien 4:4, NTKM.

  Seki bann dimounn panse: Lisifer se enn lot nom pou Diab.

 Laverite: Mo Ebre ki sertin Labib finn tradir par “Lisifer” vedir ‘sa kikenn ki briye la.’ (Izai 14:12) Kontex sa verse-la montre ki sa lexpresion-la fer referans ar bann lerwa Babilonn, ki Bondie ti pou imilie akoz zot lorgey. (Izai 14:4, 13-20) Ti servi lexpresion “twa ki briye” pou boufonn bann lerwa Babilonn ki ti pou tonbe.

  Seki bann dimounn panse: Satan travay kouma “avoka” pou Bondie.

 Laverite: Diab, li lennmi Bondie, pa so serviter. Diab opoz li ar bann ki servi Bondie ek fer bann fos lakizasion kont zot.​—1 Pier 5:8, NTKM; Revelasion 12:10, NTKM.