Labib dekrir Zob kouma enn kikenn ki “personn pa ti kapav fer . . . okenn repros” ek ki “ti enn dimounn drwat.” (Zob 1:1) Labib apel Lot enn “dimounn drwat.” (2 Pier 2:8) Ek Labib dir ki David ti fer “seki drwat” devan lizie Bondie. (1 Lerwa 14:8) Selman, anou get lavi sa bann personaz Biblik la inpe plis an detay. Nou pou trouve (1) ki zot ti fer bann erer, (2) ki nou kapav aprann boukou ar zot lexanp, ek (3) ki bann imin inparfe vremem kapav fer Bondie plezir.

Zob ti gagn boukou leprev enn deryer lot ki ti paret inzis. Li ti ena bann fos lide, ek li ti panse ki Bondie pa kas latet mem si li kontign ena lafwa an Li ouswa non. (Zob 9:20-22) Zob ti ena tro konfians dan so prop zistis. Akoz sa lezot ti gagn linpresion ki koumadir li pe deklar limem pli drwat ki Bondie.​—Zob 32:1, 2; 35:1, 2.

 Lot ti ezite pou swiv enn linstriksion kler ek sinp. Lot ti bien deprime akoz bann dimounn dan Sodom ek Gomor ti bien imoral. Li ti mem “tourmante” akoz zot bann move aksion. (2 Pier 2:8) Kan Bondie ti anonse ki Li ti ena lintansion pou detrir sa bann move lavil la ek ti pou permet Lot ek so fami gagn lavi sov, kitfwa ou pe panse ki se Lot ki premie-premie ti pou kit lavil. Ofet non, dan sa moman inportan la, li’nn tarde pou azir. Bann anz ki Bondie ti avoye pou sov Lot ek so fami ti bizin trap zot lame ek tir zot andeor lavil pou ki zot an sekirite.​—Zenez 19:15, 16.

David ti mank metriz enn moman dan so lavi ek ti komet ladilter avek madam enn lot misie. Pa fini, pou esey kouver so pese, David inn fer touy sa madam-la so misie. (2 Samiel, sapit 11) Labib dir ki seki David “ti fer ti move devan lizie Zeova.”​—2 Samiel 11:27.

Zob, Lot, ek David toule trwa ti fer bann erer, ek sertin sa bann erer-la ti bien grav. Me, kouma nou pou trouve, zot ti anvi servi Bondie ek obeir Li avek tou zot leker. Zot ti dispoze pou montre ki zot ti regret seki zot ti’nn fer ek pou fer bann sanzman ki bizin. Alafin, zot ti regagn faver Bondie, ek Labib koz lor zot kouma bann zom fidel.

Lefe ki nou bann imin inparfe, nou pa pou kapav evit fer bann erer. (Romin 3:23) Me kan nou fer erer, nou bizin montre ki nou regrete ek apre fer tou pou koriz nou bann erer.

Kouma eski Zob, Lot, ek David ti esey koriz zot bann erer? Dan fon limem, Zob ti enn zom integ. Apre ki Bondie ti rezonn avek li, Zob ti  koriz so move fason panse ek ti regret seki li ti dir. (Zob 42:6) Lot so fason panse lor limoralite ki ti ena dan Sodom ek Gomor ti an-akor avek bann prinsip Bondie. Se lefe ki li pa ti azir vit dan sa moman-la ki ti enn problem. Me alafin, li ti sorti dan sa bann lavil ki Bondie ti’nn kondane la ek li’nn reisi sape kan Bondie ti amenn So zizman. Ek li ti osi obeir kan li pa ti get bann kitsoz ki li ti’nn kite deryer li. Mem si David ti fer enn erer bien grav kan li ti viol lalwa Bondie, li ti montre seki li ti ena vremem dan so leker kan li ti repanti sinserman ek kan li ti demann Bondie So mizerikord.​—Psom 51.

Fason ki Bondie ti azir anver sa bann zom-la montre bien ki Li rezonab anver bann imin inparfe. Bondie “bien kone kouma ti form nou; li kone ki nou sorti dan lapousier.” (Psom 103:14) Alor, si Bondie kone ki nou pa pou kapav evit fer bann erer, ki Li atann nou fer?

Konsey ki David ti donn so garson Salomon fer nou kone kouma nou kapav fer Bondie plezir. Li ti dir: “Twa, Salomon mo garson, konn Bondie to papa ek servi Li avek enn leker konple.” (1 Kronik 28:9) Ki ete enn leker konple? Se enn leker ki kontan Bondie ek ki determine pou konn So volonte ek fer seki Li demande. Se pa enn leker parfe, me se enn leker ki fer tou pou obeir Bondie ek ki dispoze pou gagn disiplinn ek fer bann sanzman. Parski zot ti kontan Bondie ek zot ti anvi obeir Li, Bondie ti konsider Zob kouma enn kikenn “san repros,” Lot kouma enn dimounn “drwat,” ek David kouma enn kikenn ki ti “fer zis seki drwat.” Mem si zot ti fer bann erer, zot inn reisi fer Bondie plezir.

Alor si nou’nn ena bann move panse ki nou pa ti anvi ena, si nou’nn dir enn kitsoz ki nou regrete, ouswa si nou’nn fer enn kitsoz ki apre nou trouve pa bon, anou pran kouraz ar lexanp sa bann zom-la. Bondie kone ki azordi nou pa kapav fer bann kitsoz dan enn fason parfe. Selman, Li atann ki nou kontan Li ek ki nou fer zefor pou obeir Li. Si nou ena enn leker konple koumsa, nou kapav sir ki nou’si nou pou reisi fer Bondie plezir.